Inuunermi siunertaqarluartumik anguniagaqarit

„Anersaartortut tamarmik [Jehova] unnersiutigissavaat!“ — TUSSIAAT 150:6.

1. Angutip inuusuttup inuunerup siunertaanik ujartuinera oqaluttuariuk.

„NAKORSASSATUT ilinniarpunga inuunera allanik ikiuinermut atorusukkakku. Aamma takorloorpara nakorsatut ataqqisaanera akissarsiakkaaneralu pillualissutigissallugit,“ Seung Jin, Koreami peroriartorsimasoq, taama oqaluttuarpoq. * „Paasigakkuli nakorsap ikiuiniarluni iliuuserisinnaasai qanoq annikitsigisut pakatsivunga. Taava eqqumiitsuliornermik ilinnialerpunga, eqqumiitsuliakkali allanut iluaqutaavallaanngillat, taamaammallu namminissarsiortutut misigaanga. Taava ilinniartitsisunngorpunga, sivitsunngitsorli paasivara ingerlateqqissinnaasatuakka tassaasut ilisimasassat, tassaanatik siunnersuutit piviusumik pillualersitsisinnaasut.“ Inuppassuit allat pinerattulli Seung Jin inuunerup siunertaanik ujartuivoq.

2. (a) Inuunerup siunertaanik ilisimanninneq qanoq paasisariaqarpa? (b) Qanoq ililluta nalunngilarput Pinngortitsisoq uagut nunarsuarmut pisikkamitigut siunertaqartoq?

² Inuunerup siunertavianik ilisimanninneq tassaavoq inuunissamut pissutissaqarneq, tassa aalajangersimasumik anguniagaqarneq tamannalu anguniarlugu tamaviaarneq. Inuilli inuunerat taamatut siunertaqalersinnaava? Aap! Eqqarsarsinnaassusilerneqarsimanerput, nalunngeqatiginnissutilerneqarsimanerput tunngavilersuisinnaassusilerneqarsimanerpullu Pinngortitsisup nunarsuarmut maanga pisikkamisigut pingaarutilimmik siunertaqarsimaneranut takussutissaapput. Taamaattumik paasinarpoq Pinngortitsisup piumasaa siunertaalu naapertorlugit inuunikkut taamaallaat inuunerup siunertaa paasisinnaallugulu naammassisinnaagipput.

3. Guutip inunnut siunertaanut ilaasut suuppat?

³ Biibilimi ersersinneqarpoq Guutip uagutsinnut siunertaanut ilaasut arlaliusut. Assersuutigalugu tupinnangaartumik pinngortinneqarsimanerput Guutip namminissarsiorani asanninneranut takussutissaavoq nuannersoq. (Tussiaat 40:6; 139:14) Taamaattumik Guutip siunertaa naapertorlugu inuunermut ilaavoq namminissarsiorani allanik asanninneq, soorlu Guuti taamaaliortoq. (1 Johannesi 4:7-11) Aamma Guutip peqqussutaanut, taassuma siunertaa asanninneranut ersiutaasoq naapertorlugu inuunissamut iluaqutigisartakkatsinnut, naalanneruvoq. — Oqaluussisartup oqaasii 12:13; 1 Johannesi 5:3.

4. (a) Siunertaqarluartumik inuusinnaajumalluta suut pisariaqartippavut? (b)  Inuunitsinni anguniagarisinnaasatta suna nersornarnerpaartaraat?

 ⁴ Aamma Guutip siunertaraa inuit pinngortitarsuarmiittut allat peqatigalugit pilluarlutik eqqisseqatigiillutillu inuussasut. (1 Mosesi 1:26; 2:15) Nuannaarumallutali, toqqissisimajumalluta, qamuunalu eqqissisimajumalluta suut pisariaqartippavut? Soorlu meeqqap nuannaarlunilu toqqissisimasinnaajumalluni angajoqqaami najuunnerata maluginissaa pisariaqartikkaa, taamatuttaaq uagut inuunerup siunertavia paasisinnaajumallugu Ataatatsinnut qilammiusumut attaveqarluarnissarput pisariaqartipparput. (Hebræerit 12:9) Guutip imminut taamatut attaveqalernissarput ajornarunnaarsippaa imminut palligussinnaatilluta qinnutivullu tusarnaartarlugit. (Jaaku 4:8; 1 Johannesi 5:14, 15) Uppernikkut taassumunngalu ikinngutaanikkut ’Guuti saqeqatigigutsigu’ Ataatarput qilammiusoq nuannaartillugulu unnersiutigisinnaavarput. (1 Mosesi 6:9, NV; Ussatit 23:15, 16; Jaaku 2:23) Tamanna tassaavoq inuit inuunerminni anguniagarisinnaasaasa nersornarnerpaartaat. Tussiaasiortoq ima allappoq: „Anersaartortut tamarmik [Jehova] unnersiutigissavaat!“ — Tussiaat 150:6.

