1. Inuit suna pisariaqartippaat, kikkullu tamatuminnga matussusiisinnaappat?

KIKKUT TAMARMIK inunnut allanut qaninnissartik pisariaqartippaat. Uagutsinnik asannittunik, pingaartitsisunik paasinnittartunillu ilaqutaqarnerput ikinnguteqarnerpullu pilluaatigisarparput. Tamanilli pingaarnerusutut Pinngortitsiserput, Jehova, qanimut attaveqarfigilertariaqarparput. — Oqal 12:1.

2. Jehovap qanoq neriorsorpaatigut, tamannali sooq inuppassuit upperinngilaat?

² Jehovap ikinngutigerusuppaatigut. Neriorsorpaatigut qanilligutsinni qanilliniarluta. (Jaak 4:8) Tamatuminnga ilisimanninnerput nuannaarutigaarput. Inuppassuilli upperinngilaat Guutip qanikkusukkaatsik. Misigipput Guutimut attaveqarnissaminnut qinngaqqunnarlutik imaluunniit Guuti ungasippallaartoq. Ilumut Jehovamut qanillisinnaavugut?

3. Jehova pillugu suna paasisariaqarparput?

³ Aap, Jehova ujarlertiminit ‘kikkunnilluunniit ungasinngimmat’ ilisarisimalersinnaavarput. (Apustilit Suliaat 17:26, 27; Tussiaat 145:18 atuakkit). Naak naammalluinnanngitsuugaluartugut  Jehova ikinngutigillualernissatsinnut piareersimallunilu piumassuseqarpoq. (Es 41:8; 55:6) Tussiaasiortoq misilittakkani tunngavigalugit Jehova pillugu ima oqarsinnaasimavoq: “Ilinnut qinnutitsinnik tusartartutit. Inuit tamarmik ornissavaatsit. Pilluarpoq illit najortigiumallugu qinikkat.” (Tuss 65:3, 5) Maanna Judami kunngip Asap Guutimut qanillinera Guutillu Asamut qanillinera pillugu Biibilimi oqaluttuaq sammissavarput. *

4. Kunngi Asa Judakkunnut qanoq maligassiuiva?

⁴ Asa ilumoorluni pallorfiginninnermik aallussilluarpoq. Judami kunnginngormat naalaffimmi atortittarneq guutipilussiortarnerlu nalinginnaapput, taakkulu ajortut atuukkunnaarsinnerisigut Jehovamut naalappoq. (1 Kng 15:9-13) Asap Jehova qanilligamiuk taassumalu inatsisai maleruaramigit innuttani oqarfigisinnaasimavai Jehova “siuaasamik Guutiat ujassagaat aammalu inatsisai peqqussutaalu naalassagaat”. Taamaattumik Jehova Asap ukiuni qulini siullerni naalakkersuinerani eqqissineqartitsivoq. Asap tamanna nalunnginnamiuk innuttani ima oqarfigai: “Ujarsimavarput tamanilu eqqissisimatinneqartippaatigut.” (2 Nal 13:23–14:6) Tamatuma kingorna qanoq pisoqarpa?

5. Asap Guutimik tatiginninnini qanoq ersersippaa, tamannalu qanoq kinguneqarpa?

⁵ Takorlooruk kunngiullutit Asa. Nubiamiu Zera angutit 1.000.000-t qamutillu sorsuutit 300-t siulersorlugit nunannut sorsukkiartorpoq. (2 Nal 14:7-9) Zerap sakkutuui illit sakkutuunnit marloriaatingajammik amerlanerupput. Illit sussagaluarpit? Aperissavit sooq Guutip akeqqat isaanerat unitsissimanngikkaa? Imminut tatigissavit? Imaluunniit Jehovamit illersorneqarnissat upperissaviuk? Asap Jehova qanittumik attaveqarfigalugu tatigilluinnarlugulu ersersippaa. Asa ima torlulavoq: “Naalagaq Guuterput, ikiortigut illit tassaagavit tunaarisarput.” Guutimit qanoq akineqarpa? ‘Jehovap Nubiamiut ajorsartippai.’ Nubiamiut tamarmik toqutaapput. — 2 Nal 14:10-12.

