Aappariinnersi ineriartornartuutillugulu pilluarnartuutissiuk
“Naalakkap illu qarmanngippagu illuliortut sulilussinnassapput.” — TUSS 127:1a.
1-3. Aappariit sunik unamminiagassaqartarpat? (Allaaserisap aallaqqaataani assiliaq takuuk).
“SAPINNGISANNIK iliuuseqaruit aappariinnissilu iluatsilluarnissaa kissaatigalugu ersersikkukku Jehovamit pilluaqquneqarnerit nuannaarutigissavat,” taama angut ukiuni 38-ni pilluarluni aappaqartoq oqarpoq. Aap, uiusut nuliaasullu pilluarlutik inuusinnaallutillu artornartorsiornerminni tapersersoqatigiissinnaapput. — Uss 18:22.
2 Aappariit artornartorsiortarnerat nalinginnaavoq. Tamanna ‘uinngup piisigut naalliuuteqarnertut’ Biibilimi taaneqarpoq. (1 Kor 7:28, 1936) Sooq? Ulluinnarni ajornartorsiutit aappariinnermik tatisisinnaammata. Uiusut nuliaasullu naammalluinnanngitsuugamik ilaannikkut imminnut ajuallatsittarsinnaasarlutillu paatsooqatigiissinnaasarput. (Jaak 3:2, 5, 8) Aappariippassuit ilungersornartunik suliffeqarlutillu perorsagassaminnik meeraqarput. Ulapinneq qasoqqanerlu aappariinnerminnik ineriartornartuutitsinissaminnut piffissaarussutigisinnaavaat. Aningaasaqarnikkut ajornartorsiorneq, napparsimaneq allatigulluunniit erloqinartorsiorneq pissutigalugu asaqatigiikkunnaariartulersinnaallutillu ataqqeqatigiikkunnaariartulersinnaapput. Aappariit ingerlalluarpasissut ‘uinngup suliaanit’ — soorlu kinguaassiuutitigut inuunerlunnermit, ileqqorlunnermit, akerariinnermit, saqitsaannermit, sinnganermit, kamajassusermit namminissarsiornermillu — aappariinnerat sanngiillisinneqarsinnaavoq. — Gal 5:19-21.
3 Tamatumali saniatigut inuppassuit ‘ulluni kingullerni’ namminissarsiortuullutillu Guutimik ataqqinninngillat, isiginnittaaserlu tamanna aappariinnerliulersitsisinnaavoq. (2 Tim 3:1-4) Taamatuttaaq akeqqap ajortup aappariinnik avitsitsinissani aalajangiusimavaa. Apustilip Petrusip ima mianersoqquaatigut: “Akerartortersi Diaavulu løvitut uiannisaartutut angalasarpoq iisassarsiorluni.” — 1 Petr 5:8; Saqq 12:12.
4. Sooq aappariinneq ineriartornartuutinneqarsinnaallunilu pilluarnartuutinneqarsinnaava?
4 Uiusoq, Japanimiu, ima oqaluttuarpoq: “Aningaasaqarnikkut ajornartorsiuteqangaarpunga. Nuliara aamma oqaloqatigerpiarneq ajorakku nanertisimangaalerpoq. Tamatumalu saniatigut peqqiilliungaalerpoq. Taamatullu nanertisimanerput pissutigalugu assortuuttalerpugut.” Aappariinnitsinni unamminiagaqartarpugut, kisianni qaangersinnaavavut. Jehovap ikiuineratigut aappariit attaveqarnerminnik ineriartortitsisinnaallutillu pilluarlutik inuusinnaapput. (Tussiaat 127:1 atuaruk). Aappariinnitsinnik ineriartornartuutitsinissatsinnut pilluarnartuutitsinissatsinnullu iluaqutigisinnaasavut tallimat sammeriartigit. Aamma aappariinnermik ineriartornartuutitsinissamut asanninnerup pingaaruteqassusia sammissavarput.
