Timmiarniap nigaanut illersorneqarneq

„[Jehovap] annaatissavaatit timmiarniap nigaanit.“ — TUSSIAAT 91:3.

1. ’Timmiarniaq’ kinaava, aamma sooq ulorianangaarpa?

KRISTUMIUT ilumoortut tamavimmik ulorianartumik akeraqarput. Taanna peqqusersuujuvoq, uagutsinnit silassorinneruvoq uumasutullu kiisortutut ulorianarluni. Tussiaat 91:3-mi ’timmiarniatut’ eqqaaneqarpoq. Kinaava? Watchtower 1. juuni 1883-imoortumiilli atuagassiami matumani uparuarneqartarpoq akeraasoq pissaaneqangaartoq taanna tassaasoq Saatani Diaavulu. Peqqusersiornikkut taassuma Jehovap kiffai tammartinniarsaralugillu napitinniarsarai, soorlu timmiarniap timmiaq napitinniarsarisaraa.

2. Saatanip timmiarniallu suut assigiissutigaat?

² Itsaq timmissat napitittarpaat timmiaatiginiarlugit qallornerallu tusartarniarlugu, meqqui qalipaatigissaartut atorniarlugit, neqaat neriniarlugu immaqaluunniit pilliutiginiarlugit. Timmissalli napiaruminaapput mianersortuugamik aalassarissuullutillu. Taamaattumik Biibilip nalaani timmiarniap timmissat aalajangersimasut napiarusutami iliuuserisartagaat ileqquilu peqqissaartumik maluginiaqqaartarpai. Taavalu timmissanik taakkuninngarpiaq napiaaniutissarsiortarpoq. Saatanip Biibilimi timmiarniatut eqqaaneqarnera qanoq periaaseqarneranik paasinninnissatsinnut iluaqutigaarput. Taassuma tamatta immikkut misissoqqissaarpaatigut. Maluginiartarpai pissusinnaavut, ileqquliussimasavut, taavalu uumatilluta napitinniarluta malunnaarsaartumik napiaaniusertarpoq. (2 Timotheusi 2:26) Taassuma napiaaniutaasa ilaannut napitikkaluarutta anersaakkut toqussagaluarpugut, naggataatigullu immaqa inaarutaasumik suujunnaarsitaanissatsinnik kinguneqassagaluarpoq. Taamaattumik „timmiarniap“ periaasiisa peqqusersuut ilisarisinnaanissaat uagutsinnut pisariaqarluinnarpoq.

3, 4. Qaqugukkut Saatani løvitut periaaseqartarpa — qaqugukkullu pulateriaarsuttut?

³ Tussiaasiortup pikkunartunik assersuusioqattaarnini nangillugu Saatani løvitsiamut aamma pulateriaarsummut assersuuppaa. (Tussiaat 91:13) Ilaanneeriarluni Saatani løvitut erseqqissumik toqqaannartumillu saassussisarpoq, assersuutigalugu Jehovap innuttaanik malersuisitsinikkut imaluunniit taakkununnga naqisimannittumik inatsisiliortitsinikkut. (Tussiaat 94:20, 1990) Saassunneqarneq toqqaannartoq taamaattoq inuit ikittuinnaat immaqa nakkaannassutigissavaat. Amerlanertigulli erseqqissumik saassussinerit tamatumunnga akerliusumik kinguneqartarput — Guutip innuttaanik ataqatigiinnerulersitsisarput. Taavami Saatanip pulateriaarsuttut malugitinnaveersaarluni saassukkiartorpatigut?

⁴ Inunnit silassorinnerungaarluni Diaavulup isertorfimminit malugitinnaveersaarluni saassussinnaavaatigut toqunartumillu kapilluta. Pulateriaarsuttut iliornermigut Guutip innuttaasa ilaasa isumaannik toqunartuliiniarnini iluatsippaa, taakkulu Jehovap piumasaatuunngitsoq taassumali piumasaatut iliornissamut nakutinneqarput. Tamatuma kinguneri alianarput. Qujanartumilli Saatanip pilersaarutai periaasiilu suunersut nalunngilavut. (2 Korinthimiut 2:11) Allaaserisami matumani „timmiarniap“ nigaasa ilaat sisamat sammissavavut.

