ANGAJOQQAAKKA 1919-imi naapipput Biibilimik Atuaqqissaartartut Nunanit Tamalaaneersut USA-mi Cedar Pointimi Ohiomiittumi ataatsimeersuarneranni. Kingusinnerusukkut ukioq taanna katipput. Uanga 1922-mi inunngorpunga, nukaralu Paul ukiut marluk qaangiummata inunngorpoq. Nuliara Grace 1930-mi inunngorpoq. Angajoqqaavi, Roy aamma Ruth Howell, Biibilimik Atuaqqissaartartutut perorsarneqarput, aatakkuisalu qatanngut Charles Taze Russell ikinngutigaat.

Grace 1947-mi naapippara, 1949-milu juulip ulluisa 16-ianni katilluta. Katitsinnata siunissarput oqaloqatigiissutigisarparput. Piffissaq tamaat kiffartorusukkatta meerartaarniarnata aalajangerpugut. 1950-imi oktobarip aallaqqaataani pioneritut kiffartortunngorpugut. 1952-imi nakkutilliisutut angalasartutut kiffartulersinnaanerluta aperineqarpugut.

Marluulluta misigisimavugut suliassariligarput iluatsissappat annertuumik ikiorneqartariaqarluta. Uanga qatanngutinik misilittagaqarluartunik ikiortissaqarpunga, Gracelli ikiortigisinnaasaanik qinaassissuppara. Marvin Holien ilaqutariit ikinngutitoqaat nakkutilliisuulluni angalasarsimaqisoq ornippara oqarfigalugulu: “Grace inuusuttuuvoq misilittagakitsuullunilu, suleqatigisinnaasaanik ilinniartitsisinnaasumik innersuussaqarsinnaavit?” Marvin ima akivoq: “Aap, Edna Winkle pioneriuvoq misilittagaqarluartoq ikiuulluarsinnaasoq.” Grace kingusinnerusukkut Edna pillugu ima oqarpoq: “Taassuma oqaluussitilluta matut eqqaanniitilluta eqqissisittarpaanga, nalusanngilaa akerliliisoqartillugu qanoq akisoqartassasoq ajoqersuuppaangalu oqaluussiffigisakka tusarnaartarukkit paasissagiga qanoq naleqquttumik oqaaseqarsinnaallunga. Tamanna atorfissaqartitavigaara!”

Gracelu Iowami ilageeqatigiit marluk nakkutilliisuuffigaavut, ilageeqatigiinnullu ilaapput aamma nunap immikkoortui Minnesota aamma South Dakota. Taava New Yorkimi ilageeqatigiit 1-imut nuutsinneqarpugut, taakkununngalu ilaapput illoqarfiup immikkoortortai Brooklyn aamma  Queens. Taamatut kiffartuleqqaaratta misilittagakikkatta immitsinnut annikigaluta misiginerput puigunngisaannarparput. Ilageeqatigiinnut ilaapputtaaq Brooklyn Heightsimi ilagiit, Betelimi naalagaaffilersaarfimmut ataatsimiigiartartut. Betelimiorpassuit misilittagaqarluartut ilagiinnut taakkununnga ilaapput. Ilagiinni tassani oqalugiaqqaarnerma kingorna qatanngutip Nathan Knorrip ornippaanga imalu oqarfigalunga: “Malcolm, suut sulissutigissagivut pillugit siunnersuuteqarputit, tamannalu pissusissamisoorpoq. Puigussanngilat inussiarnersumik siunnersortanngikkutsigut peqatigiissortaqarfimmut iluaqutaavallaarnavianngitsutit. Sulilluarnerit ingerlatiinnaruk.” Ataatsimeereeratta Grace tamatuminnga oqaluttuuppara, kingusinnerusukkullu Betelimi ineeqqatsinnukarpugut. Annilaangasimanermut nukillaarluta qissaserpugut.

Taamatut pisoqareersoq qaammatialuit qaangiummata allagarsivugut Ilinniarfiup Gileadip klassit 24-annut qaaqqusaalluta, 1955-imi februaarip tungaanut ingerlasussamut. Ilinniarfiup aallartinnissaa sioqqullugu ilisimatinneqarpugut ilinniartitaanissarput ajoqersuiartortitatut sulinissatsinnut ilaatigut piareersaataassanngitsoq, kisianni nakkutilliisutut angalasartutut kiffartornissatsinnut piukkunnarsaataassasoq. Ilinniarfik Gileadi nuannersorsuarmik misigisaqarfigiutigalugu maniguunnissatsinnik ilinniarfigaarput.

