Angut arnarlu — imminnut tulluartumik pinngortitat

ANGUTIT arnallu imminnut pileriffigeqatigiittuaannarnikuupput. Jehova Guutip taamaattussanngortissimavai. Takusinnaavaa inuk pinngortitaq siulleq, Adami, kisimiimmat iluanngitsoq, taamaattumillu ’ikiortissiuppaa taassumunnga tulluartumik’.

Jehovap Adami itisuumik sinitsippaa. Taava Adamip najungasuisa ilaat tiguaa ’tigusanilu arnaliaraa, taannalu Adamimukaappaa’. Adamip pinngortitaq taanna kusanartoq takugamiuk qiimmatsangaarami ima nillerpoq: „Tamanna tassa saaneq saanerma ilaa uinillu uinimma ilaa.“ Evap naammalluinnartuunerata, arnarpaluttuunerata aammalu piginnaasaasa asanangaartunngortippaa. Adamilu naammalluinnartoq anguterpaluttorlu ataqqinarpasinnerata pissusissamisoortumik ataqqineqartariaqartunngortippaa. Imminnut tulluartumik pinngortitaapput. Biibilimi ima allassimavoq: „Tamanna pillugu angutip ataatani anaananilu qimallugit nuliani attavigissavaa, uiniulissappullu ataaseq.“ — 1 Mosesi 2:18-24.

Taamaakkaluartoq ullumikkut ilaqutariit avissaartuuttarnerat nalinginnaalluinnarpoq, aamma angutit arnallu aappariinnerat amerlasuutigut timikkut oqaatsitigulluunniit nakuusernernik ilaqarajuttarpoq imaluunniit namminissarsiorneq salliutinneqartarluni. Angutip arnallu akornanni unammillertarneq akerleriilersitseqataallunilu isumaqatigiinngissuteqalersitsisarpoq. Tamakku tamarmik Guutip angummut arnamullu siunertarisaanut akerliupput. Angut suliassamut pingaarutilimmut akisussaaffeqartussaalluni pinngortitaavoq. Arnaq pingaaruteqarluinnartumik angutip saniani inissisimaffeqassaaq, taakkulu isumaqatigiillutik suleqatigiinnissaat siunertaavoq. Inuiaat pinngortitaaqqaarneraniilli angutit arnallu Guutimut mianerinnittut Jehovap suliassiissutaa aalajaallutik maleruarniartarsimavaat, tamannalu pilluarnerannut nalerisimaarnerannullu ilasaataasimavoq. Immikkut tamarmik sunik suliassinneqarsimappat qanorlu tamanna ajunngitsumik suliarisinnaasimavaat?

[Qupp. 3-mi assiliartaq]

Angut arnarlu Guutip aaqqissuussaani pingaarutilimmik akisussaaffilerneqarlutik pinngortitaapput