Jehova asagatsigu aalajangernikuuvugut taassumunnga tunniulluinnarniarluta kuisinniarlutalu. Aalajaaffiginiarlugu neriorsuinerput eqqortikkusupparput. Uagutsinnulli akeraasoq Saatani Diaavulu assuarnaakkunnaarsinniartarpaatigut. (Saqq 12:17) Jehova kiffartuunniarlugu naalanniarlugulu aalajangernikuuvugut. Isumarput allanngortikkutsigu inuunerput annaasinnaavarput.

Ukiut 2600-t sinnerlugit matuma siorna Babylonimiut kunngiat Nebukadnesari kuultiusumik inuusalialiortitsivoq peqqusillunilu inuit tamarmik pallorfigissagaat. Pallorfiginnikkusunngitsoq aatsitsivimmut aamaannaasumut iginneqassaaq. Shadraki, Meshaki Abed-Negolu angutaapput inuusuttut pingasut Jehovamik pallorfiginnittut taassumanngalu iluarisaajuarusuttut. Tamanna pissutigalugu kunngi naalakkumannginnamikku aatsitsivimmut aamaannaasumut iginneqarput. Jehovap tupinnartuliornikkut inuuginnartippai. Guutimit iluarisaajunnaarnissaminngarnit toqorusunnerupput. — Dan 3:1-27.

Aamma pruffiitip Danielip Guutimut qinunermini allanit takuneqaruni løvit inaannut iginneqassalluni nalunngikkaluarlugu ullormut pingasoriarluni qinusarnini taamaatinngilaa. Guutimik ilumoortumik pallorfiginninniarluni aalajangernini allanngortinnginnamiuk Jehovap “løvit pissaanerannit” aniguisippaa. — Dan 6:2-28.

Ullumikkut aamma Guutip kiffaasa kuisimasut Jehovamut neriorsuutertik eqquutitittarpaat. Afrikami nalunaajaasut inuusuttut ilinniarfimminni nunagisamut ilisarnaammik pallorfiginninnermut peqataajumannginnamik anisitaanissamik sioorasaarneqarput. Kingusinnerusukkut taakku ilinniartitaanermut naalakkersuisumit oqaloqatigineqaramik siooranatik pissuserillutillu ilassinnikkumannginnerminnik nassuiaapput. Tamatuma kingorna ajornartorsiuteqaqqinngillat. Jehovamut naalasseriinnissamut tatineqarnatik ilinniarnerminnik ingerlatitseqqissinnaanngorput.

Josephip aamma nuliami toqoriataarnera misilinneqaatigisimavaa. Josephip ilisinermut tunngatillugu kissaatai ilaqutaasa ataqqivaat. Nuliatali ilaqutai sallusuissummiinngillat Guutillu iluarinngisaanik ilisinermut tunngatillugu iliuuseqarusullutik. Joseph ima oqaluttuarpoq: “Isumaga allanngortikkusunnginnakku qitornakka sunnerniarsarilerpaat, qitornakkali aalajaattuarput. Ilaqutaasut aamma angerlarsimaffitsinni uagutsinni toqusoornermi ileqqulersuutit ingerlanniaraluarpaat, oqarfigaakkali taamaaliornissartik aalajangiusimappassuk uagutsinni taamaaliortoqassanngitsoq. Nalunngilaat toqusoornermi ileqqulersuutit upperisannut nuliamalu upperisaanut naapertuutinngitsut, taamaattumik sivisuumik oqaloqatigeereerlutik sumiiffimmi allami taamaaliorput.”

“Aliasullunga artorsarninni ilaqutariittut Jehova taassuma inatsisaanik maleruaajuarnissatsinnut ikioqqulluta qinnuigisarpara. Qinnutikka tusaavai tatineqarnitsinnilu aalajaattuarnissatsinnut ikiorluta.” Josephip qitornaasalu Jehova naalattuarniarlugu aalajangersimanerminnik allanngortitsinissartik eqqarsaatiginngisaannarpaat.

Arnap Israelikkuunngitsup Jiisusi aperaa anersaapiluk panimminit anisissinnaaneraa. Arlaleriarluni aperigaluaraani Jiisusip akinngilaa. Ajoqersukkani ima nassuiaappai: “Allanut aallartitaanngilanga kisianni Israelikkunni savanut tammarsimasunut.” Aperiuarmalli Jiisusip ima akivaa: “Iluanngilaq meeqqat nerisassaannik arsaaraanni qimminnguanullu tunniullugit.” Arnap ima akinermigut uppersuseqangaarnini ersersippaa: “Massami, Naalagaq, taamaattormi qimminnguit sequnnikut naalakkamik nerrivianniit nakkartut nerisarpaat.” Jiisusip isummani allanngortikkamiuk anersaapiluk niviarsiaqqamit anisippaa. — Matt 15:21-28.

Jiisusip naleqqukkaangat isummaminik allanngortitsinissaminut kajumissuseqarnermigut Jehova ilaarpaa. Assersuutigalugu Israelikkut kuultimik nersuteeraasaliamik pallorfiginninnermikkut naalanngimmata Jehova aalajangerpoq toqusariaqartut. Mosesilli  kimigiiserfigimmani Jehova isummaminik allanngortitsinissaminut kajumissuseqarpoq. — 2 Mos 32:7-14.

