Jehovap oqaasii qammuinnanngisaannarput

„Ajunngitsut [Jehovap] Guutissi ilissinnut oqaatigisaasa ilaat ataasinnguarluunniit [qammuinnarsimanngilaq]. Tamarmik piviusunngorsimapput.“ — JOSVA 23:14.

1. Josva kinaava, toqungajalernerminilu sua?

SAKKUTUUNUT naalagaavoq piumassuseqarluarlunilu qunusuitsoq, angut assuarnaatsoq upperluartorlu. Taassuma Mosesi angalaqatigaa Israelikkunnillu inoqajuitsumit navianartumit nunamut immummik tungusunnitsuummillu kuuttumut siulersuisussatut Jehovamit immikkut toqqarneqarluni. Toqungajalerluni angutip ataqqineqangaartup taassuma, Josvap, Israelimi utoqqaanertat killitsinnartumik naggammik oqalugiarfigai. Qularnanngitsumik oqalugiaataa tusarnaartunut uppernikkut nakussatsissutaavoq. Aamma illit upperninnut nakussatsissutaasinnaassaaq.

2, 3. Josvap utoqqaanertat oqaluffigimmagit Israelimi pissutsit qanoq ippat, qanorlu oqarpa?

² Pisimasut Biibilimi oqaluttuarineqarnerattut takorlooriakkit: „Ukiorpassuarni [Jehovap] Israelikkunni eqqissineqartippaa akeqqanit avatangiisaannit tamanit saassunneqatsaaliorlugit, Josvallu utoqqalilluni ukiorpassuit angusimavai. Josvap Israelikkut tamaasa — utoqqaanertat, qullersaasut, eqqartuussisut allattuusullu — katersortippai oqarfigalugillu: ’Maanna utoqqanngorpunga ukioqqortuseqalungalu.’“ — Josva 23:1, 2.

³ Josva 110-ngajannik ukioqarpoq, Guutillu innuttaasa oqaluttuarisaaneranni piffissat pissanganarnerpaartaasa ilaat misigaa. Guutip suliaasa angisuut ilaannik takkunnittuusimavoq, aamma Jehovap neriorsuutaasa ilarpassuisa eqquunnerat takusimavaa. Taamaattuminguna nammineq misigisimasani tunngavigalugit qulanngilluinnarluni ima oqarsinnaasimasoq: „Uummatissigut tarnissigullu ilisimassavarsi ajunngitsut [Jehovap] Guutissi ilissinnut oqaatigisaasa ilaat ataasinnguarluunniit qammuinnarsimanngitsoq. Tamarmik piviusunngorsimapput, oqaaseq ataasiinnarluunniit maangaannarsimanngilaq.“ — Josva 23:14.

4. Jehovap Israelikkunnut suut neriorsuutigai?

⁴ Jehovap oqaasii suut Josvap inuunerata nalaani eqquukkamik? Jehovap Israelikkunnut neriorsuutai pingasut sammissavavut. Siullermik, taakkuninnga inussiaataanermit aniguisitsiumaarnerminik neriorsuutaa. Aappassaanik, taakkuninnga illersuiumaarnerminik neriorsuutaa. Pingajussaanillu, taakkuninnga isumassuiumaarnerminik neriorsuutaa. Ullumikkut Jehovap innuttani taakkununnga assingusunik neriorsorsimavai, taakkualu eqquunnerat uagut inuutilluta misigaarput. Jehovalli ullumikkut innuttaminik qanoq iliorfiginnissimanera misissortinnagu, Josvap nalaani qanoq iliorsimanera sammissavarput.

Jehovap innuttani aniguisippai

5, 6. Jehovap Israelikkut qanoq ililluni Egyptenimit aniguisippai, tamannalu sumut uppernarsaataava?

⁵ Israelikkut Egyptenimi inussiatut sulinertik pissutigalugu Guutimut ikioqqullutik torlulammata, taassuma tusaavai. (2 Mosesi 2:23-25) Orpikkap ikualasup eqqaani Jehovap Mosesi ima oqarfigaa: „Aqqarpunga Egyptenimiut assaannit aniguisikkumallugit nunamillu taassumannga majuartikkumallugit nunamut ajunngitsumut aallariarfittuumut, nunamut immummik tungusunnitsuummillu kuuttumut.“ (2 Mosesi 3:8) Jehovap neriorsuummik tamatuminnga eqquutitsinera misigalugu qanormita pissanganartigisimassava! Faraop Israelikkut Egyptenimit aninissaat akueriumanngimmagu Mosesip taanna oqarfigaa Guutip Nilenip ernga aanngortikkumaaraa. Jehovap oqaasii qammuinnanngillat. Nilenip ernga aanngorpoq. Aalisakkat toqupput, kuullu ernga imerneqarsinnaajunnaarpoq. (2 Mosesi 7:14-21) Farao uteriittuarpoq, Jehovallu suli qulingiluanik allanik perlussiortippaa, perluk suussanersoq tamatigut oqaluttuuttarlugu. (Mosesimik allakkat  aappaat, kapitalit 8-12) Perluit qulingat pissutigalugu Egyptenimi angajulliliat toqummata Faraop Israelikkut aallaqquai — aallarpullu! — 2 Mosesi 12:29-32.

