1, 2. (a) Kia katinnissaa qilammi nuannaarutaangaassava? (b) Apeqqutit suut akissutisarsissavavut?

KATITTORSIORNISSAP piareersarnissaa sivisusarpoq. Maannali kunngikkormiuni katittorsiornissaq, piareersarnera ukiut 2000-it missaannik sivisussusilik, sammissavarput. Qanittukkut nuliassap uissaanukaannissaanut piffissanngussaaq. Kunngip illussaarsuani tusarnersumik nipilersortoqassaaq qilammiullu ima erinarsussapput: “Halleluja! Naalagaq Guuterput Ajugaqanngitsoq naalagaalerpoq. Tipaatsullutalu qiimasutta unnersiutigalugulu Savaaraq katittussanngormat, nuliassaalu piareersareermat.” — Saqq 19:6, 7.

² “Savaaraq” allassimaffimmi tamatumani pineqartoq tassaavoq Jiisusi Kristusi. (Joh 1:29) Katinnera qilammi nuannaarutigineqangaassaaq. Uissap atisai qanoq ittuuppat? Nuliassaa kinaava? Taanna katinnissaminut qanoq piareersarneqarsimava? Qaqugu katissappat? Katittorsiorneq tamanna qilammi nuannaarutaassaaq, nunarsuarmili naassaanngitsumik inuunissamik neriugisallit aamma nuannaaqataassappat? Apeqqutit tamakkua akissutaat paaserusungaarpavut, taamaattumik  Tussiaat 45-mik misissuinerput nangeriartigu.

3, 4. (a) Uissap atisai pillugit tussiaasiortoq qanoq allappa, uissallu suna nuannaarnerulissutigaa? (b) “Dronningi” ‘kunngillu panii’ uissamik nuannaaqatiginnittut kikkuuppat?

³ Tussiaat 45:9, 10 atuakkit. Uissap Jiisusip Kristusip kunngikkormiutut katissutissani ativai. Atisai “tipigissaatiliassanik pitsaanerpaanik”, ilaatigut myrramik kassiamillu uuliap tarnutissap illernartup Israelimi atorneqartartup akorisartagaasa ilaannik, tipigissagaapput. — 2 Mos 30:23-25.

⁴ Uissap katinnissami qanilliartornerani qilammi illussaarsuarmini nipilersorpalaaq nuannaarnerulissutigaa. “Dronningi” nuannaaqataavoq. “Dronningi” tassaavoq Guutip peqatigiissortaasa ilaat qilammiittut, ilaatigut tassaasut ‘kunngip panii’ — inngilit illernartut. Qilammiit nipit ima tutsiupput: “Tipaatsullutalu qiimasutta ... Savaaraq katittussanngormat.”

5. Nuliassaq kinaava?

⁵ Tussiaat 45:11, 12 atuakkit. Uissaq kinaassusersereerparput, nuliassaali kinaava? Taanna kristumiunut tanitanut 144.000-iusunut assersuutaavoq. Kristusi ilagiinnut tanitanut taakkununnga niaquuvoq. (Efesosimiut 5:23, 24 atuakkit). Tanitat taakkua Kristusi naalagaaffimmi Missiarsikkoortumi qilammi naalakkersueqatigissavaat. (Luk 12:32) “Savaaraq sumulluunniit aallaraangat malittarpaat.” (Saqq 14:1-4) Tassaaleramik “Savaaqqap nulia” savaaraq qilammi najugaqatigissavaat. — Saqq 21:9; Joh 14:2, 3.

6. Sooq tanitat ‘kunngip panianik’ taaneqarpat, aamma sooq ‘inuiaqatitik puiussavaat’?

⁶ Nuliassaq ‘panimmik’ aamma ‘kunngip panianik’ taaneqarpoq. (Tuss 45:14) ‘Kunngi’ taanna kinaava? Tassaavoq Jehova kristumiunik tanitanik qitornavissiartaartoq. (Rom 8:15-17) Ima oqarfigineqarput: “Puiukkit inuiaqatitit ataatavillu inoqutai!” Qilammi nuliassaalissagamik ima oqarfigineqarput: “Eqqarsaatigisigit qilammiittut, nunamiittut pinnagit.” — Kol 3:1-4.

