1. Jehovamit pilluaqqussutisiavut suut nuannaarutigisinnaavavut?

JEHOVAP kissaatigaa pilluassasugut taamaasinnaaqqullutalu pilluaqqussutisiarpassuaqartippaatigut. Ilaatigut inuunermik tunivaatigut. Guutip pallorfiginninnermut ilumoortumut kajungilersimmatigut inuunerput taassuminnga unnersiutiginninnermut atorsinnaavarput. (Tuss 144:15; Joh 6:44) Jehovap uagutsinnik asanninnerminik uppernarsaavigalutalu kiffartornitsinni aalajaassinnaaqqulluta ikiorpaatigut. (Jer 31:3; 2 Kor 4:16) Nuannaarutigaarput anersaakkut paratiisimiinnerput, soorlu toqqissisimaneq ataasiussuseqarnerlu, qatanngutigiissuit asaqatigiittut Jehovallu uagutsinnik asanninnerminik eqqaasitsiuarnera. Aamma siunissamut neriuuteqarpugut nuannersumik.

2. Guutip kiffaasa aalajaatsut ilaasa suna akiorpaat?

² Tassa nuannaarutissarpassuaqaraluartoq Guutimut kiffartortut aalajaatsut ilaat imminik pillutik nikallornartunik eqqarsaateqartarput. Immaqa misigipput Jehovap pingaartinngikkaatik kiffartornertilluunniit pingaartinngikkaa. Nikallornartunik eqqarsaateqartuaannartut “ukiorpassuarni” nuannaarluni inuunissaq piviusorsiornerunngitsorisinnaavaat, misigigamik ullut tamarmik ‘taarsiorfiusutut’ ittut. — Oqal 11:8.

3. Misigissutsit nikallornartut sunik pissuteqarsinnaappat?

 ³ Nikallunganeq pakatsinermik, nappaateqarnermik utoqqalinermilluunniit pissuteqarsinnaavoq. (Tuss 71:9; Uss 13:12) Aamma paasisariaqarparput uummaterput ‘tatigisassaanngitsuusoq’ Guutimillu iluarisaagaluaruttaluunniit pisuusutut misigitissinnaagaatigut. (Jer 17:9; 1 Joh 3:20) Diaavulup Guutip kiffai salluliuutigisarpai. Inuillu Saatanitut eqqarsartut isumaqalersinniarsinnaavaatigut Elifazi aalajaanngitsoq eqqortumik oqartoq oqarami inuit Guutimut naleqanngitsuusut. Tamanna Jobip nalaani salluuvoq sulilu ullumikkut salluulluni. — Job 4:18, 19.

4. Allaaserisami matumani suna sammissavarput?

⁴ Biibilimi Jehovap uppernarsaavigaatigut nikallornartunik eqqarsaateqartut najortarini. (Tuss 23:4) Ilaatigut Oqaatsini aqqutigalugu najortarpaatigut. Biibili tassaavoq sakkutut ittoq ‘Guutimit pissatsitaasoq pallittaalisalianik aserorterisinnaasoq’. Tassa imminik pilluta eqqarsaatinik eqqunngitsunik nikallornartunilluunniit allanngortitsisinnaavoq. (2 Kor 10:4, 5) Taamaattumik Biibili iluaqutigalugu qanoq isumalluarnartumik isiginnittaaseqalersinnaanersugut qanorlu taamatut isiginnittaaseqartuarsinnaanersugut sammeriartigu. Tamanna nammineq iluaqutigisinnaallugulu allanik isumalluarsaarinissamut iluaqutigisinnaavat.

