1, 2. Sooq nakutitsinerit taama nalinginnaatigippat, tamakkulu qanoq siaruarterneqartarpat? (Allaaserisap aallaqqaataani assiliaq takuuk).

SILARSUARMI inuuffigisatsinni nakutitsinerit salluliuutillu nalinginnaapput. Tamanna tupaallaatigissanngilarput. Biibilimimi erseqqissumik allassimavoq Saatani Diaavulu inunnik nakutitsillaqqissuusoq silarsuarmillu matuminnga aqutsisuusoq. (1 Tim 2:14; 1 Joh 5:19) Silarsuup ajortup matuma naggatissaa qanilliartortillugu Saatani ‘piffissakikkami’ kamannerujartuinnarpoq. (Saqq 12:12) Taamaattumik ilimagisinnaavarput Diaavulumit sunnertissimasut salluliuutaat amerliartuinnassasut. Ingammik Jehovamut kiffartortut nakutinniarsarissavaat.

² Tusagassiuutini Jehovap kiffai taakkualu upperisaat eqqaaneqaraangamik ilaannikkut ilumoortup ilaannaa eqqaaneqartarpoq allaallu salluliuutigineqartarlutik. Aviisini qulequttani, tv-kkut aallakaatitassiani nittartakkanilu salluliuutit siaruarterneqartarput. Inuit ilaasa ilumoortunik paasiniaaqqaarnatik salluliuutit tamakku upperisaramikkit eqqissiunnaarutigisarpaat allaalluunniillu kamassutigilertarlugit.

3. Nakutinneqaqqunata suna iluaqutigisinnaavarput?

³ Qujanartumik Saatanip salluliuutaanut imminut illersorsinnaavugut. Nakutinneqaqqunata Biibili, ‘naqqiinermut iluaqutaasoq’, pigaarput. (2 Tim 3:16, NW) Apustilip Paulusip allataanit erserpoq kristumiut Thessalonikamiut ilaat salluliuutinit nakutinneqarsimasut. Taakku ima allaffigai: “Qinnuigaassi ... tassanngaannaq paatsiveerutitinneqaqqunasi.” (2 Th 2:1, 2) Paulusip asannittumik oqaaqqissaarutaa qanoq ilinniarfigisinnaavarput, siunnersuutaalu qanoq maleruarsinnaavavut?

4. Kristumiut Thessalonikamiut ‘Naalakkap ullussaanut’ tunngatillugu qanoq mianersoqquneqarpat, uagullu qanoq mianersoqquneqartarpugut?

⁴ Paulusip kristumiunut Thessalonikamiunut allakkamini siullerni ‘Jehovap ullussaata’ nalliunnissaa eqqaasitsissutigaa. Kissaatiginngilaa qatanngutini paatsiveerutissasut piareersimanngitsuussasulluunniit. Allaffigai ‘qaamanerup qitornaanerarlugit’ imalu nangilluni: “Eqqumaniartali aalakoornatalu.” (1 Thessalonikamiut 5:1-6 atuakkit). Ullumikkut Babylonersuup, upperisarsiornerup eqqunngitsup tamarmiusup, suujunnaarsinneqarnissaa utaqqivarput. Suujunnaarsitaaneq tamanna Jehovap ullussarsuata aallartinneranut nalunaaqutaassaaq. Qujanartumik Jehovap siunertani qanoq naammassiumaaraa pillugu ilisimasaqarnerujartorpugut. Ilagiinni Jehovap ullussaanut piareersimaqqulluta eqqaasinneqartarpugut. Mianersoqqussutigineqartartut tamakku maluginiartarutsigit ‘paatsiveerutitinneqarnata’ Guutimut kiffartornerput aalajangiusimanerulersinnaavarput. — 2 Th 2:2.

5, 6. (a) Paulusip Thessalonikamiunut allakkami aappaanni suna allaatigaa? (b) Qanittukkut Jiisusi sussava, imminullu qanoq aperisariaqarpugut?

