1. Kristumiuunerartut palasii sorsunnerni qanoq iliortarpat?

KRISTUMIUT ilumoortut sorsullutik inunnik inuiannit allaneersunik toqutsinissaat Guutip kissaatigaa? Ukiut 100-it kingulliit kristumiuunerartut sorsunnerni uppeqatitik toquttarsimavaat. Katuullit katuuleqatitik aamma naaggaartut naaggaartoqatitik toquttarpaat. Katuullit naaggaartullu palasiisa sakkutuut sorsunnernilu sakkut pilluaqqusarsimavaat. Assersuutigalugu sorsunnersuarmi kingullermi kristumiuunerartut akornanni peqqarniitsuliortoqartuaannarsimavoq.

2, 3. Jehovap Nalunaajaasui sorsunnersuarmi kingullermi kingusinnerusukkullu qanoq iliorsimappat, aamma sooq?

² Jehovap Nalunaajaasui sorsunnersuarmi kingullermi sorsoqataappat? Naamik, inuiaqatigiit isumaqatigiinngissutaannut sorsunnerannullu akuliunneq ajorput. Sooq? Jiisusip ajoqersuutai naalakkusukkamikkit allanullu asanninnermut tunngatillugu maligassiaa malikkusukkamikku. Jiisusi ima oqarpoq: “Asaqatigiikkussi tamatumuuna tamarmik paasissavaat ajoqersugarigissi.” (Joh 13:35) Aammattaaq Nalunaajaasut najoqqutassiat Paulusip kristumiunut korinthimiittunut allagaaniittut maleruarusuppaat. — 2 Korinthimiut 10:3, 4 atuakkit.

³ Kristumiut ilumoortut nalunngeqatiginnissutaat Biibilimit ilinniartinneqarsimammat taakku sorsunnernut tapersersuerusunnatillu peqataajumanngillat. Kristumiutut ilumoortutut inoorusukkamik  Jehovap Nalunaajaasuisa ilarpassui tuusintilikkuutaat malersorneqarsimapput. Inuusuttut, utoqqaat, angutit arnallu parnaarussaasarsimapput tigusanullu inissiarsuarniitinneqartarlutik allaallu ilaat toqutaallutik. Taamatut pisoqarpoq Tysklandimi nazistit naalakkersuinerisa nalaanni. Jehovap Nalunaajaasuisa Europami malersorneqarnerminni akisussaaffitsik — Jehovap naalagaaffianik nutaarsiassamik nuannersumik oqaluussissutiginninneq — puiunngisaannarpaat. Sumiikkaluaraangamilluunniit, allaat parnaarussivinni, tigusat inissiarsuini aallarussaaffimminnilu, oqaluussiuarput. * Ukiut arlallit tamatuma kingorna 1994-imi Rwandami inunnik toqoraanersuaqarmat Nalunaajaasut toqoraanermut peqataanngillat. Aamma Jugoslaviaasimasumi sorsuuttoqarmat sorsoqataanngillat.

4. Jehovap Nalunaajaasuisa sorsoqataajumannginnerat inunnut allanut qanoq sunniuteqarsimava?

⁴ Jehovap Nalunaajaasuisa sorsoqataajumannginnerat pissutigalugu inuppassuit nunanit tamalaaneersut qularunnaarsinneqarsimapput Nalunaajaasut Guutimut inoqatiminnullu asannittuusut kristumiuusullu ilumoortut. Inuilli allat allanik pissuteqarlutik qulariunnaarsimavaat Jehovap Nalunaajaasui kristumiuusut ilumoortut. Pissutaasut taakkua ilaat sammeriartigit.

