’Guutip itissusiinik’ misissueqqissaarit

„Anersaap suut tamaasa killisiortarpai [misissoqqissaartarpai, NV] Guutip itissusiinut allaat.“ — 1 KORINTHIMIUT 2:10.

1. Sallusuissutit Biibilimeersut atuaqqissaaqatigineqalerlaat nuannaarutigingaartagaat suuppat?

ILAGIINNI kristumiuniittugut amerlanersatta eqqaamavaat sallusuissut ilinnialeratsigu qanoq nuannaartigisugut. Paasivarput Jehovap aqqata pingaaruteqassusia, sooq Jehova naalliunnartoqarneranik akuerinninnersoq, sooq inuit ilaat qilaliassanersut aamma inuiaat aalajaatsut kinguleruttut qanoq siunissaqassanersut. Immaqa siornatigut Biibilimik atuartarsimavugut, tamakkuali tamarmik uagutsinnut isertuunneqarput, soorluttaaq amerlanersaannut taamaattoq. Angut koraalit ikkanninnguuttut killinganni immamik nakkussisoq assigaarput. Immikkut atortoqarnani kusanartut immap iluaniittut ilaminiinnanngui takusinnaavai. Aqqartartulli isaruai atorlugit imaluunniit umiatsiaq igalaaminermik natilik atorlugu koraalit, aalisakkat qitupeqqallu qalipaatigissaartut pinngortitallu alutornartut allat alutorsaatigingaakkaminik takusinnaassavai. Tamatumunnga assingusumik misigisaqarpugut Biibilimik paasinninnissatsinnut ikiorneqaratta ’Guutillu itissusiinik’ siullermik takusaqallatsiaratta. — 1 Korinthimiut 2:8-10.

2. Guutip oqaasiisa ilinniarfiginerat sooq nuannaarutigineqartuaannarsinnaava?

² Sallusuissummik Biibilimeersumik qarsupittuinnarmik ilisimasaqarnissarput — takusaqallatsiarsimanerput — naammagiinnassavarput? Oqariartaatsimi ’Guutip itissusii’-ni pineqarpoq Guutip ilisimassusianik kristumiunut anersaaq illernartoq aqqutigalugu saqqummersinneqarsimasumik, allanulli isertorneqartumik, paasinninneq. (1 Korinthimiut 2:7) Guutip ilisimassusianik misissuinissamut periarfissat killeqanngillat, misissuinerpullu nuannaarutigingaarsinnaavarput. Ilisimassummut Guutip iliuuseqarnermini atortagaanut tunngasut ilaannai paasisinnaassavavut. Biibilimi sallusuissutit tunngaviusut pillugit ilinnialeqqaaratta nuannaarnitsitut naassaanngitsumik  nuannaarsinnaavugut ’Guutip itissusiinik’ misissueqqissaartuaannarutta.

3. Sooq upperisatsinnik upperinninnitsinnut pissutaasunik paasinnilluartariaqarpugut?

³ Sallusuissutinik anersaakkut ittunik itinerusunik tamakkuninnga paasinninnissaq sooq pisariaqartipparput? Pissutigalugu upperisatta suunerat ilisimaannarnagu, aammali sooq taakkuninnga upperinninnitsinnik paasinninnerput — tassa upperisatsinnut tunngaviusunik ilisimanninnerput — uppernitsinnut nakussatsissutaassammat. Biibilimi kajumissaarneqarpugut ’sianigileqqullutigu [qulakkeeqqullugu, NV] sunaasoq Guutip piumasaa: ajunngitsoq, iluarinartoq, naammalluinnartoq’, taamaaliorsinnaavugullu siuneqassuserput atorlugu. (Romamiut 12:1, 2) Paasigaangatsigu sooq Jehovap aalajangersimasumik inooriaaseqarnissarput piumasarigaa taassumunnga naalannissarput suli aalajangiusimanerulertarparput. Taamaattumik ’Guutip itissusiinik’ ilisimasaqarneq eqqunngitsuliornissamut ussernartunik akiuinissamut nakussatsissutigisinnaavarput, aamma ’ajunngitsuliornissamik noqqaassuteqarnissamut’ kajumississutigisinnaavarput. — Titusi 2:14.

