1, 2. (a) Guuti kiffartorfiginiarlugu aalajangiininnut suna iluaqutigaajuk? (b) Kingornussassarput Jehovameersoq pillugu apeqqutit suut allaaserisami matumani akineqassappat?

INUIT millionillit Jehova Guuti kiffartorfiginiarlugu Jiisusillu Kristusip maligassiaa malinniarlugu silatusaartumik aalajangersimapput. (Matt 16:24; 1 Petr 2:21) Guutimut tunniulluinnarniarluta aalajangernerput aalajangerneruvoq pimoorussassaq. Allassimaffialunnguanik qarsupittumik ilisimasaqarneq tunngavigiinnarlugu taamatut aalajanginngilagut. Biibililli peqqissaartumik misissoqqissaarnera kingornussassamik Jehovap neriorsuutigisaanik upperinninnerulissutigaarput. Kingornussassaq tamanna Guutimik Jiisusimillu Kristusimik ilisarisimannittuarniartunit kingornunneqassaaq. — Joh 17:3; Rom 12:2.

² Jehovamut attaveqarluartuarumalluta tamatigut silatusaartumik taassuma iluarisaanik aalajangiisariaqarpugut. Allaaserisani matumani apeqqutit pingaarutillit uku akineqassapput: Sumik kingornussassaqarpugut? Kingornussassarlu tamanna uagutsinnut qanoq pingaaruteqartigissava? Kingornussinissarput qanoq qulakkeersinnaavarput? Silatusaartumik aalajangiinissatsinnut suut iluaqutigisinnaavavut?

3. (a) Tanitat sumik kingornussassaqarpat? (b) ‘Savat allat’ sumik kingornussassaqarpat?

³ Kristumiut amerlanngitsut qilammi toqujuissutsimik kingornussinissaq neriuutigaat. Kristusi qilammi naalakkersueqatigissallugu immikkut pisinnaatitaaffigissavaat. (1 Petr 1:3, 4) Kingornussissagunik ‘ernioqqittariaqarput’. (Joh 3:1-3) Jiisusilli ‘savaatai allat’ millionillit tanitanik suleqataallutik Guutip naalagaaffia pillugu nutaarsiassamik nuannersumik oqaluussissutiginnittartut  sumik kingornussassaqarpat? (Joh 10:16) Savat allat Adamip Evallu annaasimasaat — nunarsuarmi paratiisiusumi inuuneq naassaanngitsoq — kingornukkumaarpaat. Paratiisimi naalliuttoqassanngilaq, toqusoqartassanngilaq aliasuttoqassananilu. (Saqq 21:1-4) Jiisusip nappakkami anniartitaaffimmi angut saniminiittoq neriorsorpaa tamatuminnga kingornussassaqarumaartoq, imami oqarfigaa: “Paratiisimeeqatigiumaarparma.” — Luk 23:43.

4. Suut pilluaqqussutisiarereerpavut?

⁴ Allaat maannakkut kingornussassatta ilaat iluaqutigaarput. Jiisusip utertitsissutitut pilliutaa upperigatsigu qamuuna eqqissisimallutalu Guutimut attaveqarluarsinnaavugut. (Rom 3:23-25) Siunissaq pillugu neriorsuutit Biibilimeersut paasilluarpavut. Aamma qatanngutit nunarsuaq tamakkerlugu asaqatigiinnerat nuannaarutigingaarparput. Jehovalu pillugu nalunaajaasinnaanerput ataqqinaataavoq. Kingornussatsinnik qujamasunnissatsinnut pissutissaqarluarpugut!