Inuunermi illit suna anguniagaraajuk?

5. Sooq pigisanik salliutitsineq silatusaarnerunngila?

⁵ Imminut paarilluarnissarput ilaquttatsinnillu isumassuinissarput Guutip uagutsinnut siunertaata ilagaa. Tamatumunnga ilaavoq uagut nammineq ilaquttattalu timikkut anersaakkullu pisariaqartitaannik isumaginninneq. Oqimaaqatigiissaariuarnissarli pisariaqarpoq ulluinnarni suliassat suliassanit anersaakkut ittunit pingaaruteqarnerusunit pingaaruteqarnerusutut isigilinnginniassagatsigit. (Matthæusi 4:4; 6:33) Ajoraluartumik inuppassuit pigisanik katersuineq kisiat aalluttarpaat. Piviusorsiornerunngilarli isumaqassalluni pigisaqarnerulernikkut pisariaqartitanik tamanik matussusiisoqarsinnaasoq. Qanittukkut Asiami millionærinik apersuilluni misissuinermi qulaarneqarpoq taakkua ilarpassui „toqqissisimanatillu ernumasut, uffa massa pisuussutitik pissutigalugit innuttaaqatigiinni qaffasissumik inissisimaffeqaraluarlutik naammassisaqarsimasutullu misigisimagaluarlutik“. — Oqaluussisartup oqaasii 5:10.

6. Pisuunngorniarneq eqqarsaatigalugu Jiisusi qanoq siunnersuuteqarpa?

⁶ Jiisusip eqqartorpaa ’pisuussutit nakutitsisarnerat’. (Markusi 4:19) Pisuussutit qanoq nakutitsisaramik? Inunnik isumaqalersitsisarput pigisat pillualissutaasinnaasut. Kunngi Salomo silatooq ima allappoq: „Aningaasanik nuannarisaqartoq naammatsiffeqanngilaq.“ (Oqaluussisartup oqaasii 5:9, The New English Bible) Pigisanilli noqqaassuteqaatigaluni uummatikkut iluunngarluni Guutimut kiffartortoqarsinnaagami? Naamik, taamaattoqarsinnaanngilaq. Jiisusi ima oqarpoq: „Naalakkanut marlunnut kiffartorsinnaasoqanngilaq. Aappaa uumigiguniuk aappaa asassavaa, aappaa tulaavigiguniuk aappaa asiginnassavaa. Guutilu Mammonilu [Pisuussutillu, NV] tamaasa kiffartorfigisinnaanngilasi.“ Jiisusip ajoqersukkani kajumissaarpai nunami pisuussutinik katersinnginnissamik, qilammili pisuussutinik katersinissaannik, tassa imaappoq Guutimit, ’suliluunniit qinnuiginngikkitsinni pisariaqakkatsinnik ilisimannittumit’, tusaamasaalluarnissaannik. — Matthæusi 6:8, 19-25.

7. Qanoq ililluta „inuunivik“ tigulluartitaarsinnaavarput?

⁷ Apustilip Paulusip tamatumunnga tunngatillugu suleqatini Timotheusi taassumunnga allakkamini toqqaannartorujussuarmik siunnersorpaa. Ima allappoq: „Silarsuarmi matumani pisuut peqqusiffigissavatit . . . pisuussutitilluunniit allanngujasut isumalluutigeqqunagit, isumalluutigeqqulluguli Guuti pisariaqakkatsinnik naammattunik tunniussisoq. . . . Ajunngitsulioqqullugit ajunngitsulianillu pisuussuteqaqqullugit, tukkusuujoqqullugit inoqatiminnullu tunniussisaqqullugit, katerseqqullugillu pisuussutinik siunissami toqqaviusinnaasunik ajunngitsunik inuunivik pigilersinnaaqqullugu [tigulluartitaarsinnaaqqullugu, NV].“ — 1 Timotheusi 6:17-19.

