1. Ataatsimiinnitsinni sammisat suut sammigajuttarpavut, sammeqqinnerilu qanoq iluaqutigisarpavut?

NAPASULIAQ ALAPERNAARSUIFFIK-mik atuaqqissaaqatigiinnermut piareersartillutit ima eqqarsarnikuuit: ‘Soorlu sammereersimallutigu’? Jehovap Nalunaajaasuisa ataatsimiinnerinut najuuttaruit maluginiarsimagunarpat sammisat aalajangersimasut arlaleriarlutik sammineqartartut. Guutip naalagaaffia, utertitsissut, oqaluussineq pissuserineqartussallu, assersuutigalugu asanninneq uppernerlu, sammigajuttarpavut. Sammisat taakkua sammeqqittarnerisigut uppernikkut nakussatsinneqartarlutalu ‘oqaatsimik tusaaginnarnata maleruaasarsinnaavugut’. — Jaak 1:22.

2. Jehovap inatsisai inuit inatsisiliaannit qanoq allaalluinnarpat?

² Guutip inatsisini, peqqussutini najoqqutassianilu Biibilimi allassimasut iluaqutigalugit innuttani arlaleriarluni siunnersortarpai. Jehovap inatsisai inuit inatsisiliaannit naammalluinnanngitsunit allanngortinneqakulasariaqartunillu allaalluinnarput. Guutip inatsisai naammalluinnartuupput, taakkualu uagutsinnut iluaqutaajuaannarnissaat tutsuigisinnaavarput. Guutilli inatsisaasa ilaat itsaq innuttaminut tunniussai ullumikkut atuukkunnaaraluarlutik kukkunertaqanngillat. Tussiaasiortoq ima allappoq: “Oqaaqqissaarutitit tamatigut naapertuilluartuupput.” — Tuss 119:144.

3, 4. (a) Jehovap oqaaqqissaarutaasa ilaat suuppat? (b) Israelikkut Guutip peqqussutai naalakkunikkit qanoq iluaqutigissavaat?

³ Jehovap oqaaqqissaarutaasa ilaat mianersoqqussutaapput. Israelikkut Guutip pruffiitii aqqutigalugit arlaleriarlutik mianersoqquneqartarput. Assersuutigalugu Israelikkut nunamik neriorsuutigisamik tiguaanngitsiarlutik Mosesimit ima mianersoqquneqarput: ‘Tunussititaaniaqinasi guutit allat guutisiorfigilerlugit pallorfigisarlugit. Tunussigussimi Jehovap kamaatingaarumaarpaasi.’ (5 Mos 11:16, 17) Guutip oqaaqqissaarutai innuttaminut tunniussai amerlanerusut Biibilimi atuarsinnaavavut.

 ⁴ Jehovap mianerineqarnissaminik, naalanneqarnissaminik atermilu ataqqineqarnissaanik innuttani eqqaasikulasarpai. (5 Mos 4:29-31; 5:28, 29) Guutip innuttani neriorsorpai peqqussutini naalappatigit pilluaqqungaarumaarlugit. — 3 Mos 26:3-6; 5 Mos 28:1-4.

5. Sooq kunngi Hizkija sinnerlugu Guuti sorsuppa?

⁵ Israelikkut oqaluttuarisaanerata ingerlanerani Guuti taakkununnga neriorsuutiminik eqquutitsiuaannarpoq. Assersuutigalugu Assyriap kunngiata Sankeribip Juda tiguarmagu kunngilu Hizkija sioorasaarmagu Jehovap innuttani ikiorumallugit inngilini aallartippaa. Unnuap ingerlanerinnaani Guutip inngiliata sakkutuut Assyriamiut 185.000-it toquppai. Sankeribi nikanarsarneqarluni illoqarfigisaminut uterpoq. (2 Nal 32:21; 2 Kng 19:35) Sooq kunngi Hizkija sinnerlugu Guuti sorsuppa? Hizkijap Jehova ‘attavigiuarmagu qimanngivillugulu, inatsisillu Jehovap Mosesimut tunniussimasai maleruarmagit’. — 2 Kng 18:1, 5, 6.

