1, 2. Jiisusip ajoqersukkani ullormi makititaaffimmini qanoq nakussatsippai?

JIISUSIP ajoqersugai marluk Jerusalemimiit 11 kilometerisut ungasitsigisumiittumut illoqarfeeqqamukarput. Jiisusip toqunera aliasuutigaat taassumalu makititaasimanera nalullugu. Jiisusip saqqummerfigeriasaarpai pisoqatigilerlugillu. Taava “Mosesi pruffiitillu tamaasa aallarniutigeriarlugit Allakkani tamani imminik pilluni allassimasunik nassuiaaffigai.” (Luk 24:13-15, 27) Tuppallersarneqartutut misigalutillu ‘Allakkanik nassuiaanneqaramik uummatimikkut kissalerput’. — Luk 24:32.

² Unnuk taanna ajoqersukkat taakku marluk Jerusalemimut uterput. Apustilit naapikkamikkit pisimasunik oqaluttuuppaat. Oqaloqatigiitsillugit Jiisusip tamaasa saqqummerfigai. Ajoqersukkat annilaangangaalerput Jiisusiunersorlu qularutigilerlugu. Jiisusimit nakussatsinneqarnerat Biibilimi ima nassuiarneqarpoq: “Siuneqassusiat ammarpaa Allakkat paasisinnaalersillugit.” — Luk 24:45.

3. Sooq Jehovamut kiffartornitsinni nikallungasarsinnaavugut, qanorli nuannaartuarsinnaavugut?

³ Ilaannikkut ajoqersukkat pisimanerattut nikallungangaarsinnaasarpugut. Aallussilluarluta Jehovamut  kiffartoraluarluta inuit oqaluussissutigisatsinnik paasinninnginnerat nikallungassutigisinnaavarput. (1 Kor 15:58) Imaluunniit misigisinnaavugut Biibilimik atuaqqissaaqatigisartakkavut suli siumukarnerusariaqaraluartut. Allaat taakkua ilaasa Jehova ajattulersinnaavaat. Qanoq oqaluussinitsinnik nuannaarutiginnittuarsinnaavugut? Jiisusip assersuusiaasa isumaannik paasiniaalluartarneq iluaqutigisinnaavarput. Maanna assersuutit pingasut qanoq ilinniarfigisinnaanerlutigit paasiniarlugu sammissavavut.

4. Jiisusip naatsiiassanik siaruarterisoq sinittoq pillugu assersuusiaa qanoq isumaqarpa?

⁴ Markusip iivangkiiliua 4:26-29 atuakkit. Jiisusip naatsiiassanik siaruarterisoq sinittoq pillugu assersuusiaa qanoq isumaqarpa? Naatsiiassanik siaruarterisoq Naalagaaffimmik oqaluussisartunut assersuutaavoq, naatsiiassat tusarliussamut inunnut eqqortuliorusuttunut oqaluussissutigisaannut assersuutaavoq. Naatsiiassanik siaruarterisoq allatulli nalinginnaasunik suliaqartarpoq, unnukkut sinittarpoq ullunngoraangallu makittarluni. Naatsiiassat piffissap ingerlanerani, siaruarteriffimmiit katersuiffissap tungaanut, naajartortarput. Piffissami tamatumani ‘karrit naajartorput alliartorlutillu’. “Imminik” naajartorusaartarput. Taamatuttaaq inuk anersaakkut ineriartorusaartarpoq, imaluunniit Jehovamut attaveqarluarneruleriartortarpoq. Inerilluariartortilluni Guutimut kiffanngorniarluni aalajangeraangami Jehovamut tunniulluinnarnermigut kuisinnermigullu “inerititaqartarpoq”.

5. Sooq Jiisusi naatsiiassanik siaruarterisoq sinittoq pillugu assersuusiorpa?

⁵ Sooq Jiisusi taamatut assersuusiorpa? Jehovap ‘eqqortumik isiginnittaasillit’ uummataanni sallusuissummik naajartortitsisarneranik Jiisusip paasitikkusukkamisigut. (ApS 13:48, NW; 1 Kor 3:7) Siaruarterisarlutalu imerterisarpugut, naajartornerli sukkanerulersissinnaanngilarput. Assersuusiami angutitut nalusarparput naajartorneq qanoq pisartoq. Imaassinnaavoq Naalagaaffimmik naatsiiassap inunni allani naajartornera takusinnaanngikkipput. Piffissalli ingerlanerani inerititaqarpat ajoqersugaq nutaaq katersueqatigilersinnaavarput. — Joh 4:36-38.

