1, 2. Guuti innuttaminit, inuusuttunit utoqqarnillu, qanoq pallorfigineqaqqua?

INUUSUTTUUIT? Taamaappat qularinngissinnaavat nunarsuaq tamakkerlugu Jehovap ilagiissortaanut pingaaruteqarnerit. Nunarpassuarni kuisittut amerlanerpaartaat inuusuttuusarput. Inuusuttorpassuit Jehovamut tunniulluinnartut takullugit qiimmaallannarpoq!

² Inuusuttuuguit peqatitit ilagissallugit nuannarisarpiuk? Ilimanarpoq. Ikinngutivummi peqatigisavut ilagissallugit nuannarisarparput. Jehovalli qatanngutivut tamaasa peqatigalugit pallorfiginninnissarput piumasaraa. Innuttani, utoqqaassusaat tunuliaqutaalluunniit apeqqutaatinnagit, ataasiussuseqaqquai. Apustili Paulusi allappoq Guutip piumasarigaa “inuit tamalaat annaanneqassasut sallusuissummillu eqqorluartumik ilisimasaqalissasut”. (1 Tim 2:3, 4, NW) Aamma Saqqummersitat 7:9-mi Guutimik pallorfiginnittut “inuiaqatigiinnit naggueqatigiinnillu inuiannillu immikkullu oqaasilinnit tamanit” pisutut allaatigineqarput.

3, 4. (a) Ullumikkut inuusuttorpassuit qanoq isiginnittaaseqarpat? (b) Paulusip ilagiit Efesosimiittut qanoq allaatigai?

 ³ Inuusuttut Jehovamut kiffartortut kiffartortuunngitsullu assigiinngilluinnarput. Jehovamut kiffartortuunngitsut amerlasuut imminuinnaq eqqarsaatigisarput. Allaat misissueqqissaartartut ilaat oqarsimapput ullumikkut inuusuttut aatsaat taama namminissarsiortigisut. Allanik, ingammik utoqqarnik, ataqqinninnginnerat oqaloriaasiannit atisalersoriaasiannillu erserpoq.

⁴ Isiginnittaatsip tamatuma nalinginnaalluinnarnera pissutigalugu taamatut isiginnittaaseqarnaveersaarnissaq Jehovamillu iluarisaajuarnissaq tamaviaarnarsinnaavoq. Allaat kristumiut siulliit nalaanni Paulusip qatanngutini tamanna pillugu mianersoqquai. Isiginnittaaseq tamanna ‘anersaatut naalasseriinnerup qitornaani maanna sunniisutut’ (1936) taavaa. (Efesosimiut 2:1-3 atuakkit). Qiimmaallannarpoq takullugu ilagiinni inuusuttut taamatut isiginnittaaseqannginnerat. Taakku qatanngutitik peqatigalugit Jehovamut kiffartorusupput. Paasivaat ilagiit timitut avaterpassualittut suleqatigiittariaqartut. Paulusip allanneratut ‘immitsinnut avatioqatigiippugut’. (Ef 4:25) Saatanip silarsuaata naggatissaa qanilliartortillugu qatanngutigiittut ataasioqatigiinnissarput pingaaruteqarneruleraluttuinnarpoq. Oqaluttuat Biibilimeersut ataatsimoornissatta, tassa ataasiussuseqarnissatta, pingaaruteqassusianik paasinninnissamut iluaqutigissavavut.

5, 6. Loti ilaqutaalu qanoq ilinniarfigisinnaavavut?

⁵ Itsaq Jehovap innuttai navianartorsiungaarnerminni pinertusaarput. Ataasiussuseqaraangata ikioqatigiikkaangatalu Jehovap illersortarpai. Tamatta, inuusuttut utoqqaallu, Biibilimi oqaluttuat taakku ilinniarfigisinnaavavut. Loti pillugu oqaluttuaq sammeriartigu.

