1. Oqaluussinermi inunnik pinnittarnerput pingaaruteqarpa? Assersuuteqarit. (Allaaserisap aallaqqaataani assiliaq takuuk).

FIJIMI aappariit Jiisusip toquneranik eqqaaniaanissamut qaaqqusinerminni arnaq taassuma angerlarsimaffiata silataani oqaloqatigaat. Siallilermat uiusup sialussiutini siaartartoq arnamut atukkiullugu nammineq nulianilu sialussiut ataaseq atorpaat. Aappariit nuannaarutigeqaat arnaq eqqaaniaanermut najuuttoq takullugu. Taannalu kingusinnerusukkut oqaluttuarpoq aappariit oqaasiinik eqqaamasaqarpallaarani, inussiarnisaarfigineqarninili killitsissutigalugu eqqaaniaanissamut najuukkusulerluni. Aappariit Jiisusip siunnersuutaa maleruarlugu inussiarnersuullutillu innimittartuupput.

2. Allanik pinnittarneq pillugu Jiisusi qanoq siunnersuuteqarpa, tamannalu qanoq maleruarsinnaavarput?

² Jiisusip allanik ima pinnittaqquaatigut: “Inunnut qanorluunniit iliorfigeqqugussi ilississaaq taamatut iliorfigisigit.” (Matt 7:12) Qanoq taamaaliorsinnaavugut? Siullermik imminut ima aperigit: “Uanga taannaasuuguma qanoq pineqarusussagaluarpunga?”  Taava sapinngisat tamaat inuk taanna taamatut pissuseqarfigiuk. — 1 Kor 10:24.

3, 4. (a) Nassuiaruk sooq kikkut tamaasa pissuseriffigissanerivut. (b) Allaaserisami matumani suut sammissavavut?

³ Qanoq pissuseqartarnissaq pillugu Jiisusip oqaasii ilagiinniinnaq maleruarneqassappat? Naagga, tamatumani kikkunnik tamanik, ilaatigut akeqqatsinnik, qanoq pinnittarnissarput pivaa. (Lukasi 6:27, 28, 31, 35 atuakkit). Akeqqatsinnut pissuserissuussagutta oqaluussiffigisatsinnut tusaarusuttunut, ‘inuuneq naassaanngitsoq’ pillugu eqqortumik isiginnittaaseqartunut, pissuserinnerungaartariaqarpugut. — ApS 13:48.

⁴ Maanna sammissavavut apeqqutit sisamat oqaluussigaangatta eqqumaffigisassavut. Kina oqaluuppara? Sumi oqaluuppara? Qaqugukkut piffissaalluarnerusarpa? Qanoq oqaluutissavara? Apeqqutit taakku iluaqutigalugit inuit qanoq pineqarusuttarnersut pitsaanerpaamillu qanoq saaffigissanerivut paasisinnaavarput. — 1 Kor 9:19-23.

5. Imminut qanoq aperisinnaavugut?

⁵ Inuit oqaluussinermi naapitavut tamarmik kinaassusiliupput immikkut tunuliaqutaqarlutillu ajornartorsiutillit. (2 Nal 6:29) Oqaloqateqaraangavit oqaloqatigisat pillugu imminut ima aperisarsinnaavutit: ‘Taannaasuuguma qanoq pineqarusussagaluarpunga? Suli ilisarisimalernanga kukkusumik isummerfigippanga iluarissagaluarpara? Iluarinerussagaluarparaluunniit ilisarisimanerulerniarpanga?’ Apeqqutit taakku iluaqutigalugit inuit tamaasa immikkut pissuseriffigisinnaavavut.

6, 7. Oqaluussinermi naapitarput kamappasippat sorraappasippalluunniit sussaagut?

⁶ Assersuutigalugu kristumiut sapinngisartik tamaat ‘inussiarnersumik oqaluttarnissamik’ Biibili siunnersuut maleruarniartarpaat. (Kol 4:6) Naammalluinnanngitsuuvugulli. Immaqa ullulukkatta peqqissimissutigisatsinnik oqaaseqarpugut. (Jaak 3:2) Inussiarniiffigisaqarsimagutta sorraatsutut innimiitsutulluunniit nalilerneqarusunngilagut. Neriuppugut taama pissuseqarfigisarput paasinnittuussasoq. Taamaammat uaguttaaq inunnik allanik paasinnittuusariaqarpugut.

