1. Inuppassuit pigisatik pillugit qanoq isumaqartarpat?

INUIT ilaat ima oqartut immaqa tusarnikuuat: “Aatsaat annaagakku paasilerpara qanoq pingaaruteqartiginera.” Illit aamma taamatut misiginikuuit? Assersuutigalugu ilaqutariinni pisuuni peroriartortut ilaat qujasuitsuusinnaasarput. Imaluunniit inuusuttup misilittagakinnini pissutigalugu inuunermi sunarpiaq pingaaruteqarnersoq immaqa paasisinnaassanngilaa.

2, 3. (a) Kristumiut inuusuttut qanoq eqqarsartaaseqarnaveersaartariaqarpat? (b) Pissarsiatta qujamasuutiginissaanut suut iluaqutigisinnaavavut?

² Inuusuttuuguit suna pingaartippiuk? Ullumikkut silarsuarmi inuusuttorpassuit pigisat ikinnguteqarnermit pingaartinnerusarpaat. Immaqa suliffigissaarusuttarput, kusanartumik angerlarsimaffeqarusuttarput imaluunniit atortorissaarutinik elektroniskiusunik nutaanerpaanik pigisaqarusuttarlutik. Taakkuninnga pingaarnerpaatitsisut inuunermi pingaarnerpaaq, Guutimik ikinnguteqarneq, amigaatigaat. Angajoqqaanit kristumiuusunit perorsarneqarsimaguit anersaakkut kingornussarsiaq nuannersoq pissarsiarisimassavat. (Matt 5:3, NW) Anersaakkut kingornussarsiannik  qujamasuutiginninnginnerit inuunerpit sinnerani ajortumik sunnerneqaatigisinnaavat.

³ Illit tamanna misigisariaqanngilat. Oqaluttuat Biibilimeersut anersaakkut kingornussarsiannik qujamasuutiginninnissannut iluaqutigisinnaasatit sammissavavut. Oqaluttuat taakku inuusuttunut iluaqutaaginnaratik tamatsinnulli Jehovamit pissarsiarisimasatsinnik pingaartitsinissatsinnut iluaqutaassapput.

4. Samuelimik allakkat siulliit 8:1-5 naapertorlugit Samuelip erneri qanoq ittuuppat?

⁴ Inuit Biibilimi eqqaaneqartut ilaasa anersaakkut kingornussarsiartik nuannersoq qujamasuutiginngilaat. Pruffiiti Samueli inuusuttuaraalluni Jehovamut kiffartulerpoq taassumunngalu aalajaattuarluni. (1 Sam 12:1-5) Samueli maligassaalluarpoq, ernerili Joeli Abijalu ataatartik ilaarnagu peqquserluttunngorlutillu ajortunngorput. — 1 Samueli 8:1-5 atuakkit.

5, 6. Josijap ernerinut ernutaanullu tunngatillugu qanoq pisoqarpa?

⁵ Kunngimut Josijamut tunngatillugu aamma taamatut pisoqarpoq. Josija kunngiuvoq aalajaatsoq Jehovamik pallorfiginnittoq. Guutip inatsisaanik nassaarineqartunik atuffanneqarami Jehovap ilitsersuussutaanik maleruaalerpoq. Judami guutipilussiortoqarunnaarsitsillunilu anersaarsiortoqarunnaarsitsivoq inuillu Jehovamut naalaqqullugit kimigiiserfigalugit. (2 Kng 22:8; 23:2, 3, 12-15, 24, 25) Erneri anersaakkut immikkut ittumik kingornussarsigaluarput! Ernerili pingasut ernutaalu ataaseq kunnginngoramik pissarsiartik qujamasuutiginngilaat.

⁶ Josijap ernera Joakazi kunnginngorami Jehovap “isaani ajortumik iliorpoq”. Qaammatini pingasuinnarni kunngioreerluni Egyptenimi faraomit parnaarunneqarpoq. Kingusinnerusukkut nunaminit ungasissumi aallarussaaffimmini toquvoq. (2 Kng 23:31-34) Qatanngutaa Jojakimi kingoraarlugu ukiuni aqqanilinni kunngiuvoq. Taassuma aamma ataataminit pissarsiani qujamasuutiginngilaa. Ajungaarmat Jeremiap ima allaatigaa: “Siutituutut ilineqassaaq.” (Jer 22:17-19) Josijap ernera Sidkija ernutaalu Jojakini aamma taama ajortigalutillu Josijap aalajaatsup maligassiuilluarneranik ilaarsinngillat. — 2 Kng 24:8, 9, 18, 19.