⁶ Loti ilaqutaalu navianartorsiorput. Jehovap illoqarfik najugaqarfigisaat, Sodoma, piujunnaarsingajalerpaa. Jehovap inngilit aallartippai Loti illoqarfik qimallugu qaqqanut qimaaqquniassammassuk.  Taakkua ‘tamaviat qimaaniaqquaat’. (1 Mos 19:12-22) Loti paniilu marluk ilitsersorneqarnertik naapertorlugu iliorput. Ajoraluartumilli Lotip ilaqutai allat naalanngillat. Loti qimaaqqusimmat ningaassaasa marluk “quiasaaginnarsoraat”. Tusarusunnginnamikku illoqarfik suujunnaarsinneqarmat toqutaapput. (1 Mos 19:14) Loti paniilu marluk naalakkamik ataatsimooramillu aniguisutuaapput.

7. Inuit eqimattatut ataasiussuseqarlutik Egyptenimit aallartut Jehovap qanoq ikiorpai?

⁷ Israelikkut Egyptenimit aallarmata pisut aamma ilinniarfigisinnaavavut. Nunamut neriorsuutigisamukarniarlutik aqqutit assigiinngitsut ingerlavigiumallugit eqimattanut immikkoortitinngillat. Eqimattatulli ataatsitut ataasiussuseqarlutik ingerlaarput. Jehovallu Imaq Aappalaartoq avissaartitaa Mosesip kisimiilluni Israelikkulluunniit amerlanngitsut peqatigalugit ingerlaviginngilaa. Inuiaat tamarmik Mosesi ingerlaqatigigamikku Jehovamit illersorneqarput. (2 Mos 14:21, 22, 29, 30) Allaat Israelikkuunngitsut amerlasuut Jehovamut kiffartulerniarlutik Egyptenimillu aallarniarlutik aalajangerput. Inuiaat tamarmik ataatsimoorput. (2 Mos 12:38) Eqimattat amerlanngitsut, immaqa inuusuttut, kisimiillutik aqqutikkut pitsaanerusorisamikkut angalalersimagaluarunik sianiilliorsimassagaluarput. Kinaluunniit kisimiilluni nunamut neriorsuutigisamukarsimagaluartoq Jehovamit illersorneqarsimanavianngikkaluarpoq. — 1 Kor 10:1.

8. Joshafatip nalaani Guutip innuttai qanoq ataasiussuseqarpat?

⁸ Kunngip Joshafatip nalaani sakkutoorpassuit pissaasut Guutip innuttai saassukkiartorpaat. (2 Nal 20:1, 2) Israelikkut akeqqanit qununarpasittunit unguneqaramik qanoq iliorpat? Jehova tatigalugulu siulersoqqullutik qinnuigaat. (2 Nalunaarsuutit 20:3, 4 atuakkit). Israelikkut ataasiakkaat namminneq aaqqiissutissarsiornatik tamarmik katersuupput. Biibilimi ima allassimavoq: “Judakkut tamarmik Naalakkap kiinaata saani qeqarput — aamma arnat meeqqallu, angisuut mikisullu.” (2 Nal 20:13) Inuiaat tamarmik, inuusuttut utoqqaallu, Jehovamik tatiginnillutillu peqquneqarnermissut iliorput. Ataatsimoormata Jehovap akeraannit illersorpai. (2 Nal 20:20-27) Tamanna Guutip innuttaasa akerlilersorneqarnerminni qanoq ataatsimoorsinnaanerannik ersersitsilluarpoq.

9. Kristumiut siulliit qanoq ilinniarfigisinnaavavut?

⁹ Kristumiut siulliit eqqisseqatigiillutik Jehovamik pallorfiginnipput. Assersuutigalugu juutit juutiunngitsullu amerlasuut kristumiunngoreerlutik tamarmik apustilit ilinniartitsissutaannik maleruaapput. Peqatigiittarlutillu nereqatigiittarlutillu qinoqatigiittarput. (ApS 2:42) Malersorneqaraangamik ataasioqatigiittarput. Taamaaliornissartillu pisariaqartilluinnartarpaat. (ApS 4:23, 24) Uaguttaaq malersorneqaraangatta ataasiussuseqartariaqarlutalu tapersersoqatigiittariaqarpugut.

