1, 2. Guutip naalagaaffia sumik naammassisaqassava, qanorlu nalunngilarput naalagaaffia tikiutissasoq?

UKIUMI 31-mi upernaakkut qaqqami illoqarfiup Kapernaumip eqqaaniittumi Jiisusip Kristusip ajoqersukkani ilinniartippai ima qinusassasut: “Naalagaaffiit tikiulli.” (Matt 6:10) Ullumikkut inuppassuit naalagaaffiup tamatuma tikiunnissaa qularaat. Uagulli naalagaaffiup tikiunnissaanik qinnutitta Jehovamit akineqarnissaa upperilluinnarparput.

² Jehovap naalagaaffini iluaqutigalugu qilammi nunamilu ilaqutariissortani ataasiussuseqalersissavai. Jehovap siunertaa tamanna naammassineqarumaarpoq. (Es 55:10, 11) Ukiuni 100-ni qaanngiuttuni pisoqangaarfiusunit erserpoq Jehova kunnginngoreersimasoq kiffanilu millionillit pillugit nuanningaartunik iliuuseqarluni. (Zak 14:9; Saqq 15:3) Jehovalli kunnginngornera taassumalu naalagaaffiata tikiunnissaanit Jiisusip qinnutigeqqusaanit allaaneruvoq. Pisimasut taakku qanoq assigiinngissuteqarpat, uagullu qanoq iluaqutigisinnaavavut?

3. (a) Qanga aamma sumi Jiisusi kunnginngortinneqarpa? (b) Jiisusip 1914-imi kunnginngorsimanera qanoq uppernarsarsinnaaviuk? (Quppernerup ataani ilanngussaq takuuk).

³ 1880-ip missaani Guutip kiffaasa siulittuut ukiut 2500-it matuma siorna Danielip allagaa una paasilerpaat: “Kunngit taakkua inuutillugit  qilaap Guutiata naalagaaffik qaqugumulluunniit atasussaq pilersikkumaarpaa.” (Dan 2:44) Ukiorpassuarni Biibilimik Atuaqqissaartartut ukiup 1914-ip immikkuullarissuunissaa erseqqissartarpaat. Taamani inuppassuit siunissamut isumalluangaarput. Atuakkiortoq ima allappoq: “Ukioq 1914 neriuffiungaarlunilu isumalluarfiungaarsimavoq.” Ukiumili tamatumani kingusinnerusukkut sorsunnersuaq siulleq aallartippoq, siulittuullu Biibilimiittoq eqquuppoq. Kaannersuit, nunap sajuttarneri, nappaassuit, pisullu Biibilimi siulittuutigineqartut eqquuttut allat uppernarsaataapput Jiisusip Kristusip 1914-imi qilammi Guutip naalagaaffiani kunnginngorsimaneranut. * Jehova Ernerminik Missiarsiusumik kunnginngortitsinermigut siornatigutut allaanerusumik kunnginngorpoq.

4. Jiisusip kunnginngorami suut iliuusereqqaarpai?

⁴ Guutip kunnginngoqqammertitaata iliuusereqqaagaa tassaavoq Saatanimut, Ataataminut akeraanerpaamut, sorsunneq. Jiisusip inngiliisalu Saatani anersaapiluilu qilammit igippaat. Tamanna qilammiittunut nuannaarutaaqaaq, naalliuutilli nunarsuarmi aatsaat taama amerlatigilerput. (Saqqummersitat 12:7-9, 12 atuakkit). Tamatuma kingorna Kunngip innuttani nunarsuarmiittut Guutip piumasaatut iliorsinnaaqqullugit minguialerlugillu ilinniartilerlugillu aaqqissuussaatilerpai. Taakkua Jiisusip siulersuineranut naalannerat uagutsinnut qanoq maligassaalluarsinnaasoq sammeriartigu.

5. 1914-imiit 1919-ip aallartinnerata tungaanut minguiaaneq qanoq ittoq piva?