⁵ Paulusip Thessalonikamiunut allaqqikkami allaatigaa annikilliornartussaq Jiisusip ‘Guutimik ilisimasaqanngitsunut iivangkiiliumullu naalakkumanngitsunut’ Guutip eqqartuussutaanik naammassinniffissaa. (2 Th 1:6-8) Allakkat kapitaliisa aappaanni Paulusip eqqaavaa ilagiinniittut ilaasa Jehovap ullussaa nalliutingajalersoralugu ‘annilaartut’. (2 Thessalonikamiut 2:1, 2 atuakkit). Kristumiut siulliit Jehovap siunertaa qanoq naammassineqarumaartoq pillugu paasinnittaasiat killeqarpoq. Kingusinnerusukkut Paulusip tamanna ima nassuerutigaa: “Ilaannakuuvormi ilisarsinerput, ilaannakuuppullu siulittuisarnivut; tamarmiusorli nalliuppat ilaannakuusut soraassapput.” (1 Kor 13:9, 10) Mianersoqqussutilli Jehovameersut Paulusip, apustilip Petrusip qatanngutillu tanitat allat taamanikkut allataat iluaqutigalugit aalajaattuarsinnaapput.

⁶ Isumaat naqqinniarlugu Guutip Paulusi isumassarsisillugu nassuiaasippaa Jehovap ullussaa nalliutsinnagu tunussinersuaqarumaartoq aamma “inatsisaatsuunerup inuttaa” tikiukkumaartoq. * Taamaattoqareerpat  Guutip piffissarititaani Jiisusip nakutitaasimasut tamaasa ‘suujunnaarsissavai’. Paulusip nassuiarpaa taakkua ‘sallusuissummut asanninneq ilassinnginnamikku’ taamatut eqqartuunneqarumaartut. (2 Th 2:3, 8-10) Imminut ima aperisariaqarpugut: ‘Sallusuissut qanoq nuannaritigaara? Atuagassiaq manna Biibililersaarutillu allat silarsuarmi tamarmi Guutip innuttaanut atuagassiat atuaqqissaartarpakka Biibilimi ajoqersuutigineqartunik erseqqinnerujartuinnartumik paasinnittaaserput malinnaaffigiumallugu?’

7, 8. (a) Kristumiunut siullernut suut ulorianarpat? (b) Ullumikkut kristumiunut suna ulorianangaartuua?

⁷ Tunussisut taakkualu ajoqersuutaat kristumiunut ulorianartutuaanngillat. Paulusip Timotheusi allaffigaa ‘aningaaserituujuneq ajortunut tamanut sorlaasoq’. Imalu nangippoq: “Tamatumannga pileritsatsitaallutik inuit ilaat uppernerminnit tunussisitaasarput taamalu imminnut amerlasuunik erloqissutissiorlutik.” (1 Tim 6:10) Aamma “uinngup suliai” ulorianartorsiortitsiuassapput. — Gal 5:19-21.

⁸ Paulusip ‘apustilioqqusersunik’ taasaminut Thessalonikamiut erseqqissumik mianersoqquai. Taakkua ilaat ‘ilumoortuunngitsumik oqalupput ajoqersukkat imminnut malinnaatikkumallugit’. (2 Kor 11:4, 13; ApS 20:30) Jiisusip ilagiit Efesosimiittut ‘ajortunik akaarinninngimmata’ nersualaarpai. Efesosimiut taakku ‘misilikkamikkit’ paasisimavaat apustilioqqusersuusut salluliortuusullu. (Saqq 2:2) Soqutiginarpoq Paulusi Thessalonikamiunut allakkami aappaanni ima oqaaqqissaarisoq: “Qatanngutit, Naalakkatta Jiisusi-Kristusip aqqani peqqusiffigaassi qatanngut kinaluunniit torinngitsumik inuuseqartoq ... nigorsimaqqullugu.” Taava kristumiut ‘suliumanngitsut’ eqqaavai. (2 Th 3:6, 10) Eqiasuttut suliumanngitsullu peqatigisassanngippatigit, pingaaruteqarnerungaarpoq tunussisutut pissusilersortalersunik peqateqartannginnissaat. Taamanikkut inunnik taamaattunik peqateqartarneq ulorianangaartuummat nigorsimasariaqarpaat. Aamma ullumikkut taamaappoq. — Uss 13:20.

9. Sooq mianersortariaqarpugut Biibilimi nassuiarneqanngitsunik eqqoriaaniartoqalerpat Jehovalluunniit peqatigiissortaanik isornartorsiuisoqarpat?

⁹ Annikilliornartussarsuaq silarsuullu ajortup matuma naggatissaa qanilligatsigu Jehovap kristumiunut siullernut mianersoqqussutai ullumikkut suli pingaaruteqarnerupput. Jehovap ‘saammaannera pissarsiarput maangaannartikkusunngilarput’ naassaanngitsumillu inuunissamik neriuutaarulluta. (2 Kor 6:1) Ataatsimiinnitsinnut najuuttartup Biibilimi nassuiarneqanngitsunik eqqoriaasinniarpatigut oqaloqatigineraniluunniit utoqqaanertanik Guutimullu kiffartortunik allanik isornartorsiueqatiginiarsarippatigut mianersoqqissaartariaqarpugut. — 2 Th 3:13-15.

