1, 2. Qanittuararsuakkut sorsunnivik suna aallartissava, uagullu susariaqanngilagut?

USA-mi inuit millionilikkuutaat radiukkut aallakaatitassiaq nuannarineqartoq 1938-mi oktobarip 30-anni tusarnaarpaat. Aallakaatitsisut tusagassiortuusaarlutik nalunaarutigaat avataarsuanit Marsiminngaanneersut nunarsuaq tigusareriarlugu aserorteraat. Nalunaarutigineqaraluartoqtamanna oqaluttualiaannaasoq tusarnaartorpassuit annilaarujussuarput. Allaallu ilaat akeraasorisanut imminut illersorniarlutik iliuuseqarput.

² Qanittuararsuakkut sorsunnivik aallartissaaq. Inuilli amerlanersaat piareersimanngilluinnarput. Sorsunneq tamanna tassaavoq Harmagedoni Guutip silarsuarmut ajortumut matumunnga sorsunnissaa. Tamanna oqaluttualiaannaanngilaq. Guutip oqaatsimini, Biibilimi, tamanna pillugu oqaluttuummatigut nalunngilarput sorsunneq tamanna nalliukkumaartoq. (Saqq 16:14-16) Sorsunnermi tamatumani akiuuttariaqanngilagut Jehovap nukini atorlugu tupinnangaartumik annaatissammatigut.

3. Siulittuut suna misissussavarput, aamma sooq uagutsinnut pingaaruteqarpa?

³ Siulittuummi Zakariap allagaani kapitali 14-imi allassimasumi Harmagedoni allaaserineqangaatsiarpoq. Ukiut 2500-t missaasa matuma siorna allataagaluarluni ullumikkut uagutsinnut pingaaruteqangaarpoq. (Rom 15:4) Kristusi 1914-imi kunnginngormalli Guutip innuttaasa nalaassimasaat qanittuararsuakkullu pisussat pissanganartut siulittuummi allaatigineqarput. Allaatigineqartunut ilaapput ‘qoororujussuaq’ aamma “imeq inuussutaasoq”. (Zak 14:4, 8) Qooroq tamanna Jehovamut pallorfiginnittut illersorneqarnerannut pingaaruteqangaarpoq. Paasigutsigulu imeq inuussutaasoq uagutsinnut qanoq  pingaaruteqartigisoq taava pisariaqartillutigu paasiinnarnagu aamma imernissaa kissaatigilissavarput. Taamaattumik siulittuut tamanna maluginiaqqissaartigu. — 2 Petr 1:19, 20.

4. (a) “Naalakkap ullua” qanga aallartippa? (b) Kristumiut tanitat 1914 ukiorpassuarnik sioqqullugu suut oqaluussissutigaat, aamma politikkikkut upperisarsiornikkullu siuttut qanoq iliorpat?

⁴ Siulittuut Zakariap allagaani kapitali 14-imiittoq ima aallartippoq: “Ulloq nalliukkumaarpoq, Naalakkap ullua.” (Atuakkit Zakaria 14:1, 2). Ulloq taanna aamma Saqqummersitat 1:10-mi ‘Naalakkap ulluanik’ taaneqarpoq. Ullorlu taanna aallartippoq 1914-imi Jiisusi qilammi Guutip naalagaaffiani kunnginngormat. (Saqq 1:10; 11:15) Kristumiut tanitat 1914 ukiorpassuarnik sioqqullugu oqaluussissutigaat ukiumi tamatumani “Guutimik nalusunut piffissarititaasut” naassasut ukiorlu tamanna aallarnerfigalugu silarsuarmi aatsaat taama ajornartorsiuteqartigilissasoq. (Luk 21:24) Tamanna inuiannit tusaaniarneqarpa? Naamik. Politikkikkut upperisarsiornikkullu siuttut kristumiunik taakkuninnga illaruaatiginnillutillu malersuipput. Siuttut taakkua taamaaliornermikkut Guuti Ajugaqanngitsoq illaruaatigaat, kristumiummi tanitat Guutip naalagaaffianut sinniisuupput. — Hebr 12:22, 28.

5, 6. (a) Guutip innuttaanut akeraasut qanoq iliorpat? (b) ‘Illoqarfiup inuisa amiakkui’ kikkuuppat?

