1. Mosesimik allakkat pingajui qanoq iluaqutigisinnaavarput?

JEHOVAP kiffami illernartuunissaat piumasaraa. Illernartuuneq Biibilimi eqqaaneqaqattaaraluartoq Mosesimik allakkat pingajuini innersuussutigineqarnerpaavoq. Atuakkamik tamatuminnga paasinninnerput pingaartitsinerpullu illernartuunissatsinnut iluaqutigissavarput.

2. Mosesimik allakkat pingajui qanoq immikkooruteqarpa?

² Mosesimik allakkat pingajui Allakkanut Illernartunut ilaasoq ‘ajoqersuinermut iluaqutaavoq’. (2 Tim 3:16) Biibilip allassimaqqaarfiini Jehovap aqqa Mosesimik allakkat pingajuini kapitalini tamani quleriarlugu eqqaaneqarpoq. Atuakkamik tamatuminnga paasinninnerput Guutip aqqanut kanngunarsaataasumik sumilluunniit iliuuseqannginnissatsinnut iluaqutigissavarput. (3 Mos 22:32) Biibilip allassimaqqaarfii naapertorlugit oqaatsit “tassaavunga Jehova” Guutimut naalannissatsinnik eqqaasitsissutigisariaqarpavut. Allaaserisami matumani tulliuttumilu Mosesimik allakkat pingajuini allaatigineqartut, Guutimik pallorfiginninnitsinni illernartuunissatsinnut iluaqutigisassavut, sammissavavut.

3, 4. Aronip ernerisalu eqqiarneqarnerat sumut assersuutaava? (Allaaserisap aallaqqaataani assiliaq takuuk).

³ Mosesimik allakkat pingajui 8:5, 6 atuakkit. Jehovap Aroni Israelimi palasiunerusussatut ernerilu palasiusussatut toqqarpai. Aroni Jiisusimut assersuutaavoq Aronillu erneri kristumiunut tanitanut assersuutaallutik. Aronip eqqiarneqarnera qanoq paasisariaqarpa? Jiisusip minguiarneqartariaqarneratut paasisariaqarpa? Naamik, Jiisusimi ajorteqaranilu ‘minguitsuuvoq’. (Hebr 7:26; 9:14) Aronili eqqiarneqareerluni Jiisusimut, minguitsumut naapertuilluartuusumullu, assersuutaalerpoq. Aronimmi ernerisa eqqiarneqarnerat sumut assersuutaava?

⁴ Aronip ernerisa eqqiarneqarnerat qilammi palasiunissamut toqqarneqarsimasut minguiarneqarnerannut assersuutaavoq. Minguiaaneq tamanna kuisinnermut attuumassuteqarpa? Naamik, kuisinneq ajorteqarunnaarnermut assersuutaanani inuup Guutimut tunniulluinnarneranut assersuutaammat. Tanitat “oqaatsikkut” minguiarneqarsimagamik Kristusip ajoqersuutaanik inuunerminni maleruaaqqissaartariaqarput. (Ef 5:25-27) Taamaalillutik illernarlutillu minguitsuussapput. ‘Savammi allat’? — Joh 10:16.

5. Sooq oqartoqarsinnaava savat allat Guutip oqaasia iluaqutigalugu minguiarneqartut?

⁵ Aronip erneri ‘inuppassuarnut amerlangaartunut’ Jiisusip savaataanut allanut assersuutaanngillat. (Saqq 7:9) Savalli allat Guutip oqaasia iluaqutigalugu illernartunngorlutillu minguitsunngorput. Nunarsuarmi inuunissamik neriugisallit Jiisusip pilliutaata pingaaruteqassusia upperilluinnaramikku Jehova “ullukkut unnuakkullu” pallorfiginissaanut kajumissuseqarput. (Saqq 7:13-15) Tanitat savallu allat minguiarneqarnerat ataavartuuvoq. Tamatuma kingunerisaanik pissusimikkut  minguitsuujuarput. (1 Petr 2:12) Jehovap innuttami Savanik Paarsisumik, Jiisusimik, naalallutik ilumoorlutillu malinninnerminni minguinnerat ataasioqatigiinnerallu iluaringaarpaa!