5. Isumalluarnartumik isiginnittaaseqarumalluta suna iluaqutigisinnaavarput?

⁵ Apustilip Paulusip isumalluarnartumik isiginnittaaseqalernissamut iluaqutigisinnaasatsinnik allaatigisaqarpoq. Ilagiit Korinthimiittut ima kajumissaarpai: “Immissinnik paasiniaaffiginiaritsi uppernermiinnersusi!” (2 Kor 13:5) ‘Upperneq’ tamatumani pineqartoq tassaavoq ajoqersuutit tunngaviusut tamarmiusut Biibilimi saqqummersinneqartut. Oqaatsivut iliuutsivullu Biibilimi ajoqersuutigineqartunut naapertuuppata taava ‘uppernermiilluta’ ersersissavarput. Soorunami ajoqersuutit sorliit maleruassanerlugit maleruassannginnerlugilluunniit nammineq aalajangersinnaanngilarput. Ajoqersuutit Biibilimeersut tamaasa naalattariaqarpavut. — Jaak 2:10, 11.

6. Sooq ‘uppernermiinnerluta’ imminut paasiniaaffigissaagut? (Allaaserisap aallaqqaataani assiliaq takuuk).

⁶ Ingammik uppernermiinngitsorisoriguit imaassinnaavoq imminut paasiniaaffigerusunngitsutit. Jehovalli uagut pilluta isumaa uagut isumatsinnit pingaaruteqarnerungaarpoq taannami uagutsinnit ilisimasaqangaarneruvoq. (Es 55:8, 9) Pallorfiginnitsini misissuiffigisarpai assuariniarnagit, pissusiili nuannersut takusinnaajumallugit ikiorsinnaajumallugillu. Guutip oqaasia atorlugu ‘uppernermiinnerlutit’ paasiniaaguit illit pillutit Guutip misigissusii paasiartulissavatit. Tamanna iluaqutigisinnaavat naleqanngitsutut misiginaveersaarnissannut matumanngalu eqqaamanninnissamut: Guutip isaani naleqangaartuuvutit. Tamanna eqqaamagutsigu misiginarsinnaavoq soorlulusooq inimi taartumiilluta suna tamaat qaammarlugu saaguertugut.

7. Inuit aalajaatsut Biibilimi oqaluttuarineqarnerat qanoq iluaqutigisinnaavarput?

⁷ Taamatut paasiniaanermi periaasiulluarsinnaavoq inuit aalajaatsut Biibilimi oqaluttuarineqartut maligassaalluarnerannik eqqarsaatiginneqqissaarneq. Pissutsit atugaat misigissusiilu illit atukkannut misigisutsinnillu sanilliukkit eqqarsaatigalugulu illit taakkuusuuguit qanoq iliorsimassagaluarnersutit. ‘Uppernermiinnerlutit’ Biibili atorlugu qanoq qulakkeerisinnaaninnik ersersitsisunik oqaluttuanik pingasunik sammisaqassaagut. Aamma tamanna imminut pillutit isumalluarnartumik isiginnittaaseqalernissannut iluaqutigissavat.

8, 9. (a) Uillarneq piitsoq qanoq atugaqarpa? (b) Eqqarsaatit nikallornartut suut eqqarsaatigisimasinnaavai?

⁸ Jerusalemimi naalaffimmi Jiisusip uillarneq  piitsoq isiginnaarpaa. Pisinnaasavut killeqaraluartut taassuma oqaluttuarineqarnera isumalluarnartumik isiginnittaaseqartuarnissamut iluaqutigisinnaavarput. (Lukasi 21:1-4 atuakkit). Uillarnerup pissutsit atugai eqqarsaatigikkit. Uimi annaanera anniaatigaa. Aamma upperisarsiornikkut siuttut piumatuut uillarnernik ikiuinatik “pigisaannik nunguuttarpaat”. (Luk 20:47) Piitsuungaarami naalaffimmut tunissutigisinnaasatuai sulisartup minutsialunni sulinerminut akissarsiassaatuinnaq naleqarput.

