Nalunngeqatiginnissutivit nipaa tusarnaartaruk

’Guutimik nalusut inatsisit piginagit inatsisit peqqussutaat malillugit iliortarput.’ — ROMAMIUT 2:14.

1, 2. (a) Inuppassuit qanoq ilillutik namminissarsioratik allanik soqutiginnissimappat? (b) Biibilimi oqaluttuarineqartut suut allanik soqutiginninnerup qanoq paasisariaqarneranik ersersitsippat?

ANGUT 20-nik ukiulik qimuttuitsut unittarfianni noqarpoq utaqqisarfimmiillu qimuttuitsut aqqutaannut nakkarluni. Tamatuminnga isiginnittup paneeqqani marluk iperarpai qimuttuitsullu aqqutaannut ammut pissilluni. Taassuma angut noqartoq nusullugu qimuttuitsut aqqutaasa akornannut itersamut pisippaa qimuttuitsullu quliminni qiarsuttumik bremserneranni illersorniarlugu qallerlugu. Angut annaassisoq sapiitsuliortutut suaarutigineqarpoq, taannali ima oqarpoq: „Eqqortuliuinnartussaavugut. Iliuuserisara akuerineqarnissara ataqqineqarnissaralu pinnagit, tullermilli asanninneq pissutigalugu iliuuseraara.“

² Immaqa illit ilisarisimasaqarputit allanik ikiuiniarluni imminut navianartorsiortissimasumik. Assersuutigalugu sorsunnersuit aappaata nalaani inuppassuit takornartaalluinnartunik angerlarsimaffimminni toqqortitsisarput. Aamma apustilip Paulusip inuillu 275-it allat Maltap avataani umiugamik misigisaat eqqarsaatigeriakkit. Tassani najugallit ilaasa takornartat taakkua ikiorpaat ’assullu inussiarnisaarfigalugit’. (Apustilit Suliaat 27:27–28:2) Niviarsiararmi Israelikkuusoq inuunerminik navianartorsiortitsinngikkaluarluni Aramæerimut tigusarinnitsiminut inussiarnisaartoq? (2 Kunngit 5:1-4) Aamma Jiisusip Samariamiumik tullerminik asannittumik assersuusiaa ilisimaneqarluartoq eqqarsaatigeriaruk. Palasip Levikkuusullu nunaqqatertik juutiusoq saassunneqarsimasoq aqqusinermilu toqungajalluni nalasoq sianiginngitsuusaarpaat, Samariamiuli taanna ikiorniarlugu immikkut ittumik iliuuseqarpoq. Ukiut hundredellit ingerlaneranni assersuusiaq taanna inunnut kulturinit assigiinngitsorpassuarneersunut killinneqaataangaarsimavoq. — Lukasi 10:29-37.

3, 4. Inuppalaartarneq nalinginnaaqisoq pinngoriartuaarsimanermik isumaliutersuutip uppernassusianut qanoq sunniuteqarpa?

³ Ilumoorpoq ’ulluni atugarliungaarfiusuni’, inuusugut. Inuppassuit ’qiningallutillu’ ’ajunngitsunut akeraapput’. (2 Timotheusi 3:1-3) Taamaakkaluartorli asannittuliortunik takusarpugut, ilaa? Aamma uagut nammineq taamatut inussiarnisaarfigineqarsimavugut, ilaa? Allanik ikiuiniartarneq, imminut akisugaluaraangalluunniit, ima nalinginnaatigaaq inuit ilaannit ’inuppalaarnerunerarneqartarluni’.

⁴ Imminut akisugaluaraangalluunniit allanik ikiuiumatussuseq tamanna naggueqatigiinni kulturinilu tamani ersertarpoq, tamannalu inunnik uumasunit ineriartorsimaneraanermut naapertuutinngilaq. Timikkut kingornussisinnaassusermik ilisimatooq Francis S. Collins, Amerikamiut naalakkersuisuisa inuup timikkut kingornuttagaanik (dna-mik) paasinarsaaniarneranni siuttuusoq, ima oqarpoq: „Namminissarsiorani tullermik asanninneq pinngoriartuaarsimaneraanermik tapersersuisunut ajornartorsiuterujussuuvoq. . . . Timerput namminissarsiortutut pinngortinneqarsimappat namminissarsiorani tullermik asanninneq nassuiarneqarsinnaanngilaq.“ Aamma ima oqarpoq: „Inuit ilaat namminneq ilaginngisatik [ilaqutarinngisatik, naggueqatiginngisatik, upperisaqaqatiginngisatik] ataatsimooruteqarfiginngilluinnakkatillu pillugit imminut pilliutigeriaannaasarput. . . . Tamanna Darwinip isumaa atorlugu nassuiarneqarsinnaarpasinngilaq.“

