Angut arnarlu — immikkut tamarmik pingaarutilimmik suliassallit

JEHOVA GUUTIP Adami siulliullugu pinngortippaa, kingornalu Eva. Eva suli pinngortinneqanngitsoq Adami inuunermini misilittagaqalereersimavoq, piffissamilu tamatumani Jehovap maleruagassaqartippaa. (1 Mosesi 2:15-20) Guutip sinniisuatut Adamip najoqqutassiat nuliaminut ingerlateqqittussaavai, taamaattumillu pissusissamisoorluinnarpoq Adamip, Guutimut pallorfiginninnermut atatillugu, sunut tamanut siuttuunissaa.

Aaqqissuussineq tassunga assingusoq kristumiut ilagiivini atuuppoq, misissoqqissaarneratigullu tamanna ilikkagaqarfigingaarsinnaavarput. Apustili Paulusi ima allappoq: ’Akuerisinnaanngilara arnap . . . uiminut naalagaaniarnissaa; arnaq nipaalluni inuussaaq. Adamimi siulliulluni pinngortitaavoq, kingornatigullu Eva.’ (1 Timotheusi 2:12, 13) Imaanngilaq arnaq kristumiut ilagiivisa ataatsimiinnerini oqaaseqaqqusaanngitsoq. Nipaassaaq ima paasisarialimmik ataatsimiinnerup nalaani angummut assortuissanngitsoq imaluunniit saqitsaassutaasumik aallarniissanngitsoq inissisimaffianik ataqqinnippalunngitsumik takutitsisumik. Ilagiinni ajoqersuiniarsarissanngilaq. Angutilli ilagiinni siuttuusussaallutillu ajoqersuisussatut suliassinneqarsimapput, arnalli kristumiut ataatsimiinnerini assigiinngitsutigut peqataanermikkut tapersersuilluarsinnaapput.

Paulusip angutip arnallu Guutip aaqqissuussaani immikkut suliassaat pillugit paasitippaatigut oqarami: „Angummi arnamit pinngilaq, arnarliuna angummit pisoq . . . Taamaattorli [Jehovami] arnaq suunngilaq angut ilagitinnagu, angullu suunngilaq arnaq ilagitinnagu [tassa imminnut pinngitsoorsinnaanngillat]. Soorlumi arnaq angummit pisoq, taama angut arnakkut pisarpoq suullu tamarmik Guutimit pipput.“ — 1 Korinthimiut 11:8-12.

Arnat immikkut pisinnaatitaaffitik annertuut nuannaarutigaat

Inatsisit Guutip Israelikkunnut tunniussaasa atuunneranni, arnat immikkut pisinnaatitaaffippassuaqarput namminerlu iliuuseqarnissaminnut kiffaanngissuseqarlutik. Ussatini 31:10-31-mut eqqartorneqarpoq „arnaq pikkorissoq“ annoraasiassanik kusanartunik pisisartoq kusanartunillu inoqutiminut atisaliortartoq. Aap, „ilulliliortarpoq tuniniagassaminik“! (Versi 13, 21-24) ’Umiarsuartut niuffagiutitut’ arnaq pikkorissoq pitsaanerpaanik nerisassanik aallertarpoq, naak ungasissorsuarmit aasaraluarlugit. (Versi 14) „Eqqarsaatigilluareerlugu narsaammik pissarsisarpoq, iluanaarutinilu atorlugit viinnequteqarfiliortarpoq.“ (Versi 16) ’Suliani iluatsimmata’, ilungersornera kinguneqarluarpoq. (Versi 18) ’Illumini pisartut alaatsinaatiitigalugit’, arnaq eqiasuillunilu Guutimut mianerinnittoq aamma allanik ikiuisarpoq. (Versi 20, 27) Tupinnanngitsumik nersorneqarpoq! — Versi 31.

