1, 2. Jiisusip naggammik Jerusalemiliarnerani apustilit qanoq eqqarsarsimagunarpat?

‘NUIAQANNGIMMAT qaammannittoq takusinnaavarput. Ippassaammat unnukkut pigaartut Jerusalemimiittut aamma takusimassavaat. Killisiuisoqatigiit tamanna paasigamikku nalunaarutigisimassavaat qaammat nutaaq, nisani, aallartittoq. Ikumatitsinikkut oqariartortitsinikkulluunniit nalunaarutigineqapallassimassaaq. Allaammi inuit tamaaniittut tusagassaq tusarsimavaat. Qularnanngitsumik Jiisusi poorskip nalliutinnginnerani Jerusalemimut apuukkumalluni ingerlaqqikkumassaaq.’

² Apustilit ilaat taamatupajaaq eqqarsarsimagunarput Jiisusi Peræamit kuussuup Jordanip kangianiittumit naggammik Jerusalemiliaqatigigamikku. (Matt 19:1; 20:17, 29; Mark 10:1, 32, 46) Nisanip aallaqqaataa ulloq sorliunersoq nalunaarutigineqarmat juutit nalunngilaat ullut 13-it qaangiuttut seqineq tarrippat poorskisiussallutik.

3. Sooq kristumiut qaqugukkut poorskisiortoqartartoq soqutigaat?

³ 2014-imi ulloq Naalakkap unnukkorsiortitsineranik nalliuttorsiorfik, aamma ulloq poorskisiorfik, tassaavoq apriilip 14-iat. Ulloq taanna kristumiunut ilumoortunut soqutiginnittunullu immikkorluinnaq ittuussaaq. Sooq? Korinthimiunut allakkani siullerni 11:23-25-mi allassimasut uku pissutigalugit: “Jiisusip unnuaq taanna pisitaagami timiusaq tiguaa, qujallunilu aggorpaa oqarlunilu: ‘Tassa timiga pillusi tunniunneqartoq; taamaaliortaritsi uanga eqqaaniarlunga.’ Taamatuttaaq nerereeramik ermuseq tiguaa.”

4. (a) Eqqaaniaanermut tunngatillugu qanoq imminut aperisinnaavit? (b) Qanoq nalunngissinnaavarput ullormi sorlermi ukiumoortumik eqqaaniaasartussaalluta? (Ungalusaq  “Eqqaaniaaneq 2014” takuuk).

⁴ Eqqaaniaaneq tamanna tassaavoq Jiisusip ajoqersukkaminut ukiumoortumik nalliuttorsiortaqqussutigisatuaa,  qularnanngitsumillu illit tamatumunnga najuukkusussaatit. Eqqaaniaannginnermi imminut ima aperigit: ‘Qanoq eqqaaniaanermut piareersarsinnaavunga? Eqqaaniaanermi assersuutit atorneqartussat suuppat? Eqqaaniaanermi qanoq pisoqassava? Sooq eqqaaniaaneq assersuutillu uannut pingaaruteqarpat?’

5. Jiisusip apustilini poorskisiornissamut qanoq piareersaqquai?

⁵ Jiisusip apustilini inimik poorskisiornermut atorneqartussamik piareersaajartoqqugamigit eqqaanngilaa pinnersaaterpassuit atussagaat. Ini nalinginnaasoq ipiitsoq naammattumik imminik apustiliminillu inissaqartitsisoq atorniassagaat kissaatigigunarpaa. (Markusi 14:12-16 atuakkit). Aamma nereqatigiinnermut atortussat, timiusaq seernarsaateqanngitsoq viinnilu aappalaartoq ilanngullugit, pissarsiarisussaavaat. Poorskisiummik nereqatigeereerlutik Jiisusi timiusaq viinnilu eqqaaniaanermut atortussat pillugit oqaaseqarpoq.

6. (a) Poorskisiummik nereqatigeereerlutik Jiisusi timiusaq pillugu qanoq oqarpa? (b) Eqqaaniaanermi timiusaq qanoq ittoq atorneqartarpa?