5. Saatani suniaraluarpa, napiaaniutaalu qanoq ingalassimasinnaavavut?

⁵ Kingornussassarput annaajumanagu Saatanip napiaaniutai sianigiuartariaqarpavut. Guutip innuttai kingornussassaminnik annaasaqarniassammata Saatanip taakku aalajangiinerlutsinniartarpai. (4 Mos 25:1-3, 9) Saatanip nalunnginnamiuk naggatissani qanillisoq eqqunngitsuliortinniarluta ilungersortorujussuuvoq. (Saqqummersitat 12:12, 17 atuakkit). ‘Diaavulup qoqassiiniarnerani’ aalajaattuarumalluta kingornussassarput pingaartittuartariaqarparput. (Ef 6:11) Iisaap angajulliliaa, Esaui, kingornussassaminik qanoq isiginnittaaseqarnersoq ilinniutigisinnaavarput.

6, 7. Esaui kinaava, sumillu kingornussisussaagaluarpa?

⁶ Ukiut 4000-it matuma siorna Rebekka marlulivoq, Esaui Jaakulu. Marlulissat taakkua pissusii assigiinngitsorujussuupput. “Esaui pinerrarissunngorpoq narsarsuarmi ivigalimmi angalaartartoq, Jaakuli inuuvoq pitsaasoq tupermi najugaqartoq.” (1 Mos 25:27) Biibilimik nutserisoq Robert Alter naapertorlugu oqaaseq hebræerisooq allassimaffimmi matumani ‘pitsaasoq’-mik nutserneqartoq aamma ‘assuarnaatsoq’-mik allaallu ‘pinngitsuusoq’-mik isumaqarsinnaavoq.

⁷ Esaui Jaakulu 15-inik ukioqartut aataavat Aaperaat toquvoq. Jehovalli Aaperaamut neriorsuunni eqqaamavaa. Kingusinnerusukkut Jehovap neriorsuunni Iisaamut eqqaaqqippaa oqarlunilu nunarsuarmi inuiaat tamarmik Aaperaap ‘kinguaassaa’ aqqutigalugu pilluaqquneqarumaartut. (1 Mosesi 26:3-5 atuakkit). Neriorsuutaanit erserpoq Missiarsi — kinguaassaq aalajaatsoq Mosesimik Allakkani siullerni 3:15-imi eqqaaneqartoq — Aaperaap kinguaarissagaa. Esaui Iisaap angajulliliarimmani Guutip Aaperaamut neriorsuutaatut aamma neriorsorneqartussaavoq. Taamaattumik Missiarsi Esauip kinguaarisussaagaluarpaa. Esauip kingornussassaa tamanna immikkut ittuuvoq! Tamannali pingaartippaa?

8, 9. (a) Esaui kingornussassani pillugu qanoq aalajangerpa? (b) Ukiut arlallit qaangiummata Esaui aalajangersimanini pillugu qanoq paasinnilerpa, qanorlu piva?

⁸ Ilaanni Esaui angalareersimalluni tikikkami takuaa ‘Jaaku nerisassaminik igasoq’. Esaui qinulluni ima oqarpoq: “Aappaluttumik uuminnga illit pinnik nerisassannik tuninasuannga qasutassimaqigama.” Jaaku ima akivoq: “Angajulliussutsit uannut pisiaritikkukku aatsaat taamaaliussaanga.” Esaui qanoq aalajangerpa? Oqarpoq angajulliussutsini iluaqutiginaviarnagu. Angajulliussutsiminit nerisassiaq ataasiagassaannaq pingaartinneruaa! Esauip angajulliussusianik pinissani qulakkeerniarlugu Jaaku ima oqarpoq: “Uppernarsaaffigeqqaarallannga.” Esauip nangaanani angajulliussutsini tunivaa. Taava “Jaakup Esaui iffiamik eertaasanillu  tunivaa; nerereerami imereerlunilu nikuippoq qimagullunilu”. Esauip angajulliussutsini naleqanngitsutut pingaaruteqanngitsutullu isigaa. — 1 Mos 25:29-34.