⁵ Zakariap siulittuutigaa Guutip innuttaanut akeraasut qanoq iliussasut, ima allappoq: “Illoqarfik tiguarneqassaaq.” “Illoqarfik”, Jerusalemi, Guutip naalagaaffianut assersuutaavoq. Kristumiut tanitat suli nunarsuarmiittut naalagaaffimmut tamatumunnga ilaapput. (Fil 3:20) Illoqarfik sorsunnersuup siulliup nalaani ‘tiguarneqarpoq’ qatanngutit Jehovap peqatigiissortaani angisuumik akisussaaffeqartut tigusarineqarmata USA-milu Georgiami, Atlantami parnaarunneqarmata. Kristumiut tanitat akeqqanit naapertuilluanngitsuliorfigineqarlutillu naakkittaatsuliorfigineqarput, atuagassiaataat inerteqqutaalerput oqaluussinerallu unitsinniarsarineqarluni. Soorlu tassa akeqqanit ‘illoqarfiup illui ujajaaffigineqartut’.

⁶ Akeraasut pissaanillit Guutip innuttaanik malersuigaluarlutik salluliuutiginnikkaluarlutillu pallorfiginninneq ilumoortoq suujunnaarsissinnaanngilaat. Kristumioqarpoq tanitanik aalajaattuartunik. Taakku tassaapput ‘illoqarfiup inuisa amiakkui nungutinneqarusunngitsut’.

7. Kristumiut tanitat qanoq maligassaalluarpat?

⁷ ‘Illoqarfiup tiguarneqarnissaanik’ siulittuut sorsunnersuup siulliup naanerani tamakkiisumik eqquuppa? Naamik. Tanitat kinguleruttut taakkualu suleqataat aalajaatsut suli saassunneqartuarput. (Saqq 12:17) Assersuutigalugu sorsunnersuup aappaani qatanngutivut ingasattumik malersorneqarput. Ullumikkut uagut qanorluunniit misilinneqassagaluarutta kristumiut tanitat aalajaatsuunerat pinertusaarnissatsinnut kajumississutigaarput. Misilinneqarnernut taamaattunut ilaapput angerlarsimaffimmi, suliffimmi atuarfimmilu upperisarput pissutigalugu illaruaatiginnittunit akerlilersorneqarnerit. (1 Petr 1:6, 7) Sumiluunniit najugaqaraluarutta aalajaattuarnissarput akerlilersuisumillu kimilluunniit qunulersinneqannginnissarput aalajangiusimavarput. (Fil 1:27, 28) Silarsuarmili uagutsinnik uumissuiffiusumi sumi isumannaatsumiissinnaavugut? — Joh 15:17-19.

8. (a) Ilaannikkut qaqqat Biibilimi sumut assersuunneqartarpat? (b) ‘Uuliap Qaqqaa’ sumut assersuutaava?

⁸ Paasivarput siulittuummi tamatumani ‘illoqarfik’, imaluunniit Jerusalemi, Guutip naalagaaffianut assersuutaasoq. Taavami ‘Uuliap Qaqqaa Jerusalemip kangianiittoq’ sumut assersuutaava? Qaqqaq qanoq ililluni ‘qitermigut qupilluni’ marlunngorpa? Aamma sooq, hebræerisut allassimaqqaarfiit naapertorlugit, qaqqat taakku Jehovap nammineq piginerarpai? (Atuakkit Zakaria 14:3-5). Ilaannikkut qaqqat Biibilimi naalagaaffinnut naalakkersuisunulluuniit assersuunneqartarput. Aamma Biibilimi allassimagajuppoq pilluaqqussutit illersorneqarnerillu Guutip qaqqaanit pisartut. (Es 25:6, 7) Taamaattumik Uuliap Qaqqaa Jehovap pinngortitaminut tamanut naalakkersuineranut assersuutaavoq.

9. Uuliap Qaqqaata ‘qitermigut qupinera’ qanoq isumaqarpa?

⁹ Uuliap Qaqqaata ‘qitermigut qupinera’ qanoq isumaqarpa? Isumaqarpoq Jehova aalajangersimasumik siunertaqarluni kunngeqarfimmik allamik pilersitsisoq. Kunngeqarfiup aappaa tamanna tassaavoq naalagaaffik Missiarsikkoortoq Jiisusip Kristusip kunngiuffigisaa. Naalagaaffiit taakku marluk Jehovap pigigamigit ‘qaqqaminik’ (1900) taavai.