4. Biibilimik atuaqqissaarnermut suut ilaappat?

⁴ Sallusuissutit anersaakkut ittut itinerusut paasiumallugit atuaqqissaartariaqarpugut. Atuaqqissaarnerli qarsupittumik atuarnertut inngilaq. Atuaqqissaarneq tassaavoq paasissutissanik peqqissaarluni paasiniaaneq, paasiniarlugu taakku ’oqaatsinut peqqissinartunut najoqqutassiamut’ ilisimariikkatsinnut qanoq naapertuunnersut. (2 Timotheusi 1:13, NV) Tamatumunnga ilaavoq oqaatigineqartunut pissutaasunik paasinninneq. Biibilimik atuaqqissaarnermut ilaasariaqarpoq atuakkanik eqqarsaatiginneqqissaarneq, ilikkakkat silatusaarluni aalajangiinissamut allanillu ikiuinissamut qanoq atorneqarsinnaanersut paasiniarlugu. ’Allakkat illernartut tamarmik Guutip sunniineratigut isumassarsiarititaallutillu iluaqutaammata’ (NV), „oqaaseq sunaluunniit Guutip qarnanit anisoq“ atuaqqissaarnitsinnut ilaasariaqarpoq. (2 Timotheusi 3:16, 17; Matthæusi 4:4) Biibilimik atuaqqissaarneq ilungersornarsinnaavoq. Aammattaarli nuannersuusinnaavoq, aamma ’Guutip itissusiinik’ paasinninnissaq sapernanngilaq.

Jehovap maniguuttut paasinninnissaannut ikiortarpai

5. ’Guutip itissusii’ kikkut paasisinnaavaat?

⁵ Atuarfimmi angusaqarluarsimanngikkaluaruilluunniit aamma atuaqqissaarneq sungiusimanngikkaluarukkuluunniit isumaqassanngilatit ’Guutip itissusiinik’ paasinnissinnaanak. Jiisusi nunarsuarmiitillugu inunnut ilisimasunuunngitsoq sianisuunuunngitsorlu, inuinnaasunulli immikkut ilinniagaqarsimanngitsunut Guutip kiffaanit ilinniartinneqarnissaminnut maniguussuseqartunut, Jehova siunertami ilaanik paasinarsisitsivoq. Taakkua ilinniarfinni ilinniarsimasunut naleqqiullugit ’meerannguatut’ ipput. (Matthæusi 11:25; Apustilit Suliaat 4:13) „Guutip asasiminut piareersagai“ pillugit apustilip Paulusip uppeqatini ima allaffigai: „Tamakku Guutip Anersaakkut uatsinnut saqqummersippai. Anersaammi suut tamaasa killisiortarpai [misissoqqissaartarpai, NV] Guutip itissusiinut allaat.“ — 1 Korinthimiut 2:9, 10.

6. Korinthimiunut allakkani 2:10-mi allassimasut qanoq paasisariaqarpat?

⁶ Guutip anersaava qanoq ililluni „Guutip itissusiinut allaat“ misissueqqissaartarpa? Jehovap kristumiut tamaasa ataasiakkaarlugit saqqummersitsiviginagit anersaaq illernartoq atorlugu peqatigiissortani, Biibilimik paasinninnissamut innuttaminut iluaqutaasut, siulersortarpai. (Apustilit Suliaat 20:28; Efesosimiut 4:3-6) Silarsuaq tamakkerlugu ilagiit tamarmik Biibilimik atuaqqissaarnermut pilersaarut ataaseq malittarpaat, ukiualuillu ingerlaneranni Biibilimi ajoqersuutigineqartut tamaasa sammisarpaat. Anersaap illernartup ilagiit aqqutigalugit inuit ’Guutip  itissusiinik’ paasinninnissamut pisariaqartumik eqqortumik isiginnittaaseqalernissaannut ikiortarpai. — Apustilit Suliaat 5:32.