Inunnut qununeq

5. Sunaana pissutigalugu inunnut qununeq napiaaniutaasoq sunniuteqangaartoq?

⁵ Inuit allanit akuerineqarusunnerat iluarineqarusunnerallu „timmiarniap“ ilisimavaa. Imaanngilaq kristumiut inuit allat eqqarsaataat isumaallu sussarinagillu sunnerneqaatigisanngikkaat. Diaavulup tamanna nalunngilaa, taakkualu allanit qanoq isumaqarfigineqarnerminnik soqutiginninnerat atornerlukkusuppaa. Assersuutigalugu, napiaaniut „inunnik qunugisaqarneq“-mik taaneqartoq atorlugu Guutip innuttaasa ilaannik oqimaaqatigiissaariunnaarsitsisarpoq. (Ussatit 29:25) Guutimut kiffartortut inunnut qununermit taassuma  inerteqqutigisaatut iliorunik imaluunniit oqaasiani imminnut peqqussutigineqartutut iliunngitsoorunik, „timmiarniap“ nigaanut napitissimassapput.— Ezekieli 33:8; Jaaku 4:17.

6. Assersuuteqarlutit ersersiguk kristumiu inuusuttoq qanoq „timmiarniap“ nigaanut napitissinnaanersoq.

⁶ Immaqa inuusuttoq kristumiu atuaqatiminit tatineqartarpoq sikaritsimillu pujortarnissamut ullut ilaanni akuersilluni. Ullaaq taanna atuariartorami pujortalernissani immaqa kissaatiginikuunngisaannarpaa. Sivitsunngitsorli peqqissutsiminut ajoqutaasumik Guutillu eqqunngitsutut isigisaanik iliulerpoq. (2 Korinthimiut 7:1) Qanoq pisoqarami? Immaqa ajortunik kammalaateqarpoq taakkunanngalu iluariunnaarneqarnissani annilaangagalugu. Ilissi inuusuttuususi, ’timmiarniaq’ ilissinik napititsisinnaanngortinniaqinasiuk! Uumatillutit napitinneqarumanngikkuit eqqunngitsoq qanorluunniit pingaaruteqarpasinngitsigigaluarpat akueriinnarnaveersaartariaqarpat! Ikinngutipalaaqarnermut mianersoqqussut Biibilimiittoq tusarnaaruk.— 1 Korinthimiut 15:33.

7. Saatanip angajoqqaat ilaat qanoq anersaakkut oqimaaqatigiissaariunnaarsissinnaavai?

⁷ Angajoqqaatut peqqissaarluartut kristumiuusut Biibili naapertorlugu ilaquttaminnik pilersuinissamik akisussaaffitsik pimooruppaat. (1 Timotheusi 5:8) Saatanilli aamma tamatumunnga tunngatillugu oqimaaqatigiissaariunnaarsinniarpaatigut. Kristumiut ilaat sulisitsisuminnit qaangiuttoorsinnaanerlutik aperineqaraangamik immaqa akuersiinnartarput taamaattumillu ataatsimiinnerit najuuffiginngitsooqattaarlugit. Allat ataatsimeersuarneq tamaat najuuffigiumallugu qatanngutitillu peqatigalugit Jehova pallorfigiumallugu sulinngiffeqarniarlutik qinnuteqarnissaminnut immaqa naammattumik sapiissuseqanngillat. Napiaaniummut tamatumunnga illersuut tassaavoq ’Jehovamik tatiginninneq’. (Ussatit 3:5, 6) Tamatta anersaakkut inoqutigiinnut Jehovap isumagiumallugit neriorsorsimasaanut ilaavugut. Tamanna eqqaamagutsigu oqimaaqatigiissaariuarnissamut aamma iluaqutigissavarput. Ilissi angajoqqaajususi — tatigivisiuk Jehovap ilissi qitornasilu arlaatigut isumagiumaaraasi taassuma piumasaatut iliortuartillusi? Imaluunniit inunnut qunugassi Diaavulumit uumatillusi napitinneqassavisi taassumalu piumasaatut iliortinneqassallusi? Ilungersorluta qinnuigaassi tamanna qinunikkut eqqarsaatigeqqissaaqqullugu.

