1. Sooq Jehova iivangkiiliulersaartunit pingaarnerpaava?

IIVANGKIILIULERSAARTOQ tassaavoq nutaarsiassamik nuannersumik oqaluttuartoq. Jehova Guuti iivangkiiliulersaartunit siullersaallunilu pingaarnerpaavoq. Adami Evalu pikitsitsiniariartut Jehovap nalunaarutigaa Saatani Diaavulu piuneerunniarlugu. (1 Mos 3:15) Ukiut hundredelikkuutaat ingerlaneranni Jehovap nassuiartarpaa aqqi qanoq illernarsisissallugu, Saatanip ajornartorsiutaalersitai qanoq aaqqissanerlugit inuillu naassaanngitsumik inuunissamut qanoq periarfissaqaleqqissasut. Tamakku tamarmik tassaapput nutaarsiassat nuannersut Biibilimi allassimasut.

2. (a) Sooq oqarsinnaavugut inngilit iivangkiiliulersaartuusut? (b) Jiisusi iivangkiiliulersaartunut qanoq maligassaalluarpa?

² Aamma inngilit iivangkiiliulersaartuupput. Nutaarsiassamik nuannersumik tusarliisarlutillu inuit nutaarsiassaq nuannersoq pillugu oqaluussisut ikiortarpaat. (Luk 1:19; 2:10; ApS 8:26, 27, 35; Saqq 14:6) Inngiliunermi Mikaeli? Aamma taanna iivangkiiliulersaartuuvoq. Nunamiikkallarami Jiisusimik ateqarluni nutaarsiassap nuannersup oqaluussissutiginera pingaarnerpaatippaa. Taassuma maligassaalluarneranit erserpoq uaguttaaq oqaluussineq pingaarnerpaatissagipput. — Luk 4:16-21.

3. (a) Nutaarsiassaq nuannersoq suna oqaluussissutigaarput? (b) Apeqqutit suut sammissavavut?

³ Jiisusip ajoqersukkani iivangkiiliulersaartooqquai. (Matt 28:19, 20; ApS 1:8) Apustilip Paulusip Timotheusi ima allaffigaa: “Iivangkiiliulersaartutut suliat ingerlanniaruk kiffartuutillu naammassillugu.” (2 Tim 4:5) Nutaarsiassaq nuannersoq suna oqaluussissutigaarput? Ataatatta qilammiusup Jehovap inunnik asanningaarnera oqaluussissutigaarput. (Joh 3:16; 1 Petr 5:7) Guutip naalagaaffia taassuma inuiannik asanninneranut uppernarsaataavoq. Taamaammat inuit allat oqaluttuuttarpavut Guutip naalagaaffianut innuttanngorunik Guutimullu naalallutillu eqqortumik  iliuuseqarunik Guuti ikinngutigilersinnaagaat. (Tuss 15:1, 2) Jehovap naalliunnartut tamaasa piissavai. Aamma pereersut alianartut anniaataajunnaartissavai. Nutaarsiassap nuannissusia! (Es 65:17) Apeqqutit pingaarutillit marluk ukua akissutaat iivangkiiliulersaartutut pisariaqartippavut: Sooq inuit nutaarsiassap nuannersup tusarnissaa ullumikkut pisariaqartippaat? Qanorlu iivangkiiliulersaartuulluarsinnaavugut?

4. Guuti qanoq salluliuutigineqartarpa?

⁴ Takorlooriaruk salloqittaasoq oqartoq ataatavit illit ilaquttatillu qimaannarsimagaasi. Oqarporlu ataatavit soqutiginngikkaatit aamma naakkittaatsuullunilu isertuussaqartoq. Taava oqarfigineqarputit ataatat toqusoq taamaattumillu ujartariaqanngikkit. Taamatupajaaq Guuti salluliuutigineqartarpoq. Inuimmi oqarfigineqartarput Guuti naakkittaatsuusoq ilisarisimaneqalersinnaanngitsorlu. Assersuutigalugu upperisarsiornikkut siuttut ilaasa ajoqersuutigaat Guuti inunnik ajortunik naassaanngitsumik anniarfimmi pillaasartoq. Allat Guuti ajunaarnersuaqarneranut pisuutittarpaat. Oqartarput tamakku Guutimit pillaatisiaasut uffa aamma inuit ajunngitsut toqutaasartut.

5, 6. Pinngoriartuaarnermik ajoqersuut upperisarsiornikkullu ajoqersuinerluutit inunnut qanoq sunniuteqartarpat?