⁹ Ukiut arlallit tamatuma kingorna Iisaaq toqungajalersorimmat Rebekkap Jaakup angajulliussutsimik Esauimit pisiaminik tunineqarnissaa isumagaa. Esauip paasileramiuk angajulliussutsip tunineratigut sianiitsumik aalajangiisimalluni Iisaaq ima kimigiiserfigaa: “Ataata, uangattaaq pilluaqqunnga! . . . Uannut pilluaqqussutissamik toqqortaqanngilatit?” Iisaaq oqarmat Jaakumut pilluaqqussutini allanngortissinnaanagu Esaui qissaserujussuarpoq. — 1 Mos 27:30-38.

10. Jehovap Esaui Jaakulu qanoq isigai, aamma sooq?

¹⁰ Esauip isiginnittaasia pillugu oqaluttuamit qanoq paasisaqarpugut? Esauip uinngup pilerigisai pilluaqqussutissanit kingornussassaminut tunngatillugu Jehovap neriorsuutigisimasaanit pingaartinneruai. Esauip angajulliussutsini pingaartinngimmagu ilimanarpoq Guutimik asanninngitsoq. Esauip aalajangernini kinguaassaminut qanoq sunniuteqassanersoq aamma eqqarsaatiginngilaa. Jaakuli allaanerusumik isiginnittaaseqarpoq. Kingornussassani pingaartingaaramiuk eriagiumallugu silatusaartumik aalajangiisarpoq. Assersuutigalugu Jaakup nuliassarsiorniarnermut tunngatillugu angajoqqaami siunnersuutaat kajumilluni malippaa. (1 Mos 27:46–28:3) Tamanna imaannaanngilaq, Jehovalli Jaakup naalannera pilluaqquaa Missiarsimut siuaasanngortillugu. Guutip Esaui Jaakulu qanoq isigai? Jehova ima oqarpoq: “Jaaku asavara Esauili uumigalugu.” — Mal 1:2, 3.

11. (a) Kristumiuugatta sooq Esauimik oqaluttuaq iluaqutigisinnaavarput? (b) Esauip iliuuserisimasaa allaatigigamiuk sooq Paulusip kinguaassiuutitigut inuunerlunneq eqqartorpaa?

¹¹ Esauimik oqaluttuaq ilinniutigisinnaavarput. Apustilip Paulusip kristumiut mianersoqquai “kinguaassiuutitigut inuunerluttoqaqqunagu Esauitullu illernartunik pingaartitsinngitsoqaqqunagu, taassuma nerisassanut ataasiaannagassanut angajulliliatut pisinnaatitaaffini taartigimmagit”. (Hebr 12:16, NW) Mianersoqqussutaa tamanna suli atuuppoq. Illernartunik pingaartitsiuartariaqarpugut ussernartunik akiuisinnaaniassagatta kingornussassarpullu eriaginiassagatsigu. Esauip iliuuserisimasaa allaatigigamiuk sooq Paulusip kinguaassiuutitigut inuunerlunneq eqqartorpaa? Esaui assigalugu uinngup pilerigisai maliinnarutsigit ajortulioriaannaassaagut, assersuutigalugu kinguaassiuutitigut inuunerloriaannaasinnaavugut, tamatumalu kingunerisaanik kingornussassarput annaallugu.

12. (a) Saatanip tamatta inuttut ataasiakkaatut qanoq usserniartarpaatigut? (b) Ussernartorsioraangatta Biibilimik oqaluttuat suut iluaqutigisarsinnaavavut?