Nunap piinik pingaartitsivallaarneq

8. Saatanip nunap piinik pingaartitsivallaarneq ilaatigut qanoq ililluni napiaaniutitut atorsinnaavaa?

⁸ Saatanip aamma nunap piinik pingaartitsivallaarneq napiaaniutitut atortarpaa. Silarsuarmi matumani aningaasarsiornikkut aaqqissuussinerit pisuunngornissamik, ajornanngippat pisuunngupallannissamik, kissaateqarneq siuarsartupilussuuaat. Tamanna Guutip kiffaasa ilaannut napitissutaasinnaavoq. Immaqa illit ima oqarfigineqassaatit: „Maanna sulerulooruit aningaasatigut isumannaassaatit. Taava tamatuma kingorna sulivallaarunnaassaatit. Immaqa allaat pionerinngorsinnaassaatit.“ Nakutitsiniarlutik taama oqaluttut ilaat tassaasinnaapput inuit anersaakkut oqimaaqatigiissaarilluanngitsut ikinngutiminnit ilagiinniittunit aningaasatigut iluanaaruteqarniartut. Eqqarsaatigiuk sunarpiaq siunnersuutigineraat. Angutip pisuup ’sianiitsup’, Jiisusip assersuusiamini oqaluttuarisaata, eqqarsartaasianut assingusumik eqqarsartaaseqannginnerpat? — Lukasi 12:16-21.

9. Nunap piinik pigisaqarusunneq pissutigalugu kristumiut ilaat qanoq napitissinnaappat?

⁹ Saatanip silarsuani ajortoq aquttarpaa inunnik nakutitsisillugu nunap piinik pigisaqarusulersitsisillugu. Kissaat tamanna kristumiumut sunniuteqalersinnaavoq,  oqaaserlu ipitillugu ’inerititaqanngitsoortillugulu’. (Markusi 4:19) Biibilimi kajumissaarneqarpugut nerisassaqarneq atisassaqarnerlu naammageqqullugit. (1 Timotheusi 6:8) Amerlasuulli „timmiarniap“ nigaanut napitipput siunnersuut tamanna namminneq malinnginnamikku. Pingaarniarneq pissutigalugu taakku isumaqarpat inooriaaseq aalajangersimasoq pisariaqartillugu? Uagummi inuttut ataasiakkaatut — nunap piinik pigisaqarusunnerput pissutigalugu pallorfiginninneq minguitsoq pingaarnerpaajunnaartipparput? (Haggaji 1:2-8) Ajoraluartumik aningaasatigut ajornartorsiorfinni kristumiut ilaasa anersaakkut inuunertik pilliutigisimavaat pigisatigut inooriaaseq sungiusimasartik inooriaaseriuarumallugu. „Timmiarniap“ nunap piinik pingaartitsivallaarneq taamaattoq nuannaarutigaa!

Aliikkusersuutit aserorsaataasut

10. Sumut tunngatillugu kristumiut imminut misissortariaqarpat?

¹⁰ Periaaseq „timmiarniap“ atortagaa alla tassaavoq inuit inunnguuseralugu suup ajunngitsuuneranik suullu ajortuuneranik misigisimanerannik sanngiillisitsiniarneq. Aliikkusersuuterpassuit ullumikkut anersaamit Sodomamik Gomorramillu eqqaasitsisumit aqunneqartarput. Allaat — tv-kkut naqitatigulluunniit — nutaarsiat nakuusernermik pisariaqanngitsumik ersersitsivallaartarput, imaluunniit qujanarniutigalugu atoqatigiinneq sammivallaartarpaat. Aliikkusersuuterpassuit aallakaatinneqartartut inunnik ’ajunngitsumik ajortumillu immikkoortitsilluarsinnaajunnaarsitsisarput’. (Hebræerit 5:14) Eqqaamakkilli Jehovap pruffiiti Esaja aqqutigalugu oqaasii uku: „Eqqanaq taakku ajortumik ajunnginneraasut ajunngitsumillu ajorneraasut.“ (Esaja 5:20) „Timmiarniap“ peqqusersiorluni aliikkusersuutit aserorsaataasut atorlugit illit eqqarsartaatsit sunnersimavaa? Tamatumunnga tunngatillugu imminut misissornissaq pisariaqarpoq! — 2 Korinthimiut 13:5.