⁶ Apustili Matthæusi tamatumunnga najuuttoq kingusinnerusukkut ima allappoq: “Jiisusip timiusaq tiguaa pilluaqqusillunilu aggorpaa, ajoqersukkaminullu tunniuppaa oqarlunilu: ‘Tigusiuk nerillugulu.’” (Matt 26:26) “Timiusaq” tassaavoq iffiaq seernarsaateqanngitsoq poorskisiornermi nerineqartartoq. (2 Mos 12:8; 5 Mos 16:3) Timiusaq tamanna qajuusiassanik aseqqorissunik imermillu sanaajuvoq. Seernarsaateqanngimmat pullanngilaq. Aamma akuutissaqanngilaq, assersuutigalugu taratsunik. Nagguteeqqatut saatsutut ippoq aggoruminarlunilu. Ullumikkut ilagiinni utoqqaanertat isumagissavaat eqqaaniaannginnermi tamatumunnga assingusumik timiusaliortoqassasoq. Qajuusiassanik aseqqorissunik imermillu sananeqartariaqarpoq siatsivimmilu iffiorfikkulluunniit uulialilaarlugu siallugu. Nunani qajuusiassanik pissarsiariuminaaffiusuni qajuusat allat, assersuutigalugu qaqorteqqasut suaasiassalluunniit majsilluunniit qajuusaat, atorneqarsinnaapput.

7. Naalakkap unnukkorsiortitsinerani ermuseq Jiisusip atugaa sumik imaqarpa, eqqaaniaanermilu viinni qanoq ittoq atorneqarsinnaava?

 ⁷ Matthæusi nangilluni ima allappoq: ‘Jiisusip ermuseq tiguaa qujallunilu taakkununnga tunniuppaa oqarlunilu: “Tamassi tassannga imeritsi.”’ (Matt 26:27, 28) Jiisusip ermuseq aappalaartumik viinnilik atorpaa. Qanoq nalunngilarput viinnissap isseranik nutaamik imaqanngitsoq? Viinnissanik katersuiffik qangalili qaangiutereersimammat. Egyptenimi poorskisiummik nereqatigeeqqaarnermi viinni atorneqanngilaq. Jiisusilli poorskisiummik nereqatigiinnermi viinnip imernissaa kukkuneranngilaa. Naalakkap unnukkorsiortitsinerani allaat viinni atorpaa. Taamaattumik ullumikkut kristumiut eqqaaniaanermi viinni aamma atortarpaat. Viinnili qanoq ittoq atorneqassava? Eqqaaniaanermi viinni atorneqartussaq allanik akoqassanngilaq, assersuutigalugu imigassamik kimittuumik akuutissanilluunniit. Jiisusip aava naleqarnerutinniarlugu akoorneqanngimmat viinni nalinginnaasoq pisiniarfimmi pisiarineqarsinnaasoq, assersuutigalugu beaujolais, bourgogne chiantiluunniit, atorneqarsinnaavoq.

8. Sooq kristumiut timiusaq viinnilu sunut assersuutaanersut soqutigaat?

⁸ Apustilip Paulusip oqaasiisa ilaannit erserpoq kristumiut allat, apustilit saniatigut, Naalakkap unnukkorsiortitsinera nalliuttorsiutigissagaat. Paulusi qatanngutiminut Korinthimiunut ima allappoq: “[Naalakkamit] uannut kingornussassiissutigineqarpoq ilissinnuttaaq ingerlateqqitara manna: Naalakkap Jiisusip ... timiusaq tiguaa, qujallunilu aggorpaa oqarlunilu: ‘Tassa timiga pillusi tunniunneqartoq; taamaaliortaritsi uanga eqqaaniarlunga.’” (1 Kor 11:23, 24) Ullumikkut kristumiut peqquneqaramik ukiut tamaasa eqqaaniaasassasut timiusaq viinnilu sunut assersuutaanersut soqutigingaarpaat.

9. Inuit ilaat timiusaq Jiisusip atugaa pillugu qanoq kukkusumik upperisaqarpat?

⁹ Biibilimik nutsikkat ilaanni allassimammat “tassa timiga” kristumiuunerartut ilaasa upperaat timiusaq tupinnartuliornikkut uininngortoq Jiisusimeersoq. Timiusarli timinngunngilaq. *  Apustilit aalajaatsut Jiisusi aamma timiusaq seernarsaateqanngitsoq takusinnaavaat. Erseqqippoq Jiisusip timiusaq timiminut assersuutaaneraraa. Ilinniartitsinermigut arlaleriarluni tamatumunnga assingusumik assersuusiortarpoq. — Joh 2:19-21; 4:13, 14; 10:7; 15:1.

10. Timiusaq eqqaaniaanermi atorneqartartoq sumut assersuutaava?

¹⁰ Timiusaq apustilit takusaat nerisassaallu Jiisusip timaanut assersuutaavoq. Kristumiut ilumoortut ukiut qulikkuutaat arlallit matuma siorna upperisimavaat timiusaq ilagiinnut kristumiunut tanitanut, Biibilimi ‘Kristusip timaanik’ taaneqartumut, assersuutaasoq. Tamanna upperisimavaat Jiisusip timiusaq aggormagu saaniili nallorneqanngikkaluartut. (Ef 4:12; Rom 12:4, 5; 1 Kor 10:16, 17; 12:27) Tamannali misissornerugamikku paasilerpaat timiusaq Jiisusip inuttut timaanut assersuutaasoq. Biibilimi arlaleriarluni allassimavoq Jiisusi ‘timimigut anniartoq’ allaallu nappakkami anniartitaaffimmi toqusoq. Taamaattumik eqqaaniaanermi timiusaq Jiisusip inuttut timaanut ajortivut pillugit pilliutigineqartumut assersuutaavoq. — 1 Petr 2:21-24; 4:1; Joh 19:33-36; Hebr 10:5-7.