⁷ Sorraappasittumik naapitaqaruit sorraatsutut nalilerniapallassanngilat. Suliffimmi atuarfimmiluunniit tatineqarsimasinnaava? Perulunnartumik peqqiilliuteqarpa? Inuppassuit qisuariapiloqqaartut nalunaajaasunit inussiarnersumik ataqqinnittumillu pineqaraangamik amerlanertigut sallaallisarput. — Uss 15:1; 1 Petr 3:15, 16.

8. Sooq Guutip naalagaaffianik tusarliussaq inunnut tamalaanut oqaluussissutigissavarput?

⁸ Inuit tamalaat oqaluussiffigisarpavut. Ukiualunni kingullerni misigisalikkersaarutit “Biibili inuit inuunerannik allannguisitsisarpoq” 60-init amerlanerusut ilaat kalaallisuunngortitaasut Napasuliaq Alapernaarsuiffik-mi oqaluttuarineqarput. Allaaserisani taakkunani inuit tillinniaasimasut, imerajuttuusimasut, inupiluusimasut ikiaroortarsimasulluunniit oqaluttuarineqarput. Allat polikeriusimapput, upperisarsiornikkut siuttuusimapput suliffimminnilluunniit pingaartitsivallaarsimallutik. Sulilu allat kinguaassiuutitigut inuunerluttuusimapput. Tamarmilli nutaarsiassaq nuannersoq tusaramikku Biibilimik atuaqqissaaqatigineqartalerput inuunerminnillu allannguillutik nalunaajaasunngorlutik. Taamaattumik  isumaqassanngilagut inuit taamaattut Guutip naalagaaffianik tusarliussamik ilassinnissinnaanngitsut. (1 Korinthimiut 6:9-11 atuakkit). ‘Kikkut tamarmik’ sallusuissummik paasinnissinnaapput. — 1 Kor 9:22.

9. Sooq oqaluussiffigisatta angerlarsimaffiat innimigisassavarput?

⁹ Amerlanertigut inuit angerlarsimaffianni oqaluussiffigisarpavut. (Matt 10:11-13) Angerlarsimaffipput uagutsinnut pingaaruteqarpoq, taamaattumik angerlarsimaffipput pigisavullu allanit innimigineqaraangata iluarisarparput. Kissaatigaarput angerlarsimaffipput isumannaatsuullunilu eqqissisimaarfiussasoq. Taamaattumik oqaluussiffigisatta angerlarsimaffiat innimigisassavarput. — ApS 20:20.

10. Inuit qanoq naleqqutinngitsumik akornusersornaveersaarsinnaavavut?

¹⁰ Ullumikkut silarsuarmi pinerluffiungaartumi takornartat amerlasuunit pasipilunneqartarput. (2 Tim 3:1-5) Pasipilunneqalissutigisinnaasatsinnik iliuuseqassanngilagut. Assersuutigalugu oqaluussitillutit kasuttorfigisanni mappiunneqanngikkuit immaqa ilummut itsuarusupputit illulluunniit illuatungaanut inussarsiorusullutit. Taamaaliornerit kasuttorfigisappit eqqissiunnaarutigissavaa? Sanilii qanoq eqqarsassappat? Imaassinnaavoq inuit amerlanerpaat naapinniarlugit taamaaliortutit. (ApS 10:42) Guutimi pillugu sallusuissut inunnut tusarliukkusungaarpat. (Rom 1:14, 15) Inuilli oqaluussiffigisartakkatsinniittut naleqqutinngitsumik akornusersornaveersaarutsigit silatusaassaagut. Apustili Paulusi ima allappoq: “Sumilluunniit naakkiuffissiiniartanngilagut kiffartuutigisarput tusaamanerlunneqaleqqunagu.” (2 Kor 6:3) Inuit oqaluussiffigisartakkatsinniittut immaqa sallusuissummut kajungilissapput angerlarsimaffiat pigisaallu innimigigutsigit. — 1 Petrusi 2:12 atuaruk.