10. Qaqugu ataasioqatigiinnissarput pisariaqartilluinnassavarput?

¹⁰ Qanittukkut inuiaat aatsaat taama erloqinartorsiortigissapput. Pruffiitip Joelip piffissaq tamanna ‘ullussatut taggarissutut’ allaatigaa. (Joel 2:1, 2; Sef 1:14) Taamanikkussamut Guutip innuttaasa ataasioqatigiinnissartik pisariaqartilluinnassavaat. Jiisusip oqaasii uku eqqaamakkit: “Naalagaaffik sunaluunniit  imminut akerlilersuleruni suujunnaarsitaassaaq.” — Matt 12:25.

11. Guutip innuttaasa Tussiaat 122:3, 4 ataasiussuseq pillugu qanoq ilinniarfigisinnaavaat? (Allaaserisap aallaqqaataani asseq takuuk).

¹¹ Qanoq ataasioqatigiitsigissaagut? Itsaq Jerusalemimi illulioriaaseq ilinniarfigisinnaavarput. Illut qanittuaranngorlugit sananeqartarmata tussiaasiortup illoqarfik ‘katersuuffissiatut’ allaatigaa. Inuit imminnut qanillutik najugaqaramik imminnut ikioriaannaasarlutillu illersoriaannaasaramik toqqissisimasarput. Illut imminnut qaninnerat tussiaasiortup Israelikkut naggueqatigiissortaasa inuiattut Jehovamik pallorfiginninniarlutik katersuuttarnerannik eqqaasitsissutigisimassavaa. (Tussiaat 122:3, 4 atuakkit). Maanna siunissamilu erloqinartorsiorfiusumi Jehovap innuttaasa ‘katersuunnissaat’ pingaaruteqarluinnarpoq.

12. Jehovap innuttai Gogip saassuppagit aniguinissatsinnut suna iluaqutigissavarput?

¹² Siunissami ataasiussuseqarnissarput sooq aatsaat taama pingaaruteqartigissava? Ezekielip allagaani kapitali 38-mi ‘Gogi Magogimi nunaqartup’ Jehovap innuttaanik saassussinissaa siulittuutigineqarpoq. Taamanikkussamut avissaartuunnissaq silatusaarnerussanngilaq. Aamma Saatanip silarsuaanut illersortissarsiorneq kukkorujussuarnerussaaq. Qatanngutivulli ataatsimooqatigisariaqarpavut. Soorunami eqimattanut ilaanerput pissutigiinnarlugu aniguisinnaanngilagut. Tamatta immikkut Jehova tatigisariaqarlugulu naalattariaqarparput. Taamaaliorutta Jehovap Jiisusillu saassussinermit aniguisilluta silarsuassami nutaami inuulersissavaatigut. (Joel 3:5; Matt 28:20) Guutip innuttai aamma ataasiussuseqarfigisariaqarpavut. Ilimagaajuk inuit immikkoorniarlutik aalajangertut Jehovap aniguisissagai? — Mika 2:12.

13. Oqaluttuat sammeriikkavut inuusuttut qanoq ilinniarfigisinnaavaat?

¹³ Inuusuttuuguit qatanngutinut qanittumik attaveqarnissap sooq taama pingaaruteqartiginera paasiviuk? Peqatinnik ilagisaqarusuttarneq imaluunniit qatanngutinit ungasillerusoqqajaasarneq akioruk. Ungasinngitsukkut tamatta, inuusuttut utoqqaallu, aatsaat taama immitsinnut pisariaqartitsigissaagut. Maannangaaq qatanngutit ikinngutigilluarnerulikkit taakkulu peqatigalugit Jehovamut kiffartornerit nuannaarutigalugu. Jehovap innuttaanut ataasiussuseqarnerit siunissami annaanneqaatigissavat!

14, 15. (a) Sooq Jehovap ataasiussuseqarnissatsinnik ilinniartippaatigut? (b) Ataasiussuseqarsinnaaniassagatta Jehovap qanoq siunnersorpaatigut?

