Jiisusitut makitajuitsuullutillu nallittuisuugit
‘Kristusi anniartitaavoq ilissi pillusi maligassamillu qimatsivigalusi, tumini atuarlugit malinnaaqqullusi.’ — 1 PETR 2:21.
1. Sooq Jiisusimik ilaarsinerput Jehovamut qanimut attaveqalissutigissavarput?
INUIT nuannarisavut ilaarniartarpavut. Jiisusi Kristusi inunnit inuusimasunit tamanit maligassaalluarnerpaavoq. Sooq? Jiisusi nammineq ima oqarami: “Uannik takunnittup Ataataq takuaa.” (Joh 14:9) Jiisusi Ataatami pissusiinik ilaarsilluinnarami taamatut oqarsinnaasimavoq. Taamaattumik Jiisusi pillugu ilisimasaqaleraangatta Jehova pillugu ilisimasaqalertarpugut. Jiisusilu ilaaraangatsigu Jehovamut, qilammi nunamilu qutsinnerpaamut, qanimut attaveqalertarpugut. Tamatuma ataqqinaataangaassusia!
2, 3. (a) Sooq Jiisusip inuunera Biibilimi sukumiisumik allaaserineqarnissaa Jehovap isumagaa, Guutittalu qanoq piumaffigaatigut? (b) Allaaserisami matumani tulliuttumilu suut sammissavavut?
2 Jiisusip inuunera Biibilimi sukumiisumik allaaserineqarnissaa Jehovap isumagaa. Sooq? Guutitta ernerminik ilaarseqqissaarnissarput kissaatigigamiuk. (1 Petrusi 2:21 atuaruk). Jiisusip maligassiaa Biibilimi tuminut assersuunneqarpoq. Tamanna qanoq paasisariaqarami? Jehovap ernermi tumaanik atuaanissarput, tassa Jiisusip iliuusiinik tamanik ilaarsinissarput, kissaatigaa. Soorunami Jiisusi naammalluinnartuummat Jehovap ernerminik kukkunngisaannarluta ilaarsinissarput naatsorsuutiginngilaa. Sapinngisarpulli tamaat Jiisusimik ilaarsinissarput Guutip piumasaraa.
3 Jiisusip pissusiisa ilaat nuannersut sammeriartigit. Allaaserisami matumani taassuma makitajuitsuunera nallittuisuuneralu sammissavavut. Tulliuttumi sapiissuseqarnera naliliisinnaassuseqarneralu sammissavavut. Pissusiinut tunngatillugu apeqqutit pingasut uku akissutissarsissavavut: Tamanna qanoq paasisariaqarpa? Jiisusip pissuseq tamanna qanoq ersersippaa? Qanoq ilaarsinnaavarput?
JIISUSI MAKITAJUITSUUVOQ
4. Makitajuitsuuneq qanoq paasisariaqarpa?
4 Makitajuinneq qanoq paasisariaqarpa? Inuppassuit makitasuut makitajuinneq, imaluunniit maniguunneq, sanngiinnertut imminulluunniit tatiginnginnertut isigisarpaat. Tamannali ilumoorpa? Naamik, tassami makitajuikkumalluta nukittusariaqarlutalu sapiitsuusariaqarpugut. Makitajuinneq pingaakujunnerup paarlattoraa. Oqaaseq grækerisooq Biibilimi ‘makitajuitsumik’ nutserneqartoq aamma ‘nikanartittumik’ ‘qanilaartumillu’ nutserneqartarpoq. (ApS 20:19; Ef 4:2; Fil 2:3) Makitajuitsuujumalluta siullertut imminut pilluta eqqortumik isiginnittaaseqartariaqarpugut. Assersuutigalugu Biibilimi oqaatsinik qinerlerfissiami ima allassimavoq: “Makitajuinneq Guutimut sanilliulluta qanoq nikanartiginitsinnik ilisimanninneruvoq.” Aamma makitajuitsuugutta inunnit allanit pitsaanerusutut misigissanngilagut. (Rom 12:3) Inuit naammalluinnanngitsut pissutsimik tamatuminnga ersersitsinissartik sapernartittarpaat. Jehovalli angingaassusia eqqarsaatigeqqissaartarutsigu Jiisusillu maligassiaa ilaartarutsigu makitajuinnissarput ilinniarsinnaavarput.
