Jehovap oqaasia uumavoq

Haggajip Zakariallu allagaannit pingaarnersat

UKIOQ 520-uvoq u.n.s. Ukiut 16-it matuma siorna juutit Babylonimut aallarussaaqqanerminnit nunaminnut utertut Jerusalemimi Jehovap naalaffia toqqavilerpaat. Taamaattoq naalaffik suli naammassineqanngilaq, sanaartornerlu inerteqqutaavoq. Jehovap pruffiiti Haggaji taassumanngalu qaammatinik marlunnik kingulliutillugu pruffiiti Zakaria sassartippai oqaatsini oqaluussissutigeqqullugu.

Haggaji Zakarialu assigiimmik siunertaqarput: inuit naalaffimmik sanaqqiinerminnik ingerlatsitsiinnarusulersinnissaat. Pruffiitit marluk taakku ilungersuutaat kinguneqarluarpoq, ukiullu tallimat tamatuma kingorna naalaffik naammassineqarpoq. Haggajip Zakariallu oqaluussissutigisaat Biibilimi taakkua aqqinik taaguutilinni allassimapput. Haggajip allagai 520-mi u.n.s. Zakariallu allagai 518-imi u.n.s. allallugit naammassineqarput. Pruffiitit taakku suliaqarnerattulli uagut aamma Guutimeersumik suliassaqarpugut pissutsit aaqqissuussaanerata maanna atuuttup naggatissaa nalliutsinnagu naammassisariaqakkatsinnik. Tassaavoq Guutip naalagaaffianik oqaluussissutiginninneq ajoqersuganngortitsiortornerlu. Haggajip Zakariallu allagai qanoq qiimmassaatigisinnaanerlugit misissoriartigu.

„INGERLAVIGISASI UUMMATISSINNUT EQQUMAFFIGITISSIGIT“

(Haggaji 1:1–2:23)

Ullut 112-it ingerlaneranni Haggajip tusarliussat sisamat kajumissinartut saqqummiuppai. Siulleq imaappoq: „Ingerlavigisasi uummatissinnut eqqumaffigitissigit (NV). Qaqqanukaritsi qisunnik aallerlusi illussarlu sanasiuk; tamanna nuannaarutigiumaarpara naalannassuseralu saqqummiukkumaarlugu, oqarpoq [Jehova].“ (Haggaji 1:7, 8) Tamanna inuit ajunngitsumik periaaseqarfigaat. Tusarliussap aappaani Jehova ima neriorsuivoq: „Illu manna alutornarsisikkumaarpara.“ — Haggaji 2:7.

Tusarliussat pingajuat naapertorlugu naalaffiup sanaqqinneqarnerani suliamik sumiginnaaneq ’inunnik taakkualu assaasa suliaannik tamanik’ Jehovap isaani minguttuunngortitsivoq. Ullormiilli iluarsaaqqiinermik sulillutik aallartiffianni Jehovap pilluaqqujumavai. Tusarliussat sisamaat naapertorlugu Jehovap ’inuiaat naalagaaffii pissaasut suujunnaarsinniarpai’ naalagaatitarlu Zerubbabeli ’assammiunngortillugu naqitsit’. — Haggaji 2:14, 19, 22, 23.

 Allassimaffiit pillugit apeqqutit akineqartut:

1:6 — Oqaatsit „imertarpusi aalakuussanasili“ qanoq paasisariaqarpat? Viinnimik amigaateqarneq oqaatsini taakkunani ersersinneqaannarpoq. Juutit Jehovamit pilluaqqusaannginnamik viinnissaqarniarnerat killeqassaaq — aalakuulissutaasinnaanngivilluni.