AAPPARIITTUT JEHOVA IKIORTIGISIUK
5, 6. Aappariit Guuti qanoq ikiortigisinnaavaat?
5 Aappariit Jehovamut ilumooraangamik naalatsigitikkaangamillu aappariinnerminni Oqaluussisartup oqaasii 4:12 atuaruk). Uiusut nuliaasullu Guutip asannilluni siulersuineranik maleruaanermikkut Guuti ikiortigisarpaat. Biibilimi ima allassimavoq: “Nammineq siutinnik tusassavat tununnit oqaaseq: ‘Aajuna aqqusineq, taanna ingerlavigissavarsi!’” (Es 30:20, 21) Ullumikkut aappariit Biibilimik atuaqatigiikkaangamik Jehovap oqaasia ‘tusaasarpaallusooq’. (Tuss 1:1-3) Nuannersumik pissarsiaqarnartumillu ilaqutariittut atuaqqissaaqatigiittarnermikkut aappariinnertik ineriartornartuutinnerulersittarpaat. Aamma aappariit ullut tamaasa qinoqatigiikkaangamik Saatanip silarsuaanut akiuunnissaminnut aappariittut ineriartoqatigiittarput.
qajannaatsumik toqqammaveqartarput. (Uiusoq nuliaasorlu aappariittut Jehovamut kiffartoraangamik taassumunnga imminnullu attaveqarluarnerulertarlutillu pilluarnerulertarput (Immikkoortut 5 aamma 6 takukkit)
6 Gerhard, Tysklandimiu, ima oqaluttuarpoq: “Ajornartorsiutit paatsooqatigiinnerillu nuannaarnermit annertuneruleraangata siunnersuutit Guutip oqaasianeersut kamagittarnissamut isumakkeerfigeqatigiinnissamullu iluaqutigisarpavut.” Nangilluni oqarpoq pissuserineqartussat taakku aappariittut iluatsilluarnissamut pingaaruteqartut. Aappariit aallussilluarlutik Guuti kiffartuunneratigut ikiortigigaangamikku attaveqarfigilluartarlugulu aappariinnertik ineriartornartuutittarpaat.
UIUSUSI ASANNILLUSI ILAQUTARIINNI ITTUUGITSI
7. Uiusup nuliani qanoq pissusilersorfigisussaavaa?
7 Uiusup ilaquttaminik siulersueriaasia aappariinnermik ineriartornartuutitsinermut pilluarnartuutitsinermullu iluaqutaasinnaavoq. Biibilimi ima allassimavoq: ‘Angutip kialuunniit Kristusi niaqoraa, arnap angut niaqoraa.’ (1 Kor 11:3) Tamanna qanoq paasisariaqarpa? Jiisusip ajoqersukkaminut pissusilersortarneratut uiusut nuliatik pissusilersorfigisassavaat. Jiisusi peqqarniinngisaannarlunilu sorraanngisaannarpoq. Tamatigut asannittarpoq, inussiarnertarpoq, ingasaassiniarneq ajorpoq, saamasuusarpoq uummatikkullu makitajuitsuusarluni. — Matt 11:28-30.
8. Uiusoq nuliaminit asaneqarumalluni ataqqineqalerumallunilu susariaqarpa?
8 Uiusut kristumiut nuliatik ataqqinnittooqqullugit piumaffigineq ajorpaat. Kisianni nuliatik ‘qajannarnerusutut qajassuullugit inooqatigisarpaat’. (1 Petr 3:7) Allat ilagigaangamikkit kisimiikkaangamillu uiusut ataqqinnippaluttumik oqaluttariaqarlutillu misiginneqataasuusariaqarput. Uiusut pissusilersoriaatsimikkut oqaloriaatsimikkullu nuliatik pingaartingaarlugit ersersittarpaat. (Uss 31:28) Uiusoq nuliaminut asannittuuppat nuliata asassallugulu ataqqissavaa, Jehovallu aappariinnerat pilluaqqujumaarpaa.
