UILLARNERUP piitsup ernini qitornatuarisani pakkuppaa. Takusani upperisinnaanngingajappaa. Tamatuma pinngitsiarnerani ernermi toqungasup timaa eqitaarsimavaa. Maannali ernera uummarsimavoq, taassumalu qungujunnera pilluassutiginermik sajukulaalissutigisarpaa. Uillarnerup inisimasua ima oqarpoq: “Takuat, ernerit uumavoq!”

Makititsineq tamanna pissanganaqisoq ukiut 3000-it matuma siorna pivoq. Makititsineq Kunnginik allakkani siullerni kapitali 17-imi atuarsinnaavat. Inisimasoq tassaavoq Guutip pruffiitia Elia. Anaanaasormi? Tassaavoq uillarneq Sareptamiu, taassumalu aqqa ilisimaneqanngilaq. Ernerata makititaanera inuunermini uppernermik nakussatsissutiginerpaasaasa ilagaat. Uillarneq pillugu oqaluttuaq pingaarutilinnik ilinniarfigisinnaavarput.

Jehova aalajangersimavoq Israelimi, kunngip ajortup Akabip naalakkersuiffigisaani, sivisuumik panernersuaqassasoq. Eliap panernersuaqarnissaa nalunaarutigereermagu Guutip Akabimut isertortillugulu tupinnartuliornikkut timiusanik neqinillu tulukkanit pajunneqartittarpaa. Taava Jehovap Elia ima oqarfigaa: “Sareptamukarit Sidonimiittumut tassanilu najugassillutit. Uillarneq tassanimioq peqqusimavara nerisassannik isumageqqullutit.” — 1 Kng 17:1-9.

Elia Sareptamut pigami uillarneq piitsoq qisussanik katersisoq naammattoorpaa. Ilumut taassuma nerisassiuuttassavaa? Taama piitsuutigaluni qanoq taamaaliorsinnaagami? Elia immaqa nangaassuteqaraluarluni arnamut ima saaffiginnippoq: “Imermik qummuattamut aalliutitsiannga imeruersaatissannik.” Elia imermik aalliunneqarami ima oqarpoq: “Aamma timiusaminermik nassaakkinga!” (1 Kng 17:10, 11) Uillarnerup takornartamut imermik tunisinissani ajornartinngilaa, timiusaminermilli tunisinissani ajornartippaa.

 Ima akivoq: “Ilumut uumammat Naalagaq Guutigisat: Timiusaateqanngilanga! Taamaallaat itummap imaanik qajuusaateqarpunga qummuattamiittunik uuliaminiuteqarlungalu kannimiittumik. Maanna qisussaminernik katersereeruma angerlassaanga uanga ernermalu nerisassatsinnik timiusalioriartorlunga. Taanna nungukkutsigu toquinnarumaarpugut.” (1 Kng 17:12) Oqaloqatigiinnerat maanna sammeriartigu.

Uillarnerup paasivaa Elia Israelikkuusoq Guutimik mianerinnittoq. Tamanna erserpoq ima oqarami: “Ilumut uumammat Naalagaq Guutigisat.” Israelikkut Guutiat, Jehova, pillugu ilisimasaqarpasikkaluarluni taanna iluamik ilisarisimannginnamiuk Guutigineranngilaa. Uillarneq illoqarfimmi anginngitsumi Sareptami, Fønikerit illoqarfiannit Sidonimit pigineqarunartumi, najugaqarpoq. Ilimanarpoq Sareptamiut Ba’alisiortuusimanissaat. Uillarnerulli immikkuullarissuunera Jehovap takusimavaa.

Uillarneq Sareptamiu piitsoq guutipilussiortunik nunaqqateqaraluarluni Israelikkut Guutiannik upperinninnera iliuusaanit erserpoq. Jehovap uillarneq Elialu ikiorniarlugit Elia uillarnermukartippaa. Tamanna pingaarutilimmik ilinniarfigisinnaavarput.

Sareptamiut Ba’alisiortut tamarmik ajuissortuunngillat. Eliap uillarnermukartinneratigut Jehovap ersersippaa inunnik uummatigissunik, naak imminut kiffartunngikkaluartunik, maluginiaasarluni. Aap, Guuti tassaavoq “inuiaqatigiinni kikkuusuniluunniit imminik mianerinnittumik iluartuliortumillu ilassinnittartoq.” — ApS 10:35.

