1, 2. Jehovap kiffani ataasiakkaat qanoq isiginnittaaseqarfigai?

ANGAJOQQAAT qitornatik pinnguartut isiginnaaraangamikkit qitornamik piginnaaneri tupigusuutigikulasarpaat. Taamatut aamma illit misiginikuuit? Meeqqat ilaat timersullaqqissuusut allat titartaallaqqissinnaallutilluunniit allanik pikkoriffeqarsinnaapput. Angajoqqaat qitornamik pikkoriffii apeqqutaatinnagit taakku periarfissaminnik tamakkiisumik atorluaasinnaaaqqullugit, tassa sapinngisaminnik iliuuseqarnissaannut, ikiorneri nuannaarutigisarpaat.

² Angajoqqaatut asannittutut Jehovap kiffani soqutigai. Namminerminut aalajaallutillu ilumoormata ‘erlinnartuutitut’ isigai. (Hagg 2:7) Immaqa qatanngutivit pikkoriffii piginnaanerilu assigiinngiiaaqisut maluginiarsimassavatit. Assersuutigalugu qatanngutit angutit ilaat oqalugiallaqqissuupput allallu aaqqissuussillaqqillutik. Qatanngutit arnarpassuit allamiut oqaasiinik ilikkajapput, allallu napparsimasut pisariaqartitaannik isumassuillaqqissuullutilluunniit pisariaqartitsisunik tuppallersaallaqqipput. (Rom 16:1, 12) Taamaattunik ilagiinni qatannguteqarnerput qujamasuutigingaarparput.

3. Apeqqutit suut allaaserisami matumani akissutissarsissavavut?

 ³ Kristumiut ilaasa, ingammik inuusuttut qatanngutillu angutit kuiserlaat, immaqa qanoq ilagiinnik tapersersuissanerlutik nalornissutigisarpaat. Qanoq periarfissaminnik tamakkiisumik atorluaasinnaaqqullugit ikiorsinnaavavut? Sooq Jehova ilaartariaqarlugulu qatanngutitta pissusii ajunngitsut isiginiartariaqarpavut?

4, 5. Gideonip pikkoriffii suut Jehovap takuai, Jehovallu maligassiuinera qanoq ilinniarfigisinnaavarput?

⁴ Biibilimi ersersinneqarpoq Jehovap kiffami pissusii ajunngitsut maluginiaannarnagit aamma periarfissaat takusarai. Assersuutigalugu Jehovap Gideoni Israelikkunnik akeqqaminnit Midjanikkunnit aniguisitsisussatut toqqarpaa. Gideoni pingaaruteqanngitsutut misigigami inngilimit ima oqarfigineqarami tupassimassaaq: “Naalakkap najorpaatit, sorsuttartuusutit qunusuitsoq!” Gideoni ‘qunusuitsutut’ misiginngilluinnarluni Guutip innuttaanik aniguisitsisinnaanngitsutut misigivoq. Jehovalli pissutsit allatut isiginnittaaseqarfigai. Takuaa Gideoni piukkunnarlunilu Israelikkunnik aniguisitsinissamut atorsinnaallugu. — Eqqartuussisut 6:11-16 atuakkit.

⁵ Gideonip pikkoriffii Jehovap takusinnaagamigit taanna tatigilluinnarpaa. Assersuutigalugu Gideoni nukini tamaasa atorlugit qajuusiassanik karrertaajaasoq Jehovap takuaa. Aamma naasorissaasut nalinginnaasumik silami sulisaraluarput. Gideonilli katersukkani Midjanikkunnit takuneqannginniassammata tillinneqannginniassammatalu qajuusiassat viinnissanik tunguiaaffimmi piareersarpai. Jehovap takuaa Gideoni sullarissuuginnarnani pilersaarusiullaqqillunilu ulorianartorsiornissani pinngitsoortinniarlugu silatusaartumik aalajangiisartoq. Aap, Jehovap Gideonip piginnaaneri takugamigit taanna sungiusarpaa.

6, 7. (a) Amosimut tunngatillugu Jehova Israelikkunnit allaanerusumik qanoq isiginnittaaseqarpa? (b) Sooq oqarsinnaavugut Amosi oqariartortitatut piukkunnartuusoq?

⁶ Taamatuttaaq pruffiitip Amosip pikkoriffii Jehovap takuai. Amosi inuppassuit isaanni tunuarsimaarpasissinnaallunilu nikanarpasissinnaavoq. Inuinnarnit suliarineqartartut, soorlu savanik paarsisuuneq naasorissaanerlu, suliarisarpai. Jehovalli Amosi Israelimi naggueqatigiinnik qulinik, namminerminik pallorfiginnikkunnaarsimasunik, oqaaqqissaarisussanngortippaa. Israelikkut ilaat eqqarsarsimasinnaapput Amosi piukkunnanngitsuusoq. Sooq? — Amosi 7:14, 15 atuakkit.

