1, 2. (a) Sooq ‘qinunermut tunngatillugu eqqumaneq’ pingaaruteqangaarpa? (b) Qinunermut tunngatillugu imminut qanoq aperisariaqarpugut?

“UNNUARSIORLUNI eqqumaniarneq ajornarnerpaasarpoq ullup qaalernera sioqqutitsiarlugu,” angut unnuarsiortarsimasoq oqarpoq. Inuit allat unnuakkut eqqumasariaqartartut isumaqataassagunarput. Tamanna piffissamut inuuffigisatsinnut assersuussinnaavarput. Ullumikkummi Saatanip silarsuaata naggatissaa qanittuararsuummat unnuap taggarinnerpaaffianiipporlusooq. Taamaattumik kristumiut eqqumaniarlutik ilungersortariaqarput. (Rom 13:12) Anersaakkut sinilertuussagaluarutta navianartorsiungaassaagut. ‘Isumakkut peqqissuullutalu qinunermut tunngatillugu eqqumasariaqarpugut’. — 1 Petr 4:7, NW.

² Saatanip silarsuaata naggatissaa taama qanitsigimmat silatusaassaagut imminut ima aperigutta: ‘Qinunermut tunngatillugu qanoq eqqumatigaanga? Qinoriaatsit tamaasa atortarpakka? Allanik qinnussikulavunga, namminerluunniit pisariaqartitakka kissaatigisakkalu kisiisa qinnutigisarpakka? Uangalu annaanneqarnissannut tunngatillugu qinuneq qanoq pingaaruteqartigaa?’

3. Qinoriaatsit ilaat eqqaakkit.

³ Paulusip Efesosimiunut allakkamini qinoriaatsit assigiinngitsut eqqaavai. (Ef 6:18) Jehovamut qinugaangatta pisariaqartitavut qinnutigisarpavut ajornartorsiutitsinnillu aaqqiinissamut ikioqqusarluta. Biibilimi allassimavoq Jehova ‘qinnutitsinnik tusartartuusoq’, asagamisigullu ikioqqugaangatta tusarnaartarpaatigut. (Tuss 65:3) Qinugaangattali pisariaqartitaannavut qinnutigisassanngilavut. Aamma Jehova unnersiutigisassavarput, qutsavigisassavarput torlorfigisassallugulu.

4. Sooq qinunikkut Jehova unnersiutigikulasassavarput?

 ⁴ Qinunikkut Jehovamik unnersiutiginninnissamut pissutissarpassuaqarpugut. Assersuutigalugu “naammassisai asseqanngitsut” aamma “angingaassusia” eqqarsaatigigaangatsigit unnersiutigerusulertarparput. (Tussiaat 150:1-6 atuakkit). Tussiaat 150-imi arfiniliinnarnik versilimmi Jehovamik unnersiutiginninnissamut 13-eriarluta kajumissaarneqarpugut. Tussiaasiortup allap Jehovamik asanningaarnini ima erinarsuusiaraa: “Ullormut arfineq-marloriarlunga unnersiutigisarpakkit inassutitit naapertuilluartut pillugit.” (Tuss 119:164) Ilumummi, Jehova unnersiutigineqartariaqarpoq. Taamaattumik qinunikkut ‘ullormut arfineq-marloriarluta’, tassa akulikitsumik, unnersiutigisariaqarparput.

5. Qinunikkut qujaniuteqartarneq qanoq illersuutaava?

⁵ Qinoriaaseq pingaarutilik alla tassaavoq qujaniut. Paulusi kristumiunut illoqarfimmi Filippimiittunut ima allappoq: “Sumilluunniit isumakuluuteqarnaveeritsi, kissaatigisasili qanoq ittukkulluunniit Guutimut saqqummiuttarsigit qinullusi torlulallusilu qujallusilu.” (Fil 4:6) Saatanip silarsuaata ulluini kingullerni inuugatta inunnillu ‘qujasuitsunik’ avatangiiseqaratta silarsuartut pissuseqaleqqunata uagutsinnut pingaaruteqarluinnarpoq Jehovap pilluaqqussuterpassui pillugit taassumunnga qamannga pisumik qujasarnissarput. (2 Tim 3:1, 2) Silarsuup qujasuinnera malunnartorujussuuvoq, mianersunngikkuttalu aamma uagut taamaaleriaannaavugut. Qinunikkulli qujamasuttarutta nalerisimaassaagut, tamannalu iluaqutigissavarput ‘naammagittaalliorlutik atugarisaminnik ajorneraasunik’ ilaarsilinnginnissatsinnut. (Jud 16) Aamma ilaqutariinni ittuusoq ilaquttani qinoqatigigaangamigit qujaniuteqartaruni nuliata qitornaasalu qujamasuttuunissaminnut kajumississutigissavaat.

