1, 2. Adamip Evallu pissutsit atugaat qanoq ittuugaluarpat, sunillu apeqqutissaqalersitsiva?

ADAMI Evalu pinngortinneqaramik akeraqanngillat. Naammalluinnartuullutillu paratiisimi najugaqarput. Pinngortitsisiminnut Ataataminnut qitornatut attaveqarluarput. (1 Mos 2:7-9; Luk 3:38) Aamma Guutip pingaarutilimmik suliassippai. (1 Mos 1:28 atuaruk.) Suliassiissut tamanna naammassiumallugu qanoq sivisutigisumik inuusariaqarpat? Nunarsuaq inunnik tamakkerneqassappat Adami Evalu naassaanngitsumik inuusariaqanngillat, kisianni ‘nunami aalasunut tamanut naalagaajuarumallutik’ naassaanngitsumik inuusariaqarput. Suliassaq tamanna nuannaarutigiuarsinnaagaluarpaat.

² Soormi ullumikkut pissutsit allaalluinnarpat? Sooq pilluarnitsinnut akornutaasunik akerarpassuaqarpugut? Akeqqatta annersaat, toqu, qanoq pilerpa? Guutillu akeqqavut tamaasa qanoq suujunnaarsissavai? Apeqqutinut tamakkununnga akissutit Biibilimi atuarneqarsinnaapput, taakkulu maanna misissoriartigit.

3, 4. (a) Jehovap Adami Evalu sumik peqquai? (b) Peqqussummut tamatumunnga naalanneq qanoq pingaaruteqartigaa?

³ Adami Evalu naassaanngitsumik inuusimasinnaagaluarlutik toqujuitsuunngillat. Inuuinnarumallutik anersaartortariaqarput, imertariaqarlutik, sinittariaqarlutik nerisariaqarlutillu. Jehovamulli inuunerup pilerfianut attaveqarnerat pingaaruteqangaarneruvoq. (5 Mos 8:3) Aatsaat Jehovamit siulersortinneqarunik naassaanngitsumik inuusinnaallutillu pilluartuarsinnaapput. Allaat Evap pinngortinnginerani Jehovap Adami paatsuugassaanngitsumik ima oqarfigaa: “Naatsiiviup orpii tamaasa neriffigisinnaavatit, kisianni orpik ajunngitsumillu ajortumillu ilisimalersitsisoq neriffigissanngilat, neriffigigaluarukkumi toqussaatit!” — 1 Mos 2:16, 17.

⁴ “Orpik ajunngitsumillu ajortumillu ilisimalersitsisoq” Guutip suut ajunngitsuunersut suullu ajortuunersut kisimi aalajangiisinnaaneranut assersuutaavoq. Adami nalunngeqatiginnissuteqarnini Guutilu assilillugu pinngortitaanini pissutigalugit isummersinnaavoq suut ajunngitsuunersut suullu ajortuunersut. Orpik takugaangamikku Adami Evalu eqqaasinneqartarput Jehovap siulersuinera pisariaqartittuarlugu. Orpik tamanna neriffigigunikku Guutimut ima oqassappullusooq: “Naalakkiutitit pisariaqartinngilavut.” Guutip mianersoqqussutaa malinngippassuk alianaqisumik kinguneqarumaarpoq — taakku taakkualu qitornaat toqujumaarput.

5. Sooq Adami Evalu Jehovamut pikitsitsippat?

⁵ Adamip Eva Jehovap peqqussutaanik oqaluttuuppaa. Evap peqqussut ilisimalluangaaramiuk kingusinnerusukkut pulateriaarsuk oqaloqatigigamiuk issuaqqissaangajassinnaavaa. (1 Mos 3:1-3) Pulateriaarsulli aqqutigalugu oqaluttoq tassaavoq Saatani Diaavulu pissaaneqarnermik pikitsitsiumanermillu pilerissuseqaleriartorsimasoq. (Jaaku 1:14, 15 naleqqiukkit). Saatanip Eva oqarfigaa Guuti sallusoq Evalu naalanngikkuni toqunavianngitsoq Guutitulli ilerumaartoq. (1 Mos 3:4, 5) Eva Saatani upperalugu paarnamik nerinermigut pikitsitsivoq, aamma Adami nereqquaa. (1 Mos 3:6, 17) Diaavulumit salloqittarneqarpoq. (1 Timotheusi 2:14 atuaruk.) Adamip tamanna ajortuliornerusoq nalunngikkaluarlugu nuliani naalappaa. Saatani Diaavulu pulateriaarsuk aqqutigalugu oqaluttoq ikinngutitut pissuseqarpasikkaluarluni akeraavoq naakkittaatsoq salluliornermilu kingunipiluinik ilisimannittoq.

