ATAATAGA maniguuttuuvoq suleruluttartoq. Naapertuilluarnermik nuannarisaqartuuvoq, taamaattumik 1953-imi tusarliussaq Biibilimeersoq tusaramiulli nuannarilerpaa. Taamanimiilli ilikkakkani sapinngisaminik uagutsinnut meeraasunut ilinniartitsissutigisarpai. Aallaqqaammut anaanama katuullit ileqqutoqaat iperaruminaatseqqaariarlugit ajoqersuutit Biibilimeersut akueriartulerpai.

Anaanaga atuarsinnaanngingajammat ataatagalu ulloq naallugu narsaammi suleruluttarmat ilaqutariittut atuaqqissaaqatigiinnissarput angajoqqaatsinnut oqitsuinnaanngilaq. Ilaannikkut atuaqqissaartilluta ataataga qasoqqanermik sinilersoortarpoq. Ilungersorlunili ilinniartitsinera kinguneqarluarpoq. Angajulliugama aqqalussannik marlunnik nukkannillu ilinniartitseqataasarpunga. Noap ilaquttaminik asanningaarnera Guutimullu naalalluinnarnera eqqartorajupparput. Oqaluttuaq taanna nuannaringaarpara! Ilaqutariittut Biibilimik atuaqqissaartalernitta kinguninngua Italiap kangimut sineriaani illoqarfimmi Roseto degli Abruzzimi tamatta naalagaaffilersaarfimmut ataatsimiigiartalerpugut.

1955-imi aqqaniliinnarnik ukioqarlunga anaanagalu qaqqarsuit itivillugit Romaliarpugut siullerpaamik ataatsimeersuariarluta. Taamanerniilli ataatsimeersuarnerit immikkut nuannarisarilerpakka.

1956-imi kuisippunga sivitsunngitsorlu pionerinngorlunga. 17-inik ukioqarlunga Romap kujataani illoqarfimmi Latinami inunngorfinniit 300 kilometerit missiliorlugit ungasitsigisumi specialpionerinngorpunga. Illoqarfik nutaajummat tassani najugallit inoqatimik isumaat soqutigivallaanngilaat. Atuagassianik Biibililersaarutinik piumasoqarluartarnera pionereqatimalu nuannaarutigigaluarlutigu uanga inuusunnermik angerlarsertaqaanga. Taamaakkaluartoq Jehova naalakkusukkakku aallartitaaffigisanniiginnarusuppunga.

Tamatuma kingorna 1963-imi Milanomukartitaavunga ataatsimeersuarnissamut “Nutaarsiassaq nuannersoq atajuartussaq”-mut nunanit tamalaanit peqataaffigineqartussamut piareersaasunut ikiuukkiartortitaallunga. Ataatsimeersuarnermi nammineq kajumissutsimit sulivunga  allarpassuit peqatigalugit, ilaatigut qatanngut angut Firenzemeersoq Paolo Picciolimik atilik. Ataatsimeersuarnerup ulluisa aappaanni Paolo aappaqannginneq pillugu uummaarissumik oqalugiarpoq. Eqqaamavara ima eqqarsarlunga: ‘Tassaqa angut taanna aappartaassava.’ Ataatsimeersuarnerulli kingorna allaqatigiittalerpugut. Paasivarput anguniakkavut assigiittut marluullutalu Jehovamut asanningaartuullutalu naalakkusuttugut. 1965-imi Paololu katippugut.

Ukiuni qulini Firenzemi pioneriuvunga nalinginnaasoq. Ilagiinniittut amerliartuinnartut, ingammik inuusuttut sallusuissummik siumukartut, takullugit pissanganaqaaq. Paololu inuusuttut taakkua Biibili pillugu oqaloqatigisarnerat nuannaraarput, aamma sukisaarsaaqatigisarpavut, Paololu ilaaguni allaassanngilaq arsaanneq. Soorunami uiga najorusuttarpara, aammali takusinnaavara ilaqutariit inuusuttullu ilagiinniittut Paolomit piffissaqarfigineqarnissartik soqutigineqarnissartillu pisariaqartittaraat.