⁵ Allat oqartarput Guuteqanngitsoq uumasunillu pinngoriartuaarsimasugut. Taamatut isumaqartut oqartarput pinngortitsisoqanngitsoq uumassusillillu silassorissumit piliaanngitsut. Allaat isumaqarput inuit uumasunit pinngoriartuaaramik nakuusersuunerat namminissarsiortuunerallu tupinnanngitsoq. Aamma oqartarput inuit nukittuut inoqatiminnut sanngiitsunut peqqarniitsuunerat pissusissamisuuginnartoq. Taamaattumik tupinnanngilaq inuppassuit isumaqarmata naapertuilluanngitsuliortoqartuaannassasoq. Tassa pinngoriartuaarnermik upperinnittut piviusumik neriuutissaqanngillat.

⁶ Pinngoriartuaarnermik ajoqersuut upperisarsiornikkullu ajoqersuinerluutit inuiaat ullussani kingullerni naalliunnerannut pissutaasut ilagaat. (Rom 1:28-31; 2 Tim 3:1-5) Ajoqersuutit tamakku tassaanngillat nutaarsiassat nuannersut. Tamakkumi pissutigalugit, apustili Paulusi allanneratut, inuit tassaapput “isumamikkut taarsiortut . . . Guutimi inuunermut takornartaasut”. (Ef 4:17-19) Aammattaaq pinngoriartuaarnermik ajoqersuut upperisarsiornikkullu ajoqersuinerluutit pissutigalugit Guutimit nutaarsiassamillu nuannersumit ‘ungasipput’. — Efesosimiut 2:11-13 atuakkit.

7, 8. Nutaarsiassaq nuannersoq taamaallaat qanoq ilinniarneqarsinnaava?

⁷ Inuit Guutimut attaveqalissagunik Jehovap piunera taassumunngalu qanillinissamut pissutissaqarluartoq qulariunnaaqqaartariaqarpaat. Guuti pillugu ilinniarnissaannik ikiorsinnaavavut taassuma pinngortitaanik misissueqqissaarnissamut kajumissaarnerisigut. Inuit avatangiisiminni pinngortitanik qimerluuerusussuseqarunik takusaminnillu eqqarsaatiginnilluarusukkunik Guutip ilisimassusia pissaaneralu pillugit ilikkagaqassapput. (Rom 1:19, 20) Guutip pinngortitaasa tamarmik tupinnartuunerannik inuit paasinnissinnaaqqullugit qanoq ikiorsinnaavavut? Atuagassiaativut tamakkununnga tunngasunik imallit atorsinnaavavut, assersuutigalugu atuagassiaaqqami Guutip ilumut soqutigaatigut?-mi qupperneq 4-miit 8-mut. *  Apeqquteqarporli pinngortitanik qimerluuinerinnakkut akineqarsinnaanngitsunik, ilaatigut uku: Sooq Guutip naalliunnartoqarnera akueraa? Guutip nunarsuaq sumik siunertaqarfigaa? Guutip uanga inuttut soqutigaanga?

⁸ Biibilimik atuaqqissaarnikkuinnaq Guuti taassumalu siunertaa pillugit nutaarsiassaq nuannersoq ilinniarneqarsinnaavoq. Inuit allat nutaarsiassamik nuannersumik ilinniarneranni ikiorsinnaagatsigit immikkut pisinnaatitaaffigaarput! Paasissutissiineq naammanngimmat tusarnaartitta uummataa killissagutsigu eqqarsalersinniartariaqarparput sooq upperneq pisariaqartinneraa. (2 Tim 3:14) Taamaattumik Jiisusip qularunnaarsitsisarneratut qularunnaarsitsisarneq ilinniartariaqarparput. Sooq Jiisusi qularunnaarsitsillaqqippa? Ilaatigut apeqqutit atorluartaramigit. Qanoq ilaarsinnaavarput?

9. Inuit nutaarsiassamik nuannersumik upperinninnissaannik ikiorsinnaajumallugit susariaqarpugut?

⁹ Sooq oqaluussinitsinni, Jiisusip pisarneratut, apeqqutit atortassavavut? Takorlooruk nakorsap oqarfigigaatit pilatserujussuassasutit. Ilimanarpoq upperigit. Taavami qanoq innerit apersuutiginngivillugu taama oqarpat? Taava ilimananngilaq upperissagit. Nakorsarmi pikkorikkaluaruniluunniit ilinnik ikiuisinnaassaguni apersoqqaartariaqarlunilu tusarnaaqqaartariaqarpoq. Taamatulli inuit Guutip naalagaaffia pillugu nutaarsiassamik nuannersumik upperinnilernissaannik ikiorsinnaassagutsigit sunniuteqarluartumik aperisarneq ilikkartariaqarparput paasiumallugu qanoq ikiorsinnaanerlugit.

