1. Guuti assilillugu pinngortitaagatta susinnaavugut?

“ANGUSISAQ!” Meeqqap ataatani assigigaangagu inuppassuit taama oqartarput. Aap, meeqqat tamarmik angajoqqaatik assigisarpaat. Jehova Ataatarput qilammiusoq inuunermik tunisisuuvoq. (Tuss 36:10) Jehovap nunarsuarmi qitornarimmatigut assigiinngitsorpassuartigut taanna assigaarput. Jehova ‘assilillugu’ pinngortitaagatta eqqarsarsinnaassuseqarlutalu aalajangiisinnaassuseqarlutalu qanittumik ikinngutigisaqalersinnaavugut. — 1 Mos 1:26.

2. Suna tunngavigalugu Jehova ikinngutiginerpaasarilersinnaavarput?

² Guuti Erneralu upperigatsigit Jehovallu asammatigut taanna ikinngutiginerpaasarilersinnaavarput. Jiisusi ima oqarpoq: “[Guutip] silarsuaq ima asatigaa ernituani tunniussimallugu taassumunnga uppertoq kinaluunniit tammaqqunagu naassaanngitsumilli inooqqullugu.” (Joh 3:16) Biibilimi Jehovamik qanittumik ikinnguteqartut pillugit oqaluttuarpassuaqarpoq. Taakkua ilaat marluk sammeriartigit.

3, 4. Aaperaap Jehovamut ikinngutaanera Israelikkut Jehovamut attaveqarnerannit qanoq allaanerua?

³ Jehovap Israelikkut siuaasaat, Aaperaat, ‘ikinngutiminik’  taavaa. (Es 41:8) Nalunaarsuutit aappaanni 20:7-imi Aaperaat aamma Guutip ikinngutaatut allaatigineqarpoq. Sooq Aaperaap Pinngortitsisini qanittumik ikinngutigilersinnaavaa? Aaperaat upperluartuugami. — 1 Mos 15:6; Jaaku 2:21-23 atuakkit.

⁴ Aaperaap kinguaavisa kingusinnerusukkut inuiaqatigiinngortut Israelikkut Jehova Ataatagisimallugulu ikinngutigisimavaat. Alianaraluartumik piffissap ingerlanerani Guuti ikinngutigiunnaarpaat. Sooq? Jehovap neriorsuutai upperiunnaaramikkit.

5, 6. (a) Illit Jehova qanoq ikinngutigilersimaviuk? (b) Qanoq immitsinnut aperisariaqarpugut?

⁵ Jehova ilisarisimanerujartortillugu taassuminnga upperinninnerulissallutillu asanninnerulissaatit. Guuti piviusuusoq taassumunngalu qanittumik ikinngutaalersinnaallutit ilinniaqqaalersimanerit eqqarsaatigeriaruk. Adamip naalanngitsuliornera pissutigalugu ajorti kingornussarisimagipput paasisimavat. Aamma inuit Guutimik eqqisseqateqannginnerat paasisimavat. (Kol 1:21) Taavalu paasilersimavat Ataatarput qilammiusoq asannittoq uagutsinnit ungasinnanilu soqutiginningaartuusoq. Jehovap Ernini pilliutigisimagaa ilinniaratsigu Jiisusillu utertitsissutitut pilliutaa upperileratsigu Guuti ikinngutigileriartorparput.

⁶ Jehovamik ilisarisimannilersimanerput eqqarsaatigigaangatsigu imminut ima aperisariaqarpugut: ‘Guutimut ikinngutaanera suli ineriartortittuarpara? Ullut tamaasa Jehova tatigineruleriartorlugulu asaneruleriartorpara?’ Guutip qanimut ikinngutigisimasaasa ilagaat Gideoni. Taanna qanoq ilinniarfigisinnaaneripput sammeriartigu.

7-9. (a) Gideoni maluginiarnartumik qanoq misigisaqarpa, qanorlu kinguneqarpa? (Allaaserisap aallaqqaataani assiliaq takuuk). (b) Guuti qanoq ikinngutigillualersinnaavarput?

⁷ Israelikkut nunamik neriorsuutigisamik tiguaanerata kingorna piffissami erloqinartorsiorfiusumi Gideoni eqqartuussisuuvoq Jehovamut kiffartortoq. Midjanikkut arlaleriarlutik Israelikkut saassukkiartortarpaat taakkua nunaat ujajaaffiginiarlugu. Taamaattumik Gideoni qajuusiassat naleqangaartut toqqupallassinnaaniassagamigit viinnissanik tunguiaaffimmi, narsaammiinnani, qajuusiassanik karrertaajaavoq. Eqqartuussisunik allakkani kapitali 6 naapertorlugu Gideoni Oframiitillugu Jehovap inngilia tikiuppoq. Gideonip inngilimit saqqummerfigineqarnini ‘sorsuttartumillu qunusuitsumik’ taaneqarnini tupigusuutigaa. Jehovap Israelikkut Egyptenimit aniguisikkaluarai Gideonip Jehovamit maanna ikiorneqarnissartik qularaa. Jehova sinnerlugu inngilip Gideoni neriorsorpaa Guutimit ikiorneqarumaartoq.