6. Josijap Jehovamik tatiginninnini qanoq ersersippaa?

⁶ Jehovap peqqussutaanik maleruaasut ilaat alla tassaavoq kunngi Josija. Taanna arfineq-pingasunik ukioqarluni Jehovap “isaani ajunngitsumik iliorpoq”. (2 Nal 34:1, 2) Josijap Jehovamik tatiginninnini ersersippaa nunagisamini guutipilunnik aserorterinermigut innuttamilu Jehovamik pallorfiginneqqilernissaannut ikiornerisigut. Josija taamaaliormat Jehovap taanna pilluaqquinnarnagu aammali inuiaqatai tamaasa pilluaqquai. — 2 Nalunaarsuutit 34:31-33 atuakkit.

7. Israelikkut Jehovamut naalakkunnaaraangata qanoq kinguneqartarpa?

⁷ Ajoraluartumilli Guutip innuttaasa taassuma oqaaqqissaarutai amerlanertigut tutsuigisanngilaat. Ukiorpassuit ingerlaneranni Jehovamut arlaleriarlutik naalaalliorput. Uppernikilligaangamik guutipilussiornissamut allanit sunnerneqartarput. (Ef 4:13, 14) Guutillu mianersoqqusineratut taassuminnga tatiginnikkunnaaraangamik naalliuttarput. — 3 Mos 26:23-25; Jer 5:23-25.

8. Israelikkut qanoq ilinniutigisinnaavavut?

⁸ Israelikkut qanoq ilinniutigisinnaavavut? Israelikkut pisimanerattut ullumikkuttaaq Guutip innuttai siunnersorneqartarlutillu oqaaqqissaarneqartarput. (2 Petr 1:12) Biibilimi atuaraangatta Guutip peqqussutaanik eqqaasinneqartarpugut. Jehovap peqqussutaanut naalakkumanerluta eqqortuusorisarpulluunniit naapertorlugu iliorumanerluta  nammineq aalajangersinnaavugut. (Uss 14:12) Maannakkut sammeriartigu Jehovap oqaaqqissaarutai sooq eqqumaffigisariaqarnerivut taamaaliornissarpullu qanoq iluaqutigissaneripput.

9. Israelikkut inoqajuitsumiinneranni Jehovap annertoqqusersuinerminik qanoq eqqaasippai?

⁹ Israelikkut ukiuni 40-ni inoqajuitsumi ‘tujorminartumi’ angalalermata Jehovap taakku qanorpiaq siulersorumallugit, illersorumallugit isumassorumallugilluunniit nassuiaatinngilai. Assigiinngitsutigulli ersersittarpaa taassuminnga tatiginnikkunik ilitsersuussutaanillu maleruaagunik iluaqutigiumaaraat. Ulluunerani napasoq nuiaasoq iluaqutigalugu unnuaaneranilu napasoq innerusoq iluaqutigalugu siulersuinermigut Jehovap Israelikkut eqqaasippai angalaneranni imaannanngitsumi annertoqqusersortarlugit. (5 Mos 1:19; 2 Mos 40:36-38) Aamma taakkua pisariaqartitaannik isumagai. Ajorsaateqanngillat. “Atisaat alittulinngillat isigaallu pullalernatik.” — Neh 9:19-21.

