1. Jehova sulinermut tunngatillugu qanoq isiginnittaaseqarpa, qanorlu iliorpa?

JEHOVAP suliani nuannaarutigaa. (Tuss 135:6; Joh 5:17) Jehovap inngilit inuillu suliaqarnermik nuannaarutiginninnissaat kissaatigigamiuk nuannersumik nalerisimaarnartumillu suliassippai. Ernituani angajulliliani pinngortitseqatigaa. (Kolossemiut 1:15, 16 atuakkit). Biibilimi allassimavoq Jiisusi nunarsuarmukannginnermini Guutip ‘sanianiissimasoq suliortuatut’. — Uss 8:30, 1900.

2. Qanoq nalunngilarput inngilit pingaarutilimmik nalerisimaarnartumillu suliaqartuaannarsimasut?

² Jehovap inngilinik suliassiiuarsimanera Mosesimik allakkat siullerniit Saqqummersitanut nassuiarneqarpoq. Adami Evalu ajortuliormata paratiisimillu anisitaammata Guutip inngilit suliassippai. Mosesimik allakkat siullerni allassimavoq Guutip “kerubit panalu innaallagissatut naaralaartoq naatsiiviup Edenip kangiani [inissikkai], orpimmut inuunartumut aqqutaasoq nakkutigeqqullugu”. (1 Mos 3:24) Saqqummersitanilu paasitinneqarpugut Jehovap ‘inngilini aallartissimagaa qanittukkut piumaartussat kiffaminut takuteqqullugit’. — Saqq 22:6.

3. Jiisusip nunarsuarmiinnermini Ataatani qanoq ilaarpaa?

³ Jiisusip nunarsuarmiinnermini Jehovap suliassiissutai kajumilluni suliarai. Ajoqersukkani pingaarutilimmik suliassinnerisigut Ataatani ilaarpaa. Suliassartik nuannaarutiginiassammassuk ima oqarfigai: “Ilumut, ilumut oqarfigaassi: Uannut uppertup uanga suliakka — allaammi taakkunannga annerusut — aamma suliarissavai, uangami Ataatamut aallassagama.” (Joh 14:12) Ajoqersukkani suliap pingaaruteqassusianik paasitinniarlugit Jiisusip ima nassuiaappai: “Uannik aallartitsisup suliareqqusai ulluutillugu naammassisariaqarpavut. Unnuaq suliffiusinnaanngitsoq nalliukkumaarpoq.” — Joh 9:4.

4-6. (a) Noap Mosesillu Jehovap oqaasiinik maleruaanerat sooq qujamasuutigisinnaavarput? (b) Guutip inunnut suliassiissutai marlutsigut qanoq iluaqutaappat?

⁴ Jiisusip nunarsuarmut aallartitaanera sioqquterujussuarlugu Jehovap inuit nalerisimaarnartumik suliassittarsimavai. Adamip Evallu imminnut suliassiissutigineqartoq naammassinngikkaluaraat inuit allat Guutimit suliassiissutigineqartut suliaraat. (1 Mos 1:28) Jehovap Noakkut ulersuarmit aniguiniassammata umiarsualiornissamik ilitsersuuteqqissaarpai. Noa Jehovap peqqusineratorluinnaq iliormat uagut ullumikkut inuuvugut. — 1 Mos 6:14-16, 22; 2 Petr 2:5.

⁵ Mosesi illernartuut qanoq sananeqarnissaanik aaqqissuussaasumillu palaseqatigeeqarnissaanik Jehovamit ilitsersoqqissaarneqarpoq. Mosesi Jehovap peqqusineratorluinnaq iliorpoq. (2 Mos 39:32; 40:12-16) Suliamut ilungersunartumut aamma naalannermut tunngatillugu Mosesi qanoq ilinniarfigisinnaavarput? Apustilip Paulusip nassuiaaneratut illernartuut palaseqatigeeqarnerlu siunissami ‘ajunngitsuutinut nalliuttussanut’ assersuutaapput. — Hebr 9:1-5, 9; 10:1.