6, 7. Torlulaneq qanoq paasisariaqarpa, suullu pillugit Jehova torlorfigisinnaavarput?

⁶ Torlulaneq tassaavoq sakkortuumik misigissuseqarluni qamannga pisumik qinuneq. Pissutsini qanoq ittuni Jehovamut torlulasinnaavugut? Malersorneqarnitsinni toqqutigisinnaasatsinnilluunniit nappaateqaraangatta Jehovamut ikioqqusinnaavugut. Pissutsini taamaattuni ikioqqulluta Jehova kimigiiserfigigutsigu paasinarpoq. Malersorneqarnermili napparsimanermiluunniit taamaallaat torlulasinnaavugut?

⁷ Apeqqut tamanna akissutissarsiumallugu qinnummi najoqqutassaasumi Guutip aqqa, taassuma naalagaaffia piumasaalu pillugit Jiisusip oqaasii eqqarsaatigisigit. (Matthæusi 6:9, 10 atuakkit). Ullumikkut silarsuarmi matumani ajussuseqangaarpoq, naalakkersuisullu inuit pisariaqartitaviinnaannilluunniit isumagisinnaanngilaat. Taamaattumik Guutip aqqata illernarsisinneqarnissaanik naalagaaffiatalu Saatanip nunarsuarmik aqutsineranik peersitsinissaanik qinnutiginninnissamut pissutissaqarluarpugut. Aamma maanna piffissanngorpoq Jehovap piumasaata nunarsuarmi qilammisut pinissaanik qinunissamut. Taamaattumik eqqumajuarta, qinoriaatsillu tamaasa atorlugit qinusarisa.

8, 9. Sooq Petrusi apustilillu allat sinilermata assuarissanngilavut?

⁸ Petrusi kristumiunut allappoq ‘qinunermut tunngatillugu eqqumaqqullugit’, namminerli ikinnerpaamik ataasiarluni taamaaliunngitsoorpoq. Taannami Jiisusip naatsiivimmi Getsemanemi qinunerani ajoqersukkat sinilersoortut ilagaat. Sinilerput Jiisusip ima oqarfigereeraluaraatik: “Eqqumagitsi, qinugitsilu [qinujuaritsilu, NW].” — Matthæusi 26:40-45 atuakkit.

 ⁹ Petrusi apustilillu allat sinilersoormata assuarinagit eqqaamasariaqarparput taakku ullormi tamatumani pisorpassuit pissutigalugit qasoqqasorujussuusut. Unnummi tamatumani poorskisiorneq piareersarlugulu nalliuttorsiutigaat. Taava Jiisusip Naalakkap unnukkorsiortitsinera pilersippaa ajoqersukkat siunissami toquminik eqqaaniaallutik nalliuttorsiortarnissaannik najoqqutassillugit. (1 Kor 11:23-25) “Erinalimmillu unnersiutiginnissummik tussiareeramik Uuliap Qaqqaanukarput,” Jerusalemimi aqqusinertigut nerukitsutigut pisullutik. (Matt 26:30, 36) Unnuaqeqqa qaangeriingaatsiarsimassagunarpaa. Uagut unnuami tamatumani naatsiivimmi Getsemanemiissimasuugutta sinilersimassagunaraluarpugut. Jiisusip apustilit avoqqaarinagit asannilluni nassuerutigaa ‘anersaaq kajumikkaluartoq, uinilli qajannartoq’.

10, 11. (a) Petrusip Getsemanemi misigisaminit suna ilikkarsimavaa? (b) Petrusip misigisaa sumik ilinniarfigaajuk?