Gileadi naammassereeratsigu ilageeqatigiinnut arlalinnut nakkutilliisunngortinneqarpugut. Nakkutilliisuuffigisassatsinnut ilaapput Indiana, Michigan aamma Ohio. 1955-imi decembarimi uissuummissutigeqisatsinnik qatanngut Knorrimiit allagarsivugut. Ima allappoq: “Unneqqarillusi maanna toqqaannartumik oqarfigisinga. Betelimukarusukkussi tassaniiginnarlusilu, ... imaluunniit Betelimiilaariarlusi nunamut allamukartitaarusukkussi ilisimatissinga. Ilageeqatigiinnut arlalinnut aamma nakkutilliisutut angalasartunngorusukkussi paaserusuppara.” Akivugut qanorluunniit suliassinneqassagaluarutta suliassiissut nuannaarluta suliariumaarlugu. Piffissaq sivikitsoq qaangiummat Betelimukaqqusaavugut!

Betelimiinnerma nalaani USA tamakkerlugu ilagiinnut aamma ataatsimeersuarnernut oqalugiariartortinneqartarpunga. Jehovap peqatigiissortaani angutinik inuusuttorpassuarnik kingusinnerusukkut akisussaaffeqalernikuusunik taakkununnga ilinniartitseqataallungalu ikiueqataasarpunga. Naggataatigut qatanngummut Knorrimut allatsinngorpunga, allaffitsinniillu nunarsuaq tamakkerlugu oqaluussineq aaqqissuunneqartarpoq.

 Kiffartornermik Nakkutilliisoqarfimmiissimanera nuannareqaara. Tassaniinninni T. J. (Bud) Sullivan suleqatigisarpara. Taanna Kiffartornermik Nakkutilliisoqarfimmi ukiorpassuarni nakkutilliisuusimavoq. Allalli ilinniarfigeqaakka. Taakkua ilagaat Fred Rusk uannut ilinniartitsisussanngortinneqartoq. Oqaloqatigiinnerput ataaseq nuannaarlunga eqqaasarpara. Aperaara: “Fred, sooruna allakkama ilaat taama iluarsaattartigigitit?” Illareerami silatusaartumik ima akivaanga: “Malcolm, oqaaseqaraangavit tamatigut nassuiaateqaqqissinnaasarputit, allakkaangavilli, ingammik maanngaanniit, allakkatit suliarilluagaallutillu eqqorluartuusariaqarput.” Taava inussiarnerluni ima nangippoq: “Nikalloqinak — ingerlalluarputit, siunissamilu pikkorissivikkumaarputit.”

Grace Betelimi ukiut ingerlanerini assigiinngitsunik suliassaqartarpoq; ilaatigut illulerisuuvoq ineeqqanilu eqqiaasarluni. Suliani nuannarai. Suli qatanngutinik taamanikkut inuusuttuullutik Betelimiissimasunik naapitaqartarpugut qungujullutik Gracemut ima oqartartunik: “Siniffiliornissannik ilinniartipparma, taamaaliornerillu anaanama pingaarteqaa.” Gracep aamma atuagassianik pisartagaqarfimmi, allaffigeqatigiiffittaqarfimmi aamma kassettebåndinik siammarterivimmi suliaqarnini nuannarisimaqaa. Taamatut assigiinngissitaartunik suliaqarnerata paasinnilersippaa Jehovap peqatigiissortaani sumilluunniit suliaqaraluarutta sumiluunniillu kiffartoraluarutta tamanna pisinnaatitaaffiullunilu pilluaqqussutaasoq. Ulloq manna tikillugu taamatut isiginnittaaseqarpoq.

1970-ikkunni paasilerparput angajoqqaatta utoqqalisut ikiorneqarnerunissartik pisariaqartikkaat. Ajornakusoortumik aalajangiisariaqarpugut. Beteli ikinngutivullu nuannareqisavut tassaniittut qimakkusunngilavut. Misigivungali angajoqqaannik isumassuinissaq akisussaaffigalugu. Naggataatigut Beteli qimapparput, neriuutigalugu atukkavut allanngorpata uteqqissinnaalluta.

Pilersorsinnaajumalluta sillimmasiissutinik tuniniaasalerpunga. Ilinniartinneqarnerma nalaani pisortarisama oqaasii puigunngisaannassavakka: “Suliffik una suliffigissagaanni inuit unnukkut ornittarnissaat pisariaqarpoq, unnukkut angerlarsimasarmata. Pisisartut unnuit tamarluinnaasa orninneqarnissaanniit allamik pingaarnerusoqanngilaq.” Ima akivunga: “Qularinngilara misilittakkatit aallaavigalugit taamatut oqartutit, tamannalu ataqqivara. Uangali anersaakkut ittumik akisussaaffeqarpunga sumiginnarsimanngisaannakkannik sumiginnarusunngisannillu. Unnukkut pulaagaqartarumaarpunga, kisianni marlunngornerup sisamanngornerullu unnukkuini pingaarutilerujussuarnut ataatsimiigiartartussaavunga.” Suliffiga ataatsimiinnernut akornutaatinnginnakku Jehovap pilluaqquaanga.

