2013-IMI apriilip 28-an­ni Nagoyami, Japanimiit­tumi, im­mik­kut it­tumik ataatsimiin­nermi Anthony Morris Siulersuisoqatigiin­neersoq pis­sanganar­tumik nalunaaruteqar­poq: Biibililersaarut nutaaq Japanimiusut Biibili — Mat­thæusip iivangkiiliua-nik qulequtalik saq­qum­mersin­neqar­poq. 210.000-nit amerlanerusut ataatsimiin­nermut najuup­put inter­netik­kul­luun­niit malin­naal­lutik. Tusar­naar­tut nalunaarum­mik nuan­naarutigin­nin­ner­tik ersersin­niarlugu sivisuumik ersaar­taap­put.

Mat­thæusip iivangkiiliua New World Translation-imit naqiteq­qitaavoq. Atuagarli taan­na 128-nik qup­per­nilik im­mik­kuul­larip­poq. Atuak­kap Japanimiunut naleq­qus­sar­neqarsimanera qatan­ngutip Morrisip nas­suiaatigaa. Atuak­kap suna al­laanerus­sutigigamiuk? Sooq pisariaqar­tin­neqar­pa? Inuil­lu qanoq isumaqarfigaat?

Atuak­kap nutaap ilusaa inup­pas­suit tupaal­laatigaat. Japanimiut al­lat­tariaasiat am­mukaar­tuusin­naal­lunilu sanimukaar­tuusin­naavoq. Naqitat amerlanersaat, soorlu Biibililersaarutivut, sanimukaar­tumik al­lan­neqar­tar­put. Atuagarli taan­na nutaaq Japanimiut aviisiisa atuagaataasalu amerlanersaasa al­lan­neqar­tar­nerat­tut am­mukaar­tumik al­lan­neqarsimavoq. Taamatut al­lat­tariaaseq Japanimior­pas­suit atuaruminar­nerutit­tar­paat. Aam­ma atuar­tut pineqar­toq paasil­luarsin­naanias­sam­mas­suk qulequt­tat nalingin­naasumik qup­per­nerup qulaaniit­tar­tut qulequtaaq­qatut al­lan­neqarsimap­put.

Qatan­ngutit Japanimiut atuagaq nutaaq ingerlaan­naq atuarlugu aal­lar­tip­paat. Qatan­ngut ar­naq 80-t sin­nerlugit ukiulik ima oqalut­tuar­poq: “Mat­thæusip al­lagai arlaleriarlunga atuar­nikuuak­ka, am­mukaar­tumil­li al­lan­neqarsimanera qulequtaaq­qat aam­ma qaq­qami oqaluutsip paasil­luar­nis­saan­nut iluaqutigaak­ka.” Qatan­ngut ar­naq inuusut­toq ima al­lap­poq: “Atuagaq tamaat ingerlaan­naq atuar­para. Sanimukaar­tumik al­lat­tariaaseq sungiusimavara, Japanimior­pas­suil­li am­mukaar­tumik al­lat­tariaaseq atuarusun­nerusar­paat.”

Sooq Biibilip atuagar­taa taan­na Japanimiunut taama naleq­qutsigaa? Japanimior­pas­suit Biibili pil­lugu ilisimasaqar­pian­ngik­kaluarlutik Biibilimik atuar­nis­samut piumas­suseqar­tar­put. Inup­pas­suit Biibilimik takunikuun­ngisaan­nar­tut maan­na Biibilip atuagar­taasa ilaan­nik pinis­samin­nut atuar­nis­samin­nul­lu periarfis­saqaler­put.

Sooq Mat­thæusip al­lagai toq­qar­neqar­pa? Japanimior­pas­suit oqaaseq “Biibili” tusaraangamik­ku Jiisusi eq­qaasar­paat. Taamaat­tumik Mat­thæusip al­lagai toq­qar­neqar­poq tamatumani Jiisusip siuaasai inun­ngor­neralu, qaq­qami oqaluusaa ul­lul­lu kingul­liit pil­lugit siulit­tuinera al­las­simam­mata. Sam­misat taak­ku tamarmik Japanimior­pas­suit soqutigaat.

Japanimiut oqaluus­sisar­tut atuagaq nutaaq taan­na il­lumiit il­lumut oqaluus­sinermi pulaaq­qiinermilu aal­lus­sil­luarlutik neqeroorutigisaler­paat. Qatan­ngut  ar­naq ima al­lap­poq: “Maan­na Guutip oqaasiata inun­nut oqaluus­sif­figisan­nut tun­niun­nis­saanut periarfis­saqar­neruler­punga. Al­laat im­mik­kut it­tumik ataatsimiin­nerup kingor­na ualik­kut tun­niup­para!”

Oqaluus­sisar­tut atuagaq nutaaq qanoq neqeroorutigisar­paat? Japanimior­pas­suit oqariar­taatsit soorlu ‘isaaf­fik nerukitsoq’, ‘sapan­nganik puulukinut nalorius­sineq’ aam­ma “aqagus­saq isumakuluutigeqinasiuk” ilisimavaat. (Mat­t 6:34; 7:6, 13) Taak­kua Jiisusimit oqaaserineqar­nerat paasigaangamik­ku tupaal­lat­tar­put. Oqariar­taatsit taak­ku Mat­thæusip iivangkiiliua-ni takugaangamik­kit amerlanerit ima oqar­tar­put: “Biibili min­ner­paamik ataasiarlunga atuarusut­tuaan­nar­nikuuara.”

Mat­thæusip iivangkiiliua-nik pisimasut amerlanerit oqaluus­sisar­tunit pulaaq­qin­neqaraangamik oqar­tar­put atuak­kap ilaa imaluun­niit al­laat tamaat atuarsimal­lugu. Angut 60-it sin­nerlugit ukiulik oqaluus­sisar­tumut ima oqar­poq: “Arlaleriarlunga atuar­para tup­pal­lersar­neqarlungalu. Biibili pil­lugu ilin­niar­tin­nerusin­naavisinga?”

Atuagaq aam­ma tamanut oqaluus­sinermi neqeroorutigineqar­tar­poq. Nalunaajaasup oqaluus­sinermini e-mailini ar­namut inuusut­tumut atuak­kamik pisumut tun­niup­paa. Nalunaaqut­tap-akun­nera ataaseq qaangium­mat ar­nap qatan­ngut ar­naq al­laf­figaa atuak­kap ilaa atuarsimal­lugu paasisaqar­nerorusul­lunilu. Sapaatip-akun­nera ataaseq qaangium­mat ar­naq Biibilimik atuaq­qis­saaqatigineqaq­qaar­poq sivitsun­ngitsorlu ataatsimiin­ner­nut najuut­talerluni.

Atuagaq 1.600.000-t sin­nerlugit naqiter­neqar­poq Japanimilu ilagiin­nut nas­sius­suun­neqarluni. Qaam­matit tamaasa nalunaajaasut 20.000-nit amerlanerusunik atuak­kamik taas­sumin­nga agguaasar­put. Atuak­kamik saq­qum­mersitsisut neriuuter­tik atuak­kap siulequtaani ima al­laatigaat: “Neriuutigingaar­par­put atuak­kap matuma atuar­nera Biibilimik soqutigin­nin­nerulis­sutigingaas­sagit.”