⁵ Jiisusip qilammi Saatanip anersaapiluisalu ajortumik sunniinerannik minguiaanerata kingorna Jehovap Jiisusi ajoqersugaanik nunarsuarmiittunik misissuitillugulu minguiaatippaa. Pruffiitip Malakip tamanna anersaakkut ‘eqqiaanertut’ allaatigaa. (Mal 3:1-3) Oqaluttuarisaanermit erserpoq ‘eqqiaaneq’ tamanna 1914-imiit 1919-ip aallartinnerata tungaanut pisimasoq. * Jehovap qilammi nunamilu ilaqutariissortaanut ilaajumalluta minguitsuusariaqarpugut, imaluunniit illernartuusariaqarpugut. (1 Petr 1:15, 16) Upperisarsiornermit eqqunngitsumit politikkimilluunniit mingutsinneqarnaveersaartariaqarpugut.

6. Anersaakkut nerisassat qanoq pilersinneqartarpat, nerisassallu taakku sooq pingaaruteqangaarpat?

⁶ Jiisusip kunngitut oqartussaassuseqarnini atorlugu “inussiaq aalajaallunilu silatooq” ivertippaa. Inussiaq taanna Jiisusip paarisaanut, ‘savaatinut katersanut ataatsinut’ ilaasunut tamanut, anersaakkut nerisassanik iluaqutaasunik pilersuiuassaaq. (Matt 24:45-47, NW; Joh 10:16) 1919-imiilli angutit tanitat ikittunnguit ‘kiffanik’ nerisitsinissamut akisussaaffitsik pingaarutilik ilumoorfiginnilllutik isumagisimavaat. Inussiaq aalajaallunilu silatooq uppernikkut ineriartorsinnaaqqulluta anersaakkut nerisassarpassuarnik pilersitsisarpoq. Taakku anersaakkut, ileqqussatigut, isumakkut timikkullu minguitsuujuarnissatsinnut nakussatsissutigaavut. Aamma anersaakkut nerisassat iluaqutigalugit nunarsuarmi suliarineqartumi pingaarnerpaami, oqaluussinermi, aallussilluarsinnaajumalluta piareersarneqartarlutalu ilinniartinneqartarpugut. Inussiap pilersuinera tamakkiisumik iluaqutiginiartarpiuk?

7. Jiisusip nunarsuarmiitilluni suliaq pingaarutilik suna aallartippaa, qanorlu sivisutigisumik suliarineqartussaava?

⁷ Jiisusi nunarsuarmi oqaluussinini aallartikkamiuk ima oqarpoq: “Guutip naalagaaffianik iivangkiiliu illoqarfinni allanissaaq tusarliussassaraara; tamanna pillugu  aallartitaavunga.” (Luk 4:43) Ukiuni pingasuni affarmilu Jiisusip oqaluussinini inuunermini pingaarnerpaatippaa. Ajoqersukkani ima ilinniartippai: “Oqaluussiartoritsi ima: Qilaap Naalagaaffia qanillivoq!” (Matt 10:7) Jiisusip toqusunit makititaareerluni siulittuutigaa ajoqersukkani ‘nunarsuup isua tikillugu allaat’ tusarliussaminik tusarliiumaartut. (ApS 1:8) Neriorsorpai suliami tamatumani nammineq tapersersorumallugit silarsuup naggatissaanut allaat. — Matt 28:19, 20.

