JEHOVAP NALUNAAJAASUISA Siulersuisoqatigiivinut ilaasortaq Guy Hollis Pierce marlunngorneq marsip 18-ianni 2014-imi 79-inik ukioqarluni nunarsuarmi inuujunnaarpoq. Kristusip qatanngutaanut ilaagami qilammi makititaanissamut akissarsiassani pivaa. — Hebr 2:10-12; 1 Petr 3:18.

Guy Pierce USA-mi Auburnimi Californiamiittumi novembarip arfernanni 1934-mi inunngorpoq 1955-imilu kuisilluni. 1977-imi asangaakkani Penny katippaa meeqqiulerlutillu. Aamma allanut amerlaqisunut ataatatut ippoq. 1982-imi Pennylu pioneritut aallarteqatigiipput. 1986-imi nakkutilliisutut angalasartutut USA-mi aallartippoq ukiunilu aqqanilinni kiffartorluni.

1997-imi Guy aamma Penny Pierce USA-mi Betelimi kiffartortuulerput. Qatanngut Guy Pierce Kiffartornermik Nakkutilliisoqarfimmi kiffartulerpoq 1998-imilu Siulersuisoqatigiinni Sulisoqarnermut Ataatsimiititaliami ikiortissatut ivertinneqarluni. 1999-imi oktobarip ulluisa aappaanni ukiumoortumik ataatsimiinnermi Siulersuisoqatigiinnut ilaasortatut ivertinneqarnera nalunaarutigineqarpoq. Ukiuni kingullerni piffissani assigiinngitsuni Sulisoqarnermut, Aaqqissuisoqarnermut, Saqqummersitsisarnermut Ataqatigiissaarisunut Ataatsimiititaliani sulisimavoq.

Qatanngut Pierce qungutsarissuuvoq quiasaarumatuujullunilu. Inuit assigiinngitsunik tunuliaqutallit kulturillillu ilakkuminartittarpaat. Inunnilli ilakkuminartinneqarneranut pissutaanerpaapput asannittuunera, maniguuttuunera, Guutip inatsisaanik najoqqutassiaanillu ataqqinnittuunera Jehovamullu upperluartuunera. Guy Pierce oqartarpoq Jehovap neriorsuutaasa eqquunnissaat seqernup nuinissaanit qularnannginnerusoq, tamannalu nunarsuup inuinut tamanut paasitikkusuttarpaa.

Qatanngut Pierce Jehova pillugu eqiasuilluni sulisarpoq, ullaaralaamiit ilaatigullu unnussuarmut. Qatanngutini kristumiut qiimmassarniarlugit nunanut assigiinngitsorpassuarnut angalasarpoq, ikiortariallillu siunnersorneqarnissaminnilluunniit pisariaqartitsisut piffissaqarfigiuartarlugit. Ukiorpassuit qaangiutereeraluartut uppeqataasa inoroorsaartuunera, ikinngutinnersuunera anersaakkullu qiimmassaasarnera eqqaamavaat.

Qatannguterput ikinnguterpullu asasarput nuliaminit, qitornaminit arfinilinnit, ernutaminit ernutaqqiutiminit anersaakkullu meerarpassuarminit maqaasineqassaqaaq. Arfininngornermi marsip 22-anni 2014-imi Siulersuisoqatigiinnut ilaasortaq, Mark Sanderson, Betelimi Brooklynimiittumi qatanngut Pierce eqqaaniarlugu oqalugiartuuvoq. Qatanngutip Piercep qilammi neriuutaa pillugu oqalugiarpoq Jiisusillu oqaasii uku atuarlugit: “Ataatama illuani inissat amerlaqaat. ... Inissassinnillu piareersaakkiartoreerussi tikiuteqqikkumaarpunga uannullu pisikkumaarlusi ilississaaq uanga najugarisanneeqqullusi. Ornigassannut aqqutaa nalunngilarsi.” — Joh 14:2-4.

Qatanngut Pierce maqaasinassaqaaq. Nuannaarutigaarpulli ‘inigiuagassaminut aqqutaa nalunngimmagu’.