1, 2. (a) Jehovap innuttani qanoq piumasaqarfigai? (b) Allaaserisami matumani suut akissutissarsissavavut?

APUSTILI PETRUSI isumassarsisitaalluni Mosesimik allakkat pingajuinik issuaavoq nassuiarlugulu kristumiut Israelikkutut illernartuusariaqartut. (1 Petrusi 1:14-16 atuakkit). Jehovap, ‘Illernartuusup’, tanitat ‘savallu allat’ sapinngisamik sutigut tamatigut illernartuunissaat piumasaraa. — Joh 10:16.

² Allaaserisami matumani Mosesimik allakkat pingajuini allaatigineqartut Guutip illernartuuneq pillugu najoqqutassiaanik paasinninnissatsinnut maleruaanissatsinnullu iluaqutigisassavut sammissavavut. Aamma apeqqutit uku akissutissarsissavavut: Ilumoortuarneq qanoq isiginnittaaseqarfigisariaqarparput? Jehovap kisimi oqartussaaneranik tapersersuineq pillugu Mosesimik allakkat pingajui qanoq ilinniarfigisinnaavarput? Israelikkut pilliutigisartagaat qanoq ilinniarfigisinnaavavut?

3, 4. (a) Sooq kristumiut Biibilimi inatsisinik maleruaajuartariaqarpat? (b) Sooq akiniaanatalu puttarsisaqartuartassanngilagut?

³ Jehovamit iluarisaajumalluta taassuma inatsisaanut najoqqutassiaanullu naalattariaqarlutalu illernartuujuartariaqarlutalu  ilumoortuartariaqarpugut. Ullumikkut Mosesip inatsisai maleruartussaanngilavut, Inatsisilli Jehovap iluarisaanik iluarinngisaanillu paasinninnissatsinnut iluaqutigaavut. Assersuutigalugu Israelikkut ima oqarfigineqarput: “Inuiaqatinnut akinialerituussanngilatit puttarsisaqarnalluunniit. Tullit ilittut asassavat. Uanga tassaavunga Naalagaq.” — 3 Mos 19:18.

⁴ Jehovap akiniaanissarput puttarsisaqarnissarpulluunniit kissaatiginngilaa. (Rom 12:19) Guutip inatsisaanik najoqqutassiaanillu sumiginnaanerput Saatanimut nuannaarutaassallunilu Guutip aqqanik kanngunarsaataassaaq. Allaat allap piaaraluni ajuallatsitsinera puttarsissutigiuassanngilarput. Biibilimi ‘immersakkatut marrartut’ erlinnartumik imalittut allaatigineqarpugut. Erlinnartoq tassaavoq oqaluussineq. (2 Kor 4:1, 7) Puttarsineq arrortitsisartutut ittoq erlinnartuutitsinnut immersakkamiitinnavianngilarput!

5. Aronip nalaatai qanoq ilinniarfigisinnaavavut? (Allaaserisap aallaqqaataani assiliaq takuuk).

⁵ Mosesimik allakkat pingajui 10:1-11-mi Aronip ilaqutaasa alianangaartumik eqqugaanerat allaatigineqarpoq. Jehovap Aronip erneri Nadabi Abihulu ikuallallugit toquppai. Tamatuma kingorna Guutip Aroni ilaqutaalu aliasoqqunngilai. Tamanna uppernikkut misilinneqaataangaarpoq! Illit ilaquttatit allalluunniit ilaajunnaarsitaasimasut peqatigisannginnerisigut illernartuuit? — 1 Korinthimiut 5:11 atuaruk.

6, 7. (a) Oqaluffimmi katinnermut najuunnissamut qaaqqusaanermut akuersinnginnitsinni suna eqqarsaatigeqqaartariaqarparput? (Innersuussut takuuk). (b) Oqaluffimmi katinnermut najuukkusunnginnerput qanoq nassuiarsinnaavarput?