11, 12. (a) Viinni pillugu Jiisusi qanoq oqarpa? (b) Viinni eqqaaniaanermi atorneqartartoq sumut assersuutaava?

¹¹ Timiusaq sumut assersuutaasoq paasigatsigu Jiisusip viinni pillugu oqaasii paasisinnaavavut. Biibilimi ima oqaluttuarineqarpoq: “Ermuseq tiguaa oqarlunilu: ‘Ermuseq manna tassa uanga aakkut angerusisaaq.’” (1 Kor 11:25) Ermuseq Jiisusip tigusaa ilumut angerusiua nutaaq? Naamik. Jiisusip ermutsip imaa, viinni, pivaa. Jiisusip viinni sumut assersuutaanerarpaa? Aavanut pilliutigisassaanut assersuutaavoq.

¹² Markusip iivangkiiliua naapertorlugu Jiisusip oqaasii imaapput: “Tassa aaga, angerutsip aava, amerlasuut pillugit kuineqartussaq.” (Mark 14:24) Matthæusillu iivangkiiliuani allassimavoq Jiisusip aava “amerlasuut pillugit [kuineqassasoq] ajortit isumakkeerneqaatissaannik”. (Matt 26:28) Taamaattumik viinni aappalaartoq Jiisusip aavanut assersuutaavoq. Jiisusip aava utertitsissutaavoq ajortitsinnik isumakkeerfigineqarniassagatta. — Efesosimiut 1:7 atuaruk.

13. Kristusip toquneranik eqqaaniaanermi qanoq pisoqartarpa?

¹³ Jehovap Nalunaajaasui peqatigalugit eqqaaniaanermut najuuteqqaassaguit qanoq pisoqassasoq ilimagisinnaaviuk? Eqqaaniaaneq inimi ipiitsumi naammattumik inissaqartumi katersuunneruvoq kikkut tamarmik nuannaarutigisinnaasaat. Immaqa naasoqassaaq kusassaataasunik, ingasattumilli kusassagaassanngilaq, festitullu innavianngilaq. Utoqqaanertaq piumasaqaatinik eqqortitsisoq Biibilimi Naalakkap unnukkorsiortitsinera pillugu allassimasut tunngavigalugit paasiuminartumik ataqqinnippaluttumillu oqalugiassaaq. Nassuiaassaaq Kristusi utertitsissutitut toqusoq uagut inuujuarsinnaaniassagatta. (Romamiut 5:8-10 atuakkit). Oqalugiartoq aamma neriuutit marluk Biibilimi allassimasut pillugit nassuiaassaaq.

14. Eqqaaniaanermi neriuutit marluk suut oqalugiartumit sammineqassappat?

¹⁴ Neriuutigineqartut ilaat tassaavoq qilammi Kristusimik naalakkersueqateqarneq. Kristumiut ikittuinnaat, assersuutigalugu apustilit aalajaatsut, taamatut neriuuteqarput. (Luk 12:32; 22:19, 20; Saqq 14:1) Neriuutigineqartut aappaat tassaavoq kristumiut ilumoorfiginnittut amerlanersaasa neriuutigisaat. Taakku nunarsuarmi paratiisiusumi naassaanngitsumik inuunissamik neriuuteqarput. Nunarsuaq Guutip kissaatigisaatut, kristumiut qinnutigiuartagaattut,  naggataatigut ilissaaq. (Matt 6:10) Biibilimi taakkua inuunissaat nuannivissoq naaffeqanngitsoq allaatigineqarpoq. — Es 11:6-9; 35:5, 6; 65:21-23.

15, 16. Eqqaaniaanermi Jiisusip timiusaq pillugu oqaasii qanoq maleruarneqassappat?

