1, 2. Sooq Paulusi sanngiitsunik misiginneqatiginnissinnaasimava?

TAMATTA ilaannikkooriarluta sanngiittarpugut. Ullut ilaanni peqqippallaanngikkaangatta nukillaangasarlutalu iliuuserisariaqakkavut naammassiuminaatsittarpavut. Takorloorulli sivisuumik taamatut misigalutit. Allanit qanoq pineqarusussagaluarpit? Soorunami misigissutsivit paasineqarnissaat, misiginneqatigineqarnissat, kissaatigissagaluarpat.

² Apustili Paulusi silamiunit ilagiinneersunillu tatineqartarnini pissutigalugu ilaannikkut sanngiitsutut misigisarpoq. Ikinnerpaamik ataasiarluni uniinnarusuttutut misigivoq. (2 Kor 1:8; 7:5) Paulusip sanngiitsutut misigineq nammineq misilittagaqarfigigamiuk ima oqarpoq: “Sanngiitsoqaraangat sanngiitsutut misigisarpunga.” (2 Kor 11:29, NW) Kristumiut ilagiiviniittut inuup avataanut assersuukkamigit allappoq ‘sanngiinnerpaasutut ittut tassarpiaasut pisariaqartut’. (1 Kor 12:22) Sunaana pigaa? Sanngiippasissut Jehovap qanoq isiginnittaaseqarfigai? Qanoq qatanngutivut Jehovatut isiginnittaaseqarfigisinnaavavut? Tamannalu qanoq iluaqutigisinnaavarput?

3. Sooq qatanngutivut ajortumik isiginnittaaseqarfigilersoorsinnaavavut?

³ Ullumikkut inuppassuit piumasartik piniarlugu sanngiitsunik atornerluisarput. Upperaat inuk iluatsilluarusukkuni inuusuttuusariaqarlunilu nukittusariaqartoq. Silarsuarmiut isiginnittaasiannit sunnerneqaratarsinnaavugut. Qatanngutivut ikiorneqarnissaminnik pisariaqartitsikulasut ajortumik isiginnittaaseqarfigilersoorsinnaavavut. Qanoq ilagiinniittunut tunngatillugu Jehovatut isiginnittaaseqarsinnaavugut?

4, 5. (a) Jehovap kiffaminik ataasiakkaanik isiginnittaasianut tunngatillugu Paulusip timi pillugu assersuusiaa qanoq ilinniarfigisinnaavarput? (b) Sanngiitsunik ikiuinerput qanoq iluaqutigisinnaavarput?

⁴ Jehovap ilagiinniittut ataasiakkaat tamaasa pingaartippai. Paulusip Korinthimiunut allakkamini siullermi kapitali 12-imi inuup timikkut pisatai allaat sanngiinnerorpasissut pisariaqartuunerarpai. (1 Korinthimiut 12:12, 18, 21-23 atuakkit). Pinngoriartuaarsimaneraasut ilaat oqartarput timip pisatai aalajangersimasut pisariaqanngitsuusut. * Assersuutigalugu inuit ilaasa isikkap inuaani eqeqqup atorfissaqarnera apeqqusertarsimavaat. Ilisimatuulli paasisimavaat isikkatta inuaani eqeqqoq nikorfanitsinni timitsinnik uppisitsaaliuisartoq.

⁵ Ilagiinniittut tamarmik pisariaqarnerat Paulusip ilagiit inuup timaanut assersuummagit erserpoq. Saatanip atorsinnaanngitsutut misigitikkusuppaatigut. Jehovalli kiffani tamaasa, allaat sanngiippasittut, ‘pisariaqartutut’ isigai. (Job 4:18, 19) Taamaattumik ilagiinni nunarsuarlu tamakkerlugu Guutip innuttaasa akornanni pisariaqartinneqarnerput nuannaarutigisinnaavarput. Assersuutigalugu utoqqarmik ikiuinerit eqqarsaatigiuk. Ikiuinerit taassuma iluaqutigaa, illimmi aamma iluaqutigaajuk? Aap, allanimmi ikiuigaangatta nuannaarnerulertarpugut, utaqqisinnaassuseqarnerulertarpugut, allaat qatanngutivut asanerulertarpavut kristumiuulluarnerulertarlutalu. (Ef 4:15, 16) Qatanngutitsinnik, allaat sanngiippasittunik, pingaartitsinissarput Jehovap kissaatigaa. Taamatut isiginnittaaseqarnerput qatanngutitsinnut inornartumik piumasaqalissutigissanagulu ilagiinniittut asaqatigiinnerulissutigissavaat.