10, 11. Jiisusip ilinniartitseriaasia ilaarutsigu qanoq angusaqarsinnaavugut?

¹⁰ Jiisusip nalunngilaa ilinniartitsisup apeqqutit atorsinnaagai ilinniartitani ilisarisimanerulerniarlugu taassumalu isummaminik anitsinissaanik ikiorumallugu. Assersuutigalugu Jiisusip ajoqersukkani maniguunnermik ilinniartikkusukkamigit eqqarsalissutigisinnaasaannik apereqqaarpai. (Mark 9:33) Ilaanni Jiisusip Petrusi najoqqutassiat tunngavigalugit tunngavilersuisinnaanermik ilinniartinniarlugu aperaa akissutaasinnaasullu marluk oqaatigeriarlugit taakkua arlaat eqqortoq Petrusimut oqaatigeqquaa. (Matt 17:24-26) Ulloq alla Jiisusip ajoqersukkani qanoq uummammioqarnersut paaserusukkamiuk apersorpai. (Matthæusi 16:13-17 atuakkit). Jiisusip inuit qanoq iliussanersut oqaluttuutiinnartanngilai. Apereriaatsimigut inuit nutaarsiassamik nuannersumik ilassinninnissaannik inuunerminnillu allannguinissaannik kajumissisittarpai.

¹¹ Jiisusip apereriaasia ilaartarutsigu paasissavarput oqaluussinitsinni naapitavut pitsaanerpaamik qanoq ikiorsinnaanerlugit. Aamma uagutsinnit allaanerusumik isumallit tunngavilersuilluta oqaloqatiginissaat ilikkartarparput. Maniguuttullu ilinniartittarpavut ilinniakkatik qanoq iluaqutigisinnaaneraat. Maanna apeqqutinik qanoq atorluaasoqarsinnaaneranik assersuutit pingasut sammissavavut.

12-14. Qitornat oqaluussitilluni imminut tatigineruleqqullugu qanoq ikiorsinnaaviuk? Assersuuteqarit.

¹² Assersuut 1: Qitornavit inuusuttuaqqap pinngortitsisoqarneranik upperisani pillugu atuaqatimi oqaloqatiginissaa annilaangagippagu qanoq iliussavit? Imminut  tatiginerulersillugu qanoq ikiorsinnaaviuk? Isornartorsiornagu imaluunniit qanoq oqassanersoq oqarfigiinnarnagu Jiisusi ilaarsinnaavat aperalugu isummaminik oqaatiginninnissaminut iluaqutigisassaanik. Qanoq taamaaliorsinnaavit?

¹³ Qitornat atuagassiaaqqami Guutip ilumut soqutigaatigut?-mi qupperneq 4-miit 8-mut allassimasut arlaannik atuaqatigiuk. Atuareerussi suna soqutiginarnerpaatinneraa aperiuk. Kajumissaaruk eqqarsaatigeqqullugu sooq Pinngortitsisoqarnera upperilluinnarneraa aamma sooq Guuti kiffartorfigerusunneraa. (Rom 12:2) Paasitiguk isummasi assigeeqqissaartariaqanngitsut.

¹⁴ Taava qitornat oqaluttuuguk oqaloqatigiinnissitulli atuaqatini oqaloqatigisinnaagaa. Atuaqatini pinngortitanut tunngasunik oqaluttuuteriarlugu qanoq isumaqarfiginerai aperisinnaavaa. Assersuutigalugu atuagassiaaqqami qupperneq 7-imi assimut allagartaq atuaqqusinnaavaa. Atuareerpagu qitornavit ima aperisinnaavaa: “Ilaa, qarasatta piginnaaneqarnera tupinnaq?” Aperisaq angissagunarpoq. Taava qitornat ima apereqqissinnaavoq: “Attaveqaatit inummit pilersinneqarsimappata silatusaarnerussava upperissallugu qaratsap imminik pilersimanera?” Qitornat upperisani pillugu allanik oqaloqateqarnermini imminut tatigineruleqqullugu sungiusarsinnaavusi. Oqaluussitilluni aperisarneq sungiusarussiuk ikiorsinnaavat iivangkiiliulersaallaqqinnerunissamut.