¹² Jehovamut kiffaagatta kinguaassiuutitigut inuunerlunnissamut ussernartut suulluunniit sapinngisatsinnik ussernartorsiorfiginaveersaarniartarpavut. Ussernartorsioraluaruttali Jehova Guuti ussernartumut nakkaannannginnissatsinnut ikioqqulluta qinnuigissavarput. (Matt 6:13) Silarsuarmi ajortumi matumani assuarnaattuarumalluta ilungersorpugut, Saatanilli Jehovamut attaveqarluarunnaarsinniarsaraatigut. (Ef 6:12) Saatanip pissutsit aaqqissuussaanerannut ajortumut maanna atuuttumut guutiugami nalunngilaa inuit pilerigisapiluinut taakku qanoq nakkaannartissinnaallugit. (1 Kor 10:8, 13) Tamatta misilinniartarpaatigut. Taavami illit pilerissusipiluit naammassiniaannarlugu ussernartorsioruit? Qanoq aalajangiissavit? Esauitut ussernartumut ingerlaannaq nakkaannassavit? Imaluunniit Jaakup erneratut Josefitut Potifarip nulianit ussernartorsiorfigineqartutut ussernartoq akiussaviuk qimaallutillu? — 1 Mosesi 39:10-12 atuakkit.

13. (a) Nalitsinni ilaat Josefitut qanoq iliorsimappat, allalli Esauitut qanoq iliorsimappat? (b) Esauitut iliorumanata susariaqarpugut?

¹³ Qatannguterpassuavut ussernartorsiortitaanertik pissutigalugu Esauitut imaluunniit Josefitut piniarlutik aalajangertarsimapput. Ilarpassuisa silatusaartumik aalajangersimagamik Jehovap uummataa nuannaartippaat. (Uss 27:11) Allalli kingornussassartik eriaginngitsooramikku Esauitut iliorniarlutik aalajangersimapput. Ukiut tamaasa taakkua ilarpassui kinguaassiuutitigut inuunerlunnertik pissutigalugu oqaaqqissaarneqarlutilluunniit ilaajunnaarsitaasimapput. Ussernartorsiortitaanissatsinni assuarnaattuarsinnaaqqulluta uummatitta maannakkut piareersarnissaa pingaaruteqarluinnarpoq! (Tuss 78:8) Ussernartut akiorsinnaaniassagatsigit silatusaartumillu aalajangiisinnaaniassagatta uummatitta piareersarnissaanik iliuuserisinnaasavut marluk sammissavavut.

14. Apeqqutit suut ajussutsip uumiginissaanut ajunngitsullu aalajangerfiginissaanut iluaqutigisinnaavavut?

¹⁴ Iliuuserisassaq siulleq tassaavoq ajortuliornerup kingunipiluisa eqqarsaatigeqqissaarnissaa. Jehova asanerujartortillutigu kingornussassarput eriaginerujartussavarput. Asasarput aliasutsikkusunngilarput, sapinngisatsinnilli pilluartinniartarparput. Taamaattumik ajortuliornerup kingunipilui — uagutsinnut allanullu qanoq ajoqutaatigisinnaanerat — eqqarsaatigeqqissaartariaqarpavut. Imminut ima aperisariaqarpugut: ‘Namminissarsiorlunga pissusilersoraluaruma tamanna Jehovamut attaveqarninnut qanoq sunniuteqassava? Ajortulioraluaruma tamanna ilaquttannut qanoq sunniuteqassava? Ilagiinni qatanngutinnut qanoq sunniuteqassava? Taamatut pissusilersoraluaruma allat ajuallaatigissavaat?’ (Fil 1:10) Aamma imminut ima aperisinnaavugut: ‘Kinguaassiuutitigut inuunerlunnerup sivikitsuinnarmik nuannaarnarnera eqqunngitsuliornerup kingunipilui eqqarsaatigalugit imminut akilersinnaanerpa? Esaui ajortuliornermi kingunipilui paasileramigit qissaserujussuartoq ilumut assigerusuppara?’ (Hebr 12:17) Apeqqutit taakku eqqarsaatigeqqissaarutsigit ajussuseq maajugisinnaallugulu ajunngitsoq aalajangerfigisinnaavarput. (Rom 12:9) Jehova ilumoorluta asagutsigu kingornussassarput sapinngisatsinnik eriagissavarput. — Tuss 73:28.

15. Ussernartut suulluunniit akiornissaannut piareersaqqissaarnissatsinnut Guutimullu attaveqarluartuarnissatsinnut suut iluaqutigisinnaavavut?