2:6, 7, 21, 22 — Kina imaluunniit suna sajutsitsiva, tamannalu qanoq kinguneqarpa? Jehovap ’inuiaat tamaasa sajutsippai’ silarsuaq tamakkerlugu Guutip naalagaaffianik oqaluussisoqarneratigut. Oqaluussinerup aamma kinguneraa ’inuiaat erlinnartuutaat’ Jehovap illuanut aggiussorneqarnerat, taamaalillunilu illu naalannarsisinneqarpoq. Piffissap ingerlanerani ’katersaarsuit Jehovaata qilak nunalu, imaq nunalu panertoq’ sajutsissavai taamaalilluni pissutsit aaqqissuussaanerat ajortoq maanna atuuttoq tamaat suujunnaarsillugu. — Hebræerit 12:26, 27.

2:9 — Qanoq ’naalaffik manna naalaffitoqqamit suli alutornarnerua’? Taamaappoq ikinnerpaamik pingasut uku pissutigalugit: naalaffiup ukiut qassit piusimaneranut atatillugu, tassani kiap ilinniartitsisuusimaneranut atatillugu, tassungalu qassit Jehovamik pallorfiginnikkiartortarnerinut atatillugu. Salomop naalaffia ukiuni 420-ni piuvoq, 1027-miit u.n.s. 607-imut u.n.s., ’naalaffilli manna’, tassa kingulleq, ukiuni 580-ini atorneqarpoq, 515-imi u.n.s. naammassineqarnerminiit 70-imi u.n.k. aserorneqarnissami tungaanut. Aammattaaq Missiarsi — Jiisusi Kristusi — naalaffimmi kingullermi ilinniartitsivoq, Jehovamillu pallorfiginnikkiartorlutik ’naalaffitoqqamut’ ornigussortunit naalaffimmut kingullermut ornigussortut amerlanerupput. — Apustilit Suliaat 2:1-11.

Ilinniarfigisinnaasavut:

1:2-4. Oqaluussinermut akerlilersuisoqarnerata pingaarnersiuinitsinnik allannguisittariaqanngilaatigut ’Guutip naalagaaffia ujaqqaarunnaarlugu’ nammineq soqutigisatsinnik salliutitsilersilluta. — Matthæusi 6:33.

1:5, 7. Silatusaassaagut ’ingerlavigisavut uummatitsinnut eqqumaffigitikkutsigit’ inooriaasittalu Jehovamut attaveqarnitsinnut qanoq sunniuteqartarnera eqqarsaatigeqqissaartarutsigu.

1:6, 9-11; 2:14-17. Haggajip nalaani juutit namminermut tunngasut suliaralugit suleruloortarput, suliamilli inerititaannik katersuissanatik. Naalaffik sumiginnarpaat taamaattumillu Jehovamit pilluaqqusaanngillat. Sammisassat anersaakkut ittut salliutittariaqarpavut uummatikkullu iluunngarluta Guutimut kiffartorluta, eqqaamallutigu nunap piisigut qanorluunniit pigisakitsigigaluarutta qanorluunniillu pigisaqartigigaluarutta ’Jehovap pilluaqqusinera pisuunngortitsisartoq’. — Ussatit 10:22.

2:15, 18. Jehovap juutit kajumissaarpai eqqumaffigissagaat ulloq taanna aallarnerfigalugu qanoq pisoqassanersoq, siornatigut sumiginnaanertik pinnagu, sanaqqiinermili suliartik. Taamatuttaaq uagut Jehovamut pallorfiginninnitsinni siumut isiginiarluta ilungersortariaqarpugut.

„INUIT NAKUUSSUSIATIGUT PINNANI UANGA ANERSAAKKUT PISSAAQ“

(Zakaria 1:1–14:21)

Zakaria pruffiititut aallartippoq juutit ’Jehovamut saannissaannik’ kajumissaarlugit. (Zakaria 1:3) Takorruukkat arfineq-pingasut tulliuttut naalaffimmik sanaqqiinerup Jehovamit najorneqarnissaanik neriorsuutaapput. (Takuuk ungalusaq „Zakariap takorruugai assersuutaasut arfineq-pingasut“.) Sanaartorneq naammassineqassaaq „inuit pissaaneratigut pinnani inuillu nakuussusiatigut pinnani uanga anersaakkut [tassa: Jehovap anersaavatigut] pissaaq.“ (Zakaria 4:6) Angutip Semakimik atillip „[Jehovap] naalaffissaa sanajumaarpaa“ tassaassallunilu ’palasiusoq issiavissaarsuarmini issiajumaartoq’. — Zakaria 6:12, 13.