7. (a) Kristusip nuliassani qanoq piareersarsimavaa? (b) Nuliassap uissani qanoq isigaa?

⁷ Ukiuni hundredilikkuutaani Kristusip nuliassani qilammi katittorsiornissamut piareersarsimavaa. Apustili Paulusi allappoq Kristusip “ilagiit asagai imminullu tunniulluni taakku pillugit illernarsarumallugit eqqiarlugit imermik oqaatsikkut, ilagiit imminut sassartinniaramigit naalannassuseqartumik, — ilagiit simernitannguaqanngitsut, eqingasulinneqanngitsut, illernartuusut sumilluunniit ippinnaateqaratik”. (Ef 5:25-27) Paulusip itsaq kristumiut tanitat Korinthimiittut ima allaffigai: “[Nakkutigaassi] sangiallunga Guutip sangianneranik Kristusimut, taassumunngaannarlu, nuliassaritikkassi niviarsiatut minguitsutut taassumunnga ingerlakkumallusi.” (2 Kor 11:2) Nuliassap pallorfiginninnera minguitsuullunilu Guutimit iluarisaammat kunngip Jiisusip Kristusip nuliassani pinnaraa. Nuliassap uissani ‘naalakkamisut’ isigalugu ‘pallorfigaa’.

8. Sooq nuliassaq ‘alutornangaartutut’ allaatigineqarpa?

⁸ Tussiaat 45:14, 15a atuakkit. Tussiaammi tamatumani nuliassap ‘alutornangaarnera’ allaatigineqarpoq. Saqqummersitat 21:2-mi nuliassaq “uissaminut assukkersorsimasutut” allaatigineqartoq illoqarfimmut assersuunneqarpoq. Illoqarfik taanna, “Jerusalemi nutaaq”, “Guutip  naalannassusia pigalugu” qaamavoq. “Akisunnera soorlu tassa ujarak erlinnartoq akisunerpaaq, soorlu jaspisi aligoqqissoq.” (Saqq 21:10, 11) Jerusalemip nutaap alutornangaarnera Saqqummersitani allaatigineqarluarpoq. (Saqq 21:18-21) Tussiaasiortup nuliassap alutornangaarneranik allaatiginninnera tupinnanngilaq. Qilammimiuna kunngikkormiut katittorsiortut.

9. Nuliassaq kimut sassartinneqarpa, atisaalu qanoq ittuuppat?

⁹ Nuliassaq kunngimut Missiarsiusumut uissaminukaanneqarpoq. Nuliassani piareersarsimavaa ‘oqaatsikkut eqqiarlugu’. Nuliassaq ‘illernartuuvoq sumilluunniit ippinnaateqarani’. (Ef 5:26, 27) Nalliuttorsiornissamullu naleqquttumik atisaqarpoq. Aap, “kjolia sapangalersugaavoq kuultimik sinequsikkanik”, ‘allapalaartunillu atisaqarluni kunngimut sassartinneqarpoq’. Savaaqqap katinnissaanut “[atisassinneqarpoq] ilupaassiamik qaallorissumik minguitsumik — ilupaassiamimmi atisassiat tassaammata illernartut suliaat iluartut.” — Saqq 19:8.

10. Savaaraq qaqugu katissava?

¹⁰ Saqqummersitat 19:7 atuaruk. Qaqugu savaaraq katissava? Saqqummersitat 19:7-imi allassimavoq katinnissamut ‘nuliassaq piareersareersoq’. Versinili tulliuttuni katittorsiorneq allaatigineqarnani annikilliornartussarsuup naggataatungaa erseqqissumik allaatigineqarpoq. (Saqq 19:11-21) Tamanna isumaqarpa kunngi suli ajugaalluinnarani katissasoq? Naamik. Pisussat Saqqummersitani allaatigineqarneranni pisussamiit siullermiit tulleriiaaqqissaarlugit allaatigineqanngillat. Tussiaat 45 naapertorlugu kunngi, Jiisusi Kristusi, aatsaat panaminik makitsiminut aalajangiussilluni akeqqaminik ajugaaffiginnikkiartoreernermi kingorna katissaaq. — Tuss 45: 4, 5.

