Itsaq Daavip Israelikkunnut kunngiusup Pinngortitsisuni unnersiutigalugu ima erinarsorfigaa: “Guuti, piumasat malillugu iliornissaq tassa kajungerisara; inatsisitit uanga ilunni ipput.” (Tuss 40:9) Daavip inuunermi nalaatani imaannaanngikkaluartut Guutip piumasaa malillugu iliorneq nuannaarutigingaarpaa. Imaanngilarli Daavi kisimi Guutimik ilumoortumik kiffartornerminik nuannaarutiginnittutuaasoq.

Apustilip Paulusip Tussiaat 40:9-mi allaatigineqartut Missiarsimut, imaluunniit Kristusimut, tunngatillugit ima allappoq: “[Jiisusi] silarsuarmut iserami oqarpoq: Pilliutit toqutassat naatitanillu pilliutit piumasarinngilatit, timimilli piareersaapparma; pilliutit ikikkagassat ajortaaruteqqussutillu kissaatiginngilatit. Taava oqarpunga: ‘Takuat, tikiuppunga — mappersakkami allaaserineqarpunga — piumasat malillugu iliorumallunga, Guuti.’” — Hebr 10:5-7.

Jiisusip nunarsuarmiikkallarami pinngortitarsuaq, ikinngutinik ilagisaqarneq nereqateqarnerlu nuannaarutigisarpaa. (Matt 6:26-29; Joh 2:1, 2; 12:1, 2) Taamaakkaluartorli Ataatami qilammiusup piumasaa malillugu iliorneq pingaartinnerpaallugulu nuannaarutiginerpaavaa. Soqutiginarpoq Jiisusi ima oqarmat: “Uanga nerisassara tassaavoq aallartitsisima piumasaa malillugu iliornissaq suliassarititaatalu naammassinissaa.” (Joh 4:34; 6:38) Ajoqersugaasa ilinniartitsisuminnit paasivaat suna pillualivitsitsisartoq. Nuannaarutigisaminnik kajumillutik aallussilluarlutillu Guutip naalagaaffianik tusarliussaq allanut oqaluussissutigaat. — Luk 10:1, 8, 9, 17.

Jiisusip ajoqersukkani ima peqquai: “Aallaritsi inunnillu inuiannit tamaneersunik ajoqersuganngortitsigitsi, Ataatap Ernerullu anersaallu illernartup aqqini kuillugit, ajoqersorlugillu ilissinnut peqqussutikka tamaasa maleruaqqullugit. Atalu, ullut tamaasa najorpassi pissutsit aaqqissuussaanerata naggataatungaanut allaat.” (Matt 28:19, 20, NW) Peqqussutip tamatuma maleruarneranut ilaavoq inunnut sumiikkaluartunulluunniit oqaluussineq, soqutiginnittunik pulaaqqiisarneq Biibilimillu  atuaqqissaaqateqartarneq. Taamatut ajoqersuganngortitsiortorneq nuannaarutaangaarsinnaavoq.

Inuit tusarliussatsinnik soqutiginnikkaluarpata soqutiginninngikkaluarpataluunniit oqaluussineq nuannaarutigissagutsigu oqaluussinermut isiginnittaaserput pingaaruteqarluinnarpoq. Soqutiginnittoqanngikkaluartoq sooq nutaarsiassaq nuannersoq oqaluussissutigiuarparput ajoqersuganngortitsiortortuarlutalu? Nalunnginnatsigu Guutimut inoqatitsinnullu asanninnerput taamaaliornikkut ersersittarlutigu. Inoqatittami inuunerat uagullu inuunerput navianartorsiortinneqarput. (Ez 3:17-21; 1 Tim 4:16) Oqaluussisartoqatitta unamminiarnartunik oqaluussiffigisartagaqartut aallussilluartuarnissaminnut aallussilluaqqilernissaminnullu iluaqutigisimasaat maanna sammeriartigit.

Oqaluussinermi apeqqutit tulluarsakkat atoraanni ajunngitsumik kinguneqarajuppoq. Ullaat ilaanni Amaliap naatsiiviliarsuarmi angut aviisimik atuartoq takuaa. Ornippaa aperalugulu nutaarsiassaqarnersoq nuannersunik. Naameermat Amaliap ima oqarfigaa: “Guutip naalagaaffia pillugu nutaarsiassaq nuannersoq ilinnut tusarliukkusuppara.” Tamanna angutip soqutiginnilissutigaa, Biibilimillu atuaqqissaaqatigineqartalernissani akuerivaa. Amaliap naatsiiviliarsuarmi tassani naapitani pingasut Biibilimik atuaqqissaaqatigisalerpai.