5. Jiisusip ajoqersugaasa allanngorneq suna sungiunniartariaqarpaat?

⁵ Jiisusip allanut erseqqissarpaa Guutip naalagaaffianik nutaarsiassaq nuannersoq pillugu oqaluussineq suliaasoq nunarsuarmi pingaaruteqarnerpaaq. Jiisusip oqaluussilernermini ajoqersukkat aqqaneq-marluk toqqarpai nunarsuaq tamakkerlugu suliarineqartussamik suliaqaleqqullugit. Tamatuma kingorna Jiisusip ajoqersukkat 70-it * oqaluussinissaannik ilinniartippai. (Luk 6:13; 10:1) Aallaqqaammut ajoqersukkani juutinut oqaluussiartorniassammata ilinniartippai, kingusinnerusukkullu oqarfigai nutaarsiassaq nuannersoq inunnut nunanit tamalaaneersunut oqaluussissutigissagaat. Inunnut juutiunngitsunut oqaluussineq ajoqersukkanut juutiusunut allannguuterujussuuvoq! — ApS 1:8.

6. Jehovap kinaassusersiortuunnginnera Petrusip qanoq paasilerpaa?

⁶ Juutiunngitsoq kipineqanngitsoq kristumiunngortoq siulleq tassaavoq Corneliusi. Jehovap apustili Petrusi oqaluussiartortillugu Corneliusip angerlarsimaffianut aallartippaa. Petrusi najuutsillugu Jehovap Corneliusi ilaqutaalu anersaamik illernartumik tanippai. Petrusip paasilerpaa Guuti kinaassusersiortuunngitsoq naggueqatigiillu aalajangersimasut allanit pitsaanerusutut isiginngikkai. Jehovap piumasaraa inuit inuiaqatigiinnit tamalaaneersut sallusuissut tusarlugulu paasissagaat. Taamaattumik Petrusi peqqusivoq Corneliusi ilaqutaalu kuineqassasut. (ApS 10:9-48) Taamanimiilli Petrusi Jiisusillu ajoqersugai allat inunnut inuiaqatigiinnit tamaneersunut oqaluussisalerput.

7, 8. Inuit nutaarsiassaq nuannersoq tusarniassammassuk Jehovap Nalunaajaasui qanoq iliorpat? (Allaaserisap aallaqqaataani asseq takuuk).

⁷ Ullumikkut Jehovap peqatigiissortaani siulersuisut nunarsuaq tamakkerlugu nutaarsiassamik nuannersumik oqaluussissutiginninneq ilinniartitsinerlu aallussilluarlutik tapersersortarlugulu aaqqissuuttarpaat. Maannakkut nunarsuaq tamakkerlugu Jehovap Nalunaajaasui 8 millioningajaapput. Oqaatsini 600-nit amerlanerusuni aallussilluarlutik oqaluussisarput — oqaatsillu atorneqartartut amerliartorput. Illumiit illumut aqqusinernilu oqaluussisarput, aamma oqaluussinerminni nerriviit atuagaasiviilluunniit angallattakkat atorlugit Biibililersaarutit takutittarpaat. Jehovap Nalunaajaasuisa periaatsit taakku kisimik atortarmatigit inuit allat naluneq ajorpaat taakku Nalunaajaasuusut.

⁸ Jehovap peqatigiissortaani qatanngutit 2900-nit amerlanerusut Biibilimik  Biibililersaarutinillu nutserisutut ilinniartinneqarsimapput. Allaat oqaatsinut ilisimaneqarpianngitsunut nutsigaqarpoq. Assersuutigalugu ullumikkut Spaniami Jehovap Nalunaajaasui oqaatsinut catalanimik taaneqartunut Biibililersaarutinik nutserisarput. Ingammik nalitsinni illoqarfinni Valenciami Alicantemilu, qeqertani Balearini nunamilu Andorrami inuit catalanitut oqaluttartut amerliartorput. Ullumikkullu inuit millionillit catalanitut oqaluttarput. Jehovap Nalunaajaasuisa nutserisarnerat iluaqutigalugu catalanitut oqaluttartut uummataannik killiisunik ataatsimiittoqartarlunilu Biibililersaaruteqarpoq.

9, 10. Jehovap peqatigiissortaasa sallusuissut pillugu inunnik ilinniartitserusunnerat qanoq uppernarsarneqarpa?