11. Tv-mi nangeqattaartut pillugit Vagttårnet-imi qanoq mianersoqqussisoqarsimava?

¹¹ Ukiut 25-ngajaat matuma siorna inoqutigiit uppertut tv-mi nangeqattaartut pillugit Vagttårnet-imi asannittumik mianersoqquneqarput. * Nangeqattaartut nuannarineqarluartut sunniuteqarnerat pillugu ilaatigut ima allassimasoqarpoq: „Asanninnermut kipisaneq atorneqartarpoq pissusilersorneq sunaluunniit eqqortutut isigineqalersinniarlugu. Assersuutigalugu nangeqattaartumi aalajangersimasumi inuusuttoqarpoq ueqarnani naartusumik ikinngutiminullu ima oqartumik: ’Soqutaammat? Victor asavara. . . . Taassuma qitornartaarfiginissaa uannut allanit tamanit pingaarnerpaavoq!’ Taassuma iliornera eqqunngitsutut isumaqarfigiuminaappoq sallaatsumik nipilersuutitaqarmat. Illit aamma Victor nuannaraat. Niviarsiaq iluarisaraat. ’Paasinnipputit.’ Isiginnaartartoq kingusinnerusukkut silattuaqisoq ima oqarpoq: ’Tupinnaqaaq allatut eqqarsartoqalersinnaasoq. Nalunngilarput kinguaassiuutitigut inuunerlunneq ajortuusoq. . . . Paasilersimavarali tamatumunnga eqqarsaatikkut peqataasarlunga.’“

12. Sumit paasinarsiva tv-mi aallakaatitat aalajangersimasut pillugit mianersoqqussut suli naleqqulluartuusoq?

¹² Allaaserisat tamakkua saqqummersinneqarnerata kingorna filmit nangeqattaartullu aserorsaataasut taamatut ittut nalinginnaagaluttuinnarput. Nunani amerlasuuni ulloq unnuarlu tv-kkut aallakaatinneqartarput. Angutit, arnat inuusuttuaqqallu amerlasuut isumartik uummatertillu aliikkusersuutinik taamatut ittunik immertarpaat. Tunngavilersuutilli eqqunngitsut atorlugit imminut salloqittassanngilagut. Inuit ilaat oqarumassapput aliikkusersuutit ajortut silarsuarmi piviusumi pisimasunit ajornerunngitsut — tamannali eqqarsartaasiuvoq kukkusoq. Kristumiu inunnit angerlarsimaffimminut iseqquniarnavianngisaraluaminit aliikkusersorneqarniarluni piaaraluni aalajangerpat ajunngila?

13, 14. Kristumiut ilaasa mianersoqqussutit Vagttårnet-imiittut qanoq iluaqutigisimanerarpaat?

¹³ Amerlasuut ’inussiap aalajaallunilu silatuup’ mianersoqqussutaanik pigiliussinertik iluaqutigaat. (Matthæusi 24:45-47, NV) Atuartartut ilaasa allaatigaat siunnersuut Biibilimik tunngaveqartoq paasiuminartoq atuarlugu inuttut qanoq sunnerneqarlutik. * Ilaat ima nassuerpoq: „Ukiuni 13-ini ’tv-mi nangeqattaartunut narkomaaniusimavunga’. Taamani isumaqarpunga kristumiut ataatsimiinnerinut najuuttartuartillunga oqaluussinermilu ilaannikkuinnaq peqataasartillunga navianartoqanngitsoq. Silamiulli isiginnittaasiat  nangeqattaartuni ersersinneqartoq una isiginnittaaserilersimavara: Uimit ajortumik pineqaraanni imaluunniit asaneqanngitsutut misigigaanni allasiorneq ajunngilaq; uiusup nammineq pisuussutigaa. Taava ’taamaaliornissamut pissutissaqarluartutut’ misigilerama iliuuseq ajortoq tamanna iliuuseriniarlugu aalajangerpunga Jehovamullu uinnullu ajortuliorlunga.“ Arnaq taanna ilaajunnaarsinneqarpoq. Kingusinnerusukkulli silattuaqivoq, allamik isumataarpoq ilanngutiteqqinneqarlunilu. Allaaserisat, tv-mi nangeqattaartut pillugit mianersoqqussutaasut, Jehovap uumigisaanik aliikkutaqannginnissaminut nakussatsissutigai. — Amosi 5:14, 15.