7, 8. (a) Salomop anersaakkut kingornussarsiani qanoq maangaannartippaa? (b) Anersaakkut kingornussarsiaminnik maangaannartitsisut pillugit oqaluttuat Biibilimeersut qanoq ilinniarfigisinnaavavut?

⁷ Kunngi Salomo Jehovamut kiffartornermik  ataataminit, Daavimit, ilinniartinneqartoq anersaakkut kingornussarsiaminik qujamasuutiginnikkunnaarpoq. “Salomo utoqqalimmat nuliaasa uummataa guutinut allanut saatsippaat ataatani ilumoorsusiatigut assiginagu Naalakkamut Guutiminut uummammigut iluunngarluni ilumoorunnaarsillugu.” (1 Kng 11:4) Tamanna pissutigalugu Salomo Jehovamit iluarisaajunnaarpoq.

⁸ Angutit taakku tamarmik Jehovamik ilisarisimannilernissaminnut eqqortuliornissaminnullu periarfissaqarput. Ajoraluartumilli periarfissartik maangaannartippaat. Inuusuttulli tamarmiunngitsut anersaakkut kingornussarsiaminnik maangaannartitsineq ajorput. Maligassaalluartut inuusuttut ilaarsinnaasaat maanna sammissavavut.

9. Noap erneri qanoq maligassiuilluarpat? (Allaaserisap aallaqqaataani assiliaq takuuk).

⁹ Noap erneri maligassiuilluarput. Inuit annaanniarlugit Noap umiarsualiornerani ikiuunnissaminnik immikkut pisinnaatitaaffeqarput. Jehovamut naalattariaqarnertik nalunnginnamikku ulersualinnginnerani umiarsuarmut ikipput. (1 Mos 7:1, 7) Tamanna qanoq kinguneqarpa? Mosesimik allakkat siulliit 7:3-mi allassimavoq “uumassuseqartut assigiinngitsukkuutaat tamarmik nunarsuarmi kinguaassaqarsinnaaqqullugit” uumasut tamaasa umiarsuarmut ikisikkaat. Inuit aamma aniguisinneqarput. Noap ernerisa anersaakkut kingornussarsiartik qujamasuutigigamikku inuiannik aniguisitsisinnaanermik nunarsuarmilu pallorfiginninnermik ilumoortumik pilersitseqqiinermik ikiuunnissartik immikkut pisinnaatitaaffigaat. — 1 Mos 8:20; 9:18, 19.

10. Inuusuttut hebræerit sisamat Babylonimi anersaakkut kingornussarsiaminnik qujamasuutiginninnertik qanoq ersersippaat?

¹⁰ Ukiut hundredillit tamatuma kingorna inuusuttut hebræerit sisamat Babylonimiutut inooriaaseqarusunngillat. 617-imi Kr.in.si. Hananja, Mishaeli, Azarja Danielilu tigusarineqarput Babylonimullu aallarunneqarlutik. Pinnerlutillu silassorissuugamik Babylonimi iluatsilluarsinnaagaluarput. Uppernertilli ilinniarsimasatillu puiunngisaannaramikkit Jehovamit pilluaqquneqangaarput. — Danieli 1:8, 11-15, 20 atuakkit.

11. Jiisusip anersaakkut kingornussarsiaa allat qanoq iluaqutigaat?

¹¹ Anersaakkut kingornussarsiamik qujamasuutiginninnermut tunngatillugu Jiisusi maligassiuilluarnerpaavoq. Jiisusip Ataatami ilinniartitsissutai nuannarilluinnarpai. Tamanna ima oqaasiinit erserpoq: ‘Ataatap uannut ajoqersuutaa malillugu oqaluppunga.’ (Joh 8:28) Ilinniarsimasani allanit iluaqutigineqarniassammata ingerlateqqinnissaat nuannaarutigisarpaa. Ima oqarpoq: “Guutip naalagaaffianik iivangkiiliu illoqarfinni allanissaaq tusarliussassaraara; tamanna pillugu aallartitaavunga.” (Luk 4:18, 43) Sallusuissut Guutimeersoq silarsuarmit qujamasuutigineqanngilaq, taamaammat Jiisusip ajoqersukkani ‘silarsuarmut ilaaqqunngilai’. — Joh 15:19, NW.

12. (a) Timotheusimut allakkat kapitali 3-mi allassimasut ullumikkut inuusuttorpassuarnut qanoq atuuppat? (b) Kristumiut inuusuttut imminut qanoq aperisariaqarpat?