Janicep suliffini oqaluussiffigisartakkamisut isigaa. Isumannaallisaasoq suleqatinilu allaaserisamik Napasuliaq Alapernaarsuiffik-miittumik soqutiginnillutik oqarmata Janicep atuagassianik pajuttarniarlugit neqeroorfigai. Suleqatini alla Napasuliaq Alapernaarsuiffik-mi Vågn op!-imilu allaaserisat assigiinngikkuutaat nuannarinerarmagit aamma taanna neqeroorfigaa atuagassianik pajuttarniarlugu. Tamatuma kingunerisaanik suleqataa suli alla atuagassiaatitsinnik perusuppoq. Janice ima oqarpoq: “Ila Jehovamit pilluaqquneqangaarpunga!” Piffissap ingerlanerani Janice suleqatiminik aqqanilinnik atuagassiaatitsinnik pajuttagaqalerpoq.

Nakkutilliisup angalasartup siunnersuutigaa illumiit illumut angalaaraanni oqaluussisartut oqaloqatigiinneq naggaserlugu naapitartik oqarfigiinnassanngikkaat ulloq alla aggeqqikkumaarlutik. Naapitartilli ima aperisinnaavaat: “Biibilimik atuaqqissaaqateqarneq qanoq ingerlanneqartarnersoq takutissinnaavara?” imaluunniit: “Oqaloqatigeeqqinniassagatta qaqugu qassinullu maanngaqqissinnaavunga?” Nakkutilliisup angalasartup nalunaarutigaa ilagiit tikeraarfigisamini ataatsimi qatanngutit taama periaaseqarlutik sapaatip-akunnerata ingerlanerinnaani 44-nik Biibilimik atuaqqissaaqatitaarsimasut.

Pulaaqqiipallanneq, allaat ullut arlaqanngitsut ingerlaneranni, sunniuteqarluarsinnaavoq. Sooq? Taamaaliornikkummi inuit eqqortuliorusuttut Biibilimik paasinninnissaannut ikiorusungaarlutigit ersersittaratsigu. Arnaq aperineqarami sooq Jehovap Nalunaajaasui peqatigalugit Biibilimik atuaqqissaartalersimanerluni  ima akivoq: “Atuaqqissaartalerpunga taakkua soqutiginninnermik asanninnermillu ersersitsivigimmannga.”

Pionerinut Ilinniarfimmeereernermi kinguninngua Madaí 15-inik Biibilimik atuaqqissaaqateqarpoq tamatumalu saniatigut tallimat oqaluussisartunut allanut atuaqqissaaqatigitittalerlugit. Biibilimik atuaqqissaaqatigisartagai arlallit ataatsimiigiartalerput. Madaíp taama amerlatigisunik Biibilimik atuaqqissaaqatitaarnissaminut suna iluaqutigisimavaa? Pionerinut Ilinniarfimmi paasivaa soqutiginninnermik ersersitsisimasut naapissimasami naapeqqittuarniarnissaat qanoq pingaaruteqartigisoq. Nalunaajaasoq alla inunnik arlalinnik sallusuissutinik Biibilimeersunik ilinniartitsisimasoq ima oqarpoq: “Ilikkarpara inuit Jehovamik ilisarisimannilernissaannut ikiorumallugit qasusuilluni pulaaqqiiuarneq pisariaqarluinnartoq.”

Pulaaqqiiniaraanni Biibilimillu atuaqqissaaqateqarniaraanni eqiasuinnissaq pisariaqarluinnarpoq. Ilungersuutigisimasalli pilluaqqussutinit akimorneqangaartarput. Guutip naalagaaffia oqaluussissutiginiarlugu ilungersuussigutta inuit allat ‘sallusuissummik eqqorluartumik ilisimasaqalernissaannut’ (NW) ikiorsinnaavavut, tamannalu taakkua annaanneqaatigisinnaavaat. (1 Tim 2:3, 4) Tamannalu uagutsinnut nalerisimaangaarnermik nuannaangaarnermillu kinguneqarsinnaavoq.