Nalunngeqatiginnissutit qanoq periarfigisarpiuk?

„Minguitsumut suut tamarmik minguitsuupput, mingussimasunulli [mingutsinneqarsimasunulli, NV] uppinngitsunullu minguitsoqanngilaq.“ — TITUSI 1:15.

1. Paulusi ilagiit Kretamiittut ikiorniarlugit qanoq iliorpa?

APUSTILI Paulusi pingajussaanik ajoqersuiartortitatut angalareerluni tigusarineqarpoq naggataatigullu Romaliartinneqarluni, tassanilu ukiuni marlunni tigusaaqqavoq. Iperagaanermi kingorna suleriva? Ilaanni Kretamut tikeraarpoq Titusi ilagalugu, kingusinnerusukkullu taanna ima allaffigaa: „Kretami uninngaannaqqugakkit pissutigaara aaqqissuutassat ilaat suli naammassineqanngitsut naammasseqqullugit, aammalu . . . utoqqaanertassanik ivertissueqqullutit.“ (Titusi 1:5) Titusip suliassaq tamanna suliarisinnaajumallugu inuit assigiinngitsut nalunngeqatiginnissutaasa sunniuteqarnerata assigiinngissuteqarsinnaanerat eqqarsaatigisariaqarpaa.

2. Ajornartorsiut suna Titusip Kretami isumagisussanngorpaa?

² Paulusip Titusi utoqqaanertat ilagiinniittut sunik piukkunnaateqartussaanerat pillugu unnersuuppaa ’amerlaqisunillu piunngitsunik oqaasilinnik peqquserluttunillu naalasseriitsoqarnera’ uparuarlugu. Paulusi taakku pillugit allappoq ’ajoqersuinerlunnerminnik siaruarterinermikkut ilaqutariit tamakkerlugit mumitittaraat’. Titusip taakkua ’naqqissortussaavai’. (Titusi 1:10-14; 1 Timotheusi 4:7) Paulusi allappoq taakkua isumaat nalunngeqatiginnissutaallu ’mingutsinneqarsimasut’, oqaaserlu taanna atugaa ippatsinneqarsimasumik isumaqarpoq, soorlu atisaq kusanartoq simeraangat. (Titusi 1:15, NV) Angutit taakkua ilaat juutisut tunuliaqutaqarsimasinnaapput, taakkuami pillugit allassimagami „kipineqarnermik aalajangiusimannittut“ (NV). Ullumikkut ilagiit angutinit taamatut isumalinnit akornusersorneqanngillat; taamaakkaluartorli Paulusip Titusimut siunnersuutai nalunngeqatiginnissut pillugu ilinniarfigilluarsinnaavavut.

Mingutsinneqarsimasumik nalunngeqatiginnissutillit

3. Paulusip nalunngeqatiginnissut pillugu Titusi qanoq allaffigaa?

³ Maluginiariaruk sumut tunngatillugu Paulusip nalunngeqatiginnissut eqqaaneraa. „Minguitsumut suut tamarmik minguitsuupput, mingussimasunulli [mingutsinneqarsimasunulli, NV] uppinngitsunullu minguitsoqanngilaq; taakkunani siuneqassuseq nalunngeqatiginnissuserlu minguttuupput [taakkuali isumaat nalunngeqatiginnissutaallu mingutsinneqarsimapput, NV]. Nassuerutigisarpaat Guuti ilisimallugu, uffali suliamikkut miserratigalugu.“ Erseqqippoq taamanikkut inuit ilaat allannguisariaqartut ’uppernerminni peqqissuuleqqullutik’. (Titusi 1:13, 15, 16) Suut minguitsuunerannik suullu minguttuunerannik naliliiniarneq ajornartorsiutigaat, tamannalu nalunngeqatiginnissutaannut attuumassuteqarpoq.

4, 5. Ilagiinniittut ilaasa suna ajoqutigaat, tamannalu taakkununnga qanoq sunniuteqarpa?