6. Qanoq Asa ilaartariaqarparput?

⁶ Sooq Asap Guutimit illersorneqarnissani siulersorneqarnissanilu upperilluinnarsinnaavaa? Biibilimi allassimavoq ‘Asa Jehovap isaani eqqortumik inuusoq’ aamma ‘uummatimigut iluunngarluni Jehovamut ilumoortoq’. (1 Kng 15:11, 14) Uaguttaaq massakkut siunissamilu Guuti qanikkumallugu uummatikkut iluunngarluta kiffartorfigisariaqarparput. Jehovap imminut qanillisikkumalluta iliuuseqarsimanera qanimullu attaveqaqqulluta ikiuisarnera qujamasuutigaavut. Guutip imminut qanillisikkumalluta iliuuserisimasai marluk sammeriartigit.

7. (a) Jehova imminut qanillisinniarluta qanoq iliorsimava? (b) Guutip imminut qanillisinniarluta iliuuserisimasaasa annerpaartaat suua?

⁷ Jehova nunarsuarmik alutornangaartumik pinngortitsigami inunnut asannittuliorpoq. Ullut tamaasa inuuinnartittaramisigut asannittuliortuarpoq. (ApS 17:28; Saqq 4:11) Jehova anersaakkut pisariaqartitatsinnik tunisisarami suli annerusumik asannittuliortarpoq. (Luk 12:42) Aamma qinnutitsinnut tusarnaartarnerminik uppernarsaavigaatigut. (1 Joh 5:14) Jehovalli imminut qanillisinniarluta asannittuliorfiginiarlutalu utertitsissut  iliuuserisimasaasa annerpaartaraat. (1 Johannesi 4:9, 10, 19 atuakkit). Jehovap ernituani uagut pilluta pilliutitut aallartippaa. Pilliut tamanna taamaallaat tunngavigalugu naammalluinnartutut naassaanngitsumik inuunissatsinnik neriuuteqarsinnaavugut. — Joh 3:16.

8, 9. Jiisusi Jehovap siunertaani qanoq inissisimaffeqarpa?

⁸ Jehovap utertitsissut inunnut tamanut, allaat utertitsissut sioqqullugu inuusunut, iluaqutaasussaatippaa. Qanoq ililluni? Jehovap inuiannut siunertami eqquukkumaarnera nalunnginnamiuk Annaassisussaq pillugu siulittuinermini utertitsissut akilerneqareersimasutut isigaa. (1 Mos 3:15) Ukiut hundredillit tamatuma kingorna apustilip Paulusip ‘Kristusikkut Jiisusikkut aniguisitaasimanertik’ pillugu Jehova qutsavigaa. Paulusip nassuiarpaa Guutip ‘kamagittarnermigut itsaq ajortuliat isumakkeerai’ (NW). (Rom 3:21-26) Taamaattumik Guutimut attaveqarnitsinnut Jiisusi pingaaruteqarluinnarpoq!

⁹ Inuit maniguuttut kisimik Jiisusikkut Jehovamut qanimut attaveqarnermik nuannaarutiginnissinnaapput. Biibilimi ima allassimavoq: “[Guutip] uagutsinnut asanninnini takutippaa ajortiliugallartilluta Kristusip pilluta toquneratigut.” (Rom 5:6-8) Jehovap Jiisusillu asanningaarnertik pissutigalugu utertinneqarnissarput pisussaaffiginngikkaluaripput utertitsissummik akiliuppaatigut. Jiisusi ima oqarpoq: “Kinaluunniit uannut ornigussinnaanngilaq Ataatap uannik aallartitsisup kajungilersinngippani.” Aamma ima oqarpoq: “Uakkuinnaq Ataatamut pisoqarsinnaavoq.” (Joh 6:44; 14:6) Jehovap anersaaq illernartoq iluaqutigalugu inuit Jiisusikkut imminut qanillisittarlugillu naassaanngitsumik inuusinnaaniassammata imminik attaveqarluarsinnaaqqullugit ikiortarpai. (Judasi 20, 21 atuakkit). Maanna Jehovap imminut qanillisikkumalluta iliuuserisimasaasa aappaat sammeriartigu.

