1, 2. Jehovap inuiannut siunertaata Naalagaaffimmit naammassineqarumaarnera qanoq qularutiginngisinnaavarput, aamma sooq? (Allaaserisap aallaqqaataani assiliaq takuuk).

JEHOVAMIK NALUNAAJAASUUGATTA Guutip naalagaaffia inuiaat ajornartorsiutaannik aaqqiisinnaasutuaanera aallussilluarluta oqaluussissutigisarparput. Taamaattorli naalagaaffiup tamatuma piviusuunera Guutillu siunertaanik naammassinnikkumaarnera upperilluinnarparput? Sooq Guutip naalagaaffia upperilluinnarsinnaavarput? — Hebr 11:1.

² Jehovap inuiannut siunertani naammassiumallugu Naalagaaffik Missiarsimit kunngiuffigineqartoq pilersippaa. Naalagaaffik taanna Jehovap kisimi naalakkersuisinnaatitaaneranik tunngavilerneqarpoq. Naalagaaffimmi tassani kina kunngiua? Kunngip taassuma kikkut naalakkersueqatigissavai? Kikkunnut naalakkersuissappat? Angerutsit aqqutigalugit Jehovap Naalagaaffimmut tunngasut pingaarnerit inatsisitigut tunngavilerpai. Angerutsit taakku tassaapput inatsisitigut isumaqatigiissutit Jehovamit imaluunniit erneranit, Jiisusi Kristusimit, pilersinneqartut. Angerutsit taakku misissornerisigut Jehovap  siunertaata qanoq naammassineqarumaarnera Naalagaaffiullu tamatuma qanoq tunngavilerneqarluarsimanera paasilluarnerussavavut. — Efesosimiut 2:12 atuaruk.

3. Allaaserisami matumani tullianilu suut sammissavavut?

³ Biibilimi angerutsit pingaarnerusut arfinillit Naalagaaffimmut Missiarsimit kunngiuffigineqartumut attuumassuteqarput. Taakkulu ukuupput: (1) Aaperaamut angeruseq, (2) Inatsisit tunngavigalugit angeruseq, (3) Daavimut angeruseq, (4) Melkisedeki assigalugu palasiunissamik angeruseq, (5) angerusisaaq aamma (6) Naalagaaffimmik angeruseq. Angerutsit taakku tamarmik immikkut Guutip naalagaaffianut qanoq attuumassuteqarnersut taakkulu aqqutigalugit Guutip inuiannut nunarsuarmullu siunertaa qanoq naammassineqarumaartoq misissoriartigit. — Nassuiaat “ Guutip siunertani qanoq naammassiumaaraa” takuuk.

4. Mosesip allagaani siullerni eqqaaneqartutut Jehova inunnut tunngatillugu qanoq aalajangersaava?

⁴ Jehovap nunarsuaq inunnit najugaqarfigineqartussatut pinngortippaa. Tamatuma kingorna Jehovap makku aalajangersarpai: (1) Inunnik imminik assililluni pinngortsitsinissani. (2) Nunarsuup inunnit paratiisinngortinneqarnissaa taakkulu qitornaannit assuarnaatsunik tamakkerneqarnissaa. (3) Inuit orpimmit ajunngitsumik ajortumillu ilisimalersitsisumit nereqqusaannginnerat. (1 Mos 1:26, 28; 2:16, 17) Aalajangersakkat taakku pingasut Guutip inuiannut nunarsuarmullu siunertaanik ersersitsipput. Sooq Guutip angerutsit pilersittariaqarpai?

5, 6. (a) Guutip siunertaata eqquunnissaanut Saatani qanoq akornuseeriaraluarpa? (b) Edenimi pikitsitsinermut tunngatillugu Jehova qanoq iliuuseqarpa?

⁵ Saatani Guutimut taassumalu siunertaanut  pikitsitsivoq. Taassuma Eva orpimmik ajunngitsumik ajortumillu ilisimalersitsisumit nereqqullugu usserneratigut inuit Guutimut naalakkunnaarsinniarpai. (1 Mos 3:1-5; Saqq 12:9) Taamaaliornermigut Guutip pinngortitaminut naalakkersuisinnaatitaanera unammillerpaa. Kingusinnerusukkut Saatanip inuit namminissarsiorlutik Guutimut pallorfiginninnerarpai. — Job 1:9-11; 2:4, 5.