10. Kristumiut Thessalonikamiut ‘maligassarsianik’ sunik maleruaaqquneqarpat?

¹⁰ Paulusip qatanngutini Thessalonikamiut ‘aalajaaqqullugit’ ilikkakkaminnillu maleruaajuaqqullugit oqaaqqissaarpai. (2 Thessalonikamiut 2:15 atuaruk). “Maligassarsiat” ilinniartitsissutigineqartut suuppat? Upperisarsiornermi eqqunngitsumi ajoqersuutigineqartartut pineqanngillat. Tassaappulli Jiisusip ilinniartitsissutigisai Guutillu Paulusimut allattunullu allanut isumassarisiarititai. Paulusip qatanngutini Korinthimi ilagiinniittut  ima nersualaarpai: “Nersorpassi tamatigut eqqaamasarassinga kingornussassiissutillu ilissinnut tunniussakka aalajangiukkassigit.” (1 Kor 11:2) Ilinniartitsissutigineqartut tamakku tatiginartumeersuupput tutsuiginartuullutillu.

11. Inuit ilaat nakutitsiniutinit qanoq sunnerneqartarpat?

¹¹ Kristumiut ilaat upperunnaarlutillu Jehovamut ilumoorfiginnikkunnaarsimapput, Paulusilu allappoq marlutsigut taamaalisoqarsinnaasoq. (Hebræerit 2:1; 3:12 atuakkit). Qimagukkiartorneq tunussinerlu eqqartorpai. Qimagukkiartorneq assersuunneqarsinnaavoq umiatsiamut malunnanngingajattumik saavikkiartortumut. Tunussinerli piaarinaatsoornerunani piaaraluni imminut ‘saavititinneruvoq’. Nakutitsiniut nakkaannarfigigaanni sallusuissummilu sanngiilliuleraanni qimagukkiartortoqarsinnaavoq tunussisunngortoqarsinnaalluniluunniit.

12. Jehovamut ikinngutaanitsinnut suut ajoqutaasinnaappat?

¹² Thessalonikamiut ilaasa nakutitsiniutit nakkaannarfigisimasinnaavaat. Ullumikkut taamaattoqarsinnaava? Sorpassuit piffissaajaataasinnaapput. Aliikkutanut, internetikkut attaveqaqatigiinnermut, sms-inik e-mailinillu atuarnermut akisinermullu aamma timersornermut tunngasunik nutaarsiassarsiortuarnermut nalunaaquttap-akunneri qassimmita atorneqartarpat? Tamakku kristumiup pingaaruteqarnerusunit allamut saasaarutigisinnaavai aallussilluarunnaassutigisinnaallugillu. Tamatuma kingunerisinnaavaa qamannga pisumik qinusarunnaarneq, Biibilimik atuaqqissaarnikillineq, ataatsimiigiarpiarunnaarneq nutaarsiassamillu nuannersumik oqaluusserpiarunnaarneq. ‘Tassanngaannaq paatsiveerutitinneqaqqunata’ qanoq iliorsinnaavugut?

13. Biibilimi siulittuutigineqartutut inuppassuit qanoq isiginnittaaseqarpat, uppernikkullu qanoq sanngiillinaveersaarsinnaavugut?

¹³ Saatanip silarsuaata naggatissaa qanillisoq inunnillu ‘ulluni kingullerni’ inuunitsinnik upperinnikkumanngitsunik peqateqartarnerup navianartuusinnaanera eqqaamasariaqarparput. Apustili Petrusi nalerput pillugu ima allappoq: “[Tikiukkumaarput] mitallersut pilerissusertik maliinnarlugu inuusut mitallerlutillu ima oqartut: ‘Tikiunnissaaninguna neriorsuut qanoq piniartoq? Siuaasat toqummatali suut tamarmik pinngortinneqaqqaarnermissut ittuaannarsimapput.’” (2 Petr 3:3, 4) Ullut tamaasa Biibilimik atuartarutta aalajangersimasumillu atuaqqissaartarutta ‘ulluni kingullerni’ inuusugut puiussanngilarput. Tunussineq Biibilimi siulittuutigineqartoq itsaq aallartippoq, ullumikkullu suli tunussisoqarpoq. “Inatsisaatsuunerup inuttaa” suli piuvoq Guutillu kiffaanik akerlilersuiuarluni. Taamaattumik eqqumajuartariaqarpugut Jehovallu ullussaata qanillinera puiunngisaannarlugu. — Sef 1:7.