Aallartitsisoqarpoq Jerusalemip aserugaanera eqqaaniarlugu iisinnginniarnermi ileqquusut pillugit palasit aperiartortillugit. Jehova Zakariamut oqarpoq Jerusalemip aserugaanera eqqaaniarlugu iisinnginniarfiusut sisamaasut nalaanni aliasunnerit ’nuannaarfissanngussasut tipaatsuffissanngussallutillu, nalliuttorsiorfinngussasut nuannersut’. (Zakaria 7:2, 3; 8:19) Tusarliussat marluk tulliuttut tassaapput inuiannut pruffiitioqqusersunullu eqqartuussutit aamma Missiarsi pillugu siulittuutit Guutillu innuttaasa kingumut aaqqissuugaalluartunngortinneqarnissaannik tusarliussaq. — Zakaria 9:1; 12:1.

 Allassimaffiit pillugit apeqqutit akineqartut:

2:5 — Sooq angutip Jerusalemi ussersaat allunaasaq atorlugu uuttortarpaa? Taamaaliortoqarunarpoq illoqarfik kaajallallugu illersuutaasumik qarmasualiortoqarnissaa eqqarsaatigalugu. Inngilip angummut nassuiarpaa Jerusalemi alliartussasoq Jehovamillu illersorneqassasoq. — Zakaria 2:7-9.

6:11-13 — Palasiuneq Josva kunngisut niaqoruserneqarami tassaalerpa kunngiullunilu palasiusoq? Naagga, Josva Daavip kinguaavisa kunngikkormiut ilaginngilaat. Kunngisulli niaqoruserneqarami Missiarsimut siulittuutaalerpoq assersuutaasoq. (Hebræerit 6:20) ’Semaki’ pillugu siulittuut qilammi kunngiullunilu palasiusumi Kristusi Jiisusimi eqquuppoq. (Jeremia 23:5) Soorlu Josva juutinut nunaminnut utertunut naalaffimmi sanaqqitami palasiunerusoq, taamatulli Jiisusi Jehovap naalaffiani anersaakkut ittumi pallorfiginninnermut ilumoortumut palasiuneruvoq.

8:1-23 — Versini taakkunani tusarliussat quliusut qanga eqquuppat? „Katersaarsuit [Jehovaata] oqaasia imaappoq“, tusarliussat tamarmik taama aallartipput tassaappullu Guutip innuttaminut eqqissineqarnissamik neriorsuutai. Tusarliussat taakkua ilaat 500-kkunni u.n.s. eqquupput, 1919-illi kingorna tamarmik eqquupput imaluunniit ullumikkut eqquutilerlutik. *

8:3 — Sooq Jerusalemi „illoqarfimmik unneqqarissumik“ taaneqarpa? Jerusalemi 607-imi u.n.s. aserugaanngikkallarami ’illoqarfimmik naalasseriitsumik’ taaneqartarpoq, illoqarfimmimi pruffiitit palasillu peqquserluttuupput inuillu ilumuunngitsuullutik. (Sefania 3:1; Jeremia 6:13; 7:29-34) Naalaffilli sanaqqinneqareerpat inuillu Jehovamik pallorfiginninnermik aallussillualerpata, sallusuissutit pallorfiginninnermut minguitsumut attuumassuteqartut illoqarfimmi eqqartorneqartalissapput, Jerusalemilu „illoqarfimmik unneqqarissumik“ taaneqartalissaaq.