Makitajuitsuugutta inunnit allanit pitsaanerusutut misigissanngilagut
5, 6. (a) Inngiliuneq Mikaeli kinaava? (b) Mikaeli makitajuinnermik qanoq ersersitsiva?
5 Jiisusi qanoq makitajuinnermik ersersitsiva? Guutip ernera qilammi inngilitut pissaanilittut nunarsuarmilu inuttut naammalluinnartutut makitajuitsuujuarsimavoq. Jiisusip makitajuinneranut uppernarsaatit ilaat sammeriartigit.
6 Isiginnittaasia. Jiisusip nunarsuarmukannginnermini qilammiinnera Biibilimik allaqataasup Judasip allaatigaa. (Judasi 9 atuaruk). Jiisusip inngiliunertut Mikaelitut “Mosesip timaa toqungasoq pillugu Diaavulu [saqitsaappaa]”. Mosesi toqummat timaa inunnit nassaarineqarsinnaajunnaarlugu Jehovap ilivaa. (5 Mos 34:5, 6) Immaqa Diaavulup Israelikkut Mosesip timaa eqqunngitsumik pallorfiginninnermi atoqqullugu usserusukkaluarpai. Diaavululli pilersaarutipilui apeqqutaatinnagit Mikaelip sapiilluni unitsippaa. Qinerlerfissiat ilaanni allassimavoq oqaaseq ‘saqitsaappaa’ aamma ‘inatsisitigut akerleriissuteqarnermik’ allaatiginninnissamut atorneqartarmat imaassinnaasoq ‘Diaavulup Mosesip timaanik tigusisinnaatitaanera Mikaelip akerlileraa’. Taamaakkaluartorli inngiliunerup oqartussaassutsimi killeqarnera ilisimavaa. Taamaattumik suliaq Jehovamut, Eqqartuussisumut qutsinnerpaamut Saatanimik eqqartuussisinnaatitaasutuamut, ingerlateqqippaa. Jiisusi makitajuingaarami, ilaa?
Jiisusi, “toqumut allaat”, makitajuilluni Jehovap peqqusineratut iliortuaannarpoq
7. Jiisusi oqaatsimigut iliuutsimigullu qanoq makitajuinnermik ersersitsiva?
7 Aamma Jiisusi nunarsuarmiikkallarami oqaatsimigut iliuutsimigullu makitajuinnermik ersersitsisarpoq. Oqaloriaasia. Jiisusi pisariaqanngitsumik allanit maluginiarneqarusunngisaannarpoq. Paarlattuanik Ataatani tamatigut ataqqinarsisikkusuttarpaa. (Mark 10:17, 18; Joh 7:16) Jiisusip ajoqersukkani sianiitsutut misigilissutigisaannik ajukkutilissutigisaannilluunniit oqaluutinngisaannarpai. Kisianni pissusii nuannersut pillugit nersualaartarnerisigut ataqqinninnermik tatiginninnermillu ersersitsivigisarpai. (Luk 22:31, 32; Joh 1:47) Iliuusai. Jiisusi pigisarpassuaqarnani pilimanianngitsumik inuuniarluni aalajangerpoq. (Matt 8:20) Allat suliarerusunngisaannik maniguulluni suliaqarusuttarpoq. (Joh 13:3-15) Naalannermigut aamma makitajuinnermik maligassiuilluarpoq. (Fil 2:5-8) Makitasuut allanut naalannissaminnik nuannarinninngilluinnartut assiginagit Jiisusi, “toqumut allaat”, makitajuilluni Jehovap peqqusineratut iliortuaannarpoq. Jiisusip, Inuup Ernera, ‘uummatikkut makitajuinnera’ ersarippoq. — Matt 11:29.
JIISUSITUT MAKITAJUITSUUGIT
8, 9. Makitajuinnermik qanoq ersersitsisinnaavugut?