6. Paulusip oqaatsit “sanngiissuseq” aamma ‘sanngisooq’ qanoq atortarpai?

⁶ Ilumoorpoq Paulusip ilagiinniittut ilaat allaatigigamigit oqaatsit “sanngiissuseq” aamma ‘sanngiinneq’ atormagit. Taamaaliorpoq uppinngitsut ilaat kristumiunut taamatut isiginnittaaseqarmata. Paulusili isumaqanngilaq kristumiut ilaat allanit pikkorinnerusut. Ilaannikkut aamma imminut sanngiitsutut oqaatigisarpoq. (1 Kor 1:26, 27; 2:3) Kristumiulli aalajangersimasut allaatiginerini oqaaseq ‘sanngisooq’ atoramiuk isumaqanngilaq taakku allanit pikkorinnerusut. (Rom 15:1) Isumaqaannarpoq misilittagakinnerusut misilittagaqarnerusunit utaqqisinnaassuseqarfigineqartariaqartut.

7. Sooq pisariaqartitsisunik ikiuinissarput ilaannikkut ajornaatsuinnaaneq ajorpa?

⁷ Jehovap sanngiitsut ikiortarpai, uagullu taamaalioraangatta nuannaartarpoq. (Tuss 41:2; Ef 5:1) Tamannali ilaannikkut ajornaatsuinnaaneq ajorpoq. Sooq? Immaqa eqqarsartarpugut qatannguterput ajornartorsiutiminut akisussaatinneqartariaqartoq. Immaqaluunniit qatannguterput qanoq oqarfigissanerlugu nalugatsigu ingalassimaniartarparput. Assersuutigalugu qatanngummut arnamut Karinamik * atilimmut  qanoq pisoqartoq eqqarsaatigiuk. Uiminit qimanneqarami ikiorneqartariaqalerpoq. Ima oqarpoq: “Qatanngutinit ingalassimaneqarneq imaluunniit ikinngutigilluakkat naatsorsuutigisatut iliuuseqannginnerat aliatsannarsinnaavoq. Misilinneqarnermi qatanngutinik peqateqartarnissaq pisariaqarpoq.” Aamma kunngip Daavip ikinngutiminit ingalassimaneqarnini aliatsaatigaa. — Tuss 31:13.

8. Qatanngutitsinnut paasinnittuunissatsinnut suut iluaqutigisinnaavavut?

⁸ Qatanngutitsinnut ikiorneqartariaqartunut paasinnittuunissatsinnut suut iluaqutigisinnaavavut? Eqqaamassavat ikiorneqartariaqartut amerlanersaat napparsimanertik, isumatsassimangaarnertik imaluunniit ilaquttanik sallusuissut malillugu inuunngitsunik najugaqateqarnertik pissutigalugu naalliummata. Uagut taakkunatut ajornartorsiuteqaraluarutta allat misiginneqatiginnittuunissaat kissaatigissagaluarparput. Israelikkut eqqarsaatigikkit. Egyptenimi naalliungaarsimagaluartut Jehovap nunamut neriorsuutigisamut isinnginneranni ‘uummatiminnik manngertitsinnginnissaannik’ eqqaasippai. Jehovap piumasaraa Israelikkut qatanngutiminnik piitsunik sanngiitsunilluunniit ikiuissasut. — 5 Mos 15:7, 11; 3 Mos 25:35-38.

9. Qatanngutitta sanngiitsup suna pisariaqartippaa? Assersuuteqarit.

⁹ Qatanngutivut ajornartorsiutiminnut namminneq pisuunerartarnagillu qatanngutitsinnit pikkorinnerusorisassanngilagut. Qatanngutivut sanngiikkaangata ikiorusuttarpavut. (Job 33:6, 7; Matt 7:1) Assersuutigalugu motorcykelerluni ajutoortoq piaarnerpaamillu napparsimmaviliaanneqartariaqartoq takorlooruk. Napparsimmavimmut eqqunneqarpat nakorsat peqqissaasullu piffissaajarlutik ajutoornermut kina pisuunersoq oqaloqatigiissutigissavaat? Naamik. Ingerlaannaq nakorsassavaat. Uagutsinnut tunngatillugu aamma taamaappoq. Qatannguterput sanngiitsoq anersaakkut ikiorneqarnissaminik pisariaqartitsilluinnartarpoq. — 1 Thessalonikamiut 5:14 atuaruk.