⁶ Aniguisinneqarnerat tamanna Jehovap Israelikkunnik toqqakkamisut innuttanngortitsinissaanut aqqutissiuivoq. Aniguisitaaneq pissutigalugu Jehova neriorsuutinik eqqortitsisartutut, qammuinnanngisaannartunik oqaaseqartartutut, qutsissisinneqarpoq. Tamatumani ersersinneqarpoq Jehovap inuiaat guutiinit qutsinnerungaarnera. Aniguisinneqarneq tamanna pillugu atuaraangatta uppernerput nakussatsinneqartarpoq. Takorlooriarulli nammineq misigalugu qanoq issimassanersoq! Josvap nammineq takuaa Jehovap qularnanngilluinnartumik ’nunarsuarmi tamarmi Qutsinnerussaartuunera’. — Tussiaat 83:19.

Jehovap innuttani sernissorpai

7. Jehovap Israelikkut Faraop sakkutuuinut qanoq sernissorpai?

⁷ Taavami Jehovap neriorsuutaasa aappaat — innuttaminik sernissuiumaarnerminik neriorsuutaa? Neriorsuut taanna Jehovap innuttaminik Egyptenimit aniguisitsinissamik nunamullu neriorsuutigisaasumut siulersuinissamik neriorsuutaanut ilaavoq. Faraop kamattorsuup sakkutuuni pissaaneqaqisut, hundredelinnik sorsuutinik qamutillit, ilagalugit Israelikkut malersorpai. Angutip makitasuup taassuma ajugaanissani qularinngilluinnarsimassavaa, ingammik Israelikkut qaqqat immallu akornanni ingerlariaqqissinnaajunnaarpasimmata! Maanna Guuti innuttani illersorniarlugit akuliuppoq Egyptenimiut tammaarfiata Israelikkullu tammaarfiata akornanni nuiamik inissiilluni. Egyptenimiut akornanni taarpoq; Israelikkut akornanni qaamavoq. Nuiaq Egyptenimiunik uninngatitsitillugu Mosesip ajaappissani isatsippaa, Immallu Aappalaartup erngi avissaarput Israelikkut qimaaffissaqalerniassammata Egyptenimiullu nakutinneqarniassammata. Jehovap Faraop sakkutoorpassui nungutilluinnarpai taamaalillunilu innuttani ajorsarnissaraluamut sernissorlugit. — 2 Mosesi 14:19-28.

8. Israelikkut qanoq sernissorneqarpat (a) inoqajuitsumi aamma (b) nunamut neriorsuutigisamut iseramik?

⁸ Israelikkut Imaq Aappalaartoq ikaareeramikku nunami ’inoqajuitsorsuartut navianartulittut pulateriaarsunnik paarmortorujunnillu skorpioninillu uumasulittut, nunatut parnunnikutut imeqanngitsutut’ oqaluttuarineqartumi ingerlaalerput. (5 Mosesi 8:15) Tamaanissaaq Jehovap innuttani sernissorpai. Taavami Israelikkut nunamut neriorsuutigisamut isertussanngormata qanoq pisoqarpa? Kana’animiut sakkutoorpassuinit pissaaneqangaartunit akerlilersorneqarput. Jehovalli Josva ima oqarfigaa: „Illit inuiaallu tamassi Jordani ikaarniarsiuk nuna Israelikkunnut tunniukkumasara iserfigiartorlugu. Inuutillutit kialuunniit ajugaaffigisinnaassanngilaatit. Najortuassavakkit soorlu Mosesi najorsimagiga; qimanngisaannassavakkit.“  (Josva 1:2, 5) Oqaatsit taakku maangaannanngillat. Ukiut arfinillit missiliorlugit ingerlaneranni Josvap kunngit 31-t ajugaaffigai nunallu neriorsuutigisap ilarujussua tiguarlugu. (Josva 12:7-24) Jehova illersuutaasumik isumassuisimanngitsuuppat taamatut tiguaasinnaasimassanngikkaluarput.