10. Guutimut qanillinissatsinnut Biibili qanoq iluaqutigaarput?

¹⁰ Allaaserisami matumani massakkumut allassimaffiit Biibilimi atuakkanit 14-ineersut innersuussutigineqareerput. Jehovap imminut qanillisinniarluta anersaani illernartoq atorlugu Biibili allatsippaa. Biibili allanneqarsimanngitsuuppat qanoq ilisimasinnaavarput Pinngortitsisitsinnut qanillisinnaalluta? Aamma Biibileqanngitsuuppat utertitsissut Jehovamullu qanillisinnaaqqulluta Jiisusip uagutsinnik ikiuisarnera qanoq paasisinnaassavarput? Jehovap pissusii nuannersut inuiannullu siunertaa Biibilimi ilinniartarpavut. Assersuutigalugu Mosesimik allakkat aappaat 34:6, 7-imi Jehova oqarpoq Guutiulluni “nallittuisoq saammaasorlu, kamajaatsoq ilumoornermik sallusuissummillu peqangaartoq. Ilumoornermik atatitsisoq kinguaariissoqatigiinni tuusintini ataatsini pisuussusernik unioqqutitsinernillu, ajortulianillu isumakkiisoq.” Kiap taamatut pissusilik qanillerusussannginnamiuk? Jehovap nalunngilaa nammineq pilluni ilisimasaqarnerujartortilluta piviusutut isiginerulissallugulu qaninnerulissagipput.

11. Sooq Jehova pillugu ilinniartariaqarpugut? (Allaaserisap aallaqqaataani asseq takuuk).

¹¹ Atuakkap Kom nær til Jehova-p aallaqqaasiutaani allassimavoq ikinngutigilerusutatta pissusiinik nuannarinninneq ikinngutigiillualernissatsinnut aalajangiisuusoq. Taamaattumik Guuti ikinngutigillualerumallugu taassuma pissusii Biibilimi  allaatigineqartut pillugit atuaqqissaartarnitsigut kinarpiaanera ilinniartariaqarparput. Jehovap Biibilimik paasiuminartumik allatsitsisimanera qujamasuutigingaarsinnaavarput.

12. Sooq Jehovap Biibili inunnit allanneqartippaa?

¹² Jehovap inngilit Biibilimik allatsissimasinnaagaluarpai. Inngilimmi uagutsinnik suliatsinnillu soqutiginningaarput. (1 Petr 1:12) Qularnanngitsumillu Jehovap tusarliussaa inuiannut allassinnaagaluarpaat. Inngililli inunnit allaanerupput. Uagutsitut misigissuseqaratillu pisariaqartitaqaratillu sanngiissuseqanngillat. Jehovap inngilit uagutsinnit allaanerulluinnarnerat nalunnginnamiuk Biibili inunnit allanneqartippaa. Biibilimik allattut allallu pakatsinerat, qularnerat, annilaanganerat, kukkunerat kiisalu nuannaarnerat pillugit atuaraangatta misigissusaat paasisinnaasarpavut. Pruffiititut Eliatut Biibilimik allattut tamarmik ‘uatsitut atuagaqartarput’. — Jaak 5:17.

13. Jonap qinnutaa qanoq killinneqaatigaajuk?

¹³ Assersuutigalugu pruffiiti Jona Guutimit pingaarutilimmik suliassinneqarami qimaavoq. Inngilip oqaluttuaq tamanna allassimasuuguniuk Jonap misigissusii tamakkiisumik allaatigisimasinnaassanngikkaluarpai. Jonap nammineq oqaluttuaminik, aamma immap itinersuanit Guutimut qinunerminik, Jehovap allatsitsinera pitsaanerujussuuvoq. Jona ima oqarpoq: “Toqulerama ilinnut qinuvunga, Naalagaq.” — Jon 1:3, 10; 2:2-10, 1990.

14. Sooq Esajap imminut allaatiginera paasisinnaaviuk?

¹⁴ Aamma Esajap Jehovamit isumassarsisitaalluni imminut allaatiginera eqqarsaatigiuk. Pruffiiti Esaja Guutip naalannassusia pillugu takorruuisitaagami ajortiliussutsini pillugu ima allappoq:  “Eqqanaq uanga, toqusussanngorpunga angutaagama minguttunik qarlulik, nunaqqatigalugillu inuiaat minguttunik qarlullit, maannalu isinnik takuara kunngi, Katersaarsuit Naalagaat.” (Es 6:5) Inngili Esajatut imminut taama allaatigisinnaanngilaq. Esajatut naammalluinnanngitsuugatta qanoq misigisimanera takorloorsinnaavarput.