15. Guuteqarneranik upperinninngitsoq qanoq aperisinnaavarput?

¹⁵ Assersuut 2: Oqaluussinitsinni naapitaqarsinnaavugut Guuteqarneranik qularinnittumik upperinninngilluinnartumilluunniit. Aamma tamatumani tunngavilersuilluta eqqarsalersinniarsinnaavarput. Inussiarnersumik aperisinnaavarput sooq Guuti upperinnginneraa aamma taamatut  isumaqartuaannarsimanersoq. Akissutaa tusarnaariarlugu upperisaminik eqqarsaatiginnilluarsimanera pillugu nersualaarsinnaavarput. Taava aperisinnaavarput inuunerup pinngortitaaneranik uppernarsaatit pillugit atuagassiamik atuarusunnersoq, angerpat atuagassaanik pajukkumasinnaavarput. Periaaserikkutta inussiarnersumillu aperisarutta oqaluussiffigisatta nutaarsiassaq nuannersoq uummammigut killitsissutigisinnaavaa.

16. Sooq atuaqatigisartakkatta akissutip atuaannartannginnissaa qulakkiissavarput?

¹⁶ Assersuut 3: Biibilimik atuaqqissaaqatigisartagarput akigaangami akissutaa atuaannartarpagu qanoq kinguneqarsinnaava? Immaqa anersaakkut siumukassanngilaq. Sooq? Akissut eqqarsaatigeqqissaarnagu uteqqittaruniuk atuaqatigisartagaq naasutut sorlaqarpianngitsutut ilersinnaammat. Akerlilersorneqalerunilu sallusuissummiittuarnissani artorsaatigisinnaavaa. (Matt 13:20, 21) Atuaqatigisartakkat ikiorumallugu aperisariaqarpat atuagarsi qanoq isumaqarfigineraa. Paasiniarullu ilinniakkani akuerisinnaanerai akuerisinnaannginneraaluunniit aamma sooq taama isumaqarnersoq. Taava Biibili tunngavigalugu eqqarsalersinniarsariuk upperisani Biibilimik tunngavissaqartissinnaaniassammagu. (Hebr 5:14) Apeqqutinik atuilluartarutta ilimanarnerussaaq atuaqatigisartakkatta anersaakkut nukittuujunissaat akerlilersorneqalerunillu tammartinniarneqarunilluunniit aalajaassinnaanissaat. (Kol 2:6-8) Iivangkiiliulersaallaqqissuujumalluta aperisarnerup saniatigut qanoq iliorsinnaavugut?

17, 18. Oqaluusseqateqaraangavit qanoq suleqatigiittarsinnaavisi?

¹⁷ Jiisusip ajoqersukkani marlukkuutaarlugit oqaluussiartortippai. (Mark 6:7; Luk 10:1) Kingusinnerusukkut apustilip Paulusip ‘suleqatini’, nutaarsiassamik nuannersumik oqaluussinermi ‘peqatini’, eqqartorpai. (Fil 4:3) Biibilip nalaani periaatsinut naapertuuttumik 1953-imi Jehovap peqatigiissortaasa oqaluussisartut kiffartornermi ilinniarteqatigiinnissaat aallartippaat.

¹⁸ Oqaluusseqateqaraangavit qanoq suleqatigiittarsinnaavisi? (1 Korinthimiut 3:6-9 atuakkit). Oqaluusseqatit Biibilimit atuaraangat illit nammineq Biibilinni malinnaasarit. Oqaluusseqativit pulaakkallu oqaloqatigiinnerat malinnaaffigilluaruk oqaluusseqatit ikiortariaqalissappat piareersimajumallutit. (Oqal 4:12) Oqaluusseqativit tunngavilersuinera sunniuteqarluarpat pulaagarlu oqalutsillugu akuliunnaveersaartarit. Akuliuppallaaruit oqaluusseqatit nikallortissinnaavat pulaagarluunniit paatsuungalersillugu. Oqaaseqarniaruilli oqaatsitit killilersimaakkit, oqaluusseqativit pulaakkallu oqaloqatigiinnertik nangissinnaaniassammassuk.

19. Suna eqqaamasariaqarparput, aamma sooq?

¹⁹ Oqaluusseqatillu pulaagassassinnukartillusi iivangkiiliulersaallaqqinnerulerumallusi qanoq ikioqatigiissinnaavisi? Eqqartorsiuk qanoq saqqummiussillaqqinnerulersinnaanersusi. Inuit oqaluussiffigisassinniittut nikallornartumik eqqartoqinasigit. Aamma qatanngutit isornartorsioqinasigit. (Uss 18:24) Eqqaamasariaqarparput marrartut qajannartuulluta, tassa naammalluinnanngitsuulluta. Jehovap ajunngisaarfigaatigut erlinnartuut, nutaarsiassap nuannersup oqaluussissutiginera, uagutsinnut isumagisassanngortikkamiuk. (2 Korinthimiut 4:1, 7 atuakkit). Taamaattumik tamatta sapinngisatsinnik iivangkiiliulersaallaqqissuunikkut nutaarsiassaq nuannersoq qujamasuutigisigu.