⁶ Aronip ilaqutaasalu misilinneqarnerattut misilinneqarnissarput ilimananngilaq. Ilaquttatsinnimmi nalunaajaasuunngitsunit oqaluffimmi katinnermut najuunnissamut qaaqqusaagutta? Tamanna Biibilimi inerteqqutigineqanngilaq, aalajangiinissatsinnulli tunngaviusunik najoqqutassiaqarpoq. *

⁷ Jehovamit iluarisaarusunnerput illernartuujuarusunnerpullu ilaquttatta isumatsassutigisinnaavaat. (1 Petr 4:3, 4) Ajuallatsikkusunngikkutsigit inussiarnersumik unneqqarissumillu oqaloqatigisariaqarpavut. Katittorsiornissaq sioqquterujussuarlugu oqaloqatigisariaqarpavut. Qaaqqusaanerput pillugu qutsavigisinnaavavut. Taava nassuiaassinnaavavut ullormi immikkut ittumi nuannaarnissaannik  kissaallugit upperisarsiornikkullu ileqqulersuutinut ilaannginnerput pissutigalugu kanngusutsikkusunnagit. Taamaalilluta najoqqutassianik Biibilimeersunik maleruaanissarput qulakkiissavarput.

8. Jehovap kisimi oqartussaanera Mosesimik allakkat pingajuini qanoq erseqqissarneqarpa?

⁸ Jehovap kisimi oqartussaanera Mosesimik allakkat pingajuini erseqqissarneqarpoq. Atuakkami tamatumani inatsisit Guutimeersuunerat minnerpaamik 30-riarluni eqqaaneqarpoq. Mosesip tamanna ilisimallugulu Jehovap peqqussutai tamaasa maleruarpai. (3 Mos 8:4, 5) Mosesitut Jehovamit, Kisimi Oqartussaasumit, piumaffigineqarnitsitut iliortariaqarpugut. Guutip peqatigiissortaanit ikiorneqartaraluarluta Jiisusitut ilaannikkut kisimiinnitsinni misilinneqartarpugut. (Luk 4:1-13) Guuti tatigigutsigu taassumalu kisimi oqartussaanera tapersersorutsigu tatineqarnermut nakkaannarnavianngilagut. — Uss 29:25.

9. Sooq Guutip innuttai nunani tamalaaniittut uumissorneqarpat?

⁹ Guutip innuttai nunani tamalaaniittut malersorneqartarumaarnerat naatsorsuutigisinnaavarput, Jiisusimmi ajoqersukkani ima oqarfigai: “Naalliutsikkumaarpaasi toqukkumaarlusilu, ateralu pillugu inuiannit tamanit uumissorneqassaasi.” (Matt 24:9) Uumissorneqaraluarluta oqaluussiuarlutalu sutigut tamatigut illernartuujuarpugut. Unneqqarissuuvugut aamma timikkut anersaakkullu minguitsuuvugut. Aamma innuttaaqataalluartuuvugut. Kisianni sooq inuit uumissortarpaatigut? (Rom 13:1-7) Jehova, allat pinnagit, Kisimi Oqartussaasutut naalakkatsigu. Taanna “kisiat” pallorfigalugulu taassuma inatsisai najoqqutassiaalu naapertuilluartut maleruartuaannarpavut. — Matt 4:10.