11. Sooq ulapputeqarnerput pillugu allat innimisunnerat iluarisarparput?

¹¹ Amerlanersavut ulapittuupput. Pisassavut tamaasa angumeriumallugit pilersaarusiortariaqartarpugut. (Ef 5:16; Fil 1:10) Pilersaarutitsitut iliorsinnaanngikkaangatta nukillalaartarpugut. Taamaattumik piffissaqarpallaannginnerput pillugu inuit allat paasinninnerat iluarisarparput. Oqaluussiffigisatsinnut innimisuttuunissamut Matthæusi 7:12-imi Jiisusip siunnersuutaa qanoq iluaqutigisinnaavarput?

12. Oqaluussinissamut qaqugukkut piffissaalluarnerunersoq qanoq paasisinnaavarput?

¹² Inuit oqaloqatiginissaannut qaqugukkut piffissaalluarnerpaasarpa? Imminut ima aperigit: ‘Oqaluussiffigisartakkanni inuit qaqugukkut angerlarsimanerusarpat? Qaqugukkut tusarnaarnissamut piffissaqassappat?’ Taakkua piffissaqarnerat naapertorlugu pilersaarusiorutta pitsaassaaq. Silarsuup ilaani ualilluarnerani unnulaannguakkulluunniit illumiit illumut oqaluussigaanni pitsaanerusarpoq. Illit najukkanni taamaappat ullup taamaalinerani oqaluussisinnaavit? (1 Korinthimiut 10:24 atuaruk). Oqaluussiffigisatsinnut piffissaalluarnerusukkut oqaluussiniarluta pilliuteqarnivut Jehovap pilluaqqussavai.

13. Oqaluussiffigisarput qanoq innimittarfigisinnaavarput?

¹³ Aamma sutigut allatigut innimittartuusinnaavugut? Tusarusuttoqaraangat nalunaajaalluartassaagut, sivisunaarinatali.  Oqaloqatigisarput allamik pingaarutilimmik pilersaaruteqarsimasinnaavoq. Oqarpat ulapilluni aperisinnaavugut sivikitsunnguamik piffissaqarnersoq. Angerpat sivikitsunnguamik oqaloqatigissavarput. (Matt 5:37) Naggataatigut pitsaassaaq aperigukku qaqugu pulaaqqikkukku pitsaanerussanersoq. Oqaluussisartut ilaat ima oqartarput: “Takoqqinnissat qilanaaraara. Aggertinnanga sianeruma sms-erumaluunniit pitsaanerussava?” Inuit ulapinnerannut namminnerlu pilersaaruteqarnerannut tunngatillugit innimittartuugutta Paulusip maligassiaa malissavarput. Taassuma imminut ‘pitsaanerpaasussamik pinnani, amerlasuunut iluaqutaasoq noqqaassutigaa, annaanneqaqqullugit’. — 1 Kor 10:33.

14-16. (a) Sooq oqaluutarput suniarnitsinnik erseqqissumik oqaluttuutissavarput? Assersuuteqarit. (b) Nakkutilliisoq angalasartoq sunniuteqarluartumik qanoq aallarniisarsimava?

¹⁴ Takorlooruk sianerfigitillutit, sianertulli nipaa ilisarinngilat. Ilisarisimanngikkaluarlutit nerisartakkatit pillugit apersorpaatit. Kiunersoq sunarpiarlu anguniarneraa eqqarsaatigaat. Inussiarniitsoorusunnak oqaluutilaariarlugu soqutiginninnak oqarputit. Maanna takorlooruk sianertoq ingerlaannaq imminut ilisariteriarluni oqartoq inuussutissanut peqqinnartunut tunngasunik suliaqartuulluni. Inussiarnersumik oqaluttuuppaatit iluaqutigisinnaasannik paasissutissaateqarluni. Taanna tusarnaarusussagunarpat. Aap,  uagutsinnut oqaluttut kinaassutsiminnik isertuussinngikkaangata iluarisarparput. Uagummi oqaluutatsinnut qanoq innimittartuusinnaavugut?