⁸ Gideonip paaserusuppaa Israelikkut qanoq ‘Midjanikkut assaannit aniguisissallugit’. Jehovap paatsuugassaanngitsumik ima akivaa: “Uanga najorumaarpakkit! Midjanikkut tamaviisa toqorassavatit.” (Eqq 6:11-16) Qanoq tamanna pissasoq paasiumallugu Gideoni Guutimit uppernarsaavigeqquvoq. Maluginiarnarpoq Gideonip Guuti oqaloqatigigamiuk Guutip piviusuunera qularinngilluinnaraa.

⁹ Taava Gideonip upperluarnerulissutigisaanik Guutimullu qanillinerulissutigisaanik pisoqarpoq. Gideonip inngili iggappaa. Inngilillu nerisassat ajaappiami nuuanik attorpai tupinnartuliornikkullu nerisassat ikuallallugit. Gideonip paasigamiuk inngili ilumut Guutimit aallartitaasoq annilaangalerpoq, imalu oqarpoq: “Ila Guuti Naalagaq, Naalakkap inngilia kiinarsillugu takuara!” (Eqq 6:17-22) Gideonip misigisimasaa Guutimik ikinnguteqarneranut ajoqutaava? Naamerluinnaq! Gideoni misigivoq Guutimik eqqisseqateqarluni. Taama isummersinnaavugut Gideoni tassani pilliiviliormat ima taasaminik: “Naalagaq eqqissisitsisuuvoq.” (Eqqartuussisut 6:23, 24 atuakkit). Jehovap uagut pilluta ullut tamaasa iliuuserisartagai  eqqarsaatigeqqissaarutsigit paasilissavarput Jehova tassaasoq ikinngutiginerpaasarput ilumoortoq. Guuti qinunikkut saaffigikulasarnerugutsigu qamuuna eqqissineq misiginerusinnaavarput Guutilu ikinngutiginerujartuinnassallugu.

10. Tussiaat 15 versi 3, 5-ilu naapertorlugit Jehovap imminut ikinngutaajumasut qanoq piumasaqarfigai?

¹⁰ Jehovamut ikinngutaajumalluta piumasaqaatit aalajangersimasut eqqortittariaqarpavut. Tussiaat 15-imi Daavi erinarsorpoq Jehovap tupiani ‘tikeraajujumalluta’, tassa Guutimut ikinngutaajumalluta, qanoq iliortariaqarnersugut. (Tuss 15:1) Piumasaqaatit ilaat marluk sammeriartigit: Mamarliinaveersaarneq unneqqarissuunerlu. Daavi Jehovap ikinngutigisaa pillugu ima allappoq: ‘Oqqamigut mamarliinngilaq.’ (1900) Imalu nangippoq: ‘Pinngitsuusumit pisuutitsinngilaq uffa pisuutitsinissaminut akilerniarneqaraluarluni.’ — Tuss 15:3, 5.

11. Sooq mamarliineq ingalattariaqarparput?

¹¹ Tussiaammi allami Daavi ima mianersoqqusivoq: “Sianigissavat oqqat ajortumik oqalussanngimmat.” (Tuss 34:14) Mianersoqqussut tamanna sumiginnarutsigu Ataatatsinnut qilammiusumut ikinngutaanerput ajoqusissavarput. Mamarliineq, imaluunniit oqaatissuaaneq, Jehovamut akeraanerpaamut, Saatanimut, ilisarnaataavoq. Taaguut “Diaavulu” oqaatsimit grækerisuumit “mamarliisoq”-mik isumaqartumit naggueqarpoq. Allanut suna pillugu oqaluttarnerluta allallu pillugit qanoq oqartarnerluta mianersuutigigutsigu Jehovamut attaveqarluartuarnissatsinnut iluaqutaassaaq. Ingammik qatanngutinut angutinut ilagiinni siulersuisutut Guutimit toqqarneqartunut isiginnittaaserput mianersuutigisariaqarparput. — Hebræerit 13:17; 1 Thessalonikamiut 5:12 atuakkit.

12, 13. (a) Sooq tamatigut unneqqarissuusariaqarpugut? (b) Unneqqarissuunerput qanoq kinguneqartarpa?