Mosesip inatsisaata arnat anersaakkut ineriartornissaannut periarfissaqartilluarpai. Assersuutigalugu Josva 8:35-mi ima allassimasoqarpoq: „Mosesip peqqussutai tamarluinnaasa Josvap atuffassissutigai Israelikkunnut katersorsimasunut  tamanut, arnanut meeqqanut takornartanullu malinnaasimasunut.“ Palasi Ezra pillugu Biibilimi ima allassimavoq: „Qaammatit arfineq-aappaata ulluisa siullianni palasi Ezra inatsisit nassarlugit katersorsimasunut angutinut arnanullu tamanullu tusakkaminnik paasinnissinnaasunut tikiuppoq. Isaaffiup Imertartarfiup sioraani ullaannguamiit ullup qiteqqunneranut angutit arnallu tusakkaminnillu paasinnissinnaasut tamaasa inatsisinik atuffappai. Inuillu tamarmik inatsisini allassimasunik tusarnaarluaqqissaarput.“ (Nehemia 8:2, 3) Arnat inatsisinik taamatut atuffassisoqarnera iluaqutigaat. Aamma upperisarsiornikkut nalliuttorsiornerit najuuffigisarpaat. (5 Mosesi 12:12, 18; 16:11, 14) Tamanillu pingaarnerpaavoq Israelitoqqami arnat Jehovamut qanittumik attaveqarsinnaammata nammineerlutillu qinunikkut saaffigisinnaallugu. — 1 Samueli 1:10.

Ukiuni hundredelinni siullerni arnat upperluartut Jiisusimik isumaginninneq immikkut pisinnaatitaaffigaat. (Lukasi 8:1-3) Betaniami unnukkorsiornermi Jiisusi niaquagut isigaatigullu arnap uuliamik kuivaa. (Matthæusi 26:6-13; Johannesi 12:1-7) Jiisusi makititaanermi kingornagut saqqummermat arnat takunnittooqataapput. (Matthæusi 28:1-10; Johannesi 20:1-18) Jiisusip qilaliareernerani eqimattat 120-t missaanniittut katersuuttut ilagaat ’arnat aamma Jiisusip anaanaa Maria’. (Apustilit Suliaat 1:3-15) Arnarpassuit taakkua, tamarmiussagunartut, piinsip ulluani ukiumi 33-mi Jerusalemimi inimi qullermi anersaaq illernartoq kuineqarmat Jiisusillu ajoqersugai tupinnartuliakkut oqaatsinik assigiinngitsunik oqalussinnaalermata najuupput. — Apustilit Suliaat 2:1-12.

Angutit arnallu Joeli 3:1, 2-milu allassimasut apustilip Petrusip piinsip ulluani issuagaata eqquunnerat misigaat: „Anersaannit kuisiumaarpunga inunnut tamanut. Ernisi panisilu siulittuissapput . . . Anersaara kuiumaarpara allaat inussiaatinnut angutinut inussiaatinnullu arnanut ullussani taakkunani.“ (Apustilit Suliaat 2:13-18) Ukiumi 33-mi piinsip ulluata kingorna kristumiut arnat piffissami aalajangersimasumi anersaap tunissutaanik ilangeeqataasinnaanermikkut immikkut pisinnaatitaaffilerneqarput. Takornartat oqaasiinik oqalussinnaapput siulittuisinnaallutillu, pisussanik siumut siulittuinngikkaluarlutik, Biibilimili sallusuissutsinik oqaluttuarlutik.

Paulusip ilagiinnut kristumiunut Romamiittunut allakkamini ’qatanngut arnaq Føbe’ kissalaartumik innersuussutigaa. Aammattaaq arnat  Tryfæna Tryfosalu „Naalakkammi sulisuusut“ eqqartorpai. (Romamiut 16:1, 2, 12) Arnat taakkua ilagiinni kristumiuni utoqqaanertatut ilagiinniluunniit kiffartortutut qinerneqarsimanngikkaluarput, taakkuali — arnarpassuillu allat — angingaartumik immikkut pisinnaatitaaffeqarput Guutimit toqqarneqaramik ernera Jiisusi Kristusi qilammi naalagaaffimmeeqatigisussanngorlugu. — Romamiut 8:16, 17; Galatiamiut 3:28, 29.