¹⁵ Iliuuserisassatta aappaat tassaavoq ussernartup akiornissaanut piareersaqqissaarneq. Jehovap silarsuarmi ussernartunik akiuinissamut piareersarnissatsinnut imminullu attaveqarluartuarnissatsinnut assigiinngitsorpassuartigut  ikiortarpaatigut. Assersuutigalugu Jehovap Biibilimik atuaqqissaartarneq, ataatsimiinnerit, oqaluussisarneq qinusarnerlu qanoq iluaqutigisinnaanerivut ersersissimavaa. (1 Kor 15:58) Jehovamut qinunikkut uummammiuvut aniatikkaangatsigit sapinngisatsinnillu oqaluusseqataagaangatta ussernartup akiornissaanut piareersartarpugut. (1 Timotheusi 6:12, 19 atuakkit). Ussernartup akiornissaanut piareersimassagutta taakku ilungersuutigisariaqarpavut. (Gal 6:7) Tamanna Ussatini kapitalit aappaanni sammineqarpoq.

16, 17. Silatusaartumik aalajangiinissatsinnut suut iluaqutigisinnaavavut?

¹⁶ Ussatini kapitalit aappaanni ilisimassuseqarnissatsinnut eqqarsarsinnaassuseqarnissatsinnullu kajumissaarneqarpugut. Pissuserineqartussat Jehovameersut taakku eqqortumik eqqunngitsumillu immikkoortitsinissatsinnut imminullu aqussinnaanissatsinnut iluaqutigisinnaavavut. Silatusaartumilli aalajangiisinnaavugut aatsaat ilungersorumagutta. Biibilimi ima allassimasoqarpoq: “Ernera, oqaatsikka ilassiniakkit inassutikkalu pigiliullugit, ilisimassusermut naalaarlutit uummatillu siuneqassusermut saatsillugu, paasisimasaqassuseq qaaqqugukku siuneqarnerlu aggeqqullugu nipituumik torlulaffigalugu, ujarukku sølvisiortoq assigalugu, erlinnartunik nassaarniartutut ilungersorlutit, taava paasilissavat Guutimik mianerinninneq sunaasoq, taava Guuti ilisimalissavat. Naalagarmi ilisimassuseqalersitsisarpoq, ilisimasaqarneq sianissuseqarnerlu qarnanit pilersarput.” — Uss 2:1-6.

¹⁷ Allassimaffimmi tamatumani allaaserineqartutut iliuuseqarutta silatusaartumik aalajangiisinnaavugut. Aatsaat Jehovap oqaasianit qamuuna sunnertitikkutta, Guutip siulersuineranik qinnutiginnittuarutta erlinnartuutinillu ujaasisartutullusooq Guutimik ilisimasaqalernissamik ujaasiuarutta ussernartut akiorsinnaavavut.

18. Sunissat aalajangiusimaviuk, aamma sooq?

¹⁸ Jehova imminik ilisarisimanninniartuartunik ilisimasaqartitsivoq, paasisimasaqartitsilluni, siuneqassuseqartitsilluni ilisimassuseqartitsillunilu. Ilisimasaqarnermik, paasisimasaqassusermik, siuneqassusermik ilisimassusermillu ujaasinerullutalu atuinerugutta Jehovamut attaveqarnerput pitsanngornerussaaq. Taava taassumunnga attaveqarluarnerput ussernartorsiornitsinni illersuutigissavarput. Jehovamut qanittumik attaveqarutta taassuminngalu mianerinnikkutta ilungersorluta ajortuliornaveersaassaagut. (Tuss 25:14; Jaak 4:8) Jehovamut ikinngutaanerput ilisimassuserlu taassuminnga pisarput iluaqutigalugit silatusaartumik aalajangiisinnaavugut, taamaalillutalu Jehova nuannaartissinnaallugulu kingornussassarput eriagisinnaavarput.