10. Ullumikkut Jehovap innuttani qanoq siulersortarpai?

¹⁰ Ullumikkut Guutip kiffai ungasinngitsukkut silarsuassami nutaami naapertuilluarfiusumi inuulertussaapput. Jehovap ‘naalliunnartoqangaarnissamit’ aniguisikkumalluta pisariaqartitatsinnik isumaginnittarnera upperilluinnarparput? (Matt 24:21, 22; Tuss 119:40, 41) Ullumikkut Jehovap napasoq nuiaasoq napasorluuniit innerusoq iluaqutigalugu silarsuassamut nutaamut siulersunngikkaluarluta peqatigiissortani aqqutigalugit oqaaqqissaarutiminik eqqaasittarpaatigut. Assersuutigalugu Biibilimik atuartarnikkut, ilaqutariittut atuaqqissaaqatigiittarnikkut, ataatsimiigiartuartarnikkut oqaluusseqataasarnikkullu Jehovamut ikinnguteqarnitta nakussatsinnissaanik kajumissaarneqartarpugut. Kajumissaarutit taakku malinniarlugit inuunitsinni allannguisimavugut? Silarsuatoqqamit aniguisinneqarumalluta upperluartariaqarpugut. Upperluarumallutalu Jehovap oqaaqqissaarutai maleruartuartariaqarpavut.

11. Guutip peqqissutsitsinnik pilluarnitsinnillu soqutiginninnini qanoq ersersippaa?

¹¹ Aamma ulluinnarni silatusaartumik aalajangiinissatsinnut Guutip peqatigiissortaanit siunnersorneqartarpugut. Assersuutigalugu isumakuluuteqannginneruniassagatta pigisanut eqqortumik isiginnittaaseqarnissatsinnut pilimanianngitsumillu inooriaaseqarnissatsinnut kajumissaarneqartarpugut. Aamma atisalersoriaatsitsinnut, isikkorissarnitsinnut, aliikkutassanik toqqaanissatsinnut aamma qanoq ilinniagaqartiginissatsinnut tunngatillugu siunnersorneqartarpugut. Aamma angerlarsimaffitta, biilitta naalagaaffilersaarfittalu isumannaatsuunissaannut ajunaarnersuaqassagaluarpallu piareersimanissatsinnut eqqaasinneqartarpugut. Siunnersuutit taakku tamarmik Guutip peqqissutsitsinnik pilluarnitsinnillu soqutiginninneranut ersiutaapput.

12. (a) Jiisusip suna ajoqersukkaminut eqqartukulasarpaa? (b) Petrusip ilikkakkani suna puiunngisaannarpaa, Jiisusillu maligassiaa qanoq ilinniarfigisinnaavarput?

¹² Kristumiut siulliit Guutimit eqqaasinneqakulasarput. Jiisusip ajoqersukkaminut arlaleriarluni erseqqissartarpaa maniguunnissap qanoq pingaaruteqartiginera. Maniguunnerli qanoq paasisariaqarnersoq nassuiaannarnagu aamma maligassiuinermigut ersersittarpaa. Unnukkut toqunissani aqaguttoq Jiisusi apustilinilu poorskisioqatigiipput. Isikkanik asattuineq kiffaasup suliassarigaluaraa, apustilit neritillugit Jiisusi nikuippoq taakkualu isigaat asattulerlugit. (Joh 13:1-17)  Unnuk taanna Jiisusip taakkua puiugassarinngisaannik ilinniartippai. Ukiut 30-it tamatuma kingorna apustili Petrusi, Jiisusip poorskisioqataasa ilaat, maniguuttuunissaq pillugu kristumioqatiminik siunnersuivoq. (1 Petr 5:5) Jiisusip maligassiaa kajumississutigalugu uppeqatitsinnik pinnittarnitsinni maniguuttuusariaqarpugut. — Fil 2:5-8.

