1, 2. Qanoq Jehovap kiffani attaveqaqatigisarpai?

JEHOVAP innuttani siulersortuarsimavai. Itsaq Guutip inngilini innuttaminut oqariartortitatut atortarpai. Aamma innuttani takorruuisitsinikkut sinnattortitsinikkullu siunissaq pillugu paasitittarlugilluunniit aalajangersimasumik suliassittarpai. (4 Mos 7:89; Ez 1:1; Dan 2:19) Ilaannikkullu Guutip inuit sinniisussamisut siulersuinerminillu ingerlatitseqqiisussatut toqqartarpai. Jehovap oqaasiinik, qanoq tusarliunneqarnerat apeqqutaatinnagu, maleruaasut tamarmik pilluaqquneqartarput.

² Ullumikkut Jehovap Biibili, anersaani illernartoq ilagiillu atorlugit siulersortarpaatigut. (ApS 9:31; 15:28; 2 Tim 3:16, 17) Siulersuinera ersaringaarmat allaanngilaq ‘nammineq siutitsinnik tusaripput tunutsinnit oqaaseq: “Aajuna aqqusineq, taanna ingerlavigissavarsi!”’ (Es 30:21) Jiisusip ilagiinnik siulersuinermini “inussiaq aalajaallunilu silatooq” aqqutigalugu Ataatami Jehovap nipaa uagutsinnut ingerlateqqittarpaa. (Matt 24:45, NW) Naalannerput naassaanngitsumik inuuneqalissutigissagatsigu Jiisusip taamatut siulersuinera ilitsersuineralu pimooruttariaqarparput. — Hebr 5:9.

3. Jehovap siulersuineranik maleruaaniarnitsinnut suut ajoqutaasinnaappat? (Allaaserisap aallaqqaataani asseq takuuk).

³ Jehovap siulersuineranik maleruaanerput annassutigissagipput Saatanip nalunnginnamiuk taamaaliorniarnitsinni  ajoqusersorniartarpaatigut. Aamma ‘uummaterput tatigisassaanngitsoq’ Jehovap siulersuineranik maleruaaniarnitsinnut ajoqutaasinnaavoq. (Jer 17:9) Guutip nipaanut tusarnaarniarnitsinni unamminiarnartut qanoq qaangersinnaanerivut allaaserisami matumani sammissavarput. Aamma qanorluunniit pisoqaraluarpat Jehovap tusarnaartarnera qinunikkullu oqaloqatigisarnera taassumunnga qanittuarnissatsinnut qanoq iluaqutigisinnaanerivut sammissavarput.

4. Qanoq Saatani inuit eqqarsartaasiannik sunniiniartarpa?

⁴ Saatani paasissutissat eqqunngitsut sunniiniutillu allat atorlugit inuit eqqarsartaasiannik sunniiniartarpoq. (1 Johannesi 5:19 atuaruk). Aviisit, atuakkat, atuagassiat, radio, tv internetilu paasissutissanik nunanut tamalaanut siaruarterisarput. Taakku atorluarneqarsinnaasunik paasissutissiisarput, amerlanertigulli ileqqorlunnermik Jehovap ileqqorissaarneq pillugu najoqqutassiaanut akerliusumik siuarsaasarput. (Jer 2:13) Assersuutigalugu anguteqatigiit arnaqatigiillu katittarnerat ajunnginnerartarpaat. Taamaattumik inuppassuit Biibilimi tamanna pillugu allassimasut ingasappallaartutut isigisarpaat. — 1 Kor 6:9, 10.

5. Qanoq Saatanimit sunnerneqarnaveersaarsinnaavugut?

⁵ Inuit Jehovap ileqqorissaarneq pillugu najoqqutassiaanik nuannarinnittut qanoq Saatanimit sunnerneqarnaveersaarsinnaappat? Suup eqqortuunera suullu eqqunngitsuunera qanoq nalunngissinnaavaat? Tamanna Biibilimi ima akineqarpoq: ‘[Guutip] oqaasiinik maleruaanikkut.’ (Tuss 119:9) Suup ilumoorneranik suullu ilumuunnginneranik paasinninnissatsinnut Biibili iluaqutigaarput. (Uss 23:23) Jiisusi oqarpoq oqaaseq “sunaluunniit Guutip qarnanit anisoq” pisariaqartikkipput. (Matt 4:4) Najoqqutassiat Biibilimeersut inuunitsinni qanoq maleruarsinnaanerlugit ilinniartariaqarparput. Assersuutigalugu allasiorneq pillugu inatsisiliortoqarnera sioqquterujussuarlugu Josefip nalunngilaa Potifarip nulianik atoqateqaruni Guutimut ajortuliussalluni. Josefip Jehovamut naalannginnissani eqqarsaatiginngilaaluunniit. (1 Mosesi 39:7-9 atuakkit). Josefi Potifarip nulianit sivisuumik tatineqartaraluarluni taassumunnga tusarnaarniarnani Jehovamulli tusarnaarniarluni aalajangerpoq. Ullumikkut uaguttaaq Saatanip sunniiniartuarneranut tusarnaarnata Jehovamut tusarnaartariaqarpugut.