Jehovap innuttani isumassorpai

9, 10. Jehovap innuttani inoqajuitsumi qanoq isumassorpai?

⁹ Maanna neriorsuutit pingajuat — Jehovap innuttaminik isumassuiumaarnerminik neriorsuutaa — sammissavarput. Israelikkut Egyptenimit aniguisitaanerata kinguninngua Guutip ima neriorsorpai: „Timiusartugassassinnik qilammit nakkaatitsiumaarpunga; inuillu ullormut pisariaqakkaminnik katersuiartortassapput.“ Guutilu neriorsuisimanermisorluinnaq iliorluni ’timiusartugassaannik qilammit’ tunivai. „Israelikkut tamanna takugamikku imminnut aperipput: ’Suunuku?’“ Tassaana manna, timiusaq Jehovap taakkununnga neriorsuutigisaa. — 2 Mosesi 16:4, 13-15.

¹⁰ Ukiuni 40-ni inoqajuitsumi angalaarneranni Jehovap Israelikkut isumassorpai nerisassaqartillugit imissaqartillugillu. Allaat atisaasa alittunnginnissaat isigaasalu pullalinnginnissaat isumagaa. (5 Mosesi 8:3, 4) Josva tamakkuninnga tamanik takunnittuuvoq; takuaa Jehovap neriorsuisimanermisorluinnaq innuttani aniguisillugillu sernissorlugillu isumassorai.

Ukiuni kingulliunerusuni aniguisitsineq

11. 1914-imi Betelimi Brooklynimiittumi qanoq pisoqarpa, sumullu piffissanngorsimava?

¹¹ Ullutsinnimi qanoq ippa? Tallimanngornermi ullaakkut, 1914-imi oktobarip ulluisa aappaanni, Charles Taze Russell, taamanikkut Biibilimik atuaqqissaartartut sulineranni siulersuisoq, Betelimi Brooklynimiittumi nerisarfimmut iserpoq. Qiimarpalulluni ima oqarpoq: „Kumoorn tamassi.“ Inginnginnermini nuannaarpalulluni ima nalunaaruteqarpoq: „Guutimik nalusut ullui naapput, taakkualu kunngiisa ullui qaangiupput!“ Jehovap, qilammi nunamilu kisimi oqartussaasup, innuttami iluaqutissaannik iliuuseqaqqinnissaanut piffissanngoqqissimavoq. Taamaaliorporlu!

12. 1919-imi sumit aniguisitsisoqarpa, tamannalu qanoq kinguneqarpa?

¹² Ukiut tallimaannaat tamatuma kingorna Jehovap innuttani ’Babylonersuarmit’, upperisarsiornerup eqqunngitsup silarsuarmi tamarmi naalagaaffissuanit pissaaneqaqisumit, aniguisippai. (Saqqummersitat 18:2) Ilavut ikittunnguit ima utoqqaatigipput aniguisitaaneq pissanganartoq tamanna misigisimallugu. Aniguisitaanerulli kinguneri erseqqipput. Jehovap pallorfiginninneq ilumoortoq pilerseqqippaa imminillu pallorfiginnerusuttut ataasiussuseqalersillugit. Tamanna pruffiiti Esaja aqqutigalugu siulittuutigineqarpoq: „Ullussani kingullerni qaqqaq [Jehovap] naalaffiata inaa aalajaalluni qaqqanit allanit portunerulerumaarpoq qattorngit tamaasa portussutsimigut  akimussallugit. Tassunga inuiaat tamarmik ornigutissapput.“ — Esaja 2:2.

