1. Nutaarsiassamik nuannersumik tamaviaarlutik oqaluusseqataasut Paulusip qanoq isiginnittaaseqarfigai?

APUSTILIP Paulusip qatanngutit angutit arnallu nutaarsiassamik nuannersumik tamaviaarlutik oqaluusseqataasut eqqaamavai. Ima allappoq: ‘Kipisuitsumik eqqaamasarparput uppernissigut qanoq sulisartusi asanninnissigullu qanoq assorortartusi, qanorlu nikallujuitsusi Naalakkatsinnut Jiisusi Kristusimut Guutip ataatatta saani neriunnissigut.’ (1 Th 1:3, 1936) Jehovap aamma innuttami imminut kiffartornerminni iliuuserisartagaat, annikitsut annertuullu, tamaasa eqqaamallugillu pingaartippai. — Hebr 6:10.

2. Allaaserisami matumani suut sammissavavut?

² Itsaq ullumikkullu kristumiut Jehovamut kiffartornerminni iliuuseqarnerujumallutik pilliuteqangaartarsimapput. Allaaserisami matumani kristumiut siulliit ilaat Jehovamut kiffartornerminni sulerisarnersut ullumikkullu piffissaq tamaat kiffartortut sulerisarnersut qanorlu ikiorsinnaanerivut sammissavarput.

3, 4. (a) Kristumiut siulliit ilaat qanoq kiffartorpat? (b) Timikkut pisariaqartitaminnut tunngatillugu qanoq ikiorneqartarpat?

³ Jiisusip kuisinnermi kingunitsianngua Naalagaaffik oqaluussissutigilerpaa allallu taamaaliornissamik ilinniartillugit. (Luk 3:21-23; 4:14, 15, 43) Jiisusi toqummat taassuma ajoqersugai oqaluussinerup  annertusiartornerani siulersuilerput. (ApS 5:42; 6:7) Kristumiut ilaat angerlarsimaffitsik qimallugu ajoqersuiartortitanngorput. Assersuutigalugu Filipi Palæstinap ilaani oqaluussivoq. (ApS 8:5, 40; 21:8) Ajoqersuiartortitaasoq alla Paulusi nunani ungasissuni nutaarsiassamik nuannersumik oqaluussivoq. (ApS 13:2-4; 14:26; 2 Kor 1:19) Allat, soorlu Markusi, Lukasi Silvaanusilu (Silasi), Biibilimi atuakkanik allapput imaluunniit Biibilimik allaqataasunut allattaallutik. (1 Petr 5:12) Arnarpassuit angutinik taamaattunik suleqateqarput. (ApS 18:26; Rom 16:1, 2) Kristumiut Allagaataanni Grækerisuuni qatanngutit angutit arnallu misigisimasaat pissanganartut atuarsinnaavavut. Oqaluttuat taakkua Jehovap kiffami suliaannik pingaartitsineranik pisariaqartitaannillu isumaginnittarneranik eqqaasitsissutigaavut.

⁴ Kristumiut siulliit nalaanni piffissaq tamaat kiffartortut aningaasatigut qanoq taperserneqartarpat? Qatanngutiminnit ikiorneqarnissartik piumasarineq ajoramikku ilaannikkut ullup affaani sulisarput. (1 Kor 9:11-15) Qatanngutit ilagiillu ataasiakkaat kajumillutik tapersiisarput. (ApS 16:14, 15; Fil 4:15-18 atuakkit.) Paulusi angalaqataalu aningaasartuutitik matussuserumallugit aamma ullup affaani sulisarput.