6, 7. Saatanip siunnersuutaanik ajortunik maleruaalerumanata susariaqarpugut?

⁶ Nunarsuarmi upperisarsiornikkut ajoqersuutit paatsiveerunnartut amerlammata inuppassuit upperisarsiorneq eqqortoq nassaarineqarsinnaannginnerartarpaat. Jehovamulli tusarnaarnissatsinnut piumassuseqarutta taassumannga ikiorneqarnikkut sallusuissut nassaareriaannaassavarput. Kimut  tusarnaarusunnerluta aalajangertariaqarparput. Nipit marluk ataatsikkut tusarnaarneqarsinnaanngillat. Savat paarsisumik nipaanik ilisarinnittarnerattut uaguttaaq Jiisusip, Jehovap uagutsinnut paarsisunngortitaata, nipaa ilisarisinnaasariaqarparput. — Johannesi 10:3-5 atuakkit.

⁷ Jiisusi ima oqarpoq: “Tusakkasi sianiginiarsigit!” (Mark 4:24) Jehovap siulersuinera ersarillunilu eqqorpoq, taassumanngali siulersorneqassagutta eqqortumik isiginnittaaseqartariaqarpugut. Mianersunngikkutta Guutip asannilluni siulersuineranik maleruaajunnaarluta Saatanip siunnersuutaanik ajortunik maleruaalersinnaavugut. Nipilersuutit, isiginnaagassiat, tv-kkut aallakaatinneqartartut, atuakkat, ilisarisimasat, ilinniartitsisut ilisimatuunerarneqartartullu silamiorpaluttut inuuninnik aqutsilernissaat akuerinngisaannaruk. — Kol 2:8.

8. (a) Saatanip uummaterput atorlugu qanoq sunneriaannaavaatigut? (b) Mianersornissatsinnut takussutissanik sumiginnaanerput qanoq kinguneqarsinnaava?

⁸ Ajortiliunerput Saatanip nalunngilaa. Sanngiissutitsinnut nakkaannartitsiniarnerani Jehovamut ilumoortuarnissaq sapernartorujussuusinnaavoq. (Joh 8:44-47) Imaassinnaavoq qinusarunnaarsimasugut, oqaluusserpiassaarsimasugut imaluunniit ataatsimiigianngitsoortalersimasugut. Taakku tamarmik mianersortariaqarnitsinnut takussutissaapput, taakkuninngalu sumiginnaanerput ulorianangaarsinnaavoq. Mianersunngikkutta Jehovap nipaanut tusarnaarunnaariartulersinnaavugut. Naggataatigut sanngiissutitsinnut nakkaannarsinnaavugut takorloorsimanngisaannakkatsitullu iliorluta. (Rom 7:15) Mianersortariaqarnitsinnut takussutissat eqqumaffigalugillu eqqortuliorniarluta ingerlaannaq iliuuseqartarutta ajortuliorujussuarnissarput pinaveersaartissinnaavarput. Jehovap nipaanut tusarnaaqqissaartarutta tunussisut isumaliuutersuutaannut tusarnaanngisaannassaagut. — Uss 11:9.

9. Sooq ajortulioqqajaasarnerput eqqumaffigisariaqarparput?

⁹ Inuup nappaataa perulussutaasoq siusissukkut suussusersineqarpat katsorsarneqarsinnaanera ilimanaateqarnerussaaq. Taamatuttaaq ajortulioqqajaasarnerput paasigutsigu Saatanip ‘piumasaatut iliornissatsinnut napitinneqannginnitsinni’ ingerlaannaq iliuuseqartariaqarpugut. (2 Tim 2:26) Eqqarsaativut kissaativullu Jehovap uagutsinnut piumasaanit allaanerulersimappata susariaqarpugut? Ingerlaannaq taassumunnga utertariaqarlutalu siulersuinera noqqaassutigisariaqarlugulu maleruartariaqarparput. (Es 44:22)  Jehovamut uternitta kingorna ajortuliatta ilaasa suli anniaataangaarsinnaanerat paasisariaqarparput. Jehovamit qimagutinngisaannarneq pitsaanerujuaannarpoq.