10. Sorsoqqusaannginnermut tunngatillugu ilumoorunnaarsimasut ilaat soqquneqarpa?

¹⁰ Silarsuarmut ilaannginnatta sorsunnernut peqataaneq politikkimullu akuuneq ajorpugut. (Johannesi 15:18-21; Esaja 2:4 atuakkit). Kristumiut tunniulluinnarsimasut sorsoqqusaannginnermut tunngatillugu ilumoorunnaarsimasut amerlanerit peqqissimisimapput Jehovamullu saaqqillutik. (Tuss 51:19) Amerlanngitsulli allamik isumataarsimanngillat. Assersuutigalugu sorsunnersuarmi kingullermi Ungarnimi qatannguterpassuit pisuussuteqanngitsut parnaarussaapput. Taakkunannga 160-it 45-t ataallugit ukiullit oqartussaasunit illoqarfimmut ataatsimut katersortinneqarsimasut sakkutuunngoqquneqarput. Amerlanerit itigartitsipput, qulingilualli sakkutuutut neriorsuillutillu sakkutuut atisaannik atisipput. Ukiut marluk tamatuma kingorna ilumoorunnaarsimasut ilaat nalunaajaasunik aalajaatsunik toqutseqquneqarpoq. Qatanngutivia toqutassaasunut ilaavoq! Nalunaajaasulli aalajaatsut toqutassanngortinneqaraluartut toqunneqanngillat.

11, 12. Itsaq Israelimi pilliutigineqartut qanoq ilinniarfigisinnaavavut?

¹¹ Inatsisini Israelikkut aalajangersimasunik pilliuteqartarnissaat piumasarineqarpoq.  (3 Mos 9:1-4, 15-21) Pilliutigineqartut Jiisusip pilliutaanut naammalluinnartumut assersuutaammata innarluuteqartussaanngillat. Israelikkut aamma pilliutinut ataasiakkaanut ilitsersuutit malittussaavaat. Mosesimik allakkat pingajui 12:6-imi arnamut erneqqammersumut piumasaqaatit ima allassimapput: “Ullut minguersarfini naappata — ernertaarsimaguni panissaarsimaguniluunniit assigiimmik — illernartuummut aggiussissaaq savaaqqamik ataatsimik ukiulimmik ikikkagassatut pilliutissamik aammalu tuimik piaqqamik tuimilluunniit quluartartumik ajortaaruteqqussutitut pilliutissamik. Taakku Toqqup Naapeqatigiittarfiup isaariaata sioraanut sassaatissavai palasimullu tunniullugit.” Jehova aalajangersimasunik piumasaqaateqaraluartoq taassuma asannittuunera ingasaassinianngitsuuneralu Inatsisinit ersersinneqarpoq. Assersuutigalugu anaanaasoq savamut akissaqanngikkuni tuinik quluartartunik marlunnik tuinilluunniit piaqqanik marlunnik pilliuteqarsinnaavoq. (3 Mos 12:8) Arnaq piitsoq arnatut akisuumik pilliuteqarsinnaasutut Jehovamit asaneqarlunilu pingaartinneqarpoq. Tamanna qanoq ilinniarfigisinnaavarput?

¹² Apustilip Paulusip kristumiut ‘qujaniutinik pilliuteqaqqullugit’ kajumissaarpai. (Hebr 13:15) Jehovap aqqa pillugu allat oqaloqatigigaangatsigit qujaniummik pilliuteqartarpugut. Qatanngutit tusilartut ussersorlutik Guutimik unnersiutiginnittarput. Kristumiut angerlarsimaffimminnit anisinnaanngitsut allakkatigut, oqarasuaatikkut pulaartuminnullu oqaluussinermikkut Jehovamik unnersiutiginnittarput. Peqqissuserput piginnaanivullu qanoq annertutigisumik Jehovamik unnersiutiginnissinnaanitsinnut aalajangiisuusarput, tamatigulli pitsaanerpaamik pilliuteqartariaqarpugut. — Rom 12:1; 2 Tim 2:15.