Suut „Guutip itissusiinut“ ilaanersut

7. Sooq inuppassuit ’Guutip itissusiinik’ paasinninngillat?

⁷ Isumaqassanngilagut sallusuissutit anersaakkut ittut itinerusut paasiuminaatsuusariaqartut. ’Guutip itissusii’ pillugit ilisimasassat inuit amerlanersaannut isertugaapput — imaanngitsoq Guutip ilisimassusia paasiuminaappallaarmat, Saatanilli inuit salloqittarmagit Jehovap peqatigiissortani aqqutigalugit ikiuiumaneranik itigartitsisillugit. — 2 Korinthimiut 4:3, 4.

8. Paulusip Efesosimiunut allakkamini kapitalit pingajuanni sallusuissutit itinerusut suut innersuussutigai?

⁸ Paulusip Efesosimiunut allagaani kapitalit pingajuannit erserpoq sallusuissuterpassuit, Jehovap innuttaasa amerlanersaannit paasilluarneqartut, „Guutip itissusiinut“ ilaasut, assersuutigalugu kinguaassap neriorsuutigisap kinaaneranik sallusuissut, inuianneersut qilaliarnissamik neriugisaqartut toqqarneqarnerat pillugu sallusuissut naalagaaffillu Missiarsikkoortoq pillugu sallusuissut. Paulusi ima allappoq: „Siulitsinni tamanna inuit qitornaannut ilisimalersinneqarsimanngilaq maanna saqqummiunneqarneratut apustiliinut pruffiitiinullu illernartunut Anersaakkut: Tassa Guutimik nalusut kingornusseqataasussaasut timimullu ilanngutitaaqataasut Kristusi-Jiisusimillu neriorsuummik pissarseqataatitaasut.“ Paulusi allappoq suliassinneqarsimalluni „tamanut ilisimalersissallugu annaassinissamik pilersaarut anngigisami pinngortoqanngikkallarneraniilli Guutimi suut tamarmik pinngortitsisaanni toqqortaasumiittoq sunaanersoq“. — Efesosimiut 3:5-9.

9. Sooq ’Guutip itissusiinik’ paasinninneq immikkut pisinnaatitaaffiua?

⁹ Paulusip nangilluni nassuiarpaa Guutip piumasaanut aamma ilaasoq ’Guutip tamatigooqisumik ilisimassusiata ilagiit aqqutigalugit maanna pissaanilinnit qullersaasunillu qilaap ataaniittunit ilisimaneqalernissaa’. (Efesosimiut 3:10) Allaat inngilit ilisimassummik Jehovap ilagiinnik kristumiunik isumassuinermini sakkugisaanik maluginiaallutillu paasinninnertik iluaqutigisinnaavaat. Allaat inngilit soqutigisaannik paasinninnerput immikkut pisinnaatitaaffiuvoq angingaartoq! (1 Petrusi 1:10-12) Paulusip nangilluni allaatigisaa tassaavoq kristumiutut uppernerup ’silissusianik takissusianillu portussusianillu itissusianillu paasinninnissatsinnik’ ilungersuutiginnittariaqarnerput. (Efesosimiut 3:11, 18) Maanna sallusuissutit anersaakkut ittut itinerusut ilaannik paasinninnerunissatsinnut immaqa iluaqutaasinnaasunik misissueriarta.

Sallusuissutit anersaakkut ittut itinerusut ilaat

10, 11. Biibili naapertorlugu Jiisusi qanga arnap qilammiup Guutip pigisaata ’kinguaassaanut’ ilaalerpa pingaarneq?

¹⁰ Nalunngilarput Jiisusi arnap qilammiup Guutip pigisaata ’kinguaassaata’ pingaarnerusortarigaa, Mosesimik allakkani siullerni 3:15-imi eqqartorneqartoq. Paasinninnerujumalluta ima aperisinnaavugut: ’Jiisusi qanga kinguaassanngorami neriorsuutigisaq? Inuttut inunngunngikkallarami, inuttut inunngorami, kuisikkami, imaluunniit makititaagami?’

