Apeqqut tamanna, ingammik aappat toqukkut qimagussimappat, pingaaruteqarpoq. Immaqa silarsuartaassami aapparigaluannik najueqqilernissat kissaatigilluinnarpat. Nuleerneq ima oqarpoq: “Nuliaralu aappariikkunnaarnissarput kissaatiginngilarput. Naassaanngitsumik aappariittut pallorfiginneqatigiinnissarput qamannga pisumik kissaatigaarput. Uanga suli taamatut misigivunga.” Nunarsuarmi inuunissamut makititaasut aappaneqqissinnaanerannik upperinninnissatsinnut tunngavissaqarpa? Naluarput.

Ukiorpassuarni Biibililersaarutitsinni allassimasarpoq Jiisusip makititsineq aappaninnerlu pillugit oqaasii nunarsuarmi makititsinermut innersuussutaasut. Aamma Biibililersaarutitsinni allassimasarpoq silarsuartaassami makititaasut aappaqanngitsuunissaat ilimanartoq. * (Matt 22:29, 30; Mark 12:24, 25; Luk 20:34-36) Jiisusilli oqaasii qilammut makititsinermut innersuussutaasinnaappat? Siumut aalajangiussaqareernata Jiisusip oqaasii misissoriartigit.

Jiisusip makititsineq eqqartoramiuk kikkut oqaloqatigai? (Lukasi 20:27-33 atuakkit). Saddukiiarit oqaloqatigai. Upperisarsioqatigiit taakkua makititsisoqarumaarnera upperinngilaat Jiisusilu makititsineq sakiatsiariillu aappariilertarnerat pillugu aperineratigut misileriaraluarpaat. * Jiisusip ima oqarfigai: “Silarsuup matuma qitornai nuliartarlutillu uinitsitaasarput, silarsuulli aappaanut pinissamut toqusunillu makinnissamut qinngaqqunnanngitsut nuliassanatillu uinitsitaassanngillat. Inngilitummi ikkamik toqusussaajunnaarput; toqusunit makinnissamut qitornaagamik Guutimuttaaq qitornaapput.” — Luk 20:34-36.

Sooq siornatigut Biibililersaarutitsinni allassimasarpa Jiisusip nunarsuarmi makititsineq eqqartorsimagunaraa? Tamatumunnga marluk pissutaanerupput. Siullertut, saddukiiarit Jiisusimik oqaloqateqaramik nunarsuarmi makititsinermut innersuussisimanissaat ilimanarpoq. Taamaattumik pissusissamisuussaaq Jiisusip nunarsuarmi makititsineq eqqartorneratigut apeqqutaat akisimappagu. Aappaattut, Jiisusip Aaperaamut, Iisaamut Jaakumullu innersuussilluni akissutini naggaserpaa. Angutit aalajaatsut taakku nunarsuarmi inuunissamut makititaassapput. — Luk 20:37, 38.

Jiisusili qilammut makititsinermut innersuussisimasinnaavoq. Sooq taamatut oqarsinnaavugut? Jiisusip saddukiiarinut akissutaani nalunaarutit marluk misissoriartigit.

‘Toqusunit makinnissamut qinngaqqunnanngitsut.’ Tanitat aalajaatsut ‘Guutip naalagaaffianut isernissamut qinngaqqunnanngitsuutitaapput’. (2 Th 1:5, 11) Kristusip utertitsissutitut pilliutaa pissutigalugu Guutip tanitat naapertuilluartutut isigisai toqugaangamik ajortilittut pillakkatut pineqarneq ajorput. (Rom 5:1, 18; 8:1) Tanitat ‘pilluartutut illernartutullu’ taaneqartarput qilammullu  makititaanissamut qinngaqqunnanngitsutut isigineqartarlutik. (Saqq 20:5, 6) Nunarsuarmi inuunissamut makititaasut ‘iluaatsunut’ ilaanerat pissutigalugu taamatut oqaatigineqarsinnaanngillat. (ApS 24:15) ‘Iluaatsut’ makititaanissamut ‘qinngaqqunnanngitsutut’ oqaatigineqarsinnaappat?

