1. Israelikkut tunussisunngormata Guutip peqatigiissortat sorliit innuttamisut toqqarpai? (Allaaserisap aallaqqaataani assiliaq takuuk).

ULLUMIKKUT Jehova innuttaminit nunarsuarmiittunit iluarisamisut kiffartorfigineqarpoq. Itsaq Israelikkut Guutip innuttaatut toqqarneqarsimapput. Tunussisunngormatali Jehovap Kristusimut ajoqersukkat inuianngortillugillu peqatigiissortanngortippai imminerminut sinniisuusut. Ukiumi 70-imi Jerusalemi suujunnaarsinneqaraluartoq peqatigiissortat taakku suujunnaarsinneqanngillat. (Luk 21:20, 21) Ulluni kingullerni inuiaat nutaat taakku Jehovamut sinniisuunissamut aaqqissuussaapput. Saatanip silarsuaa inaarutaasumik peerneqarpat suujunnaarsitaanavianngillat. (2 Tim 3:1) Sooq tamanna qularinngilluinnarsinnaavarput?

2. ‘Naalliunnartussarsuaq’ pillugu Jiisusi qanoq oqarpa, qaqugulu aallartissava?

² Jiisusi ullut kingulliit pillugit ima siulittuivoq: “Naalliunnartoqangaassaaq silarsuup pileqqaarneraniit maannamut asseqanngitsumik nalliuteqqinngisaannassasumillu.” (Matt 24:3, 21) Jehovap “Babylonersuaq”, upperisarsiornerup eqqunngitsup silarsuarmi tamarmi naalagaaffissua, inuit naalakkersuisui atorlugit suujunnaarsippagu naalliunnartussarsuaq  taanna aallartissaaq. (Saqq 17:3-5, 16) Tamatuma kingorna susoqassava?

3. Upperisarsiorneq eqqunngitsoq suujunnaarsinneqareerpat Jehovap innuttai suneqassappat?

³ Upperisarsiorneq eqqunngitsoq suujunnaarsinneqareerpat Jehovap Nalunaajaasui nunarsuarmi upperisarsiornikkut peqatigiissortatuaalissapput. Taava Saatani taassumalu silarsuaa Guutip kiffaanik saassussissapput. Jehovap innuttai eqqissisimasut illersortissaqarpasissanngillat. ‘Gogi Magogimi nunaqartoq’ Biibilimi ima allaatigineqarpoq: “Silapiluttut nuissatullu majortutut illutit nuna illit sakkutoorpassuit inuiappassuillu ilagisavit tamakkissavarsi.” Saassussinerli tamanna kukkorujussuarnerussaaq! — Ez 38:1, 2, 9-12.

4, 5. Jehova innuttani saassunneqarpata sussava?

⁴ Jehovap innuttami Saatanimit taassumalu malinnittaanit saassunneqarnerat namminerminut saassussinertut isigissavaa. (Zakaria 2:12 atuaruk). Qanormi iliussava? Qilammi nunarsuarmilu Kisimi Oqartussaasoq ingerlaannaq aniguisitsiartussaaq. Innuttami suujunnaarsinneqarnissaat akuerinavianngilaa. Taamanikkussamut Jehovap sorsunneq Harmagedoni aallartissallugulu Saatanip silarsuaa suujunnaarsilluinnassavaa. — Saqq 16:14, 16.

⁵ Harmagedonimut tunngatillugu Biibilimi ima siulittuuteqarpoq: “Naalakkap inuiaat [saqitsaatissavai], inuit tamaasa eqqartuussisunut [sassartitassanngortissavai]; guutiitsullu panamut tunniutissavaat, oqarpoq Naalagaq. Ima oqarpoq Katersaarsuit Naalagaat: Ajunaarneq pilerumaarpoq inuiannit inuiannut, anorersuaq pitorarumaarpoq nunarsuup isorlersaanit. Naalakkap toqutitai ullussami tassani uppigarsimassapput nunarsuarmi tamarmi; upputigineqassanngillat katersorneqaratillu ilineqaratillu; nunamut naggorissaatissanngussapput.” (Jer 25:31-33) Saatanip silarsuaata naggatissaa Harmagedonimi nalliutissaaq. Jehovalli peqatigiissortai suujunnaarsinneqassanngillat.

6, 7. (a) ‘Inuppassuit amerlangaartut’ suminngaanneerpat? (b) Ukiuni kingullerni sutigut amerliartortoqarsimava?

