NALUNAAJAASUT inuusuttorpassuit oqaluussinermi iliuuseqarnerusinnaajumallutik inuunerminnik pisariillisaasut takullugit killitsinnarpoq. (Matt 6:22) Qanoq allannguisimappat? Sunik unamminiagaqarsimappat? Apeqqutit akissutissarsiniarlugit maanna Mexicomi kiffartortut ilaat paasisaqarfigineroriartigit.

Dustin aamma Jassa USA-meersut januaarimi 2007-imi katipput. Tamatuma kingunitsianngua ukiorpassuarni kissaatigisarsimasartik — tissiartaatiseriarlutik tassani ukioq kaajallallugu najugaqarnissartik — piviusunngortissinnaasimavaat. Umiatsiaat USA-mi Oregonimiittumi illoqarfiup Astoriap eqqaani alianaalluinnartumi orpippassuarnit qaqqarsuarnillu apisimasunit avatangerneqarsimasumi Manerassuullu qanittuani tulassimaffeqarpoq. Dustin ima oqarpoq: “Sumulluunniit qiviaraluaraangatta isikkivigilluinnartarpugut!” Aappariit misigipput pilimanianngitsumik inuuneqarlutillu Jehovamik tatiginnittuullutik. Ima eqqarsaraluarput: ‘Umiatsiami 7,9 meterisut takissusilimmi najugaqaratta, ullup ilaannaa sulisaratta, ilagiinni allamiusut oqaasilinni kiffartorlutalu ilaannikkut ikiorti-pioneriusaratta ingerlalluarpugut.’ Piffissalli ingerlanerani paasilerpaat imminut salloqittarlutik. Dustin ima oqarpoq: “Piffissarput ilagiinnik tapersersuinerminngarnit umiatsiatsinnik suliaqarnermut atorneruarput. Jehovamut kiffartorneq tamanit pingaarnerpaatikkusukkutsigu allannguisariaqarpugut.”

 Jassa ima oqarpoq: “Kisimiikkallarama Mexicomi najugaqarnikuuvunga, ilagiinnilu tuluttut oqaasilinni kiffartorlunga. Mexicomi kiffartornera nuannarigakku eqqarsarpunga siunissami Mexicomut uteqqikkumaarlunga.” Dustinip Jassallu nunami allami kiffartulernissaminnik kissaateqarnertik ineriartortinniarlugu ilaqutariittut atuaqqissaaqatigiinnerminni qatanngutit nunanut katersuiffigeriaannanngorsimasunut nuullutik oqaluussiartorsimanerminnik misigisalikkersaarutaat atuartalerpaat. (Joh 4:35) Dustin ima oqarpoq: “Taakkua nuannaarnerat uaguttaaq misigerusupparput.” Dustinip Jassallu oqaluussisartoqatigiit pilersinneqaqqammersut pisariaqartitsinerat ikinngutiminnit Mexicomiunit tusaramikku nuunniarlutik aalajangerput. Suliffimminnit soraarniuteqariarlutik tissiartaatertillu tuneriarlugu Mexicomut nuupput.

Dustin Jassalu illoqarfimmut Tecománimut — Manerassuup qanittuaniittumut Astoriamilli kujammut 4345 kilometerisut ungasitsigisumiittumut — nuupput. Dustin ima nangippoq: “Nillataartumik anorsaannguarfiusartumi qaqqarsuillu akornanni najugaqarunnaarluta kiassuup ataani citronequterpassuillu akornanni najugaqalerpugut.” Aallaqqaammut suliffissaaleqipput. Aningaasaateqarpallaannginnertik pissutigalugu sapaatit-akunnerini arlalinni ullormut marloriarlutik qaqorteqqasutortarlutillu eertatortarput. Jassa ima oqaluttuarpoq: “Nerisartakkavulli sorsaatileruttorlutigillu Biibilimik atuaqqissaaqatigisartakkatta mangonik, bananinik, papayanik soorunamilu puussianik citroninik ulikkaartunik tunisalerpaatigut!” Piffissap ingerlanerani aappariit oqaasileriffimmi Taiwanimi qullersaqarfeqartumi internetikkut sulisalerput. Maanna aningaasarsiatik atorlugit naammattorsuarmik ulluinnarni pisariaqartitaminnik imminnut pilersorsinnaanngorput.