⁶ Pikitsitsineq tamanna Jehovap qanoq iliuuseqarfigaa? Pikitsitsisut piuneerussinnaagaluarpai. Taamaalioraluarunili Adamip Evallu kinguaavinik nunarsuup ulikkaarnissaa pillugu siunertani naammassinavianngilaa. Jehova pikitsitsisunik piuneerutsitsinani Edenimi neriorsuummik taaneqartumik pingaarutilimmik siulittuivoq. Tamannalu Guutip nunarsuarmut inunnullu tunngatillugu neriorsuutiminik eqquutititsiumaarneranik qularnaveeqqutaavoq. — 1 Mosesi 3:15, NW atuaruk. *

7. Edenimi neriorsuummi pulateriaarsuk taassumalu kinguaavi pillugit suna siulittuutigineqarpa?

⁷ Edenimi neriorsuut aqqutigalugu Jehovap pulateriaarsuk taassumalu kinguaavi, tassa Saatani Diaavulu taassumunngalu ililiuttut Jehovap naalakkersuisinnaatitaaneranut akerlilersuisut, toqusussatut pillarpai. Jehovap arnap kinguaava pikitsitsisunik piuneerutsitsisussanngortippaa. Edenimi neriorsuummit erserpoq Saatani pikitsitsineratalu sunniutai qanoq piuneerunneqarumaartut.

8. Arnap taassumalu kinguaassaata paasinarsisinneqarnissaannut tunngatillugu suut paasivavut?

⁸ Arnap kinguaassaa kinaava? Kinguaassaq taanna Saatanimik, anersaajusumik, ‘pissaaneerutititsisussaagami’ anersaajusariaqarpoq. (Hebr 2:14) Taamaattumik arnaq kinguaassamik ernertaartoq aamma anersaajusariaqarpoq. Pulateriaarsuup kinguaavisa amerliartuinnarneranni arnap taassumalu kinguaavata kikkuuneri ukiut 4000-t missaanni ilisimaneqarsimanngilaq. Ukiut taakkua ingerlaneranni kinguaassap kinaanera Saatanillu pikitsitsinerata kingunerisaanik qanoq aaqqiisoqarnissaa paasinarsisinniarlugit Jehovap angerutsit arlallit pilersippai.

9. Aaperaamut angeruseq qanoq paasisariaqarpa qangalu atuutilerpa?

⁹ Edenimi neriorsuutip oqaatigineqarneraniit ukiut 2000-t missaat ingerlareermata Jehovap Aaperaat oqarfigaa illoqarfigisani Uri qimallugu Kana’animukassasoq. (ApS 7:2, 3) Guutip Aaperaat ima oqarfigaa: “Nunagisat eqqarlitit ataatavillu illua qimallugit  nunamut ilinnut takutitassannut aallarit. Inuiassuanngortikkumaarpakkit pilluaqqullutillu. Aqqit tusaamasanngortikkumaarpara, pilluaqqussutaassaatillu. Ilinnik pilluaqqusisut pilluaqqujumaarpakka ilinnillu perloqqusisoq perloqqujumaarlugu, ilikkullu nunarsuarmi eqqarleriit tamarmik pilluaqqunarsissapput.” (1 Mos 12:1-3) Neriorsuut tamanna Aaperaamut angerutsimik taaneqarpoq. Jehovap qangarpiaq Aaperaat angerfigeqatigisimaneraa ilisimanngilarput. Nalunngilarpulli ukiumi 1943-mi Kr.in.si. Aaperaat 75-inik ukioqarluni Karani qimallugu kuussuaq Eufrati ikaarmagu angeruseq tamanna atuutilersoq.

10. (a) Guutip neriorsuutaanik Aaperaap upperinnilluinnarnini qanoq ersersippaa? (b) Arnap kinguaassaanut tunngatillugu Jehovap suut paasinarsisikkiartuaarpai?

¹⁰ Jehovap neriorsuutini Aaperaamut eqqaaqqeqattaarpaa piffissallu ingerlanerani paasinarsisikkiartuaarlugu. (1 Mos 13:15-17; 17:1-8, 16) Aaperaat ernituaminik pilliuteqarusunnermigut Guutip neriorsuutaanik upperinnilluinnarnerminik ersersitsimmat angerutsip eqquukkumaarnera Jehovap neriorsuinermigut uppernarsaqqippaa. (1 Mosesi 22:15-18; Hebræerit 11:17, 18 atuakkit). Aaperaamut angerutsip atuutilernerata kingorna arnap kinguaassaanut tunngatillugu pingaarutillit Jehovap paasinarsisikkiartuaarpai. Inuppassuit Aaperaap kinguaassaanut ilaassapput, kunngiussapput, akeqqanik suujunnaarsitsissapput inunnullu allanut amerlangaartunut pilluaqqussutaassallutik.