⁷ Amosi illoqarfeeqqami avinngarusimasumi najugaqarpoq. Niuertut angalasut oqaloqatigisarnerisigut ileqqunut nunaminilu naalakkersuisunut tunngasut ilisimasaqarfigillualersimagunarpai. Assersuutigalugu inuiaat allat Israelimilu pissutsit ajortut Amosip ilisimasaqarfigilluarpai. (Am 1:6, 9, 11, 13; 2:8; 6:4-6) Amosi aamma atuakkiullaqqissuuvoq. Oqaatsit paasiuminartut kimittuullu atorlugit allattarpoq. Sapiilluni palasi Amasja tunussisuusoq assuaraa. Aap, Jehova oqariartortitassatut allamik piukkunnarnerusumik toqqagassaqanngilaq. Amosip piginnaaneri assigiinngitsorpassuit inuit allat takusinnaanngisaat takuai. — Am 7:12, 13, 16, 17.

8. (a) Jehovap Daavi qanoq neriorsorpaa? (b) Piginnaanerminnut tunngatillugu immaqa imminut tatiginngitsut Tussiaat 32:8 qanoq tuppallersaatigisinnaavaat?

⁸ Jehovap kiffami piginnaaneri tamaasa maluginiartarlugillu tamatta sapinngisatsinnik iliuuseqarnissatsinnut ikiorusuppaatigut. Assersuutigalugu Jehovap Daavi neriorsorpaa siulersorniarlugulu pisariaqartitaanik siunnersorniarlugu. (Tussiaat 32:8 atuaruk). Sooq tamanna uagutsinnut tuppallersaataava? Imminut tatiginngikkaluartugut Jehovap takorloorsimanngisaannakkatsinnik iliuuseqarnissatsinnut  ikiorsinnaavaatigut. Ilinniartitsisup pikkorissup ilinniartumik misilittagakitsumik siulersuisarneratut Jehovap periarfissatsinnik tamakkiisumik atorluaanissatsinnut siulersussavaatigut. Taamaaliorumallunilu imaassinnaavoq qatanngutivut atorai. Qanoq?

9. Qanoq qatanngutivut soqutiginninnermik ersersitsivigisinnaavavut?

⁹ Paulusip kristumiut tamaasa qatanngutiminnik soqutiginninnermik ersersitsisarnissaannut kajumissaarpai. (Filippimiut 2:3, 4 atuaruk). Siunnersuummi tamatumani suna pineqarpa? Qatanngutitta piginnaaneri maluginiartariaqarlugillu oqaatigisariaqarpavut. Illit pissuserisat ajunngitsoq maluginiarneqaraangat qanoq misigisarpit? Siuariartornerusutut misigisarputit. Aamma qatanngutinut tunngatillugu taamaappoq. Qatanngutitta iliuuserisaannik maluginiaasarnerput Jehovamut kiffartornerminni siuariartornissaminnut iluatsinnissaminnullu kajumississutigissavaat.

10. Kikkut ingammik soqutiginninnermik ersersitsivigineqartariaqarpat?

¹⁰ Ilaanneeriarluta allanit soqutiginninnermik ersersitsivigineqarnissarput pisariaqartittarparput. Inuusuttulli qatanngutilluunniit angutit kuiserlaat ilagiinnut akuulluartutut misiginissartik pisariaqartinnerusarpaat. Tamanna Jehovap innuttaasa akornanni atorfissaqartinneqarnerminnik paasinninnissaminnut iluaqutigissavaat. Qatanngutit angutit taakku akisussaaffeqarnerulerumallutik piukkunnarsarnissaminnut Biibilimi kajumissaarneqarput. (1 Tim 3:1) Misigigunilli suliartik qujamasuutigineqanngitsoq Jehovamut kiffartornerminni iliuuseqarnerorusukkunnaarsinnaapput.

11. (a) Qatanngut angut inuusuttoq ineriartulerniassammat utoqqaanertap qanoq ikiorpaa? (b) Julienip misigisai qanoq ilinniarfigigaagit?