Inuimmita uillarnertut Sareptamiutut ittut illit oqaluussiffigisartakkanni qassiuppat? Imaassinnaavoq upperisarsiornermik eqqunngitsumik tapersersuisunik peqateqartaraluarlutik eqqortuliorusuttuusut. Imaassinnaavoq Jehova pillugu ilisimasakikkamik ilisimasaqanngilluinnaramilluunniit minguitsumik pallorfiginnilernissaminnut ikiorneqartariaqartut. Inuit taamaattut ujartortarlugillu ikiortarpigit?

Elia uillarnermut qanoq peqqusinersoq eqqarsaatigiuk. Uillarneq oqaqqammerpoq imminut ernerminullu naggammik nerisassiuutereeruni marluullutik toquinnarniarlutik. Eliali qanoq akiva? “Annilaangassanngilatit! Angerlarniarit soorlu oqartutit, uangali timiusaliuuteqqaaringa maanngaallugulu. Taamaalioreeruit illit ernerpillu nerisassassinnik timiusaliorumaarputit. Naalagarmi Israelip Guutia ima oqarpoq: Qummuattamiittut qajuusat nungussanngillat kannilu uuliaasivik imaarutissanani Naalakkap nunami siallersitsinissaata tungaanut.” — 1 Kng 17:11-14.

‘Nerisassatuakka allamut tunniutissavakka? Qanoq aamma.’ Ilaat immaqa taamatut oqassagaluarput, uillarnerli taamatut oqanngilaq. Jehova pillugu ilisimasakikkaluarluni Elia upperalugulu peqquneqarnermisut iliorpoq. Aap, uppernikkut misilinneqangaarlunilu silatusaartumik aalajangiivoq!

Guutip uillarneq piitsoq pakatsisinngilaa. Eliap neriorsuisimaneratut panernersuaqarunnaarnissaata tungaanut uillarneq Eliamut, imminerminut ernerminullu naammattunik nerisassaqarniassammat Jehovap taassuma qimatulivinngua annertusisippaa. Biibilimi ima allassimavoq: “Qajuusat qummuattamiittut nungunngillat kannilu uuliaasivik imaarunnani, soorlu Naalagaq Elia aqqutigalugu taama oqarsimasoq.” (1 Kng 17:16; 18:1) Arnaq taanna allatut periarsimasuuppat qularnanngitsumik qimatulivinnguaminit qajuusaat uulialu atorlugit timiusaliani naggammik  nerisarisimassagaluarpaa. Upperamili iliuuseqarpoq, Jehovamik tatiginnippoq Elialu nerisassiuuteqqaarlugu.

Tamanna Guutip uppernerminnik iliuutsikkut ersersitsisunik pilluaqqusisarneranik ilinniarfigisinnaavarput. Jehovamik tatiginninnerpit misilinneqarnerani uppernerit ersersikkukku taassumannga ikiorneqassaatit. Taanna ilinnut Pilersuisunngussaaq, Sernissuisunngussaaq aamma Ikinngutinngussaaq misilinneqarninnilu pinertusaarnissannut ikiuissaaq. — 2 Mos 3:13-15.

1898-imi Zion’s Watch Tower-imi uillarneq pillugu oqaluttuaq ima ilinniarfigineqarsinnaanerarneqarpoq: “Arnaq uppernermigut naalakkuni pruffiiti aqqutigalugu Naalakkamit ikiorneqarnissamut qinngaqqunnarsimassanngilaq; uppernerminik ersersitsisimanngitsuuppat immaqa uillarneq alla inisimasitsisutut atorneqarsimassagaluarpoq. Uagutsinnut tunngatillugu aamma taamaappoq — inuunerup aqqutaani assigiinngitsutigut Naalakkap uppernerput misilinneqartittarpaa. Uppernerput ersersikkutsigu pilluaqquneqassaagut; ersersinngikkutsigu pilluaqqussutisiassaq annaassavarput.”