¹² Jehovamik asannittunik angajoqqaaqaruit anersaakkut kingornussarsiaq pissarsiarisimassavat. Timotheusi pillugu Biibilimi allassimasut aamma ilinnut atuussinnaapput. (2 Timotheusi 3:14-17 atuakkit). Jehova pillugu taassumanngalu qanoq iluarisaasinnaanersutit angajoqqaavit ilinniartissimassavaatsit. Imaassinnaavoq nalungiaaninniilli ilinniartilersimagaatsit. Tamanna Kristusimut Jiisusimut uppernikkut annassutaasumik ilisimasaqalernissannut aamma Guutimut kiffartorninni ‘inerilluinnarnissannut’ iluaqutigisimassavat. Pissarsiatilli qujamasuutigaagit? Imminut ima aperigit: ‘Nalunaajaasut aalajaatsut uanga sioqqullunga inuusut qanoq isumaqarfigaakka? Jehovamik Nalunaajaasuunera tulluusimaarutigaara? Inuit allat ikittut peqatigalugit Guutimit ilisimaneqarnera qanoq isumaqarfigaara? Paasivara assissaqanngitsumik nuannersumillu immikkut pisinnaatitaaffeqarlunga?’

13, 14. Sallusuissut malillugu perorsarneqarsimasut ilaat sunissamut ussernartorsiorsinnaappat, taamaaliornissarli sooq silatusaarnerunngila? Assersuuteqarit.

¹³ Inuusuttut ilaat angajoqqaaminnit kristumiuusunit perorsarneqarsimasut sallusuissutsip qanoq nuannertiginera Saatanillu silarsuaata qanoq ajortiginera paasineq ajorpaat. Allaat ilaat silarsuarmi inuunissamik ussernartorsiorsimapput. Aqqunassanerlutit toqussanerlutilluunniit paasiniaannarlugu biilit ingerlasut saavannut periataassagaluarpit? Tamanna sianiilliornerungaassaaq! Taamaattumik qanoq aliasutsigissanerluta paasiniaannarlugu  silarsuarmi matumani ajortut misilittariaqanngilavut. — 1 Petr 4:4.

¹⁴ Angut inuusuttoq Generimik atilik Asiami sallusuissut malillugu perorsarneqarpoq. Aqqaneq-marlunnik ukioqarluni kuisippoq. Inuusuttuaraallunili kiffaanngissuseqarluni inuulerusukkami silamiutut inooriaaseqarnissamik ussernartorsiulerpoq. Gener ilaquttaminut salluliorlunilu isertuisalerpoq. 15-inik ukioqarluni ikinngutini ilaarlugit, soorlu imertalernermigut oqaasipiluttalernermigullu, ajortuliortalerpoq. Gener ikinngutinilu billiardereerluni nakuusernertalinnillu spillereerluni kingusissukkut angerlartalerpoq. Piffissap ingerlanerani paasigamiuk iliuuserisartakkani pillualissutiginagit misigilerpoq inuunini imaqanngitsoq. Maannakkut sallusuissummiippoq. Ilaanneeriarluni silarsuaq ussernartorsiorfigisarnerarpaa, Jehovamilli pilluaqquneqarnissani pingaarnerpaatippaa.

15. Angajoqqaanit kristumiuusunit kristumiuunngitsunilluunniit perorsarneqarsimagaluarluta tamatta suna eqqarsaatigisariaqarparput?

¹⁵ Angajoqqaannit sallusuissut malillugu perorsarneqarsimanngikkaluaruilluunniit Pinngortitsisitsinnik ilisimanninnitta kiffartuussinittalu immikkut pisinnaatitaaffiunera nuanningaartoq eqqarsaatigiuk! Nunarsuarmi inunnit milliardiliusunit Jehovap inussiarnerluni imminut kajungilersippaatit. Tamanna pilluaqqussutaavoq annertooq! (Joh 6:44, 45) Sallusuissut angajoqqaatsinnit allanilluunniit ilinniarsimagaluarutsigu sallusuissummik ilisimanninnerput pillualissutigissavarput. (1 Korinthimiut 2:12 atuaruk). Gener ima oqarpoq: “Kinaagama Jehovamit, qilammik nunamillu piginnittumit, ilisimaneqarsinnaavunga?” (Tuss 8:5) Qatanngut arnaq ima oqarpoq: “Ilinniartut ilinniartitsisuminnit ilisimaneqaraangamik tulluusimaangaartarput. Jehovamilli, Ajoqersuisorsuarmit, ilisimaneqarneq immikkut pisinnaatitaaffiuvoq annerungaartoq!”