¹¹ Guuti neriorsuisimavoq peqatigiissortami ilaa qilammiittoq, siulittuummi ’arnatut’ nammineq pigisamitut eqqartorneqartoq, kinguaassamik pulateriaarsuup niaquanik aserorterisussamik pilersitsiumaartoq. Ukiulli tusindilippassuit ingerlapput, arnarlu Guutip pigisaa kinguaassamik, Saatanimik taassumalu suliaanik piuneerutitsisinnaasumik, pilersitsinngilaq. Taamaattumik Esajap siulittuutaani arnaq ’ernisuitsutut’ ’aliasuttutullu’ oqaluttuarineqarpoq. (Esaja 54:1, 5, 6) Kingusinnerusukkut Jiisusi Betlehemimi inunngorpoq. Aatsaalli kuisereernerata kingorna, Guutip anersaakkut erneratut anersaakkut kinguaassiarititaammat, Jehova ima nalunaarpoq: „Tassa ernera.“ (Matthæusi 3:17; Johannesi 3:3) Arnap ’kinguaassaata’ ilaa pingaarneq kiisami saqqummerpoq. Kingusinnerusukkut aamma Jiisusip ajoqersugai anersaamik illernartumik taninneqarput Guutimullu erninngorlutik. Maanna ’arnaq’ Jehovap pigisaa, sivisoqisumik ’ernisuitsuusimasoq’, kiisami ’nuannaarnermit torlulasinnaanngorpoq’. — Esaja 54:1; Galatiamiut 3:29.

12, 13. Allassimaffinni sorlerni erserpa kristumiut tanitat nunarsuarmiittut tamarmik tassaasut „inussiaq aalajaallunilu silatooq“?

¹² Sallusuissutit anersaakkut ittut itinerusut uagutsinnut  paasinarsisinneqarsimasut ilaat alla Guutip 144.000-inik inuianneersunit toqqaaniarluni aalajangigaanut tunngassuteqarpoq. (Saqqummersitat 14:1, 4) Paasillugulu upperaarput tanitat qanoq ilisukkulluunniit nunarsuarmiittut tamarmik tassaasut „inussiaq aalajaallunilu silatooq“ Jiisusip kiffaminik piffissaq eqqorlugu ’nerisassaqartitsisussatut’ eqqaasaa. (Matthæusi 24:45, NV) Allassimaffiilli suut paasinnittaatsip tamatuma eqqortuuneranut uppernarsaataappat? Jiisusip kristumiu kinaluunniit qatanngutiminik ineriartortitsisoq piinnarsimasinnaavaa?

¹³ Guutip inuiaqatigiit Israelikkut ima oqarfigai: „Ilissi nalunaajaasigaassi . . . aap kiffaraassi, qinigaralusi.“ (Esaja 43:10, NV) Ukiumili 33-mi nisanip aqqarngani Jiisusip Israelikkunnut siuttuusut oqarfigai Guutip taakkua inuiaqatigiittut ajattorai kiffamisullu isigiunnaarai. Ima oqarpoq: „Guutip naalagaaffia ilissinnit peerneqassaaq tunniunneqassallunilu inuiannut inerititaqartitsisinnaasunut.“ Jiisusillu inuppassuit ima oqarfigai: „Illorsi ilissinnut qimagaassaaq inuerullugu.“ (Matthæusi 21:43; 23:38) Israelikkut inussiatut aalajaallutillu silatunngillat. (Esaja 29:13, 14) Jiisusi ulloq taanna kingusinnerusukkut ima aperigami: „Kinaavami inussiaq aalajaallunilu silatooq?“, ima aperivorlusooq: ’Inuiaat silatuut kikkut Israelikkut Guutip inussiaataatut aalajaatsutut taarsissavaat?’ Apustilip Petrusip apeqqut tamanna akivaa kristumiut tanitat ilagiissaat ima oqarfigigamigit: „Ilissi tassaavusi . . . inuiaqatigiit illernartut, inuiaat erligisatut pigineqartussat.“ (1 Petrusi 1:4; 2:9, NV) Inuiaqatigiit anersaakkut ittut taakku, „Israeli Guutip pigisaa“, Jehovamut inussiaatinngorput nutaat. (Galatiamiut 6:16) Soorlu itsaq Israelikkunnut ilaasut tamarmik tassaasimasut „inussiaq“, taamatuttaaq kristumiut tanitat qanoq ilisukkulluunniit nunarsuarmiittut tamarmik tassaapput „inussiaq aalajaallunilu silatooq“. Guutip inussiaataa aqqutigalugu ’nerisassanik’ pisarnerput uagutsinnut immikkut pisinnaatitaaffiuvoq angingaartoq.