10. Qatanngutit ilaat sanngiippasikkaluartut qanoq ‘uppernikkut pisuujusinnaappat’?

¹⁰ Qatanngutit ilaat sanngiippasissinnaapput. Pissutsilli atugaat eqqarsaatigilerutsigit immaqa sanngisuujusut paasissavarput. Takorlooruk qatanngut arnaq Jehovamut kiffartunngitsumik uilik qanoq artorsartigisartoq. Anaanaq kisimiittoq qitornanilu ataatsimiigiartuartoq takugaangakku uppernera killinneqaatigisarpiuk? Inuusuttuaqqat atuarfimmi tatineqartaraluarlutik sallusuissummik aalajangiusimannittut takugaangakkit qiimmaallattarpit? Taakkua tamarmik Jehova asalluinnarlugulu ilumoorfiginissaa aalajangiusimalluinnarpaat. Qatanngutitta, allaat sanngiippasikkaluartut, Jehovamut kiffartornerminni iliuuserisartagaannik amerlaqisunik eqqarsaatiginnittarnerput ‘uppernikkut pisuujusutut’ isiginissaannut iluaqutigissavarput. — Jaak 2:5.

11, 12. (a) Qatanngutivut kukkugaangata Jehovatut isiginnittaaseqarnissatsinnut suut iluaqutigisinnaavavut? (b) Sooq Aroni Jehovamit isumakkeerfigineqarpa, tamannalu qanoq ilinniarfigisinnaavarput?

¹¹ Qatanngutitsinnut tunngatillugu, allaat kukkugaangata, Jehovatut isiginnittaaseqartariaqarpugut. Biibilimi oqaluttuat iluaqutigalugit Jehovap kiffaminut isiginnittaasia paasisinnaavarput. (Tussiaat 130:3 atuaruk). Assersuutigalugu takorlooruk illit Mosesilu marluullusi Aronip kuultiusumik nersuteeraasaliornerminut utoqqatsissutissarsiorneranut tusarnaarlusi. Aroni qanoq isumaqarfigisimassagaluarpiuk? (2 Mos 32:21-24) Aroni Mirjamimut tusarnaareerluni Mosesip allamiumik nuliarsimanera pillugu isornartorsiuisoq tusarnaarsimasuugukku  qanoq misigisimassagaluarpit? (4 Mos 12:1, 2) Aronimmi Mosesillu Jehovap qaarsumit imermik puilalersitsinera pillugu taassuminnga ataqqinarsisitsinnginnerat qanoq qisuariarfigisimassagaluarpiuk? — 4 Mos 20:10-13.

¹² Pisuni taakkunani Jehovap Aroni ingerlaannaq pillarsimasinnaagaluarpaa. Jehovalli nalunngilaa Aroni pisuni aalajangersimasuni sanngiittaraluarluni inuttut ajortuunngitsoq. Aronip artorsarnini siunnersuutinillu eqqunngitsunik maleruaanini kukkussutigai. Aronili kukkussutini taakku nassuerutigalugillu Jehovap oqaaqqissaarineratut iliorpoq. (2 Mos 32:26; 4 Mos 12:11; 20:23-27) Aroni Jehovamik asannillunilu peqqissimigami taassumannga isumakkeerfigineqarpoq. Taamaattumik Aronikkut ukiut hundredilikkuutaat qaangiutereersut Jehovamut aalajaallutik kiffartortutut ilisimaneqarput. — Tuss 115:10-12; 135:19, 20.

13. Qanoq eqqarsartaatsitsinnik allannguisariaqarsinnaavugut? Assersuuteqarit.

¹³ Qatanngutit Aronip pisimaneratut kukkusinnaavoq. Taama pisoqaraangat qanoq isiginnittaaseqarfigisarpiuk? Eqqarsartaatsit allanngortittariaqarpiuk? (1 Sam 16:7) Assersuutigalugu inuusuttuaraq ajortumik isiginnittaasilik eqqarsaatigiuk. Immaqa aliikkutassanut tunngatillugu aalajangiisarnermini mianersorneq ajorpoq. Ingerlaannaq inuttut ajortutut isigilissanngilat. Akerlianik qanoq ikiorsinnaanerlugu eqqarsaatigissavat. Silatusaartumik aalajangiisalernissaanut ilinniartinniarlugu piffissaqarfigisaruk. Qatanngutitit taamatut ikiortarukkit utaqqisinnaassuseqarfiginerulissallugillu asanerulissavatit.

14, 15. (a) Jehovap Elia annilaangalermat qanoq isiginnittaaseqarfigaa? (b) Jehovap Eliamik ikiuinera qanoq ilinniarfigisinnaavarput?