Dustinip Jassallu inooriaaserilersimasartik qanoq isumaqarfigaat? Ima oqarput: “Nuunniarluta aalajangersimanerput aalajangersimasatsinnit tamanit pitsaanerpaavoq. Jehovamik allanillu aatsaat taama ikinnguteqarluartigilerpugut. Ullut tamarluinnaasa sammisaqaqatigiittarpugut — soorlu oqaluusseqatigiittarpugut, Biibilimik atuaqqissaaqatigisartakkavut qanoq ikiorsinnaanerlutigit oqaloqatigiissutigisarlugulu ataatsimiinnernut piareersaqatigiittarpugut. Aamma tatineqanngitsutut misigivugut.” Ima nangipput: “Tussiaat 34:9-mi neriorsuut ilumoortoq siornatigut paasivinnikuunngisarput una maanna qujamasuutigilerparput: ‘Ussersiuk takusiullu Naalagaq ajunngitsuusoq.’”

Qatanngutit 20-t 40-llu akornanni ukiullit — katissimasut katissimanngitsullu — 2900-nit amerlanerusut Guutip Naalagaaffia pillugu oqaluussisartunik pisariaqartitsiffiusuni kiffartorsinnaajumallutik Mexicomut nuussimapput. Sooq nalunaajaasut tamatuminnga suliassamik imaannaanngitsigisumik suliaqarusuppat? Arlallit taamatut aperineqaramik pissutaasut pingasut akissutigaat, taakku suugamik?

 Jehovamik tullimillu asanninnermik ersersitserusunneq. Leticia 18-inik ukioqarluni kuisittoq ima oqarpoq: “Jehovamut tunniulluinnarnera taassuminnga uummatikkut tarnikkullu iluunngarlunga kiffartorfiginnikkusunninnut ersiutaatippara. Taamaattumik piffissara annerusoq nukikkalu Jehovamut kiffartornermut atorniarlugit taassuminngalu uummatikkut iluunngarlunga asanninnera ersersinniarlugu aalajangerpunga.” (Mark 12:30) Leticiap uia Hermilo 20-t sinnerlugit ukioqarluni Guutip naalagaaffia pillugu oqaluussisartunik pisariaqartitsiffiunerusumi kiffartorniarluni nuuppoq. Ima oqarpoq: “Paasivara anersaakkut pisariaqartitanik matussusiinissamut inunnik ikiuineq tassaasoq tullermut asannittuliorneq pitsaanerpaaq.” (Mark 12:31) Taamaattumik illoqarfimmi atugarissaarfiusumi Monterrey-mi aningaaserivimmi suliffini ilorrisimaarlunilu inuunini qimallugit illoqarfeeqqamut nuuppoq.

Piviusumik naassaanngitsumillu nuannaarusunneq. Leticiap kuiserlaajulluni arnaq pionereq misilittagaqarluartoq illoqarfimmut avinngarusimasumiittumut qaammammi ataatsimi oqaluusseqatigiartorpaa. Leticia ima oqaluttuarpoq: “Tupaallappunga. Inuit Guutip naalagaaffia pillugu oqaluussiffigisatta ajunngitsumik qisuariarnerat nuannaalissutigingaarpara. Qaammammi tamatumani imminut ima oqarfigivunga: ‘Tassa inuunera tamatumunnga atorniarpara!’” Taamatuttaaq Esslyp, qatanngutip arnap 20-t sinnerlugit ukiullip, allat nuannaarnerat pisariaqartitsiffiunerusumi kiffartorusulissutigaa. Ilinniarnertuunngorniartuugallarami nalunaajaasut aallussilluartut arlallit pisariaqartitsiffiusumi kiffartortut naapissimavai. Ima oqarpoq: “Qatanngutit nuannaarpasissut takugakkit taakkutulli inoorusulerpunga.” Qatannguterpassuit arnat Esslytut periarsimapput. Mexicomi qatanngutit arnat 680-init amerlanerusut pisariaqartitsiffiunerusumi kiffartorput. Ilumut inuusuttunut utoqqarnullu maligassaalluangaaramik!