10. Qaqqat marluk akornanni ‘qoororujussuaq’ sumut assersuutaava?

¹⁰ Siulittuut naapertorlugu Uuliap Qaqqaa qupilluni affaa avannamut affaalu kujammut illuarpata Jehovap marluutillugit suli tummaqqassavai. Qupineratigut Jehovap isigaasa akornisigut ‘qoororujussuaqalerpoq’. Qooroq taanna illersugaaffimmut Guutip pilersitaanut assersuutaavoq, tassa Jehovap kiffaasa taassuma oqartussaanerata ataani erneratalu naalagaaffiani Missiarsikkoortumi illersugaaffigisaat. Jehovap akuerinngisaannassavaa pallorfiginninnerup minguitsup suujunnaarsinneqarnissaa. Uuliap Qaqqaa qanga qupiva? Tamanna pivoq 1914-imi Guutimik nalusunut piffissarititaasut naaneranni Jiisusi qilammi kunnginngormat. Siulittuummi aamma allassimavoq Jehovamik pallorfiginnittut ‘qoororujussuarmut’ qimaassasut. Qanga taamaaliulerpat?

11, 12. (a) Qanga qooqqumut assersuutaasumut qimaasoqartalerpa? (b) Sumit erserpa Jehovap innuttani illersortarai?

¹¹ Jiisusip ajoqersukkani ima mianersoqquai: ‘Atera pillugu inuiannit tamanit uumissorneqassaasi.’ (Matt 24:9) Uumissuineq 1914-imi ullussat kingulliit aallartimmata ingasatsippoq. Sorsunnersuarmi siullermi kristumiut tanitat aalajaatsut akeqqanit naakkittaatsumik malersorneqaraluarlutik nungutinneqanngillat. 1919-imi Guutip innuttai Babylonersuarmit, tassa upperisarsiornermit eqqunngitsumit, aniguipput. (Saqq 11:11, 12) * Ukiumi tamatumani qooqqumut Jehovap pilersitaanut qimaasoqartalerpoq.

¹² 1919-imiilli Jehova ilumoortumik pallorfiginnittunik silarsuarmi sumiikkaluartunilluunniit illersuiuarpoq. Ukiut ingerlaneranni naalakkersuisorpassuit Jehovap Nalunaajaasuisa oqaluussinerat unitsinniarsarisarpaat atuagassiaataallu inerteqqutaalersittarlugit. Nunat ilaanni suli taamaattoqarpoq. Jehovalli akuerinngilaa naalakkersuisut taakkua pallorfiginninnermik ilumoortumik suujunnaarsitsinissaat. Naalakkersuisut inuit pilersitaat qanorluunniit ilioraluarpata  Jehovap pissarsuup innuttani illersortuassavai. — 5 Mos 11:2.

13. Qanoq Jehovap qooruani illersugaaffiusumiittuarsinnaavugut, tamannalu sooq aatsaat taama pingaaruteqartigaa?

¹³ Jehovamut aalajaattuarutta taassuma qooruani illersugaaffiusumiittuassaagut. Taassuma erneratalu uagutsinnik illersuinertik kimilluunniit sumilluunniillu akornuserneqatsaalissavaat. (Joh 10:28, 29) Jehovap naalakkersuinerminut ernermilu naalakkersuineranut ilumoorfiginnittuarsinnaaqqulluta sutigut tamatigut ikiorpaatigut. Annikilliornartussarsuarmi nalliutingajalersumi ikiuinera aatsaat taama pisariaqartitsigilissavarput. Taamaattumik Jehovap qooruani illersugaaffiusumiittuarnissarput maanna aatsaat taama pingaaruteqartigilerpoq.

14, 15. Ullormi Jehovap akeqqaminut sorsuffiani taassumannga illersorneqanngitsut qanoq atugaqassappat?

¹⁴ Maannamiit silarsuup ajortup matuma naggatissaanut Guutip innuttaasa Saatanimit saassunneqarnerat sakkortusiartuinnassaaq. Qanittukkulli naggammik saassussiumaarpoq. Ullormi tamatumani Jehova sorsussaaq innuttaminullu akeraasut tamaasa suujunnaarsissallugit. Zakariap siulittuineratut tassaassaaq ‘ulloq sorsuffiusoq’. Sorsunnermi tamatumani sorsunnernit allanit tamanit paasinarsisinneqarnerussaaq Jehova sorsuttartutut qanoq pissaaneqartigisoq. — Zak 14:3.