11, 12. Aaperaamut angerutsip pingaarnerusumik eqquukkumaarnera Biibilimi qanoq ersersinneqarpa, tamannalu uagutsinnut qanoq sunniuteqassava?

¹¹ Aaperaap kinguaavisa nuna neriorsuutigisaq aatsaat kingornutereermassuk Aaperaamut angerutsimi neriorsuutit piviusunngorput. Angerutsilli pitsaanerungaartunik kinguneqarumaarnera Biibilimi allaatigineqarpoq. (Gal 4:22-25) Aaperaap kinguaassaata  pingaarnerusortaa Apustilip Paulusip tassaanerarpaa Jiisusi Kristusi. Pingaannginnerusut tassaapput kristumiut tanitat 144.000-t. (Gal 3:16, 29; Saqq 5:9, 10; 14:1, 4) Arnaq Edenimi neriorsuutimi eqqaaneqartoq tassaavoq ‘Jerusalemi qilammiittoq’ — Guutip qilammi peqatigiissortai anersaajusut aalajaatsut. (Gal 4:26, 31) Aaperaamut angerutsimi neriorsuutigineqartutut arnap kinguaassaa inuiannut pilluaqqussutaajumaarpoq.

¹² Aaperaamut angeruseq Naalagaaffimmik qilammiittumik pilersitsinissamut aamma kunngip taassumalu naalakkersueqatissaasa Naalagaaffimmik tamatuminnga kingornussinissaannut tunngaviliivoq. (Hebr 6:13-18) Angeruseq tamanna qanoq sivisutigisumik atuutissava? ‘Angerusiussaaq naassaanngitsumik.’ (1 Mos 17:7) Naalagaaffiup Guutip akeraanik piuneerussinissaata tungaanut aamma nunami ilaqutariissortat tamarmik pilluaqquneqarnissaasa tungaanut angeruseq atuutissaaq. (1 Kor 15:23-26) Angerutsilli pilluaqqussutisiassartai naassaanngitsumik iluaqutaajumaarput. Guutip Aaperaamik angerfigeqatiginninnera Jehovap inunnik naapertuilluartunik ‘nunarsuup tamakkernissaanik’ siunertaata naammassiumaarneranut uppernarsaataavoq. — 1 Mos 1:28.

13, 14. Daavimut angeruseq sumut qularnaveeqqutaava?

¹³ Edenimi neriorsuummi Aaperaamullu angerutsimi Jehovap najoqqutassiat naapertuilluartut tunngavigalugit naalakkersuiuaannarnera pillugu paasitinneqarpugut. Taamaattumik Naalagaaffik Missiarsimit kunngiuffigineqartoq Guutip pilersitaa aamma najoqqutassianit naapertuilluartunit taakkuninnga tunngaveqarpoq. (Tuss 89:15) Naalagaaffik Missiarsimit kunngiuffigineqartoq peqquserlunneq pissutigalugu piuneerunneqassava? Naalagaaffimmi tassani naalakkersuisut taarserneqartariaqalersinnaappat? Taama pisoqanngisaannarnissaa angerutsimit allamit qularnaveeqquserneqarpoq.

¹⁴ Jehova itsaq Israelimi kunngimut Daavimut neriorsuuteqarpoq. Neriorsuut tamanna Daavimut angerutsimik taaneqarpoq. (2 Samueli 7:12, 16 atuakkit). Missiarsip Daavimit kinguaarineqarumaarnera Jehovap neriorsuutigaa. (Luk 1:30-33) Taamaaliornermigut Missiarsip kikkut siuaasariumaarai Jehovap paasinarsisinneruaa Daavillu kinguaava Guutip naalagaaffiani kunnginngornissamut qinngaqqunnannginnera eqqaallugu. (Ez 21:30-32) Daavip kinguaava, Jiisusi, ‘naassaanngitsumik atassammat, issiavissaarsualu seqinertut ataavassammat’ Daavip kunngeqarfia naassaanngitsumik naalakkersuissaaq. (Tuss 89:35-38) Missiarsip pitsaanerpaamik naalakkersuiumaarnera naalakkersuineratalu naassaanngitsumik iluaqutaajumaarnera qularinngilluinnarsinnaavavut!