11:7-14 — Zakariap ajaappiaq „kusanassuseq“-mik taaneqartoq ajaappiarlu alla „qilerut“-mik taaneqartoq napimmagit qanoq isumaqarpa? Zakaria ’savaatinik toqutassanik paarsisussatut’ — inunnik savatut ittunik, siulersuisuminnilli atornerlunneqartunut — aallartitatut eqqaaneqarpoq. Zakariap savanik paarsisuunera assersuutaavoq Jiisusi Kristusimut, Guutip innuttamisut angerfigeqatigisaanut aallartitatumut, taakkunanngali ajattugaasumut. Zakariap ajaappissamik „kusanassuseq“-mik napisinera assersuutaavoq Guutip Inatsisit tunngavigalugit juutinut angerusianik atorunnaarsitsinissaanut taakkuninngalu ’kusanartumik’ iliorfiginnikkunnaarnissaanut. Ajaappissap „qilerut“-ip napineqarnera isumaqarpoq Judakkut Israelikkullu teokratii tunngavigalugu qatanngutigiissuartut ’qilerutaat’ kipineqassasoq.

12:11 — „Kappialaneq Hadad-Rimmonip Megiddop Qooruani“ suua? Judami kunngi Josija Egyptenip faraoanut Nekomut sorsutsillutik „Megiddop Qooruani“ toqutaavoq, toquneralu ukiut ingerlaneranni upputini kappialaatigineqartarpoq. (2 Nalunaarsuutit 35:25) Taamaattumik ’Hadad-Rimmonimi kappialaneq’ tassaasinnaavoq Josijap toquneranik aliasuutiginninneq.

Ilinniarfigisinnaasavut:

1:2-6; 7:11-14. Jehovap peqqissimillutik perorsaatissinneqarnerminnik akuerinnittut uummatikkullu iluunngarlutik kiffartornikkut imminut utertut iluarai taakkununngalu saattarluni. Tusarliussaminilli ’naalakkumanngitsut; uteriillutik tunussisut, siutiminnillu tutsarluttunngortitsisut’ ikioqqullutik nillianerat tusarumanngilai.

4:6, 7. Akornutit suulluunniit angivallaanngillat Jehovap anersaaminit ajugaaffiginissaannut  naalaffiullu sanaqqinneqarnerata naammassineqarneranik isumaginninnissaanut. Guutimut kiffartornitsinni qanorluunniit ajornartorsiulissagaluarutta Jehovamut uppernermik ersersitsinikkut ajugaaffigisinnaavavut. — Matthæusi 17:20.

4:10. Jehovap nakkutilliinerani Zerubbabelip taassumunngalu innuttaasut Guutip najoqqutassiai qutsissut naapertorlugit naalaffik naammassivaat. Jehovap naatsorsuutigisaanik eqqortitsinissamut inunnut naammalluinnanngitsunut sapernarpallaanngilaq.

7:8-10; 8:16, 17. Jehovamit iluarisaassagutta naapertuilluartumik iliortariaqarpugut, ilumoorfiginnilluta tunniusimasariaqarpugut, naakkittarfigeqatigiittariaqarpugut immitsinnullu ilumoortumik oqaluffigisariaqarluta.

8:9-13. Jehovap pilluaqqussavaatigut uagutsinnut suliassiissutaa ’tatitusaarluta’ suliarigutsigu. Pilluaqqussutinut ilaapput eqqissineq, toqqissisimaneq anersaakkullu ineriartorneq.

12:6. Jehovap innuttaanik nakkutilliisut, ’Judakkunnut siulersortaasut’ (1900/1961), aallussilluangaarlutik ’nanerussatut ikumasutut’ ittariaqarput.

13:3. Guutimut ilumoortumut taassumalu peqatigiissortaanut ilumoorfiginninnerput inunnut, qanorluunniit qanitaritigisaraluatsinnut, kikkunnulluunniit ilumoorfiginninnitsinnit pingaarnerutittariaqarparput.