⁹ Nunarsuaq tamakkerlugu Biibililersaarutinik nutserisoqartarlunilu inuit namminneq oqaasii atorlugit ilinniartitsisoqartarpoq. Assersuutigalugu Mexicomi inuit amerlanerit Spaniamiutut oqaluttaraluartut inuppassuit angerlarsimaffimminni oqaatsit allat atortarpaat. Oqaatsit taakkua ilagaat maya. Nalunaajaasut mayatut nutserisartut nunap immikkoortortaani mayatut oqaluttoqarfiusuni najugaqartinneqarput. Nutserisartut ulluinnarni mayatut oqalussinnaallutillu tusaasinnaagamik Biibililersaarutinik mayatut oqaluttartut paasilluarsinnaasaannik nutserisinnaapput. Aamma Nepali assersuutigisinnaavarput. Nepalimi oqaatsit assigiinngitsut 120-t missaat atorneqartarput. Nepalimiut 29 millioninit amerlanerupput, taakkualu ilaasa 10 millioninit amerlanerusut oqaatsit nepalimik taaneqartut atornerusarpaat, inuppassuillu allat nepali oqaatsitut pingaannginnerusutut atortarpaat. Ullumikkut Biibililersaarutit nepalitut nutserneqartarput.

¹⁰ Oqaatsinut amerlasuunut nutserineq Jehovap peqatigiissortaasa nunarsuaq tamakkerlugu oqaluussinermik akisussaaffimminnik pimoorussinerannut uppernarsaataavoq. Jehovap Nalunaajaasuisa naqitaaqqat, quppersakkat atuagassiallu millionillit akeqanngitsumik agguaattarpaat. Aap, namminneq kajumissutsiminnit suliartik aningaasatigut tapersersortarpaat. Jiisusip ilitsersuutaa una malippaat: “Akeqanngitsumik tunineqarpusi, akeqanngitsumik tunisigitsi!” — Matt 10:8.

11, 12. Nunarsuaq tamakkerlugu oqaluussisarlutalu ilinniartitsisarnerput inuppassuit qanoq isumaqarfigaat?

¹¹ Jehovap Nalunaajaasui sallusuissummiinnertik qularutiginnginnamikku inunnut inuiaqatigiinnit tamalaaneersunut oqaluussiniarnerminni pimoorussisuupput. Nalunaajaasut ilarpassui inooriaatsiminnik pisariillisaallutik, oqaatsinik allanik ilinniarlutik kulturinullu allanut naleqqussarsimapput.  Nunarsuaq tamakkerlugu oqaluussisarnerput pissutigalugu inuppassuit qularutiginngilaat Jehovap Nalunaajaasui Jiisusip Kristusip maligassiaanik malinnittuusut ilumoortut.

¹² Nalunaajaasut taamaaliorput sallusuissummiinnertik upperilluinnaramikku. Suut pissutigerpiarlugit qatanngutitta ilaasa sallusuissummiinnertik upperilluinnarsinnaavaat? — Rom 14:17, 18 atuakkit.

13. Jehovap Nalunaajaasuisa peqatigiiffitsik qanoq minguitsuujuartippaat?

¹³ Sooq qatanngutitta sallusuissummiinnertik upperilluinnarsimavaat? Pissutaasut assigiinngitsorpassuit eqqartorsinnaavaat. Qatanngut angut ukiorpassuarni Jehovamut kiffartortoq ima oqarpoq: “Kikkut siunnersorneqassanersut perorsaatissinneqassanersulluunniit apeqqutaatinnagu Jehovap peqatigiissortaasa ileqqussatigut minguitsuujuarnissaannut sapinngisaq tamaat iliuuseqartoqartarpoq.” Jehovap innuttai qanoq minguitsuujuarsinnaappat? Tamarmik immikkut Jiisusi ajoqersugaalu ilaarlugit sapinngisartik tamaat Guutip oqaasia maleruarniarsaraat. Nalunaajaasut ikittuinnaat Guutip eqqortunut eqqunngitsunullu najoqqutassiaanik maleruaarusussimannginnertik pissutigalugu ilagiinnut ilaajunnaarsinneqarput. Jehovap Nalunaajaasui amerlanerit Jehovap minguitsutut isigisaanik inooriaaseqarput. Taakkua ilaat siornatigut Guutip iluarinngisaanik iliuuseqarsimagaluarlutik allannguisimapput Guutillu najoqqutassiai naapertorlugit inuulerlutik. — 1 Kor 6:9-11 atuakkit.