⁶ Ullumikkut Guutip peqatigiissortaasa ilaat nunarsuarmiittoq inunnik Guutimit iluarisaasuinnarnik ilaasoqarnera pissutigalugu ineriartortuarpoq. Biibilimi ima allassimavoq: “[Naalakkap] isaasa sammivigaat iluartut, ikioqqullutik nillianerat siutaasa tusartarpaat.” (1 Petr 3:12) “Iluartut” taakku ‘inuppassuarnut amerlangaartunut’, ‘annikilliortitaangaarnermit aniguisussanut’, ilaapput. (Saqq 7:9, 14) Inuppassuit amerlangaartut annikilliornartussarsuarmit anigueqatigigukkit qanoq misigissanerlutit takorlooruk!

⁷ Inuit inuiannit tamaneersut inuppassuarnut amerlangaartunut ilaapput. Taakkua Jiisusip najuunnissaanut ilisarnaataasut ilaat katersuussutigaat. Jiisusi ima oqarpoq: “[Naalagaaffimmik] iivangkiiliu taanna silarsuarmi tamarmi oqaluussissutigineqassaaq inuiannut tamanut nalujunnaarsillugu, taavalu naggatissaq nalliutissaaq.” (Matt 24:14) Taamaattumik Guutip innuttaasa taassuma naalagaaffia pillugu nutaarsiassamik nuannersumik oqaluussineq pingaarnertut suliassaraat. Tamatuma kingunerisaanik inuit millionillit “anersaakkut ilumoornikkullu” Jehovamik pallorfiginnipput. (Joh 4:23, 24) Assersuutigalugu 2003-miit 2012-imut inuit 2.707.000-init amerlanerusut Jehovamut tunniulluinnarnertik kuisinnikkut  ersersippaat. Ullumikkut nalunaajaasut 7.900.000-init amerlanerupput, ukiullu tamaasa Kristusip toquneranik eqqaaniaalluni nalliuttorsiornermi millionilikkuutaat najuuttarput. Inuppassuit amerlangaartut Jehovamit amerliartupiloortinneqarnerat nuannaarutigaarput. — 1 Kor 3:5-7.

8. Sooq Jehovap peqatigiissortaanut ilaasut taama amerliartortigippat?

⁸ Jehovap nalunaajaasut imminerminut sinniisussatut toqqagai amerliartupiloorput. (Esaja 43:10-12 atuakkit). Amerliartortussaanerat ima siulittuutigineqarpoq: “Minnersaat tuusintilinngussaaq nukarlersaallu tassaalissalluni inuiaat pissaasut. Uanga tassa Naalagaq; piffissanngorpat pilertortumik tamanna naammassissavara.” (Es 60:22) Tanitat sinneruttut, ‘Israelimik Guutip pigisaanik’ taaneqartut, ‘minnersatut’ ikkaluartut oqaluussinermi sulinerminni Jehovamit pilluaqquneqarput. Taakkua amerliartornerat ilutigalugu tanitat Guutip peqatigiissortaanut ilannguttut amerliartuinnarput. (Gal 6:16) Ukiut ingerlaneranni aamma inuit millionillit nunarsuarmi inuunissamik neriugisallit sallusuissummik ilassinnittarput.

9. Guutip nuannersumik neriuutissiinera iluaqutigiumallugu susariaqarpugut?

⁹ Jehovap tamatta, tanitaanersugut inuppassuarnulluunniit amerlangaartunut ilaanersugut apeqqutaatinnagu, nuannersumik neriuutissippaatigut. Neriorsuut tamanna iluaqutigiumallugu taassuma peqqussutaanut naalattaqariaqarpugut. (Es 48:17, 18) Assersuutigalugu Jehovap Israelikkut inatsisiminut naalannissaat piumasaraa. Israelikkut inatsisit iluaqutigalugit illersorneqarlutillu ilaqutariittut pilluarnissaq, ajunngitsunik ikinnguteqarnissaq, unneqqarissumik niueqatigiittarnissaq allanullu inussiarnertarnissaq pillugit ilinniartinneqarput. (2 Mos 20:14; 3 Mos 19:18, 35-37; 5 Mos 6:6-9) Ullumikkut uaguttaaq Guutip peqqussutai illersuutigalugillu iluaqutigaavut. Peqqussutaasa naalannissaat artornanngilaq. (1 Johannesi 5:3 atuaruk). Naalakkaangatsigit pilluarnerulertarpugut, pingaarnerusutullu ‘uppernikkut peqqissuulertarpugut’. — Tit 1:13.