⁹ Takorlooruk uillarneq aningaasamininnguit marluk tigummiarlugit naalaffiup silarlianut iserami qanoq misigisimasinnaasoq. Uini suli uumasimasuuppat tunissutigisinnaasaminut sanilliullugu tunissutimi qanoq nalikitsiginera eqqarsaatigisimassavaa? Inuit allat tunissutaat naleqangaartut takugamigit peqqusiileqilerpa misigaluni tunissutini naleqanngitsut? Taamatut misigisimagaluaruniluunniit pallorfiginninneq ilumoortoq tapersersorlugu sapinngisaminik tunissuteqarpoq.

10. Jiisusip qanoq ersersippaa uillarneq Jehovamut naleqangaartoq?

¹⁰ Jiisusi oqarpoq uillarneq taassumalu tunissutaa Jehovamut naleqangaartut. Oqarpoq uillarneq pisuunit ‘tamanit annerusumik tunisisoq’. Tunissutaa allat tunissutaannut akulerunneqartussaavoq, Jiisusilli uillarneq unnersiutigineqartussaanerarpaa. Naalaffimmi tunissutinik kisitsisut paasinngisaannassavaat aningaasamininnguit taakku marluk uillarnerlu Jehovamut qanoq pingaaruteqartigisut. Pingaaruteqarnerpaarli tassaavoq Guutip isumaa, tassaanatik inuit allat eqqarsaataat uillarnerulluunniit imminut pilluni eqqarsaatai. Oqaluttuaq tamanna uppernermiinnerlutit paasiumallugu iluaqutigisinnaaviuk?

11. Uillarnermik oqaluttuaq qanoq ilinniarfigisinnaavarput?

¹¹ Jehovamut tunniussinnaasatit pissutsinit atukkannit sunnerneqarsinnaapput. Imaassinnaavoq utoqqalineq peqqiilliornerlu pissutigalugit oqaluusserusutsiginertulli oqaluussisinnaangitsutit. Misigissavit piffissaq  oqaluussinermi atukkat annikingaarmat nalunaarutigisariaqarnagu? Aamma inuusuttuugaluaruit peqqissuugaluaruilluunniit misigisimasinnaavutit Guutip innuttaasa pallorfiginninnermi nalunaaquttap-akunnerinik atuisimaneranut sanilliullugu iliuuserisatit suunngitsut. Uillarnermik piitsumik oqaluttuamit paasivarput Jehova pillugu iliuuserisartakkavut suulluunniit, ingammik imaannaanngitsumik atugaqartilluta, taassuma malugalugillu pingaartittarai. Qaammatini kingullerni Jehovamut pallorfiginninnerit eqqarsaatigeriaruk. Nalunaaquttap-akunnerisa kiffartornermi atukkavit ilaanni pilliuteqangaartariaqarsimavit? Taamaappat upperilluinnarsinnaavat nalunaaquttap-akunnerani tamatumani iliuuserisatit Jehovap pingaartikkai. ‘Uppernermiinnerlutit’ uppernarsissavat uillarnerup piitsup ilaarneratigut Jehovamut sapinngisannik iliuuseqaruit.

12-14. (a) Elia qanoq misigiva? (b) Eliap taama misigineranut suut pissutaasimasinnaappat?

¹² Pruffiiti Elia Jehovamut ilumoorfiginnittuullunilu upperluartuuvoq. Taamaakkaluartoq nikallungangaarami inoorusukkunnaarluni Jehovamut ima oqarpoq: “Naalagaq, naammalerpoq! Toqutiinnannga.” (1 Kng 19:4) Taama nikallungatigisimatiginngitsut immaqa isumaqarput Elia ‘isumaatsutut oqaluttoq’. (Job 6:3) Misigissusiili piviusuupput. Malugiullu Jehovap Elia kamaannagu ikioraa.

¹³ Sooq Elia inoorusukkunnaarpa? Taama oqannginnermini Eliap tupinnartuliaanit uppernarsarneqarpoq Jehova tassaasoq Guuti ilumoortoq. Tamatuma kingunerisaanik Ba’alip pruffiitii 450-it toqutaapput. (1 Kng 18:37-40) Eliap neriuutigisimassagunarpaa Guutip innuttai minguitsumik pallorfiginnileqqissasut, taamaaliunngillalli. Dronningip Jezabelip ajortup Elia nalunaarfigaa toqunniarlugu. Eliap toqutaanissani siooragalugu Israelimiit kujammut Juda aqqusaarlugu inoqajuitsuliarpoq. — 1 Kng 19:2-4.