6. Biibilimik atuaqqissaaqatigisartakkatta siumukarnerannut tunngatillugu suna nassuerutigisariaqarparput?

 ⁶ Assersuusiaq qanoq ilinniarfigisinnaavarput? Siullertut, Biibilimik atuaqqissaaqatigisartakkatta qanoq sukkatigisumik sallusuissummi siumukarnissaanik aqutsisinnaannginnerput nassuerutigisariaqarparput. Atuaqqissaaqatigisartagarput sapinngisatsinnik ikioraluarlugu tapersersoraluarlugulu kuiseqqullugu kimigiiserfiginngisaannartariaqarparput. Guutimulli tunniulluinnarnissani nammineq aalajangertussaagaa maniguulluta nassuerutigisariaqarparput. Jehovap aatsaat asagutsinni tunniulluinnarnerput akuerissavaa. — Tuss 51:14; 54:8; 110:3.

7, 8. (a) Jiisusip naatsiiassanik siaruarterisoq sinittoq pillugu assersuusiaa aamma qanoq ilinniarfigisinnaavarput? Assersuuteqarit. (b) Tamatumannga Jehova Jiisusilu pillugit suna ilikkarparput?

⁷ Aappaattut, assersuummik tamatuminnga paasinninnerput ilinniartitsinitta sunniutaannik ingerlaannaq takusaqanngikkaluarluta nikallunnginnissatsinnut iluaqutigaarput. Erinitsajuittariaqarpugulli. (Jaak 5:7, 8) Atuaqqissaaqatigisartagaq sapinngisatsinnik ikioraluarlutigu sallusuissut taassuma uummataani naajartunngippat imaanngilaq ilinniartitsinerluttuusugut. Aatsaat inuup maniguuttup uummataa allanngortitsinissaminut kajumissuseqarpat Jehovap sallusuissutsip naatsiiassartaata naajartornissaa akuerisinnaavaa. (Matt 13:23) Oqaluussinitta sunniuteqarluartarnera inuit kuisittut amerlassusaat naapertorlugu nalilersortassanngilarput. Jehovammi ilinniartitatta iliuusaat oqaluussinitta iluatsilluarneranut apeqqutaatinneq ajormagu. Eqiasuillutali iliuuseqarnerput qujamasuutigisarpaa. — Lukasi 10:17-20; 1 Korinthimiut 3:8 atuakkit.

⁸ Pingajuattut, inuit uummataanni allanngornerit ilaannikkut takusinnaaneq ajorpavut. Assersuutigalugu aappariit ajoqersuiartortitamit atuaqqissaaqatigineqartartut oqarput oqaluussisartunngorusullutik kuisimanngitsut. Ajoqersuiartortitap pujortartarunnaaqqaartariaqarnerannik eqqaasippai. Taanna qaammatit arlallit tamatuma sioqqullugit pujortartarunnaarsimanerminnik oqarfigineqarami tupaallappoq. Aappariit paasivaat isertorlutik pujortartarunik Jehovap takusinnaassagaatik taassumalu ilumoortuusaarneq uumigigaa. Taamaattumik aalajangersimapput ajoqersuiartortitap saavani pujortartassanngikkunik marluullutik pujortartarunnaarniarlutik. Jehovamik asanninnerulernertik eqqortumik aalajangiinissaminnut iluaqutigaat. Ajoqersuiartortitap allannguinerat maluginiarsimanngikkaluaraa anersaakkut siumukarsimapput.

9. Jiisusip qassutit pillugit assersuusiaa qanoq isumaqarpa?

⁹ Matthæusip iivangkiiliua 13:47-50 atuakkit. Jiisusip qassutit pillugit assersuusiaa qanoq isumaqarpa? Jiisusi oqarpoq Naalagaaffimmik tusarliussamik oqaluussissutiginninneq immamut qassutinik naloriussinertut ittoq. Soorlu  qassutit ‘aalisakkanik tamalaanik pisaqartartut’ taamatuttaaq oqaluussinerput inunnik millionilinnik ussagartitsisarpoq. (Es 60:5) Ukiut tamaasa inuppassuit ataatsimeersuarnitsinnut eqqaaniaanitsinnullu najuuttarnerat tamatumunnga uppernarsaataavoq. Inuit taakkua ilaat aalisakkatut ‘ajunngitsutut’ ittut kristumiut ilagiivinut ilannguttarput. Allat aalisakkatut ‘ajortutut’ ittut Jehovamit akuerineqarneq ajorput.