8. Kunngip innuttani nunarsuarmiittut oqaluusseqqullugit qanoq kajumissaarpai?

⁸ 1919-imiilli ‘naalagaaffimmik iivangkiiliu’, imaluunniit nutaarsiassaq nuannersoq, isumaqarnerulerpoq. (Matt 24:14) Kunngi qilammi naalakkersuilersimavoq nunarsuarmilu innuttaminik ikittunik minguiarneqartunik katersuisimalluni. Taakkua Guutip naalagaaffiata qilammi naalakkersuilernera pillugu nunarsuaq tamakkerlugu Jiisusip oqaluussissutigeqqusaa kajumillutik naalappaat. (ApS 10:42) Assersuutigalugu 1922-mi Guutip naalagaaffianik tapersersuisut 20.000-ingajaat nunanit tamalaaneersut USA-mi Cedar Pointimi Ohiomiittumi ataatsimeersuarnermut najuupput. Takorlooriaruk tusarnaartut qanoq nuannaartigisimassanersut qatanngut Rutherford oqalugiaammini “Qilaap Naalagaaffia qanillivoq”-mik qulequtalimmi ima nalunaarmat: “Ata, kunngi naalakkersuivoq! Ilissi oqariartortigaasi. Taamaattumik kunngi taassumalu naalagaaffia oqaluussissutigisigik, oqaluussissutigisigik, oqaluussissutigisigik.” Aqaguani najuuttut taakkua ilaat 2000-it oqaluusseqataapput, taakkualu ilaat ataatsimeersuarfimmit allaat 72 kilometerisut ungasitsigisumut angalaarsimapput. Qatanngut angut ima oqarpoq: “Naalagaaffimmik oqaluussissutigeqqusissut najuuttorpassuillu aallussilluarnerat puiunngisaannassavakka!” Taakkua ilarpassui aamma taama misigipput.

9, 10. (a) Ilinniarfiit suut oqaluussillaqqinnerulissutigisinnaavavut? (b) Illit ilinniartinneqarnerit qanoq iluaqutigisimaviuk?

⁹ 1922-mi nunani 58-ini oqaluussisartut 17.000-it sinnerlugit oqaluussisarput. Ilinniartinneqartariaqarpulli. Kristumiut siulliit nalaanni kunngitut tanitaasup ajoqersukkani sumi, qanoq aamma suna pillugu oqaluussissanersut ilitsersorluarpai. (Matt 10:5-7; Luk 9:1-6; 10:1-11) Ullumikkuttaaq Jiisusip oqaluussisartut tamarmik ilitsersorneqarnissaat ilinniartitsillaqqinnissamullu pisariaqartitaminnik tunineqarnissaat qulakkeertarpaa. (2 Tim 3:17) Jiisusip ilagiit iluaqutigalugit ajoqersukkani oqaluussisinnaaqqullugit ilinniartittarpai. Assersuutigalugu Teokratiimik Ilinniarfik nunarsuaq tamakkerlugu ilagiinni 111.000-init amerlanerusuni ingerlanneqartoq iluaqutigalugu ilinniartitsisarpoq. “Kikkut tamaasa” ikiorniarlugit oqaluussisartut 7 millioninit amerlanerusut ilinniarfik tamanna oqaluussinermi ilinniartitsinermilu pikkorinnerulissutigaat. — 1 Korinthimiut 9:20-23 atuakkit.

¹⁰ Aamma allanik ilinniarfeqarpoq utoqqaanertat, pionerit, qatanngutit angutit aappaqanngitsut,  aappariit, immikkoortortaqarfiit ataatsimiititaliaannut ilaasut nuliaallu, nakkutilliisut angalasartut nuliaallu ajoqersuiartortitallu iluaqutigisaannik. * Aappariinnut Kristumiunut Biibilimik Ilinniarfimmi ilinniartut ilaat qujamasunnertik ersersinniarlugu ima allapput: “Immikkut ittumik ilinniartinneqarnerput Jehovamik asanninnerulissutigalugulu allanik ikiuillaqqinnerulissutigaarput.”

