1. Sooq Guutip kiffaasa “naalliunnartorpassuit” misigisarpaat?

INUUNERMIK naassaanngitsumik akissarsisinneqannginnitsinni “naalliunnartorpassuit” atoqqaassagivut tupaallaatigaajuk? Ilimananngilaq. Qanorluunniimmi sivisutigisumik sallusuissummiissimagaluarutta tamatta misilinneqartarpugut. Saatanip silarsuaani inuugatta tamanna ilimagiinnarsinnaavarput. — Saqq 12:12.

2. (a) Inuit naammalluinnanngitsut tamarmik ajornartorsiutigisinnaasaasa saniatigut kristumiut aamma sunik nalaataqartarpat? (Allaaserisap aallaqqaataani asseq takuuk). (b) Malersuinermut kina pisuua, qanorlu tamanna nalunngilarput?

² Kristumiut ajornartorsiutit ‘inuit atortagaattut ittut’ saniatigut aamma artornarsinnaasut allat migisisarpaat. (1 Kor 10:13) Assersuutigalugu Guutimut ilumoorfiginnittuarnertik pissutigalugu peqqarniitsumik malersorneqartarput. Jiisusip ajoqersukkani ima oqarfigai: “Kiffaq naalakkaminit annerunngilaq. Uanga qinugisimaguninnga ilississaaq qinugiumaarpaasi.” (Joh 15:20) Qinuginninnermut, imaluunniit malersuinermut, Jiisusip eqqaasaanut kina pisuua? Pisuusoq pingaarneq Biibilimi “løvitut uiannisaartutut” Guutip innuttaanik ‘iisassarsiortutut’ allaatigineqarpoq, taannalu tassaavoq Saatani. (1 Petr 5:8) Saatanip sapinngisani  tamaat Jehovamut assuarnaakkunnaarsinniarsuataarpaatigut. Apustili Paulusi qanoq ilinniarfigisinnaaneripput misissoriartigu.

3-5. (a) Paulusi Lystrami qanoq misilinneqarpa? (b) “Naalliunnartorpassuit” pillugit eqqaasai qanoq nakussatsinnartuusinnaappat?

³ Guutimut ilumoorfiginninnini pissutigalugu Paulusi qasseeriarluni misilinneqarpoq. (2 Kor 11:23-27) Ilaanni Lystramiinnermini Paulusip angut inunnguuseralugu nukillaarsimasoq ajorunnaarsippaa. Tupinnartuliaq tamanna pissutigalugu Paulusi Barnabalu inunnit guutiusorineqaramik pallorfigineqalerput. Taamaalioqqunagilli inerterpaat! Sivitsunngitsoq juutit upperisarsiornikkut siuttut tikiupput Paulusi Barnabalu oqaluuserinerlullugit. Lystramiut salluliuutit taakku upperalugit isummartik allanngortipallappaat. Paulusilu ujaqqanik milloorpaat toqusorigamikkulu qimallugu. — ApS 14:8-19.

⁴ Paulusi Barnabalu illoqarfik Derbe tikeraareerlugu “Lystramut, Ikonionimut Antiokiamullu uterput. Ajoqersukkat nakussatsippaat, oqaaqqissaarpaallu uppernertik aalajangiuteqqullugu oqarlutik: ‘Naalliunnartorpassuit atoqqaarlugit Guutip naalagaaffianut isissaagut.’” (ApS 14:21, 22) “Naalliunnartorpassuit” atornissaat nikallornarpasissinnaagaluarpoq. Allassimavorli Paulusip Barnaballu ‘ajoqersukkat nakussatsikkaat’ oqarfigalugit naalliunnartorpassuarnik nalaataqassasut. Tamannali qanoq nakussatsinnartuusinnaagami?

⁵ Tamanna Paulusip oqaasiinit akissutissarsisinnaavarput. Imami oqarpoq: “Naalliunnartorpassuit atoqqaarlugit Guutip naalagaaffianut isissaagut.” Imalu oqanngilaq: “Naalliunnartorpassuit naammagalugit atussavavut.” Aap, Paulusip Guutimut aalajaattuartut pilluaqquneqarumaarnerat erseqqissarpaa. Akissarsiassarlu tamanna piviusuuvoq. Jiisusi ima oqarpoq: “[Naggatissamut] nikallujuitsuusoq taanna annaanneqassaaq.” — Matt 10:22.

6. Nikallujuitsut qanoq akissarsisinneqassappat?

⁶ Nikallujuilluta pinertusaarutta akissarsisinneqassaagut. Kristumiut tanitat qilammi Jiisusi kunngioqatigalugu toqujuissuseq akissarsiassaraat. ‘Savat allat’ nunarsuarmi aarlerinartoqarfiunngitsumi inuuneq naassaanngitsoq akissarsiassaraat. (Joh 10:16; 2 Petr 3:13) Tamatumali pinnginnerani “naalliunnartorpassuit” atoqqaassavavut. ‘Naalliunnartut’ nalaassinnaasatta ilaat marluk sammeriartigit.