NULIAASUSI MANIGUULLUSILU NAALATSIGITIGITSI
9. Nuliaasup naalatsigitinnini qanoq ersersissinnaavaa?
9 Jehovap najoqqutassiai tunngavigalugit Jehovamut namminissarsiorani asanninneq “Guutip assaata pissarsuup ataani” maniguunnissamut iluaqutigissavarput. (1 Petr 5:6) Nuliaasup uiminik suleqatiginninnera Jehovap oqartussaassusianik ataqqinninnerminik ersersitseriaasiisa pingaarnerpaartaasa ilagaat. Biibilimi ima allassimavoq: “Nuliaasusi, uissinnut naalatsigitissaasi tamanna Naalakkami ileqqussaammat.” (Kol 3:18) Ilumoorpoq nuliaasup uimi aalajangigaasa ilaat isumaqatigineq ajormagit. Aalajangigaali Guutip inatsisaanut akerliunngippata nuliaasup naalatsigitittup uini suleqatigerusussavaa. — 1 Petr 3:1.
10. Sooq asannilluni naalatsigitinneq pingaaruteqarpa?
10 Jehovap nuliaasut ilaqutariinni pingaarutilimmik akisussaaffilerpai. Nuliaasoq uiminut ‘ikiortaavoq’. (1 Mos 2:20) Aappariit ilaqutariittut aalajangiileraangamik nuliaasup isummani misigissutsinilu ataqqinnilluni oqaatigisassavai, naalatsigitittuassavorli. Uiusup sianisuup nuliani tusarnaaqqissaassavaa. (Uss 31:10-31) Asannilluni naalatsigitinneq ilaqutariinni nuannaalersitsisarlunilu eqqissisitsisarlunilu ataasiussuseqalersitsisarpoq. Tamatuma kingunerisaanik uiusut nuliaasullu Guutimit iluarineqarnertik nalunnginnamikku nalerisimaalissapput. — Ef 5:22.
ISUMAKKEERFIGEQATIGIITTARITSI
11. Sooq isumakkeerfigeqatigiittarnissaq pingaaruteqarpa?
11 Uiusut nuliaasullu aappariittuarumallutik isumakkeerfigeqatigiittarnissaq ilinniartariaqarpaat. Aappariit ‘kamageqatigiillutillu isumakkeerfigeqatigiittarunik’ attaveqatigiinnertik ineriartortissavaat. (Kol 3:13) Aappariilli kukkussutigineqarsimasut qaqilerlugit imminnut oqaatsitigut saassuttarunik aappariinnerliulissapput. Quppat inissiamik qajannarlisitsisarnerattut aliatsatsinneqarneq kamannerlu aappariit isumakkeerfigeqatigiittarnissaannik suleqatigiittarnissaannillu ajornarnerulersitsiartortarput. Uiusulli nuliaasullu Jehovamit isumakkeerfigineqarsimanermissut isumakkeerfigeqatigiittarunik aappariinnertik ineriartornartuutissinnaavaat. — Mika 7:18, 19.
12. Qanoq ‘asanninnerup ajorterpassuit matoortarpai’?
12 Asanninneq ilumoortoq “naatsorsuusiortanngilaq”. ‘Asanninnerulli ajorterpassuit matoortarpai.’ (1 Kor 13:4, 5, NW; 1 Petrusi 4:8 atuaruk). Taamaattumik allat asagutsigit killeqanngitsumik isumakkeerfigisassavavut. Apustilip Petrusip inummik qasseriarluni isumakkeerfiginninnissaminik aperimmani Jiisusip oqarfigaa allaat ‘77-eriarluni’ isumakkeerfiginnissasoq. (Matt 18:21, 22) Matumani Jiisusip suna pivaa? Kristumiut isumakkeerfiginnittuunissaat killeqartussaanngilaq. — Uss 10:12. *