¹⁴ Eliap inoqajuitsumi kisimiitilluni eqqarsaatigilerpaa pruffiitiunini asuliinnaanersoq. Jehovamut ima oqarpoq: ‘Siuaasannit pitsaanerunngilanga.’ Siuaasami toqungasut saarngisut atorfissaqanngitsigisutut misigivoq. Nammineq isummani naapertorlugu imminut paasiniaaffigereerluni isummerpoq iluatsitaqarsimanani aamma Jehovamut allanullu pingaaruteqarnani.

15. Guutip Elia suli pingaartillugu taassumunnga qanoq ersersippaa?

¹⁵ Ajugaqanngitsorli Elia pillugu taama isumaqanngilaq. Elia Jehovamit pingaartinneqartuarpoq, tamatuminngalu paasitinniarlugu Jehova arlalinnik iliuuseqarpoq. Guutip taanna nakussatseqqullugu inngili aallartippaa. Aamma Jehovap Elia ulluni 40-ni qaqqamut Horebimut kujammukarnermini nukissaqalissutigisassaanik nerisassaqartillugulu imigassaqartippaa. Elia misigimmat Israelikkuusunit kisimi Jehovamut aalajaatsuulluni Guutip asannittumik naqqippaa. Aamma malugiuk Jehovap Elia allanik suliassikkaa. Eliap suliassiissutigineqartut akuerai, Jehovamillu ikiorneqarami nukissaqaqqilerluni pruffiititut sulileqqippoq. — 1 Kng 19:5-8, 15-19.

16. Jehovamit qanoq nakussatsinneqarsimavit?

¹⁶ Illit ‘uppernermiinnersutit’ uppernarsiniarlugu isumalluarnartumillu isiginnittaaseqalerniarlutit Eliap misigisai iluaqutigisinnaavatit. Siullermik, Jehovap qanoq annertoqqusersorsimagaatit eqqarsaatigeriaruk. Utoqqaanertamit kristumiumilluunniit inersimalluartumit allamit pisariaqartitsiffinni ikiorneqartarsimavit? (Gal 6:2) Anersaakkut pisariaqartitatit matussuserniarlugit Biibili, Biibililersaarutivut ataatsimiinerillu iluaqutigivigit? Taakkua arlaat iluaqutigigaangakkit kimit ikiorneqarlutit eqqarsaatigisaruk, Jehovamullu qinunikkut qujanissat eqqaamajuk. — Tuss 121:1, 2.

17. Sooq Jehovap kiffani pingaartippai?

 ¹⁷ Aappassaanik, eqqaamassavat isumalluarnanngitsumik isiginnittaaseqarneq nakutitaassutigisinnaagipput. Guutip qanoq isumaqarfigineraatigut pingaarnerpaavoq. (Romamiut 14:4 atuaruk). Jehovap imminut tunniusimanerput aalajaannerpullu pingaartippai qanoq iliuuseqartiginerput apeqqutaatinnagu. Immaqa Eliatut nammineq sianiginagu Jehovamut iliuuseqarnerusimavutit. Immaqa ilagiinniittunik sianiginagu ikiuisimavutit. Illillu oqaluussinerit pissutigalugu inuit allat sallusuissut tusarsimasinnaavaat.