5. Aappariit piffissaq tamaat kiffartornertik pillugu qanoq oqarsimappat?

⁵ Ullumikkuttaaq qatannguterpassuit piffissaq tamaat Jehovamut kiffartorniarlutik assigiinngitsutigut tamaviaartarput. (Takuuk ungalusaq “ Piffissaq tamaat kiffartoriaatsit”) Inooriaasertik qanoq isumaqarfigaat? Qatanngutivit ilaannut taamatut aperinerit qiimmaallaatigissavat. Qatanngut angut pioneritut, specialpioneritut, ajoqersuiartortitatut nunamilu allami Betelimi kiffartorsimasoq ima oqarpoq: “Piffissaq tamaat kiffartorniarlunga aalajangersimanera nuannaarutigilluinnarpara. 18-inik ukioqarlunga qaffasissumik ilinniagaqalissanerlunga, piffissaq tamaat sulissanerlunga pionerinngussanerlungaluunniit aalajangerniarsarivara. Misilittakkakka tunngavigalugit paasivara piffissaq tamaat kiffartorumalluni pilliutigineqartut Jehovap puiorneq ajorai. Pikkoriffiit piginnaanerillu Jehovameersut suliffeqalerniarlunga aalajangersimasuuguma ineriartortissinnaasimanngisaraluakka pitsaanerpaamik atorsinnaasimavakka.” Taassuma nulia ima oqarpoq: “Suliassiissutigineqartut tamaasa ineriartuutigaakka. Jehovap illersuinera siulersuineralu misigiuartarsimavarput, tamannalu misigisimasinnaassanngikkaluarparput sungiusimasatsitut toqqissilluta inuuginnarsimasuugutta. Piffissaq tamaat kiffartorsinnaanerput pillugu Jehova ullut tamaasa qutsavigisarpara.” Illit inuuninnut tunngatillugu taamatut misigerusuppit?

6. Jehovap imminut kiffartornerput qanoq isiginnittaaseqarfigaa?

⁶ Soorunami ilaat piffissaq tamaat massakkorpiaq kiffartorsinnaanngillat, sapinngisaminnilli Jehovamut kiffartorput. Nalunngilarput Jehovap kiffartornerat pingaartikkaa. Assersuutigalugu Paulusip Fiilimuumut allagai 1-3-mi Kolossemi ilagiinniittut tamaasa inuulluaqquai ilaallu atiisigut taallugit. (Atuakkit.) Paulusip Jehovallu taakkua tamaviaarlutik kiffartornerat pingaartippaat. Taamatuttaaq illit kiffartorninni iliuuserisatit Jehovap pingaartippai. Illilli piffissaq tamaat kiffartortut qanoq tapersersorsinnaavigit?

7, 8. Pionerit sulerisarpat, ilagiinniittullu pionerinik qanoq ikiuisinnaappat?

⁷ Ullumikkut pionerit kristumiut siulliit nalaanni oqaluussisartut aallussilluartut assigalugit ilagiinnut qiimmassaataangaartarput. Amerlanersaat qaammatit tamaasa nalunaaquttap-akunneri 70-it missaanni oqaluussisarput. Qanoq ikiorsinnaavigit?

⁸ Pioneri arnaq Sharimik atilik ima oqarpoq: “Pionerit ullut tamaasa oqaluussisaramik  anersaakkut nukittorpasittarput. Qiimmassarneqarnissartilli pisariaqartittarpaat.” (Rom 1:11, 12) Qatanngut arnaq alla ukiorpassuarni pioneriusimasoq ilagiinni pionerertatik pillugit ima oqarpoq: “Tamaviaarlutik suliuarput. Oqaluussinerminni biiliunneqarumagaangamik, neriartoqquneqaraangamik, orsussamut aningaasannguanik tunineqaraangamik allatigulluunniit aningaasatigut ikiorneqaraangamik qujamasuttarput. Tamakku ilumoorluni soqutiginninnermik ersersitsinerupput.”

9, 10. Ilaat ilagiinni pionerinik qanoq ikiuisarsimappat?