“Toqusussaajunnaarput.” Nutsikkani allani ima allassimavoq: “Toqumut naalatsigitikkunnaarput” aamma “toqup pissaaneqarfigiunnaarpai”. Tanitat aalajaattuarsimasut qilammut toqusuitsutut makititaasarput. Tassa toqusinnaanatillu suujunnaarsinneqarsinnaanngillat. (1 Kor 15:53, 54) Toqup qilammut makititaasimasut pissaaneqarfiginngilai. *

Paasissutissat sammeriikkavut tunngavigalugit qanoq inerniliisinnaavugut? Paasivarput Jiisusip qilammut makititsineq innersuussutigisimasinnaagaa. Taamaappat qilammut makititaasut pillugit uku pingasut paasivavut: (1) Aappaninneq ajorput, (2) toqusinnaanngillat, aamma (3) qilammi inngilinut assingussuteqarput. Jiisusilli qilammut makititsineq innersuussutigisimappagu apeqqutit tulliuttut akineqartariaqarput.

Siullertut, sooq Jiisusi qilammut makititsinermut innersuussiva saddukiiarit nunarsuarmi makititsineq eqqartorpassuk? Ilaannikkut Jiisusi akerlilersortimi eqqarsartaasiannut naapertuuttumik akineq ajorpoq. Assersuutigalugu Jiisusip juutit ilaat tupinnartulioqqusisut ima oqarfigai: “Naalaffik una ingutsersiuk, taava ullut pingasut ingerlaneranni nappaqqikkumaarpara.” Jiisusip nalugunanngilaa naalaffik eqqarsaatigigaat, “kisianni naalaffik taanna eqqartoramiuk nammineq timini pivaa”. (Joh 2:18-21) Immaqa Jiisusi misigivoq saddukiiarit ilumoortuusaartut, makititsisoqarumaarneranik inngileqarneranilluunniit upperinninngitsut, akisariaqarnagit. (Uss 23:9; Matt 7:6; ApS 23:8) Jiisusilli ajoqersukkani, eqqortuliorusuttut qilaliarnissaminnik neriugisaqartut, qilammut makititsineq pillugu sukumiisumik ilinniartissimasinnaavai.

Aappaattut, sooq Jiisusip oqaloqatigiinnertik Aaperaamut, Iisaamut Jaakumullu innersuussilluni naggaserpaa? Angutimmi taakku nunarsuarmi inuunissamut makititaasussaapput. (Matthæusi 22:31, 32 atuakkit). Jiisusip angutit aalajaatsut eqqaanngitsiarlugit oqaatsini ima aallarnerpai: ‘Toqusullu makinnissaat pillugu.’ Taamatut oqarnermigut qilammut makititsineq eqqartorunnaarlugu nunarsuarmi makititsineq eqqartulersimasinnaavaa. Jiisusip saddukiiarit Mosesip allagaanik upperinnittut nalunnginnamiuk orpikkap ikualasup eqqaani Guutip Mosesimut oqaasii issuarpai. Jiisusip nunarsuarmi makititsinerup Guutip siunertaanut ilaanera saddukiiarinut uppernarsarusuppaa. — 2 Mos 3:1-6.

Pingajuattut, Jiisusip oqaasii qilammut makititaasussanut atuuppata taava nunarsuarmi makititaasut aappanissinnaassappat? Apeqqut tamanna Guutip oqaasiani ersarissumik akineqanngilaq. Jiisusi qilammut makititsineq eqqartorsimappagu oqaasiinit ersersinneqanngilaq nunarsuarmi makititaasut silarsuartaassami aappanissinnaanersut.

Biibilimi ersarissumik allassimavoq toqu aappariinnermik atuukkunnaarsitsisartoq. Taamaattumik nuleernerit uillarnerillu kateqqinnertik ilerasuutigisariaqanngilaat. Tamanna inuup nammineq aalajangertussaammagu kialluunniit alla toqqissilluni aappaqalerusuttoq isornartorsiortussaanngilaa. — Rom 7:2, 3; 1 Kor 7:39.

Immaqa silarsuartaassami inuuneq pillugu apeqqutissarpassuaqarpugut. Apeqqutit taakku eqqoriaanikkut akissutissarsiornagit utaqqiinnartariaqarpugut. Unali qularnanngilaq: Jehovap naalatsimi pisariaqartitaat kissaataallu tamaasa pitsaanerpaamik matussusissammagit pilluassapput. — Tuss 145:16.