13. Jehovap innuttaasa amerliartornerat eqqarsaatigalugu illit suut misiginikuuigit?

¹³ Esajap oqaasii eqquuteqqissaarput. 1919-imi tanitat kinguleruttut sapiillutik oqaluussinermi immikkut suliniuteqalerput Guutimik ilumoortumik pallorfiginninnermik akitsisitsisumik. 1930-kkunni ’savanik allanik’ katersuisoqalersimanera erseqqissivoq. (Johannesi 10:16) Siullermik tusindialunnguit ilanngupput, kingusinnerulaartukkut 100.000-illit arlallit, maannalu millionillit pallorfiginninnermik ilumoortumik aalajangiussisimapput! Apustilip Johannesip takorruugaani taakku oqaluttuarineqarput ’inuppassuartut amerlangaaramik kisinneqarsinnaanngitsutut, inuiaqatigiinnit naggueqatigiinnillu inuiannillu immikkullu oqaasilinnit tamanit pisutut’. (Saqqummersitat 7:9) Illit inuuninni suut misiginikuuigit? Illit sallusuissut ilikkarakku Jehovap Nalunaajaasui qassiuppat? Ullumikkut 6.700.000-init amerlanerusut Jehovamut kiffartorput. Jehova innuttaminik Babylonersuarmit aniguisitsinermigut silarsuaq tamakkerlugu amerliartornermut tupinnaannartumut maanna misigisatsinnut aqqutissiuivoq.

14. Aniguisitsinissaq suna suli pinngila?

¹⁴ Aniguisitsisoqaqqikkumaarpoq — inunnut nunarsuarmiittunut tamanut sunniuteqarumaartumik. Jehovap tupinnangaartumik pissaanerminik takutitsinermini imminik akerlilersuisut tamaasa piiassavai, innuttani aniguisissavai silarsuarmullu nutaamut naapertuilluarfiusumut isertillugit. Ajussutsip tamarmi peerunnera inuiaallu oqaluttuarisaaneranni piffissap alutornarnerpaap aallartinnera takullugu qanoq nuannertigissava! — Saqqummersitat 21:1-4.

Jehovap ullumikkut sernissuinera

15. Sooq ullutsinni Jehovap innuttaasa sernissorneqarnissartik pisariaqartippaat?

¹⁵ Soorlu misissoreeripput, Israelikkut Josvap nalaani inuusut Jehovamit sernissorneqarnissartik pisariaqartissimavaat. Ullutsinni Jehovap innuttaanut tunngatillugu allaava? Naamerluinnaq. Jiisusip ajoqersukkani ima mianersoqquai: „Naalliutsikkumaarpaasi toqukkumaarlusilu, ateralu pillugu inuiannit tamanit uumissorneqassaasi.“ (Matthæusi 24:9) Ukiut ingerlanerini nunarpassuarni Jehovap Nalunaajaasuisa akerlilersorneqarsuataarnertik peqqarniitsumillu malersorneqarnertik naammagalugit atorsimavaat. Jehovalli innuttaminik najuinera erseqqippoq. (Romamiut 8:31) Taassuma oqaasiani neriorsoqqissaarneqarpugut suulluunniit — uagutsinnut sakkuaatissatut saffiukkat suulluunniit — oqaluussinitsinnik ilinniartitsinitsinnillu unitsitsisinnaassanngitsut. — Esaja 54:17.

16. Jehovap innuttaminik sernissuisarneranut uppernarsaatit suut illit takunikuuigit?

¹⁶ Jehovap innuttai silarsuarmit uumissorneqaraluarlutik assut siumukarsimapput. Jehovap Nalunaajaasui nunani 236-ni maanna oqaluussiffigisartakkaminni  angusaqarluarsimapput, tamannalu Jehovamit najorneqarnitsinnut taassumanngalu uagutsinnik sequmiiumasunut nipangersitsiumasunulluunniit sernissorneqarnitsinnut uppernarsaataavoq kimittooq. Politikkikkut upperisarsiornikkullu siuttuusut pissaanillit, illit inuuninni Guutip innuttaanik peqqarniitsumik akerlilersuisimasut, ilaasa atii eqqaamavigit? Taakkua qanoq pisimappat? Maannakkut sumiippat? Amerlanersaat Mosesip Josvallu nalaani Faraotut piujunnaarsimapput. Guutimmi kiffai ullutsinni aalajaallutik toqusimasut? Taakku Jehovap eqqaamavai, taakkununngalu allamik isumannaannerusoqanngilaq. Jehovap kiffaminik sernissuiumaarnerminik oqaasiisa eqquunnerat erseqqippoq.

Jehovap innuttani ullumikkut isumassorpai

17. Anersaakkut inuussutissanut tunngatillugu Jehova qanoq neriorsuiva?

¹⁷ Jehovap innuttani inoqajuitsumi isumassorpai, aamma ullumikkut innuttani isumassorpai. „Kiffaq ilumoortoq silatoorlu“ aqqutigalugu anersaakkut inuussutissanik pilersorneqarpugut. (Matthæusi 24:45) Aamma anersaakkut sallusuissutinik ukiuni hundredelinni isertorneqarsimasunik ilisimasaqalerpugut. Inngilip Danieli ima oqarfigaa: „Oqaatsit isertukkit allakkallu naqissuserlugit naggatissap nalaa nalliutserlugu. Amerlasuut misissoqqissaarumaarpaat, ilisimassullu annertusissaqaaq.“ — Danieli 12:4, NV.