Ullumikkut arnat upperluartut aamma pisinnaatitaafferujussuaqarput. Tussiaat 68:12 ima allassimavoq: „[Jehovap] oqaaseq tutsiutitippaa, arnallu amerlaqaat tipaatsunnartumik nalunaariartortut.“ Arnat taamaattut nersortariaqarput. Biibilimik atuaqqissaaqatiginninnermikkut ajoqersuilluarnerat inuppassuit ajoqersuummik sallusuissutaasumik Guutip iluarisaanik ilisarsinerannik kinguneqarpoq. Kristumiut arnat meeqqamik uppertunngornissaannik ikiuisut uiminnillu ilagiinni pisussaaffippassualinnut tapersersuisartut nersorneqartariaqarput. (Ussatit 31:10-12, 28) Arnat kisimiittut aamma Guutip aaqqissuussaani ataqqinartumik inissisimapput, kristumiullu angutit aamma kajumissaarneqarput ’oqaaqqissaassagaat . . . arnat utoqqaat anaanagisutut arnallu inuusuttut qatanngutigisutut tamatigut minguitsuullutik’. — 1 Timotheusi 5:1, 2.

Angutip suliassaa

Kristumiut angutit Guutimit suliassinneqarsimapput, tamannalu ajunngitsumik isumagissagaat naatsorsuutigineqarpoq. Paulusi oqarpoq: „Ilisimaqquarali angutip kialuunniit Kristusi niaqorimmagu, arnap angut niaqorimmagu, Kristusillu niaqua Guutiummat.“ (1 Korinthimiut 11:3) Angut aamma qullersaqarpoq — tassa Kristusi. Tassa angut Kristusimut akisussaaffeqarpoq naggataatigullu Guutimut. Guutillu naatsorsuutigaa angutip oqartussaassutsi asannittumik atussagaa. (Efesosimiut 5:25) Inuup pinngortitaaqqaarneraniilli taamaassimavoq.

Biibilimi takutinneqarpoq Guutip angutit qullersatut inissisimaffeqarnerat naapertorlugu suliassikkai. Assersuutigalugu Jehovap Noa umiarsualioqquaa ulersuartoqarnerani aniguisoqarniassammat. (1 Mosesi 6:9–7:24) Guutip Aaperaat neriorsorpaa kinguaassaagut nunarsuarmi eqqarleriit inuiaallu pilluaqquneqarumaartut. Tamatumani kinguaassaq pingaarnerpaaq tassaavoq Jiisusi Kristusi. (1 Mosesi 12:3; 22:18; Galatiamiut 3:8-16) Guutip Mosesi Israelikkunnik Ægyptenimit aniguisitsisussaattut toqqarpaa. (2 Mosesi 3:9, 10, 12, 18) Mosesittaaq aqqutigalugu Jehovap inatsisinik katitikkanik Mosesip inatsisaanik imaluunniit Inatsisit tunngavigalugit angerutsimik taaneqartartunik tunivai. (2 Mosesi 24:1-18) Biibilimi allattut tamarmik angutaapput.

Paulusi ilagiinni nakkutilliisussatut piumasaqaatit taagormagit angutit pivai. (1 Timotheusi 3:1-7; Titusi 1:5-9) Taamaattumik Jehovap Nalunaajaasuisa ilagiivini angutit nakkutilliisutut imaluunniit utoqqaanertatut kiffartortarput, aamma angutit ilagiinni kiffartortussatut toqqarneqartarput. (Filippimiut 1:1, 2; 1 Timotheusi 3:8-10, 12) Ilagiinni kristumiuni angutit kisimik paarsisuusussaapput. (1 Petrusi 5:1-4) Arnalli aamma Guutip pingaarutilinnik pisinnaatitaaffeqartippai.

Suliassaminnik nuannarinnittut

Angutit arnallu immikkut tamarmik Guutip suliassarititaanik suliaqarumagaangamik nuannaarnermik misigisaqartarput. Uiusut nuliaasullu Kristusip ilagiillu attaveqatigiinnerat ilaaraangassuk, aappariinnerannut pillualersitsisarpoq. Apustili Paulusi ima allappoq: „Angutit, nuliasi asassavasi soorlu Kristusip ilagiit asagai imminullu tunniulluni taakku pillugit . . . Ilississaarli tamassi immikkut nuliasi immissisut asasussaavasi.“ (Efesosimiut 5:25-33) Tassa uiusut oqartussaassusertik asannittumik atussavaat, namminissarsiunngitsumik. Ilagiit kristumiut naammalluinnanngitsunik innuttaqarput. Taamaakkaluartoq Jiisusip asanninneranik isumassuineranillu peqangaarput. Taamatuttaaq kristumiup uiusup nuliani asallugulu sernissortariaqarpaa.