14. Guutimut kiffartornermi ulapputeqartuarnerput qanoq illersuutigaarput?

¹⁴ Aamma aalajangersimasumik nutaarsiassamik nuannersumik oqaluussinikkut ‘paatsiveerutitinneqarnaveersaarsinnavugut’. Inunnik inuiannit tamaneersunik ajoqersuganngortitsiortoqqusigami peqqussutiminillu maleruaanissaannik ilinniartitseqqusigami Kristusip Jiisusip ajoqersukkami illersuutigisassaannik innersuuppai. (Matt 28:19, 20) Peqqussut tamanna naalassagutsigu aallussilluarluta oqaluusseqataasariaqarpugut. Takorloorsinnaaviuk qatanngutit Thessalonikamiut oqaluussinerup ilinniartitsinerullu pisussaaffiginerinnaa pissutigalugu taamaaliorunik tamanna nalerisimaarutigisimassagaat? Eqqaamajuk Paulusip taakku qanoq  allaffigigai: “Anersaaq qamiteqinasiuk, pruffiitit oqaaserisaat asiginnaqinasigit.” (1 Th 5:19, 20) Ilumut siulittuutit atuaqqissaartakkavut allanullu tusarliuttakkavut pissanganartuupput!

15. Ilaqutariittut atuaqqissaaqatigiinnermi suut sammisinnaavavut?

¹⁵ Tamatta ilaquttavut nutaarsiassamik nuannersumik oqaluussillaqqinneruleqqullugit ikiorusuppavut. Qatannguterpassuavut taamaaliorniarlutik ilaqutariittut atuaqqissaaqatigiinnerminnut ilanngullugu oqaluussinermut sungiusartarput. Immaqa pulaaqqiinissarsi piareersarsinnaavarsi. Suut eqqartussamaarpisigit? Suut soqutiginninnerulersitsisinnaappat? Qaqugu pulaaqqikkussi pitsaanerussava? Aamma ilaqutariippassuit ataatsimiinnernut piareersaqatigiittarput. Ilissi taamaaliorsinnaavisi? Ataatsimiinnerni peqataasarussi tamanna uppernikkut nakussatsissutigissavarsi, tamannalu ‘paatsiveerutitinneqannginnissassinnut’ iluaqutaassaaq. (Tuss 35:18) Ilaqutariittut atuaqqissaaqatigiinnerput Biibilimi nassuiarneqanngitsunik eqqoriaannginnissamut qulalinnginnissamullu illersuutigissavarput.

16. Kristumiut tanitat suna ‘paatsiveerutitinneqarnaveersaarnissaminnut’ kajumississutigaat?

¹⁶ Ukiut ingerlaneranni Jehovap innuttani pilluaqqusimavai siulittuutinik Biibilimeersunik paasinninnerulersillugit. Taamaattumik upperilluinnarparput siunissami nuanningaartumik akissarsisinneqassalluta. Tanitat Kristusimik qilammeeqatiginninnissartik qilanaaraat. Neriuut tamanna ‘paatsiveerutitinneqarnaveersaarnissaminnut’ kajumississutigaat! Paulusip Thessalonikamiunut allatai uku ullumikkut tanitanut tunngapput: “Qatanngutit, ... Guutimut qujassutigittuinnartariaqarpassi, ilissi Naalakkap asasai, Guutip qinermasi ... Anersaap illernartitsineragut sallusuissummullu uppernikkut.” — 2 Th 2:13.

17. Illit Thessalonikamiunut allakkat aappaat 3:1-5 qanoq qiimmaallaatigaagit?

¹⁷ Aamma nunarsuarmi naassaanngitsumik inuunissamik qilanaarutiginnittut ‘tassanngaannaq paatsiveerutitinneqarneq’ sapinngisaminnik pinaveersaartittariaqarpaat. Nunarsuarmi naassaanngitsumik inuunissamik neriugisaqaruit Paulusip asannittumik kajumissaarutaa Thessalonikamiunut allakkat aappaanniittoq naalattuaruk. (2 Thessalonikamiut 3:1-5 atuakkit). Tamatta oqaatsit asannilluni allatat taakku qujamasuutigisariaqarpavut. Thessalonikamiunummi allakkani Biibilimi nassuiarneqanngitsunik eqqoriaannginnissamut isummanillu nalorninakujuttunik upperinninnginnissamut kajumissaarneqarpugut. Naggatissaq qanittuararsuummat mianersoqqussutit tamakku qujamasuutigingaarpavut.