13:8, 9. Tunussisut Jehovap ajattugai amerlaqaat — nunap inuisa pingajorarterutaat. Pingajorarterutaannaat innikkullusooq minguiarneqassapput. Ullumikkut kristumiuunerartut, kristumiutut imminut isigisut amerlanerpaartaat, Jehovamit ajattorneqarput. Ikittuinnaat, kristumiut tanitat, ’Jehovap aqqanik torlorfiginnipput’ minguiarneqarnissaminnullu naalatsigitillutik. Paasinarsivoq taakku uppeqatitillu Jehovap Nalunaajaasuisut taaguuteqarnertik asuliinnaatinngikkaat.

Aallussilluarluni iliuuseqarnissamut kajumissisinneqarneq

Haggajip Zakariallu tusarliussaat ullumikkut uagutsinnut qanoq sunniuteqarpat? Taakku tusarliussaat naalaffiup sanaqqinnissaanik juutinik qanoq kajumissisitsisimanerat eqqarsaatigigaangatsigu, oqaluussinermi ajoqersuganngortitsiortornermilu aallussilluartuunissamut kajumilertarpugut, ilaa?

Zakariap siulittuutigaa Missiarsip ’siutituumik qimussernissaa’, „sølvi sekelinik 30-nik naleqartoq“ pillugu killuutigineqarnissaa, persuttarneqarnissaa savallu siammartinneqarnissaat. (Zakaria 9:9; 11:12; 13:7) Uppernitsinnut pingaaruteqangaarpoq eqqarsaatigeqqissaassallugu Missiarsi pillugu siulittuutit qanoq eqquunnersut! (Matthæusi 21:1-9; 26:31, 56; 27:3-10) Tamanna Jehovap oqaasianik taassumalu annaassissutissatut aaqqissuussaanik upperinninnitsinnut nakussatsissutaavoq. — Hebræerit 4:12. (wE 12/1 07)

[Quppernerup ataani ilanngussaq]

[Qupp. 15-mi ungalusaq]

ZAKARIAP TAKORRUUGAI ASSERSUUTAASUT ARFINEQ-PINGASUT ZAKARIAP UKUNANI ALLATAI:

1:8-17: Qulakkeerutaapput naalaffiup naammassineqarnissaanut, paasititsippullu Jerusalemi illoqarfiillu allat pilluaqquneqassasut.

2:1-4: Neriorsuutaapput ’nassuit sisamat Judamik tamanut tamaanga siammartitsisut’, tassa naalagaaffiit Jehovamik pallorfiginninnermik akerlilersuisut tamarmik, piujunnaarumaarnerannik.

2:5-17: Uppernarsaataapput Jerusalemip alliartornissaanut, Jehovalu tassunga ’qarmarsuujumaartoq innerinnaasoq’ — illersuutaajumaartoq.

3:1-10: Paasititsipput naalaffiliornermik akerlilersuinermi Saatani akuusoq, palasiunerlu Josva aniguisinneqarlunilu minguiarneqassasoq.

4:1-14: Neriorsuutaapput akornutaasut qaqqarsuartut ittut ajugaaffigineqassasut, naalagaatitallu Zerubbabelip naalaffiup sanaqqinneqarnera naammassissagaa.

5:1-4: Nalunaarutigineqarpoq unioqqutitsisunut perloqqussut.

5:5-11: Siulittuutaapput ajussutsip piuneerunnissaanut.

6:1-8: Neriorsuutaapput inngilit suliamik nakkutilliiumaarnerannik sernissuiumaarnerannillu.

[Qupp. 12-mi assiliartaq]

Haggajip Zakariallu tusarliussaat sumik siunertaqarpat?

[Qupp. 14-mi assiliartaq]

Nakkutilliisut „nanerussatut ikualasutut“ ittuunerat qanoq paasisariaqarpa?