Nammineerluni atuaqqissaarneq nuannersuusinnaavoq

14. Sooq Biibilimik atuaqqissaarneq atuaannarnerminngarnit nuannaarnarnerua?

¹⁴ Biibilimiittunik suli allanik paasisaqarnerput pissutigalugu uppernerput nakussatsinneqaraangat nuannaartaqaagut, ilaa? Taamaattuminguna Biibilimik atuaqqissaarneq, atuaannarnerunngitsoq, taama nuannaarutaatigisinnaasoq. Kristumiut atuagaataannik atuagassiaataannillu atuaraangavit imminut ima aperisarit: ’Matumani nassuiarneqartoq sammineqartumik siornatigut paasinninninnut naleqqiullugu qanoq ippa? Biibilimik tunngavilinnik allassimaffinnilluunniit Biibilimiittunik sunik allanik allaaserisami matumani isummiunneqartunut tunngavilersuutaasunik eqqaasaqarsinnaavunga?’ Sammineqartumik misissuinerunissaq pisariaqarsorigukku apeqqut akissutissarserusutat allaguk, atuaqqissaagassatullu pilersaarutinnut ilannguguk.

15. Atuaqqissaarnermut pilersaarutit suut nuannersuusinnaappat, tamakkualu qanoq ilillutik qaqugorsuarmut iluaqutaasinnaappat?

¹⁵ Atuaqqissaarnermik pilersaarutit suut nutaanik ilinniagaqarnermik nuannaarutiginnilissutigisinnaavigit? Guutip inuiaat iluaqutissaattut taakkununnga angeruserisimasaanik assigiinngitsunik misissueqqissaarneq sallusuissummik paasinninnerulissutigisinnaasatta ilagaat. Uppernerit nakussatsissinnaavat siulittuutit Jiisusi Kristusimut tikkuussisut pillugit atuaqqissaarlutit, imaluunniit allakkat siulittuutaasut Biibilimiittut versikkuutaarlugit misissorlugit. Alla uppernikkut nakussatsissutaasinnaasoq tassaavoq nalitsinni Jehovap Nalunaajaasuisa oqaluttuarisaanerannik misissuineq atuagaq Jehovas Vidner — forkyndere af Guds rige * atorlugu. Aamma „Atuartartut  apeqqutaat“ Napasuliaq Alapernaarsuiffik-mi saqqummersinneqartut ilaat misissoqqilaarukkit, qularnanngitsumik tamanna allassimaffinnik aalajangersimasunik paasinninnerulissutigissavat. Ingammik isummiunneqartunut tunngavilersuutit Biibilimeersut maluginiakkit. Tamanna paasinnissinnaassutsinnik sungiusaanissamut naliliisinnaassutsinnillu ineriartortitsinissamut iluaqutigissavat. (Hebræerit 5:14) Biibilinnut imaluunniit pappiaraminermut eqqaamassutissannik allattuisaruit, atuaqqissaarnerit illit nammineq ikiorsinnaasatillu qaqugorsuarmut iluaqutigissavarsi.