¹¹ Utoqqaanertaq Ludovicimik atilik, inuusukkallarami soqutiginninnermik ersersitsivigineqarnerminik iluaqutiginnissimasoq, ima oqaluttuarpoq: “Qatanngut soqutiginninnermik ersersitsivigigaangakku ineriartupallannerusarpoq.” Julienimut, angummut inuusuttumut ittoortuusimasumut, tunngatillugu Ludovic ima oqarpoq: “Julien maluginiarneqarusuttarnini pissutigalugu ilaannikkut eqqumiitsumik, nalinginnaanngitsumik, pissusilersortarpoq. Takusinnaavarali inussiarnerlunilu ilagiinniittunik ikiuerusuttorujussuusoq. Pissutiginiagai apeqqusernagit pissusii ajunngitsut isiginiarnerullugillu kajumissaarniartarpara.” Piffissap ingerlanerani Julien ilagiinni kiffartortunngornissaminut piumasaqaatinik eqqortitsilerlunilu massakkut pioneriuvoq.

12. Qatanngutivut angutit ikiorumallugit susariaqarpugut? Assersuuteqarit.

¹² Qatanngutit angutit periarfissaminnik tamakkiisumik atorluaasinnaaqqullugit ikiorusukkutsigit maluginiartariaqarpavut. Taakkua sanngiiffii maluginiarnagit pissusii piginnaanerilu ajunngitsut maluginiartakkit. Jiisusi apustilimut Petrusimut tunngatillugu taamaaliorpoq. Petrusi ilaanneeriarluni tatigisassaanngitsutut pissuseqarpasittarpoq. Jiisusilli pissusii ajunngitsut takullugillu oqarfigaa qaarsutut patajaatsunngorumaartoq. — Joh 1:42.

13, 14. (a) Barnabap Markusi inuusuttoq qanoq isiginnittaaseqarfigaa? (b) Alexandrep utoqqaanertamit ikiorneqarnini qanoq iluaqutigaa? (Allaaserisap aallaqqaataani assiliaq takuuk).

¹³ Barnaba Markusilu pillugit oqaluttuaq sammeriartigu. (ApS 12:25) Paulusip Barnaballu ajoqersuiartortitatut angalaqqaarneranni pisariaqartitaannik Markusip ikiortussaagaluarpai. Pamfylialli eqqaanut pigamik Markusi aalajangeriataarpoq qimanniarlugit. Paulusi Barnabalu kisimiillutik nunap ilaani ulorianartukkut angalasussanngorput. (ApS 13:5, 13) Barnaba kingusinnerusukkut  sua? Markusip sanngiiffii isiginiarnagit pissusii ajunngitsut isiginiarpai. Eqqarsanngilaq Markusi tatigisassaanngitsuusoq. Markusili Barnabamit ilinniartinneqarami kristumiunngorpoq inersimalluartoq. (ApS 15:37-39) Ukiut arlallit qaangiummata Paulusip Romami parnaarussaaqqanerani Markusip ikiorpaa. Paulusillu Kolossemiunut allakkami Markusi nersualaarpaa. (Kol 4:10) Paulusi allaat Markusimit ikioqqummat Barnaba qanoq nalerisimaartigisimassasoq takorloorsinnaaviuk? — 2 Tim 4:11.

¹⁴ Utoqqaanertaq Alexandremik atilik qatanngummit ikiorneqartarsimanini pillugu ima oqarpoq: “Inuusukkallarama kikkut tamarmik takkuanni qinusarneq unamminiarnartittorujussuuara. Utoqqaanertap qanoq piareersarsinnaaninnik eqqissisimanerulersinnaaninnillu ilinniartippaanga. Aperisarunnaaginnarnanga katersuunnerni qinunissannut periarfissittalerpaanga. Piffissap ingerlanerani imminut tatiginerulerpunga.”

15. Paulusip qatanngutinik pingaartitsinini qanoq ersersippaa?

¹⁵ Uppeqativit pissusii ajunngitsut takugaangakkit susarpit? Nersualaartarpigit? Romamiut kapitali 16-imi Paulusip qatanngutit angutit arnallu 20-nit amerlanerusut pissusii ajunngitsut qujamasuutigisani pillugit nersualaarpai. (Rom 16:3-7, 13) Assersuutigalugu Paulusip Andronikosi Juniasilu namminerminit sivisunerusumik Kristusimut kiffartornikuunerat pinertusaarnerallu pillugit nersualaarpai. Paulusip aamma Rufusip arnaa asannittumik isumassuisimanera pillugu nersualaarpaa.