7. Qanoq saassunneqarsinnaavugut?

⁷ Jiisusi ima siulittuivoq: “Eqqartuussisunut pisikkumaarpaasi, synagoginilu iperartorneqarumaarpusi, naalagaatitanullu kunnginullu sassartinneqarumaarpusi uanga pillunga taakkununnga nalunaajaatissamik.” (Mark 13:9) Jiisusip oqaasiinit erserpoq kristumiut ilaat malersorneqarnermikkut saassunneqarumaartut. Ilaannikkut upperisarsiornikkut politikkikkulluunniit siuttuusut saassussinermut pisuusarput. (ApS 5:27, 28) Paulusip maligassiaa eqqarsaatigeqqilaariaruk. Malersorneqarnissani nalunngikkaluarlugu sapiuppa? Naamerluinnaq. — ApS 20:22, 23 atuakkit.

8, 9. Paulusip qanoq ersersippaa pinertusaartuarnissani aalajangiusimallugu, ullumikkullu qatanngutit saassunneqarnertik qanoq naammagalugu atorsimavaat?

⁸ Paulusi Saatanimit saassunneqaraluarluni sapiitsuuvoq. Taanna ima oqarpoq: “Nammineq inuunera pingaartinngilara naammagalugu naammassisinnaagukkit arpannera kiffartuullu Naalakkamit Jiisusimit pisara, tassa Guutip saammaanneranik iivangkiiliumik nalunaajaatiginninneq.” (ApS 20:24) Paulusip malersorneqarnissani annilaanngatiginngilluinnarlugu pinertusaartuarnissani aalajangiusimavaa. Qanorluunniit misilinneqaraluaruni peqqissaartumik nalunaajaanissani anguniagaraa.

 ⁹ Ullumikkut qatannguterpassuavut Jehovamut ilumoorfiginnittuarput. Assersuutigalugu nunat ilaanni Nalunaajaasut politikkimut tunngasunut akuliukkusunnginnamik eqqartuunneqaqqaaratik parnaarunneqarsimapput. Maannalu ukiut 20-t pallillugit parnaarussaaqqapput. Kimilluunniit, allaat ilaquttaminnit, pulaarneqaqqusaanngillat. Aamma ilaat unatagaallutillu naalliutsitaasimapput.

10. Sooq misilinneqariataarnissarput annilaangalissutigissanngilarput?

¹⁰ Qatanngutit allat ilimaginngisaminnik misilinneqariataartarput. Illit taamatut nalaataqaruit qunulinngisaannarit. Josefi eqqarsaatigiuk. Taannami inussianngortinneqariataarpoq. Jehovalli “najorpaa atugarliuutaanit tamanit aniguisillugu”. (ApS 7:9, 10) Jehovap aamma illit taamatut ikiorsinnaavaatit. Puiunngisaannaruk Jehovap ‘mianerinnitsini ussernartunit [misilinneqarnermit, NW] aniguisinneq sapinngikkai’. (2 Petr 2:9) Aap, Jehovamik tatiginninnissannut sapiillutillu misilinneqarnermi pinertusaarnissannut pissutissaqarluarputit. Jehovap silarsuarmit ajortumit aniguisissinnaagaatit naassaanngitsumillu inuulersissinnaagaatit qularutiginngilluinnaruk. — 1 Petr 5:8, 9. 

11. Toqqaannartumik saassunneqarneq toqqaannanngitsumillu saassunneqarneq qanoq allaassuteqarpat?

¹¹ Aamma toqqaannanngitsumik saassunneqarsinnaavugut. Taamatut saassunneqarneq malersorneqarnermit qanoq allaanerua? Malersorneqarnikkut toqqaannartumik saassunneqarneq ulussaarsuartut illumik aseruititseriataartutut issinnaavoq. Toqqaannanngitsumilli saassunneqarneq isugutattut oquttullu illumik arriitsumik asiutitsiartortutut ippoq. Immaqalu illu asiusimasoq aatsaat kingusinaarluni paasineqarsinnaavoq.

12. (a) Saatanip toqqaannanngitsumik saassusseriaasiisa ilaat suua, aamma sooq taama sunniuteqarluartigaa? (b) Paulusi nikallungasarnerminit qanoq sunnerneqarpa?