¹⁴ Jehovap qatanngutivullu ‘suleqatigiinnissatsinnut’ ikiortarpaatigut. (Sef 3:8, 9, NW) Siunissami ‘qilammiittut nunamiittullu tamarmik Kristusimi ataatsimut kattutitinneqarnissaannut’ piareersimaqqulluta ilinniartippaatigut. (Efesosimiut 1:9, 10 atuakkit). Jehovap “qilammiittut nunamiittullu” ilaqutariissuartut ataatsitut imminik pallorfiginnilernissaat siunertaraa. Jehovap taamaaliorumaarnera  qularnanngilaq. Inuusuttuususi, ilaqutariissuarnut taakkununnga ilaasinnaavusi. Jehovap peqatigiissortaasa ataasiussuseqarnerannut ilaarusuppisi?

¹⁵ Siunissami silarsuassami nutaami eqqisseqatigiilluta inuusinnaaniassagatta Jehovap maannangaaq erinitsajuilluni ataasiussuseqarnissatsinnik ilinniartippaatigut. ‘Isumassoqatigiinnissatsinnik’, ‘qamannga pisumik tunniussimaffigeqatigiinnissatsinnik’, ‘tuppallersaqatigiinnissatsinnik’ ‘ineriartorteqatigiinnissatsinnillu’ ilinniartittarpaatigut. (1 Kor 12:25; Rom 12:10, NW; 1 Th 4:18; 5:11) Jehovap nalunngilaa naammalluinnanngitsuunerput pissutigalugu ataasiussuseqarnissatsinnik sapernartitsisinnaanerput. Taamaattuminguna ‘isumakkeerfigeqatigiittaqqulluta’ kajumissaaraatigut. — Ef 4:32.

16, 17. (a) Ataatsimiittarnitsinnut pissutaasut ilaat suua? (b) Inuusuttut Jiisusip maligassiaa qanoq ilinniarfigisinnaavaat?

¹⁶ Jehovap ataatsimiinnerit aqqutigalugit aamma ataatsimoornissatsinnik ilinniartittarpaatigut. Hebræerinut allakkat 10:24, 25 naapertorlugit ajunngitsuliornermut kajumissaaqatigiittarnissaq ataatsimiittarnitsinnut pissutaasut ilagaat. Jehovallu ullussaata nalliunnissaa qanilliartortillugu ataatsimiittarnerit pisariaqartinneruleraluttuinnassavavut.

¹⁷ Jiisusi uagutsinnut maligassaalluarpoq Jehovap innuttaanik ataatsimeeqateqarnermik nuannaarutiginnittarami. Aqqaneq-marlunnik ukioqarluni angajoqqaani ilagalugit naalaffimmut inuppassuarnit najuuffigineqartumut ataatsimiigiarpoq. Taamani Jiisusi angajoqqaaminit tammaaneqalerpoq. Peqatini ilaginiarlugit ingerlasimava? Naamik. Jiisusi naalaffimmi Allakkat pillugit ilinniartitsisunik oqaloqateqartoq angajoqqaavisa nassaaraat. — Luk 2:45-47.

18. Ataasiussuseqarnerput qanoq nakussatsissinnaavarput?

¹⁸ Qatanngutivut qinnuttarnerisigut aalajangersimasumillu ikioqqullugit Jehovamut qinusarnitsigut ataasiussuseqarnerput nakussatsissinnaavarput. Qatanngutitsinnik qinnussisarnerput taakkuninnga isumassuinissatsinnik eqqaasitsissutigissavarput. Qatanngutitsinnik asanninnissaq, ataatsimiinnermi  kajumissaarisarnissaq qinnussisarnissarlu pingaaruteqarput. Inuusuttuususi, ilagiinniittut ikinngutigillualerumallugit taamaaliortarpisi? Naggatissami aniguiumalluta qatanngutivut, Saatanip silarsuaa pinnagu, qanittumik attaveqarfigisariaqarpavut.