11. Jiisusip ajoqersugai Saatanimit akerlilersorneqaraluarlutik qanoq oqaluussiuarsinnaappat?

¹¹ Akeraasup, Saatanip, nutaarsiassaq nuannersoq pillugu ilinniartitsinermi oqaluussinermilu iliuuseqangaarnerit tamaasa maluginiartarpai. Sapinngisani tamaat Guutip naalagaaffianik oqaluussissutiginnikkunnaarsitsiniartarpoq oqaluussisartullu akerlilersorniartarlugit. Saatanilli akerlilersuineri iluatsinnavianngillat. Jehovap erni ‘piginnaanilinnit, pissaanermit, nakuussusermit, naalagaassutsimit annerungaartunngortissimavaa’. (Ef 1:20-22) Jiisusip Ataatami piumasaata naammassineqarnissaa qulakkeerniarlugu kunngitut oqartussaanini atorlugu ajoqersukkani illersorlugillu siulersorpai. * Nutaarsiassaq nuannersoq oqaluussissutigineqartuarpoq, inuillu millionillit eqqortuliorusuttut Jehovamik pallorfiginninnissamik ilinniartinneqartarput. Suliamut nuannersumut peqataanerput pisinnaatitaaffiuvoq immikkut ittoq!

12. 1914-imiilli Guutip kiffaasa aaqqissuussaanerat qanoq pitsanngorsarneqarpa?

¹² Jiisusi 1914-imi naalakkersuileramili Guutip kiffai Ataatami piumasaatut iliorsinnaaqqullugit aaqqissuussaanerannik pitsanngorsaasarpoq. (Esaja 60:17 atuaruk). 1919-imi ilagiinni ataasiakkaani oqaluussinermi siuttuusussatut sulinermut siulersuisunngortitsisoqartalerpoq. 1927-mi ilagiit sapaatikkut oqaluussisalerput. 1931-mi Jehovap Nalunaajaasuinik taaguuteqalerput, tamannalu oqaluussinermi iliuuseqarnerunissaminnut kajumississutigaat. (Es 43:10-12, NW) 1938-mi ilagiinni siuttuusut qinersinikkut toqqarneqartarunnaarput, piumasaqaatinilli Biibilimeersunik eqqortitsisut kisimik toqqarneqartalerput. 1972-imi ilagiinnik ataasiakkaanik nakkutiginninnermik siuttoq ataasiinnaq akisussaaffeqarunnaarpoq, utoqqaanertaqatigiilli akisussaaffeqalerput. Angutit utoqqaanertanut ilagiinnilu kiffartortunut piumasaqaatinik eqqortitsisinnaasut tamarmik ilagiinnik paarseqataanissamut kajumissaarneqarput. (1 Petr 5:2) 1976-imi nunarsuaq tamakkerlugu Guutip naalagaaffia pillugu suliaq nakkutigineqarluarsinnaaqqullugu Siulersuisoqatigiinni ataatsimiititaliat arfinillit pilersinneqarput. Taamanimiilli Jiisusi ajoqersukkani Guutip  piumasaanut naapertuuttumik iliuuseqarsinnaaqqullugit aaqqissuussaatikkumallugit iliuuseqartuarpoq.

13. Kunngip Missiarsiusup naammassisai qanoq iluaqutigaagit?

¹³ Kunngip Missiarsiusup naalakkersuinermini ukiuni 100-ni siullerni naammassisai nuannersut eqqarsaatigeriakkit. Inuiaat Jehovamut sinniisussat minguiarpai. Nunani 239-ni nutaarsiassaq nuannersoq pillugu oqaluussinermik siulersuillunilu inuit millionillit Jehovamik pallorfiginnissinnaaqqullugit ilinniartippai. Innuttaasut ilumoorfiginnittut 7 millionit sinnerlugit Ataatami piumasaatut sapinngisartik tamaat iliorumasut ataasiussuseqalersippai. (Tuss 110:3) Jehovap naalagaaffik Missiarsikkoortoq iluaqutigalugu nuanningaartorpassuit naammassisimavai. Siunissamili suli nuanningaarnerusut pisussaapput!

14. (a) ‘Naalagaaffiup tikiunnissaanik’ qinugaangatta Guuti sumik qinnuigisarparput? (b) Ukiumut 2014-imut allassimaffik suua, aamma sooq naleqquppa?