8 Qanoq Jiisusitut makitajuitsuusinnaavugut? Isiginnittaatsitsigut. Makitajuikkutta oqartussaassutsitta killeqarnera ilisimassavarput. Taamaattumik inunnik allanik eqqartuussisinnaatitaannginnerput ilisimavarput. Isornartorsiornagillu pissutiginiagaat apeqqusertassanngilavut. (Luk 6:37; Jaak 4:12) Makitajuinneq ‘iluarniarpallaannginnissamut’ iluaqutigisarparput. Tassa uagutsitut piginnaaneqanngitsunit immikkullu pisinnaatitaaffeqanngitsunit pitsaanerusutut misigisassanngilagut. (Oqal 7:16) Utoqqaanertat makitajuitsut qatanngutiminnit pitsaanerusutut misigineq ajorput. Paarlattuanik savanik paarsisut taakkua ‘allat imminerminnit annerutittarpaat’, tassa pingaarnerutittarpaat. — Fil 2:3; Luk 9:48.
9 Qatanngut W. J. Thorn, 1894-ip aallartinnerani nakkutilliisutut angalasartutut kiffartortoq, eqqarsaatigeriaruk. Ukiorpassuit nakkutilliisooreerluni naalagaaffiup New Yorkip avannaatungaani Kingdom Farmimi kukkukuujuteqarfimmi sulisunngortinneqarpoq. Pingaaruteqarnerusumik suliaqartariaqartutut misigileraangami tamatigut imminut ima oqarfigisarpoq: “Pujoralaannartut ittutit. Suna pillugu makitaniassavit?” (Esaja 40:12-15 atuakkit). Ila makitajuissusia!
10. Oqaloriaatsitsigut iliuutsitsigullu qanoq makitajuinnermik ersersitsisinnaavugut?
10 Oqaloriaatsitsigut. Ilumoorluta makitajuinnerput allanut oqaloriaatsitsigut ersertarpoq. (Luk 6:45) Oqaloqateqaraangatta immikkut pisinnaatitaaffivut iliuuserisimasavullu pingaarnerutittassanngilavut. (Uss 27:2) Paarlattuanik qatanngutivut iliuuserisimasaat ajunngitsut pillugit nersualaassallugillu pissusii piginnaanerilu nuannersut pingaarnerutittassavavut. (Uss 15:23) Iliuuserisartakkatsigut. Kristumiut makitajuitsut silarsuarmi matumani tusaamasaalernissartik pingaaruteqalernissartillu sulissutigineq ajorpaat. Paarlattuanik pilimanianngitsumik inuuniarlutik aalajangertarput allaallu sapinngisartik tamaat Jehovamut kiffartorsinnaaniassagamik nikagineqartumik suliffeqarusuttarlutik. (1 Tim 6:6, 8) Pingaarnertut naalannitsigut makitajuinnerput ersersissinnaavarput. Ilagiinni ‘siulersuisut naalassinnaajumallugit’ Jehovallu peqatigiissortaani malittarisassat maleruarsinnaajumallugit makitajuitsuusariaqarpugut. — Hebr 13:17.
JIISUSI NALLITTUISUUVOQ
11. Nallittuineq qanoq paasisariaqarpa?
11 Nallittuineq qanoq paasisariaqarpa? Inuk nallittuisoq inussiarnersuullunilu allanik soqutiginnittuuvoq. Nallittuineq asanninnermik ersersitsinerullunilu misigissutsinut, soorlu misiginneqatiginninnermut isumassuinermullu, assinguvoq. Biibilimi ‘nallittuingaarneq’, ‘nallittuineq’ aamma ‘asanningaarneq’ innersuussutigineqarput. (Luk 1:78; 2 Kor 1:3; Fil 1:8) Biibili pillugu qinerlerfissiat ilaanni allassimavoq nallittuineq allanik ikiortariaqartunik misiginneqatiginninnerinnaanani allat inuunerannik pitsannguisumik iliuuseqarnikkut “soqutiginninnerusoq akuliukkusulersitsisarlunilu ikiuerusulersitsisartoq”. Nallittuineq pissusiuvoq inummik allamik ikiuerusulersitsisartoq.