¹⁴ Atuartartoq sunnerneqartoq alla ima allappoq: „Allaaserisat tamakku atuarakkit qiavunga, paasilerparami Jehova uummatikkut iluunngarlunga asajunnaarsimallugu. Guutimut neriorsuivunga nangeqattaartunut tamakkununnga inussiaataajunnaarniarlunga.“ Arnap kristumiup allap allaaserisat tamakku qujassutigeriarlugit nangeqattaartunik tamakkuninnga isiginnaanngitsoorsinnaajunnaarsimanerarpoq imalu nangilluni: „Eqqarsaatigaara . . . Jehovamut attaveqarninnut sunniuteqarsimanersoq. ’Taakku’ qanoq ikinngutigisinnaavakka Jehovamut ikinngutaajutigalunga?“ Ukiut 25-t matuma siorna ajortunngortitsisinnaasunik aallakaatitaqarpat, taavami ullumikkut? (2 Timotheusi 3:13) Aliikkusersuutit aserorsaataasut Saatanip napiaaniutitut atortagai mianersorfigisariaqarpavut — tv-mi nangeqattaartuugaluarpata, qarasaasiakkut pinnguaataagaluarpata nakuusertortallit imaluunniit nipilersukkanik video-ugaluarpata kinguaassiuutitigut inuunerlunnertallit.

Inuttut aaqqiagiinngissutit

15. Kristumiut ilaat qanoq Diaavulumit napitinneqartippat?

¹⁵ Saatanip inuttut aaqqiagiinngissutit atornerluttarpai Jehovap innuttai avissaartuutilersinniarlugit. Napiaaniutaavoq qanorluunniit pisinnaatitaaffeqaraluarluta napitiffigisinnaasarput. Kristumiut ilaat Diaavulumit napitinneqartipput anersaakkut avatangiisini nuannersuni Jehovap uagutsinnut tunniusaani eqqisseqatigiinneq ataasiussuserlu inuttut aaqqiagiinngissutinit aserorneqartikkamikkik. — Tussiaat 133:1-3.

16. Saatanip peqqusersiorluni qanoq ataasiussuserput akornuserniarsaraa?

¹⁶ Sorsunnersuup siulliup nalaani Saatanip Jehovap peqatigiissortaata ilaa nunarsuarmiittoq iluatsinngitsumik nungutinniaraluarpaa erseqqissumik toqqaannartumillu saassussinerit atorlugit. (Saqqummersitat 11:7-13) Taamanerniilli peqqusersiorluni ataasiussuserput akornuserniarsaraa. Inuttut aaqqiagiinngissutit avissaartuussutaalersikkutsigit ’timmiarniaq’ uagutsinni inissarsisimassaarlusooq. Tamanna anersaap illernartup uagut inuttut inuunitsinni aamma ilagiinni sulineranut akornutaasinnaavoq. Akornutaalissagaluarpat Saatanip nuannaarutigissavaa, ilagiinnimi eqqisseqatigiinneq ataasiussuserlu qanorluunniit ittumik akornuserneqaraangata tamatigut oqaluussinermut akornutaasarpoq. — Efesosimiut 4:27, 30-32.

17. Inuttut aaqqiagiinngissuteqartoqarpat ajornartorsiutit aaqqinnissaannut suut iluaqutaasinnaappat?

¹⁷ Taavami uppeqat aaqqiagiinngissuteqarfigigaanni qanoq iliortoqarsinnaava? Ilumoorpoq pissutsit assigiinneq ajortut. Ajornartorsiuteqalernermut pissutaasut arlaliusinnaapput — ajornartorsiummilli aaqqiiniarsarinnginnissamut pissutissaqanngilaq. (Matthæusi 5:23, 24; 18:15-17) Biibilimi siunnersuutit Guutimit isumassarsiarititaapput  naammalluinnarlutillu. Biibilimi najoqqutassiat maleruarneqaraangamik tamatigut sunniuteqarluartarput!