¹⁴ Jehovap erni, Jiisusi Kristusi, 1914-imi kunngitut Missiarsitut niaqoruserpaa, taamaakkaluartorli ‘naalagaaffiup tikiunnissaanik’ qinnuterput tamakkiisumik akineqanngilaq. (Matt 6:10) Biibilimi siulittuutigineqartutut Jiisusi ‘akeqqami akornanni’ naalagaalerpoq. (Tuss 110:2) Naalakkersuisut inuit pilersitaasa Saatanimit sunnerneqartut Guutip naalagaaffia suli akiorpaat. Guutip naalagaaffiata tikiunnissaa qinnutigigaangatsigu Guuti qinnuigisarparput kunngip Missiarsiusup qilammilu kunngioqataasa 144.000-it inuit naalakkersuineri Guutillu naalagaaffianik akerlilersuisut nunarsuarmiittut suujunaarsissagaat. Qinnut tamanna akineqarpat siulittuut Danielimik allakkani 2:44-mi allassimasoq eqquutissaaq. Tassani allassimavoq ‘Guutip naalagaaffiata kunngeqarfiit allat tamaasa aserortissagai suujunnaarsillugillu’. Naalakkersuisut Guutip naalagaaffianut akeraasut suujunnaarsissavai. (Saqq 6:1, 2; 12:18–13:18; 19:11-21) Tamanna qanittuarasuakkut pisussaammat ukiumut 2014-imut allassimaffik Matthæusip allagaani 6:10-mi allassimasoq una naleqqulluinnarpoq: “Naalagaaffiit tikiulli.” Ukioq manna Jiisusi ukiuni 100-ni qilammi naalakkersuisimavoq!

15, 16. (a) Kristusip ukiuni 1000-ini naalakkersuinissaani nuannersunik sunik pisoqarumaarpa? (b) Jiisusi kunngitut Missiarsiusutut inaarutaasumik qanoq iliussava, tamannalu Jehovap siunertaanut qanoq attuumassuteqarpa?

¹⁵ Kunngip Missiarsiusup Guutimut akeraasut suujunnaarsereerunigit Saatani anersaapiluilu itinersuarmut igikkumaarpai, tassaniissappullu ukiuni 1000-ini. (Saqq 20:1-3) Ajortunik sunniisut peereerpata Naalagaaffiup inuit Jiisusip utertitsissutitut pilliutaanik iluaqutiginninnissaannut ingerlaannaq ikiussavai ajortillu Adamimit kingornussap kingunipilui atuukkunnaarsissallugit. Kunngip inuit millionilikkuutaat toqusunit makitissavai nunarsuarlu tamakkerlugu taakkuninnga Jehova pillugu ilinniartitsinermik aaqqissuussissalluni. (Saqq 20:12, 13) Naatsiivittut Edenitut nunarsuaq tamakkerluni paratiisinngorumaarpoq, inuillu aalajaatsut tamarmik naammalluinnartunngorumaarput.

¹⁶ Kristusi ukiuni 1000-ini naalakkersuereerpat Jehovap nunarsuarmut siunertaa naammassineqarumaarpoq. Taava Jiisusip naalagaaffik Ataataminut tunniutissavaa. (1 Korinthimiut 15:24-28 atuakkit). Jehovamut uagutsinnullu akunnermiliuttoqartariaqarunnaassaaq. Guutip erneri qilammiittut qitornaalu nunarsuarmiittut tamarmik Ataatartik qilammiusoq ilaqutariissuartut ataasioqatigilissavaat.

17. Guutip naalagaaffia pillugu sunissat aalajangiusimaviuk?

¹⁷ Kristusip ukiuni 100-ni kunngiunerani pisimasunit nuannersunit erserpoq Jehova aqutsisuusoq nunarsuarmullu siunertaa naammassineqarumaartoq. Kunngi ilumoorfigalugu kiffartorfigiuartigu taannalu naalagaaffialu oqaluussissutigiuarlugit. Upperilluinnarparput Jehovap qinnuterput una qanittukkut akissagaa: “Naalagaaffiit tikiulli”!