¹² Jehovap innuttaasa unneqqarissuunertik ilisarnaatigaat. Apustili Paulusi ima allappoq: “Qinnuttarniartigut, nalunngilluaratsigu ilerasuutissaqarnata, tamatigummi eqqortumik [unneqqarissumik, NW] iliorumasaraluaratta.” (Hebr 13:18) ‘Tamatigut unneqqarissumik iliornissarput’ aalajangiusimagatsigu uppeqativut peqquserluttuliorfigineq ajorpavut. Assersuutigalugu uppeqativut sulisorigutsigit naapertuilluartumik pineqarlutillu isumaqatigiissutigineqareertutut akissarsiaqarnissaat qulakkiissavarput. Kristumiuugatta sulisorisavut aamma kikkut tamaasa unneqqarissumik pisarpavut. Uppeqatittalu ilaannut sulisuugutta allanit pitsaanerusumik immikkullu ittumik pineqarnissarput piumasarissanngilarput.

¹³ Jehovap Nalunaajaasui unneqqarissuunerat pillugu allanit nersualaarneqakulasarput. Assersuutigalugu sanaartornermi peqatigiifferujussuarmi pisortaasup maluginiarpaa Jehovap Nalunaajaasui neriorsuinermissut iliortuaannartut imalu oqarluni: “Isumaqatigiissutigineqartutut tamatigut iliortarpusi.” (Tuss 15:4) Unneqqarissuunerput Jehovamut ikinngutaajuarnissatsinnut iluaqutaallunilu Ataatatsinnut qilammiusumut nersornaataasarpoq.

14, 15. Oqaluussinitsinni naapittakkavut Jehovamut ikinngutaalersinnaaqqullugit qanoq ikiorsinnaavavut?

¹⁴ Inuit oqaluussinermi naapittakkatta Guuteqarneranik upperinnikkaluartut ilarpassuisa Guuti ikinngutiginerpaasamissut isigineq ajorpaat. Taakku qanoq ikiorsinnaavavut? Maluginiaruk Jiisusi ajoqersukkami ilaat oqaluussiartoqqullugit aallartileramigit qanoq oqarnersoq: “Illumut sumulluunniit iseraangassi ima oqaqqaartassaasi: Illu manna eqqissinarsili! Tassaniittoqarpallu  eqqissinermik nuannarisaqartumik taava eqqisseqqussutissi taanna uninngavigissavaa, taamaattoqanngippalli eqqisseqqussutissi uterfigissavaasi.” (Luk 10:5, 6) Inuit inussiarnerfigigutsigit immaqa sallusuissut pillugu ilinniarnissartik kajumiginerussavaat. Aamma uagutsinnut akeqqersimaartut inussiarnerfigigutsigit immaqa inussiarnernerput kamakkunnaassutigisinnaavaat, kingusinnerusukkullu sallusuissut tusarumalersinnaavaat.

¹⁵ Inunnik upperisamik pingaartitsisunik imaluunniit upperisarsiornikkut ileqqutoqqanik maleruaasunik naapitaqaraangatta taakku assuarinagit inussiarnerfigisarpavut. Kikkut tamaasa, ingammik silarsuarmi pissutsinik pakatsissutiginnittut Guutilu pallorfigisarput pillugu ilinniarnerorusuttut, ataatsimiinnitsinnut tikilluaqqusarpavut. Inuit taamatut misigisaqarsimasut pillugit allaaserisani “Biibili inuit inuunerannik allannguisitsisarpoq”-mik qulequtalinni atuarneqarsinnaapput.

16. Jehova ikinnguterput qanoq ‘suleqatigisinnaavarput’?

¹⁶ Inuit suleqatigiittartut ikinngutigiillualerajuttarput. Jehovamut tunniulluinnarsimasut tamarmik taassumunnga ikinngutaaginnaratik aammali taanna ‘suleqatigaat’. (1 Korinthimiut 3:9 atuaruk). Oqaluusseqataallutalu ajoqersuganngortitsiortoqataanitsigut Ataatatta qilammiusup pissusii asseqanngitsut pillugit ilinniarnerusarpugut. Aamma Jehovap anersaavata illernartup nutaarsiassamik nuannersumik oqaluussissutiginninnitsinnut qanoq iluaqutaatiginera misigisarparput.