Siunertaqarluartumik nalerisimaarnartumillu inoorusunneq. Essly ilinniarnertuunngorniarfimmi naammassinngitsiarluni ilisimatusarfimmi akiliutsilluni ilinniartunngornissaminut neqeroorfigitippoq. Peqataasa neqeroorummut akuersinissaanut “nalinginnaasumillu inuuneqalernissaanut” — allagartartaarnissaanut, qaffasissumik atorfeqalernissaanut, biilitaarnissaanut angalasarnissaminullu piffissaqartarnissaanut — kajumissaarpaat. Taamaakkaluartorli taakkua siunnersuutaat maleruanngilai. Essly ima oqarpoq: “Ikinngutikka kristumiut arlallit tamakkuninnga anguniagaqartut anersaakkut anguniakkaminnik pingaartitsivallaarunnaartarnerat maluginiarpara. Aamma maluginiarpara silarsuarmut tunngassutilinnik aallussinerujartornertik ilutigalugu ajornartorsiutimik amerliartuinnarnerat pakatsissutigisaraat. Inuusunninni Jehova tamakkiisumik kiffartorfigerusuppara.”

Essly pioneriunermini imminut aningaasaqarnikkut pilersorsinnaajumalluni suliffeqalerniassagami immikkoortukkuutaanik katitigaasumik ilinniagaqalerpoq, allagartartaaramilu Guutip naalagaaffia pillugu  oqaluussisartunik pisariaqartitsiffiungaartumut nuuppoq. Allaat Otomip Tlapanecollu inoqqaavisa oqaasii ilinniarlugit aallartippoq. Ukiuni pingasuni sumiiffinni avinngarusimasuni oqaluussisarnermini pisimasut eqqarsaatigalugit ima oqarpoq: “Sumiiffinni pisariaqartitsiffiunerusuni kiffartornera nalerisimaalissutigalugulu siunertaqarluartumik inuuneqalissutigaara. Minnerunngitsumillu Jehovamut attaveqarlualerpunga.” Phillip aamma Racquel aappariit USA-meersut 30-t sinnerlugit ukiullit aamma taamatut misigipput. “Silarsuup allanngorartuarnera pissutigalugu inuppassuit patajaatsumik inissisimanngitsutut misigisarput. Sumiiffinnili Biibilimi tusarliussanut ajunngitsumik suli periartoqarfiusuni oqaluussineq inuunitsinni siunertaqarluartutut misigilissutigaarput. Tamanna nalerisimaarnaqaaq!”

Soorunami sumiiffinni Guutip naalagaaffia pillugu oqaluussisartunik pisariaqartitsiffiunerusuni kiffartorneq unamminiarnartoqarpoq. Tamakkualu ilagaat aningaasaqarnikkut imminut pilersorneq. Imminut pilersorsinnaajumallutit najukkanni pissutsinut naleqqussarnissannut piumassuseqartariaqarputit. Verónica pioneri misilittagaqarluartoq ima nassuiaavoq: “Kiffartorfimma ilaanni nerisassanik akikitsunik nerisassiortarlungalu tuniniaasarpunga. Allamilu atisanik tuniniaasarlungalu nujalerisuusarpunga. Massakkut illumi eqqiaasarlungalu angajoqqaanngorlaat meeqqaminnik qanoq attaveqaqateqartassanersut ilinniartittarpakka.”