13. Jiisusip ajoqersukkani pissuserineqartussamik sumik ilinniartittuarpai?

¹³ Jiisusip ajoqersukkaminut eqqartukulasartagaa alla tassaavoq upperluartuunissap qanoq pingaaruteqartiginera. Ilaanni ajoqersukkat nukappiaraq anersaapilulik ajorunnaarsissinnaannginnamikku Jiisusi ima aperivaat: “Sooq uagut anisissinnaanngilarput?” Jiisusip ima akivai: “Uppernikikkassi. Ilumut oqarfigaassi: Siinuppip naatsiiassartaatut atsigisumik uppersuseqaraluarussi ... [sunaluunniit] ilissinnut ajornassanngikkaluarpoq.” (Matt 17:14-20) Jiisusip nunarsuarmiitilluni ajoqersukkani ilinniartittuarpai uppernerup qanoq pingaaruteqarluinnartigineranik. (Matthæusi 21:18-22 atuakkit). Uppernikkut nakussatsinneqarumalluta ataatsimeersuarnerit, ataatsimeersuaararnerit ataatsimiinnerillu tamaasa najuuffigisarpavut? Taakku nuannersumik katerisimaarnerinnaanngillat; aammali Jehovamik tatiginninnitsinnik ersersitsinissatsinnut periarfissaapput.

14. Sooq namminissarsiorani asanninnermik ersersitsineq ullumikkut pingaaruteqarpa?

¹⁴ Kristumiut Allagaataanni Grækerisuuni asaqatigiinnissatsinnik eqqaasinneqaqattaartarpugut. Jiisusip inassutit annersaasa aappaat unaanerarpaa: “Tullit ilittut asassavat.” (Matt 22:39) Jiisusip affarmik qatanngutaata Jaakup asanninneq ‘inatsimmik akimasumik’ taavaa. (Jaak 2:8) Apustili Johannesi ima allappoq: “Asasakka, allaffiginngilassi inassummik nutaamik, pisoqqamilli pileqqaarneranniilli pigisassinnik.” (1 Joh 2:7, 8) Johannesip inassummik ‘pisoqqamik’ allakkami suna pivaa? Asanninnermik inassut pivaa. Inassut ‘pisoqaavoq’ Jiisusip ‘pileqqaarneranniilli’, tassa ukiut qulikkuutaat arlallit siornatigut, inassutigisimammagu. Inassulli taanna aamma ‘nutaajuvoq’ ajoqersukkat kingusinnerusukkut allatigut namminissarsioratik asanninnermik ersersitsisariaqassammata. Ullumikkut mianersoqqussutit silarsuarmi namminissarsiorfiusumi namminissarsiulinnginnissatsinnut asannittuliortarnissatsinnullu iluaqutaasut qujamasuutigaavut.

15. Jiisusip nunarsuarmukarsimaneranut pissutaasoq pingaarnerpaaq suua?

¹⁵ Jiisusi inunnik soqutiginningaarpoq. Napparsimasunik ajorunnaarsitsinermigut toqusimasunillu makititsinermigut isumassuingaarnini ersersittarpaa. Jiisusilli nunarsuarmukarneranut pissutaasoq pingaarnerpaaq  tassaanngilaq inunnik ajorunnaarsitsinera, inuimmi oqaluussinera ilinniartitsineralu iluaqutiginerungaarpaat. Qanoq? Jiisusip ajorunnaarsitai makitissimasaalu kingusinnerusukkut utoqqalillutillu toqupput, Jiisusilli tusarliussaanik upperinnittut naassaanngitsumik inuulernissaminnik periarfissaqarput. — Joh 11:25, 26.

16. Ullumikkut Jehovap Nalunaajaasuisa Jiisusip ajoqersuganngortitsinissamut peqqussutaa qanoq naalappaat?

¹⁶ Jiisusip ajoqersukkani ima peqquai: “Aallaritsi inunnillu inuiannit tamaneersunik ajoqersuganngortitsigitsi.” (Matt 28:19, NW) Oqaluussineq Jiisusip kristumiut siulliit nalaanni aallartitaa ullumikkut annerungaartumik suliarineqarpoq. Nunani 230-nit amerlanerusuni Jehovap Nalunaajaasui 7 millioninit amerlanerusut Guutip naalagaaffianik aallussilluarlutik oqaluussissutiginnittarput inunnillu millionilikkuutaanik Biibilimik atuaqqissaaqateqartarlutik. Oqaluussineq tamanna ulluni kingullerni inuunitsinnut uppernarsaataavoq.