„Inuunivik“ suua?

8. (a) Sooq inuit ilarpassuisa pisuussutit ataqqineqarnissarlu noqqaassutigisarpaat? (b) Suna paasisimanngilaat?

⁸ Oqaaseq „inuunivik“ eqqaaneqaraangat inuit ilaasa piisaarluni inuuneq nuannaarniutillu eqqarsaatigisarpaat. Asiami atuagassiami nutaarsiassanut tunnganerusumi ima allassimavoq: „Inuit filmeraangamik imaluunniit tv-mik isiginnaaraangamik isiginnaakkatik pigerusulertarpaat, aamma  suut pisaarisinnaanerlugit takorluulertarpaat.“ Inuit ilarpassuisa pisuussuteqalernissaq qaffasissumillu inissisimaffeqalernissaq inuunerminni anguniagarilertarpaat. Tamakkuninnga noqqaassutiginninnerminni inuusunnertik, peqqissusertik, ilaqutariittut inuunertik anersaakkullu nalillit pilliutigisarpaat. Ikittuinnaat unikaallattarput eqqarsaatigalugulu piisaarluni inuuneq nuannaarniutillu filmini tv-kkullu takutinneqartartut ’silarsuup anersaavanik’ — eqqarsartaatsimik silarsuarmi nalinginnaasumik nunarsuullu inuisa milliardillit amerlanerpaartaannut sunniuteqartumik taakkuninngalu Guutip uagutsinnut siunertaanut akerliusumik iliuuseqartitsisartumik — ersersitsiinnartartut. (1 Korinthimiut 2:12; Efesosimiut 2:2) Tupinnanngilaq ullumikkut inuit pilluaatsut amerlaqimmata! — Ussatit 18:11; 23:4, 5.

9. Inuit qanoq iliorsinnaanngisaannassappat, aamma sooq?

⁹ Taavami inuit namminissarsioratik allanik ikiuiniarlutik ilungersortut aamma kaannermik, nappaatinik naapertuilluannginnermillu nungutitsiniarlutik akiuuttut? Imminut pilliutigeriaannaallutik iliuuseqarnerat nersornartoq inuppassuarnut iluaqutaasarpoq. Ilumoorlutilli ilungersoraluarlutik pissutsit aaqqissuussaanerat manna naapertuilluarfiusunngortissinnaanagulu pilluarfiusunngortissinnaanngisaannassavaat. Sooq? ’Silarsuaq tamarmi Ajortumut [Saatanimut] naalatsigitimmat’, taassumalu kissaatiginngilaa silarsuaq allanngortinneqassasoq. — 1 Johannesi 5:19.

10. Aalajaallutik Guutimut kiffartortut „inuunivik“ qaqugu nuannaarutigisinnaassavaat?

¹⁰ Qanoq alianartigissagaluarpa pitsaanerusumik neriuutissaqarnata silarsuaq maanna atuuttoq neriuutissatuarisuugutsigu! Paulusi ima allappoq: „Inuunermi matumaniinnaq Kristusi neriuffigigutsigu inunnit tamanit naakkinarnerpaassaagut.“ Inuit isumaqartut inuuneq manna taannaannaasoq una oqaasinnaaraat: „Nerillutalu erngutiinnarniarta, aqagu toqussagatta.“ (1 Korinthimiut 15:19, 32) Siunissaqarporli, Guutimmi „neriorsuutaa naapertorlugu ilimagisaraavut qilaat nutaat nunalu nutaaq iluassutsip najugarisassai“. (2 Petrusi 3:13) Taamanikkussamut kristumiut nuannaarutigisinnaassavaat „inuunivik“, tassa imaappoq naammalluinnartuulluni „inuuneq naassaanngitsoq“, qilammi imaluunniit Guutip naalagaaffiata asannittumik aqutsinerani innuttaalluni. — 1 Timotheusi 6:12.