14. Ilagiinnut ilaajunnaarsitaasimasut ilarpassui qanoq iliorsimappat, tamannalu qanoq kinguneqarpa?

¹⁴ Biibilimi kristumiut peqquneqarput Guutimut naalakkusunngitsut ilagiinnut ilaajunnaarsinneqartassasut. Qujanartumilli taakkua ilaat tuusintillit kingusinnerusukkut utersimapput iliuuserisimasartik peqqissimissutigigamikku. (2 Kor 2:6-8 atuakkit.) Nalunaajaasut najoqqutassianit Biibilimiittunit tamatigut siulersortinnerat pissutigalugu ilagiit minguitsuujuarput. Tamannalu pissutigalugu upperilluinnarpaat peqatigiiffitsik Guutimit iluarisaasoq. Upperisarsioqatigeerpassuit allat ilaasortamik iliuusii qanoq ittulluunniit akuerigaluaraat Nalunaajaasut Jehovap najoqqutassiai naapertorlugit inooriaaseqarput. Tamannalu pissutigalugu inuppassuit Jehovap Nalunaajaasuisa sallusuissummiinnerat qularunnaarutigisimavaat.

15. Suna pissutigalugu qatanngutip angutip sallusuissummiinnini qularunnaarutigisimavaa?

¹⁵ Nalunaajaasut allat sooq sallusuissummiinnertik upperilluinnarpaat? Qatanngutip angutip 54-inik ukiullip inuusuttuaraanerminiilli Jehovamut kiffartortup tunngaviusut pingasut pingaarutillit uku uppernerminut pissutaanerarpai: (1) Guuti piuvoq, (2) Biibili Guutimit isumassarsiarititaavoq, aamma (3) Jehovap Nalunaajaasui kisiartaallutik Guutip piumasaatut ullumikkut nunarsuarmi iliorput. Ima oqarpoq: “Ukiut ingerlaneranni nammineq atuaqqissaarninni tunngaviusut pingasut taakku misissortarpakka imminullu aperalunga ilumut suli taamaannersut. Ukiut ingerlaneranni tunngaviusut pingasut taakkua  ilumoornerat uppernarsisinneqarnerujartuinnarsimavoq, uppernera nakussatsinneqarlunilu ilumut sallusuissummiinnerput qularunnaarutiginerujartuinnarsimavara.”

16. Suna pissutigalugu qatanngutip arnap sallusuissummiinnini qularunnaarutigisimavaa?

¹⁶ Qatanngut uilik Jehovap Nalunaajaasuisa qullersaqarfianni New Yorkimiittumi sulisoq Jehovap peqatigiissortai pillugit ima nassuiaavoq: “Peqatigiiffiuvoq kisiartaalluni Jehovap aqqanik tusarliussisartoq.” Nangipporlu tamanna paasinarluinnartoq, Biibilimimi Jehovap aqqa 7000-t missaannik atorneqarmat. Aamma ima oqarpoq: “Kajumissaarut una Nalunaarsuutit aappaanni 16:9-mi allassimasoq pingaartippara: ‘[Jehovap] nunarsuarmiittut tamaasa takusinnaavai uummatimikkut iluunngarlutik imminik tunaarinnittut pissaanermigut ikiorsinnaallugit.’ Sallusuissummi paasivara qanoq uummatikkut iluunngarlunga Jehovamik tunaarinnissinnaanerlunga Jehovap pissaanermigut ikiorsinnaaniassammanga. Jehovamut attaveqarnera sunit tamanit uannut naleqarnerungaarpoq. Aamma Jiisusip Guutimik ilisarisimannilluinnarnermik nakussatsissutigisannik aqqutissiuussinera qujamasuutigingaarpara.”