18. Jehovamit suliassinneqarnerit sumut uppernarsaataava?

¹⁸ Kiisalu, Jehovamit ilinnut suliassiissutigineqartut tamarmik taassuma ilinnik iluarinninneranik uppernarsaatitut isigiguk. (Jer 20:11) Eliatut nikallorsinnaavutit Jehovamut kiffartornerit iluatsippasinngippat anguniakkatilluunniit anguneqarsinnaanngitsutut ippata. Maannakkut arlatta kialuunniit immikkut pisinnaatitaaffigisinnaasaa annerpaaq pisinnaatitaaffigaat. Tassa nutaarsiassamik nuannersumik oqaluussissutiginninneq aamma Jehovap Nalunaajaasuisa ilaattut taaneqarsinnaaneq. Taamaattumik Jehovamut aalajaattuarit. Taava Jiisusip oqarneratut ‘naalakkavit tipaatsuffianut isersinnaassaatit’. — Matt 25:23.

19. Tussiaat 102-mik tussiaasiortoq qanoq misigiva?

¹⁹ Tussiaat 102-mik tussiaasiortoq nikallungarujussuarpoq. Timikkut misigissutsikkullu anniaateqangaarluni aarlerivoq. Aamma ‘sanngiilliorpoq’, tassa ajornartorsiutimi anigornissaanut nukissaqanngilaq. (Tuss 102:1) Anniaatini, kiserliornini misigissutsinilu kisiisa eqqarsaatigisinnaavai. (Tuss 102:4, 5, 7, 12) Isumaqarpoq Jehovap ‘igikkusukkaani’. — Tuss 102:11.

20. Nikallornartunik eqqarsaatinik akiuisut qinuneq qanoq iluaqutigisinnaavaat?

²⁰ Taamaakkaluartoq tussiaasiortup suli Jehova unnersiutigisinnaavaa. (Tussiaat 102:20-22 atuakkit). Tussiaat 102-mit erserpoq ‘uppernermiikkaluartulluunniit’ anniaateqarsinnaasut tamannalu eqqarsaatiginermik allamik eqqarsaateqarsinnaanngitsut. ‘Timmissatut illup qaani mitsimasutut kiserliortutut’ tussiaasiortoq misigivoq, soorlulusooq ajornartorsiutini kisimeeqatigalugit. (Tuss 102:8) Taamatut misigissagaluaruit tussiaasiortup iliorneratut uummammiutit Jehovamut aniatikkit. Nikallornartunik eqqarsaateqarninnik akiuinissamut qinuneq iluaqutigissavat. Jehova neriorsuivoq ‘tamaqanngitsut qinnutaat qiviassallugit, qinnutaat sumiginnassannagit’. (Tuss 102:18) Neriorsuut tamanna tutsuigiuk.

21. Misigissutsinik nikallornartunik akiugaqartut qanoq isumalluarnartumik isiginnittaaseqarnerulersinnaappat?

²¹ Tussiaat 102-mit aamma erserpoq isumalluarnartumik qanoq isiginnittaaseqarnerulertoqarsinnaasoq. Tussiaasiortup eqqarsaatini Jehovamik ikinnguteqarnerminut sangutippai. (Tuss 102:13, 28b) Jehovap innuttani annikillioraangata pinertusaarsinnaaqqullugit ikiortuarai ilisimagamiuk tuppallersaatigaa. Guutimut kiffartorninni iliuuseqarusutsiginittut iliuuseqarsinnaanngikkallaruit tamanna qinnutinnut ilannguguk. Guuti qinnuigiuk qinnutit tusaqqullugu ajornartorsiorninni oqiliallatsitsinissaq piinnarnagu aammali ‘Naalakkap [Jehovap] aqqata tusarliunneqarnissaa’ pillugu. — Tuss 102:21, 22.

22. Tamatta immikkut Jehovamit qanoq iluarisaasinnaavugut?

²² Ilumut, Biibili iluaqutigalugu ‘uppernermiittugut’ Jehovamillu pingaartinneqartugut uppernarsisinnaavarput. Ilumoorpoq Saatanip silarsuaani misigissutsit nikallornartut tujorminerlu pinngitsuuvissinnaanngikkivut. Tamattali Jehovamit iluarisaasinnaavugut naassaanngitsumillu inuusinnaalluta taassumunnga kiffartornermi aalajaakkutta. — Matt 24:13.