„Nalunngeqatiginnissutip nipaa“

5. Suna inunni maluginiarneqartarsimava?

⁵ Dr. Collinsip namminissarsiortannginnitsinnut tunngassuteqartut ilaat uparuarpaa. Ima oqarpoq: „Nalunngeqatiginnissutip nipaa kajumississutigalugu allanik ikiuisarpugut, tamanna pillugu akissarsitinneqassanngikkaluaruttaluunniit.“ * Taassuma  nalunngeqatiginnissut eqqartormagu immaqa apustilip Paulusip oqaasii uku eqqaavavut: „Guutimik nalusut inatsisit piginagit inatsisit peqqussutaat malillugit ilioraangamik taava inatsiseqanngitsut taakku imminnut inatsisitut ipput. Takutippaat inatsisit suliareqqusaat uummatiminni allassimasut, tarningisami nalunngissusiat nalunaajaasuuvoq, eqqarsaataallu imminnut unnerluutigisarput illersortarlutilluunniit.“ — Romamiut 2:14, 15.

6. Sooq inuit tamarmik Pinngortitsisumut akisussaappat?

⁶ Paulusip Romamiunut allakkamini ersersippaa inuit Guutimut akisussaasut taassuma piunera pissusiilu avatangiisitsinni tamani erseqqimmata. Taamaassimavoq „silarsuup pinngortitaaneraniilli“. (Romamiut 1:18-20; Tussiaat 19:2-5) Ilumoorpoq inuppassuit Pinngortitsisertik sumiginnartaraat inuunerlullutillu. Guutilli piumasaraa inuit naapertuilluarnini akuerissagaat iliuutsitillu ajortut peqqissimissutigissagaat. (Romamiut 1:22–2:6) Juutit taamaaliornissaminnut pissutissaqarluarsimapput — tassami Guutip inatsisaa Mosesi aqqutigalugu pisimavaat. Inuiaalli „Guutip oqaasiinik“ peqanngikkaluartulluunniit Guutip piunera akuerisimasariaqaraluarpaat. — Romamiut 2:8-13; 3:2.

7, 8. Naapertuilluarnermik misigissuseq qanoq nalinginnaatigaa, tamatumanilu suna erserpa?

⁷ Inuit tamarmik Guuteqarneranik akuerinnittariaqarnerannut tamannalu naapertorlugu iliuuseqartariaqarnerannut pissutissaalluartoq tassaavoq suup eqqortuuneranik suullu eqqunngitsuuneranik qamuuna maluginnissinnaanerat. Naapertuilluarnermimmi misigissuserput nalunngeqatiginnissuteqarnitsinnut uppernarsaataavoq. Takorlooriaruk meeraaqqat tulleriiaaqqasut issakatsiaarnissaminnut utaqqillutik. Tassanngaannaq meeqqat ilaata tulleriiaaqqasut allat tamarmik saavannut pivoq, utaqqisut soqutiginngivillugit. Meeqqat ilarpassui tamanna naapertuilluanngitsutut isigalugu naammagittaalliussagaluarput. Maanna imminut ima apereriarit: ’Allaat meerarpassuit qanoq ilillutik eqqarsaqqaaratik takutissinnaavaat naapertuilluarnermik misigissuseqarlutik?’ Tamatuminnga takutitsinerat qamuuna ileqqussatigut sianissuseqarnerannut ersiutaavoq. Paulusi ima allappoq: „Guutimik nalusut inatsisit piginagit inatsisit peqqussutaat malillugit ilioraangamik.“ Oqanngilaq „inatsisit peqqussutaat malillugit iliussappata“, soorlulusooq qaqutigut taamaaliortartut. Oqarporli „ilioraangamik“ taamaalillunilu oqaatigimisaarlugu taamaaliukulasartut. Tassa inuit ’inatsisit piginagit inatsisit peqqussutaat malillugit iliortarput’ qamuunalu ileqqussatigut sianissusertik kajumississutigalugu Guutip inatsisaanut allassimasumut naapertuuttumik iliuuseqartarlutik.