17. Suna qatanngutip angutip guuteqannginneraasimasup qularunnaarutigisimavaa, aamma sooq?

¹⁷ Qatanngut angut guuteqannginneraasimasoq ima oqarpoq: “Pinngortitarsuaq pissutigalugu qularunnaarutigaara Guutip inuiaat inuunermik nuannaarutiginninnissaannik kissaateqarnera naalliuutinillu akuerinnittuaannarnaviannginnera. Aamma silarsuaq guutiitsuunngornerujartortillugu Jehovap innuttai uppernikkut, aallussilluarnikkut asanninnikkullu ineriartortuarput. Jehovap anersaava taamatut ullumikkut tupinnartuliorsinnaasutuaavoq.” — 1 Petr 4:1-4 atuakkit.

18. Qatanngutit angutit marluk sallusuissummiinnerminnik qularutiginninnginnertik pillugu eqqaasaat qanoq isumaqarfigaajuk?

¹⁸ Qatanngut angut alla ukiorpassuarni Nalunaajaasuusoq sallusuissummiinnerminik qularunnaarsinneqarsimanini pillugu ima nassuiaavoq: “Ukiut ingerlaneranni nammineq atuaqqissaartarninnit qularunnaarsinneqarpunga Nalunaajaasut kristumiut siulliit maligassiaat pimoorussillutik malinniarsarigaat. Nunani allani angalasarninni Jehovap Nalunaajaasuisa ataasiussuseqarnerat nammineq takusimavara. Sallusuissut Biibilimeersoq nalerisimaarutigalugulu pilluaatigaara.” Qatanngutip angutip 60-it sinnerlugit ukiullip eqqaavaa Jehovap Nalunaajaasui Jiisusimik upperinnilluinnartuusut. Ima nassuiaavoq: “Jiisusip inuunerata kiffartorneratalu misissoqqissaarneratigut taassuma maligassiaa qujamasuutigaarput. Jiisusi Kristusi aqqutigalugu Guutimut attaveqarluarnerujumagatta inooriaaserput allanngortissimavarput. Kristusip utertitsissutitut pilliutaata annaassissutaanera upperaarput. Nalunngilarpullu Kristusi toqusunit makititaasimasoq. Inuit tatiginartut tamatuma ilumoorneranik uppernarsaasimapput.” — 1 Kor 15:3-8 atuakkit.

19, 20. (a) Paulusip Romamiunut allakkamini akisussaaffik suna allaatigaa? (b) Jehovamut kiffartortut tamarmik susariaqarpat?

¹⁹ Kristumiut ilumoortut inunnik allanik asannikkamik sallusuissut ilikkagartik allanut oqaluussissutigerusuppaat. Paulusip ilagiit Romamiittut allaffigai Jiisusip ajoqersugaasa ilumoortut oqaluussineq akisussaaffigigaat. Ima allappoq: “[Qaninnit] nassuerutigigukku Jiisusi Naalagaasoq, uummatikkullu upperuit Guutip toqusunit makitikkaa, taava annaanneqassaatit. Uummatikkummi upperneq iluartuutitaassutissaavoq, qanermillu nassuerneq annaanneqaatissaalluni.” — Rom 10:9, 10.

²⁰ Jehovap Nalunaajaasuisa sallusuissummiinnertik qulakkeersimagamikku Guutip naalagaaffianik nutaarsiassaq nuannersoq pillugu allanut oqaluussineq immikkut pisinnaatitaaffittut isigaat. Taamaattumik illit Biibili pillugu allanik ilinniartitsinissat anguniagariinnarnagu aammali inooriaatsikkut sallusuissummiinninnik qularutiginninnginnerit allanut ersersiguk.