10. Sooq Jiisusi qassutit pillugit assersuusiorpa?

¹⁰ Sooq Jiisusi taamatut assersuusiorpa? Assersuusiami aalisakkat immikkoortiterneqarnerat annikilliornartussarsuarmi inaarutaasumik eqqartuussinermut innersuussutaanngilaq. Aaqqissuussaanerulli matuma naggataatungaani susoqassaneranut nassuiaataavoq. Jiisusip ersersippaa inuit Naalagaaffimmik tusarliussamik nuannarinnittut ilaat Jehovamut kiffanngorusunnavianngitsut. Ilaat ataatsimiinnitsinnut najuuttarsimasut Biibilimilluunniit atuaqqissaartarsimasut Jehovamut tunniulluinnarnissaminnut piumassuseqarnavianngillat. (1 Kng 18:21) Allaat allat ataatsimiigiartarunnaarsimapput. Inuusuttut ilaat sallusuissut malillugu perorsarneqarsimasut namminneq Jehovamik asanninnissartik ilikkarsimanngilaat. Jiisusip erseqqissarpaa tamatta nammineq aalajangertariaqartugut. Eqqortumik aalajangiigutta Jehovap ‘erlinnartuutimisut’ isigissavaatigut. — Hagg 2:7.

11, 12. (a) Qassutit pillugit assersuusiaq qanoq ilinniarfigisinnaavarput? (b) Tamatumannga Jehova Jiisusilu pillugit suna ilikkarparput?

¹¹ Qassutit pillugit assersuusiaq qanoq ilinniarfigisinnaavarput? Assersuummik tamatuminnga paasinninnerput Biibilimik atuaqqissaaqatigisartakkap qitornalluunniit Jehovamut kiffartorusunnginneranik ingasattumik aliasuutiginninnginnissamut imaluunniit pakatsissutiginninnginnissamut iluaqutigissavarput. Imaassinnaavoq ilinniartinniarlugu sapinngisatsinnik iliuuseqarsimasugut. Inuk Biibilimik atuaqqissaaqatigineqartalernissaminut akuersinini sallusuissulluunniit malillugu perorsarneqarnini pissutigiinnarlugu Jehovamut ikinngutaalerneq ajorpoq. Jehovap oqartussaassusiata akuerinissaanut piumassuseqanngikkuni Guutimut kiffanngorsinnaanngilaq.

 ¹² Tamanna sallusuissut malillugu inuujunnaarsimasut ilagiinnut uteqqinngisaannarnissaattut paasisariaqarpa? Imaluunniit Jehovamut tunniulluinnarniarlutik suli aalajangersimanngitsunut neriuutissaqannginnertut paasisariaqarpa? Naamik, annikilliornartussarsuup aallartinnginnerani Jehovamut ikinngutaalernissaminnut suli periarfissaqarput. Jehovap taakku ima oqarfigai: “Uannut saanniarniaritsi, taava uanga ilissinnut saassaanga.” (Mal 3:7) Tamanna Jiisusip erneq tammaraluartoq pillugu assersuusiaanit erseqqissarneqarpoq. — Lukasi 15:11-32 atuakkit.

13. Erneq tammaraluartoq pillugu assersuusiaq qanoq isumaqarpa?

¹³ Jiisusip erneq tammaraluartoq pillugu assersuusiaa qanoq isumaqarpa? Assersuusiami ataataq misigittartoq Ataatatsinnut qilammiusumut, Jehovamut, assersuutaavoq. Erneq kingornussarsiaminik nungulussinnaasoq inunnut kristumiut ilagiivinik qimatsisimasunut assersuutaavoq. Taakku Saatanip silarsuaanut ilanngukkamik ‘nunamut ungasissumut’, tassa Jehovamit ungasissumut, aallarpullusooq. (Ef 4:18; Kol 1:21) Inuilli ilaasa kukkorujussuarsimanertik paasigaangamikku Jehovamut uteqqinniarlutik aalajangertarput. Uterumallutik iliuuseqangaartariaqarput, maniguullutillu peqqissimivimmata Jehovap isumakkeerfigai uteraangatalu tikilluaqqungaartarlugit. — Es 44:22; 1 Petr 2:25.