¹⁴ Jehovap isumatsaqqangaartut qanoq isiginnittaaseqarfigai? Kiffami ilaat isumatsaqqangaartoq  qanoq ikioraa eqqarsaatigiuk. Elia Jehovamut pruffiititut kiffartortuuvoq sapiilluni Ba’alip pruffiitiinut 450-inut unammillertoq. Elialli dronningimit Jezabelimit toqunneqarniarnini tusaramiuk annilaajummingaarami Be’ershebamut 150 kilometerisut ungasitsigisumiittumut arpariarluni inoqajuitsup timaanut qimaavoq. Qasungaarami isumatsaqqangaaramilu toquinnarusukkaluarpoq. — 1 Kng 18:19; 19:1-4.

¹⁵ Eliap annilaangangaarnera isumatsaqqangaarneralu Jehovap takugamigit qanoq iliorpa? Elia ajattulerpaa? Naamik. Ikiorniarlugu inngili aallartippaa. Inngilip marloriarluni Elia angalaqqinnissaminut nukissaqarniassammat nerisassaanik tunivaa. (1 Kunngit 19:5-8 atuakkit). Jehovap allaat Elia ilitsersortinnagu tusarnaaqqaarlugulu pisariaqartitaanik ikiorpaa.

16, 17. Qatanngutivut Jehovatut qanoq ikiorsinnaavavut?

¹⁶ Jehovap Eliamik ikiuineratut qatannguterput qanoq ikiorsinnaavarput? Qatanngutit ingerlaannaq siunnersorniassanngilat. (Uss 18:13) Isumatsaqqaguni atorsinnaanngitsutulluunniit misigiguni siullertut ilinnit tusarnaarneqarnissani soqutigineqarnerminillu ersersitsivigineqarnissani pisariaqartissavaa. (1 Kor 12:23) Taamaalioruit pisariaqartitai sorpiaanersut paasisinnaassallugillu ikiorsinnaalissavat.

¹⁷ Karinap misigisai eqqaamakkit. Uiminit qimanneqaramik paninilu marluk imminiiginnarneqartutut misigipput. Ilagiinniittut ilaat qanoq ikiuippat? Karina ima oqarpoq: “Minutsit 45-t qaangiutiinnartut uagutsinnut iserput. Qullilipput. Ulluni marlunni pingasuniluunniit siullerni najortuarpaatigut.” Karina paniilu marluk qasusorujussuullutillu nikallungasorujussuupput. Qatanngutit Karinakkunnik tukkutitsillutillu nerisitsisarput. Tamanna Biibilimi Jaakup allagaanik eqqaasitsissutigaarput: “Qatanngummik angummik arnamilluunniit atisassaqanngitsoqarpat nerisassaqanngitsoqarlunilu arlassilu oqarfigippagit: ‘Eqqissillusi aallarniaritsi, aamma oqortunik atisiniarisi naammatsillusilu nerillusi,’ uffalu timikkut pisariaqagaannik tuninagit — taava tamanna sumut iluaqutaassava? Upperneq aamma taamaappoq: Immini, tassa sulianik ilaqarnani toqungavoq.” (Jaak 2:15-17) Karinakkut pisariaqartitarpiamittut qatanngutinit ikiorneqarput. Qaammatit arfiniliinnaat qaangiummata Karina paninilu nukissaqartutut misigigamik ikiorti-pionerinngorput.

18, 19. (a) Sanngiitsut qanoq ikiorsinnaavavut? (b) Sanngiitsunik ikiuinerput kikkut iluaqutigisarpaat?

¹⁸ Sivisuumik napparsimasimagaangatta aaqqinniaaluusaartarpugut. Qatannguterput kukkugaangami artorsaraangamiluunniit aamma aaqqinniaaluusaarsinnaasarporlusooq. Anersaakkut nukittorumalluni Guutip oqaasianik atuaqqissaartariaqartoq, Jehovamut qinujuartariaqartoq ataatsimiigiartuartariaqartorlu ilumoorpoq. Uagutsinnilli ikiorneqarnissani aamma pisariaqartippaa. Anersaakkut nukittoqqinnissaata tungaanut utaqqisinnaassuseqarfigisariaqarparput. Paasitittuartariaqarparput asallugulu ilagiinni pisariaqartillugu. — 2 Kor 8:8.

¹⁹ Allanik ikiuineq nuannaalissutigisarparput. Aamma misiginneqatiginninnermik utaqqisinnaassuseqarnermillu ersersitsinissaq ilinniartarparput. Tamannali uagut kisitta iluaqutigineq ajorparput. Ilagiinniittut tamarmik asanninnerulissapput. Pingaarnerusutullu ‘sanngiitsut isumagigaangatsigit’ Jehovatut ikkusunnerput ersersittarparput. Ataatatta asannittup inuit tamaasa erlinnartutut isigai. — ApS 20:35.