Aramæerit kunngiata Guutip pruffiitia Elisa tigusarerusukkaluarpaa, naluaali sumiinnersoq. Tusarsimavaali Elisa Dotanimi illoqarfimmi qarmalimmi qattunermiittumiittoq. Kunngi hestinik qamutinillu sakkutoorpassuarnillu Dotanimut aallartitsivoq. Ullaaralaakkullu illoqarfik unguneqarpoq. — 2 Kng 6:13, 14.

Elisap kiffaa makilluni anigami sakkutoorpassuit akeraasut takullugillu annilaangalerpoq. Ernumalluni ima oqarpoq: “Alianaq, naalagaq, qanoq iliussaagut?” Elisap ima akivaa: “Ersissanngilatit, uagut ilivut akeqqatta iliinit amerlanerupput!” Taava Jehovamut ima qinuvoq: “Naalagaq, isai uisikkit isigisaqalersillugu!” Taava Jehovap “angutip inuusuttup isai uisippai, taassumalu takuaa qaqqaq Elisa ungaqqullugu hestinik innerusunik qamutinillu innerusunik ulikkaartoq.” (2 Kng 6:15-17) Tamanna qanoq ilinniarfigisinnaavarput?

Elisa Aramæerit sakkutuuinit unguneqaraluarluni annilaangalinngilaq. Jehova tatigalugulu taassuminnga sernissorneqarnissani qularutiginngilaa. Ullumikkut tupinnartuliorfigineqarnissarput naatsorsuutiginngilarput, nalunngilluinnarparpulli Jehovap innuttani ataatsimut isigalugit sernissortarai. Uaguttaaq hestinit qamutinillu innerinnaasunit illersorneqarnerput takusinnaavarpullusooq. Jehovap innuttaminik illersuiumaarnera upperigutsigu Taannalu tatigiuarutsigu toqqissisimasinnaavugut pilluaqquneqarumaarlutalu. (Tuss 4:9) Elisap inuunerani pisimasut allat qanoq ilinniarfigisinnaanerivut sammeriartigu.

Ullut ilaanni Elisa assallatseritillugu pruffiitip Eliap ornippaa qallersaatiminillu nalussivigalugu. Taamaaliornermigut Eliap Elisa imminut kiffanngortippaa. Elisap ikinngutini nereqatigiumallugit qaaqquai, taava angajoqqaani inuulluaqquai, angerlarsimaffinilu qimallugu Elia angalaqatigilerpaa. (1 Kng 19:16, 19, 21) Elisa Guutip piumasaatut tamatigut iliorumammat Jehovap assigiinngitsorpassuartigut suliassittarpaa, kingusinnerusukkullu Eliamut taarsiullugu pruffiitinngortippaa.

 Immaqa ukiuni arfinilinni Elisa Eliamut kiffaavoq. Biibilimi allassimavoq Elisa “Eliap assaanut imermik kuisisartuusimasoq”. (2 Kng 3:11) Tamanna qanoq paasisariaqarpa? Taamani inuit amerlanertigut atortussat atornagit assatik atorlugit nerisarput. Taamaattumik nerereeraangata kiffap naalakkami assai imermik kuillugit asattarpai. Elisap suliarisartagaasa ilaat immaqa pingaarutaarpasinngillat. Taamaakkaluartorli Elisap Eliamut kiffaanini immikkut pisinnaatitaaffittut isigaa.

Tamatumunnga assingusumik ullumikkut kristumiorpassuit piffissaq tamaat kiffartornermi suliassat assigiinngitsut kajumillutik suliarisarpaat. Sooq? Jehova upperalugulu pitsaanerpaamik tuniumagamikku. Assersuutigalugu ilaasa Betelimi suleqataaniarlutik sanaartoqataaniarlutilluunniit angerlarsimaffertik qimattarpaat. Imaassinnaavoq taakkua suliaat allanit pingaaruteqarpianngitsutut isigineqartoq. Uagulli taamatut isiginnittaaseqartassanngilagut, Jehovammi kiffami suliaat tamaasa pingaartingaarpai. — Hebr 6:10.

Guutip ‘anorersuakkut Elia qilaliartitinnagu’ pruffiitini Gilgalimiit Betelimut aallartippaa. Eliap Elisa oqarfigaa ilagisariaqanngikkaani, Elisali ima oqarpoq: “Qimassanngilakkit!” Angalanerminni Eliap marloriarluni uningaannaqqugaluaraani Elisa piumanngilaq. (2 Kng 2:1-6) Elisap Elia ilumoorfigalugu qimanngisaannarpaa, soorlu Ruthip No’omi qimanngisaannaraa. (Ruth 1:8, 16, 17) Elisap Eliamut Guutimit kiffanngortinneqarnini ataqqinaataasutut isigaa.

Elisa uagutsinnut maligassiuilluarpoq. Jehova kiffartorfigalutigu eqqaamajuarutsigu Guutip peqatigiissortaani qanorluunniit suliassinneqaraluarluta suliassarput pingaartingaassavarput. Jehovamummi kiffartorneq immikkut pisinnaatitaaffiuvoq annerpaaq. — Tuss 65:5; 84:11.