Suli nuannaarutigingaartarpara Biibilimik ilinniartinnikuusavut eqqaagaangakkit. Taakkua ilagaat Adriana, ilaqutariinnut allanut marlunnut ilikkakkaminik oqaluttuartoq. Ilaqutariit taakku palasimik qaaqqusipput oqaluffimmi ajoqersuutit, soorlu ataasiullunilu pingasuussuseq tarnillu toqujuitsuunera, pillugit oqallitsitsiniarlutik. Palasit nuimanerit pingasut takkupput. Ajoqersuutiminnik nassuiaanerat paatsiveqanngilaq, Biibilimillu atuaqqissaaqatigisartakkatta tusaasinnaavaat ajoqersuutaat Biibilimut naapertuutinngilluinnartut. Tamatuma kingunerisaanik ilaqutariit marluusut taakkua ilaat 15-it nalunaajaasunngorput.

Soorunami ullumikkut oqaluusseriaaserput allaaneruvoq. Taamanikkut Paolo Biibilimi ajoqersuutit pillugit palasinik oqalliseqateqarajuppoq, oqallinnernilu taamaattuni upperisatsinnik saqqummiussillaqqissilluni. Oqallinnerit ilaanni nalunaajaasuunngitsuinnaat tusarnaarput, malunnarsivoq palasit najuuttunik apeqquteqaqqusisimasut Paolop akiuminaatsillugu peqqusiileqissutigisinnaasaanik. Palasilli pilersaarutaattut pisoqanngilaq. Najuuttut ilaat aperimmat oqaluffeqarfiup politikkimut akuliuttarnera eqqortuunersoq palasit akissutissaarupput. Tassanngaannaq qulliit qamipput ataatsimiinnerlu unitsinneqarluni. Ukiut arlallit tamatuma kingorna paasivarput palasit isumaqateqarsimasut oqallinneq neriuutigisamittut ingerlanngippat arlaata qulliit qamissagai.

Ukiuni qulini aappareereerluta aperineqarpugut Paolo nakkutilliisutut angalasartutut kiffartorusunnersoq.  Paolo suliffigissaarmat aalajangerniaasaarpugut. Akuersissanerluta qinnutitsinnut ilannguttareerlugu eqqarsaatigereerlugulu akuersivugut. Illusisimaffigisartakkavut nuannisaqatigisarpavut. Ilaannikkut unnukkut illusisimaffigisavullu atuaqqissaaqatigiittarpugut, kingusinnerusukkullu Paolop meeqqat ilinniagassaannik ikiortarlugit, kisitsisilerissagaangatalu nuannarinerpaasarpaa. Paolo aamma atuarumatuujuvoq atuarsimasanilu soqutiginartut qiimmaallannartullu pillugit oqaluttuarusuttarluni. Ataasinngornikkut illoqarfinnut nalunaajaasoqarfiunngitsunut oqaluussiartorajuppugut qaaqqusiartorlutalu unnukkut oqalugiaatissamut.

Angalasartutut ukiuni marluinnarni kiffartoreerluta Betelimi Romamiittumi kiffartorusunnersugut aperitippugut. Paolo inatsisileriffimmi kiffartulerpoq uangalu atuagassianik pisartagaqarfimmi. Inuunitta allanngornera oqitsuinnaanngilaq, naalannissarpulli aalajangiusimavarput. Immikkoortortaqarfiup allilerneqartuarnera Italiamilu qatanngutit amerliartuinnarneri malinnaaffigalugit pissanganaqaaq. Tamatuma nalaani Jehovap Nalunaajaasui upperisarsiortutut Italiami inatsisitigut akuerisaapput. Taamani Betelimi kiffartornerput nuannaarutigingaarparput.

1980-ikkut aallartinneranni Betelimi kiffartortilluta aak pillugu eqqartuussineq Italiami oqallisaangaalerpoq. Aappariit nalunaajaasut panimmik toquneranut pisuutinneqarput aalersitsikkusunnginnamikku. Eqqunngitsumik unnerluussineruvoq. Toqqutigaami aakkut nappaat ilungersunartoq Italiami nunanilu eqqaamiutsinniittuni nalinginnaasoq. Angajoqqaat eqqartuussissuserisuutitaat qatanngutinit angutinit arnanillu Betelimiittunit ikiorneqarput. Naqitaaraq aamma Vågn op! immikkut saqqummersitaq naqiterneqarput agguaanneqarlutillu inunnut pineqartoq pillugu ilumoortumik aamma aak pillugu Biibilimi qanoq allassimasoqarneranik paasititsiniutitut. Qaammatini taakkunani Paolo ullormut nalunaaquttap-akunneri 16-it pallillugit suliinnaavittarpoq. Taamaannerani sapinngisannguannik tapersersortarpara.