11. Kristusi katinnginnermini sussava?

¹¹ Tassa Biibilimit paasivarput pisussat tamakku ima tulleriillutik pissasut: Siullermik, suujunnaarsinneqassaaq ‘arnarsuaq atortittartoq’, “Babylonersuaq”, tassa upperisarsiornerit eqqunngitsut tamarmik. (Saqq 17:1, 5, 16, 17; 19:1, 2) Taava Kristusip Harmagedonimi, ‘Guutip Ajugaqanngitsup ullussarsuani sorsunnissami’, Saatanip silarsuaata ajortup sinnera suujunnaarsissavaa. (Saqq 16:14-16; 19:19-21) Naggataatigut kunngi Saatanimik anersaapilunnillu itinersuarmut igitsinermigut ajugaalluinnassaaq. Itinersuarmilu ajoqusiisinnaanatik toqungasutut issapput. — Saqq 20:1-3.

12, 13. (a) Savaaraq qaqugu katissava? (b) Savaaqqap katinneranik qilammi kikkut tipaatsuutiginnissappat?

¹² Ullussani kingullerni tanitat aalajaallutik toqusut ingerlaannaq qilammut makitinneqartarput. Babylonersuullu suujunnaarsinneqarnerata kingorna Harmagedonili sioqqullugu Kristusip tanitat aalajaatsut kinguleruttut qilammut katersussavai. (1 Th 4:16, 17) Taava Harmagedonip kingorna Savaaraq katissinnaanngussaaq. Katittorsiornissap nuannerunassusia! Saqqummersitat 19:9-mi ima allassimavoq: “Pilluarput Savaaqqap katinnerani nerersuarnissamut qaaqqusaasut.” Aap, nuliassaqatigiit 144.000-iusut pilluangaassapput. Kunngillu naalakkersueqatissaminik tamanik qilammi najorteqalernini nuannaarutigissavaa. (Luk 22:18, 28-30) Nuannaarutiginnittulli tassaaginnassanngillat nuliassaq uissarlu.

¹³ Soorlu atuareeripput qilammiut ima erinarsorumaarput: “Tipaatsullutalu qiimasutta unnersiutigalugulu Savaaraq katittussanngormat, nuliassaalu piareersareermat.”  (Saqq 19:6, 7) Jehovammi kiffai nunamiittut? Aamma taakku unnersiutiginneqataassappat?

14. Nuliassap ‘ikinngutai niviarsiat’ Tussiaat 45-mi eqqaaneqartut kikkuuppat?

¹⁴ Tussiaat 45:13, 15, 16 atuakkit. Pruffiitip Zakariap siulittuutigaa ullussani kingullerni inuit nunarsuarmi sumi tamaneersut qujamasullutik tanitanik kinguleruttunik Jehovamut kiffartoqatiginnissasut. Ima allappoq: “Taamaalisukkut inuiaat assigiinngitsut tamarmik angutitaasa ilaasa quliullutik angut Judakkuusoq ataaseq atisaata nuuagut tigullugu oqarumaarput: Ingerlaqatigissavassi tusaratsigu Guutip najoraasi.” (Zak 8:23) ‘Angutit qulit’ assersuutaasut taakku Tussiaat 45:13-imi ‘Tyrusip paniinik’ aamma ‘inuiaat pisoortaannik’ taaneqarput. Tanitat kinguleruttut ornippaat tapersersorniarlugit Jehovamullu kiffartornerminni ikiortisiariniarlugit. 1935-miilli tanitat kinguleruttut Jehova pillugu sallusuissummik ilinniartitsinermikkut ‘iluarneq’ inunnut millionilinnut innersuuppaat. (Dan 12:3) ‘Angutit qulit’ taakku tassaapput tanitat ikinngutaat ilumoorfiginnittut inuunertik minguiarlugu eqqunngitsumik pallorfiginnikkunnaarsimasut. Taamaattumik anersaakkut ‘niviarsiaapput’. ‘Niviarsiat ikinngutaasut’ taakkua inuunertik Jehovamut tunniulluinnarsimavaat kunngimullu Jiisusimut Kristusimut kiffatut aalajaatsuunertik ersersissimallugu.

15. ‘Ikinngutit niviarsiat’ tanitanik kinguleruttunik qanoq suleqatiginnippat?