19-21. (a) ‘Avatioqatigiinnerput’ sunissatsinnut kajumississutigaarput? Assersuuteqarit. (b) Ajunaarnersuaqarnerani qatanngutitta ikioqatigiittarnerat qanoq ilinniarfigaajuk?

¹⁹ Ullumikkut Jehovap innuttaasa avatioqatigiinnerannut takussutissarpassuaqarpoq. (Rom 12:5) Ajunaarnersuaqarnerani qatanngutivut naalliuuteqartut misiginneqatigisarlugillu ikiorusuttarpavut. 2011-mi decembarimi qeqertaq Mindanao, Filippineriniittoq, anoraasuarsualerpoq. Unnuap ingerlanerinnaani illut 40.000-nit amerlanerusut, qatannguterpassuatta illui ilanngullugit, qarsunneqarput. Immikkoortortaqarfik nalunaarpoq nunaqavissut ikiuiniaqatigiivinit suli takkuttoqanngitsoq “qatanngutit sumiiffinnit allaneersut ikiuinermi atugassanik nassiussisut”.

²⁰ Japanimi qatanngutivut nuna sajorujussuarmat sinerissallu kangisissortaani tsunameqarmat annaasarpassuaqarput. Amerlasuut suutaarutiivipput. Assersuutigalugu Yoshiko angerlarsimaffeeruppoq. Naalagaaffilersaarfimmit 40 kilometerisut ungasitsigisumiittumi najugaqarpoq. Ima oqaluttuarpoq: “Kingusinnerusukkut ajasoorutigaarput ippassaammat nuna sajuttoq ilagiinnik nakkutilliisup qatanngutillu allap ujarmatigut.” Qungujorujussuarluni ima nangippoq: “Ilagiit aqqutigalugit sinnilissuarmik anersaakkut pisariaqartitatsinnik tunineqarnerput qujamasuutigingaarparput. Tamatuma saniatigut kavaajanik, kamippannik, pooqattanik sinngusinillu tunineqarpugut.” Ikiuiniaqatigiinnut ilaasortaq ima oqarpoq: “Qatanngutit Japanimi sumiiffinnit assigiinngitsuneersut ataasiussuseqarlutik ikiuipput. Allaat qatanngutinik USA-meersunik ikiuiartortunik tikittoqarpoq. Sooq taama ungasitsigisumit ikiuiartorsimanerminnik aperineqaramik ima akipput: ‘Japanimi qatanngutivut ataasiussuseqarfigisavut ikiortariaqarmata aggerpugut.’” Peqatigiissortanut asannilluinnartunik ilaasortalimmut ilaanerit tulluusimaarutigaajuk? Jehovap taamatut ataasiussuseqarnermik iluarinninnera qularinngilluinnarsinnaavarput.

²¹ Maannangaaq ikioqatigiittarutta siunissami erloqinartorsiornissamut piareersimasinnaavugut. Allaat qatanngutivut nunami allamiittut attaveqarfigiunnaaraluarutsigit qatanngutit ilagiitsinniittut ataasiussuseqarfigissavavut. Qatanngut arnaq Japanimiu Fumikomik atilik anoraasuarsuarmit aniguisoq ima oqaluttuarpoq: “Naggatissaq aajunaralaarsuaq. Ajunaarnersuaqartarunnaarnissaa qilanaaritillugu qatanngutivut tapersersortuartariaqarpavut.”

22. Ataasioqatigiinnerput siunissami qanoq iluaqutigissavarput?

²² Qatanngutit ataasiussuseqarfiginerisigut maannangaaq Jehovap ullussaanut piareersarit. Saatanip silarsuaa ajortoq suujunnaarsinneqarpat Jehovap innuttani itsaq pisimanermisut aniguisissavai. (Es 52:9, 10) Inuusuttuugaluaruit utoqqaagaluaruilluunniit annaanneqarumallutit Guutip innuttai ataasiussuseqarfigisariaqarpatit. Allaaserisami tulliuttumi anersaakkut kingornussarsiatsinnik qujamasuutiginnittariaqarnitsinnut pissutaasut sammissavavut.