11. Sooq Guutip naalagaaffiata soqutigisaanik siuarsaaniarluni iliuuseqarneq inuunermik siunertaqalersitsisarpa?

¹¹ Guutip naalagaaffia kisimi inuiaat ajornartorsiutaannik  aaqqiilluinnarsinnaavoq. Taamaattumik Guutip naalagaaffiata soqutigisaanik siuarsaaniarluni iliuuseqarneq suliarineqarsinnaasunit tamanit siunertaqarluarnerpaavoq. (Johannesi 4:34) Suliaq tamanna ulapputigigutsigu Ataatatsinnut qilammiusumut erlinnartumik attaveqarnerput nuannaarutigisinnaavarput. Aamma anersaakkut qatanngutitsinnik millionilinnik, inuunermi uagutsitut anguniagaqartunik, kiffartoqateqarnerput nuannaarutigaarput.

Eqqortunik pilliuteqarit

12. Pissutsit aaqqissuussaaneranni matumani inuunerup ’inuuniviullu’ suna assigiinngissutigaat?

¹² Biibilimi allassimavoq silarsuaq manna ’piumatussusialu nungussasut’. Saatanip silarsuaanut ilaasut tamarmik, aamma tusaamasaaneq pisuussutillu, atanavianngillat, „Guutilli piumasaanik iliortoq naassaanngitsumik atassaaq“. (1 Johannesi 2:15-17) Pissutsit aaqqissuussaaneranni matumani pisuussutinit allanngujasunit, sivikitsumik ataqqisaanermit qallikkuinnarlu nuannaarnermit allaanerulluinnarluni „inuunivik“ — Guutip naalagaaffiata aqutsinerani inuuneq naassaanngitsoq — ataavartuuvoq pilliuteqarfigissallugu imminut akilersinnaasoq, eqqortunik pilliuteqarutta.

13. Aappariit qanoq ilillutik eqqortunik pilliuteqarsimappat?

¹³ Henry Suzannelu qanoq pisimanersut misissoriartigu. Taakkua Guutip inuunerminni naalagaaffimminik pingaarnerpaatitsisunik tamanik ikiuiumaarnerminik neriorsuutaa upperilluinnarpaat. (Matthæusi 6:33) Taamaattumik aalajangerput akisunngitsumi najugaqarniarlutik arlartik kisimi sulisinnaaniassammat, panitillu marluk peqatigalugit sammisassat anersaakkut ittut piffissaqarfiginerusinnaajumallugit. (Hebræerit 13:15, 16) Ikinngutaasup taakkua aalajangernerat paasisinnaanngilaa ajunngitsumillu isumaqarluni Suzanne ima oqarfigalugu: „Suzanne, qaqugumulluunniit pitsaanerusumi najugaqalerukkussi arlaannik pilliuteqartariaqarpusi.“ Henrylli Suzannellu nalunngilaat Jehovamik salliutitsineq „inuunermut matumunnga piumaartussamullu immini [neriorsuutitaqartoq]“. (1 Timotheusi 4:8; Titusi 2:12) Taakkua panii peroramik piffissaq tamaat oqaluussisartunngorput aallussilluartut. Ilaqutariinniittut tamarmik misiginngillat arlaannik pinngitsuugaqarsimallutik; ’inuunivimmilli’ angusinissamik pingaarnerpaatitsinertik iluaqutigingaarpaat. — Filippimiut 3:8; 1 Timotheusi 6:6-8.

’Silarsuaq tamakkiisumik atoqinagu’

14. Inuunerup siunertavia puiorutsigu alianartumik qanoq kinguneqarsinnaava?

¹⁴ Assut navianartorsiussaagut inuunerup siunertavia puiorutsigu ’inuunivillu’ iperarutsigu. Tassami ’inuunermi eqqasuutinit pisuussutinillu inuulluaatinillu ipititaaratarsinnaavugut’. (Lukasi 8:14) „Inuussutissaqarnissamik isumakuluuteqarneq“ aqunneqarsinnaanngitsumillu nunap piinik piumatussuseqarneq pissutsit aaqqissuussaaneranni matumani akuliusimavallaalernermik kinguneqarsinnaavoq. (Lukasi 21:34, Ny Verden Oversættelsen-imi quppernerup ataani ilanngussaq) Ajoraluartumik inuit ilaasa ullutsinni aningaasarnersuaq tiguartiffigisimavaat ’uppernerminnillu tunussisitaallutik taamalu imminnut amerlasuunik erloqissutissiorlutik’. Taakkua naggataatigut allaat Jehovamut erlinnartumik attaveqarunnaarsimapput. ’Inuunermik naassaanngitsumik tigulluartitaariuarunnaarneq’ (NV) akisoorujussuuvoq! — 1 Timotheusi 6:9, 10, 12; Ussatit 28:20.