Pisuni aalajangersimasuni misilinneqaraangatta Biibili atuagassiaativullu Biibililersaarutit iluaqutigalugit Guutimit siulersortittariaqarpugut. Taava Jehovamit siulersorneqarnerput naapertorlugu, qanorluunniit akueriuminaatsigigaluarpat, iliuuseqartariaqarpugut. Ussatitsialak una naapertorlugu iliuuseqarutta pilluaqquneqangaassaagut: “Naalagaq tatigiuk uummatikkut iluunngarlutit, namminerlu paasisimasaqassutsit tatigeqinagu! Eqqarsaatigiuartaruk sumiikkaluaraangavilluunniit, taava ingerlavissatit nalimmatsissavai.” — Uss 3:5, 6.

Uillarneq uppernikkut misilinneqaqqinnialeqaaq. Biibilimi ima allassimavoq: “Kingorna arnap illumik piginnittup ernera napparpoq; nappaatini sualungaarmat kiisa anerningerpoq.” Alianartumik pisoqarneranut pissutaasoq paasiniarlugu anaanap aliasuttup Elia ima oqarfigaa: “Guutip kiffaa, sooruna ajortumik pigimma? Maanga pivutit ajortuliakka Guutimut ilisimalersinniarlugit tamatumuunakkullu ernera toqutinniarlugu!” (1 Kng 17:17, 18) Narrutsassimaarluni oqaaserineqartut qanoq paasisariaqaramik?

Arnap ajortuliarisimasani ilerasuutigisani eqqarsaatigaa? Eqqarsarpa ernermi toqunera Guutimit pillaatisiassaasoq, Elialu Guutimit toqunissamik nalunaariartortitaasoq? Tamanna pillugu Biibilimi allassimasoqanngilaq, eqqarsaatigineqartorli unaavoq: Uillarnerup Guuti naapertuilluanngitsuuneranngilaa.

Eliap tupaallaatigisimassavaa uillarnerup ernerata toqunera uillarnermillu pisuutinneqarnini. Elia nukappiaraq qalianukaatereerlugu Jehovamut ima nillerpoq: “Naalagaq Guutiga! Ilumut uillarneq inisimmavigisara ajortumik atugaqartinniarpiuk erneralu toqutillugu?” Arnap inussiarnerlunilu inoroorsaartup suli annerusumik atugarliornissaanik Jehovap akuerinninnermigut atermi kanngunarsarneqarnissaa pruffiitip eqqarsaatigisinnaanngilaaluunniit. Taamaattumik Elia ima kimigiiserpoq: “Naalagaq Guutiga! Qanortoq nukappiaraq anersaartoqqilerniarli!” — 1 Kng 17:20, 21.

Jehova tusarnaarpoq. Uillarneq Jehovap pruffiitianik isumaginnissimallunilu uppernermik ersersitsisimavoq. Guutip qularnanngitsumik nukappiaraq napparsimatiinnarsimassavaa makititsisoqarumaarnera tamatumalu kinguaariikkuutaani neriuuteqalersitsiumaarnera nalunnginnamiuk. Tamanna Biibilimi siullermeerluni toqusunit makititsinertut allaatigineqarpoq. Elia Jehovamut qinoreermat meeraq uummarpoq. Takorlooruk uillarneq qanoq pilluaammertigisimassasoq Eliamit ima oqarfigineqarami: “Takuat, ernerit uumavoq!” Taava uillarneq Eliamut ima akivoq: “Maanna nalujunnaarpara Guutip kiffarigaatit Naalakkallu illit aqqutigalutit oqaasii upperisassaasut.” — 1 Kng 17:22-24.

Kunnginik allakkani siullerni kapitali 17-imi oqaluttuami arnaq taanna allaatigineqaqqinngilaq. Arnarli Jiisusimit maligassaalluartutut oqaatigineqarami inuunermi sinnerani Jehovamut aalajaalluni kiffartorsimassaaq. (Luk 4:25, 26) Uillarneq pillugu oqaluttuamit erserpoq Guutip kiffaminut ajunngitsuliortunik pilluaqqusisarnera. (Matt 25:34-40) Ersersinneqarpoq Guutip imminut aalajaallutik, allaat erloqinartorsiornermi, kiffartortut isumagisarai. (Matt 6:25-34) Oqaluttuamit aamma uppernarsarneqarpoq Jehovap toqusut makitissinnaallugillu makitikkumaarai. (ApS 24:15) Aap, uillarneq Sareptamiu eqqaamanissaanut pissutissaqarluarpugut.