6. Sooq imminut misissukulasariaqarpugut?

⁶ Israelimi palasit timimikkut minguitsuusariaqarnerat ullumikkut sooq pingaartittariaqarparput? Biibilimik atuaqqissaaqatigisartakkatta amerlasuut isikkorinnerput, minguinnerput pallorfiginnittarfitsinnillu eqqiluitsuutitsisarnerput maluginiartarpaat. Taamatuttaaq Jehovamik pallorfiginnikkusuttut ‘uummatimikkut minguitsuusariaqarput’. (Tussiaat 24:3, 4 atuakkit; Es 2:2, 3) Taamaattumik isumakkut, uummatikkut timikkullu minguitsuulluta Jehova kiffartorfigisariaqarparput. Imminut misissukulasariaqarpugut. Immaqa illernartuujumalluta annertuumik allannguisariaqarnerput paasisarparput. (2 Kor 13:5) Assersuutigalugu kuisissimasoq pornografiimik isiginnaartartoq imminut ima aperisariaqarpoq: ‘Imminut illernartuutippunga?’ Taamatullu ileqqupalaaqarunnaarniarluni ikiortissarsiortariaqarpoq. — Jaak 5:14.

7. Palasit Mosesimik allakkat pingajui 8:22-24-mi eqqaaneqartut pisimanerattut Jiisusi qanoq maligassiuilluarpa?

⁷ Israelimi palaseqatigiit ivertinneqarmata palasiunerup Aronip taassumalu ernerisa siutaat, kullui putuguilu talerperliit savap angutivissap aavanik taninneqarput. (3 Mosesi 8:22-24 atuakkit). Taamatut aammik taniinermit erserpoq palasit naalallutik suliassaminnik naammassinnittarnissaat. Taamatuttaaq Jiisusi, Palasiuneq, tanitanut savanullu allanut maligassiuilluarnerpaavoq. Guutimit siulersortittarlunilu taassuma piumasaatut iliortarlunilu illernartumik inooriaaseqarpoq. — Joh 4:31-34.

8. Tamatta susariaqarpugut?

⁸ Jehovamik pallorfiginnittut tamarmik Jiisusimik, assuarnaattuartumik, ilaarsisariaqarput. ‘Anersaaq illernartoq aliasutsikkumanagu’ Biibilimik atuartarnitsigut Guutimit siulersorneqartuartariaqarpugut. (Ef 4:30) ‘Narlumuinnarlutit pisullutit ingerlanissat’ aalajangiusimajuaruk. — Hebr 12:13.

9. Qatanngutit angutit pingasut Siulersuisoqatigiinnut ilaasortaasunik qanimut suleqateqarsimasut qanoq oqarsimappat, oqaasiilu illernartuunissannut qanoq iluaqutigisinnaavigit?

⁹ Qatanngutit angutit pingasut ukiorpassuarni Siulersuisoqatigiinnut ilaasortaasunik qanimut suleqateqarsimasut oqaasii sammeriartigit. Ilaat ima oqarpoq: “Taamatut kiffartorneq immikkut pisinnaatitaaffiugaluartoq qanimut suleqatigiinnitsinnit ilaannikkut ersertarpoq qatanngutit taakkua anersaakkut tanitaagaluarlutik naammalluinnanngitsuunerat. Taamaattorli siulersuisunut naalannissara anguniagariuarsimavara.” Qatanngut alla ima oqarpoq: “Assersuutigalugu siulersuisut naalannissaannut suleqatiginissaannullu Korinthimiunut allakkat aappaat 10:5-imi ‘Kristusimut naalanneq’ pillugu allassimasoq iluaqutigisarpara. Tamanna naalalluinnarneruvoq.” Qatanngut aamma alla  ima oqarpoq: “Jehovap iluarisai iluarissagutsigit uumigisaalu uumigissagutsigit taassumanngalu siulersortittuassagutta iluarisaallutalu Guutip peqatigiissortaanut nunarsuarmullu siunertaata naammassineqarnissaanik siuarsaasunut naalattariaqarpugut.” Taassuma Nathan Knorrip maligassiaa eqqaamavaa. Qatanngutip Knorrip, Siulersuisoqatigiinnut ilaasortanngortup, Vagttaarnet 1925-moortumi allaaserisami “Den nye Nations Fødsel”-imi allaatigineqartut allanit apeqquserneqaraluartut akuerai. Taamatut naalanneq qatanngutip ajasoorutigaa. Qatanngutit pingasut taakkua oqaasiinik eqqarsaatiginneqqissaarnerit Guutimut naalannissannut illernartuujuarnissannullu iluaqutigisinnaavat.