6, 7. Adami Evalu ajortuliormata Jehova qanoq piva?

⁶ Adami Evalu Jehovamut, inuunermik sunillu tamanik ajunngitsunik tunisisumut, pikitsitsipput. Soorunami Jehovap qanorpiaq pisoqarsimasoq ilisimavaa. (1 Nal 28:9; Uss 15:3 atuaruk.) Adamip, Evap Saatanillu Jehovamut qanoq misigissuseqarfiginninnerminnik ersersitsinissaminnut akuerineqarput. Taakkua iliuuserisaat pissutigalugit Jehova Ataataagami aliasungaarsimassaaq. (1 Mos 6:6 naleqqiuguk). Eqqartuussisuugamili ajortuliortut naapertuilluartumik eqqartuuppai.

⁷ Guutip Adami “orpik ajunngitsumillu ajortumillu ilisimalersitsisoq” pillugu ima paasitippaa: ‘Neriffigigaluarukku [ullormi tassani, NW] toqussaatit!’ Adami ajortuliorami immaqa isumaqarpoq seqernup tarrinnginnerani toqussalluni. “Unnulermat” Jehovap Adami Evalu oqaluuppai.  (1 Mos 3:8) Eqqartuussisuugami naapertuilluartoq ajortuliortut tusarnaaqqaarpai. (1 Mos 3:9-13) Taava toqumut eqqartuuppai. (1 Mos 3:14-19) Ulloq taanna Adami Evalu toqusimasuugaluarpata Jehovap inunnut siunertaa naammassineqarnavianngikkaluarpoq. (Es 55:11) Ajortip kingunipilui ingerlaannaq atuutileraluartut Jehovap Adami Evalu siunissamik pitsaanerusumik periarfissaqarsinnaasunik meeraqalersinnaaqqullugit sivisunerusumik inuutippai. Ullormiilli ajortuliorfiannit Adami Evalu toqusutut isigai. Aamma ukiut 1000-t Jehovamut “ullortut ataatsitut” immata “ullormi tassani” toqupput. — 2 Petr 3:8.

8, 9. Adamip ajortuliornera kinguaavinut qanoq kinguneqarpa? (Allaaserisap aallaqqaataani assiliaq takuuk).

⁸ Adamip Evallu meeraat angajoqqaamik ajortuliornerannit sunnerneqarpat? Aap. Romamiunut allakkani 5:12-imi ima allassimavoq: “Inukkut ataasiinnakkut ajorti silarsuarmut [tikiuppoq] ajortikkullu toqu tikiulluni, taamatut toqu inunnut tamanut annguppoq tamarmik ajortuliormata.” Apustili Paulusi nangilluni allappoq “inuup ataatsip naalanngitsuliorneratigut inuit amerlasuut ajortilinngortut”. (Rom 5:19) Abeli aalajaatsoq siullersaalluni toquvoq. (1 Mos 4:8) Kingusinnerusukkut Adamip meerai ernutaalu utoqqalillutillu toqupput. Inuit ajorti toqulu — akeqqat marluk avaqqunneqarsinnaanngitsut — kingornuppaat. Ajorti toqulu Adamip meeraanut timikkut qanorpiaq ingerlatseqqinneqarsimasut nalugaluarlutigu kinguneri takusinnaavavut.

⁹ Ajortip toqullu Biibilimi ‘inuiaat tamarmik saagorisaannut ulimmut inuiaqatigiinni tamani atorneqartumut’ assersuunneqarnerat naleqquppoq. (Es 25:7) Inuup kialuunniit ajorti toqulu avaqqussinnaanngilaa. Taamaattuminguna Biibilimi allassimasoq “Adamimi tamarmik toqusartut”. (1 Kor 15:22) Pissusissamisoorpoq Paulusi ima aperimmat: “Kia kiffaajunnaarsissavaanga timimit matumannga toqup pianit?” Aap, kia Paulusi toqumit annaassinnaavaa? * — Rom 7:24.