Ingammik sumiiffinni avinngarusimasuni nunap inoqqaavinik nunaqqateqarnermi kulturimut ileqqunullu allanertanut naleqqussarneq sapernarsinnaasarpoq. Phillip aamma Racquel oqaluussiffigisartakkaminni Nahuatl-imik oqaluffiusumi kiffartornerminni taamatut misigisaqarput. Phillip ima oqarpoq: “Kulturikkut assigiinngitsorujussuuvugut.” Naleqqussarnissaminnut suna iluaqutigaat? “Inuiaqatigiit Nahuatl-it pissuserisaat ajunngitsut — ilaqutariittut ataqatigiinnerat, imminnut unneqqarissumik pisarnerat tukkortuunerallu — isiginiarnerusarpavut.” Racquel ima oqarpoq: “Nunap inoqqaavinik nunaqqateqarnerput qatanngutitsinnillu kiffartoqateqarnerput ilinniarfigingaarpavut.”

Sumiiffimmi pisariaqartitsiffiunerusumi avinngarusimasumiittumi kiffartulerusukkuit qanoq piareersarsinnaavit? Qatanngutit sumiiffinni avinngarusimasuni kiffartornermik misilittagaqarluartut ima oqarput: Nuunnginninni pilimanianngitsumik inuulerlutillu naammagittarneq ilinniassavat. (Fil 4:11, 12) Tamatuma saniatigut qanoq iliuuseqarsinnaavit? Leticia ima oqarpoq: “Sumiiffinnut allanut nooriaannaasinnaajumallunga suliffinni ingerlaannaq soraarniuteqarfigisinnaanngisanni atorfinikkusunneq ajorpunga. Qanorluunniit ilisukkut pisariaqartitsiffiusumut nooriaannaarusuppunga.” Hermilo ima oqarpoq: “Iganeq, atisanik errorsineq manissaanerlu ilinniarpakka.” Verónica ima oqaluttuarpoq: “Qatanngutikkalu angajoqqaanni najugaqarallaratta eqqiaaqataasarlungalu akikitsunik peqqinnartunillu nerisassiorneq ilinniarpara. Aamma ileqqaarneq ilinniarpara.”

Levi aamma Amelia USA-meersut ukiuni arfineq-pingasuni katissimasimasut oqaluttuarput Mexicomi kiffartulernissaminnut piareersarnerminni nuunnissartik pillugu qinusarnertik iluaqutigisimallugu. Levi ima oqarpoq: “Ukiumi ataatsimi nunami allami kiffartornitsinni aningaasartuutissavut naatsorsoriarlugit Jehovamut qinuvugut aningaasanillu amigaatitsinnik pissarsiniarnitsinni ikioqqulluta.” Qaammatit ingerlanerini qinunerminni aningaasat eqqaasimasatik pissarsiarigamikkit ingerlaannaq nuupput. Levi ima nangippoq: “Jehovap aalajangersimasumik noqqaassuteqarnerput akereermagu qinnuterput naapertorlugu iliuuseqarnialerpugut.” Amelia ima oqaluttuarpoq: “Taamaallaat ukioq ataaseq Mexicomiinnissarput pilersaarutigeqqaaraluarparput, maannali ukiut arfineq-marluk maaneereerpugut, nuunnissatsinnillu pilersaaruteqanngilagut! Maani najugaqarnitsinni Jehovamit toqqaannartumik ikiorneqarneq taassumalu ajunngissusia ullut tamaasa misigisarpavut.”

Aamma Adamimut Jenniferimullu, aappariinnut USA-meersunut Mexicomi ilagiinni tuluttut oqaasilinni kiffartortunut, qinusarneq pingaaruteqarluinnarpoq. Ima kajumissaaripput: “Suut tamaasa aaqqilluinnarnissaat utaqqeqqaassanngilat. Nunami allami kiffartorniarlutit kissaateqarnerit qinunikkut saqqummiuguk qinnutitillu naapertorlugit iliuuseqarlutit. Pisariinnerusumik inooriaaseqalerit, nunami kiffartorfigilerusutanni immikkoortortaqarfimmut allagit aningaasartuutissatillu naatsorsuusioreerukkit nuullutit!” * Taamaalioruit pissanganartumik inuuneqalerlutillu anersaakkut pisuunngussaatit.