⁸ Taamatut ileqqussatigut eqqortumik ilioqqajaasarneq piffissap ingerlanerani nunarpassuarni nalinginnaasimavoq. Cambridge Universitymi professori allappoq Babylonimiut, Egyptenimiut, grækerit aammattaaq Australiap inoqqaavisa Amerikamilu indianerit ileqqussatigut najoqqutarisaanni „naqisimanninneq, toqutsineq, ilumuunnginneq sallulu assuarineqartut, sumiiffinnilu taakkunani tamani utoqqarnut, meeqqanut sanngiitsunullu inussiarnisaarnermut assigiinnik najoqqutassiaqarput.“ Aamma dr. Collins ima allappoq: „Eqqortoqarnera eqqunngitsoqarneralu inuiannut tamanut atorpasippoq.“ Tamanna Romamiunut allakkani 2:14-imi allassimasunut eqqaanarpoq, ilaa?

Nalunngeqatiginnissut qanoq sunniuteqartarpa?

9. Nalunngeqatiginnissut suua, arlaannillu iliuuseqannginninni qanoq iluaqutigisinnaaviuk?

⁹ Biibilimi ersersinneqarpoq nalunngeqatiginnissut iliuutsinik naliliisinnaanermut piginnaanerusoq qamaniittoq. Soorlulusooq nipi qamanngaanneersoq iliuutsimik eqqortuuneraalluniluunniit eqqunngitsuuneraasoq. Paulusip nipi taanna ima eqqartorpaa: „Tarnima nalunngissusiata Anersaakkut Illernartukkut uppernarsarsinnaavaa.“ (Romamiut 9:1) Imaassinnaavoq nipi taanna ileqqussanut tunngasumik aalajangigaqarniartillutit siumut oqaloreersoq. Nalunngeqatiginnissutit iliuuserisassannik naliliinissamut aamma iliuuseriniakkat iliuuserisuugukku qanoq misigissanerlutit paasipajaarnissaanut iluaqutigisinnaavat.

10. Nalunngeqatiginnissut amerlanertigut qanoq ililluni malunniuttarpa?

¹⁰ Nalunngeqatiginnissutip aatsaat arlaannik iliuuseqareeraanni sunniuteqartarnera nalinginnaanerpaavoq. Daavi kunngimit Saulimit qimaatilluni ilaanni Guutip kunnginngortitaanut ataqqinninngitsuliorsinnaaleriataarpoq, taamaaliorporlu. Kingornali iliuutsini „ilerasuutigilerpaa“. (1 Samueli 24:2-6; Tussiaat 32:3, 5) Tamatta taamatut ilerasoreernikuuvugut. Arlaannik iliorsimavugut, tamatumalu kingorna iliuuserisimasarput eqqissiunnaarutigalugulu isumakuluutigaarput. Akileraarutinut tunngatillugu peqquserlussimasut ilaat  ima ilerasutsigisimapput kingusinnerusukkut akiitsutik akilersimallugit. Allat allasiorsimanerminnik aapparminnut nassuerutiginninnissamut killinneqarsimapput. (Hebræerit 13:4) Nalunngeqatiginnissut naapertorlugu iliuuseqarneq nalerisimaarnermik isumakkullu eqqissinermik kinguneqarsinnaavoq.