⁹ Pionerit aamma oqaluusseqatiginerisigut ikiorsinnaavavut. Pionerit arnat marluk ulluinnarni ualikkullu qatanngutinik amerlanerusunik oqaluusseqateqartarnissartik pisariaqartinnerarpaat. Qatanngut arnaq Betelimi Brooklynimiittumi kiffartortoq oqaluttuarpoq pioneriulluni ikiorneqartarsimanini puiorsimanagu. Ima oqarpoq: “Qatanngutip arnap biilillip oqarfigaanga angalaaqatissaarukkaangama sianerfigiinnartassagiga. Taanna pioneriuginnarnissannut iluaqutigilluinnarpara.” Qatanngut arnaq Sharimik atilik ima oqarpoq: “Qatanngutit pionerit aappaqanngitsut oqaluussereeraangamik kisimiikkajuttarput. Ilaanneeriarlusi aappaqanngitsut ilaqutariittut atuaqqissaaqatigiinnissinnut ilaatittarsinnaavasi. Assigiinngitsutigut ilaserineqartarnertik anersaakkut nukittunissaminnut aamma iluaqutigisarpaat.”

¹⁰ Qatanngut arnaq ukiut 50-it missaanni piffissaq tamaat kiffartorsimasoq qatanngutillu arnat aappaqanngitsut allat ikiorneqartarnertik pillugu ima oqarpoq: “Utoqqaanertatta pionerit qaammatit marlukkaarlugit pulaartarpaat. Peqqissuserput suliffeqarnerpullu pillugit arlaannilluunniit isumakuluuteqarnersugut ilumoorlutik aperisarpaatigut. Arlaannik ikiortariaqarnersugut takuniarlugu angerlarsimaffitsinnut pulaartarpaatigut.” Tamanna Paulusip Efesosimi angummit ilaqutariinni ittuusumit ikiorneqarsimanerminik qujamasuutiginninneranik eqqaasitsissutigissagunarpat. — 2 Tim 1:18.

11. Specialpionerit sulerisarpat?

¹¹ Ilagiit ilaat specialpionerinik kiffartoqateqarnermik pilluaqquneqarsimapput. Specialpionererpassuit qaammatit tamaasa nalunaaquttap-akunneri 130-t missaat atorlugit oqaluussisarput. Ilagiinni aamma ulapputeqartarput. Piffissartik oqaluussinermut allatigullu ikiuinermut atortaramikku saniatigut  suliffeqalaartarlutilluunniit suliffeqarneq ajorput. Qaammatit tamaasa immikkoortortaqarfimmit annertunngitsumik aningaasatigut ikiorsiissutinik tunineqartaramik oqaluussinertik salliutittuarsinnaavaat.

12. Qanoq utoqqaanertat allallu specialpionerinik ikiuisinnaappat?

¹² Specialpionerit qanoq ikiorsinnaavavut? Utoqqaanertaq immikkoortortaqarfimmi kiffartortoq specialpionererpassuarnillu oqaloqateqarsimasoq ima oqarpoq: “Utoqqaanertat specialpionerit qanoq tapersersornissaat paasiumallugu oqaloqatigisariaqarlugillu atugaat ilisimasariaqarpaat. Nalunaajaasorpassuit isumaqartarput specialpionerit aningaasatigut ikiorsiissutinik tunineqartaramik tamakkiisumik isumassorneqartartut, ilagiinniittulli taakkuninnga assigiinngitsorpassuartigut ikiuisinnaapput.” Specialpionerit qatanngutinik ilagiinniittunik oqaluusseqateqartarnertik aamma qujamasuutigisarpaat. Illit taakku oqaluusseqatigisinnaavigit?

13, 14. (a) Ilagiinnik nakkutilliisunut nuliaannullu tunngatillugu suna eqqaamasariaqarparput? (b) Nakkutilliisut angalasartut nuliaallu qanoq ikiorsinnaavigit?