10. (a) Jehovap toqumik suujunnaarsitsiumaarnera allassimaffinnit sunit erserpa? (b) Allassimaffinnit taakkunannga Jehova erneralu pillugit suna ilikkarparput?

¹⁰ Jehovap Paulusi annaassinnaavaa. Biibilimi ima allassimavoq: “Toqu nungutinneqassaaq piujunnaarsivillugu. Guutillu Naalakkap isit tamaasa qullingiarumaarpai.” (Es 25:8) Soorlu ataataq meeqqani naalliunnerannut pissutaasumik piujunnaarsitsillunilu meeqqaminik qullingiaasoq, taamatuttaaq Jehovap toqumik suujunnaarsitsinissani nuannaarutigeqaa! Jiisusilu suleqatigissavaa. Korinthimiunut allakkani siullerni 15:22-mi ima allassimavoq: “Kristusimi tamarmik uummartitaajumaarput.” Paulusip apeqqutini “kia kiffaajunnaarsissavaanga?” nammineq ima akivaa: “Guutili qujanarsili Jiisusi-Kristusikkut Naalakkatsigut!” (Rom 7:25) Erseqqippoq Adamip Evallu ajortuliornerata kingorna Jehovap inuit asajunnaanngikkai. Aamma Jiisusip Adamimik Evamillu pinngortitseqataasup inuit suli asavai. (Uss 8:30, 31) Inuilli qanoq ajortimit toqumillu annaanneqarsinnaagamik?

11. Jehovap inuiaat ikiorniarlugit qanoq iliorsimava?

 ¹¹ Jehovap Adami ajortuliorsimasoq toqumut eqqartuummagu inuit tamarmik ajortimik toqumillu kingornussipput. (Rom 5:12, 16) Romamiunut allakkani 5:18-imi nassuarneqarpoq “inuup ataatsip ajortuliornera inuit tamarmik pillagassanngortitaanerannik kinguneqartoq”. Jehovap najoqqutassiaminut naapertuilluartunut akerlianik iliuuseqarnani inuit qanoq ikiorsinnaavai? Apeqqut tamanna Jiisusip akivaa oqarami inuunini “akissatut tunniutissallugu amerlasuut utertinneqaatissaattut”. (Matt 20:28) Jiisusi naammalluinnartuugami utertitsissummik pilersitsisinnaavoq. Utertitsissut tamanna Jehovap isaani qanoq naapertuilluarpa? — 1 Tim 2:5, 6; Luk 1:35.

12. Utertitsissut Jehovap isaani naapertuilluartuusoq suua?

¹² Jiisusi naammalluinnartuugami naassaanngitsumik inuusimasinnaagaluarpoq, soorlu tamanna Jehovap Adamimut siunertarigaluaraa. Jiisusip Ataatani Adamillu kinguaavi asangaaramigit inuunini Adamip annaasaata naleqataa pilliutigaa. Kingusinnerusukkut Jehovap Jiisusi anersaajusutut makitippaa. (1 Petr 3:18) Tamanna Jehovap isaani naapertuilluartuuvoq inuuneq naammalluinnartoq inuunermit naammalluinnartumit taarserneqarmat. Jiisusip Adamip kinguaavi naassaanngitsumik inuulersinnaanissaannik periarfissippai. Taamaattumik Paulusip Jiisusi ‘Adamimik kingullermik’ taavaa, maannakkullu Jiisusi anersaajuvoq “uumassuseqalersitsisoq”. — 1 Kor 15:45.

13. ‘Adami kingulleq’ toqusimasunut qanoq iliuuseqassava?

¹³ Ungasinngitsukkut ‘Adamip kingulliup’ Adamip kinguaavi naassaanngitsumik inuulersikkumaarpai. Taakkununngalu ilaapput itsarli toqusimasut amerlanerit. Taakku nunarsuarmi inuuleqqinnissamut makitinneqarumaarput. — Joh 5:28, 29.