¹² Saatanip Jehovamik ikinnguteqarunnaarsinniarsarivaatit. Malersuinermigut toqqaannartumik saassussinerit toqqaannanngitsumillu saassussinerit atortarpai. Toqqaannanngitsumik saassusseriaatsit sunniuteqarluartut ilagaat nikallunganeq. Taassumami nalunngilaa tamanna Guutimik attaveqarnitsinnik sanngiillissutigiartorsinnaagipput. Apustili Paulusi ilaannikkut nikallungasarpoq. (Rom 7:21-24 atuakkit.) Anersaakkut nukittuujugaluarluni siulersuisoqatigiinnullu ilaasortaagunaraluarluni sooq nikallungasarpa? Paulusip naammalluinnanngissutsini nikalluutigigamiuk. Eqqortuliorusuttaraluarluni kukkusarpoq. Illit taamatut akiugaqaruit tuppallernarpoq nalunagu Paulusi ilittut misigisimasoq, ilaa?

13, 14. (a) Sooq Guutip innuttaasa ilaat nikallungasarpat? (b) Kiap upperunnaarnissarput kissaatigaa, aamma sooq?

¹³ Ilaannikkut qatannguterpassuavut nikallungasarput, isumakulullutik allaallu naleqanngitsutut misigisarlutik. Assersuutigalugu qatanngut arnaq pioneriusoq aallussilluartoq ima oqaluttuarpoq: “Kukkussutigisimasara eqqarsaatigeqattaagiinnaavippara, tamannalu ajornerulissutigaara. Kukkussutigisimasakka tamaasa eqqarsaatigigaangakkit misigisarpunga kimilluunniit, allaat Jehovamit, asaneqarsinnaananga.”

¹⁴ Sooq Jehovamut kiffartortut aallussilluartut ilaat, soorlu qatanngut arnaq eqqaaneqaqqammersoq, taamatut nikallortoorsinnaappat? Pissutaasut arlaliusinnaapput. Immaqa pissutsit atukkatik pillugit imminnullu ajortumik eqqarsaatigigajuttarput. (Uss 15:15) Allat peqqiilliornertik pissutigalugu misigissutsinik nikallornartunik akiugaqartarput. Pissutaasut suugaluarpataluunniit eqqaamajuk kina taamatut misigititsiniaasoq.  Kiap nikallorluinnarluta Jehovamut kiffartorunnaarnissarput kissaatigaa? Soorunami taamatut kissaateqartoq tassaavoq Saatani. Taanna toqusussatut eqqartuunneqareerpoq, taassumalu misigitikkusuppaatit aamma illit neriuutissaqanngitsutit. (Saqq 20:10) Saatanip isumakuluuteqalersitsinermigut aallussilluarunnaarsikkusuppaatigut. Toqqaannartumik toqqaannanngitsumilluunniit saassussisaraluaruniluunniit Guutimut kiffartorunnaarnissarput anguniagaraa. Pingaaruteqarluinnarpoq paasissallugu Guutip innuttai taassumunnga assuarnaassusertik illersorniarlugu anersaakkut sorsuttut!

15. Paulusip allagai naapertorlugit suna aalajangiusimavarput?

¹⁵ Akiuuttuarnissat aalajangiusimajuk. Akissarsiassaq eqqarsaatigiuaruk. Paulusip kristumiut Korinthimiittut ima allaffigai: “Nikallunngilagut, naammi inuuserput qalleq aseroriartoraluartillugu ilorleq ullut tamaasa nutaanngoriartorpoq. Naalliuutitta maanna atukkatta oqitsuusut peqalersippaatigut naalannassusermik angingaartumik taamalu atsigiuarluni ataavartussamik.” — 2 Kor 4:16, 17.

16. Sooq misilinneqarnissamut maannangaaq piareersarnissarput pingaaruteqarpa?

¹⁶ Saatanip ‘qoqassiiniutit’, imaluunniit pilersaarutipiluit, assigiinngitsorpassuit sakkugisarpai. (Ef 6:11) Taamaattumik kajumissaarut una maleruartigu: “Uppernikkut aalajaallusi assortorsiuk.” (1 Petr 5:9) Aalajaattuarumagutta maanna isumakkut uummatikkullu piareersartariaqarpugut eqqortuliornissamut kajumillutalu piareersimaniassagatta. Assersuuteqariarta: Sakkutuut sorsukkiartornissartik sioqquterujussuarlugu sorsunnissamut immikkut ittumik sungiusarneqartarput. Taamatuttaaq Jehovap anersaakkut  sakkutuui sungiusartariaqarput. Siunissami qanoq akiugaqassanerluta nalugatsigu sorsunnginnitsinni sungiusarnissarput silatusaarnerussaaq, ilaa? Apustilip Paulusip kristumiut ima allaffigai: “Immissinnik paasiniaaffiginiaritsi uppernermiinnersusi! Immissinnik misiligitsi!” — 2 Kor 13:5.