⁶ Guutip siunertaata naammassiartuaarnerani taassuma kiffai assigiinngitsunik suliassinneqartarput. Suliassiissutigineqartut allanngorsinnaasaraluartut Jehovamik naalannarsisitsiuarlutillu inunnut iluaqutaajuaannarput. Jiisusi nunarsuarmukannginnermini nunarsuarmiitillunilu aamma sulianut tunngatillugu taamaappoq. (Joh 4:34; 17:4) Nalitsinni Jehovap suliassiissutai suliarigutsigit taassuminnga naalannarsisitsissaagut. (Matt 5:16; 1 Korinthimiut 15:58 atuaruk). Sooq taama oqarsinnaavugut?

7, 8. (a) Kristumiut nalitsinni immikkut pisinnaatitaaffiat oqaluttuariuk. (b) Jehovap siulersuineranut qanoq isiginnittaaseqassaagut?

⁷ Jehovap inunnik naammalluinnanngitsunik suleqatiserinninnera ataqqinaataavoq. (1 Kor 3:9) Kristumiut ilaat Noatut Mosesitullu sanaartoqataanermik immikkut pisinnaatitaaffeqarput. Ilaat immaqa ataatsimeersuartarfinnik, naalagaaffilersaarfinnik aamma immikkoortortaqarfinnik sanaartoqataapput. Naalagaaffilersaarfinnik  iluarsartuussinermut imaluunniit Warwickimi, New Yorkimiittumi, qullersaqarfitsinnik sanaartornermut peqataanerit immikkut pisinnaatitaaffittut nuannaarutigiuk! (Allaaserisap aallaqqaataani titartagaq takuuk). Tamanna suliaavoq illernartoq. Kristumiulli amerlanerit anersaakkut sanaartornermut, tassa oqaluussinermut, peqataaqqullugit kajumissaarneqarput. Suliaq tamanna Jehovamik naalannarsisitseqataallunilu inunnut iluaqutaavoq. (ApS 13:47-49) Guutip peqatigiissortaasa oqaluussineq siulersormassuk imaassinnaavoq oqaluussinermut tunngatillugu allamik suliassinneqartugut.

⁸ Jehovap kiffaasa aalajaatsut taassumannga siulersorneqarnissartik kajumigiuarsimavaat. (Hebræerit 13:7, 17 atuakkit). Immaqa nutaamik suliassinneqarnerput imaluunniit nutaanik malittarisassaqalernera paasiuminaatsissinnaavarput, allanngortitsinerilli Jehovamit pisuummata ajunngitsumillu kinguneqartarmata suleqataajumavugut.

9. Utoqqaanertat ilagiinniittunut qanoq maligassiuilluarpat?

⁹ Utoqqaanertat ilagiinnik siulersuisuunermikkut Jehovap piumasaatut iliorusungaarnertik ersersippaat. (2 Kor 1:24; 1 Th 5:12, 13) Utoqqaanertat sulinissamut, ilitsersuutinik maleruaanissamut oqaluusseriaatsinillu ilinniarnissamut piumassuseqangaartarput. Naak qatanngutit ilaat oqaluusseriaatsinut nutaanut tunngatillugu tunuarsimaartaraluartut oqarasuaatikkut oqaluussinermik, umiarsualivinni oqaluussinermik tamanulluunniit oqaluussinermik aaqqissuussisarnermik kinguneqarluartarnerat utoqqaanertat takusinnaasarpaat. Assersuutigalugu Tysklandimi pionerit sisamat suliffeqarfinni sivisuumik oqaluussiffigineqarsimanngitsuni oqaluussiniarlutik aalajangersimapput. Taakkua ilaat, Michael, oqaluttuarpoq taamatut ukiorpaalunni oqaluussisimannginnamik ernumasimallutik. Ima oqarpoq: “Jehovap tamanna nalusimagunanngilaa, ullaakkummi oqaluussinerput puigunaatsuuvoq. Guutip naalagaaffianut kiffartorneq-mi siunnersuutinik maleruaasimanerput Jehovamillu tatiginnissimanerput nuannaarutigingaarpavut!” Illit illoqarfigisanni oqaluusseriaatsit nutaat misilikkusuppigit?