13. Sooq oqaluussinermi nalunaaquttap-akunneri qanoq amerlatigisut atorsimanerlutigit nalunaarusiortariaqarparput?

¹³ Jehova asagatsigu kajumilluta qujaniutinik pilliuteqarfigerusupparput. (Matt 22:37, 38) Qaammatilli tamaasa oqaluussinitsinnik nalunaarusiortarnermut qanoq isiginnittaaseqartariaqarpugut? Taamaaliornitsigut Guutimut tunniusimanerput ersersittaratsigu nalunaarusiorusuttariaqarpugut. (2 Petr 1:7) Nalunaarusiarli pitsaanerulersinniaannarlugu nalunaaquttap-akunneri amerlanerusut atorlugit oqaluussinissamut tatineqartutut misigisariaqanngilagut. Oqaluussisartup ukioqqortusinini peqqiilliorniniluunniit pissutigalugu sivikitsuinnarmik oqaluussisinnaasup minutsit 15-it nalunaarusiaminut allassinnaavai. Taassuma sapinngisaminik iliuuseqarnera Jehovap nuannaarutigaa. Jehovap aamma qatanngutitsinnit asaneqarnini taakkualu nammineq pilluni nalunaajaasoorusunnerat nalunngilaa. Itsaq Israelimi piitsut Guutimut tunissutinik pilliuteqarsinnaanerattut ullumikkut killilimmik iliuuseqarsinnaasut nalunaarusiamik tulluusimaarutigisinnaasaminnik tunniussisinnaapput. Nalunaarusiavut nunarsuaq tamakkerlugu nalunaarusiamut ilanngunneqartarput, taamaaliornerpullu peqatigiissortatta sumiiffinnut pisariaqartitsiffiunerusunut  tunngatillugu pilersaarusiornermut iluaqutigisarpaat. Tamanna pissutigalugu oqaluussinermi nalunaaquttap-akunneri qanoq amerlatigisut atorsimanerlutigit nalunaarusiortarparput.

14. Atuaqqissaartarnitsinnut tunngatillugu imminut misissornissap pingaaruteqarnera nassuiaruk.

¹⁴ Mosesimik allakkat pingajuini allassimasut pingaarutillit ilinniarfigereerlugit atuakkap tamatuma Guutip oqaasianut isumassarsiarititaasumut ilanngunneqarsimanera qujamasuutiginerulerpiuk? (2 Tim 3:16) Illernartuunissat aalajangiusimanerulerpiuk? Jehovap pitsaanerpaamik tuneqquneqarnera pissusissamisuuginnarpoq. Biibilip sinnera itinerusumik atuaqqissaarusulersimassagunarpat. (Ussatit 2:1-5 atuakkit). Nammineq atuaqqissaartarninnut tunngatillugu imminut misissorit ima aperalutit: ‘Jehova pitsaanerpaamik tunisarpara? Imaluunniit isiginnaagassiat, qarasaasiakkut pinnguaatit, timersorneq aliikkutassalluunniit anersaakkut siumukarnissannut akornutigaakka?’ Tamakku akornutigigukkit Paulusip Hebræerinut allagaanik eqqarsaatiginneqqissaarnissaq pitsaassaaq.

15, 16. Sooq Paulusip kristumiut hebræeriusut taama sakkortutigisumik allaffigai?

¹⁵ Paulusip kristumiut hebræeriusut paatsuugassaanngitsumik allaffigai. (Hebræerit 5:7, 11-14 atuakkit). ‘Tusaaniarnermut eqeersimaarunnaarsimanerarpai.’ Sooq taama sakkortutigisumik allappa? Jehovatut asallugillu immuinnarmik, imaluunniit Biibili pillugu tunngaviusumik ilisimasaqarnerinnarmik, inuuniarnerat ernumassutigigamiuk. Anersaakkut  siumukarusukkutta Biibilimi ilinniartitsissutigineqartut tunngaviusut paasinerisa saniatigut ‘nerisassat tamuasarissat’, tassa ilinniartitsissutigineqartut itinerusut, nerisariaqarpavullusooq.

¹⁶ Hebræerit allanik ilinniartitsinatik allanit ilinniartinneqarnissartik pisariaqartippaat. Sooq? ‘Nerisassat tamuasarissat’ nerinaveersaaramikkit. Imminut ima aperigit: ‘Biibilimi ilinniartitsissutigineqartut itinerusut pingaartippakka? Taakku pillugit kajumillunga atuaqqissaarusuttarpunga? Imaluunniit atuaqqissaarnaveersaartarlungalu qinunaveersaartarpunga? Taamaappat atuaqqissaarnermik ileqquliussisariaqarpunga?’ Inuit oqaluussiffigiinnarnagit ilinniartittariaqarlugillu ajoqersuganngortittariaqarpavut. — Matt 28:19, 20.