12. Jiisusip allanik misiginneqatiginninnera sumit erserpa, misiginneqatiginninninilu sunissaminut kajumississutigaa?
12 Jiisusi qanoq nallittuinermik ersersitsisarpa? Misiginneqatiginninnermigut iliuutsimigullu. Jiisusi allanik misiginneqatiginnittarpoq. Jiisusip ikinngutini Mariap allallu Lazarusip toqunera qissatigigaat takugamiuk qiaqatigilerpai. (Johannesi 11:32-35 atuakkit). Misiginneqatiginninnini Lazarusimik makititsinissaminut kajumississutigaa, misigissuserlu tamannarpiaq aamma pissutigalugu uillarnerup ernera makitissimavaa. (Luk 7:11-15; Joh 11:38-44) Taamatut misiginneqatiginnilluni iliuuseqarnera Lazarusip qilaliarnissamik neriuuteqalernissaminut periarfissaqalissutigisinnaavaa. Jiisusip siusinnerusukkut inuppassuit imminik malinnittut ‘nalligingaalerpai’. Misiginneqatigigamigit ‘amerlasuunik ajoqersulerpai’. (Mark 6:34) Ajoqersugaasa taamatut ilinniartitsinera inuunerminnik allannguissutigaat. Jiisusip misiginneqatiginninnera misigissusiinnaanngilaq. Misiginneqatiginninnini inunnik ikiuerusulissutigaa. — Matt 15:32-38; 20:29-34; Mark 1:40-42.
13. Jiisusi qanoq misiginneqatiginnilluni allanut oqaluttarpa? (Allaaserisap aallaqqaataani assiliaq takuuk).
13 Misiginneqatiginnilluni oqaluttarnermigut. Jiisusip nallittuinini allanut, ingammik naqisimaneqartunut, misiginneqatiginnilluni oqaluttarnissaminut kajumississutigaa. Esajap Jiisusi pillugu oqaasii apustilip Matthæusip issuarpai. Esaja ima allappoq: “Sullortooq naffalik napivissanngilaa iperarlu pujoortoq qamivissanagu.” (Es 42:3; Matt 12:20) Tamanna qanoq paasisariaqarpa? Jiisusip inuit soqqusaaffigisarnagillu ajortumik pineq ajorpai. Paarlattuanik nukissaqalissutigisaannik oqaluuttarpai. Tusarliussaq ‘aserorsimasumik uummatilinnik’ neriuuteqalersitsisoq oqaluussissutigaa. (Es 61:1) Inuit ‘suleruluttut nanertugaasullu’ nukissaqalerniassammata aggeqquai. (Matt 11:28-30) Ajoqersukkani Guutip pallorfiginnitsiminik, aamma ‘minninnguanik’, tassa silarsuarmi matumani pingaaruteqanngitsutut isigineqartunik, soqutiginningaarneranik uppernarsaavigai. — Matt 18:12-14; Luk 12:6, 7.
JIISUSITUT NALLITTUIGIT
14. Allanik misiginneqatiginninnerput qanoq ersersissinnaavarput?
14 Qanoq Jiisusitut nallittuisinnaavugut? Misiginneqatiginninnitsigut. Biibilimi kajumissaarneqarpugut ‘nallittuingaarnermik’, allaat tamanna uagutsinnut pissusissamisuunngikkaluarpat, ersersitsisassasugut. Misigissutsit taakku Jehovap kristumiunut tamanut ‘inuttut pissusermik nutaamik ateqqusaanut’ ilaapput. (Kolossemiut 3:9, 10, 12 atuakkit). Misiginneqatiginninnerit qanoq ersersissinnaaviuk? Biibilimi ima allassimavoq: “Ammarniaritsi.” (2 Kor 6:11-13) Allap misigissutsini ernumassutigisanilu pillugit oqaluttuukkaangatit tusarnaaqqissaartarit. (Jaak 1:19) Takorluuisinnaanerit atortaruk imminullu ima aperisarlutit: ‘Uanga taamatut atugaqartuuguma qanoq misigissagaluarpunga? Sunik pisariaqartitsissagaluarpunga?’ — 1 Petr 3:8.