10. Ukiuni kingulliunerusuni peqatigiissortani allannguinerit suut pisimappat?

¹⁰ Ilaannikkut Betelimi allannguisoqartarpoq. Assersuutigalugu ukiuni kingullerni immikkoortortaqarfiit mikinerit matuneqarsimapput tassanilu suliarineqartartut immikkoortortaqarfinnut anginerusunut nuunneqarsimallutik. Immikkoortortaqarfinni taakkunani kiffartortunut tamanna sunniuteqarsimavoq. Naleqqussartariaqarsimapput,  kingornatigulli iluaqutissartaat takusinnaalersimavaat. (Oqal 7:8) Kajumillutik kiffartortut taakkua Jehovap kiffaasa nalitsinni oqaluttuarisaanerannut peqataanertik nuannaarutigaat!

11-13. Peqatigiissortani allannguinerit qatanngutit ilaasa suut unamminiarnartissimavaat?

¹¹ Immikkoortortaqarfiit kattunneqarnerannut atatillugu immikkoortortaqarfinni kiffartortut pingaarutilimmik ilinniarfigisinnaavavut. Qatanngutit taakkua ilaat immikkoortortaqarfinni taakkunani ukiorpassuarni kiffartorsimapput. Aappariit Betelimi mikinerusumi kiffartorsimasut Betelimut Mexicomiittumut 30-riaammik amerlanerusunik kiffartortulimmut nuussinnaanersut aperineqarsimapput. Uiusoq, Rogelio, ima oqarpoq: “Ilaquttat ikinngutillu qimanneri artornaqaaq.” Betelimi kiffartortoq, Juan, Mexicomut nuunnissamik aperineqarsimasut ilaat inuunermini aallaqqaataaniit aallartittariaqartutut misigivoq. Ima oqarpoq: “Nutaanik ikinngutissarsiortariaqarpugut, ileqqunullu nutaanut eqqarsartariaatsinullu nutaanut naleqqussartariaqarluta.”

¹² Immikkoortortaqarfiit ilaat Europamiittut kattunneqarmata Betelimi kiffartortut amerlanerit immikkoortortaqarfimmut Tysklandimiittumut nuussinnaanersut aperineqarput. Nunagisaq qimallugu nuunneq unamminiarnartoqartarmat sungiunniagassaqarput. Schweizimiit nuuttut ilaasa qaqqat kusanartut kipisaffigaat aamma Østrigimiit nuuttut ilaasa Betelimi mikinerusumiissimanertik maqaasivaat.

¹³ Qatanngutit angutit arnallu immikkoortortaqarfimmut nunamut allamiittumut nuussimasut amerlasuunik allannguisariaqarsimapput. Angerlarsimaffik nutaaq, suleqatit nutaat immaqalu allaat allamik suliassaqalerneq sungiunniartariaqarsimavaat. Sungiunniagarisimasaasa ilaat tassaapput ilagiit nutaat, sumiiffik nutaaq immaqalu allaat allamiut oqaasii. Betelimi kiffartortut taamatut inuunerminnik allannguerujussuarnissaminnut piumassuseqarsimapput. Sooq? Ilaasa misigisimasaat sammeriartigit.

14, 15. (a) Qatannguterpassuit Jehovamik suleqateqarnermik nuannaarutiginninnertik qanoq ersersissimavaat? (b) Taakku qanoq maligassaalluarpat?

¹⁴ Grethel ima oqarpoq: “Nuunnissannut akuersivunga sumiinnera sulerineraluunniit apeqqutaatinnagit Jehovamik asanninnera ersersikkusukkakku.” Dayska ima oqarpoq: “Paasigakku nooqquneqarneq Jehovamit pisoq ingerlaannaq akuersivunga.” André Gabrielalu isumaqataapput ima oqarlutik: “Kissaativut tunulliunnerisigut Jehovamut kiffartornermi iliuuseqarnerunissamut periarfissaqalernerput paasivarput.” Jehovap peqatigiissortaani allannguinernik nuannaarutiginninneq akuerserusunnginnerminngarnit pitsaanerujuaannarnerarpaat.