10. Guutip aak pillugu inatsisaanut naalannissarput qanoq pingaaruteqartigaa?

¹⁰ Mosesimik allakkat pingajui 17:10 atuaruk. Jehovap Israelikkut ‘aammik nereqqunngilai’. Kristumiut aamma inuit uumasullu aavinik ingalassimanneqquneqarput. (ApS 15:28, 29) Jehova asallugulu naalakkusukkatsigu Guutimit ajattorneqalissutigisatsinnik taassumalu ilagiivinut ilaajunnaarsitaassutigisassatsinnik iliuuseqarnissarput takorloorsinnaanngilarpulluunniit. Allaat navianartorsioraluarluta Jehovamik ilisimanninngitsut soqutiginninngitsulluunniit taassumunnga naalasseriitsooqqusinerannut nakkaannarusunngilagut. Nalunngilarput aalersortikkumannginnerput pillugu illaruaatigineqartassalluta, Guutimulli naalakkusuppugut. (Jud 17, 18) Aammik nerinnginnissatsinnut aalersortinnginnissatsinnullu suna aalajangiusimanninnerulissutigissavarput? — 5 Mos 12:23.

11. Sooq oqarsinnaavugut ulloq saammaannartitsivik ileqqulersuutaannaanngitsoq?

¹¹ Israelimi palasiunerup ukiumut ataasiarluni ullormi saammaannartitsivimmi iliuuserisartagaa Guutip aak pillugu isiginnittaasianik paasinninnissatsinnut iluaqutigissavarput. Aak taamaallaat siunertamut aalajangersimasumut atorneqartarpoq. Israelikkut Guutimut eqqissisimasumik attaveqarniassammata aak ajortinik isumakkeerfiginninnermut atorneqartarpoq. Ussiup savaasallu aavat angerutsip illerfiata saavanut matuanullu serpartarneqartarpoq. (3 Mos 16:14, 15, 19) Aak taanna tunngavigalugu Guutip Israelikkut ajortuliaat pillugit isumakkeerfigisarpai. ‘Aak uinillit tamarmik uummassutigimmassuk’ uumasup nerisassatut toqunneqartup aava nunamut kuineqariarluni issumik matoorneqartarnissaa Jehovap peqqussutigaa. (3 Mos 17:11-14) Taakku ileqqulersuutaannaanngillat pingaaruteqanngitsut. Ukiut hundredillit tamatuma siorna Guutip Noa kinguaavilu aammik nereqqunngilai. (1 Mos 9:3-6) Peqqussut tamanna kristumiunut aamma atuuppa?

12. Paulusip aak isumakkeerfiginninnermut qanoq atassuserpaa?

¹² Aap eqqiaassutaanera apustilip Paulusip ima allalluni nassuiarpaa: “Inatsisit malillugit suut tamangajammik aammik eqqiarneqartarput, isumakkeerfiginninnerlu pisinnaanngilaq aammik kuisineqartinnagu.”  (Hebr 9:22) Uumasulli pilliutit sivikitsuinnarmik iluaqutaasarput. Paulusip pilliutit taakku Israelikkut ajortiliunerannik pilliummillu annerusumik ajortaarulluinnartitsisinnaasumik pisariaqartitsinerannik eqqaasitsissutaanerarpai. ‘Inatsisit ajunngitsuutit nalliuttussat pissusiviat piginagu tarraannaannik pigisaqarput.’ (Hebr 10:1-4) Ajortuliammi qanoq isumakkeerfigineqarsinnaappat?