Jehovap Jiisusillu pisimanerattut apustili Paulusi isummaminik allanngortitsinissaminut kajumissuseqarpoq. Ajoqersuiartortitatut angalanermini siullermi Markusimit qimanneqarami taanna angalaqatigeqqikkusunngilaa. Kingusinnerusukkulli Paulusip Markusi inersimalluartutut iluaqutaalluarsinnaasutullu isigilersimagunarpaa. Taamaattumik Paulusi Timotheusimut ima allappoq: “Markusi maannaqatiginiaruk, uanga kiffartortuuninni taanna ikiortigilluartarpara.” — 2 Tim 4:11.

Tamanna qanoq ilinniarfigisinnaavarput? Jehova naammalluinnartuugaluarluni naakkittartuunini, kamagittartuunini asanninninilu pissutigalugit isummaminik allanngortitsinissaminut kajumissuseqarpoq. Uagut ajortiliugatta ilaannikkut pissutaasut tamaasa takusinnaaneq ajorpavut. Taamaattumik ilaannikkooriarluta isummatsinnik allanngortitsisarnissatsinnut pissutissaqarnerungaarpugut. Assersuutigalugu allat atugaat paasilluarneruleraangatsigit taakkununnga isumarput allanngortittariaqarsinnaasarparput.

Aamma Guutimut kiffartornermi anguniakkanut tunngatillugu eqqarsartaaserput allanngortittariaqarsinnaasarparput. Imaassinnaavoq Biibili atuaqqissaartarlugulu ataatsimiigiartaraluarluta kuisinniaaluusaartugut. Imaluunniit pionerinngorsinnaagaluarluta aallartinniaaluusaartugut. Qatanngut angut immaqa ilagiinni kiffartortunngorusunngilaq imaluunniit utoqqaanertanngorusunnani. (1 Tim 3:1) Taamatut misiginikuuit? Isummannik allanngortitsisariaqarpit? Jehovap taakkuninnga immikkut pisinnaatitaaffeqarnissat aamma imminerminut allanullu kiffartuussinikkut pilluarnissat kissaatigaa.

Ella, Afrikami Betelimi kiffartortoq, ima oqaluttuarpoq: “Aallaqqaammut sivisuumik Betelimiinnissara  qularaara. Tarnikkut iluunngarlunga Jehova kiffartuukkusuppara, ilaquttakkali qanigisaringaarpakka. Assullu maqaasisarpakka! Ineqatigisamali qiimmassartarmanga angerlarniarnanga aalajangerpunga. Maanna ukiut qulit Betelimeereerlunga aalajangerpunga suliarisartakkakka ingerlatiinnarnerisigut qatanngutikka sapinngisamik sivisunerpaamik kiffartuunniarlugit.”

Ilaanneeriarluta isummatsinnik allanngortitsilluinnartariaqartarpugut. Assersuutigalugu Kaini qatanngunni sinngagileramiuk kamangaalerpoq. Guutip ajortumik iliuuseqarniartoq takusinnaagamiuk kamannerminik nunusinissaanik kajumissaarpaa. Oqarfigaa ‘ajorti matup killingani qamasoq’. Kainilli isummaminik isiginnittaatsiminillu allanngortitsinani Guutip oqaaqqissaarinera sumiginnarpaa. Tamatuma kingunerisaanik qatanngunni toquppaa! — 1 Mos 4:2-8.

Aamma kunngi Uzzija pillugu oqaluttuaq ilinniutigisinnaavarput. Aallaqqaammut Jehovamut naalallunilu attaveqarluaraluarluni makitasuunngorpoq. Palasit kisimik tipigissaatilliisussaatitaagaluartut tipigissaatilliiniarluni naalaffimmukarpoq. Palasit tamanna pillugu mianersoqqugaluaraanni isummaminik allanngortitsinngilaq. Uzzija “kamalerpoq” oqaanneqarninilu sumiginnarlugu. Tamannalu pillugu Jehovap pupissunngortippaa. — 2 Nal 26:3-5, 16-20.

Nalitsinni isummaminik allanngortitsisariaqarsimasoq tassaavoq Joachim 1955-imi kuisittoq 1978-imili ilaajunnaarsitaasoq. Ukiut 20-t sinnerlugit ingerlareersut isummani allanngortillugulu peqqissimigami ilagiinnut uteqqippoq. Utoqqaanertap aperimmani sooq taama sivisutigisumik utaqqisimanerluni Joachim ima akivoq: “Kamallungalu makitagama. Peqqissimivunga taama sivisutigisumik utaqqisimagama. Ilaajunnaarsitaaqqaninni nalunngilara Jehovap Nalunaajaasuisa sallusuissut ilinniartitsissutigigaat.”

Uaguttaaq ilaanneeriarluta aalajangiussimasavut iliuuserisartakkavullu allanngortittariaqartarpavut. Taamaaliornissatsinnut kajumissuseqarutta Jehovamit iluarisaassaagut. — Tuss 34:9.