18. Sooq oqartoqarsinnaava ilisimassut ullumikkut annertusisimasoq?

¹⁸ Maanna naggatissap nalaani inuuvugut, ilisimassullu ilumut annertusisimavoq. Nunarsuaq tamakkerlugu anersaap illernartup inuit sallusuissummik ujarlersut Guuti ilumoortoq taassumalu siunertai pillugit eqqorluartumik ilisimasaqalernissaannut siulersorsimavai. Ullumikkut nunarsuarmi Biibilerpassuaqarpoq, aammattaaq atuagarpassuaqarlunilu atuagassiarpassuaqarpoq inuit sallusuissutinik naleqangaartunik Biibilimiittunik paasinninnissaminnut iluaqutigisaannik. Assersuutigeriartigu atuakkap atuaqqissaaqatigiissutissap Hvad er det Bibelen virkelig lærer?-ip imarisaasa allattorsimaffiat. * Ilaatigut imaattunik kapitaleqarpoq: „Guuti pillugu ilumoortoq sunaava?“, „Toqusimasut sumiippat?“, „Guutip naalagaaffia sunaava?“ aamma „Sooq Guutip naalliunnartoqarnera akueraa?“ Inuit apeqqutit tamakkua ukiuni tusindilinni isumaliutigisarsimavaat. Maanna apeqqutinut akissutit paasineqariaannaapput. Ukiuni hundredelinni ilisimaatsuussuseqaraluartoq aamma kristumiuunerartut tunussisorpalaartumik ajoqersuigaluartut Guutip oqaasia siammarterneqarpoq, tamannalu Jehovamut kiffartorusuttunut tamanut nakussatsissutaavoq.

19. Neriorsuutit suut eqquunnerat illit misigaajuk, qanorlu isummerpit?

¹⁹ Nammineq takusavut aallaavigalugit qulanngilluinnarluta ima oqarsinnaavugut: „Ajunngitsut [Jehovap] Guutissi ilissinnut oqaatigisaasa ilaat ataasinnguarluunniit [qammuinnarsimanngilaq]. Tamarmik piviusunngorsimapput, oqaaseq ataasiinnarluunniit maangaannarsimanngilaq.“ (Josva 23:14) Jehova kiffaminik aniguisitsisarlunilu sernissuisarlunilu isumassuisarpoq. Neriorsuutaanik ataasiinnarmilluunniit piffissami taassuma aalajangigaani eqquussimanngitsumik eqqaasaqarsinnaavit? Tamanna ajornarluinnarpoq. Taamaattumik Guutip oqaasia tutsuiginartoq tutsuigigutsigu silatusaassaagut.

20. Sooq siunissamut isumalluarsinnaavugut?

²⁰ Siunissarmi? Jehovap oqaluttuunnikuuaatigut amerlanersatta nunarsuarmi paratiisiusumi inuulernissaq neriuutigisinnaagaat. Ilatta ikittunnguit qilammi Kristusimik naalakkersueqateqalernissaq neriuutigaat. Sunaluunniilli neriuutigigaluarutsigu Josvatut aalajaattuarnissamut pissutissaqarluarpugut. Ulloq neriuutitta piviusunngorfissaa nalliukkumaarpoq. Taamanikkussamut Jehovap neriorsuutigisimasai tamaasa eqqaamassavavut, uaguttaarlu ima oqarsinnaassaagut: „Tamarmik piviusunngorsimapput.“

[Quppernerup ataani ilanngussaq]

Uku nassuiarsinnaavigit?

• Jehovap neriorsuutaasa suut eqquunnerat Josvap misigaa?

• Jehovap neriorsuutaasa suut eqquunnerat illit misigaajuk?

• Guutip oqaasia eqqarsaatigalugu suna qularutigissanngilarput?

[Atuaqqissaarnermi apeqqutit]

[Qupp. 8-mi assiliartaq]

Jehova innuttani aniguisinniarlugit akuliuppoq

[Qupp. 8-mi assiliartaq]

Jehovap innuttani Immap Aappalaartup eqqaani qanoq sernissorpai?

[Qupp. 9-mi assiliartaq]

Jehovap innuttani inoqajuitsumi qanoq isumassorpai?

[Qupp. 10-mi assiliartaq]

Jehovap ullumikkut innuttani isumassorpai