11. Eqqarsaqqaarata ’nalunngeqatiginnissutitsinnik siulersuisuutitsinissaq’ sooq navianarsinnaava? Assersuuteqarit.

¹¹ Taava eqqarsaqqaarata ’nalunngeqatiginnissuterput siulersortigiinnarsinnaavarput’? Nalunngeqatiginnissutip tusarnaarnera iluaqutaasarpoq, aammali tamatuma nipaa uagutsinnik tammartitsilluinnarsinnaavoq. Aap, ’inuutsitta ilorliup’ nipaata tammartissinnaavaatigut. (2 Korinthimiut 4:16) Assersuuteqariarta. Biibilimi oqaluttuarineqarpoq Stefanusi, Kristusimut ajoqersugaq aallussilluartoq ’saammaannermillu pissaanermillu ilumioqangaartoq’. Juutit ilaasa Jerusalemip avataanut pisippaat ujaqqanillu milloorlugu toqullugu. Saulusi (kingusinnerusukkut apustilinngortoq Paulusi) qanittumi nikorfavoq ’Stefanusillu toqutaanera iluaralugu’. Juutit taakkua eqqortumik iliornertik ima qularinngitsigisimagunarpaat sunnguamilluunniit ilerasuuteqaratik. Saulusi aamma taamaassimassaaq, Stefanusimmi toqutaanerata kingorna „kamattorsuujuarpoq Naalakkallu ajoqersugai sioorasaarlugit toqukkumallugit“. Erseqqippoq taassuma nalunngeqatiginnissutaata nipaa tamatuma nalaani tatiginanngitsoq. — Apustilit Suliaat 6:8; 7:57–8:1; 9:1.

12. Suna inuit ilaasa nalunngeqatiginnissutaannut sunniuteqarsimasinnaava?

¹² Saulusip nalunngeqatiginnissutaanut sunniuteqartoq suusimasinnaava? Ilaatigut tassaasimasinnaavoq allanut qanittumik attaveqarnera. Ilarpassuavut angummik ataatamisorluinnangajak nipeqartumik oqarasuaatikkut oqaloqateqareerput. Ernerup ilaatigut immaqa ataatami nipaa angusisaatigaa, kisianni aamma imaassinnaavoq ataatami oqaloriaasianit sunnerneqarsimasoq. Tamatumunnga assingusumik Saulusip juutinut Jiisusimik uumissuisunut taassumalu ajoqersuutaanik akerlilersuisunut qanittumik attaveqarnini sunnertissutigisimasinnaavaa. (Johannesi 11:47-50; 18:14; Apustilit Suliaat 5:27, 28, 33) Aap, Saulusip ilagisartagai nipimut qannartaminit tusartagaanut, nalunngeqatiginnissutaanut, sunniuteqarsimasinnaapput.

13. Avatangiisit nalunngeqatiginnissummut qanoq sunniuteqarsinnaappat?

¹³ Aamma kulturi avatangiisillu nalunngeqatiginnissummut sunniuteqarsinnaapput, avatangiisit oqaloriaatsimut sunniuteqartarnerattut aalajangersimasumik sumiorpaluuteqalerluni. (Matthæusi 26:73) Itsaq Assyriamiunut tunngatillugu taamatut pisoqarsimassaaq. Taakkua sorsukkumatunertik ilisimaneqaatigaat, assilialiaannilu qiperukkani takuneqarsinnaavoq tigusatik qanoq anniartittarsimaneraat. (Nahumi 2:12, 13; 3:1) Jonap nalaani Ninevemiut ’talerpimmik saamimmillu paatsiveqartitsinngitsutut’ oqaluttuarineqarput. Tassa imaappoq Guutip isaani suup eqqortuuneranut suullu eqqunngitsuuneranut eqqortumik najoqqutassiaqanngitsut. Takorlooriaruk avatangiisit taama ittut Ninevemi peroriartortup nalunngeqatiginnissutaanut qanoq sunniuteqarsimasinnaanerat! (Jona 3:4, 5; 4:11) Taamatuttaaq ullumikkut nalunngeqatiginnissut inuit ilagisartakkat isumaannit sunnerneqarsinnaavoq.

Nalunngeqatiginnissutip nipaa qanoq ililluni tatiginarnerulersinnaasoq

14. Mosesimik allakkani siullerni 1:27-mi allassimasut nalunngeqatiginnissutitsinni qanoq uppernarsarneqarpat?

¹⁴ Jehovap Adami Evalu nalunngeqatiginnissummik tunissuteqarfigai, uagullu nalunngeqatiginnissuterput taakkunannga kingornussaraarput. Mosesimik allakkani siullerni 1:27-mi oqaluttuarineqarpoq inuit Guuti assilillugu pinngortitaasut. Imaanngilaq Guuti isikkuatigut assigigipput, taannami anersaajuvoq uagullu uiniulluta. Guuti assilillugu pinngortitaavugut ima paasillugu taassuma pissusii pissuserigivut, ilaatigut ileqqussatigut sianissuseqarluta sunniuteqartumik nalunngeqatiginnissutitalimmik. Tamanna nalunngeqatiginnissutitsinnik qanoq ililluta nakussatsitsisinnaanitsinnut tatiginarnerulersitsisinnaanitsinnullu ersiutaavoq, tassa Pinngortitsisoq pillugu ilinniarnerunitsigut taassumunngalu qanillinitsigut.