Anaanaga 1987-imi juulimi utoqqaat illuanni toqummat ilagaarput. Peqqissaasup Grace ornippaa  oqarfigalugulu: “Grace, angerlarlutit qasuersaariartorniarit. Kikkut tamarmik nalunngilaat sakit isumagiuaannarnikuugit. Qamuuna eqqissisimasinnaavutit ilinnullu naammagisimaarsinnaallutit.”

1987-imi decembarimi Betelimut, najorlugu nuannareqisatsinnut, kiffartoqqinnissatsinnik qinnuteqarpugut. Ullualuilli qaangiuttut Grace inalugarsuarmigut kræftertoq paasitinneqarpoq. Pilatsinnini anigorluarpaa kræfteqarunnaarnerminillu nalunaarfigineqarluni. Betelimiilli allagarsivugut innersuunneqarluta illoqarfigisatsinni ilagiinnik suleqateqarnerput ingerlatiinnassagipput. Aalajangiusimavarput kiffartornitsinni pinertusaarniarluta.

Taamaalluni Texasimi sulilernissannik neqeroorfigitippunga. Eqqarsarpugut Texasip kiannerunera uatsinnut iluaqutaassasoq, taamaapporlumi. Ukiuni 25-ni Texasimiippugut qatanngutinik asannittunik ungageqisatsinnik avatangiiseqarluta.

Grace arlaleriarluni kræftertarpoq, inalugarsuarmigut torluullu saani qinersimigut, kingullikkullu iviangimigut. Inuunerminili atukkani maalaarutiginngisaannarpai imaluunniit siulersuinermut najoqqutassiaq akerliliiffiginngisaannarlugu. Akuttunngitsumik ima aperineqartarpoq: “Aappariinnissinni pilluarnissinnut marluullusilu nuannaarpasinnissinnut sunaana pissutaasoq?” Pissutaasut sisamat taasarpai: “Ikinngutigiinnerpaavugut. Ullut tamaasa oqaloqatigiilluartarpugut. Peqatigiilluta nuannareqaarput, aamma kamassimatilluta sinilinngisaannarpugut.” Soorunami ilaannikkut kammagiippallaartanngilagut, kisianni isumakkeerfiginnittarpugut pisunillu puigortarluta — iluaqutaavorlu.

Inuunitsinni misilitsinnerit aqqusaarnikuusavut tamaasa ajunngitsorpassuarnik ilinniarfigaavut:

1. Jehova tamatigut tatigiuaruk, akuerisaalu akuerisakkit. Illit nammineq sianissutsit tatiginngisaannaruk. — Uss 3:5, 6; Jer 17:7.

2. Ajornartorsiutit suugaluarpataluunniit Jehovap oqaasianit siunnersortittarit. Jehovamut naalanneq peqqussutaanillu malinninneq tamanit pingaarnersaavoq. Akulloqqutaarisoqarsinnaanngilaq — naalassaatit imaluunniit naalanngissaatit. — Rom 6:16; Hebr 4:12.

3. Jehovamit ajunngitsumik tusaamaneqarneq inuunermi pingaarnersaavoq. Taassuma soqutigisai siulliuttakkit, pisuunngorniarsareqinallu. — Uss 28:20; Oqal 7:1; Matt 6:33, 34.

4. Jehovamik kiffartuussininni sapinngisamik sulilluartuunissat eqeersimaartuunissallu qinnutigisaruk. Iliuuserisinnaasatit pingaarnerutikkit, iliuuserisinnaanngisatit pinnagit. — Matt 22:37; 2 Tim 4:2.

5. Eqqaamajuk Jehovap pilluaqqusaanik iluarisaanillu allanik peqatigiissortanik nassaassaqanngitsoq. — Joh 6:68.

Gracelu tamatta immikkut Jehova ukiut 75-it sinnerlugit kiffartuupparput ukiunilu 65-ingajanni aappariittut kiffartuullugu. Jehovamik ukiorpassuarni kiffartuusseqatigiinnerput nuannarisimaqaarput. Neriuutigalugulu qinnutigaarput qatanngutitta tamarmik aamma misigissagaat Jehovamik tatiginninneq qanoq inuunermik pillualersitsisartoq.