¹⁰ Petrusip naatsiivimmi Getsemanemi unnuakkut sinilernini anniaatigisaminik pingaarutilimmilli ilinniarfigaa. Siusinnerusukkut Jiisusi ima oqarpoq: “Unnuaq manna ilissi tamassi tunukkumaarpassinga.” Petrusilli ima oqarfigaa: “Tamarmilluunniit tunukkaluarpatsit uanga tununngisaannassavakkit.” Taava Jiisusi oqarpoq Petrusip pingasoriarluni miserratigiumaaraani. Petrusilli Jiisusi upperinagu ima oqarpoq: “Toqoqatigissagaluarukkilluunniit miserratiginngisaannassavakkit.” (Matt 26:31-35) Jiisusip oqaasii eqquupput Petrusip kingusinnerusukkut taanna miserratigimmagu. Petrusip susimanerluni paasigamiuk tamanna ajussutigingaaramiuk ‘qiangaalerpoq’. — Luk 22:60-62.

¹¹ Petrusip misigisaminit ilikkarpaa imminut taama tatigisariaqartiginani. Tamatumani qinuneq iluaqutigaa. Tamanna qanoq nalunnginnatsigu? ‘Qinunermut tunngatillugu eqqumanissaq’ Petrusip allatarimmagu. Siunnersuut Biibilimeersoq tamanna maleruarparput? Qinujuarpugut ersersillugu Jehova tunaarilluinnarlutigu? (Tuss 78:7) Aamma Paulusip allatai uku eqqaamasariaqarpavut: “Kinaluunniit patajaatsuusorisoq mianersorli orloqqunani.” — 1 Kor 10:12.

12. Sooq Nehemia uagutsinnut maligassaalluarpa?

¹² Nehemia, 400-kkunni Kr.in.si. Perserit kunngiannut Artaxerxesimut immitsisuusoq, Jehovamut qamannga pisumik qinunermut tunngatillugu maligassaalluartuuvoq. Biibilimi allassimavoq juutit Jerusalemimiittut atugaasa ajornakusoornerat  pissutigalugu ulluni arlalinni iisinnginniarlunilu qinusartoq. (Neh 1:4) Artaxerxesimit aperineqarami sooq taama nikallungatiginerluni sumillu kissaateqarnerluni ingerlaannaq ‘qilaap Guutianut qinuvoq’. (Neh 2:2-4) Tamanna qanoq kinguneqarpa? Jehovap innuttami iluaqutigisaannik Nehemiap qinnutaa akivaa. (Neh 2:5, 6) Misigisani tamanna Nehemiap uppernikkut nakussatsissutigisimassavaa!

13, 14. Upperluartuujumalluta Saatanillu ilungersuutaanit nikallortitaajumanata susariaqarpugut?

¹³ Nehemiap qinujuarneratut qinujuarnerput upperluartuunissatsinnut iluaqutigissavarput. Saatani naakkittaatsuugami sanngiinnitsinni saassussigajuppoq. Assersuutigalugu perulunnartumik nappaateqarutta isumatsassimangaaruttaluunniit misigilersinnaavugut qaammatit tamaasa oqaluussinerput Guutip pingaartinngikkaa. Ilagiinniittut ilaat eqqissiunnaarutigingaakkaminnik eqqarsaateqartarput, immaqa siornatigut nuanniitsumik misigisimasaqarneq pissutigalugu. Saatanip kissaatigaa naleqanngitsutut misigissasugut. Misigissutsit nikallornartut tamakku atorlugit uppernikillisinniarsaraatigut. ‘Qinunermulli tunngatillugu eqqumagutta’ uppernikkut nukittuujuarsinnaavugut. Biibilimi allassimavoq uppernerput eqqortinnaveeqquterujussuartullusooq ittoq ‘ajortup qarsuinik ikumasunik’ eqqortinnaveeqqutigisinnaasarput. — Ef 6:16.

¹⁴ ‘Qinunermut tunngatillugu eqqumagutta’ uppernikkut misilinneqariataarutta pakasarneqarnatalu Jehovamut ilumuunngitsuliornavianngilagut. Misilinneqaraangatta ussernartorsioraangattalu Nehemiap maligassaalluarnera eqqaamallugu ingerlaannaq Guutimut qinusariaqarpugut. Jehovap ikiuinerinnaatigut ussernartut akiorsinnaavavut uppernikkullu misilinneqarnerni aalajaattuarsinnaalluta.