10. Sooq ilaqutariittut atuaqqissaaqatigiittarnissarput ullullu tamaasa Biibilimik atuartarnissarput pingaaruteqarpat?

¹⁰ Guutip peqatigiissortaasa ilaat nunarsuarmiittoq amerlasuutigut siumukartuarpoq. Tamatuma sallusuissutinik Biibilimeersunik ersarinnerusumik paasinnittaaseqalernissatsinnut ikiortarpaatigut. Tamannarpiaq Biibilimi ima siulittuutigineqarpoq: “Iluartup aqqusininnguata assigaa ullaap qaammalernera qaammarissiartortoq ulloqeqqaaneratut qaamatigilerserluni.” (Uss 4:18) Tamattali imminut ima aperisariaqarpugut: ‘Allassimaffiit aalajangersimasut pillugit qanittukkut paasinnittaatsitsinnik allannguinerit eqqumaffigaakka? Ullut tamaasa Biibilimik atuartarpunga? Saqqummersinneqartut tamaasa atuarnissaannut piumassuseqarpunga? Sapaatit-akunneri tamaasa ilaqutariittut atuaqqissaaqatigiittarpugut?’ Tamakku sapernartuunngikkaluartut piffissaqarfiginiarlugit pilersaarusiortariaqarpugut. Guutip oqaasiata atuaqqissaartuarnissaa, maleruarnissaa taassumalu peqatigiissortaata siumukaqatiginissaa uagutsinnut pingaaruteqarluinnarput. Annikilliornartussarsuup qanittuararsuunera pissutigalugu taamaaliornissarput ingammik maanna pingaaruteqarluinnarpoq!

11. Sooq Jehovap innuttai ataatsimiittarlutillu ataatsimeersuartarpat?

¹¹ Apustilip Paulusip siunnersuutaata  uuma maleruarnissaanut Jehovap peqatigiissortaanit kajumissaarneqarpugut: “Immitsinnut isumageqatigiinniarta asaqatigiinnermut ajunngitsuliornermullu kajumissaaqatigiittarluta, ilagiittut katisimasarnivut tamatigut peqataanngitsoorfigisarnatigit, soorlu ilaat taama ileqqoqartut, oqaaqqissaaqatigiittarniartali taamaaliornissaq suli pisariaqarnerulermat nalunnginnassiuk ullussaq qanillisoq.” (Hebr 10:24, 25) Itsaq Israelikkut ukiumoortumik nalliuttorsiornerit pallorfiginninniarlutillu katersuunnerit anersaakkut ineriartuutigisarpaat. Nehemiap nalaani tupiusaliorfimmik nalliussineq taakkua nuannaarlutik katersuunnerisa ilagaat. (2 Mos 23:15, 16; Neh 8:9-18) Ullumikkut aamma ataatsimiittarlutalu ataatsimeersuartarpugut. Taakku Jehovamut qanittuarnissatsinnut taassumunngalu kiffartornitsinni pilluartuarnissatsinnut iluaqutigisaratsigit najuuffiginiartuartariaqarpavut. — Tit 2:2.

12. Oqaluusseqataanitsinnut qanoq isiginnittaaseqartariaqarpugut?

¹² Jehovap peqatigiissortaanut ilaagatta ‘nutaarsiassaq nuannersoq Guutip pia pillugu suliassamik illernartumik’ oqaluusseqataanerput nuannaarutigaarput. (Rom 15:16, NW) Oqaluussigaangatta Jehova ‘Illernartuusoq’ suleqatigisarparput. (1 Petr 1:15; 1 Kor 3:9) Jehovap aqqa illernartoq aamma ataqqinaatigaarput. ‘Guutimi pilluartumi naalannassusermik iivangkiiliumik’ oqaluussissutiginninneq immikkut pisinnaatitaaffigaarput. — 1 Tim 1:11.

13. Anersaakkut peqqissuunissatsinnut suna aalajangiisuua?

¹³ Guutip namminerminut attaveqarluarnitsigut taassumalu peqatigiissortaanik tapersersuinitsigut anersaakkut peqqissuujuarnissarput kissaatigaa. Mosesi Israelikkunnut ima oqarpoq: “Ullumi qilak nunalu ilisimannittoralugit ilissinnut saqqummiuppakka inuuneq toqulu, pilluaqqussut perloqqussullu. Inuuneq qinerniaruk illit kinguaassatillu inuuginnaqqullusi! Naalagaq Guutit asassavat naalassallugulu attavigittuinnarlugulu! Taava inuuginnassaatit sivisuumillu inuussallutit najugaqarlutit nunami Naalakkap siuaasannut Aaperaamut Iisaamullu Jaakumullu tunniukkumallugu neriorsuutigisimasaani.” (5 Mos 30:19, 20) Inuuneq qineruk. Jehova asallugulu taanna taassumalu peqatigiissortai ilumoorfigiuakkit.