¹⁵ Ullormi tamatumani Jehovap akeqqaminut sorsuffiani taassumannga illersorneqanngitsut qanoq atugaqassappat? Siulittuummi allassimavoq taakkununnga ‘qaamassanngitsoq’. (Zak 14:6, 1900) Tamanna isumaqarpoq taakku Guutimit iluarisaassanngitsut. Siulittuutip nanginnerani allassimavoq ‘hestit, siutitoorsuit, qatigattuut, siutituut nersutaatillu tamarmik’ — sorsuutinut assersuutaasut — eqqorneqassasut. Tamanna isumaqarpoq sorsuutit ‘issorlutik’ atorsinnaajunnaassasut. (Zak 14:6, 1900) Zakaria allappoq Jehovap akeqqani ‘perlummik’ pillassagai. Taakkua ‘isaat oqaallu mikiarumaarput’. Naluarput pillaatisiassaat nappaataanersoq, nalunngilarpulli ajoqusersinnaassanngikkaatigut Guutimillu eqqartuinerluttut nipangersinneqassasut. (Zak 14:12, 15) ‘Nunarsuarmi kunngit’ tamarmik taakkualu sakkutuui Saatanimut ililiutissapput. Nunarsuarmili sumiikkaluarunilluunniit suujunnaarsinneqassapput. (Saqq 19:19-21) “Naalakkap toqutitai ullussami tassani uppigarsimassapput nunarsuarmi tamarmi.” — Jer 25:32, 33.

16. Imminut qanoq aperisariaqarpugut, annikilliornartussarsuarmilu susariaqarpugut?

¹⁶ Sorsunnermi kikkut tamarmik, allaat naggataatigut ajugaasut, naalliuttarput. Imaassinnaavoq nerisassat amigaataalersut, pigisat annaaneqartut, inuuniarneq artornarsisoq kiffaanngissusiiagaasoqartorlu. Taavami uagut taamatut atugarliulissagaluarutta? Uippallissaagut? Nikallussaagut neriuutaarutivillutalu? Jehovamut kiffartorunnaassaagut? Annikilliornartussarsuarmi Jehovamut aalajaannikkut uagutsinnillu illersuiumaarneranik upperinninnikkut qooqqumi illersugaaffiusumiittuartariaqarpugut. — Atuakkit Habakkuki 3:17, 18, 1990. *

17, 18. (a) “Imeq inuussutaasoq” suua? (b) ‘Imaq kangianiittoq’ aamma ‘imaq kitaaniittoq’ sumut assersuutaappat? (c) Siunissaq eqqarsaatigalugu suna aalajangiusimaviuk?

¹⁷ Harmagedonip kingorna Kristusip naalagaaffianiit “imeq inuussutaasoq kuukkumaarpoq”. “Imeq inuussutaasoq” tamanna Guutip inuit naassaanngitsumik inuusinnaaqqullugit tunissutaanut tamanut assersuutaavoq. Zakariap siulittuutaani ‘imaq kangianiittoq’ tassaavoq Imaq Uumaatsoq, assersuutaavorlu inunnut ilivermi sinippaartunut. ‘Imaq kitaaniittoq’ tassaavoq Imaq Akullersuaq, uumassuseqangaartoq, assersuutaavorlu ‘amerlangaartunut’ Harmagedonimi aniguisunut. (Atuakkit Zakaria 14:8, 9; Saqq 7:9-15) Inuit eqimattat taakku tamarmik “imeq inuussutaasoq” ‘kuussuarmit imermik inuussutaasumik’ kuuttoq imissavaat. Tamatuma kingunerisaanik taakku tamarmik naammalluinnartunngussapput naassaanngitsumillu inuullutik. — Saqq 22:1, 2.

¹⁸ Jehovap pissutsit aaqqissuussaanerat ajortoq manna suujunnaarsikkuniuk sernissussavaatigut silarsuassamullu nutaamut naapertuilluassuseqarfiusumut siulersorluta. Silarsuarmi matumani inuiannit uumissorneqaraluarluta Guutip naalagaaffianut ilumoorfiginninnissarput Jehovallu qooruani illersugaaffiusumiittuarnissarput aalajangiusimalluinnarparput.