15. Allanik qinnussinermut tunngatillugu imminut qanoq aperisariaqarpugut?

¹⁵ Jiisusip Petrusi uppernikkut sanngiilleqqunagu qamannga pisumik qinnuppaa. (Luk 22:32) Kristumiut siulliit ilaata Epafrasimik atillip Jiisusi ilaarlugu qatanngutini Kolossemiittut ilungersorluni qinnuppai. Taanna pillugu Paulusi Kolossemiunut ima allappoq: ‘Taassuma assoruulluni qinnuttuinnarpaasi aalajaaqqullusi iluarluinnarlusi qulanngilluinnarlusilu Guutip peqqusaa tamaat eqqorlugu.’ (Kol 4:12, 1936) Imminut ima aperisariaqarpugut: ‘Qatanngutikka silarsuarmi tamaneersut ilungersorlunga qinnuttarpakka? Qatanngutikka ajunaarnersuaqarnera pissutigalugu naalliuttut qanoq qinnutikulatigaakka? Jehovap peqatigiissortaani annertuumik akisussaaffillit qanga kingullermik ilungersorlunga qinnuppakka? Ilagiinniittumik atugarliortumik qanittukkut qinnussivunga?’

16. Qatanngutitsinnik qinnussineq iluaqutaava? Nassuiaruk.

¹⁶ Qatanngutitsinnik Jehovamut qinnussinerput taakkununnga ilumut iluaqutaassaaq. (2 Korinthimiut 1:11 atuaruk). Jehova kiffaminik qinnussisoqaqattaartoqarnera piinnarlugu iliuuseqartariaqanngikkaluarluni taakkua ilumoorlutik allanik soqutiginninnerat eqqarsaatigalugu qinnutaannik akisisarpoq. Taamaattumik allanik qinnussinissamut akisussaaffipput asuliinnartissanngilarput. Epafrasi ilaarlugu qatanngutivut kristumiut ilungersorluta qinnunnerisigut taakkununnga asanninnerput ersersittariaqarparput. Taamaaliorutta nuannaarnerulissaagut, tassami “tunisineq pilluarnarneruvoq tigusinermit”. — ApS 20:35.

17, 18. ‘Qinunermut tunngatillugu eqqumagutta’ qanoq iluaqutigissavarput?

¹⁷ Paulusi ima allappoq: “Unnuaq naalerpoq, ullorlu qanillivoq.” Versillu tamatuma siuliani ima allappoq: “Piffissaq ilisimavarsi nalunagulu sininnermit itissalluni piffissanngoreersoq. Annannissarpummi maanna qaninnerulerpoq uppertunngoqqaarnitsinnit.” (Rom 13:11, 12) Guutip silarsuassaa nutaaq qanillivoq, uagullu annaanneqarnissarput ilimagisinnaasatsinnit qaninneruvoq. Anersaakkut sinilernissamut piffissaanngilaq. Silarsuup matuma qinunissamut piffissaarutitikkusuppaatigut, Jehovamulli kisimiitilluta qinunissaq piffissaqarfigiuartariaqarparput. Aap, ‘qinunermut tunngatillugu eqqumajuartariaqarpugut’. Tamanna Jehovap ullussaa utaqqitillugu ‘illernartuullutalu Guutimillu mianerinnilluta inuunissamut’ iluaqutigissavarput. (2 Petr 3:11, 12) Inooriaasitsinnit ersissaaq anersaakkut eqqumanersugut silarsuullu ajortup matuma naggatissaata qanillinera upperilluinnarneripput. Taamaattumik ‘qinuttuinnarisa’. (1 Th 5:17) Jiisusi ilaarlugu akornusersorneqarata Jehovamut qinusarneq piffissaqarfigisartigu. Qinuneq piffissaqarfigilluartarutsigu Jehovamut qanillissaagut. (Jaak 4:7, 8) Pilluaqqussitisiassap nuannissusia!

¹⁸ Kristusi pillugu Biibilimi ima allassimavoq: “Nunami inuugallarami nillingaarluni qullilillunilu qinuvoq torlulallunilu toqumit annaassisinnaasumut, qinnutaalu tusarneqarpoq Guutimik mianerinnittuummat.” (Hebr 5:7) Jiisusi Jehovamut qinuvoq torlulallunilu nunarsuarmilu toqussi tikillugu aalajaattuarluni. Taamaattumik Jehovap erni toqusunit makitillugu qilammi toqusuitsunngortippaa. Aamma uagut siunissami qanorluunniit ussernartorsioraluarutta misilinneqaraluaruttaluunniit Ataatatsinnut qilammiusumut aalajaattuarsinnaavugut. Aap, inuuneq naassaanngitsoq akissarsiarisinnaavarput — ‘qinunermut tunngatillugu eqqumajuarutta’.