¹⁵ Immikkoortortaqarfiit kattunneqaraangata Betelimi kiffartorsimasut ilaat pionerinngortarput. Taama pisoqarpoq Danmarkimi, Norgemi Sverigemilu immikkoortortaqarfiit Skandinaviami Immikkoortortaqarfittut kattunneqarmata. Aappariit, Florian Anjalu,  ima oqarput: “Allamik suliassinneqarnerput pissanganartutut isigaarput. Sumikkaluaruttaluunniit Jehovamut kiffartortutut atorneqarsinnaanerput nuannaarutigingaarparput. Jehovamit pilluaqquneqangaartutut misigivugut!” Tamatta taamatut atugaqanngikkaluarluta qatanngutitut taakkunatut Jehovamut kiffartornermik salliutitsisinnaavugut. (Es 6:8) Guutimik suleqateqarnermik immikkut pisinnaatitaaffeqarnerminnik nuannaarutiginnittut Jehovap pilluaqqujumaarai qularinngilluinnarsinnaavarput.

16. (a) Galatiamiunut allakkat 6:4-mi qanoq kajumissaarneqarpugut? (b) Immikkut pisinnaatitaaffipput annerpaaq suua?

¹⁶ Naammalluinnanngitsuugatta allanut naleqqiuteqqajaasarpugut. Biibili naapertorlugu nammineq iliuuserisinnaasavut kisiisa eqqumaffigisussaavavut. (Galatiamiut 6:4 atuaruk). Tamatta utoqqaanertatut, pioneritut, ajoqersuiartortitatut imaluunniit Betelimi kiffartortutut kiffartorsinnaanngilavut. Taakku immikkut pisinnaatitaaffittut isigineqarsinnaagaluartut tamatta pisinnaatitaaffik annerpaaq, nutaarsiassamik nuannersumik oqaluussissutiginninneq, tassa Jehovamik suleqateqarneq, immikkut pisinnaatitaaffigisinnaavarput. Taamatut immikkut pisinnaatitaaffeqarnerput nuannaarutigiuartigu!

17. Pissutsit aaqqissuussaaneranni matumani suna ilimagiinnagassaava, tamannali sooq nikallussutigissanngilarput?

¹⁷ Pissutsit aaqqissuussaaneranni matumani Jehovamut kiffartornerput killeqarsinnaavoq. Imaassinnaavoq allanngortissinnaanngisatsinnik atugaqartugut, soorlu ilaquttanik pilersugaqartugut imaluunniit peqqiilliuuteqartugut.  Nikallornissatsinnulli pissutissaqanngilavut. Qanorluunniit ajornartorsiuteqaraluarluta Jehovap aqqa naalagaaffialu oqaluussissutigiuarsinnaavavut. Jehovamulli kiffartornitsinni sapinngisatsinnik iliuuseqarnerput iliuuseqarnerusinnaasunillu qinnussisarnissarput pingaaruteqarnerpaapput. Eqqaamasariaqarparput Jehovap inuit aterminik unnersiutiginnittut pingaartingaarmagit!

18. Siunissami suna qilanaarisinnaavarput, sunali pisinnaatitaaffigereerparput?

¹⁸ Naammalluinnanngitsuugaluartugut Jehovap suleqatigiumavaatigut. Ulluni kingullerni makkunani Guutimik suleqateqarneq nuanningaarami, ilaa? Siunissami Jehovap silarsuassami nutaami ‘inuunivimmik’ — eqqissilluni naassaanngitsumik inuunermik — pilluaqqusinissaa qilanaaraarput. — 1 Tim 6:18, 19.

19. Jehovap sumik nuannersumik neriorsorpaatigut?

¹⁹ Guutip silarsuassaq nutaaq neriorsuutigisaa ungasinngitsukkut piviusunngorumaarpoq. Israelikkut nunamut neriorsuutigisamut isingajalermata Mosesip taakkununnga ima oqarnera maluginiaruk: “Naalakkap Guutivit inerititaqartikkumaarpaatit.” (5 Mos 30:9) Harmagedonip kingorna Jehovap neriorsuinermisut nunarsuaq suleqatiminut kingornussarsiaritikkumaarpaa. Tamatuma kingorna nunarsuarmik paratiisinngortitsiartuaarneq suliassarilerumaarparput!