⁴ Ukiut qulit sinnerlugit tamatuma siorna siulersuisoqatigiit isummersimapput kipineqarneq Guutimik pallorfiginnittunut ilumoortunut piumasaqaataajunnaassasoq, tamannalu pillugu ilagiit paasitippaat. (Apustilit Suliaat 15:1, 2, 19-29) Taamaakkaluartorli Kretamiittut ilaasa ’kipineqarneq aalajangiusimajuarpaat’. Erseqqissumik  takutippaat siulersuisoqatigiit isumaqatiginagit ’ajoqersuinerlullutillu’. (Titusi 1:10, 11) Mumingasumik eqqarsartaaseqarnertik pissutigalugu immaqa nerisassanut ileqqulersuutitullu minguiartarnermut tunngatillugu Inatsisini aalajangersakkat maleruarneqartarnissaannik illersuisimapput. Juutit oqaluttuatoqaannik inuillu oqaluttuarsiaannik siaruarterinermik saniatigut immaqa allaat Inatsisini allassimasunut ilanngussisarsimapput, soorluttaaq isumaqatitik Jiisusip nalaani inuusut taamaaliortarsimasut. — Markusi 7:2, 3, 5, 15; 1 Timotheusi 4:3.

⁵ Taamatut eqqarsartaaseqarnerat naliliilluarsinnaanerannut ileqqussatigullu sianissusiannut, tassa nalunngeqatiginnissutaannut, ajortumik sunniuteqarpoq. Paulusi ima allappoq: „Mingussimasunut [Mingutsinneqarsimasunut, NV] uppinngitsunullu minguitsoqanngilaq.“ Taakkua nalunngeqatiginnissutaat ima mumingalersimatigaaq iliuusissaminnut aalajangigassaminnullu siunnersortitut tatiginarunnaarluni. Aammattaaq kristumiut allat nammineq aalajangigassanut tunngatillugu aalajangigaat pillugit eqqartuuttarpaat, kristumiu alla allamik aalajangiisoq alla allamik aalajangiisinnaagaluaraangalluunniit. Tamatumunnga tunngatillugu Kretamiut taakkua minguttuujunngikkaluartut minguttuutut isigaat. (Romamiut 14:17; Kolossemiut 2:16) Guuti ilisarisimanerartarpaat, suliamikkulli akerlerluinnaanik ersersitsipput. — Titusi 1:16.

’Minguitsunut minguitsut’

6. Eqimattat marluk Paulusip eqqaasai qanoq ittuuppat?

⁶ Paulusip Titusimut allagai qanoq iluaqutigisinnaavavut? Oqaasiini ukunani assigiinngissut maluginiariaruk: „Minguitsumut suut tamarmik minguitsuupput, mingussimasunulli [mingutsinneqarsimasunulli, NV] uppinngitsunullu minguitsoqanngilaq; taakkunani siuneqassuseq nalunngeqatiginnissuserlu minguttuupput [taakkuali isumaat nalunngeqatiginnissutaallu mingutsinneqarsimapput, NV].“ (Titusi 1:15) Paulusip oqaatigisaa tassaanngilluinnarpoq kristumiumut ileqqussatigut minguitsumut suut tamarluinnarmik minguitsuullutillu inerteqqutaanngitsut. Taamaannera qularisariaqanngilarput, allakkamimi allami Paulusip erseqqissarpaa kinguaassiuutitigut inuunerluttut, guutipilussiortut anersaalerisut ilaallu ilanngullugit ’Guutip naalagaaffia kingornussarsiarissanngikkaat’. (Galatiamiut 5:19-21) Taamaattumik isummertariaqarpugut Paulusip eqimattanut marlunnut, tassa ileqqussatigut anersaakkullu minguitsunut minguitsuunngitsunullu, tunngatillugu ilumoortoq pingaarnerusutigut atuuttoq saqqummiukkaa.

7. Hebræerinut allakkani 13:4-mi suna inerteqqutigineqarpa, apeqqullu suna pilersinnaava?

⁷ Kristumiup eqqortuliorusuttup ingalassimaniagassai tassaaginnanngillat Biibilimi inerteqqutigineqartut aalajangersimasut. Assersuutigeriartigit oqaatsit toqqaannartut ukua: „Aappariinneq tamanit ataqqineqassaaq, aappariillu siniffiat minguitsuussaaq. Guutimmi eqqartuukkumaarpai kinguaassiuutitigut inuunerluttut allasiortullu.“ (Hebræerit 13:4) Inuit kristumiuunngitsut Biibililu pillugu ilisimasaqanngitsut allaat versi taanna atuareerlugu tassani allasiornerup inerteqqutigineqarnera ingerlaannaq isummiutissagaluarpaat. Allassimaffimmi matumani allanilu erseqqippoq Guutip assuarigaa angutip arnalluunniit inatsisinut naapertuuttumik aapparinngisaminut kinguaassiuutitigut atoqateqarnera. Taavami inuit katissimanngitsut qanikkut atoqatigiittut? Inuusuttuararpassuit taamaaliorneq ajoqutaanngilluinnarnerartarpaat nalinginnaasumik atoqatigiinneq pineqanngimmat. Kristumiulli qanikkut atoqatigiinneq minguitsutut isigisinnaavaa?