15. Ilaqutariit ’silarsuarmik tamakkiisumik atuiniarnatik’ aalajangernertik qanoq iluaqutigaat?

¹⁵ Paulusip „silarsuarmik atuisut“ siunnersorpai ’tamakkiisumik atueqqunagit’. (1 Korinthimiut 7:31, NV) Siunnersuut tamanna Keithip Bonniellu malippaat. Keith ima oqaluttuarpoq: „Kigutilerisut højskoleanni ilinniarnera naammassingajalerlugu Jehovamut nalunaajaasunngorpunga. Aalajangigassaqarpunga. Sullitarpassuaqarsinnaavunga aningaasarsiorluarlungalu, taamaaliorumali tamanna anersaakkut inuuninnut akornutaassaaq. Aalajangerpunga sullitama amerlassusiat killilerniarlugu ilaquttakka piffissaqarfiginerusinnaajumallugit, anersaakkut misigissutsikkullu ajunnginniassammata. Piffissap ingerlanerani tallimanik paneqalerpugut. Aningaasaativut qaqutigut sinneqartarput, atorluaanerli ilikkarparput, amigaateqanngisaannarpugullu. Ilaqutariittut qanittuararsuuvugut nuannaaqalutalu. Naggataatigut tamatta piffissaq tamaat kiffartulerpugut. Maanna panivut aappatillu pilluarlutik inuupput, panittalu ilaat pingasut namminneq meeraqarput. Aamma ilaqutaat nuannaarlutillu pilluarput Jehovap piumasaanik siunertaanillu inuunerminni salliutitsiuaramik.“

 Guutip piumasaa siunertaalu inuuninni salliutikkit

16, 17. Inuit pikkorissut kikkut Biibilimi eqqaaneqarpat, taakkualu suut eqqaamaneqaatigaat?

¹⁶ Biibilimi oqaluttuaqarpoq inuit Guutip siunertaanut naapertuuttumik inuusut aamma taamatut inuunngitsut pillugit. Inuit qanorluunniit atugallit ukiullillu aamma nunanit kulturinillu tamaneersut oqaluttuat taama ittut ilinniarfigisinnaavaat. (Romamiut 15:4; 1 Korinthimiut 10:6, 11) Nimrodi illoqarfissualiortiterpoq, taamaaliorporli ’Jehovamik akerlilersuilluni’. (1 Mosesi 10:8, 9, NV) Allarpassuilli maligassiuilluarsimapput. Assersuutigalugu Mosesip Egyptenimiut kunngikkormiuini inissisimaffeqaannarnissani anguniagarinngilaa. Immikkut pisinnaatitaaffini anersaakkut ittut ’pisuussutitut Egyptenip erlinnartuutaanit annerusutut’ isigai. (Hebræerit 11:26) Nakorsap Lukasip Paulusi allallu napparsimagaangata ikiortarsimagunarpai. Lukasilli allat iluaqutissaannut iliuuserisimasaasa annerpaartaat tassaapput oqaluussisartutut Biibilimillu allattutut suliai. Aamma Paulusi inatsisinik ilisimasutut ilisimaneqarnani, ajoqersuiartortitatulli, „Guutimik nalusunut apustiliusutut“, ilisimaneqarpoq. — Romamiut 11:13.