15. Ataatatsinnik ilisarisimannilerniarnerput ilaatigut qanoq iluaqutigisinnaavarput?

¹⁵ Biibilimi ersersinneqarpoq Jehova tamatsinnut Ataataasutut oqaatigineqarsinnaasoq. (Esaja 64:7) Kristumiut aalajaatsut tamarmik Guuti Ataatamittut saaffigisinnaavaat, qilammi inuunissamik neriugisaqaraluarunik nunamiluunniit paratiisiusumi inuunissamik neriugisaqaraluarunik. (Matthæusi  6:9) Ataatatsinnut qanilliartuinnarnissarput taamaalillutalu najoqqutassiaanut pissutsinullu isiginnittaasianut naleqqussarnissarput kissaatigisariaqarparput. (Jaaku 4:8) Inuppassuit taamaaliornissartik soqutiginngilaat. Taakku juutitut Jiisusip ima oqaatigisaatut ipput: „Ilissi nipaa tusaanngisaannarparsi oqaluttorlu inuttarsinngisaannarlugu, oqaasiilu ilumiugiuaannanngilasi.“ (Johannesi 5:37, 38) Guutip nipaa ilumoortumik tusarnikuunngilarput, taamaakkaluartorli oqaasiisa atuarnerisigut qanoq eqqarsartarnersoq ilisimasinnaavarput taamaalillutalu taassumatut ilerluta, misigissuseqalerluta isumaqalerlutalu.

16. Nalunngeqatiginnissummik ilinniartitsinerup nalunngeqatiginnissullu naapertorlugu iliuuseqarnerup pingaaruteqangaarnerat Josefimik oqaluttuami qanoq ersersinneqarpa?

¹⁶ Josefip Potifarip illuaniinneranik oqaluttuami tamanna erseqqissarneqarpoq. Potifarip nuliata Josefi kanngunartuliortinniarsarisaraluarpaa. Josefi Biibilip allanneqalernera Inatsisillu Qulit tunniunneqarnerat sioqqullugu inuugaluarluni ima akivoq: „Qanoq taama kanngunartigisumik iliussaanga Guutimut ajortuliorlunga?“ (1 Mosesi 39:9) Josefi taamatut periarsimanavianngilaq ilaquttani nuannaartinniarlugit, ilaqutaami ungasissorsuarmi najugaqarput. Pingaarnerpaamik kissaatigaa Guutimik nuannaartitsinissani. Josefip Guutip aappariinnermut najoqqutassiaa nalunngilaa — angutip ataatsip arnaq ataaseq attavigissagaa marluullutillu ’uiniliussasut ataaseq’. Aamma qularnanngitsumik tusarsimavaa Abimeleki qanoq misigisimanersoq paasigamiuk Rebekka aappaqartoq — nulissiunnissaa eqqunngitsuliornerussasoq innuttaminillu pillagassanngortitsissasoq. Jehovallu pisimasoq tamanna pilluaqquaa kinguneqarluartillugu taamaalillunilu ersersillugu allasiorneq qanoq isiginerlugu. Josefip tamakkuninnga tamanik ilisimasaqarnera inunnguuseralugu nalunngeqatiginnissutaata kajumissaarutaanik sakkortunerulersitsisimagunarpoq, taamaalillunilu kinguaassiuutitigut inuunerlunnissaq itigartippaa. — 1 Mosesi 2:24; 12:17-19; 20:1-18; 26:7-14.

17. Sooq Ataatatsinnik ilaarsiniarneq eqqarsaatigalugu Josefimit pitsaanerusunik atugaqarpugut?

¹⁷ Ullumikkut soorunami pitsaanerungaartunik  atugaqarpugut. Biibili tamaat pigaarput, tassanilu paasisinnaavarput Ataatarput qanoq eqqarsartarlunilu misigisarnersoq, aammattaaq suut akuerinerai suullu inerteqqutiginerai. Allakkani allassimasunik ilisimasaqarnerujartortilluta Guuti qanillisinnaanerujartuinnarlugulu assiginerujartuinnassavarput. Qularnanngitsumik nalunngeqatiginnissutitta kajumissaarutai Ataatap eqqarsartaasianut piumasaanullu naapertuunnerujartuinnassapput. — Efesosimiut 5:1-5.