8. Kristumiut ilumoortut qanikkut atoqatigiinnermut isiginnittaasertik inuppassuarnit silamiunit qanoq allaassutigaat?

 ⁸ Hebræerinut allakkani 13:4-mi Korinthimiunullu allakkani siullerni 6:9-mi erseqqissarneqarpoq Guutip allasiorneq kinguaassiuutitigullu inuunerlunneq (grækerisut: pornei’a) assuarigai. Kinguaassiuutitigut inuunerlunnermut suut ilaappat? Oqaatsimi grækerisuumi pineqarpoq pissusissamisoortumik kanngunartumilluunniit siunertaqarluni pissusissamisuunngitsumik kinguaassiuutinik atuineq. Tamatumunnga ilaapput aappariinnerup Biibilimut naapertuuttup avataatigut aamma katissimanani kinguaassiuutitigut atoqatigeeriaatsit tamarmik inerteqqutaasut. Taamaattumik tamatumunnga ilaavortaaq qanikkut atoqatigiinneq, naak silarsuup ilarujussuani inuusuttuararpassuit oqaluttuunneqarsimagaluartut imaluunniit namminneq isummersimagaluartut qanikkut atoqatigiinneq akuerineqarsinnaasoq. Kristumiut ilumoortut eqqarsartaasertik iliuutsitilluunniit ’piunngitsunik oqaasilinnit peqquserluttunillu’ siulersorneqartinneq ajorpaat. (Titusi 1:10) Najoqqutassiaq qutsissoq Allakkani Illernartuni allassimasoq najoqqutaraat. Qanikkut atoqatigiinnissamut utoqqatsissutissarsiorniarsarinngillat, paasigamikku Biibili naapertorlugu tassaasoq kinguaassiuutitigut inuunerlunneq, pornei’a, tamannalu malillugu nalunngeqatiginnissutertik ilinniartittarpaat. * — Apustilit Suliaat 21:25; 1 Korinthimiut 6:18; Efesosimiut 5:3.

Paasinnittaatsit assigiinngitsut, aalajangikkat assigiinngitsut

9. ’Suut tamarmik minguitsuuppata’, taava nalunngeqatiginnissut qanoq pingaaruteqarpa?

⁹ Taavami Paulusip suna pivaa oqarami ’minguitsumut suut tamarmik minguitsuusut’? Paulusip kristumiut eqqarsartaatsiminnik ileqqussatigullu sianissutsiminnik Guutip najoqqutassiaanut, oqaasiani isumassarsiarititaasumiittunut, naapertuutsitsilersimasut pivai. Kristumiut taama ittut toqqaannartumik inerteqqutaanngitsunut tunngasorpassuit eqqarsaatigalugit kristumiut akornanni assigiinngitsoqarsinnaanera akueraat. Eqqartuusseqqajaanatik Guutip assuarinngisai ’minguitsutut’ isigaat. Naatsorsuutiginngilaat kikkut tamarmik immisorluinnaq eqqarsassasut apeqqutinut Biibilimi sukumiisumik siunnersuuteqarfigineqanngitsunut tunngatillugu. Assersuuteqariarta.

10. Katittorsiorneq (imaluunniit ilisineq) qanoq ililluni unamminiarnartunngorsinnaava?

¹⁰ Ilaqutariippassuarni aappariit aappaa kisimi kristumiunngorsimasarpoq, aappaa kristumiuunani. (1 Petrusi 3:1; 4:3) Tamanna pissutigalugu kristumiuusoq assigiinngitsunik unamminiagassaqalersinnaavoq, assersuutigalugu ilaqutariinni katittoqaraangat ilisisoqaraangalluunniit. Takorlooriaruk nuliaasoq kristumiu allamik upperisalimmik uilik. Uiusup ilaqutaasa ilaat katilerpoq, pissiariillu kristumiuunerartut oqaluffianni katitinneqassapput. (Imaluunniit imaassinnaavoq ilaqutaasoq, immaqa angajoqqaat arlaat, toqusoq, ilisinerlu oqaluffimmi pissasoq). Aappariit qaaqquneqarput, uiusullu kissaatigaa nuliani ilaassasoq. Nuliaasup nalunngeqatiginnissutini pissutigalugu peqataanissaq qanoq isigissavaa? Qanoq pissava? Periarfissat marluk ukua takorlooriakkit.