¹⁵ Tanitat kinguleruttut nunarsuarmi tamarmi ‘naalagaaffimmik iivangkiiliu’  pillugu oqaluussinerminni ‘ikinngutit niviarsiat’ aallussilluarlutik ikiuinerat qujamasuutigingaarpaat. (Matt 24:14) “Anersaarlu nuliartaarlu oqarput: ‘Qaagit!’” Tusartut aamma oqartarput: “Qaagit!” (Saqq 22:17) Aap, ‘savat allat’ tanitat qaaqqusinerannik tusarsimasut inunnik nunarsuarmi tamaniittunik qaaqquseqataasarput. — Joh 10:16.

16. Jehovap savat allat qanoq immikkut pisinnaatitaaffeqartippai?

¹⁶ Tanitat kinguleruttut savanik allanik asannipput. Tanitat nuannaarutigaat Jehovap savat allat katittorsiornermik nuannaaqataasinnaatimmagit. Siulittuutigineqarpoq ‘niviarsiat’ aggiunneqarumaartut “nuannaarnermit erinarsortoqartillugu qiimmattartoqartillugulu”. Aap, qilammi Savaaraq katippat savat allat, nunarsuarmi naassaanngitsumik inuunissamik neriugisallit, Jehovap ilaqutariissui tamaasa tipaatsoqatigissavaat. ‘Inuppassuit amerlangaartut’ nunarsuarmi Jehovamik pallorfiginnittut Saqqummersitani ‘issiavissaarsuup sioraani Savaaqqallu saavani qeqartutut’ allaatigineqarput. Jehova kiffartorfigaat taassuma naalaffiata anersaakkut ittup silarliani nunarsuarmiittumi. — Saqq 7:9, 15.

17, 18. Savaaqqap katinnera silarsuassamut nutaamut sunik iluaqutissartaqassava, ukiunilu 1000-ini naalakkersuinermini Kristusi kikkunnut ataatanngussava?

¹⁷ Tussiaat 45:17, 1900 atuaruk. * Kristusip nuliassaata ‘ikinngutai niviarsiat’ katittorsiorneq silarsuassamut nutaamut iluaqutissartaqartoq misigilerunikku nuannaarnerulissutissaqalissapput. Kunngip Jiisusip Kristusip ‘siuaasani’ nunamiut nunarsuarmi inuusussatut makitissavai. ‘Siuaasani’ taakku inuulerseqqissagamigit ‘ernerilissavai’. (Joh 5:25-29; Hebr 11:35) Kristusip ‘ernerit’ taakkua ilaat toqqassavai ‘naalagarsuanngortillugit nunami tamarsuarmi’. Aamma ilimagisinnaavarput ullumikkut utoqqaanertat aalajaatsut ilaat silarsuassami nutaami ‘naalagartatut’ siulersuisussanngortillugit toqqassagai. — Es 32:1.

¹⁸ Kristusip ukiuni 1000-ini naalakkersuinermini aamma allanut ataatanngussaaq. Jiisusimmi utertitsissutitut pilliutaanik upperinnittut nunarsuarmi naassaanngitsumik inuussapput. (Joh 3:16) Taamaalilluni Kristusi tassaalissaaq “Naassaanngitsumik Ataataq”. — Es 9:5, 6.

19, 20. Pisussat pissanganartut Tussiaat 45-mi allaatigineqartut kristumiut ilumoortut qanoq sunnerneqaatigaat?

¹⁹ Tussiaat 45:2, 18 atuakkit. Kristumiut tamarmik pisussat Tussiaat 45-mi allaatigineqartut soqutigisariaqarpaat. Tanitat suli nunarsuarmiittut pissangapput nalunnginnamikku qanittukkut qatanngutitik uissarlu, Jiisusi Kristusi, qilammi najulissagamikkit. Savat allat kunngersuarminnut naalattuarnissaminnut kajumissuseqarput. Aamma nuliassap kinguleruttortaanut nunarsuarmiittunut ikinngutaanertik qujamasuutigaat. Kristusi nuliassaalu katereerunik taakkua inuiannut tamanut pilluaqqussutisiarititassaat takorloorsinnaasatsinnik akimuingaassapput. — Saqq 7:17; 21:1-4.

²⁰ Kunngi Missiarsiusoq pillugu siulittuutit eqquunnissaat qilanaarutigigatsigit taassuma aqqanik ilisimaneqalersitsinikkut taanna nersorusungaarparput. Qanortoq kunngi ‘nersortuaannartigu’.