10, 11. (a) Makitanermut suut takussutissaappat? (b) Korap, Datanip Abiramillu pikitsitsinerat qanoq ilinniarfigaarput?

¹⁰ Uummatitta Jehovamit ungasillisitsisinnaanera paasisariaqarparput. Assersuutigalugu makitalersinnaallutalu piumatuunngorsinnaavugut. Pissuserisat taakku ingasattumik kukkussutigisinnaavavut. Inuk makitasooq eqqarsartarpoq immikkuullarissuullunilu qanorluunniit iliorsinnaalluni. Misigisarpoq allanit, aamma kristumioqatiminit, utoqqaanertanit allaallu peqatigiissortatsinnit ilitsersorneqartariaqarnani. Inuup taamaattup Jehovap nipaa tusaarpiarsinnaanngilaa.

¹¹ Jehovap Mosesi Aronilu inoqajuitsukkut Israelikkunnik siulersuisussatut toqqarpai. Kisianni Kora, Datani Abiramilu makitanertik namminnerlu piumasamittut Jehovamik pallorfiginnikkusunnertik pissutigalugit pikitsitsilerput. Jehovap tamanna qanoq iliuuseqarfigaa? Pikitsitsisut toquppai. (4 Mos 26:8-10) Oqaluttuaq tamanna pingaarutilimmik ilinniarfigaarput. Jehovamut pikitsitsineq ajortorujussuarmik kinguneqartarpoq. Biibilimi allassimavoq ‘imminut pingaartinneq ajunaarnerup siulerisaraa’. — Uss 16:18; Es 13:11.

12, 13. (a) Piumatunerup ajorluinnartumik kinguneqarsinnaaneranik ersersitsisumik assersuuteqarit. (b) Qanoq piumatuunngoriataarsinnaasugut nassuiaruk.

¹² Piumatuneq aamma ulorianartuuvoq. Inuk piumatooq Jehovap siulersuineranik maleruaasariaqanngitsutut misigisarpoq. Immaqa eqqarsartarpoq piginngisaminik tigusisinnaalluni. Na’amani, Aramæerit sakkutuuisa naalagaat, pupissoq Guutip pruffiitianit Elisamit ajorunnaarsinneqarpoq. Na’amani qujamasungaarami aningaasanik atisanillu Elisamut tunissuteqarumavoq, Elisali tunineqaqqunngilaq. Elisalli kiffaa Gehazi piumatuunngorami tunissutinik taakkuninnga perusulerpoq. Elisa oqarfigeqqaarnagu arpalluni Na’amanimukarpoq tunissutinillu piniassagami salloqittarlugu. Piumatooq Gehazi qanoq pillarneqarpa? Pupissunngortinneqarpoq! — 2 Kng 5:20-27.

¹³ Suunngitsumik pilerisaqarnerput pissutigalugu inuunitsinnik aseruilluinnarsinnaasumik piumatuunngoriataarsinnaavugut. Tamanna Biibilimi Akani pillugu oqaluttuamit ersersinneqarpoq. Taanna ima oqarpoq: “Tiguakkatta akornanni takuakka qallersaat kusanartoq Sinearimi sanaaq, sølvit sekelit 200-t kuultilu ilivitsukaaq sekelinik 50-inik oqimaassuseqartoq. Pileritsaateriarakkit tiguakka.” Akanip piumasani eqqunngitsut itigartittussaagaluarpai. Piginngisanili tillippai tupiminullu toqqorlugit. Akanip ajortuliaa Jehovap tamanut ilisimaneqalersippaa, ullormilu tassani tillittoq ilaqutaalu ujaqqanik milloorneqarlutik toqunneqarput. (Jos 7:11, 21, 24, 25) Tamatta mianersunngikkutta Akanitut piumatuunngorsinnaavugut. Taamaattuminguna ‘piumatussusermut sumulluunniit mianersortariaqartugut’. (Luk 12:15) Ajortut kinguaassiuutitigullu inuunerlunneq pillugit eqqarsaatipiluit tamaasa ingerlaannaq itigartittariaqarpavut pilerissutsivut ajortuliornermik kinguneqannginniassammata. — Jaaku 1:14, 15 atuakkit.

14. Makitanerput piumatunerpulluunniit pissutigalugu ajortuliornissatsinnut usserneqarutta susariaqarpugut?

¹⁴ Aap, makitaneq piumatunerlu ajorluinnartumik kinguneqarsinnaapput. Ajortuliornerup kingunerisassaanik eqqarsaatiginninneq Jehovamut tusarnaartuarnissamut iluaqutigissavarput. (5 Mos 32:29) Eqqortuliornerup iluaqutissartai ajortuliornerullu  kingunipilui Jehovap Biibilimi ersersippai. Makitanerput piumatunerpulluunniit pissutigalugu ajortuliornissatsinnut usserneqarutta ajortuliornerput uagutsinnut, asasatsinnut Jehovamullu attaveqarnitsinnut qanoq sunniuteqassanersoq eqqarsaatigigutsigu silatusaassaagut.