11. Nuliaasup kristumiup oqaluffimmi katittunut najuutissanerluni najuutissannginnerluniluunniit qanoq ililluni paasisinnaaneraa oqaluttuariuk, isummiussaalu eqqaajuk.

¹¹ Louisap ’Babylonersuaq’, upperisarsiornerup eqqunngitsup silarsuarmi tamarmi naalagaaffissua, ’qimallugu aninissamik’ peqqussut Biibilimiittoq eqqarsaatigeqqissaarpaa. (Saqqummersitat 18:2, 4) Taassuma oqaluffik katiffiusussaq ilaasortaaffiginikuuaa, nalunngilaalu katititsinerup nalaani najuuttut tamarmik upperisarsiornikkut attuumassuteqartunut, soorlu qinunermut, erinarsornermut upperisarsiornermulluunniit tunngatillugu ileqqulersornermut, peqataanissamik qinnuigineqassasut. Tamakkua peqataaffiginnginnissaat aalajangiusimalluinnarpaa, aamma najuunnissaniluunniit assuarnaakkunnaarnissaminullu tatineqarnissani kissaatiginngilaa. Louisap uini ataqqivaa suleqatigerusullugulu, tassami Biibili naapertorlugu taanna niaqoraa; kisianni aamma najoqqutassianut Biibilimiittunut akerliusumik iliornissani kissaatiginngilaa. (Apustilit Suliaat 5:29) Taamaattumik periaaserilluni uini nassuiaappaa najuunniaraluarpalluunniit nammineq najuussinnaanani. Eqqaasinnaavaa ilaaniaruni, arlaatigulli ileqqulersornermut peqataajumanani, peqqusiileqilersissinnaallugu, taamaattumillu uiminut immaqa pitsaanerussasoq najuutinngikkuni. Aalajangikkani pissutigalugu ilerasuuteqanngilaq.

12. Oqaluffimmi katittunut qaaqquneqarnermut tunngatillugu alla qanoq isumaliuteqarsinnaava, naggataatigullu suniarluni aalajangersinnaava?

¹² Ruthip nalornissutaa tamatumunnga assinguvoq.  Uini ataqqivaa, Guutimut ilumoorfiginnittuarnissani aalajangiusimallugu, nalunngeqatiginnissutimilu Biibili tunngavigalugu ilinniartinneqarsimasup tusarnaarnissaa eqqumaffigisarlugu. Ruthip Louisap eqqarsaatigisimasaasa assingi eqqarsaatigereerlugit „Spørgsmål fra læserne“-mi Vagttårnet 15. maaji 2002-moortumi * siunnersuutigineqartut qinunikkut isumaliutigai. Eqqaamavaa hebræerit pingasut guutipilussiorfiusussamiinnissamik peqqussummut naalattut, guutipilussioqataannginnermikkulli assuarnaattuartut. (Danieli 3:15-18) Uini ilaginiarlugu, upperisarsiornikkulli ileqqulersornermut peqataaniarnani, aalajangerpoq, nalunngeqatiginnissutinilu naapertorlugu iliorpoq. Periaaserilluni, erseqqissumilli, uini nassuiaappaa nalunngeqatiginnissutini pissutigalugu suut peqataaffigisinnaanerlugit, suullu peqataaffigisinnaannginnerlugit. Ruthi neriuppoq uimi upperisap ilumoortup ilumuunngitsullu assigiinngissutaat takusinnaalerumaaraa. — Apustilit Suliaat 24:16.

13. Kristumiut marluk assigiinngitsunik isummernerat sooq isumakulunnartariaqanngila?

¹³ Taava imaappa kristumiut marluk assigiinngitsunik isummermata qanoq aalajangerneq soqutaanngitsoq imaluunniit taakkua arlaata nalunngeqatiginnissutaa sanngiitsoq? Naagga. Louisa nipilersuutinut ileqqulersuutinullu oqaluffimmi atorneqartartunut tunngatillugu misilittakkani eqqarsaatigalugit immaqa misigivoq najuunnissani imminut immikkut navianaateqassasoq. Aamma imaassinnaavoq upperisarsiornermut tunngasut uinilu siornatigut oqaloqatigiissutiginikuusaat nalunngeqatiginnissutaanut sunniuteqartut. Taamaattumik qularutiginngilaa aalajangikkani imminut pitsaanerpaassasoq.