¹³ Ilagiinnik nakkutilliisut nuliaallu qatanngutaapput misilittagaqarluarlutillu uppersuseqarluartut uagutsinnik qiimmassaasartut. Taakkuali aamma qiimmassarneqarnissamik pisariaqartitsisarnerat eqqaamasariaqarparput. Taakkua aamma qatanngutinik oqaluusseqateqarnissartik pisariaqartippaat. Qatanngutinit nuannisaqatigiinnissamut soqutiginartunilluunniit sammisaqaqatigiinnissamut qaaqquneqartarnertik aamma qujamasuutigisarpaat. Nakkutilliisoq angalasartoq nuliaaluunniit napparsimmavimmi uninngappat katsorsarneqarpalluunniit pulaarneratigut pisariaqartitaanillu isumaginninnitsigut ikiorsinnaavarput. Lukasi, “nakorsaq asanartoq”, Paulusip angalasartullu allat pisariaqartitaannik isumaginnittarpoq. — Kol 4:14; ApS 20:5–21:18.

¹⁴ Nakkutilliisut angalasartut nuliaallu ikinngutigilluakkanit asannittuliorfigineqarnissartik qiimmassarneqarnissartillu pisariaqartittarpaat. Ilagiinnik nakkutilliisoq ima allappoq: “Qaqugukkut qiimmassarneqarnissamik pisariaqartitsinersunga ikinngutima nalorpasinneq ajorpaat. Soqutiginnillutik aperisarpaannga, tamannalu isumakuluutima oqaloqatigiissutiginissaanut iluaqutigisarpara. Tusarnaaginnartarnermikkut iluaqutaangaartarput.” Ilagiinnik nakkutilliisut qatanngutit ilumoorlutik soqutiginnittarnerat ikinngutaalluarnerallu qujamasuutigingaartarpaat.

15, 16. Sooq Betelimi kiffartortut suliaat pingaaruteqarpa, taakkulu qanoq ikiorsinnaavavut?

¹⁵ Betelimi kiffartortut nutaarsiassamik nuannersumik oqaluussinermik tapersersuiniarlutik pingaarutilimmik suliaqarput. Betelimi kiffartortut ilagiissinniittut ilageeqatigiissinniittulluunniit qanoq eqqaamasinnaavisigit?

¹⁶ Betelimut nuukkaangamik ilaquttatik ikinngutitilluunniit maqaasilertaramikkit angerlarsilersinnaasarput. Betelimi kiffartulerlaat Betelimiittunit allanit ilagiinniittunillu ilinniarneqalernertik ikinngutigineqalernertillu qujamasuutigisarpaat. (Mark 10:29, 30) Betelimi kiffartortut sapaatit-akunneri tamaasa ataatsimiinnernut najuunnissamut oqaluusseqataanissamullu piffissaqartinneqartarput. Betelimili kiffartortut ilaannikkut suliassaqarnerusarput. Ilagiinniittut tamatumunnga tunngatillugu paasinnittuunerat suliaannillu pingaartitsinerat pitsaasuuvoq. — 1 Th 2:9 atuaruk.

17, 18. Nunani allani piffissaq tamaat kiffartortut sumik suliassinneqartarpat?

¹⁷ Piffissaq tamaat kiffartortut ilaasa nunami allami kiffartornissartik akuerisarpaat. Allamiut nerisassaataat, oqaasii, ileqqui allatullu inooriaaseqalerneq sungiunniartariaqarsinnaavaat. Nunani allani piffissaq tamaat kiffartortut sumik suliassinneqartarpat?

 ¹⁸ Ilaat ajoqersuiartortitaapput piffissallu annerpaartaa oqaluussisarlutik. Oqaluussillaqqissuullutillu ilinniartitsillaqqissuupput, ilinniarsimasatillu ilagiinniittunut allanut ingerlateqqittarpaat. Ajoqersuiartortitat pilimanianngitsumik inissaqarnissaat tunngaviusumillu pisariaqartitaminnut atugassaminnik aningaasatigut ikiorserneqarnissaat immikkoortortaqarfimmit isumagineqartarpoq. Allat immikkoortortaqarfinni kiffartortarput imaluunniit immikkoortortaqarfinnik sanaartornermi, nutserivinni, ataatsimeersuartarfinni naalagaaffilersaarfinniluunniit nunani allaniittuni ikiuisartuupput. Immikkoortortaqarfimmit ilagiinnilluunniit pisariaqartitaminnik, soorlu nerisassaminnik inissaminnillu, tunineqartarput. Betelimi kiffartortut pisarnerattut kajumissutsimik sanaartoqataasartut ataatsimiigiartuarlutillu oqaluusseqataasarput. Ilagiinniittut qatanngutit taakku misilittagaqarluartut iluaqutigingaartarpaat.