18. Siornatigut immaqa ajortumik sunnertittaraluarluta, nalunngeqatiginnissuterput tatiginarnerulersinniarlugu qanoq iliorsinnaavugut?

¹⁸ Avatangiisimmi nalunngeqatiginnissutitsinnut sunniutaat? Immaqa qanigisatta eqqarsartaasiannit iliuuserisaannillu aamma avatangiisinit peroriartorfigisatsinnit sunnerneqarsimavugut. Taamaattumik nalunngeqatiginnissutitsinnit nalunaarutit immaqa ersernerlullutilluunniit ilumuunngillat. Nalunngeqatiginnissut avatangiisitta „sumiorpaluutaat“ atorlugu oqalussimavorlusooq. Soorunami pereersut allanngortissinnaanngilavut; ikinngutinilli avatangiisinillu nalunngeqatiginnissutitsinnut pitsaasumik sunniuteqarumaartunik toqqaanissarput aalajangiusimasinnaavarput. Tamatumunnga tunngatillugu iliuusissaq pingaarutilik tassaavoq kristumiunik tunniusimasunik Ataatamissut inniarlutik sivisuumik ilungersorsimasunik peqateqartarneq. Ilagiit ataatsimiinnerini, aammattaaq ataatsimiinnerit siornatigut kingornatigullu katerisimaarnerni, taakkuninnga peqateqarnissamut periarfissaqarluarpugut. Uppeqatitta eqqarsartaasiat iliuusiilu Biibili tunngavigalugu ilinniartinneqarsimasut aammattaaq nalunngeqatiginnissutaat Guutip isiginnittaasianik eqqarsartaasianillu eqqaasitsigaangat nalunngeqatiginnissutiminnut tusarasuartarnerat maluginiarsinnaavavut. Piffissap ingerlanerani tamanna nalunngeqatiginnissutitta Biibilimi najoqqutassianut naapertuutitilernissaanut iluaqutigisinnaavarput, tamannalu Guutip pissusiinik ersersitsillaqqinnerulissutigissavarput. Nalunngeqatiginnissutitta nipaa Ataatatta najoqqutassiaanut naapertuutilersikkutsigu kristumiullu allat uagutsinnut sunniuteqarluartikkutsigit nalunngeqatiginnissuterput tatiginarnerulissaaq, tusarnaarajunnerulissavarpullu. — Esaja 30:21.

19. Nalunngeqatiginnissummut tunngassuteqartut suut suli misissunngilavut?

¹⁹ Inuilli ilaat nalunngeqatiginnissutiminnut tusarnaarniarlutik kajumissaarutaanullu periarniarlutik ullut tamarluinnaasa ilungersortarput. Allaaserisami tulliuttumi pissutsit kristumiut atugarisimasaat sammineqassapput. Tamakkua eqqarsaatiginerisigut immaqa paasilluarnerulersinnaassavarput nalunngeqatiginnissutip qanoq pingaaruteqarnera, sooq inuit assigiinngitsut nalunngeqatiginnissutiminnut assigiinngitsumik periartarsinnaanerat, aamma nalunngeqatiginnissutip nipaanut qanoq ililluta malussarissineruleraluttuinnarsinnaanersugut. — Hebræerit 6:11, 12.

[Quppernerup ataani ilanngussaq]

Suna ilikkarpiuk?

• Sooruna inuit kulturinit tamaneersut suup eqqortuunera suullu eqqunngitsuunera malugisinnaagaat — tassa sooq nalunngeqatiginnissuteqarpat?

• Sooq eqqarsaqqaarata nalunngeqatiginnissutitta siulersuisuutiinnarnissaa mianersuutigisariaqarparput?

• Nalunngeqatiginnissutitta nipaa qanoq pitsaanerulersissinnaavarput?

[Atuaqqissaarnermi apeqqutit]

[Qupp. 21-mi assiliartaq]

Daavi ilerasuppoq . . .

[Qupp. 21-mi assiliartaq]

. . . Saulusili Tarsusimeersoq ilerasunngilaq

[Qupp. 22-mi assiliartaq]

Nalunngeqatiginnissuterput sungiusarsinnaavarput