17, 18. (a) Sooq ‘nerisassat tamuasarissat’ neriuartariaqarpavut? (b) Ataatsimiigiartinnani imigassartortarneq qanoq isiginnittaaseqarfigisariaqarparput?

¹⁷ Biibilimik atuaqqissaarneq amerlasuut sapernartittarpaat. Jehovalli soorunami Biibilimik atuaqqissaarnissatsinnut pinngitsaalerusunngilaatigut. Ukiorpassuarni sivikitsumilluunniit kuisimasuusimagaluarutta ‘nerisassat tamuasarissat’ neriuartariaqarpavut. Tamanna illernartuujuarnissatsinnut pingaaruteqarluinnarpoq.

¹⁸ Illernartuujumalluta Allakkat Illernartut misissoqqissaartariaqarlugillu Guutip piumasaatut iliortuartariaqarpugut. Aronip erneri Nadabi Abihulu aalakoorunarlutik ‘innermik illernartitaanngitsumik’ sassaassinertik pissutigalugu toqunneqarput. (3 Mos 10:1, 2) Guutip Aronimut oqaasii maluginiakkit. (3 Mosesi 10:8-11 atuakkit). Tamanna pissutigalugu kristumiut ataatsimiinnerit sioqqullugit imigassartortassanngillat? Makku eqqarsaatigikkit: Mosesip inatsisai maleruartussaanngilavut. (Rom 10:4) Nunat ilaanni qatanngutivut ataatsimiigiartinnatik nerinerminni ingasaassinaveersaarlutik imigassamik iggiseqartarput. Poorskimi ermutsit sisamat imerneqarput. Jiisusip eqqaaniaaneq atuutilersikkamiuk apustilini aammut assersuutaasumik viinnisoqatigai. (Matt 26:27) Erngunneq imerajunnerlu Biibilimi inerteqqutigineqarput. (1 Kor 6:10; 1 Tim 3:8) Kristumiorpassuit nalunngeqatiginnissutertik pissutigalugu Jehovamik pallorfiginnitsinnatik imigassartunngisaannarput. Nunanili pissutsit assigiinngitsuupput, kristumiullu illernartuujuarumallutik Jehovamillu iluarisaajumallutik ‘illernartup pitsaanngitsumit’ immikkoortissinnaanissaa pingaartittariaqarpaat.

19. (a) Qanoq ilaqutariittut atuaqqissaaqatigiittarnerput namminerlu atuaqqissaartarnerput pissarsiaqarnarnerulersissinnaavavut? (b) Illernartuujuarnissat qanoq qulakkeersinnaaviuk?

¹⁹ Guutip oqaasia misissoqqissaartarutsigu najoqqutassiarpassuit Biibilimeersut nuannersut paasissavavut. Ilaqutariittut atuaqqissaaqatigiittarnersi namminerlu atuaqqissaartarnerit pissarsiaqarnarnerulersinniarlugit ujarliutit atortakkit. Jehova taassumalu siunertaa ilisimalluarnerulikkit aamma qanilliartortuaruk. (Jaak 4:8) Tussiaasiortoq ima erinarsortoq ilaarlugu Guutimut qinusarit: “Isikka uisikkit, takoqqullugit tupinnartut inatsisinni ittut.” (Tuss 119:18) Inatsisit najoqqutassiallu Biibilimeersut maleruartuakkit. ‘Illernartuusup’ inatsisai kajumillutit maleruarlugillu ‘Guutip iivangkiiliua illernartitaasoq’ aallussilluarlutit oqaluussissutigisaruk. (1 Petr 1:15; Rom 15:16) Ulluni kingullerni ajortuni makkunani illernartuujuartariaqarpugut. Qanortoq tamatta sutigut tamatigut illernartuullutalu Jehovap kisimi oqartussaaneranik tapersersuiuarisa.