¹⁵ Angalaarfigisartakkat ilarpassuini kasuttorfigisatsinnut erseqqissaasariaqartarpugut suniarnerluta. Ilumoorpoq taassuma pisariaqartitaanik pingaarutilimmik paasissutissaateqartugut. Takorloorulli kiunerput suniarnerpullu oqaatiginagit aallarniutigalugu ima aperiinnartugut: “Silarsuarmi ajornartorsiummik aaqqiisinnaasuuguit sorleq aaqqissagaluarpiuk?” Biibilimut innersuussisinnaaniassagatta inuup eqqarsaatai paasiniarlugit aperisarpugut. Aperisarpulli ima eqqarsarsinnaavoq: ‘Kinaana? Sooq taama aperiva? Sunaana pigaa?’ Oqaloqatigiinniassagatta qasukkartikkusupparput. (Fil 2:3, 4) Tamanna qanoq angusinnaavarput?

¹⁶ Nakkutilliisoq angalasartoq imaaliorluni angusaqarluartarpoq: Ilasseriarlugu naqitaaraq Sallusuissut paaserusuppiuk? tunniuttarpaa imalu oqarluni: “Ullumikkut una agguaapparput. Aana illit pissat. Tassani apeqqutigineqarajuttut arfinillit sammineqarput.” Qatanngut taanna oqarpoq inuit amerlanersaasa paasigaangamikku sooq kasuttornersugut qasukkartartut oqaloqatikkuminarsisartullu. Taava qatanngut ima aperisarpoq: “Apeqqutit ukua arlaat eqqarsaatiginikuuiuk?” Aperisaq taakkua arlaannik toqqaagaangat qatanngutip naqitaaraq qupperiarlugu apeqqut toqqagaa pillugu Biibilimi qanoq allassimasoqarnersoq oqaluttuarisarpaa. Toqqaanngikkaangat taanna peqqusiileqitinnaveersarlugu qatanngutip apeqqutit taakkua arlaat sammisarpaa. Soorunami aallarneeriaatsit assigiinngissinnaapput. Assersuutigalugu sumiiffiit ilaanni suniarnerluta oqaatigitinnagu ilassinnipallaannarneq naammanneq ajorpoq. Aallarniutitta inuit qanoq pineqarusunnerannut naleqqussarnissaa pingaaruteqarpoq.

17. Allanik pinnittarneq pillugu sammeriikkavut oqaluttuarikkit.

¹⁷ Allanik pinnittarneq pillugu Jiisusip oqaasii qanoq maleruarsinnaavavut? Inuit tamaasa immikkut kinaassusilittut pissavavut. Kasuttorfigisatta angerlarsimaffiat pigisaalu innimigissavavut. Inuit angerlarsimaneranni tusarnaarnissaminnullu piffissaqarneranni oqaluussiniartarpugut. Aallarniuterput naleqqussartarparput inuit tusartikkusukkatsigit.

18. Sooq oqaluussinermi uagut pineqarusunnitsitut allat pigutsigit iluaqutaassava?

¹⁸ Inuit oqaluussiffigisavut inussiarnisaarfigigutsigit qanorlu misiginersut eqqarsaatigigutsigu ersersissavarput najoqqutassiat Biibilimeersut maleruarlutigit, tamannalu Ataatatsinnut qilammiusumut ataqqinaataassaaq. (Matt 5:16) Inuit amerlanersaasa innimittartumik pineqarunik sallusuissut kajungerilersinnaavaat. (1 Tim 4:16) Inuit Guutip naalagaaffianik tusarliussaq qanorluunniit qisuariarfigigaluarpassuk nalunngilarput sapinngisatsinnik pitsaanerpaamik oqaluussilluta. (2 Tim 4:5) Apustili Paulusi allappoq inunnik annaassaqarumalluni sunik tamanik iliuuseqartarluni, qanortoq taanna ilaartigu! (1 Kor 9:22, 23) Taamaattumik inunnut qanorluunniit iliorfigeqqugutta uaguttaaq taamatut iliorfigitigit.