13. Isumakkeerfiginnikkumannginneq qanoq akiorsinnaavarput?
13 Annette, Tysklandimiu, ima oqaluttuarpoq: “Aappariit imminnut isumakkeerfigerusunngitsut kamaannerulertarlutillu tatigeqatigiikkunnaartarput, tamannalu aappariinnerliulernermik kinguneqarsinnaavoq. Isumakkeerfiginnittuuneq attaveqatigiillualersitsisarpoq.” Qujamasuttuunerit ersersittaruk. Aappavit nersualaarniartarnissaa eqqumaffigiuk. Taamaaliornikkut isumakkeerfiginnikkumannginneq akiorsinnaassavat. (Kol 3:15) Tamatuma kingunerisaanik isumakkut eqqississallusilu ataasiussuseqalissallusilu Guutimit iluarisaajuassaasi. — Rom 14:19.
MALERUAGASSAQ ATORTUUJUAANNARTOQ MALERUARUK
14, 15. Maleruagassaq atortuujuaannartoq suua, tamatuminngalu maleruaaneq qanoq aappariinnermik ineriartornartuutitsisinnaava?
14 Qularnanngitsumik ataqqinnittumik pineqarusuttarputit. Allat tusarnaaraangatsit misigissutsitillu soqutigigaangatigit qujamasuttarputit. Imali oqartoqartoq tusarnikuuiuk: “Uannut iliorsimaneratut iliorfigissavara”? Taamatut oqarneq ilaannikkut paasinarsinnaasarpoq. Biibilimili ima allassimavoq: “Ima oqaqinak: ‘Uannut iliorsimanerata assinganik iliorfigissavara.’” (Uss 24:29) Jiisusip inuit ajornartorsiutiminnik pitsaanerpaamik aaqqiisarnissaannik ilinniartippai. Maleruagassaq atortuujuaannartoq Jiisusip ima oqaatigaa: “[Qanoq] inunnut iliorfigeqqugussi ilississaaq taamatut iliorfigisigit.” (Luk 6:31) Jiisusip pineqartarusunnitsitut, allat uagutsinnut pinnittarneratuunngitsoq, allanik pinnittarnissarput pivaa. Tassa aappariilluartuarumalluta iliuuseqartariaqarpugut.
Aappariilluartuarumalluta iliuuseqartariaqarpugut
15 Uiusut nuliaasullu misigissutsiminnik soqutiginninnermik ersersitsigaangamik aappariinnermik ineriartornartuutitsisarput. “Maleruagassaq atortuujuaannartoq maleruarniarsaraarput,” taama uiusoq Sydafrikamiu oqarpoq. “Ilaannikkut kamaattarpugut, pineqarusunnitsitulli, ataqqinnittumik, immitsinnut pinissarput tamaviaarluta sulissutigisarparput.”
16. Aappariit imminnut qanoq pinngisaannassappat?
16 Aappavit sanngiissutai imaluunniit iliuuserisartagai kamannarisatit allanut oqaatigisassanngilatit quiasaarutiginagilluunniit. Eqqaamajuk aappariinneq nukittuniunnerunngimmat, nillialluni nipituneqqusaannerunngimmat imaluunniit ajuallannarnerusumik oqaaseqarumalluni unamminerunngimmat. Ilumoorpoq naammalluinnanngitsuugatta allanik kamatitsilersinnaasartugut. Uiusulli nuliaasulluunniit imminnut kanngunarsartarnissaannut, ajuallatsittarnissaannut imaluunniit suli ajornerusumik imminnut ajattarnissaannut annersittarnissaannulluunniit pissutissaqanngisaannarpoq. — Ussatit 17:27; 31:26 atuakkit.