17. Ataatsimeersuarnernit qanoq erserpa Jehova ikinngutigigipput?

¹⁷ Oqaluussinerutilluta Jehovamut qanilliartornerussaagut. Assersuutigalugu Jehovap akerlilersuisut oqaluussiunnaarsitsiniarnerannik akornusiisarnera uagutsinnillu siulersuilluarnera erseqqippoq. Ataatsimiinnerit Biibililersaarutillu iluaqutigalugit qanoq ilinniartittuaannaraatigut ajasoorutigaarput. Ataatsimeersuarnitsinnit erserpoq Jehovap asannittup ajornartorsiutivut pisariaqartitavullu paasilluarai. Ataatsimeersuarnerup kingorna ilaqutariiusut ima allapput: “Saqqummiunneqartut killitsissutigingaarpavut. Jehovap tamatsinnik asanningaarnera ingerlalluarnissatsinnillu kissaassinera misigaarput.” Irlandimi ataatsimeersuarnermut immikkut ittumut najuutereerlutik aappariit Tysklandimeersut tikilluaqquneqarlutillu isumassorneqarnertik qujamasuutigaat, imalu nangipput: “Jehovali Kunngiutitaalu Jiisusi Kristusi pingaarnerpaamik qutsavigisassaraavut. Inuiaqatigiinnut ataasiussuseqavissunut qaaqqusimavaatigut. Ataasiussuseqarneq oqaluussissutigiinnarnagu tamannali ullut tamaasa misigisarparput. Dublinimi ataatsimeersuarnermi immikkut  ittumi misigisavut Guutitsinnut angingaartumut peqatigalusi kiffartornitta pisinnaatitaaffiuneranik naleqangaartumik eqqaasitsipput.”

18. Jehovamik attaveqateqarnerput pillugu qanoq imminut aperisariaqarpugut?

¹⁸ Ikinngutigiit oqaloqatigiilluaraangamik imminnut qanilliartortarput. Ullumikkut internetikkut mobilikkulluunniit attaveqaqatigiinneq atugaasorujussuuvoq. Tamannalu eqqarsaatigalugu ikinngutitsinnik Jehovamik attaveqateqarnerput qanoq pingaartitsigaarput? Taanna ‘qinnutitsinnik tusartarpoq’. (Tuss 65:3) Uagulli Jehova qanoq akulikitsigisumik qinunikkut saaffigisarparput?

19. Qinunikkut misigissutsitta Jehovamut oqaatiginissaat sapernartikkutsigu suut iluaqutigisinnaavavut?

¹⁹ Guutip kiffaasa ilaasa qamannga pisumik misigissutsitik oqaatigissallugit sapernartittarpaat. Taamaakkaluartorli Jehovap taamatut qinunissarput kissaatigaa. (Tuss 119:145; Upp 3:41) Misigissutsitta oqaatiginissaat sapernartikkutsigu ikiortissaqarpugut. Paulusip kristumiunut Romamiunut ima allappoq: “[Naluarput] qanoq ililluta qinussalluta sunalu qinnutigissallugu. Anersaalli nammineq qinnuttarpaatigut anersaarulunnertigut oqaasertassaqartinneqanngitsutigut, uummatinillu misiliisup Anersaap kajungernera ilisimavaa, illernartut Guutip piumasaa malillugu qinnuttarmagit.” (Rom 8:26, 27) Biibilip atuagartaasa ilaat, assersuutigalugu Jobimik allakkat, Tussiaatit aamma Ussatit, atuaraangatsigit misigissutsivut Jehovamut qanoq oqaatigisinnaanerlugit isumassarsiffigisinnaavavut.

20, 21. Paulusip oqaasii Filippimiut 4:6, 7-imiittut qanoq tuppallersaatigisinnaavavut?

²⁰ Ajornartorsiuteqangaaraangatta Paulusip Filippimiunut oqaasii uku eqqaamasartigit: “Sumilluunniit isumakuluuteqarnaveeritsi, kissaatigisasili qanoq ittukkulluunniit Guutimut saqqummiuttarsigit qinullusi torlulallusilu qujallusilu.” Taamatut Jehovamut qinusarutta tuppallersarneqangaassaagut. Paulusimi ima nangippoq: “Eqqissinerup Guutimit pisup siuneqassusernit tamanit annerungaartup uummatisi eqqarsaatisilu sernigissavai Kristusi-Jiisusimi.” (Fil 4:6, 7) ‘Eqqissineq Guutimit pisoq’ asseqanngilluinnartoq uummatitsinnik eqqarsaatitsinnillu sernissuisoq qujamasuutigiuartariaqarparput.

²¹ Qinusarnerput Jehovamik ikinnguteqarnitsinnik ineriartortitsinissatsinnut iluaqutaassaaq. Taamaattumik ‘qinuttuinnarisa’. (1 Th 5:17) Guutimut ikinngutaanerput ineriartortittuartariaqarparput taassumalu piumasaqaatai naapertorlugit iliortuartariaqarluta. Qanortorlu Jehovamit Guutitsinnit, Ikinngutitsinnit Ataatatsinnillu pilluaqqussutit nuannaarutigisavut eqqarsaatigeqqissaarisigit!