Ukiuni 20-ni aappareereerluta ilimaginngisatsinnik pisoqarpoq. Paolo 49-nik ukioqartoq uangalu 41-nik ukioqarlunga oqaluttuuppara naartugunarlunga. Paolo ullormi tamatumani ullorsiutimini ima allassimavoq: “Qinnut: Tamanna ilumoorpat piffissap tamaat kiffartortuarnissatsinik, anersaakkut qasukkannginnissatsinnik maligassiuilluarnikkullu angajoqqaajulluarnissatsinnik ikiortigut. Minnerunngitsumillu ukiuni 30-ni kingullerni oqaluttarfimmiit oqaaserisarpassuarma 1 procentiinnannguiluunniit maleruarsinnaatikkit.” Maanna qinnut taanna eqqarsaatigigaangakku erseqqippoq Paolop  qinnutaa — uangalumi aamma qinnutiga — ilumut Jehovap akisimagaa.

Ilaria inunngormat inuunerput allanngorujussuarpoq. Ilaannikkut Paololu nikallortarpugut, allaat Ussatit 24:10-mi allassimasutut misigaluta: “Ullormi annikilliorfiusumi sapiissuseerukkuit taava nukitit annikillissapput.” Annertoqqusersoqatigiittuartarpugulli.

Ullumikkut Ilaria oqartarpoq peroriartornermini angajoqqaani piffissaq tamaat kiffartormata nuannaarutigalugu. Asaneqartutut isumagineqartutullu misigiuaannarpoq. Meeraanerani ullukkut uanga paarisarpara. Paolop unnukkut angerlaraangami pinnguaqatigalugulu ilinniagassaanik ikiortarpaa. Taamaaliortarpoq allaat ilaannikkut unnuakkut marluk pingasulluunniit tungaanut nammineq suliassani suliarisariaqaraluaraangamigilluunniit. Ilaria ima oqartarpoq: “Ataata ikinngutiginerpaavara.”

Soorunami Ilaria eqqortuliortinniarlugu perorsaanitsinni aalajangersimaqqissaarniartarpugut — ilaannikkut sukannersumik perorsarlugu. Eqqaamavara ataatsimik ikinngutini pinnguaqatigitillugu ajortumik pigaa. Biibili tunngavigalugu nassuiaapparput sooq taamaaliortussaanngitsoq. Aamma tusaatilluta ikinngutaanut utoqqatsertipparput.

Ilaria oqartarpoq angajoqqaami oqaluussineq nuannareqimmassuk aamma nammineq nuannaringaalerlugu. Maanna inersimasuullunilu aappaqarami Jehovamut naalannerup siulersuineranullu maleruaanerup qanoq pingaaruteqartiginera paasilluarneruaa.

2008-mi Paolop paasivaa kræfteqarluni. Aallaqqaammut isumaqaraluarpugut nappaatini anigussagaa, qiimmassangaartarpaangalu. Pitsaanerpaamik nakorsaatissarsiuutigalugu sivisuumik Ilaria Jehovamut qinoqatigisarparput aqqusaagassatsinnik ikioqqulluta. Taamaakkaluartoq nikallornarpoq angut nukittooq uummaarissorlu sanngiilligaluttuinnartoq isigalugu. 2010-mi Paolo toqummat artorsangaarpunga. Ukiunili 45-ni aappariinnitsinni pisimasorpassuit tuppallersaatigisarpakka. Sapinngisarput tamaat Jehovamut iliuuseqarpugut, nalunngilaralu suliavut puiunngisaannassagai. Johannesi 5:28, 29-mi allassimasut eqquunnissaannut Paolollu makititaanissaanut qilanaaqaanga.

Qamuuna suli niviarsiarannguuvunga Noamik oqaluttuamik nuannarisalik. Suli Jehovamut naalakkusuppunga qanorluunniit peqqugaluarpanga. Qanorluunniit ajornartorsiuteqaraluarutta, sumilluunniit pilliuteqaraluarutta qanorluunniillu annaasaqaraluarutta Guutitta asannittup uagutsinnut pilluaqqussuterpassuinut nuannersunut sanilliullugit tamakku suunngillat. Tamanna nammineq misigisimavara, oqarusuppungalu peqqissimissutissartaqanngitsoq!