14. Sooq Jiisusi erneq tammaraluartoq pillugu assersuusiorpa?

¹⁴ Sooq Jiisusi taamatut assersuusiorpa? Jehovap imminik qimatsisimasut uteqqinnissaannik kissaateqangaarnera Jiisusip ersersippaa. Assersuummi ataataasup ernermi uterumaarnera neriuutigiuarpaa. Tikilluaqqusaasutut misigitikkusukkamiuk ‘ungasissumit takuleramiuk arpalluni ornippaa’. Sallusuissut malillugu inuujunnaarsimasut Jehovamut  ingerlaannaq saannissaminnut assersuut tamanna kajumississutigisariaqarpaat. Imaassinnaavoq Jehovamut attaveqarpianngitsut, kanngusuttut uternissartillu sapernartikkaat, ilungersorneralli kinguneqarluarsinnaavoq. Uternerat Jehovap, Jiisusip inngilillu nuannaarutigissavaat. — Luk 15:7.

15, 16. (a) Jiisusip erneq tammaraluartoq pillugu assersuusiaa qanoq ilinniarfigisinnaavarput? Assersuuteqarit. (b) Tamatumannga Jehova Jiisusilu pillugit suna ilikkarparput?

¹⁵ Erneq tammaraluartoq pillugu assersuusiaq qanoq ilinniarfigisinnaavarput? Jehovap asanninnermik maligassiaa ilaartariaqarparput. Ilagiinnut utertut ‘iluarniarpallaarfiginagillu’ tikilluaqqusaanngitsutut misigitittassanngilagut. Taamaalioruttami Jehovamik ikinnguteqarnerput ajoqusissavarput. (Oqal 7:16) Aamma ilagiinnik qimatsisimasoq “savatut tammartutut”, uteqqissinnaasutut, isigisariaqarparput. (Tuss 119:176) Sallusuissummi unittoorsimasoq naapikkutsigu sapinngisatsinnik ikiorusussavarput? Utoqqaanertat ikiuisinnaaniassammata ingerlaannaq paasitissavavut? Jiisusip assersuusiaa tamanna paasigutsigu maleruarlugulu taamaaliussaagut.

¹⁶ Uteqqittut Jehovap nallittuisuunera, asanningaarnera ilagiillu tapersersuinerat qujamasuutigisarpaat. Qatanngut angut ukiuni 25-ni ilaajunnaarsitaaqqasimasoq ima oqaluttuarpoq: “Jehovamit ‘ullunik inuummarissiffissanik’ tunineqartarnera ilutigalugu nuannaarneruleraluttuinnarpunga. (ApS 3:19, 20) Kikkut tamarmik tapersersuillutillu asanningaarput! Maanna inutsialannik anersaakkut ilaqutaqarpunga.” Qatanngut arnaq inuusuttoq ukiuni tallimani unittooqqareerluni ilagiinnut utertoq ima oqaluttuarpoq: “Jiisusip asanninneq paatsuugassaanngitsumik eqqartugaa uannut ersersinneqartoq oqaasertalerneqarsinnaanngilaq, Jehovammi peqatigiissortaanut ilaaneq nalissaqanngilaq!”

17, 18. (a) Assersuusiat pingasut taakku qanoq ilinniarfigisinnaavavut? (b) Sunissarput aalajangiusimavarput?

¹⁷ Assersuusiat pingasut taakku qanoq ilinniarfigisinnaavavut? Siullertut, paasisariaqarparput Biibilimik atuaqqissaartartut anersaakkut siumukariartorasuaqqullugit pinngitsaalisinnaanatigit. Jehovap tamanna isumagiumaarpaa. Aappaattut, peqatigisartakkatta atuaqqissaaqatigisartakkattalu tamarmik Jehovamut kiffartulernissaannik naatsorsuutiginninneq piviusorsiornerunngilaq. Kingullertut, Jehovamik qimatsisut uterumaarnerannik neriuuteqartuartariaqarpugut. Uterpata Jehovap asanninneranik ersersitsisumik tikilluaqqussavavut.

¹⁸ Qanortoq tamatta ilisimasaqarneq, paasisimasaqarneq ilisimassuserlu noqqaassutigiuartigit. Jiisusip assersuusiai atuaraangakkit imminut ima aperisarit: ‘Assersuut qanoq isumaqarpa? Sooq Biibilimut ilanngunneqarpa? Ilinniartitsissutigineqartoq qanoq maleruarsinnaavara? Tamatumannga Jehova Jiisusilu pillugit suna ilikkarpara?’ Taamaaliortarutta Jiisusip oqaasiisa isumaannik paasinninniartarnerput ersersissavarput.