15, 16. (a) Sooq inuit allat misigissusaat paasisinnaavavut? Assersuuteqarit. (b) Suna Jehovamut qanillissutigissavarput?

¹⁵ Inngilit Jaakutut ‘suunngippallaarnerarsinnaappat’ imaluunniit Petrusitut ‘ajortiliunerarsinnaappat’? (1 Mos 32:11; Luk 5:8) Inngilit Jiisusip ajoqersugaasut ‘ersilersimassagaluarpat’? Imaluunniit inngilit naapertuilluartut nutaarsiassaq nuannersoq oqaluussissutigiumallugu malersugaanerminni Paulusitut allatullu ‘nakimaassuseqarnissartik’ pisariaqartissimassagaluarpaat? (Joh 6:19; 1 Th 2:2) Naamik, inngilimmi sutigut tamatigut naammalluinnartuullutillu inunnit pissaaneqarnerungaarput. Naammalluinnanngitsuugatta inuit naammalluinnanngitsut misigissutsit allaatigisaat paasilluarsinnaavavut. Taamaattumik Guutip oqaasia atuartarutsigu ‘nuannaartut nuannaaqatigisinnaassallugillu qiasut qiaqatigisinnaassavavut’. — Rom 12:15.

¹⁶ Jehovap itsaq kiffaminut iliuuserisartagai eqqarsaatigeqqissaartarutsigit Guuterput, kamagittarlunilu asannilluni inunnik naammalluinnanngitsunik imminut qanillisitsisoq, pillugu nuannersorpassuit paasisinnaassavavut. Jehova ilisarisimallualerlugulu asanerulerutsigu qaninnerulissavarput. — Tussiaat 25:14, NW, atuaruk. *

17. (a) Azarjap Asa qanoq pitsaasumik siunnersorpaa? (b) Azarjap siunnersuutaa Asap qanoq sumiginnarpaa, tamannalu qanoq kinguneqarpa?

¹⁷ Kunngi Asa aamma allatigut ilinniarfigisinnaavarput. Taassuma Nubiamiut sakkutuui ajugaaffigereermagit pruffiitip Azarjap ima siunnersorpaa: “Naalakkap najorpaasi najorassinni. Ujarussiuk nanissavarsi, tunukkussiulli aamma ilissi tunussavaasi.” (2 Nal 15:1, 2) Kingusinnerusukkulli Asap siunnersuutitsialak tamanna maleruanngilaa. Israelimiut Judamut sorsukkiartormata Asa annilaangalerpoq. Jehovamut ikioqqunani Aramæerit, Guutimik nalusut, sakkutooqarnikkut isumaqatigiissuteqarfigai. Jehovap ima oqarfigaa: “[Tamatumuuna] sianiitsuliorsimavutit; maannamiit sorsuttualissaatit.” Taamatorpiarlu pisoqarpoq. (2 Nal 16:1-9) Tamanna qanoq ilinniarfigaarput?

18, 19. (a) Jehovamit ungasillilaarsimagutta susariaqarpugut? (b) Qanoq Jehovamut qanilliartortuarsinnaavugut?

¹⁸ Jehovamit ungasillinngisaannartariaqarpugut. Jehovamit ungasillilaarsimagutta siunnersuut una maleruartariaqarparput: “Taamaattumik Guutinnut saaqqinniarit, ilumoorfiginnilluni asanninneq naapertuilluassuserlu aalajangiusimakkit, Guutillu neriuffigiuaruk.” (Hos 12:6, NW [12:7]) Utertitsissut eqqarsaatigeqqissaartarutsigu Biibililu atuaqqissaartarutsigu Jehova qanilliartortuassavarput. — 5 Mosesi 13:5 atuaruk.

¹⁹ Tussiaasiortoq ima allappoq: “Guuti qanillugu inuuneq tassa pilluarnartora.” (Tuss 73:28) Tamanna aamma tamatsinnut pilluarnartuuvoq. Jehova pillugu nutaanik ilikkagaqartuarnissarput anguniagarigutsigu asanerulissavarput. Jehova qanilligutsigu taassuma maannangaaq naassaanngitsumillu qanilliartortuassavaatigut!