15. Aliasuttunik naalliuuteqartunillu ikiuiniarluta susinnaavugut?
15 Misiginneqatiginnilluta iliuuseqarnitsigut. Nallittuineq allanik, ingammik aliasuttunik naalliuuteqartunillu, ikiuinissatsinnut kajumississutigissavarput. Qanoq ikiorsinnaavavut? Romamiunut allakkat 12:15-imi ima allassimavoq: ‘Qiasut qiaqatigisigit.’ Amerlanertigut inuit aaqqiissutit pinnagit tuppallersarneqarnissartik pisariaqartittarpaat. Ikinngut soqutiginnittoq tusarnaartartorlu pisariaqartittarpaat. Qatanngut arnaq panimmi toqunerata kingorna qatanngutinit tuppallersarneqartoq ima oqarpoq: “Ikinngutima pulaartillutik qiaqatigigaangannga qujamasuutigisarpara.” Allanik ikiuinikkut nallittuineq aamma ersersittarparput. Imaassinnaavoq uillarneq angerlarsimaffimmi iluarsartuutassanut tunngatillugu ikiortariaqartoq, imaluunniit kristumiu utoqqaq ataatsimiigiaanneqarnissaminik, oqaluusseqateqarnissaminik nakorsiaanneqarnissaminilluunniit pisariaqartitsisoq. Allaat annikitsutigut inussiarnisaarneq allap inuuneranut sunniuteqangaarsinnaavoq. (1 Joh 3:17, 18) Pingaarnertut sapinngisatsinnik nutaarsiassamik nuannersumik oqaluusseqataanikkut allanut nallittuinermik ersersitsisarpugut. Tamanna inunnik eqqortuliorusuttunik ikiuinerit pitsaanerpaartaraat.
16. Nikallungasut qiimmassarniarlugit qanoq oqarfigisinnaavavut?
16 Misiginneqatiginnilluta oqaaseqartarnitsigut. Misiginneqatiginninnerput ‘ernumasunik tuppallersaanissatsinnut’ kajumississutigissavarput. (1 Th 5:14) Taakku qanoq qiimmassarsinnaavavut? Soqutigingaarlugit oqarfigisinnaavavut. Nersualaarsinnaavavut aamma nuannersunik pissuseqarnerminnik pisinnaasaqarnerminnillu paasinninnissaannut ikiorlugit. Eqqaasissinnaavavut Jehovap sallusuissummik paasinninnissaannut ikiormagit taassumunnga erlinnartuusimassasut. (Joh 6:44) Qularunnaarsissinnaavavut Jehovap kiffaminik ‘sequmissimasunik uummatilinnik’ imaluunniit ‘aserorsimasumik anersaalinnik’ soqutiginningaarneranik. (Tuss 34:19) Misiginneqatiginnilluta oqaaseqarnerput tuppallersarneqarnissamik pisariaqartitsisut nukissaqalissutigisinnaavaat. — Uss 16:24.
17, 18. (a) Utoqqaanertat savanik qanoq pinnittarnissaat Jehovap piumasaraa? (b) Allaaserisami tulliuttumi suut sammissavavut?
17 Utoqqaanertaasusi, Jehovap savaatini qajassuartumik pisassagisi piumasaraa. (ApS 20:28, 29) Eqqaamassavarsi savaataanik ilinniartitsinissaq, qiimmassaanissaq nukissaqalersitsinissarlu akisussaaffigigassigit. (Es 32:1, 2; 1 Petr 5:2-4) Taamaattumik utoqqaanertaq nallittuisoq qatanngutiminik naalakkersuiniarneq ajorpoq, tassa malittarisassiorneq ajorlunilu qatanngutit artugaannik iliuuseqartinniarlugit ilerasuuteqalersinniarneq ajorpai. Paarlattuanik utoqqaanertap qatanngutimi qamannga pisumik nuannaarnissaat kissaatigisarpaa, aamma qularutigineq ajorpaa Jehovamik asanninnertik pitsaanerpaamik Guutimut tunissuteqarnissaminnut kajumississutigisaraat. — Matt 22:37.
18 Jiisusip makitajuitsuunera nallittuisuuneralu eqqarsaatigeqqissaartarutsigit taanna ilaarusulissavarput. Allaaserisami tulliuttumi Jiisusip sapiissuseqarnera naliliisinnaassuseqarneralu qanoq ilaarsinnaanerlugit sammissavavut.