17-19. (a) Qanoq imminut misissorsinnaavugut? (b) Inuusuttut atuarfimmi upperisaminnik nassuiaalluarnissamut qanoq piareersarsinnaappat?

¹⁷ Imminut misissorniarlutit ima aperisinnaavutit: ‘Qinukulasarpunga? Allat eqqunngitsuliornissamut kajumissaaraangaminnga Guuti inunnit naalannerusarpara? Ataatsimiinnerit tamatigut najuuffigisarpakka? Upperisara nakimaallunga eqqartukulasarpara? Qatanngutikka kukkussutaannik isumakkeerfigipallattarpakka, soorlu isumakkeerfigineqapallannissara kissaatigigiga? Utoqqaanertat ilagiinniittut siulersuisullu peqatigiissortatsinniittut naalattarpakka?’

¹⁸ Uppeqatiginngisatsinnit eqqarsartaaserput sunnerniarneqartarpoq. Qatanngutitta inuusuttut ilarpassuisa atuarfinni ilinniarfinnilu nakimaallutik upperisartik illersorniartarpaat. Upperisartimmi pillugu oqaluussinissartik kannguginagulu annilaanngatiginngilaat. Sapiitsuunissaminnut suut iluaqutigisimavaat? Atuagassiaatitsinni siunnersuutit. Assersuutigalugu Vågn op!-imi juuli 2009-moortumi siunnersuutigineqarpoq atuaqatinnit aperineqaruit sooq pinngoriartuaarsimaneq upperinnginnerlugu ima akisinnaasutit: “Sooq pinngoriartuaarsimaneq upperissagakku? Allaat ilisimatuut isumaqataanngillat, taakkulu paasisimasartuugaluarput!” Ilissi angajoqqaajususi, meeqqasi atuarfimmi upperisaminnik nassuiaalluarsinnaaniassammata piareersaqatigiittarnissarsi piffissaqarfigisarsiuk.

¹⁹ Soorunami upperisatsinnik nassuiaalluarnissarput Jehovallu peqqussutigisaanik allanik iliuuseqarnissarput ajornaatsuujuaannaanngilaq. Assersuutigalugu imaassinnaavoq ulloq naallugu suleruloornerup kingorna ataatsimiigiarniarluta immitsinnut piumaffigisariaqartugut. Imaluunniit ullaakkut oqaluussiartorniarluta makiaarnissarput ajornakusoortissinnaavarput. Eqqaamajulli ajunngitsunik ileqquliussereersimaguit siunissami annertunerusunik misilinneqaatigineqarsinnaasunut piareersimalluarnerusinnaasutit.

20, 21. (a) Utertitsissut pillugu eqqarsaatiginneqqissaartarneq nikallornartunik eqqarsaateqarunnaarniarnissatsinnut qanoq iluaqutigisinnaavarput? (b) Sunissarput aalajangiusimasariaqarparput?

²⁰ Taavami toqqaannanngitsumik saassunneqarutta? Assersuutigalugu nikallornartunik eqqarsaateqarneq qanoq qaangersinnaagatsigu? Iluaqutiginerpaasinnaasatta ilagaat Jiisusip utertitsissutitut pilliutaa pillugu eqqarsaatiginneqqissaartarnissaq. Apustili Paulusi taamaaliorsimavoq. Ilaannikkut misigissutsikkut ajorsuataartarpoq. Nalunngilaali Kristusi inuit naammalluinnartut pinnagit inuit ajortillit pillugit toqusoq. Ima allappoq: “Inuuserisara inuuseraara upperfigalugu Guutip ernera uannik asannittoq uangalu pillunga imminut tunniuttoq.” (Gal 2:20) Aap, Paulusip utertitsissut upperaa, imminullu tunngatinnerarpaa.

²¹ Illittaaq taamatut isiginnittaaseqaruit, tassa utertitsissut Jehovap ilinnut tunissutaatut isigigukku, iluaqutigingaarsinnaavat. Imaanngilarli nikallungajunnaariataarsinnaasutit. Ilaat silarsuassap nutaap atuutilernissaata tungaanut nikallungasarnermik akiugaqartuarumaarput. Puiunngisaannarulli pinertusaarlutik akiuuttuartut pilluaqquneqarumaartut. Ullut tamaasa Guutip naalagaaffiata tikiunnissaanut qanilliartortuarpugut. Tikiuppallu nunarsuaq tamakkerlugu eqqissineq atuutilerumaarpoq, inuillu tamarmik naammalluinnartunngorumaarput. Taamaattumik naalliunnartorpassuit atoqqaartariaqaraluarlugit Guutip naalagaaffianut isernissat aalajangiusimajuk.