17. Paulusip Petrusillu kristumiut siulliit sunissamut kajumissaarpaat?

¹⁷ Kristumiut siulliit oqaaqqissaarutit uppernikkut nakussatsissutigaat. Assersuutigalugu Paulusip Romami parnaarussivimmiitilluni Timotheusi ima allaffigaa: “Najoqqutassiaq oqaatsinit peqqissinartunit, uannit tusakkannit, pisoq aalajangiusimajuk.” (2 Tim 1:13, NW) Paulusip oqaasii taakku Timotheusimut kajumissaarutaasimassapput. Aamma Petrusip pissuserineqartussat, assersuutigalugu nikallujuinneq, asanninneq imminullu naalakkersinnaaneq, pissuseriniartuaqqullugit kristumiut kajumissaareeramigit ima nangippoq: “Tamakkuninnga eqqaasinniartuassavassi, naak ilisimalluaraluarissi sallusuissummullu ilissinniittumut aalajangersimagaluartusi.” — 2 Petr 1:5-8, 12.

18. Kristumiut siulliit eqqaasinneqartuartarnertik qanoq isigaat?

¹⁸ Paulusip Petrusillu ilagiinnut allataat ‘itsaq pruffiitit illernartut oqaaserisaannut’ assingupput. (2 Petr 3:2) Taamanili qatanngutitta eqqaasinneqartuartarnertik narrutsaatigaat? Naamik, nalunngilaammi Guutimit asaneqaramik aalajaattuarsinnaajumallutik ikiorneqartaramik Guutip eqqaasittaraatik. — 2 Petr 3:18.

19, 20. Sooq Jehovap oqaaqqissaarutai tutsuigisinnaavavut, taassumalu oqaaqqissaarutai qanoq iluaqutigaavut?

¹⁹ Ullumikkut Jehovap oqaaqqissaarutaanik Biibilimiittunik malinninnitta uagutsinnut pitsaanerpaaneranik tutsuiginninnissatsinnut pissutissarpassuaqarpugut. Oqaaqqissaarutit Guutip oqaasianiittut iluaqutaajuarlutillu ilumoortuaannarput. (Josva 23:14 atuaruk). Biibilimi allaatigineqarpoq Guutip ukiuni 1000-ilinni inunnik qanoq pinnittarsimanera. Biibilimilu allassimasut iluaqutigisinnaaniassagatsigit allanneqarput. (Rom 15:4; 1 Kor 10:11) Siulittuutit Biibilimiittut nalitsinni eqquukkaangata Jehovap oqaasiisa ilumoortuaannarnerannik eqqaasinneqartarpugut. Assersuutigalugu siulittuutigineqarsimasutut “ullussani kingullerni” inuit millionillit Jehovamik pallorfiginnittunngorsimapput. (Es 2:2, 3) Silarsuarmi pissutsit ajorsigaluttuinnarput. Tamanna aamma Biibilimi siulittuutaavoq eqquussimasoq. Soorlu sammereeripput nunarsuaq tamakkerlugu oqaluussineq aamma Jiisusip oqaasiinik eqquutitsivoq. — Matt 24:14.

²⁰ Ukiuni hundredelikkuutaani Pinngortitsisitta tatiginarluinnarnini uppernarsarsimavaa. Oqaaqqissaarutai iluaqutigaavut? Qatanngut arnaq Rosellenimik atilik ima oqarpoq: “Jehova tatiginerujartuinnartillugu taassuma asanningaarnerata uannut annertoqqutaanera nakussatsissutaaneralu paasilluarnerulerpara.” Uaguttaaq Jehovap oqaaqqissaarutaanik eqqumaffiginnittuarnissarput iluaqutigisinnaavarput.