18. Jehovamik ilaarserusunneq inuttut aaqqiagiinnginnerit aaqqinnissaannut qanoq iluaqutigissavarput?

¹⁸ Jehova ’isumakkeerfiginnikkumasarpoq’. (Tussiaat 86:5; 130:4) Taassuminnga ilaarsinitsigut ersersittarparput taassumunnga qitornaalluta asasaasut. (Efesosimiut 5:1) Tamattami ajortiliuvugut Jehovamillu isumakkeerfigineqarnissarput pisariaqartilluinnarlugu. Allamik isumakkeerfiginnikkusuppallaarnata malugigutsigu mianersortariaqarpugut. Taamaaliunngikkutta inussiatut Jiisusip assersuusiamini oqaluttuarisaatut ilersinnaavugut; taassuma isumakkeerumanngilai kiffaqammi akiitsui nammineq akiitsuminut naalakkaminit isumakkeerneqartunut sanilliullugit suunngikkaluartut. Naalagaq tamatuminnga paasitinneqarpoq, kiffarlu akiitsunnguanik isumakkeeriumanngitsoq parnaarussaatippaa. Jiisusip assersuusiani naggaserpaa ima oqarluni: „Taamatuttaaq Ataatama qilammiittup ilarsi kinaluunniit pissavaa qatanngutini uummatimigut isumakkeerfiginngippagu.“ (Matthæusi 18:21-35) Assersuusiamik tamatuminnga eqqarsaatiginneqqissaarneq Jehovallu uagutsinnik qasseriarluni isumakkeerfiginnittarsimaneranik eqqaamanninneq qatannguterpullu aaqqiagiinngissutigisinnaasatsinnik aaqqiinissatsinnut iluaqutaassapput! — Tussiaat 19:15.

„Qutsinnerussaartup toqqorsimaffiani“ toqqissisimaneq

19, 20. Piffissami ulorianartumi matumani qanoq isigisariaqarpavut Jehovap ’toqqorsimaffia’ aamma ’alanngigaa’?

¹⁹ Piffissami ulorianartumi inuuvugut. Jehovap asannilluni sernissorsimanngikkaluarpatigut Saatanip qularnanngitsumik tamatta nungutissimassagaluarpaatigut. „Timmiarniap“ nigaanut napitikkumanata assersuutaasumik sumiiffimmi Jehovap sernissugaaniittuartariaqarpugut. ’Qutsinnerussaartup toqqorsimaffiani issiasariaqarpugut’ aamma ’Ajugaqanngitsup alanngigaani ineqartariaqarluta’. — Tussiaat 91:1.

²⁰ Qanortoq Jehovap siunnersuutai oqaaqqissaarutaalu illersuutitut isigiuartigit, killilersuutitut isiginngisaannarlugit. Tamatta akeraaraarput uagutsinnit silassorinnerusoq uumasutullu kiisortutut ulorianartigisoq. Jehovamit asannittumik ikiorneqanngikkaluarutta arlaannarpulluunniit akeraasumit aniguisinnaassanngikkaluarpoq. (Tussiaat 124:7, 8) Jehova qinnuigisigu sernisoqqulluta „timmiarniap“ nigaanut napitinnginniassagatta! — Matthæusi 6:13. (wE 10/1 07)

[Quppernerup ataani ilanngussat]

Eqqaamavigit?

• Sooq inunnut qununeq napiaaniutaava toqussutaasinnaasoq?

• Saatanip nunap pii ussassaarutitut qanoq atortarpai?

• Saatanip qanoq ililluni kristumiut ilaat aliikkusersuutit aserorsaataasut atorlugit napitissimavai?

• Avissaartuutilersinniarluta Diaavulup napiaaniut suna atortarpaa?

[Atuaqqissaarnermi apeqqutit]

[Qupp. 14-mi assiliartaq]

„Inunnik qunugisaqarneq“ napiaaniutaavoq kristumiut ilaasa napitiffigisaat

[Qupp. 16-mi assiliartaq]

Uppeqat inuttut aaqqiagiinngissuteqarfigigaanni qanoq iliortoqarsinnaava?

[Qupp. 17-mi assiliartaq]

Jehovap uumigisaanik aliikkutaqartarpit?