17. Uiusut maleruagassaq atortuujuaannartoq qanoq maleruarsinnaavaat?
17 Nunat ilaanni angutit nukittunerunertik ersersinniarlugu nuliatik angutaaserfigisarpaat. Biibilimili ima allassimavoq: “Kamajaatsoq angummit pissarsuarmit pissarsuuneruvoq, kamannerminillu nunusisinnaasoq illoqarfimmik tiguaasumit nukittuneruvoq.” (Uss 16:32, NW) Inuk imminut naalakkersinnaajumalluni Jiisusitut Kristusitut, inuit inuusimasut pingaarnerpaartaattut, anersaakkut nukittusariaqarpoq. Nuliaminut angutaasertartoq angutaavoq sanngiitsoq Jehovamut attaveqarnerminik annaasaqartussaq. Tussiaasiortoq Daavi, angut nukittooq sapiitsorlu, ima allappoq: “Kamassimariannguaritsi, kisiannili ajortuliornasi! Innanngavissinni eqqarsarallaritsi, nipangersimagitsilu!” — Tuss 4:5.
“ATINIARSIUK ASANNINNEQ”
18. Sooq asanninnermik ersersitsisarnissaq pingaaruteqarpa?
18 Korinthimiunut allakkat siulliit 13:4-7 atuakkit. Asanninneq aappariinnermi pissuserineqartussani pingaaruteqarnerpaavoq. Biibilimi ima allassimavoq: “Atiniarsigit nallittuingaarneq, ajunngissuseq, nikanartinneq, qanilaarneq naammagittassuserlu. Tamakkuali tamarmik qaavatigut atiniarsiuk asanninneq.” (Kol 3:12, 14) Uiusut nuliaasullu namminissarsioratik asanninnermik ersersitsisariaqarlutillu Jiisusimik Kristusimik, allat pillugit imminut pilliutigeriaannaasumik, ilaarsisariaqarput. Aappariinneq asanninnermik taamaattumik tunngaveqarpat uumigineqarsinnaasunik ileqqoqartoqaraluartoq, peqqiilliortoqaraluartoq, aningaasaqarnikkut ajornartorsiuteqartoqaraluartoq sakigisakkunnullu tunngatillugu ajornartorsiuteqartoqaraluartoq ineriartornartuusinnaavoq.
19, 20. (a) Uiusut nuliaasullu aappariinnertik qanoq ineriartornartuutissinnaallugulu pilluarnartuutissinnaavaat? (b) Allaaserisami tulliuttumi suna sammissavarput?
19 Asanninneq, ilumoorfigeqatigiinneq tamaviaarlunilu iliuuseqarneq iluatsilluartumik aappariinnissamut pisariaqarput. Aappariit ajornartorsiuteqaleraangamik avinnissartik eqqarsaatiginngisaannassavaat. Imminnut attaveqarluarnerulernissartik aalajangiusimasariaqarpaat. Aappariit Jehovamik asannittut imminullu asasut ajornartorsiutiminnik aaqqiinissartik aalajangiusimasariaqarpaat, ‘asanninnermi soraanngisaannarmat’. — 1 Kor 13:8; Matt 19:5, 6; Hebr 13:4.
20 ‘Ulluni atugarliungaarfiusuni’ makkunani aappariinnermik ineriartornartuutitsinissaq pilluarnartuutitsinissarlu sapernarnerungaarpoq. (2 Tim 3:1) Jehovalli ikiuineratigut tamanna iluatsissinnaavoq. Aappariilli silarsuup atoqatigiinnermut tunngatillugu isiginnittaasia akiortariaqarpaat. Allaaserisami tulliuttumi uiusut nuliaasullu aappariinnertik qanoq ineriartornartuutissinnaaneraat sammissavarput.
^ imm. 12 Aappariit isumakkeerfigeqatigiinnissartik ajornartorsiutiminnillu aaqqiinissartik pillugu suleqatigiikkaluartut Biibilimi allassimavoq aappap pisuussuteqanngitsup aappani allasiorsimasoq isumakkeerfigissanerlugu avissanerluguluunniit aalajangertussaagaa. (Matt 19:9) Takuuk atuakkami “Guutip asanninneraniittuinnaritsi”-mi tapiliussaq “Guutip avinnermut averusernermullu isiginnittaasia”, qupp. 251-253.