Angalanerminni Eliap Elisa ima oqarfigaa: “Tusariassagiga ilinnit qimagutitaatinnanga sumik kissaateqarfiginerimma.” Elisa ima akivoq: “Anersaarpit avinneri marluk pilakka!” Soorlu Salomop qinusimaneratut Elisap Jehovamut kiffartorluarnerunissaminut iluaqutaasinnaasoq qinnutigaa. (1 Kng 3:5, 9; 2 Kng 2:9) Sunarpiaruna Elisap qinnutigigaa? Israelimi inatsisit naapertorlugit nukappiaraq angutip angajulliliaa kingornussassamit marloriaammik agguagarsiassaqartinneqartarpoq. (5 Mos 21:15-17) Taamaattumik Elisap Eliamit kingornussassaqartinneqarnissani, tassa Elia taarserlugu pruffiitinngortinneqarnissani, qinnutigaa. Aamma Eliap ‘anersaavatut’, imaluunniit isiginnittaasiatut, isiginnittaaseqarnissani qinnutigaa pallorfiginninnermi ilumoortumi Eliatut sapiissuseqarlunilu aallussilluartoorusukkami. — 1 Kng 19:13, 14.

Kiffani taamatut qinnuteqarmat Elia qanoq piva? Pruffiiti ima oqarpoq: “Kissaatigisaq taama ittoq saperuttaatsuuvoq; qimagutitaanerali isiginnaarukku kissaatigisat pissavat, taamali pisoqanngippat naami.” (2 Kng 2:10) Eliap akissutaa marlutsigut isumaqarpoq. Siullermik, Guutip kisimi aalajangersinnaavaa Elisap qinnutigisaa tunniukkumanerlugu. Aappassaanik, Elisap qinnutigisani pissaguniuk qanorluunniit pisoqaraluarpat Elia najortuartariaqarpaa.

Elisap qinnutigisaanik Guutip tunivaa? Biibilimi ima allassimavoq: “Oqaloqatigiitsillugit takkupput qamutit innerinnaasut innerinnaasunik qimuttullit. Taakkua Elia Elisalu imminnit avissaartippaat, Elialu anorersuakkut qilaliartinneqarpoq. Elisap taama pisoqartoq [takuaa].” * Tassa Elisap qinnutaanut Jehovap akissutaa. Elisap Elia imminit avissaartinneqartoq takuaa, aamma Eliap ‘anersaavanik’, imaluunniit isiginnittaasianik, marloriaammik tunineqarpoq Elialu taarserlugu pruffiitinngorluni. — 2 Kng 2:11-14.

Eliap qallersaat katataa Elisap tiguaa atillugulu. Inuit Elisap qallersaat taanna atoraa takugamikku paasivaat Elisa Guutimut pruffiitinngorsimasoq. Kingusinnerusukkut Guutimut pruffiitiunini ersersippaa kuussuup Jordanip avissaartinneratigut.

Elia anorersuakkut qilaliartinneqarmat Elisap takusani puiunngisaannarsimassavaa. Kialuunniit qamutit innerinnaasut takugaluarunigit tupigusuutigissagaluarpai! Taakku Jehovap Elisap qinnutigisimasaanik tunniussisimaneranut uppernarsaataapput. Guutip qinnutivut akigaangamigit qamutinik hestinillu innerinnaasunik takorruuisittanngilaatigut.  Uppernarsaatissaqarluarpugulli Guutip ikiorumalluta piumasanilu naammassiumallugu pissaanersuani atortaraa. Jehovap peqatigiissortami ilaannik nunarsuarmiittunik pilluaqqusinera takugutsigu qamutit qilammiittut siumukarnerat takussavarpullusooq. — Ez 10:9-13.

Elisa Jehovap pissaaneranut uppernarsaataasunik misigisarpassuaqarpoq. Guutip anersaava illernartoq iluaqutigalugu pruffiiti 16-eriarluni tupinnartuliorpoq. Elisap tupinnartuliai Eliap tupinnartuliaanit marloriaammik amerlanerupput. * Elisa Dotanimi Aramæerit sakkutuuinit unguneqarami qamutinik hestinillu innerinnaasunik aappassaanik takusaqarpoq.

Elisa Dotanimi akeqqanit unguneqaraluarluni annilaangalinngilaq. Sooq? Jehova upperilluinnaramiuk. Uaguttaaq Jehova upperilluinnartariaqarparput. “Upperneq” (NW) aamma anersaap inerititaata ilaat allat pissuserineqartussat ersersissinnaaniassagatsigit Guutip anersaava illernartoq qinnutigisariaqarparput. — Luk 11:13; Gal 5:22, 23.

Elisap Dotanimi pisoq Jehovamik inngilerpassuarnillu tatiginninnerulissutisimassavaa. Guutip inngilini aallartippai illoqarfik ungoqqullugu Elisalu akeqqanit illersorumallugu. Taava Guutip Elisa kiffaalu aniguisippai akeqqanik tappiillisitsinermigut. (2 Kng 6:17-23) Navianartorsiornermi tamatumani pisunilu allani Elisap Jehovamik upperinnillunilu tatiginnilluinnarnini ersersippaa.

Elisatut Jehova Guuti tatigisigu. (Uss 3:5, 6) Taamaaliorutta ‘Guutip saammaallutalu pilluaqqujumaarpaatigut’. (Tuss 67:2) Ullumikkut qamutinit hestinillu innerinnaasunit unguneqanngilagut, taamaakkaluartorli Jehovap innuttani suli illersortarpai. Siunissamilu annikilliornartussarsuarmi Jehovap innuttani aamma illersorumaarpai. (Matt 24:21; Saqq 7:9, 14) Taamaattumik eqqaamajuartigu ‘Guuti qimarnguffigigipput’. — Tuss 62:9.