Meeqqatit atuaqqissaarnermik nuannarinnilersikkit

16. Angajoqqaat qanoq ilillutik meeqqatik Biibilimik atuaqqissaarnermik nuannarinnilersissinnaavaat?

¹⁶ Angajoqqaat meeqqatik anersaakkut inuussutissanut kajuminnerulersinniarlugit iliuuseqangaarsinnaapput. Anersaakkut ittut itinerusut meeqqannut paasiuminaassoreqinagit. Meeqqat ilaqutariittut atuaqatigiinnissamut piareersaatitut aalajangersimasumik misissugassinneqarsinnaapput sunillu paasisaqarsimanerannik oqaluttuartillugit. Aammattaaq ilaqutariittut atuaqatigiinnermi sungiusartoqarsinnaavoq, meeqqat upperisaminnik qanoq illersuinissaannik ilikkakkamillu ilumoortuunerannik allanut qanoq uppernarsaanissaannik ilinniartillugit. Aamma atuagassiaaraq „Det gode land“ * nunat Biibilimi eqqaaneqartut pillugit meeqqanik ilinniartitsinermut aamma sapaatip-akunneranoortumik ilaqutariittut Biibilimik atuaqatigiinnermi itisilerinermut atorneqarsinnaavoq.

17. Nammineerluta Biibilimik atuaqqissaarnerput eqqarsaatigalugu sooq oqimaaqatigiissaarisinnaasariaqarpugut?

¹⁷ Nammineq Biibilimik atuaqqissaarneq tiguartinnarsinnaallunilu uppernikkut nakussatsissutaasinnaavoq, ilagiilli ataatsimiinnerinut piareersarnissamit pingaarnerutilernaveersaaruk. Jehovap ilaatigut ataatsimiinnerni „inussiaq aalajaallunilu silatooq“ aqqutigalugu ilinniartittarpaatigut. Ataatsimiinnernulli piareersarninni immikkut misissuisaruit, tamanna isumaqarluartunik akissuteqartarnissannut iluaqutigisinnaavat — assersuutigalugu ilagiit atuakkamik atuaqqissaaqatigiinneranni imaluunniit Teokratiimik Ilinniarfimmi sapaatip-akunneranut Biibilimik atuagassat sammineqarneranni.

18. Sooq ’Guutip itissusiinik’ misissuiniarluni ilungersorneq imminut akilersinnaava?

¹⁸ Nammineerlutit Guutip oqaasianik iternga tikillugu misissuinerit Jehovamut qanillinissamut iluaqutigisinnaavat. Taamatut atuaqqissaarnerup pingaaruteqassusia pillugu Biibilimi ima allassimavoq: „Ilisimassuseq alanngortaliisarpoq aningaasat alanngortaliisarnerattut ilisimassutsilli pitsaaqutigiinnarpaa ilisimassuseqartoq inuutittaramiuk.“ (Oqaluussisartup oqaasii 7:12) Taamaattumik sallusuissutinik anersaakkut ittunik paasinninneruniarlutit ilungersornitit imminut akilersinnaapput. Biibilimi neriorsuutigineqarpoq ujarlertuartut ’Guuti pillugu ilisimasaqalissasut’. — Ussatit 2:4, 5, NV. (wE 11/1 07)

[Quppernerup ataani ilanngussat]

Uku nassuiarsinnaavigit?

• ’Guutip itissusii’ suuppat?

• Sooq sallusuissutit anersaakkut ittut itinerusut pillugit atuaqqissaartarunnaanngisaannartariaqarpugut?

• Sooq kristumiut tamarmik ’Guutip itissusiinik’ paasinninnissamut periarfissaqarpat?

• ’Guutip itissusii’ pillugit ilinniarnerput qanoq iluaqutigissavarput?

[Atuaqqissaarnermi apeqqutit]

[Qupp. 13-mi assiliartaq]

Jiisusi qanga kinguaassanngorpa neriorsuutigisaq?

[Qupp. 16-mi assiliartaq]

Angajoqqaat meeqqatik ilaqutariittut atuaqatigiinnissamut piareersaatitut arlaannik misissugassissinnaavaat