14. Qatanngut angut Guutip peqatigiissortaanut qanoq isiginnittaaseqarpa?

¹⁴ Qatanngut Pryce Hughes, 1914 sioqqullugu sallusuissummik paasinnittoq, Jehovamut taassumalu peqatigiissortaanut inuunini tamaat ilumoortuartoq ima oqarpoq: “Jehovap peqatigiissortaanut takussaasumut qanittuarniarneq pingaarnerpaatittuarsimavara. Sallusuissut malillugu inuulerama paasivara inuit eqqarsartaasiannik tatiginninneq silatusaarnerunngitsoq. Taamaattumik aalajangerpunga peqatigiissortamut aalajaatsumut ilumoortuarniarlunga. Taamaaliornikkuinnaq Jehovamit iluarisaasoqarsinnaallunilu pilluaqqusaasoqarsinnaavoq!”

15. Paasinnittaatsitsinnik allannguisoqaraangat qanoq periartarnissarput pillugu Biibilimi oqaluttuaq suna ilinniarfigisinnaavarput?

¹⁵ Jehovap peqatigiissortaminik tapersersuinissarput sallusuissutinillu Biibilimeersunik paasinnittaatsitsinnik oqaluusseriaatsitsinnillu naleqqussaanissatsinnik akuersinissarput kissaatigaa. Ukiuni hundredini siullerni kristumiut juutiusut Mosesip inatsisaanik maleruaarusupput. (ApS 21:17-20) Paulusilli naqqillugillu Jiisusip pilliutigineqarneratigut, uumasut  pilliutigineqarnerisiguunngitsoq, ajortitsinnik isumakkeerfigineqarsinnaanermik paasinnissinnaaqqullugit ikiorpai. (Hebr 10:5-10) Kristumiut juutiusut amerlasuut taakku Paulusip siunnersuutaa maleruarlugulu eqqarsartaatsiminnik allannguipput. Taakkua maligassiuilluarnerat pingaarutilimmik ilinniarfigisinnaavarput. Biibilimik saqqummersittakkatsinnillu atuaqqissaartariaqarlutalu Jehovap peqatigiissortaani allannguinerit maniguulluta akuerisariaqarpavut.

16. (a) Sooq paratiisimi inuuneq nuannersuussava? (b) Silarsuassami nutaami suna qilanaaraajuk?

¹⁶ Jehovamut taassumalu peqatigiissortaanut ilumoortuartut pilluaqquneqassapput. Tanitat Jiisusi Kristusi qilammi kunngitut naalakkersueqatigissavaat. (Rom 8:16, 17) Nunarsuarmi inuunissamik neriugisallit paratiisimi naassaanngitsumik inuunissartik qilanaaraat. Nunarsuaq tamakkerlugu Jehovap innuttai neriuutip tamatuma allanut oqaluttuarinissaanut periarfissatsialassuaqarput. (2 Petr 3:13) “Qanilaartut nuna kingornutissavaat pilluangaarnertillu nuannaarutigissallugu.” (Tuss 37:11) Inuit ‘namminneq inigisassaminnik illuliorumaaramik’ nalerisimaarnartumik suliaqassapput. (Es 65:21, 22) Inuit imminnut ajortumik pisarunnaassapput. Piitsuussuseq atuukkunnaassallunilu kikkut tamarmik naammattumik nerisassaqassapput. (Tuss 72:13-16) Upperisarsiorneq eqqunngitsoq suujunnaarsinneqartussaammat Guuti pillugu salluliuutinik ilinniartitsisoqartarunnaassaaq. (Saqq 18:8, 21) Toqusimasut makititaassallutillu nunarsuarmi naassaanngitsumik inuunissaminnut periarfissinneqassapput. (Es 25:8; ApS 24:15) Jehovamut attaveqarnerput nakussatsittuarutsigu taassumalu peqatigiissortai siumukaqatigiuarutsigit neriorsuutit taakkua eqquunnerat misigiumaarpavut.

17. Jehova taassumalu peqatigiissortai qanoq isiginnittaaseqarfigisariaqarpavut?

¹⁷ Saatanip aaqqissuussaanerata naggatissaa nalliutingajalermat uppernikkut aalajaattuarlutalu Guutip pallorfiginninnermik aaqqissuussaanik qujamasuutiginningaarnerput ersersittuartigu. Daavitut isiginnittaaseqarta, taanna ima erinarsorpoq: “Manna kisiat Naalakkamit kissaatigaara, ataaseq kipitsavigaara: Ineqarumallunga Naalakkap illuani inuunera tamaat, tipaatsuutigisinnaajumallugu Naalakkap alutornassusia, akissutisiffigiumallugulu naalaffiani.” (Tuss 27:4) Qanortoq tamatta ataasiakkaatut Jehovamut qanittuarlutalu taassuma peqatigiissortai siumukaqatigiuarisigit.