16. Kristumiut inuusuttut suniarlutik aalajangerunik silatusaassappat?

¹⁶ Anersaakkut kingornussarsiat nuannersoq eqqarsaatigisaruk Jehovamullu kiffartornissat anguniagaralugu. Itsaq maligassaalluartut ilaartakkit.  Silarsuarmi inuusuttut amerlanerit inuunerminnik atulussinnaasut siunissaqanngitsullu ilaaqinagit. — 2 Kor 4:3, 4.

17-19. Sooq silarsuarmit allaaneruneq silatusaarnerua?

¹⁷ Soorunami silarsuarmit allaaneruniarneq ajornaatsuinnaaneq ajorpoq. Taamaaliornerli silatusaarneruvoq. Timersortartoq OL-imut anngunniartoq eqqarsaatigiuk. Anngukkumalluni peqatiminit allaanerusariaqarpoq. Assigiinngitsorpassuit piffissaajaatigisinnaasani samminaveersaassavai. Sungiusarnerusinnaajumalluni anguniakkanilu angusinnaajumallugu allaanerunissaminut piumassuseqassaaq.

¹⁸ Silarsuarmi inuit amerlanersaasa iliuuserisamik kingunipiloqarsinnaaneri eqqarsaatigineq ajorpaat, Jehovalli kiffaasa tamanna eqqarsaatigisarpaat. Silarsuarmit allaanerugutta Jehovamut attaveqarunnaassutigisinnaasavut, soorlu kinguaassiuutitigut inuunerlunneq, ingalassimaniassavavut ‘inuunivillu’ tigulluartitaarlugu. (1 Tim 6:19) Qatanngut arnaq siusinnerusukkut eqqaaneqartoq ima oqarpoq: “Upperisat aalajangiusimagukku ullut naaneranni nalerisimaarneq misigisinnaasassavat. Tamanna Saatanip silarsuaata akiornissaanut nukissaqarninnut uppernarsaataassaaq. Tamanilli pingaarnerusutut misigissaatillusooq Jehovap Guutip tulluusimaarutigalutit qungujulaffigigaatit. Taamaalinerani allaanerunerit nuannaarutigilissavat!”

¹⁹ Maannangaaq suut pissarsiarisinnaanerlugit taamaallaat eqqarsaatiginerisigut inuunerit atulussinnaqinagu. (Oqal 9:2, 10) Inuunermi siunertaq siunissamilu naassaanngitsumik inuulersinnaanerit paasisimavatit. Tamanna silatusaartumik aalajangiisarnissannut ‘Guutimillu nalusutut inuunnginnissannut’ iluaqutigissavat. Inuunerimmi siunertaqarluarpoq. — Ef 4:17; Mal 3:18.

20, 21. Eqqortumik aalajangiisarutta qanoq siunissaqarsinnaavugut, Jehovalli qanoq piumasaqarfigaatigut?

²⁰ Eqqortumik aalajangiisarutta maannangaaq pilluarsinnaavugut allaallu Guutip silarsuassaani nutaami naassaanngitsumik inuusinnaalluta, Jehovammi takorloorsimanngisaannakkatsinnik pilluaqqussammatigut. (Matt 5:5; 19:29; 25:34) Kikkulli tamaasa taamatut pilluaqquneq ajorpai. Imminut naalattut kisiisa pilluaqqusarpai. (1 Johannesi 5:3, 4 atuakkit). Aalajaallutali Jehovamut kiffartorniarluta iliuuserisavut pilluaqquneqaatigissavavut!

²¹ Jehovap uagutsinnut tunniussimasai amerlangaarput. Oqaasia pillugu eqqorluartumik ilisimasaqarlutalu taanna taassumalu siunertaa pillugit sallusuissut eqqortumik paasisimavarput. Jehovap Nalunaajaasuisut taassuminnga ateqaateqarnerput immikkut pisinnaatitaaffigaarput. Guutillu ikiorumalluta neriorsorpaatigut. (Tuss 118:7) Tamatta, inuusuttuugutta utoqqaaguttaluunniit, anersaakkut kingornussarsiatsinnik qujamasuutiginninnerput Jehovamillu ‘naassaanngitsumik naalannarsisitsinissarput’ ersersittuarisigu! — Rom 11:33-36; Tuss 33:12.