16. Meeqqanik nersualaarisarnerput qanoq kinguneqarsinnaava?

¹⁶ Uaguttaaq nersualaarisarnitsigut angusarissaarsinnaavugut. Rico, nukappiaraq Frankrigimiu Jehovamut kiffartunngitsumik ataatalik, pillugu oqaluttuaq eqqarsaatigiuk. Rico kuisinnissaminut ataataminit itigartinneqarami nikallungaarpoq. Kuisikkumalluni inersimasunngornissaminut utaqqeqqaartariaqarnini isumatsaqqassutigaa. Ricop aamma upperisani pillugu atuaqatiminit qinngasaarneqartarnini aliasuutigaa. Utoqqaanertalli Frédéricimik atillip Rico nersualaarpaa oqarfigalugulu taamatut akerlilersorneqarnera oqaluussinissamut sapiissuseqarneranik ersersitsisoq. Ricop taamatut nersualaarneqarnini ineriartortuarnissaminik aalajangiusimanerulissutigalugulu ataataminut attaveqarluarnerulissutigaa. Rico aqqaneq-marlunnik ukioqarluni kuisippoq.

17. (a) Qatanngutit sapinngisamik pitsaanerpaamik Jehovamut kiffartorsinnaaqqullugit qanoq ikiorsinnaavavut? (b) Ajoqersuiartortitap qatanngutit angutit inuusuttut qanoq ikiorpai, tamannalu qanoq kinguneqarpa?

¹⁷ Qatanngutivut iliuuseqarluarsimanerat pillugu nersualaaraangatsigit sapinngisamik pitsaanerpaamik Jehovamut kiffartornissaminnut piumassuseqarnerulertarput. Sylvie *, Betelimi Frankrigimiittumi ukiorpassuarni kiffartorsimasoq, oqarpoq qatanngutit arnat aamma angutinik  nersualaarisarsinnaasut. Allaat misigisarpoq taamaaliornissani akisussaaffigalugu. (Uss 3:27) Amerlanertigut qatanngutit arnat angutit maluginiarneq ajugaat maluginiartarpaat. Taamaattumik qatanngutit angutit iliuuseqarnerat pillugit arnat nersualaarinerat qatanngutit angutit misilittagaqarluartut nersualaarinerannit allaanerusarpoq. Jérômep, Fransk Guyanami ajoqersuiartortitaasup, qatannguterpassuit angutit inuusuttut ajoqersuiartortitanngornissamik anguniagaqarsinnaaqqullugit ikiorsimavai. Taanna oqarpoq qatanngutit angutit inuusuttut oqaluussinermi iliuuserisatik imaluunniit akissutitik aalajangersimasut pillugit nersualaarneqartarnertik imminut tatiginerulissutigisarlugulu piginnaaneqarnerulissutigisaraat.

18. Sooq qatanngutinik angutinik inuusuttunik suleqateqarneq iluaqutaava?

¹⁸ Qatanngutivut aamma suleqatiginerisigut ineriartornissaannut kajumissaarsinnaavavut. Assersuutigalugu utoqqaanertap qatanngut angut inuusuttoq paasissutissanik, utoqqarnut qarasaasiaqanngitsunut iluaqutissanik, jw.org-imeersunik anillatitseqqusinnaavaa. Imaluunniit qatanngummut angummut inuusuttumut naalagaaffilersaarfimmi eqqiaanermut iluarsartuussinermullu tunngatillugu ikioqqusinnaavutit. Inuusuttut suleqatigisarnerisigut taakkua piginnaaneri maluginiarnissaannut, nersualaarnissaannut angusaqarluarnissannullu periarfissaqalissaatit. — Uss 15:23.

19, 20. Sooq allat ineriartorsinnaaqqullugit ikiortariaqarpavut?

¹⁹ Jehovap Josva Israelikkunnik siulersuisussatut toqqaramiuk Mosesi peqquaa taassuminnga ‘sapiissuseqalersitsissallunilu pissatitsissasoq’. (5 Mosesi 3:28 atuaruk). Ullumikkut inuit Jehovamik pallorfiginnilersut amerlapput. Peqatigiissortami qatanngutit angutit piumasaqaatinik eqqortitsisut pisariaqartippavut. Taamaattumik ilagiinniittut tamarmik qatanngutit angutit inuusuttut kuiserlaalluunniit periarfissaminnik tamakkiisumik atorluaasinnaaqqullugit ikiortariaqarpaat. Tamatuma kingunerisaanik piffissaq tamaat kiffartortut aamma qatanngutit angutit ‘ajoqersuisinnaanngortut’ amerliartussapput. — 2 Tim 2:2.

²⁰ Ilagiinniikkutta oqaluussisartoqatigiinniikkuttaluunniit siunissaq eqqarsaatigalugu peqatigiissortatsinni ineriartortitseqataasinnaavugut. Taamaaliorumalluta Jehova ilaartariaqarlugulu allat pissusii ajunngitsut maluginiartariaqarpavut.