14. Nammineq aalajangigassanut tunngatillugu kristumiut suna eqqaamasariaqarpaat?

¹⁴ Ruthimmi aalajangigaa ajorpa? Allat tamanna oqaaseqarfigisinnaanngilaat. Upperisarsiornikkut ileqqulersornermut peqataaffiginianngisaminut najuunniarluni aalajangernera pillugu eqqartuuttussaanagulu isornartorsiortussaanngilaat. Nerisassanik aalajangersimasunik nerinissaq nerinnginnissarluunniit pillugu nammineq aalajangigassanut tunngatillugu Paulusip siunnersuutaa eqqaamajuk: „Nerisup asissunngikkiliuk nerinngitsoq, nerinngitsullu eqqartuutinngikkiliuk nerisoq . . . Naalagaata nammineq aalajangigassaraa qeqassanersoq orlussanersorluunniit, qeqaannassaarlu; [Jehovami] pissaaneqarmat nikorfatiinnassallugu.“ (Romamiut 14:3, 4) Erseqqippoq kristumiut ilumoortut allat nalunngeqatiginnissutaata ilinniartitaalluartup kajumissaarutaanik sumiginnaanissaannut pinngitsaalinissaat kissaatiginavianngikkaat, sumiginnaanerummi assigiinnassagaluarpaa nipimik tusarliussamik inuunermik annaassissutaasumik immaqa tusarliussisinnaasumik sumiginnaaneq.

15. Sooq allat nalunngeqatiginnissutaat misigissusiilu eqqarsaatigalugit iliuuseqartoqartariaqartarpa?

¹⁵ Kristumiut taakkua marluk suli amerlanerusunik eqqarsaatigisassaqarput, ilaatigut aalajangikkamik allanut qanoq sunniuteqarsinnaanerat. Paulusip ima siunnersorpaatigut: „Pitsaaneroqqajaqaaq ima eqqartuussisarussi: Kialuunniit qatanngutini naakkiutitinnaguluunniit orlutissanngilaa.“ (Romamiut 14:13) Louisap immaqa pissutsit tamatumunnga assingusut siornatigut ilagiinni namminerluunniit ilaquttamini aalassatsitsingaarsimanerat aamma  iliuuserisami meeqqaminut sunniuteqangaarsinnaanerat eqqumaffigaa. Paarlattuanilli Ruthip immaqa nalunngilaa allat maanna aalajangikkamisut aalajangiinerat ilagiinni najugaqarfimminiluunniit siornatigut aalassatsitsisimanngitsoq. Arnat taakkua marluk — aamma uagut tamatta — ilisimasariaqarparput nalunngeqatiginnissutip eqqortumik ilinniartinneqarsimasup aalajangigassat assigiinngitsut allanut qanoq sunniuteqarsinnaanerannik malussarissorujussuunera. Jiisusimi ima oqarpoq: „Minninnguit uannut uppertut ukua ilaannik tammartitsisoqarpat taassumunnga pitsaanerussagaluarpoq aserorteriviup ujarattaa qungasianut qilerullugu immap itinersaanut kivisitaaguni.“ (Matthæusi 18:6) Inuup iliuutsimi allanut tammassutaasinnaanera soqutiginngippagu, tamanna mingutsinneqarsimasumik nalunngeqatiginnissuteqalerneranik kinguneqarsinnaavoq, soorluttaaq kristumiut Kretamiittut ilaannut tunngatillugu aamma taamaassimasoq.

16. Piffissap ingerlanerani kristumiup sunik allannguinissaa ilimagisinnaavarput?

¹⁶ Kristumiu anersaakkut siumukartuartariaqarpoq tamannalu ilutigalugu nalunngeqatiginnissutiminut tusarnaarneq taannalu naapertorlugu iliuuseqarneq eqqarsaatigalugu siumukartariaqarluni. Takorlooriartigu qatanngut angut Markimik atilik kuiseqqammersoq. Nalunngeqatiginnissutini pissutigalugu iliuutsit iliuuserisartagarisimasani Biibilimut naapertuutinngitsut, immaqa guutipilussiornermut aammilluunniit atuinermut tunngassuteqartut, qanillinaveersaarpai. (Apustilit Suliaat 21:25) Guutip inerteqqutigisaanut assingulaaginnarsinnaasut tamaasa ingalassimaniaqqissaarpai. Paarlattuanilli eqqumiigaa nammineq akuerineqarsinnaasutut isigisani, assersuutigalugu tv-mi aallakaatinneqartartut aalajangersimasut, qatanngutit ilaasa akuersaanngimmatigit.