19. Piffissaq tamaat kiffartortut illit nunannut nuussimasut qanoq ikiorsinnaavigit?

¹⁹ Piffissaq tamaat kiffartortut illit nunannut nuussimasut qanoq ikiorsinnaavigit? Eqqaamassavat nerisassaatisi tikerlaanut allanarsinnaammata. Neriartoqqugukkit sutorusunnersut imaluunniit nutaanik misileerusunnersut aperisinnaavatit. Illit oqaatsitit nunannilu ileqquusut ingerlaannaq ilikkarsinnaanngilaat. Taamaattumik ilinniarusummata erinitsajuillutit inussiarnerlutillu ikiortariaqarpatit.

20. Piffissaq tamaat kiffartortut angajoqqaavilu qanoq ikiorsinnaavavut?

²⁰ Piffissap ingerlanerani piffissaq tamaat nunami allami kiffartortut angajoqqaatik ukioqqortusisut qanoq ikiussanerlugit aalajangertariaqalersinnaavaat. Angajoqqaat nalunaajaasut qitornamik suliaminnik qimatsinnginnissaat kissaatigilluinnarpaat. (3 Joh 4) Soorunami piffissaq tamaat kiffartortut angajoqqaatik ikiorniarlugit sapinngisaminnik iliuuseqassallutillu tikeraartassavaat. Allalli angajoqqaat ukioqqortusisimasut eqqaanni najugallit taakkua pisariaqartitaasa isumaginerisigut piffissaq tamaat kiffartortunik ikiuisinnaapput. Piffissaq tamaat kiffartortut oqaluussilluni suliaqarnermik, ullumikkut nunarsuarmi suliat pingaarnerpaartaannik, tapersersuinermik ulapputeqangaarnerat eqqaamasariaqarparput. (Matt 28:19, 20) Piffissaq tamaat kiffartortut angajoqqaavi ikiorsinnaavigit?

21. Piffissaq tamaat kiffartortut allanit qiimmassarneqartarnertik ikiorneqartarnertillu qanoq isumaqarfigaat?

²¹ Inuppassuit pisuunngorusukkamik tamaviaarlutik sulisarput. Piffissarli tamaat kiffartorusullutik aalajangersimasut Jehovamut inoqatiminnullu pitsaanerpaamik tunniusserusukkamik tamaviaarlutik sulisarput. Taamaattumik ikiorneqarnitik suulluunniit qujamasuutigisarpaat. Qatanngut arnaq nunami allami piffissaq tamaat kiffartortoq ima oqarpoq: “Allaat qatanngutit qujaniummik naatsunnguamik allagaqarnerat soqutiginninnermik suliatsinnillu nuannaarutiginninnermik ersersitsisarpoq.”

22. Piffissaq tamaat kiffartorneq qanoq isumaqarfigaajuk?

²² Piffissaq tamaat kiffartortut inooriaaseq pissanganarluinnartoq nalerisimaarnangaartorlu toqqarsimavaat. Ullumikkut inooriaatsinit tamanit pitsaanerpaavoq. Piffissaq tamaat kiffartortut pissuserineqartussat inuunermilu pingaarutillit massakkut silarsuartaassamilu nutaami pisariaqartut ilinniarsinnaavaat. Qanittukkut Jehovap kiffai tamarmik ullut tamaasa nalerisimaarnangaartumik suliaqartalissapput. Qanortoq tamatta piffissaq tamaat kiffartortut ‘uppernikkut suliaat asanninnermikkullu assorornerat kipisuitsumik eqqaamasartigu’. — 1 Th 1:3, 1936.