¹⁵ Neriuutit taakku marluk nassuiarneqareerpata oqalugiartoq oqassaaq Jiisusip Naalakkap unnukkorsiortitsinerani iliorsimaneratut maannakkut pisoqassasoq. Oqalugiartup saniani nerrivimmiissapput timiusaq seernarsaateqanngitsoq viinnilu aappalaartoq. Oqalugiartup Jiisusip timiusaq pillugu oqaasiinik iliuusiinillu oqaluttuaq Biibilimiittoq atuassavaa. Immaqa Matthæusip iivangkiiliuaniittoq una atuassavaa: “Jiisusip timiusaq tiguaa pilluaqqusillunilu aggorpaa, ajoqersukkaminullu tunniuppaa oqarlunilu: ‘Tigusiuk nerillugulu; tassa timiga.’” (Matt 26:26) Jiisusip timiusaq aggorpaa apustiliminut saniminiittunut agguaanniassagamiuk. Eqqaaniaanermilu apriilip 14-ianni timiusaq seernarsaateqanngitsoq puuguttaniissaaq.

¹⁶ Puuguttat ingerlaartinneqannginneranni qatanngut angut naatsumik qinoqqaassaaq. Puuguttat piffissaq sivikitsoq atorlugu najuuttunut tamanut ingerlaartinneqarsinnaaniassammata naammattumik puugutaqassaaq. Aalajangersimasumik ileqqulersuuteqanngilaq, puuguttalli torersumik ingerlaartinneqassapput. Ikittunnguit timiusamik ilangiissapput, imaluunniit ilangiisoqassanngilaq, soorlu 2013-imi eqqaaniaanermi ilagiit amerlanersaanni taamaassimasoq.

17. Eqqaaniaanermi Jiisusip viinni pillugu ilitsersuutaa qanoq maleruarneqassava?

¹⁷ Taava oqalugiartup nangilluni una atuassavaa: “[Jiisusip ermuseq] tiguaa qujallunilu taakkununnga tunniuppaa oqarlunilu: ‘Tamassi tassannga imeritsi, taanna tassa aaga, angerutsip aava, amerlasuut pillugit kuineqartussaq ajortit isumakkeerneqaatissaannik.’” (Matt 26:27, 28) Jiisusip ilitsersuineratut qinoqqittoqassaaq viinnilu aappalaartoq najuuttunut tamanut ingerlaartinneqassalluni.

18. Ikittunnguit ilangiissappata ilangiisoqassanngippalluunniit sooq eqqaaniaanermut najuunnissarput pingaaruteqarpa?

¹⁸ Kristusimik qilammi naalakkersueqateqartussat kisimik timiusamik viinnimillu ilangiissapput. Taamaattumik eqqaaniaanermut najuuttut amerlanersaasa timiusaq viinnilu ingerlateqqiinnassavaat. (Lukasi 22:28-30 atuakkit; 2 Tim 4:18) Kristumiut amerlanersaasa timiusamik viinnimillu ilangiinngikkaluarlutik eqqaaniaanermut najuunnissartik pingaartippaat. Sooq? Najuunnermikkut ersersissavaat Jiisusip pilliutaanik pingaartitsingaarnertik. Eqqaaniaanermi utertitsissut iluaqutigalugu pilluaqqussutigineqartussat tamaasa eqqarsaatigisinnaavaat. Assersuutigalugu annikilliornartussarsuarmit aniguisinneqassallutik ‘amerlangaartunut’ ilaanissartik neriuutigisinnaavaat Jiisusip pilliutaanik upperinninnermikkut ‘atisatik Savaaqqap aavanik eqqiarlugit qaqortitikkamikkit’. — Saqq 7:9, 14-17.

19. Eqqaaniaanermut piareersarniarluta tamannalu iluaqutiginiarlugu susinnaavugut?

¹⁹ Nunarsuaq tamakkerlugu Jehovap Nalunaajaasui eqqaaniaanermut qanoq piareersartarpat? Eqqaaniaaneq sapaatip-akunneri arlallit sioqqullugu inuit sapinngisamik amerlasuut eqqaaniaanermut najuunnissaannut qaaqqusarpavut. Aamma ataatsimiinneq immikkut ittoq tamanna ullut arlallit sioqqullugu Jiisusip ukiumi 33-mi iliuusii Naalakkallu unnukkorsiortitsinerata siornatigut pisimasut pillugit oqaluttuat Biibilimiittut namminneq atuartarpavut. Najuunnissarput qulakkeerniarlugu pilersaarusiortarpugut. Najuuteqqaartut tikilluaqquniarlugit nalliuttorsiornerlu tamaat najuuffiginiarlugu siusinaarluta ataatsimiigiartarpugut. Najuuttut tamarmik, ilagiinniittut soqutiginnittullu, oqalugiartup allassimaffinnik atuarlunilu nassuiaanerani namminneq Biibiliminnik malinnaagunik oqalugiaat iluaqutigingaassavaat. Pingaarnerpaamillu, eqqaaniaanermut najuunnitsigut ersersissavarput Jiisusip pilliutaanik qujamasuutiginningaarluta peqqussutaalu una naalallugu: “Taamaaliortaritsi uanga eqqaaniarlunga.” — 1 Kor 11:24.