17. Piffissap anersaakkullu ineriartornerup kristumiup nalunngeqatiginnissutaanut aalajangigaanullu qanoq sunniuteqarsinnaanerannik assersuuteqarit.

¹⁷ Piffissap ingerlanerani Mark ilisimasaqarnerulerlunilu Guutimut qaninnerulerpoq. (Kolossemiut 1:9, 10) Tamanna qanoq sunniuteqarpa? Nalunngeqatiginnissutaata nipaa ilinniartinneqarluarpoq. Maanna nalunngeqatiginnissutini tusarnaarajunnerulerpaa najoqqutassiallu Biibilimiittut eqqarsaatigeqqissaarajunnerulerlugit. Paasilerpaa Guutip inerteqqutigisaanut eqqaanartillugit siornatigut qanillinaveersaartarsimasani Guutip eqqarsartaasianut akerliunngitsut. Aammattaaq Mark najoqqutassianut Biibilimiittunut naleqqussarnerusimagami nalunngeqatiginnissutinilu ilinniartinneqarluarsimasoq kajumilluni periarfigisaramiuk, nalunngeqatiginnissutini tv-mi aallakaatitassianik, siornatigut isiginnaarneqarsinnaasorisaminik, isiginnaannginnissaminut maanna killinneqaatigaa. Aap, nalunngeqatiginnissutaa naleqqussarneqarpoq. — Tussiaat 37:31.

18. Suut nuannaarutigisinnaavavut?

¹⁸ Ilagiit amerlanersaanni inoqarpoq kristumiutut ineriartornikkut assigiinngitsunik killiffeqartunik. Taakkua ilaat uppilerlaajupput. Immaqa nalunngeqatiginnissutaat aalajangigassanut aalajangersimasunut tunngatillugu sunniuteqanngingajattarpoq nipaqanngingajallunilusooq, allanut tunngatillugu nalunngeqatiginnissutaasa nipaat nipitoorujussuusoq. Inuit taakku Jehovap siunnersuutaanut naleqqussarnissaminnut namminnerlu nalunngeqatiginnissutimik ilinniartinneqarsimasup kajumissaarutaa malillugu ilioriaannaalernissaminnut immaqa piffissaqartariaqarlutillu ikiorneqartariaqarput. (Efesosimiut 4:14, 15) Qujanartumik ilagiinni taakkunani qularnanngitsumik inuppassuaqarpoq ilisimasaqangaartunik, najoqqutassianik Biibilimiittunik atuineq eqqarsaatigalugu misilittagaqarluartunik Guutillu eqqarsartaasianut naapertuuteqqissaartumik sunniuteqartumik nalunngeqatiginnissuteqartunik. Inunnik ’minguitsunik’ taakkunatut ittunik, Naalakkap iluarisaanik ileqqussatigut anersaakkullu minguitsutut isiginnittunik, ilaqarluni nuanningaarami! (Efesosimiut 5:10) Inuttut taamatut pissuseqalernissamik anguniagaqarnerput taamaalillutalu sallusuissummik eqqorluartumik ilisimasaqarnermut Guutimullu tunniusimanermut naapertuuttumik nalunngeqatiginnissuteqartuarnerput tamatta iluaqutigissavarput. — Titusi 1:1. (wE 10/15 07)

[Quppernerup ataani ilanngussat]

Qanoq akissavit?

• Sooq kristumiut Kretamiittut ilaat mingutsinneqarsimasumik nalunngeqatiginnissuteqarpat?

• Sooq kristumiut marluk tamarmik ilinniartinneqarluarsimasumik nalunngeqatiginnissutillit assigiinngitsunik aalajangiisinnaappat?

• Piffissap ingerlanerani nalunngeqatiginnissuterput susariaqarpa?

[Atuaqqissaarnermi apeqqutit]

[Qupp. 24-mi nunap assinga]

(Allassimasut qanoq inissisimanersut naqitami takuneqarsinnaavoq)

Sicilia

GRÆKERIT NUNAAT

Kreta

ASIAARAQ

Cyperni

IMAQ AKULLERSUAQ

[Qupp. 26-mi assiliartaq]

Kristumiut marluk pissutsini imminnut eqqaanartuni immaqa assigiinngitsunik aalajangiissapput