14. Inuit naammalluinnanngissutsiminnit qanoq aniguisinneqarsinnaappat?

¹⁴ Inuit naammalluinnanngissutsiminnit qanoq aniguisinneqarsinnaappat? Tamanna naammassiniarlugu Jehovap qilammi naalagaaffik pilersippaa. Naalagaaffimmini naalakkersuisussat tassaapput Jiisusi Kristusi qinikkallu inuianneersut 144.000-t. (Saqq 3:21 atuaruk.) Jiisusip naalakkersueqatai inuttut naammalluinnanngitsuusimagamik innuttaminnik paasinnittuusinnaapput. Ukiuni 1000-ni Jiisusip naalakkersueqataasalu inuit naammalluinnartunngornissaannut ikiussavaat. — Saqq 20:6.

15, 16. (a) Sooq toqu Biibilimi ‘akeqqatut kingullersaasutut’ taaneqarpa, qaqugulu suujunnaarsitaajumaarpa? (b) Korinthimiunut allakkat siulliit 15:28 naapertorlugu Jiisusi qanoq iliussava?

¹⁵ Ukiut 1000-t naalerneranni inuit naalattut ajortimit toqumillu aniguisinneqassapput. Paulusi ima nassuiaavoq: “[Soorlu] Adamimi tamarmik toqusartut, taamatuttaaq Kristusimi tamarmik uummartitaajumaarput. Tamarmilli tulleriissusissartik malissavaat: Kristusi inereqqaartuulluni, tikiutereerpallu tulliullutik Kristusip pigisai [naalakkersueqatai]. Taavalu naggatissaq nalliukkumaarpoq pissaaneq piginnaatitaanerlu nakuussuserlu suut tamaasa suujunnaarsereerlugit Naalagaaffik Guutimut Ataatamut tunniuppagu. Kristusimi kunngiussaaq akerartuisut tamarmik Guutimit taassuma isigaasa ataannut pisinneqarserlugit. Akeqqani kingullersaalluni toqu suujunnaarsitaajumaarpoq.” (1 Kor 15:22-26) Aap, toqu Adamimit kingornussarineqartoq  naggataatigut piujunnaarsitaajumaarpoq. “Inuiaat tamarmik saagorisaat” naassaanngitsumut peerneqassaaq. — Es 25:7, 8.

¹⁶ Paulusi ima nangippoq: “[Suut] tamarmik taassumunnga naalatsigititaareerpata taava Erneq nammineq naalatsigitikkumaarpoq tamanik imminut naalatsigititsisumut, Guuti tamani tamarsooqqullugu.” (1 Kor 15:28) Jiisusip naalakkersuinerminut siunertaa naammassineqarumaarpoq. Naalagaassutsini Jehovamut tunniuteqqissavaa inuiaallu naammalluinnartut taassumunnga sassartissallugit.

17. Saatani qanoq pineqassava?

¹⁷ Saatani inuiaat naalliutaannut tamanut pisuusoq qanoq pineqassava? Tamanna Saqqummersitani kapitalimi 20-mi akineqarpoq. (Saqq 20:7-15) Tassa ukiut 1000-t naappata Saatanip inaarutaasumik inuiannik naammalluinnartunik misiliinissaa akuerineqassaaq. Kingorna Saatani taassumalu malinnittai naassaanngitsumik suujunnaarsitaajumaarput. Tamannalu ‘toqup aappaanik’ taaneqarpoq. (Saqq 21:8) ‘Toqup aappaanik’ pillarneqartut piujunnaarsitaassammata “toqup aappaa” suujunnaarsinneqassanngilaq. Jehovamut aalajaattuarutta “toqup aappaa” isumakuluutigisariaqanngilarput.

18. Guutip Adamimut suliassiissutaa qanoq inaarutaasumik naammassineqassava?

¹⁸ Taamanikkussamut inuit tamarmik naammalluinnartuullutillu inuunissaminnut naassaanngitsumut Jehovamit akuerisaassapput. Inuit pilluarnerannut akeraasut tamarmik piujunnaarumaarput. Adami naammassinneqataanavianngikkaluartoq Guutip Adamimut suliassiissutaa inaarutaasumik naammassineqassaaq. Taassuma kinguaavisa nunarsuarmik uumasunillu paarinninnissartik nuannaarutigiumaarpaat. Jehovap akeqqat kingullersaannik, toqumik, ungasinngitsukkut suujunnaarsitsinissaa qilanaaringaarsinnaavarput!