Isumaqataavit Jiisusi nunarsuarmi inuusimasuni ajoqersuillaqqinnerpaajusoq? Jiisusi ilinniartitseriaasiatigut, soorlu apeqqutinik assersuutinillu atuisarneratigut, immaqa ilaarniartarsimassavat. Illuatungeriissitsisarnerit atorlugit ersarissaasarnera eqqarsaatiginikuuiuk?

Inuppassuit oqalukkaangamik illuatungeriissitsisarput. Eqqarsaatigivallaarnagu aamma illit taamaaliortarsimassaatit. Immaqa imatut oqarputit, “oqarput, naatitat tamarmik inerilluarsimasuusut; ukuli suli manngerput.” Immaqaluunniit, “meeragami ittoortuuvoq, maannali ammasorujussuuvoq.”

Tassami siullermik piviusoq imaluunniit eqqarsaat oqaatigivat; taava illuatungeriissitsisarputit soorlu uku atorlugit; taamaattoq, akerlianik, kisianni aamma -li. Immaqaluunniit paasissutissanik ilanngussillutit imaluunniit eqqarsaammik erseqqissaanikkut illuatungeriissitsisarputit. Taamatut oqalunneq pissusissamisoorpoq sunalu pineqarnersoq allanut paasinarninngortarluni.

Aamma oqaatsitigut kulturikkulluunniit illuatungeriissitsisarnerit assigiinngissuteqaraluartut pingaaruteqassusii paasiniartariaqarpavut. Sooq? Guutip oqaasiani isumassarsiarititaasuni nassaassaasarmata. Jiisusi oqalukkaangami illuatungeriissitsikulasarpoq. Assersuutigalugu: “Naneruarluunniit ikissinnarlugu nappartap ataanut inissinneqarneq ajorpoq, qullilerfimmulli.” ‘Inatsisit atorunnaarsikkiartorlugit tikiuttinngilanga, naammassisitsiartorlungali.’ “Tusarparsi oqartoqarsimasoq: ‘Allasiussanngilatit’. Uangali oqarfigaassi: Kialuunniit allap nulia pilerigalugu isigiguniuk ...” “Oqartoqarsimasoq: ‘Isi isimik naleqartinneqassaaq, kigullu kigummik.’ Uangali oqarfigaassi: Ajortumik pinninniartumut akersuuteqinasi. Kialuunniilli ulussakkut talerperlikkut isappatit illuattaaq maniuk.” — Matt 5:15, 17, 27, 28, 38, 39.

Biibilip atuagartaani allani assingusunik illuatungeriissitsisoqartarpoq. Suna pineqarnersoq imaluunniit allatut pitsaanerusumik qanoq iliortoqarsinnaaneranik paasinninissannut iluaqutaasinnaapput. Angajoqqajuguit illuatungeriissitsissutaasoq maluginiariaruk: ‘Ataataasusi, qitornasi kamatseqinasigit, perorsarsigilli anusinngorsartarlugit oqaaqqissaartarlugillu Naalakkamit pisumik.’ (Ef 6:4) Aamma Paulusi allaannarsimagaluaruni, ataataasup (imaluunniit anaanaasup) qitornani Guutimik pisumik oqaaqqissaartassagaa, eqqortuusimassagaluarpoq. Imali illuatungeriissitsigami isumaa paasinarnerulerpoq, ‘kamatseqinasigit, perorsarsigilli anusinngorsartarlugillu Naalakkamit pisumik.’

Kapitalimi tassani kingusinnerusukkut Paulusi allappoq: “Akiugassavummi tassaanngillat aak uinillu, tassaallutilli ... anersaapiluit pissaanilissuit qilaap ilaaniittut.” (Ef 6:12, NW) Illuatungeriissitsinerup tamatuma paasitippaatit pingaarutilerujussuarmik akiugassaqartutit. Akiugassatit inuunngillat anersaapiluilli akiugassaraatit.

Biibilimi, Efesosimiunut allakkani, illuatungeriissitsinerpassuit allat Paulusip atorsimasai atuarsinnaavatit. Tamakkuninnga eqqarsaatiginneqqissaarnikkut Paulusip suna pineraa paasinninnissatsinnik qanorlu iliornissatsinnik ikiorneqarsinnaavugut.

Efesosimiunut allakkani kapitali 4-mi aamma 5-imi illuatungeriissitsinerit immikkoortillugit allattukkat nuannaralugillu isumassarsiorfigisinnaassajunnarsissavatit. Illuatungeriissitsinerit immikkut atuartillugit illit inuunerit eqqarsaatigiuk. Imminut aperigit: ‘Qanoq isiginnittaaseqarpunga? Pissutsini taama ittuni assingusuniluunniit qanoq qisuariartarpunga? Illuatungiliussaq sorleq uannut allat tulluartuutissagunarpaat?’ Sulissutissaqarlutit paasigukku taamaaliorit illuatungeriissitsisarnerlu iluaqutiginniarlugu.

Aamma ilaqutariittut atuaqqissaaqatigiinnermi illuatungeriissitsinerit immikkoortillugit allattukkat sammisinnaavasi. Siullermik ilaqutariit tamarmik illuatungeriissitsinerit atuarsinnaavaat. Taava arlaata immikkoortut siulliit eqqaasinnaavai immikkoortullu aappaanni ilaqutariit ilaasa pingaarnerit eqqaamaniarsarissavaat. Ilaqutariittut nuannersumik oqaloqatigiissutigisinnaavarsi immikkoortup aappaa qanoq ilaarnerusinnaanerlusiuk. Aap, illuatungeriissitsisarnerit misissorluarneratigut ilaqutariinni allaniluunniit tamarmik kristumiutut pissusilersorniartuarsinnaapput.

Illuatungeriissitsisarnerit pingaaruteqassusii eqqumaffiginerujartortillugit Biibilimi maluginiarnerusalissavatit oqaluussinermilu iluaqutigilluarsinnaallugit. Assersuutigalugu pulaakkannut oqarsinnaavutit: “Inuppassuit oqartarput inuit tamarmik toqujuitsumik tarneqartut, Guutilli oqaasiani qanoq allassimasoqartoq maluginiariaruk.” Atuaqqissaaqatigisartakkalluunniit aperisinnaavat: “Inuit maani najugaqartut amerlanerit upperaat Guuti Jiisusilu ataasiusut; Biibilimili qanoq allassimava? Illimmi suna upperaajuk?”

Aap, Guutip peqqussutaanik maleruaanissatsinnut iluaqutigisinnaasatsinnik illuatungeriissitsinerpassuit Biibilimi atuarsinnaavavut. Taakkulu sallusuissutsinik Biibilimeersunik ilinniartitsinitsinni atorsinnaavavut.