15-17. Melkisedeki assigalugu palasiunissamik angeruseq naapertorlugu kinguaassaq sulerissava, aamma sooq?

¹⁵ Arnap kinguaavata kunnginngorumaarnera Aaperaamut angerutsimi  Daavimullu angerutsimi neriorsuutigineqarpoq. Inuiaat tamarmik tamanna iluaqutiginiassammassuk kinguaassaq kunngiuinnarani aammali palasiusariaqarpoq. Inuit ajortimit aniguiseqqullugit Jehovallu ilaqutariissortaanut aalajaatsunut qilammiittunut nunarsuarmiittunullu ilaaleqqullugit palasi pilliuteqarsinnaasutuaavoq. Kinguaassaq palasiuniassammat Jehova inatsisitigut isumaqatigiissummik allamik pilersitsivoq, taannalu tassaavoq Melkisedeki assigalugu palasiunissamik angeruseq.

¹⁶ Kunngi Daavi aqqutigalugu Guutip paasinarsisippaa Jiisusi angerfigeqatigiumaarlugu. Isumaqatigiissut tamanna marlunnik siunertaqarpoq. Siullertut, Jiisusi Guutip ‘talerpiata tungaani issiajumaarpoq’ akeqqaminullu tamanut ajugaanissaminut piginnaatinneqarumaarluni. Aappassaattut, Jiisusi ‘palasiusussaavoq naassaanngitsumik Melkisedeki assigalugu’. (Tussiaat 110:1, 2, 4 atuakkit). Jiisusi qanoq “Melkisedeki assigalugu” palasiusinnaagami? Aaperaap kinguaavi nunamik neriorsuutigisamik tiguaannginneranni Melkisedeki illoqarfimmi Salemimi kunngiuvoq ‘Guutimullu Qutsinnerussaartumut palasiulluni’. (Hebr 7:1-3) Taanna Jehovamit kunngitut palasitullu toqqarneqarpoq, Jiisusilu sioqqullugu kisiartaalluni kunngiullunilu palasiusimavoq. Melkisedekip siornatigut kingornatigullu taamatut toqqaasoqarsimanngimmat Jiisusi ‘palasiujuartuusussaavorlusooq’.

¹⁷ Angeruseq tamanna naapertorlugu Jiisusi palasiusussatut Guutimit toqqarneqarpoq. Jiisusi ‘naassaanngitsumik palasiussaaq Melkisedeki assigalugu’. (Hebr 5:4-6) Angerutsimit tamatumannga erseqqippoq Jehovap inunnut nunarsuarmullu siunertani Naalagaaffik Missiarsimit kunngiuffigineqartoq aqqutigalugu naammassissagaa.

18, 19. (a) Angerutsit sammeriikkavut Naalagaaffimmut qanoq attuumassuteqarpat? (b) Allaaserisami tulliuttumi suna sammissavarput?

¹⁸ Angerutsit tamarmik Naalagaaffimmut Missiarsimit kunngiuffigineqartumut attuumassuteqarnerat Naalagaaffiullu inatsisitigut isumaqatigiissutinik tunngaveqarnera sammereerpavut. Arnap kinguaassaa aqqutigalugu Jehovap inuiannut nunarsuarmullu siunertaminik naammassinnikkumaarneranik Edenimi neriorsuut qulakkeerutaavoq. Kinguaassap kinaanera qanorlu naammassisaqarumaarnera Aaperaamut angerutsimi nassuiarneqarpoq.

¹⁹ Missiarsip siuaasai Daavimut angerutsimi sukumiinerusumik eqqartorneqarput. Aamma angeruseq tamanna tunngavigalugu Jiisusi nunarsuarmut naassaanngitsumik naalakkersuisinnaatitaavoq. Kinguaassap palasiusutut kiffartortussaaneranik Melkisedeki assigalugu palasiunissamik angeruseq qularnaveeqqutaavoq. Jiisusili kisimi inuit naammalluinnartunngoriartuaarnissaannik ikiuissanngilaq. Aamma allat kunngiusussatut palasiusussatullu toqqarneqarsimapput. Taakku suminngaanneerpat? Tamanna allaaserisami tulliuttumi sammineqassaaq.