13. Sooq Jiisusip pilliutimi nalinganik Jehovamut sassaassinera ilinnut pingaaruteqarpa?

¹³ Paulusip Efesosimiunut allagai 1:7 atuaruk. Jiisusi inuit pillugit pilliutitut toquvoq, tamannalu Jiisusimik taassumalu Ataataanik asannittunut pingaaruteqangaarpoq. (Gal 2:20) Soorlu ullormi saammaannartitsivimmi pisunit ersersinneqartoq Jiisusip makititaanermi kingorna iliuusai pissutigalugit ajortimit aniguisinneqarpugut. Palasiuneq Illernarnerpaamut iseraangami Guutip najuuffianullusooq isertarpoq. Tassani palasiunerup uumasut aavi serpartarnerisigut Guutimut sassaattarpai. (3 Mos 16:11-15) Jiisusi makititaanermi kingorna qilammukarpoq pilliutimilu nalinga Guutimut sassaallugu. (Hebr 9:6, 7, 11-14, 24-28) Jiisusip aavata pilliutitut kuineqarnera upperigatsigu ajortivut pillugit  isumakkeerfigineqarsinnaanerput ilerasuuteqanngissinnaanerpullu qujamasuutigingaarparput!

14, 15. Sooq aak pillugu Jehovap inatsisaata paasinissaa naalannissaalu pingaaruteqarpat?

¹⁴ Immaqa maanna Jehovap “aammik” sumilluunniit nereqqusinnginneranut pissutaasoq paasilluarsinnaanerulerpat. (3 Mos 17:10) Paasiviuk sooq Guutip aak illernartikkaa? Aak inuunermut assersuutaammat. (1 Mos 9:4) Guutitut aammut isiginnittaaseqarnissarput aattoqqusinnginnermullu naalannissarput isumaqataaffigissagunarpatit. Jiisusip utertitsissutitut pilliutaanik taamaallaat upperinninnikkut Pinngortitsisittalu aammik erlinnartuutitsineranik paasinninnikkut Guutimik eqqisseqateqarsinnaavugut. — Kol 1:19, 20.

¹⁵ Tamatta aalersortinnermut, derivatinut nakorsartinnermullu tunngasunik ilimaginngisatsinnik aalajangiisariaqalersinnaavugut. Taamaattumik pinartumik pisoqannginnerani Jehovamut qinunissat, misissuinissat aalajangiinissallu pingaaruteqarpoq. Taamaalillutit aalersortinnginnissat aalajangiusimanerulissavat. Jehovap inerteqqutigisaanik akuersinitsigut taassuminnga ajuallatsitserusunngilluinnarpugut. Ullumikkut nakorsarpassuit allallu inuit inuunerannik annaassinissaq neriuutigalugu aammik tunisisartunngoqqusillutik kajumissaarisarput. Guutilli innuttaanut illernartunut ilaagatta nalunngilarput aap qanoq atorneqarsinnaanera Jehovap kisimi aalajangersinnaagaa. Taassuma isaani ‘aak’ illernartuuvoq. Taamaattumik aak pillugu inatsisaanut naalannissarput aalajangiusimasariaqarparput. Aamma minguitsumik inooriaaseqarnikkut Jiisusip aavanik pingaartitsinerput ersersissinnaavarput. Taassuma aava pissutigalugu ajortitsinnik isumakkeerfigineqarsinnaallutalu naassaanngitsumik inuunissamik periarfissaqalersinnaavugut. — Joh 3:16.

16. Sooq Jehovap innuttai illernartuusariaqarpat?

¹⁶ Jehovap Israelikkut Egyptenimi inussiaataanermit aniguisikkamigit ima oqarfigai: “[Uanga] tassaavunga Naalagaq ilissinnik Egyptenimit majuartitsisoq ilissinnut Guutiujumagama. Illernartuussaasi uanga illernartuugama.” (3 Mos 11:45) Jehova illernartuugami Israelikkut illernartuunissaat piumasaraa. Aamma uagut illernartooqquaatigut. Mosesimik allakkat pingajuinit tamanna paatsuugassaanngitsumik ersersinneqarpoq.

17. Mosesimik allakkat pingajui qanoq isumaqarfigaajuk?

¹⁷ Qularnanngilaq Mosesimik allakkat pingajuannik samminninnerput iluaqutigisimassagit. Taamatuttaaq Biibilip atuagartaa taanna pingaartinnerulerlugulu illernartuunissatsinnut pissutaasoq paasilluarnerusimassavat. Mosesimilli allakkat pingajui qanoq ilinniarfiginerusinnaavarput? Minguitsumik Guutimik pallorfiginninnissatsinnut Biibilimi atuagaq taanna qanoq iluaqutigisinnaavarput? Tamanna allaaserisami tulliuttumi sammissavarput.