Nuliaasup kristumiup „uini mianerisussaavaa“. (Efesosimiut 5:33) Tamatumunnga tunngatillugu ilagiit maligassatut isigisinnaavai. Efesosimiunut allakkani 5:21-24-mi allassimavoq: „Immissinnut naalatsigeqatigiigitsi Kristusi  mianeralugu, nuliaasusi uissinnut naalatsigitillusi soorlu Naalakkamut, uiusoq nuliaminut niaquummat soorlu Kristusi ilagiinnut niaquusoq timiminullu annaassisuulluni. Soorlu ilagiit Kristusimut naalatsigititaasut taamatut aamma ilissi nuliaasut tamatigut uissinnut naalatsigitissaasi.“ Ilaannikkut immaqa nuliaasup uiminut naalatsigitinnissani ajornakusoortissinnaavaa immaqaluunniit allaat unamminiarnartuutissinnaallugu, taamaaliornerli ’Naalakkami ileqqussaavoq’. (Kolossemiut 3:18) Uiminut naalatsigitinnissani ajornannginnerutissavaa eqqaamaguniuk Jiisusi Kristusimit tamanna iluarinartuusoq.

Uini uppeqatiginngikkaluaruniulluunniit kristumiu nuliaasoq uimi oqartussaaneranut naalatsigitittussaavoq. Apustili Petrusi ima allappoq: „Taamatuttaaq ilissi nuliaasusi uissinnut naalatsigitissaasi, uiusut ilaat oqaatsimut naalasseriikkaluartut oqaluffigineqanngikkaluarlutik nuliamilli inuusaasiatigut ilanngussinnaaqqullugit Guutimik mianerinnillusi inuunersi minguitsoq takulerunikku.“ (1 Petrusi 3:1, 2) Sara, uiminut Aaperaamut ataqqinnittoq, Iisaamut anaananngornini immikkut pisinnaatitaaffigaa taamaalillunilu Jiisusi Kristusimut siuaasanngorluni. (Hebræerit 11:11, 12; 1 Petrusi 3:5, 6) Nuliaasut Saratut ileqqoqartut qularnanngivissumik Guutimit akilerneqarumaarput.

Angutit arnallu immikkut tamarmik suliassaq Guutip tunniussimasaa suliarigunikku, akunnerminni eqqissineqalersitsillutillu isumaqatigiinneqalersitsissapput. Marluullutik nuannaalerlutillu nalerisimaalissapput. Biibilillu piumasaqaataanut ataqqinnilluni malinninneq Guutip aaqqissuussaani atorfimmik immikkut pisinnaatitaaffeqarnermik kinguneqassaaq. (wE 1/15 07)

[Qupp. 7-mi ungalusaq]

Suliassaq Guutip suliakkiussaa qanoq isigaat?

Suliassaq Guutip suliakkiussaa arnat kristumiut qanoq isigaat? „Uima asannittumik isumassuisumillu oqartussaassuseqarnini atorpaa,“ Susan oqaluttuarpoq. „Aalajangigassaqaraangat oqaloqatigiittarpugut, qanoq iliortoqarnissaanik qanorlu iliortoqannginnissaanik aalajangiigaangat, naluneq ajorpara aalajangigaa tamatsinnut pitsaanerpaajusoq. Jehovap nuliaasunut aaqqissuussaa pilluaatigaara aappariinnitsinnullu nakussatsissutigalugu. Qanimut asannittumillu attaveqatigiippugut anersaakkullu anguniagaqaraangatta suleqatigiilluartarluta.“

Arnaq Mindymik atilik oqaluttuarpoq: „Suliassaq Jehovap kiffaminut arnanut suliakkiussaa uagutsinnut asanninneranut uppernarsaataavoq. Misigivunga uinnut ataqqinnikkuma ilagiinnilu suliassaqaraangat tapersersortarukku taava Jehovap aaqqissuussaanut qujamasunnera takutissinnaallugu.“

[Qupp. 5-mi assiliartat]

Angutip qullersatut inissisimanera tunngavigalugu Guutip Noa, Aaperaat aamma Mosesi assigiinngitsunik suliassippai

[Qupp. 7-mi assiliartaq]

’Arnat amerlaqaat tipaatsunnartumik nalunaariartortut’