¹⁷ Daavi sakkutuut naalagaattut imaluunniit nipilersortartutut erinniortutullu eqqaamaneqaraluarluni ’angutitut [Guutip] uummataata iluarisaatut’ eqqaamaneqarneruvoq. (1 Samueli 13:14) Aamma Danielip Babylonimi naalagaaffimmi atorfilittut sulinini ilisimaneqaatiginngilaa, Jehovalli pruffiitiatut ilumoorfiginnittutut kiffartornini ilisimaneqaatigaa; Esteri Persiami dronningitut ilisimaneqarnani sapiinnermigulli uppernermigullu maligassatut ilisimaneqarpoq; Petrusi, Andreasi, Jaaku Johannesilu aalisallaqqissutut ilisimaneqarnatik Jiisusip apustiliisut ilisimaneqarput. Kiisalu Jiisusi ’sanasutut’ eqqarsaatiginagu ’Kristusitut’ eqqarsaatigisarparput. (Markusi 6:3; Matthæusi 16:16) Inuit taakkua tamarmik paasilluarpaat qanorluunniit piginnaaneqaraluarunik, sunilluunniit peqaraluarunik qanorluunniillu inissisimaffeqaraluarunik suliffitsik inuunerminni pingaarnerpaajunani, Guutimulli kiffartornertik pingaarnerpaajusariaqartoq. Nalunngilaat Guutimik mianerinnittuunissaq inuunerminni anguniagarisinnaasamik nersornarnerpaartaralugulu pisuunnguallannarnerpaartarigaat.

18. Kristumiu inuusuttoq inuunini qanoq atorniarlugu aalajangerpa, sunalu paasivaa?

¹⁸ Seung Jinittaaq, allaaserisap matuma aallaqqaataani eqqaaneqartup, tamanna paasilerpaa. Ima oqaluttuarpoq: „Nukikka tamaasa nakorsatut sulinermut, eqqumiitsuliornermut meeqqallu atuarfianni ilinniartitsinermut atornagit aalajangerpunga inuunera Guutimut tunniulluinnarninnut naapertuuttumik atorniarlugu. Maanna Biibili pillugu ilinniartitsisinnaasunik assut pisariaqartitsiffiusumi kiffartorpunga inuillu aqqutikkut inuunermut naassaanngitsumut sammisukkuulernissaannut ikiorlugit. Siornatigut takorloortarpara piffissaq tamaat kiffartorneq uannut pissanganarpiarnavianngitsoq. Maannali inuttut pissutsinnik pitsanngorsaaniartillunga inunnillu assigiinngitsunik kulturilinnik ilinniartitsillaqqinnerulerniartillunga inuunera aatsaat taama pissanganartoqartigilerpoq. Paasivara inuunermik siunertaqarlualersitsisutuaq tassaasoq Jehovap piumasaanik siunertaanillu inuunermi pingaarnerpaanngortitsineq.“

19. Inuunerup siunertavia qanoq ililluta paasisinnaavarput?

¹⁹ Kristumiuugatta inuunermik annaassissutaasumik ilisimasaqalersimanerput annaanneqarnissamillu neriuuteqalersimanerput nuannaarutigisinnaavarput. (Johannesi 17:3) Taamaattumik pingaaruteqarpoq ’Guutip saammaanneranik pissarsiatsinnik maangaannartitsinnginnissarput’. (2 Korinthimiut 6:1) Ullut ukiullu inuuffigisavut erlinnartut Jehovamik unnersiutiginninnermut atortariaqarpavut ilisimasallu piviusumik nuannaalersitsillutillu pillualersitsisut inuunermullu naassaanngitsumut sammisut siaruarterlugit. Taamaaliorutta Jiisusip oqaasiisa ukua ilumuussusiat misigissavarput: „Tunisineq pilluarnarneruvoq tigusinermit.“ (Apustilit Suliaat 20:35) Aamma inuunerup siunertavia paasisimassavarput!

[Quppernerup ataani ilanngussaq]

Uku nassuiarsinnaavigit?

• Inuunermi anguniagarisinnaasatta nersornarnerpaartaat suua?

• Sooq pigisat kisiisa pillugit inuunissaq silatusaarnerunngila?

• „Inuunivik“ Guutip neriorsuutigisaa suugami?

• Inuunerput qanoq ililluta Guutip piumasaanut siunertaanullu naapertuuttumik atorsinnaavarput?

[Atuaqqissaarnermi apeqqutit]

[Qupp. 5-mi assiliartaq]

Kristumiut eqqortunik pilliuteqartariaqarput