15. Jiisusip maligassiuinera qanoq ilinniarfigisinnaavarput?

¹⁵ Jehovap pitsaanerpaamik inuuneqarnissarput kissaatigaa. (Tuss 1:1-3) Piffissaq eqqorlugu eqqortumik siulersortarpaatigut. (Hebræerit 4:16 atuaruk). Jiisusip naammalluinnartuugaluarluni Jehovamik attaveqaqateqartuarnissani pisariaqartippaa. Jiisusi qinujuarpoq. Jehovap Jiisusi tupinnaannartumik tapersersortarlugulu siulersortarpaa. Isumassorniarlugu inngilit aallartittarlugillu anersaamik illernartumik tunisarlugulu apustilinik aqqaneq-marlunnik toqqaanerani siulersorpaa. Jehova allaat Jiisusimik tapersersuinerminik iluarinninnerminillu ersersitsiniarluni qilammit oqaluppoq. (Matt 3:17; 17:5; Mark 1:12, 13; Luk 6:12, 13; Joh 12:28) Uaguttaaq Jiisusitut uummammit pisumit qinujuartariaqarpugut. (Tuss 62:8, 9; Hebr 5:7) Qinnutit Jehovamut qanittuarnissatsinnut taassumunngalu ataqqinaataasumik inuunissatsinnut iluaqutigaavut.

16. Jehovap imminut tusarnaarsinnaaqqulluta qanoq ikiortarpaatigut?

¹⁶ Jehovap siunnersuutini tamanit pissarsiarineqarsinnaatippai, maleruaanissatsinnulli pinngitsaalineq ajorpaatigut. Anersaavanit illernartumit siulersorneqaqqulluta qinnuigisariaqarparput, tukkorlunilu tuniumaarpaatigut. (Lukasi 11:10-13 atuakkit). Biibilimi allassimavoq ‘qanoq tusarnaarnerput sianigisariaqaripput’. (Luk 8:18) Assersuutigalugu kinguaassiuutitigut inuunerlunnginniassagatta Jehovamut ikioqqugutta tiingasulersaarutilli isiginnaagassialluunniit kinguaassiuutitigut inuunerlunnertallit isiginnaartarutsigit taassumannga ikiorneqarusunnginnerput ersersissavarput. Jehovamit ikiorneqarumalluta taassuma anersaavata najuuffianiittariaqarpugut. Jehovamut kiffaasut amerlasuut ataatsimiinnitsinni Jehovamut tusarnaartarnermikkut kukkorujussuarnissartik pinngitsoortittarsimavaat. Pilerissusipiloqalersimanerminnik paasinninnertik ajornartorsiummik aaqqiissutigisarpaat. — Tuss 73:12-17; 143:10.

17. Sooq imminut tatigineq ulorianartuua?

¹⁷ Itsaq Israelimi kunngiusoq Daavi eqqarsaatigiuk. Jehovamik tatiginnikkaangami malunnangaartuliorsinnaasarpoq. Inuusuttuulluni inorujussuaq Goliati toquppaa. Daavi kingusinnerusukkut sakkutuunngorpoq kunnginngorlunilu. Israelikkunnik illersuinissani taakkulu sinnerlugit silatusaartumik aalajangiisarnissani akisussaaffigai. Imminulli tatigilerami uummatiminit salloqittarneqarpoq. Batseba ajortulioqatigaa allaallu uia toqullugu. Daavili Jehovamit naqqinneqarami maniguulluni tusarnaarlunilu kukkussutini nassuerutigalugulu Jehovamut ikinngutaaleqqippoq. — Tuss 51:6, 8, 12, 13.

18. Jehovamut tusarnaartuarnissatsinnut suut iluaqutigisinnaavavut?

¹⁸ Korinthimiunut allakkat siulliit 10:12-imi imminut tatigivallaalinnginnissarput paasivarput. Biibilimi allassimavoq nammineq ‘alloriartarnivut aqussinnaanngikkivut’, taamaattumik Jehovap siunnersuutai Saatanilluunniit siunnersuutai maleruartarpavut. (Jer 10:23, NW) Qinujuarnissarput anersaallu illernartup siulersuineranik maleruaanissarput pingaaruteqarluinnarput. Qanortoq Jehovap nipaanut tusarnaartuarisa!